Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Nov 18, 2017 |
  • 6 years ago |
  • 3.4K views

បទពិសោធន៍នៃការព្យាបាលដោយឱសថ Meglumine sodium succinate លើអ្នកជំងឺមហារីក

ការព្យាបាលជំងឺមហារីកភាគច្រើនតែងតែមានជាមួយនឹងបញ្ហាគ្លីនិក (clinical problem) ដែលបញ្ហានេះកើតមានជាញឹកញាប់ បណ្តាលមកពីភាពយឺតយ៉ាវក្នុងការកំណត់រោគវិនិច្ឆ័យ (លើសពី៧០%នៃអ្នកជំងឺមហារីកស្ថិតក្នុងដំណាក់កាលទី៣និង៤ រួមជាមួយនិងផលវិបាកដូចជា tumour intoxication syndrome) និងផលរំខានធ្ងន់ធ្ងរដែលបណ្តាលមកពីការព្យាបាលជាពិសេសលើអ្នកជំងឺ malignant pleural និងperitoneal effusions ជាដើម។ ដើម្បីព្យាបាលគាំពារលើករណីទាំងនេះ ឱសថ Megluminesodium succinate គឺត្រូវបានប្រើប្រាស់ ។ •Meglumine sodium succinate (solution for infusion 1.5%) គឺជាសូលុយស្យុងសម្រាប់ចាក់បញ្ចូលតាមសរសៃឈាមដែលមានតុល្យភាពមួយ ផ្សំឡើងដោយ succinic acid និងអេឡិចត្រូលីតជាច្រើន មានប្រសិទ្ធភាពក្នុងការបន្សាបជាតិពុល ប្រឆាំងទៅនឹងការរលាក អុកស៊ីតកម្ម និងកង្វះអុកស៊ីហ្សែនក្នុងឈាម។ •Meglumine sodiumsuccinate solution ផ្តល់ផលវិជ្ជមានលើដំណើរការអុកស៊ីហ្សែនក្នុងកោសិកា កាត់បន្ថយការកកើតរ៉ាឌីកាល់សេរីនិងស្តារឡើងវិញនូវសក្តានុពលថាមពលនៃកោសិកា ដោយជំរុញសកម្មភាពដំណើរការអង់ស៊ីមរបស់ Krebs cycle(aerobic intracellular processes) ។ឱសថនេះជួយកោសិកាក្នុងការប្រើប្រាស់អាស៊ីតខ្លាញ់និងស្ករ តាមរយៈធ្វើឲ្យប្រសើរឡើងនូវតុល្យភាពអាស៊ីត បាស និងកម្រិតអុកស៊ីហ្សែនក្នុងឈាម។ •Meglumine sodium succinate solution កាត់បន្ថយកម្រិតនៃ medium-sized molecules និង malonic dialdehyde លើសពីកម្រិតធម្មតា ដែលជួយបំបាត់ endogenous "metabolic" intoxication syndrome ធ្វើឲ្យធម្មតាមកវិញនូវកម្រិតប្រព័ន្ធការពាររាងកាយក្នុងចរន្តឈាម និងប្រភាគនៃសមាសធាតុផ្សំរបស់ប្រព័ន្ធការពាររាងកាយទាំងនោះ។ ដូច្នេះឱសថ Meglumine sodium succinate solution ធ្វើឲ្យប្រសើរឡើងនូវប្រសិទ្ធភាពក្នុងការព្យាបាលជំងឺទាំងឡាយដែលកើតលើអ្នកជំងឺមហារីក តួយ៉ាងដូចជាការបង្ករោគដោយបាក់តេរីឱកាសនិយមជាដើម។ •Meglumine sodium succinate solution អាចមានអត្ថប្រយោជន៍ចំពោះអ្នកជំងឺមហារីក ដោយវាជាឱសថកែសម្រួលលើការឆ្លើយតបជីវសាស្ត្រដើម្បីបង្កើន natural killer's cytotoxic activity ។ •Meglumine sodium succinate solution មានប្រសិទ្ធភាពបញ្ចុះទឹកនោមកម្រិតស្រាល។ ក្នុងអំឡុងពេលនៃការបញ្ចូល Meglumine sodium succinate solution តាមសរសៃឈាមវ៉ែន ឱសថនេះត្រូវបានប្រើប្រាស់យ៉ាងលឿននិងគ្មានការប្រមូលផ្តុំនៅក្នុងខ្លួនអ្នកជំងឺឡើយ។ •Meglumine sodium succinate solution ត្រូវបានប្រើលើមនុស្សធំ និងកុមារដែលមានអាយុលើសពី១ឆ្នាំ។ ជាឱសថបន្សាបជាតិពុលនិងប្រឆាំងទៅនឹងកង្វះអុកស៊ីហ្សែក្នុងឈាមលើអ្នកជំងឺពុលស្រួចស្រាវដែលមានប្រភពមកពីខាងក្នុងនិងខាងក្រៅរាងកាយរបស់អ្នកជំងឺដោយមូលហេតុផ្សេងៗគ្នា។ •Meglumine sodium succinate solution ត្រូវបានប្រើក្នុងការព្យាបាលជំងឺផ្សេងៗទៀតដែរដូចជា៖ កង្វះអុកស៊ីហ្សែនបណ្តាលមកពីមូលហេតុផ្សេងៗរួមមាន ខ្សោយពហុសរីរាង្គ (polyorganic insufficiency) ស្ទះថង់ទឹកប្រមាត់ (cholestasis) រលាកថ្លើមបង្កដោយវីរុស និងជាតិពុល (toxic and viral hepatitis) និង shock ដែលបណ្តាលមកពីកត្តាផ្សេងៗ។ •ការប្រើប្រាស់ឱសថ Meglumine sodium succinate solution លើជំងឺមហារីកគួរតែត្រូវបានកំណត់ដោយប្រសិទ្ធភាពរបស់ឱសថនេះទៅលើកត្តាពាក់ព័ន្ធទាំងឡាយ ដែលជាមូលហេតុបង្កឲ្យមានផលវិបាកដោយដុំសាច់មហារីក (malignant tumours) ដូចជាការពុល ប្រព័ន្ធការពាររាងកាយចុះខ្សោយ និងកង្វះអុកស៊ីហ្សែនក្នុងឈាម។ កត្តាទាំងនេះនាំឲ្យអ្នកជំងឺមានស្ថានភាពដុនដាប និងធ្ងន់ធ្ងរ រួមជាមួយវិបត្តិមេតាបូលីស និងការផ្លាស់ប្តូរថាមពលនៅក្នុងកោសិកានៃរាងកាយ។ •Meglumine sodium succinate solution គឺជាឱសថបន្សាបជាតិពុល ប្រើលើអ្នកជំងឺមហារីកដែលមានការពុលធ្ងន់ធ្ងរនៅអំឡុងពេលមានជំងឺខាន់លឿងដោយសារស្ទះបំពង់ទឹកប្រមាត់ (mechanical (obstructive) jaundice)ដុំសាច់មហារីកនៅតំបន់បំពង់បង្ហូរទឹកប្រមាត់ (malignant tumors of the hepatobiliary tract) រលាកស្រោមពោះ (peritonitis) រលាកថ្លើមស្រួចស្រាវ និងរ៉ាំរ៉ៃដោយវីរុស(acute and chronic viral hepatitis)ក៏ដូចជាដំណើររាលដាលទៅកន្លែងផ្សេងនៃដុំសាច់មហារីក (metastatic processes) និងអំឡុងពេលពុលបណ្តាលមកពីការព្យាបាលដោយវិទ្យុសាស្ត្រ និងគីមីសាស្ត្រ។ •Meglumine sodium succinate solution គឺជាឱសថប្រឆាំងទៅនឹងកង្វះអុកស៊ីហ្សែនក្នុងឈាម ត្រូវបានប្រើលើអ្នកជំងឺមហារីកដែលកង្វះអុកស៊ីហ្សែនក្នុងសាច់ដុំបេះដូង (myocardial hypoxia) រីងរៃ (cachexia) សម្រាប់រៀបចំអ្នកជំងឺមុនធ្វើការវះកាត់ និងព្យាបាលថែទាំក្រោយវះកាត់។ សម្ភារៈ និងវិធីសាស្ត្រ នៅមន្ទីរពេទ្យសាកលវិទ្យាល័យអន្តរជាតិសែនសុខ ការប្រើ Meglumine sodium succinate solution ចាក់តាមសសៃឈាមវ៉ែនក្នុងកម្រិត សម្រាប់មនុស្សធំគឺ ១០ម.ល/គ.ក ក្នុង១ថ្ងៃ(៤០០ម.ល១-២ដង ក្នុង១ថ្ងៃ កម្រិតប្រើអតិបរិមាគឺ ៨០០ម.ល ក្នុង១ថ្ងៃ) ជាមួយអត្រា៣.០-៤.៥ម.ល ក្នុង១នាទី ។ សម្រាប់កុមារកម្រិត Meglumine sodium succinate solution គឺ៦-១០ម.ល/គ.ក ក្នុង១ថ្ងៃ (កម្រិតប្រើអតិបរមា គឺ ៤០០ម.ល ក្នុង១ថ្ងៃ) ជាមួយអត្រា ៣.០-៤.០ម.ល ក្នុង១នាទី។ អស់រយៈពេលជាង ៧ឆ្នាំ(២០១០-២០១៧) អ្នកជំងឺ៤៣១នាក់បានទទួលការព្យាបាលជំងឺមហារីកនៅមន្ទីរពេទ្យសាកលវិទ្យាល័យអន្តរជាតិសែនសុខ។ អ្នកជំងឺ ៧៤នាក់ (១៧.៤%) ក្នុងចំណោមពួកគេខាងលើបានព្យាបាលជាមួយឱសថ Meglumine sodium succinate solution ដោយអ្នកជំងឺមហារីកទាំងនោះបានទទួលការព្យាបាលមូលហេតុបង្ក និងព្យាបាលគាំពារផងដែរ។ ប្រភេទជំងឺមហារីកដែលជួបប្រទះញឹកញាប់ជាងគេគឺ មហារីកកោសិកាថ្លើម (hepatocellular carcinoma) (អ្នកជំងឺ២១នាក់, ២៨.៤%) និងមហារីកពោះវៀនធំ (colorectal cancer) (អ្នកជំងឺ១៤នាក់, ១៨.៩%)។ ប្រភេទជំងឺមហារីកផ្សេងទៀតមានដូចជា មហារីកច្រមុបំពង់ក(nasopharyngeal carcinoma) មហារីកដោះ (breast cancer) មហារីកលំពែង រួមជាមួយជំងឺខាន់លឿងដោយសារការស្ទះបំពង់ទឹកប្រមាត់ (pancreatic cancer with mechanical jaundice) មហារីកឈាម (non-Hodgkin'slymphoma)មហារីកមាត់ស្បូន (cervical cancer) មហារីកសួត (lung cancer) មហារីកក្រពះ (gastric cancer) ។ល។ អ្នកជំងឺទាំងអស់នោះបានទទួលការព្យាបាលជាមួយ Meglumine sodium succinate solution ក្រៅពីការព្យាបាលជាក់លាក់។ ជំងឺដែលព្យាបាលជាមួយឱសថ Meglumine sodium succinate solution ១.  ការពុល និងដើម្បីធ្វើឲ្យប្រសើរនូវដំណើរការមេតាបូលីសលើអ្នកជំងឺមហារីកដំណាក់កាលចុងក្រោយ (អ្នកជំងឺ៥០នាក់, ៦៧.៦%)។ អ្នកជំងឺ៤៩នាក់ក្នុងចំណោម ៥០នាក់ទទួលបានថាមពលជាវិជ្ជមានក្រោយពេលចាប់ផ្តើមព្យាបាលជាមួយឱសថ Meglumine sodium succinate solution(រោគសញ្ញានៃការពុលត្រូវបានកាត់បន្ថយក្នុងរយៈពេល ២ទៅ៣ថ្ងៃ)។ ២.  ការពុលក្រោយពេលព្យាបាលដោយគីមីសាស្ត្រ (អ្នកជំងឺ១៤នាក់, ១៨.៩%) រួមទាំងការពុលសរីរាង្គថ្លើម។ អ្នកជំងឺទាំងអស់នោះទទួលបានថាមពលជាវិជ្ជមានក្រោយពេព្យាបាលជាមួយឱសថ Meglumine sodium succinate solution (ក្អួត និងចង្អោរត្រូវបានបាត់និងកាត់បន្ថយ កាត់បន្ថយភាខ្សោយ និងបង្កើនការឃ្លានអាហារនៅថ្ងៃបន្ទាប់ក្រោយពេលព្យាបាល បន្ថយកម្រិតនៃ ALAT និងASAT)។ ៣.  ការព្យាបាលប្រឆាំងទៅនឹងកង្វះអុកសីុហ្សែនក្នុងឈាម និងបន្សាបជាតិពុលក្រោយវះកាត់ លើអ្នកជំងឺរលាកស្រោមពោះធ្ងន់ធ្ងរដែលបណ្តាលមកពីការធ្លាយពោះវៀនធំនៃអ្នកជំងឺមហារីកពោះវៀនធំ - អ្នកជំងឺ ២នាក់ (២.៧%)។ រោគសញ្ញានៃការពុលលើអ្នកជំងឺទាំង ២ខាងលើត្រូវបានកាត់បន្ថយក្នុងរយៈពេល៣ថ្ងៃក្រោយវះកាត់ហើយអ្នកជំងឺក៏មិនមានរោគសញ្ញានៃការបាត់បង់ចលនារបស់ពោះវៀនធ្ងន់ធ្ងរក្រោយពីវះកាត់ដែរ។ ៤.    ការព្យាបាលគាំពារក្នុងអំឡុងពេលព្យាបាលជំងឺច្រើនមុខ (ពុលនិងរលាកថ្លើមដែលបង្កដោយសារធាតុពុល(poisoning and toxic hepatitis) ការពុលចំណីអាហារ (food-born intoxic-ations)រលាកពោះវៀនស្រួចស្រាវ (acute intestinali-nfections) រលាកសួតស្រួចស្រាវ (acute pneumonia) ចំពោះអ្នកជំងឺ៨នាក់ (១០.៨%)។ អ្នកជំងឺ ៦នាក់ក្នុងចំណោម ៨នាក់មានភាពប្រសើរឡើងនៅថ្ងៃបន្ទាប់ក្រោយពេលចាប់ផ្តើមព្យាបាល (បានកាត់បន្ថយរោគសញ្ញានៃការពុល)អ្នកជំងឺម្នាក់ដែលរលាកសួតទាំងសងខាងស្រួចស្រាវធ្ងន់ធ្ងរមានភាពប្រសើរឡើងក្នុងរយៈពេល១០ថ្ងៃបន្ទាប់ពីចាប់ផ្តើមការព្យាបាលដោយយកចិត្តទុកដាក់ស្ថានភាពអ្នកជំងឺម្នាក់ដែលពុលជាមួយឱសថប៉ារ៉ាសេតាម៉ុលធ្ងន់ធ្ងរមានភាពប្រសើរឡើងក្នុងរយៈពេល១៤ថ្ងៃប៉ុណ្ណោះ (បង្កើនការឃ្លានអាហារ មានកម្លាំង កម្រិតអង់ស៊ីម aminotransferrase ត្រូវបានកាត់បន្ថយ)។ រយៈពេលព្យាបាលជាមួយឱសថ  Meglumine sodium succinate solution គឺ ១-១០ថ្ងៃ។ ផលរំខាននៃ Meglumine sodium succinate solution មាន៣ករណីផងដែរដូចជា បេះដូងដើរញាប់ ១ករណី (បាត់ទៅវិញដោយខ្លួនឯងក្រោយពេលបន្ថយល្បឿនបង្ហូរ) គ្រុនក្តៅកម្រិតទាប (៣៧.២អង្សាសេ) ១ករណី (បាត់ទៅវិញដោយគ្មានការព្យាបាល) គ្រុនក្តៅកម្រិតខ្ពស់ (៣៩.០ អង្សាសេ)១ករណី (បាត់ទៅវិញក្រោយពេលបញ្ឈប់ជាបន្ទាន់ និងការប្រើឱសថប៉ារ៉ាសេតាម៉ុលចាក់ ១០០០ម.ក្រ)។ ចំពោះអ្នកជំងឺចុងក្រោយមិនត្រូវបានប្រើប្រាស់ Meglumine sodium succinate solution ទៀតនោះទេ។ ការព្យាបាលគាំពារជាមួយ Meglumine sodium succinate solution មានអត្ថប្រយោជន៍ចំពោះអ្នកជំងឺមហារីក ដែលមានរោគសញ្ញានៃការពុលដោយដុំសាច់មហារីក (tumour intoxicationsyndrome) រួមបញ្ចូលទាំងប្រភេទជំងឺមហារីកដែលអាចជាសះស្បើយ និងមិនជាសះស្បើយ និងផលរំខានដោយការព្យាបាលជាមួយគីមីសាស្ត្រ ដើម្បីបន្សាបជាតិពុលរួមទាំងការព្យាបាលប្រឆាំងទៅនឹងកង្វះអុកស៊ីហ្សែនក្នុងឈាម។ បកស្រាយដោយ ៖ លោកស្រីវេជ្ជបណ្ឌិត Turobova Tatianaវេជ្ជបណ្ឌិតឯកទេសជំងឺមហារីកចំពោះកូនក្មេង និងមហារីកទូទៅ ដែលសព្វថ្ងៃជាប្រធានផ្នែកមហារីកនៅមន្ទីរពេទ្យសាកលវិទ្យាល័យអន្តរជាតិសែនសុខ ©2017 រក្សាសិទ្ធិគ្រប់យ៉ាងដោយHealthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេង ឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Nov 18, 2017 |
  • 6 years ago |
  • 3.2K views

ការវិភាគលើសម្បកពាន់តាឡីរបស់ក្រុមសាស្ត្រាចារ្យ និងនិស្សិតUP

«ពាន់តាឡី» ឬ ឈ្មោះវិទ្យាសាស្ត្រ “Lophopetalum wallichii Kurz” គឺជាពូជរុក្ខជាតិដែលស្ថិតនៅក្នុងគ្រួសារCelastraceaeដែលនិយមយកមកប្រើប្រាស់ជាឱសថព្យាបាលជំងឺមួយចំនួនដូចជា ជំងឺលាប់ ជំងឺងាប់សរសៃប្រសាទ ជំងឺទាស់ជំងឺថ្នក់ឈាមបំពង់កាម និង អាការៈឈឺចាប់​សាច់ដុំ។ ការស្រាវជ្រាវនេះត្រូវបានធ្វើឡើងក្នុងគោលបំណង ដើម្បីធ្វើតេស្តរកឲ្យឃើញនូវសមាសធាតុឱសថ និងកំណត់ឲ្យឃើញនូវចំនួនឱសថដែលមាននៅក្នុងសម្បកពាន់តាឡី។ សម្បកស្ងួតនៃរុក្ខជាតិពាន់តាឡីត្រូវបានយកមកពីហាងលក់ឱសថបុរាណក្នុងស្រុក ហើយត្រូវបានផ្ទៀងផ្ទាត់ជាមួយនឹងសំណាករុក្ខជាតិ (កូដៈ UPFPT-​110066) ដែលតំកល់ទុកនៅក្នុង “មន្ទីរសំណាករុក្ខជាតិសាកលវិទ្យាល័យពុទ្ធិសាស្ត្រ” (UP-Herbarium)។ សម្បកពាន់តាឡី ត្រូវបានយកមកធ្វើការចម្រាញ់ដោយអង្គធាតុរំលាយអេតាណុល តាមរយៈវិធីសាស្ត្រចម្រាញ់ “Ultrasonication-Assisted Extraction (UAE)”។ រូបធាតុចម្រាញ់ដែលទទួលបាន ត្រូវបានត្រៀមទុកសម្រាប់ធ្វើតេស្តគីមីឱសថរុក្ខជាតិ និងធ្វើក្រូម៉ាតូក្រាបភីស្រទាប់ស្តើង។ លទ្ធផលនៃការធ្វើតេស្តគីមីឱសថរុក្ខជាតិលើសម្បកពាន់តាឡី កំណត់ឃើញថា «សម្បកពាន់តាឡីមានសមាសធាតុឱសថ Alkaloids, Phenolic Compounds, Tannins, Flavonoids, Cardiac Glycosides, Terpenoids, Resins និង Saponins។ ចំណែកឯការវិភាគលើក្រូម៉ាតូក្រាបភីស្រទាប់ស្តើងនៃសម្បកពាន់តាឡីនៅជំហានរលកចន្លោះពី 254-366 nm និង 10%-H2SO4 នៅក្នុង “Mobile Phase” Chloroform:Ethanol (1:1) យើងបានញែកឱសថសរុបទាំងអស់ចំនួន 8 អង្គធាតុឱសថ»។ ព័ត៌មាននៃសមាសធាតុឱសថដែលមាននៅក្នុងសំបកពាន់តាឡីនេះបញ្ជាក់អំពីគុណសម្បត្តិឱសថដែលមាននៅក្នុងពាន់តាឡីរបស់កម្ពុជា។ មិនតែប៉ុណ្ណោះ វាគឺជាព័ត៌មានគ្រឹះសម្រាប់អ្នកវិទ្យាសាស្ត្រជំនាន់ក្រោយ ប្រសិនបើមានបំណងចង់បន្តការស្រាវជ្រាវពាក់ព័ន្ធនឹងការបំបែកសមាសធាតុឱសថចេញពីរុក្ខជាតិពាន់តាឡីរបស់កម្ពុជា។ អត្ថបទស្រាវជ្រាវដោយ ៖ ក្រុមស្រាវជ្រាវជានិស្សិត និងសាស្ត្រាចារ្យនៃដេប៉ាតឺម៉ង់ឱសថសាស្ត្រមហាវិទ្យាល័យវិទ្យាសាស្ត្រសុខាភិបាល នៃសាកលវិទ្យាល័យពុទ្ធិសាស្ត្រ វ៉ា សិរីនិច, អោម ពេជ្រមុនី, ភុយ ម៉ីលី, លាន ស្រីនិច, វន សៀកលីម, កែវ សំអែល និង ជា ស៊ីន ©2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Nov 17, 2017 |
  • 6 years ago |
  • 3.5K views

[ខ្លឹមៗ] ញ៉ាំថ្នាំយ៉ាងណាឲ្យបានត្រឹមត្រូវ ហើយឆាប់ជាពីជំងឺ?

ប្រាកដណាស់ អ្នកក៏អាចជួយខ្លួនឯងបានផងដែរ ស្របពេលដែលវេជ្ជបណ្ឌិត ឬឱសថការីរបស់អ្នកព្យាយាមកាត់បន្ថយកត្តាដែលនាំឲ្យមានការប្រើប្រាស់ថ្នាំមិនបានត្រឹមត្រូវតាមរយៈការណែនាំផ្សេងៗ។ ដូចនេះ អ្នកត្រូវស្តាប់តាមការណែនាំរបស់វេជ្ជបណ្ឌិត ឬឱសថការីពេលទទួលឱសថមកព្យាបាលតាមរយៈការសាកសួរឲ្យបានច្បាស់លាស់អំពីគោលបំណងនៃការប្រើប្រាស់ របៀបប្រើប្រាស់ កម្រិតប្រើប្រាស់ និងរយៈពេលប្រើប្រាស់ឱសថ នោះអ្នកនឹងអាចចៀសផុតពីការប្រើប្រាស់ឱសថមិនបានត្រឹមត្រូវ។  ការផ្ទៀងផ្ទាត់ឡើងវិញ ក្រោយទទួលបានឱសថជាមួយនឹងឱសថការី៖ •កត់ព័ត៌មានសំខាន់ៗដែលបានណែនាំដោយឱសថការី •សួរឡើងវិញនូវឈ្មោះឱសថ គោលបំណងនៃការប្រើប្រាស់ របៀបប្រើប្រាស់ កម្រិតប្រើប្រាស់ រយៈពេលប្រើប្រាស់  ផលរំខាន ប្រតិកម្ម ឬអន្តរកម្មជាមួយនឹងឱសថដទៃ ឬអាហារផ្សេងៗ ការរក្សាទុក និងការចៀសវាងផ្សេងៗអំឡុងពេលប្រើប្រាស់ឱសថជាដើម •គួរទទួលឱសថដែលមានការសរសេរសេចក្តីណែនាំពីលើកញ្ចប់  ឬប្រអប់ឱសថទើបជាការប្រសើរ  •សួរជានិច្ច ប្រសិនបើអ្នកមិនយល់  ឬកត់សម្គាល់មានអ្វីប្លែក  ដូចជាការផ្លាស់ប្តូរមុខថ្នាំ ឬកម្រិតថ្នាំខុសពីមុន •អ្នកគួរនិយាយ ឬបញ្ជាក់ឡើងវិញឲ្យឱសថការីស្តាប់ ដើម្បីប្រាកដថាអ្នកបានយល់ច្បាស់ អំពីរបៀបប្រើប្រាស់ កម្រិតប្រើប្រាស់ និងរយៈពេលប្រើប្រាស់ឱសថ •ប្រសិនបើអ្នកមិនអាចស្តាប់នូវការណែនាំបានល្អ អ្នកគួរឲ្យគ្រួសារ ឬមិត្តភក្តិជូនអ្នកទៅ ដើម្បីឲ្យពួកគេជួយស្តាប់ការណែនាំ។ ជាចុងក្រោយ លោកបណ្ឌិត​ បានមានប្រសាសន៍ថា ឥទ្ធិពលទៅលើប្រសិទ្ធភាពនៃការព្យាបាល និងសុវត្ថិភាពរបស់អ្នកជំងឺ ធ្វើឲ្យរាល់ការព្យាបាលដោយឱសថ ចាំបាច់ត្រូវស្ថិតក្រោមការណែនាំ ឬតាមដានពីវេជ្ជបណ្ឌិត ឬឱសថការី និងចៀសវាងការប្រើប្រាស់ឱសថដោយខ្លួនឯង ពីព្រោះអ្នកមិនបានដឹងទេថា ការប្រើប្រាស់ឱសថមិនបានត្រឹមត្រូវនោះអាចផ្តល់ផលអវិជ្ជមាន និងធ្ងន់ធ្ងរកម្រិតណាដល់អ្នកផ្ទាល់៕ ស្វែងយល់បន្ថែម៖ ការប្រើប្រាស់ឱសថដោយសុវត្ថិភាពសំដៅលើអ្វីខ្លះ? ប្រឹក្សាយោបល់ដោយ ៖ បណ្ឌិត បូរី សុថ្ថាវីរៈ សាស្ត្រាចារ្យនៃសាកលវិទ្យាល័យវិទ្យាសាស្ត្រសុខាភិបាល ©2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Nov 13, 2017 |
  • 6 years ago |
  • 3.9K views

ការវិវឌ្ឍដំបូងនៃ “ថ្នាំមានជីវិត”សម្រាប់ព្យាបាលជំងឺមហារីក

រដ្ឋបាលចំណីអាហារ និងឱសថអាមេរិក (FDA) បានសម្រេចលើលទ្ធផលដែលជាប្រវត្តិសាស្រ្តនៃប្រភេទថ្នាំព្យាបាលជំងឺមហារីកដែលបានមកពីការកែច្នៃប្រព័ន្ធរាងកាយអ្នកជំងឺផ្ទាល់តែម្តងនេះបើយោងតាមការផ្សព្វផ្សាយលើគេហទំព័រសារព័ត៌មាន BBC នាថ្ងៃទី ៣០ ឧសភា ឆ្នាំ២០១៧។ ក្រុមវេជ្ជបណ្ឌិតនៅចក្រភពអង់គ្លេស បាននិយាយថាការប្រកាសនោះគឺជាការចាប់ផ្តើមដ៏អស្ចារ្យដែលវាជាប្រភេទឱសថមានជីវិត ហៅថា CAR-T ត្រូវបានបង្កើតឡើងតាមការចម្រាញ់ចេញពីកោសិកាឈាមសរបស់អ្នកជំងឺ ហើយវាមានភាពខុសប្លែកពីការព្យាបាលតាមការវះកាត់ ឬការព្យាបាលដោយការប្រើគីមី។ កោសិកាឈាមស ត្រូវបានធ្វើការកែប្រែតាមកម្មវិធីសេនេទិច បង្កើតឲ្យមានសមត្ថភាពអាចសម្លាប់កោសិកាមហារីក រួចត្រូវបានចាក់បញ្ចូលត្រឡប់ចូលក្នុងខ្លួនអ្នកជំងឺវិញដែលវានឹងធ្វើការបំបែកខ្លួននៅពេលជួបជាមួយកោសិកាមហារីក។ បច្ចេកវិទ្យា CAR-T នេះត្រូវបានប្រើប្រាស់សម្រាប់ព្យាបាលជំងឺមហារីកទាក់ទងនឹងកោសិកាឈាមផ្សេងៗ។ ក្នុងចំណោមអ្នកជំងឺ ៦៣នាក់ដែលត្រូវបានធ្វើការព្យាបាលដោយ CAR-T មានចំនួន ៨៣% បានបញ្ចប់ការព្យាបាលក្នុងរយៈពេល៣ខែហើយចំពោះទិន្នន័យក្នុងរយៈពេលបន្ទាប់ទៀតនឹងត្រូវបានស្រង់ទុក។ វេជ្ជបណ្ឌិត Scott Gottlib ប្រចាំ FDAក៏បានបន្ថែមថា “យើងកំពុងឈានចូលព្រំដែនថ្មីមួយទៀតក្នុងការវិវឌ្ឍវិស័យសុខាភិបាលសម្រាប់ការបង្កើតការកែប្រែកោសិការបស់អ្នកជំងឺដើម្បីប្រឆាំងទៅនឹងកោសិកាមហារីក”។ ចំណែក វេជ្ជបណ្ឌិត David Maloney ជាប្រធានវេជ្ជសាស្រ្តផ្នែកការព្យាបាលកោសិកាប្រព័ន្ធភាពស៊ាំនៅមជ្ឈមណ្ឌលស្រាវជ្រាវ  Fred Hutchinson បាននិយាយថា ការសម្រេចរបស់ FDA គឺជាព្រឹត្តិការណ៍ដ៏សំខាន់ ហើយវាត្រូវបានគេជឿជាក់ថា នេះជាការចាប់ផ្តើមមួយដើម្បីឈានទៅដល់ការរុករកឃើញការព្យាបាលប្រព័ន្ធភាពស៊ាំសម្រាប់ជំងឺមហារីកដទៃទៀត។ យ៉ាងណាមិញ ការព្យាបាលនៅតែបង្ហាញឲ្យមាននូវហានិភ័យដែលអាចគ្រោះថ្នាក់ដល់ជីវិត ដោយហេតុថាការបំបែកខ្លួនកោសិកាក្នុងរាងកាយមានសភាពលឿនតាមរយៈ CAR-T តែបញ្ហានេះនឹងអាចគ្រប់គ្រងបានតាមរយៈការប្រើប្រាស់ថ្នាំ។ ឱសថនេះទៀតសោតនឹងត្រូវបានដាក់ឲ្យប្រើប្រាស់ក្រោមឈ្មោះថា Kymriah សម្រាប់ការព្យាបាលលើជំងឺមហារីកគោលិកាឈាមស (lymphoblastic leukaemia) ប៉ុន្តែ សក្តានុពលនៃបច្ចេកវិទ្យា CAR-T នឹងអាចមានច្រើនចំពោះប្រភេទជំងឺមហារីកផ្សេងដទៃទៀត។ ឯកសារយោង៖  First cancer 'living drug' gets go-ahead ©2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

Medicine
Share
  • Nov 07, 2017 |
  • 6 years ago |
  • 2.7K views

Verzenio ឱសថថ្មីសម្រាប់ជំងឺមហារីកសុដន់

ឱសថ Verzenio (Abemaciclib) ត្រូវបានសម្រេចឲ្យប្រើប្រាស់ក្នុងការព្យាបាលជំងឺមហារីកសុដន់ដំណាក់កាលធ្ងន់ធ្ងរ (Metastatic breast cancer) ចំពោះបុគ្គលពេញវ័យដែលមានអ័រម៉ូនជារ៉េស៊ិបទ័រ  (HR)positive រ៉េស៊ិបទ័រ 2 (HER2)-negative កើតមានឡើងបន្ទាប់ពីជំងឺមានការប្រែប្រួលក្រោយទទួលការព្យាបាលបែបអង់ដូគ្រីន នេះបើតាមសេចក្តីប្រកាសដោយរដ្ឋបាលចំណីអាហារ  និងឱសថសហរដ្ឋអាមេរិក (FDA) នាថ្ងៃទី ២៨ខែកញ្ញា ឆ្នាំ ២០១៧។ ឱសថ Verzenio ត្រូវបានប្រើប្រាស់រួមក្នុងពេលជាមួយគ្នានៃការព្យាបាលបែបអង់ដូគ្រីនដោយប្រើឱសថ Fulvestrant ឬអាចប្រើប្រាស់ទោលតែមួយមុខបន្ទាប់ពីស្ថានភាពជំងឺមានការរីកលូតលាស់ធ្ងន់ធ្ងរក្រោយការព្យាបាលបែបអង់ដូគ្រីន និងតាមគីមីសាស្រ្ត។ ជាមួយនឹងសមត្ថភាពព្យាបាលជំងឺមហារីកសុដន់ដែលមិនឆ្លើយតបនឹងការព្យាបាលវាបានទៅធ្វើការរារាំងការលូតលាស់នៃម៉ូលេគុល cyclin-dependent kinases 4 និង6 ដែលមានមុខងាររ៉ាប់រងការរីករាលដាលកោសិកាមហារីក។ ប្រសិទ្ធភាព និងសុវត្ថិភាពនៃឱសថ Verzenioស្ថិតនៅក្រោមការស្រាវជ្រាវដោយមានការចូលរួមពីអ្នកជំងឺចំនួន ៦៦៨ នាក់ បានទទួលរងនូវប្រភេទជំងឺមហារីកដែលបានវិវឌ្ឍខ្លួនបន្ទាប់ពីទទួលបានការព្យាបាលតាមបែបអង់ដូគ្រីនបង្កឲ្យមានវត្តមានអ័រម៉ូន HR-positive  និងHER2-negative។ កំឡុងពេលសិក្សានៃការប្រើប្រាស់ឱសថ Verzenio រួមជាមួយ Fulvestrant គេសង្កេតឃើញកោសិកាមហារីកមិនបន្តរីកលូតលាស់ស្ថិតក្នុងកម្រិតជាមធ្យមរយៈពេល ១៦.៤ខែ បើប្រៀបធៀបទៅនឹងអ្នកជំងឺប្រើប្រាស់ថ្នាំដែលគ្មានសារធាតុសកម្ម (Placebo) និងឱសថ Fulvestrant ដោយមានត្រឹមរយៈពេលតែ ៩.៣ខែ។ ដោយឡែក ការសិក្សាប្រភេទជំងឺដែលបានរាលដាលធ្ងន់ធ្ងរបង្កឲ្យមានអ័រម៉ូន HR-positive និង HER2-negative ក្រោយការព្យាបាលតាមវិធីសាស្រ្តអង់ដូគ្រីន និងតាមគីមីសាស្រ្ត ត្រូវបានធ្វើឡើងលើអ្នកជំងឺចំនួន១៣២ នាក់ ដោយការលូតលាស់នៃកោសិកាមហារីកគិតជាមធ្យមបានថយចុះក្នុងរយៈពេល ៩.៦ខែ បន្ទាប់ពីផ្តល់ការព្យាបាលតែឱសថ Verzenio តែមួយមុខ។ ឱសថក៏បានបង្ហាញផងដែរពីផលប៉ះពាល់មួយចំនួនដូចជា រាក ថយចុះគោលិកាឈាមសនិងគោលិកាឈាមក្រហម ចង្អោរ ក្អួត ឈឺចាប់ផ្នែកពោះអស់កម្លាំង និងឈឺក្បាល  រួមជាមួយសញ្ញាធ្ងន់ធ្ងរផ្សេងទៀតឃើញមាន ប្លាកែតថយចុះ និងបញ្ហាកំណកឈាម (កំណកឈាមសរសៃវ៉ែនជ្រៅ ឬស្ទះសរសៃឈាមសួត) ចំណែកស្រ្តីមានផ្ទៃពោះ គឺមិនត្រូវបានអនុញ្ញាតឲ្យប្រើប្រាស់នោះទេ ដោយវាអាចប៉ះពាល់ដល់ការវិវឌ្ឍរបស់ទារកក្នុងផ្ទៃ។ ឯកសារយោង FDA approves new treatment for certain advanced or metastatic breast cancers [news release]. FDA’s website. https://www.fda.gov/NewsEvents/Newsroom/PressAnnouncements/ucm578071.htm  ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Oct 14, 2017 |
  • 6 years ago |
  • 3K views

ថ្នាំមហារីកប្រហែលជាអាចជួយទៅលើអ្នកជំងឺហឺត!

លទ្ធផលការសិក្សាចុះផ្សាយនាខែឧសភា ថ្ងៃទី១៧ ក្នុងព្រឹត្តិប័ត្រ ឈ្មោះថា The New England Journal of Medicine បានបង្ហាញពីប្រសិទ្ធភាពមួយផ្សេងទៀតនៃឱសថព្យាបាលជំងឺមហារីកឈាមពពួកImatinib ដែលអាចប្រើចំពោះអ្នកជំងឺដែលមានជំងឺហឺត។ ការសិក្សាបានធ្វើឡើងនៅ Washington- University School of Medicine នៃ St.Louis ក្នុងចំណោមអ្នកជំងឺ ៦២នាក់ ដោយអ្នកជំងឺខ្លះបានប្រើប្រាស់ឱសថ Imatinib និងមួយផ្នែកទៀតបានដាក់ឲ្យប្រើប្រាស់ប្រភេទថ្នាំដែលមិនមានសារធាតុសកម្ម (placebo)។ ការសិក្សាប្រើរយៈពេល ៦ខែ  ដោយលទ្ធផលឃើញថា កម្រិតនៃការរលាកនៃជំងឺហឺតបានថយចុះចំពោះអ្នកជំងឺប្រើប្រាស់ឱសថ Imatinib ដោយប្រៀបធៀបទៅនឹងអ្នកប្រើឱសថគ្មានសារធាតុសកម្ម។  បន្ថែមពីនេះ ការសិក្សាក៏បានបង្ហាញពីផលប៉ះពាល់នៃការប្រើប្រាស់ឱសថផងដែរ ដូចជារមួលសាច់ដុំ និងការថយចុះនូវកម្រិត Phosphateក្នុងឈាម។ យ៉ាងណាមិញ  “យើងកំពុងស្ថិតក្នុងដំណាក់កាលដំបូងនៅឡើយនៃការស្រាវជ្រាវ” នេះបើតាមប្រសាសន៍របស់សហអ្នកនិពន្ធ Mario Castro, MD, the Alan A ប្រចាំសាកលវិទ្យាល័យ Washington រួមជាមួយសាស្រ្តាចារ្យ Edith L. Wolff។ ការសិក្សាមានទំហំតូច ដូច្នេះពួកយើងត្រូវការធ្វើការសិក្សាស្រាវជ្រាវក្នុងទំហំធំមួយប្រមាណ ៣០០ ទៅ៥០០អ្នកជំងឺក្នុងរយៈពេលវែងមួយដើម្បីកំណត់ឲ្យកាន់តែច្បាស់ពីប្រសិទ្ធភាពរបស់ថ្នាំទៅលើអ្នកជំងឺហឺត។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Sep 28, 2017 |
  • 6 years ago |
  • 6.4K views

ប្រើថ្នាំផ្សះហើយ ស្រាប់តែមុខឡើងហើម?

សំណួរ ៖ នាងខ្ញុំមកពីខេត្ត កណ្តាល។ ប៉ុន្មានថ្ងែមុនខ្ញុំបានប្រើប្រាស់ថ្នាំផ្សះ ហើយពេលដែលខ្ញុំបានប្រើប្រាស់ វាបានធ្វើឲ្យមុខខ្ញុំហើម។ តើលោកវេជ្ជបណ្ឌិតអាចពន្យល់បានទេថា តើវាកើតឡើងបណ្តាលមកពីអ្វី ហើយតើខ្ញុំត្រូវធ្វើដូចម្តេច? ចម្លើយ ៖ ជាទូទៅ ថ្នាំផ្សះដែលប្រជាជននិយមប្រើ ហើយមានប្រតិកម្មជាមួយញឹកញាប់នោះ មិនមែន ជាថ្នាំប្រើសម្រាប់ផ្សះមុខរបួសនោះទេ តែតាមពិត ថ្នាំផ្សះ (antibiotics) គឺជាថ្នាំប្រើសម្រាប់ទប់ស្កាត់ការរីករាលដាល ឬសម្លាប់មេរោគ(Bacteria)។ ម្យ៉ាងទៀត មុននឹងប្រើប្រាស់ ថ្នាំផ្សះ គប្បីដឹងថា ប្អូនធ្លាប់មានប្រតិកម្មជាមួយ ថ្នាំ ប្រភេទនោះដែរឬទេ ព្រោះថាបើសិនដឹងថា មានប្រតិកម្មជាមួយថ្នាំប្រភេទណាមួយ ប្អូនត្រូវ តែប្រុងប្រយ័ត្ន និងចៀសវាង។  ជាទូទៅ គ្រប់ថ្នាំទាំងអស់នឹងអាចបង្កឲ្យមានគ្រោះថ្នាក់ដូចគ្នាគ្រាន់តែថ្នាំផ្សះគេច្រើនជួបប្រទះ ដោយសារផលវិបាករបស់វា។ ដូចនេះ សំណួររបស់ប្អូនស្រីមិនទាន់ អាចឆ្លើយបាននៅឡើយទេថាវាមកពីថ្នាំផ្សះ ឬយ៉ាងណា លុះត្រាដឹងថា តើប្រភពនៃការប្រើប្រាស់មកពីណា? តើប្អូនស្រីបានប្រើប្រាស់ថ្នាំប៉ុន្មានមុខ? តើមានតែថ្នាំផ្សះមួយមុខឬយ៉ាងណា? តើប្អូនតែងតែប្រតិកម្មជាមួយថ្នាំណាមួយឬទេ?  ចំណែកឯការឡើងហើមមុខ មិនមែនជាប្រតិកម្ម របស់ថ្នាំតែមួយមុខទេ ជួនកាលអាចបណ្ដាល មកពីជំងឺផ្សេងទៀតដូចជា ជំងឺខ្សោយតម្រងនោម ជាដើម។ ចំពោះរោគសញ្ញានៃការប្រតិកម្មថ្នាំមានដូចជា រមាស់ កន្ទួល កន្ទាលត្រអាក ថប់ដង្ហើម ក្អួតចង្អោរ ហើមបបូរមាត់ មុខ និងបំពង់ខ្យល់ដែលធ្វើឲ្យស្ទះផ្លូវដង្ហើម ឬក៏អាចប៉ះពាល់ដល់បេះដូង និងប្រព័ន្ធឈាមរត់ (Choc Anaphylatique) ដែលអាចបង្កគ្រោះថ្នាក់ដល់អាយុជីវិត បាន។  ហេតុនេះ បើប្អូនស្រីមានការសង្ស័យ ទាក់ទង នឹងការប្រើប្រាស់ថ្នាំ និងផលវិបាក ជាពិសេសពពួកថ្នាំផ្សះ ប្អូនគួរតែពិគ្រោះ ជាមួយ គ្រូពេទ្យជំនាញដែលផ្ដល់ការប្រឹក្សាពីការប្រើប្រាស់ថ្នាំប្រកបដោយសុវត្ថិភាព ។ បកស្រាយដោយ ៖ សាស្ត្រាចារ្យវេជ្ជបណ្ឌិត គុយ ណូ ឯកទេសសណ្តំ ជំងឺធ្ងន់ សង្គ្រោះបន្ទាន់ និងជំងឺសួត សព្វថ្ងៃលោកជាវេជ្ជបណ្ឌិតឯកទេសប្រពោធកម្ម សល្យសាស្ត្រនៃមន្ទីរពេទ្យមិត្តភាពខ្មែរ-សូវៀត និងជាវេជ្ជបណ្ឌិតឯកទេសបម្រើការនៅ មន្ទីរសំរាកព្យាបាល អាយ ស៊ី យូ ធ្លាប់បានបណ្តុះបណ្តាលនៅប្រទេសបារាំង និងប៊ែលសិក ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Ear Nose Throat Medicine
Share
  • Sep 28, 2017 |
  • 6 years ago |
  • 4.4K views

ការវិភាគសមាធាតុគីមីក្នុងញស្រុកដោយសាស្រ្តាចារ្យ និងនិស្សិតUP

លទ្ធផលនៃការស្រាវជ្រាវមួយទៀតដែលក្រុមស្រាវជ្រាវដែលជានិស្សិត និងសាស្ត្រាចារ្យនៃ ដេប៉ាតឺម៉ង់ឱសថសាស្ត្រ មហាវិទ្យាល័យវិទ្យាសាស្ត្រសុខាភិបាល សាកលវិទ្យាល័យពុទ្ធិសាស្ត្រ បានធ្វើឡើង និងត្រូវបានបោះពុម្ពក្នុងទស្សនាវដ្តីវិទ្យាសាស្ត្រអន្តរជាតិ Asian Journal of Pharmacognosyនោះ គឺជា«ការវិភាគសមាសធាតុគីមីឱសថរុក្ខជាតិ និងការវិភាគដោយប្រើTHIN LAYER CHROMATOGRAPHY នៅក្នុងញស្រុក ដែលមានប្រភពពី ខេត្តត្បូងឃ្មុំ ប្រទេសកម្ពុជា»។   ញស្រុក (Morinda citrifolia L.) ត្រូវបានគេប្រើសម្រាប់ព្យាបាលជំងឺដូចជា រលាកក្រពះ រលាកស្បែក រលាកផ្លូវដង្ហើម បញ្ហាវដ្តរដូវ បញ្ហាប្រព័ន្ធតម្រងនោម ក្តៅខ្លួន និងជំងឺទឹកនោមផ្អែម។ ការសិក្សានេះមានគោលបំណងដើម្បីកំណត់រកសមាសធាតុគីមីឱសថរុក្ខជាតិក្នុងសារធាតុចម្រាញ់(ដោយប្រើអេតាណុល) ចេញពី ញស្រុក និងកំណត់នូវវត្តមានសមាសធាតុគីមីទាំងឡាយ ដោយប្រើThin Layer Chromatography។ ការវិភាគសារធាតុគីមីឱសថរុក្ខជាតិ ទៅលើសារធាតុចម្រាញ់(ដោយប្រើអេតាណុល) ក្នុងរុក្ខជាតិញ នេះបានបង្ហាញឲ្យឃើញថា ឫសវាមានផ្ទុកPhenol, Coumarins, Cardiac glycosides និង steroids។ នៅផ្លែមាន Alkaloids, phenol tannins, coumarins, cardiac glycosides និងsteroids។ ស្លឹកមានផ្ទុកAlkaloids, saponins, phenol, tannins និង coumarins។  តាមរយៈការវិភាគដោយប្រើ Thin Layer Chromatography បានបង្ហាញឲ្យឃើញ នៅ ជំហានរលកពន្លឺ ចន្លោះពី 254-366nm នូវចំណុច ញែកដាច់ពីគ្នាបានល្អ (ដោយប្រើ mobile phase system ជា ក្លរ៉ូហ្វម និង អេតាណុល (chloroform:methanol 7:3)។  ការរកឃើញនេះពិតជាមានសារសំខាន់សម្រាប់ការត្រួតពិនិត្យគុណភាពរបស់រុក្ខជាតិ ញស្រុក និងជាគន្លងសម្រាប់ការបន្តការស្រាវជ្រាវពាក់ព័ន្ធនឹងការញែកម៉ូលេគុលឱសថចេញពី ញស្រុក នៅប្រទេសកម្ពុជា។ សំគាល់៖  លទ្ធផលស្រាវជ្រាវនេះត្រូវបានបោះពុម្ពរួចហើយក្នុងទស្សនាវដ្តីវិទ្យាសាស្ត្រអន្តរជាតិ Asian Journal of Pharmacognosy (2017)1(3):511 ប្រភព ៖ លទ្ធផលនៃការស្រាវជ្រាវរបស់ក្រុមស្រាវជ្រាវដែលជានិស្សិត និងសាស្ត្រាចារ្យនៃ ដេប៉ាតឺម៉ង់ឱសថសាស្ត្រ មហាវិទ្យាល័យវិទ្យាសាស្ត្រ សុខាភិបាល សាកលវិទ្យាល័យពុទ្ធិសាស្ត្រ រាជធានីភ្នំពេញ ប្រទេសកម្ពុជា ៖ ម៉េង ចាន់ណែត, កែវ សំអែល, ជា ស៊ីន, សាន ម៉េងហ៊ុយ, ទ្រី លឹមប៊ុណ្ណា, សេង ស៊ុនណារី, ឈួន ស្រីនាថ, ឆាន់ សុគន្ធា  ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Sep 14, 2017 |
  • 6 years ago |
  • 20.3K views

ការប្រើប្រាស់ឱសថដោយសុវត្ថិភាពសំដៅលើអ្វីខ្លះ?

តើអ្នកដឹងទេថា លើសពីចំណាយទៅលើការប្រើប្រាស់ឱសថរបស់អ្នក អ្នកអាចនឹងប្រឈមទៅនឹងការព្យាបាលដោយគ្មានប្រសិទ្ធភាព និងមិនមានសុវត្ថិភាព ប្រសិនបើការប្រើប្រាស់ឱសថទាំងនោះ មិនបានត្រឹមត្រូវតាមការណែនាំរបស់វេជ្ជបណ្ឌិត ឬឱសថការី? ទន្ទឹមនឹងការរំពឹងទុកនូវការជាសះស្បើយ ក្រោយពេលចេញវេជ្ជបញ្ជាដោយគ្រូពេទ្យ  ឬណែនាំដោយឱសថការីនូវការប្រើប្រាស់ឱសថមួយចំនួនសម្រាប់ព្យាបាលជំងឺ  ឬអាការៈរបស់អ្នក តើអ្នកធ្លាប់បានយកចិត្តទុកដាក់ ឬបារម្ភអំពីការប្រើប្រាស់ឱសថទាំងនោះ ជាពិសេសនៅពេលអ្នកមិនយល់ច្បាស់  ឬក៏មិនបានប្រើប្រាស់តាមការណែនាំដែរឬទេ? មកដល់សព្វថ្ងៃ មិនថានៅប្រទេសកំពុងអភិវឌ្ឍ ឬប្រទេសជឿនលឿនមួយចំនួន ភាពខ្វះចន្លោះជាច្រើនអំពីការប្រើប្រាស់ឱសថនៅតែត្រូវបានសង្កេតឃើញ។ ជាក់ស្តែង យោងតាមទិន្នន័យរបស់អង្គការសុខភាពពិភពលោក (WHO) ដែលផ្សាយក្នុងឆ្នាំ២០១៦  បានបង្ហាញថា នៅប្រទេសមួយចំនួន ប្រហែល៦ ទៅ ៧% នៃករណីបញ្ជូនចូលមន្ទីរពេទ្យគឺមានទំនាក់ទំនងទៅនឹងការប្រើប្រាស់ឱសថមិនបានត្រឹមត្រូវ។  បញ្ហានេះកាន់តែគួរឲ្យបារម្ភចំពោះមនុស្សចាស់  ដោយសារតែពួកគេមានកត្តាប្រឈមជាច្រើន ដែលមួយក្នុងចំណោមនោះ គឺការប្រើប្រាស់ឱសថច្រើនមុខ។(1) ការប្រើប្រាស់ឱសថមិនបានត្រឹមត្រូវនឹងជះឥទ្ធិពលដល់ប្រសិទ្ធភាព និងសុវត្ថិភាពនៃការព្យាបាល ដែលពេលខ្លះអ្នកជំងឺអាចប្រឈមទៅនឹងបញ្ហាធ្ងន់ធ្ងរដែលអាចកើតឡើងដោយសារឥទ្ធិពលបន្ទាប់បន្សំរបស់ឱសថ។ បន្ថែមពីនេះទៀត អ្នកនឹងត្រូវចំណាយថវិកាដោយឥតប្រយោជន៍ ដែលរួមមានការចំណាយទៅលើការព្យាបាលជំងឺដែលអ្នកកំពុងមាន និងជំងឺថ្មីដែលកើតឡើងពីឥទ្ធិពលបន្ទាប់បន្សំរបស់ឱសថដែលអ្នកបានទទួលរង។ ឧទាហរណ៍ ការប្រើប្រាស់ឱសថ Maalox ដែលជាឱសថព្យាបាលជំងឺរលាកក្រពះ ក្នុងអំឡុងពេលជាមួយគ្នានៃការប្រើប្រាស់ឱសថ Paracetamol នោះនឹងនាំឲ្យមានការថយចុះនូវការជ្រាបចូលឱសថ Paracetamol ទៅក្នុងឈាម ដែលបណ្តាលឲ្យការព្យាលបាលឱសថ Paracetamol មិនមានប្រសិទ្ធភាព។  ឧទាហរណ៍មួយទៀត ទាក់ទងទៅនឹងការប្រើប្រាស់ឱសថអង់ទីប៊ីយ៉ូទិកមិនបានត្រឹមត្រូវ នោះក្រៅពីការចំណាយថវិកាដោយអត់ប្រយោជន៍ក្នុងការព្យាបាលជំងឺ អ្នកមិនបានធូរស្រាលឡើយ ហើយអ្វីដែលសំខាន់ជាងនេះទៅទៀត គឺមេរោគដែលមានក្នុងខ្លួនអ្នកអាចនឹងសុំាជាមួយឱសថអង់ទីប៊ីយ៉ូទិកទាំងនោះ ដែលអាចផ្តល់ផលវិបាកចំនួនពីររួមមាន៖ ទីមួយ ការព្យាបាលជំងឺរបស់អ្នកដោយឱសថនេះនឹងមិនអាចទទួលបានលទ្ធផលប្រសើរនៅពេលក្រោយ និងទីពីរ ផលប៉ះពាល់មានទំហំធំធេង ដោយមេរោគទាំងនោះអាចបន្តឆ្លងទៅអ្នកដទៃ ហើយនាំឲ្យការព្យាបាលនឹងមិនមានប្រសិទ្ធភាព។   សរុបឡើងវិញ ការប្រើប្រាស់ឱសថដោយមិនបានត្រឹមត្រូវ នោះនឹងមានផលប៉ះពាល់ ៣ ចំណុចធំៗ៖  -ការព្យាបាលដោយមិនទទួលបានប្រសិទ្ធភាព  -ការព្យាបាលដោយមិនមានសុវត្ថិភាព -ការចំណាយថវិកាដោយអត់ប្រយោជន៍ ។ តើអ្នកកំពុងប្រើប្រាស់ ឱសថមិនត្រឹមត្រូវតាមការណែនាំឬទេ? ការប្រើប្រាស់ឱសថដោយមិនបានយល់ពីប្រសិទ្ធភាព គោលបំណងនៃការប្រើប្រាស់ និងផលប៉ះពាល់របស់ឱសថឲ្យបានច្បាស់លាស់ទេ នោះធ្វើឲ្យមានទិដ្ឋភាពនៃការប្រើប្រាស់ឱសថមិនបានត្រឹមត្រូវជាច្រើនបែប ដែលជាទូទៅរួមមាន៖ •ភ្លេចលេបឱសថ ឬលេបមិនបានទៀងពេលវេលា (យឺត ឬលឿនជាងការកំណត់) •បញ្ឈប់ការប្រើប្រាស់ឱសថដោយខ្លួនឯងពេលទទួលអារម្មណ៍ធូរស្រាល ឬក្រឃើញប្រសិទ្ធភាពពេក •បន្ថែមកម្រិតប្រើប្រាស់ឱសថ ឬប្រើញឹកញាប់ជាងការណែនាំ  នៅពេលចង់ឲ្យប្រសិទ្ធភាពឱសថកាន់តែល្អ ឬឆាប់ធូរស្រាល •បញ្ឈប់ ឬបន្ថយកម្រិតដោយខ្លួនឯងដោយសារតែធុញទ្រាន់នឹងផលរំខានរបស់ឱសថ •ភាន់ច្រឡំដែលមិនបានប្រាប់ទៅកាន់វេជ្ជបណ្ឌិត  ឬឱសថការី  ក្នុងការប្រើប្រាស់ឱសថច្រើនមុខ និងរបៀបនៃការប្រើប្រាស់ខុសៗគ្នា  •ប្រើប្រាស់ឱសថដែលខុសពីការណែនាំមានដូចជាពិសាជាមួយទឹកក្តៅ ទឹកផ្លែឈើ ឬកិនបំបែកឱសថមុនលេប ជាដើម ។ តើអ្នកគួរធ្វើដូចម្តេច ដើម្បីឲ្យការប្រើប្រាស់ឱសថបានត្រឹមត្រូវ និងមានប្រសិទ្ធភាព? ប្រាកដណាស់  អ្នកក៏អាចជួយខ្លួនឯងបានផងដែរ ស្របពេលដែលវេជ្ជបណ្ឌិត ឬឱសថការីរបស់អ្នកព្យាយាមកាត់បន្ថយកត្តាដែលនាំឲ្យមានការប្រើប្រាស់ថ្នាំមិនបានត្រឹមត្រូវតាមរយៈការណែនាំផ្សេងៗ។ ដូចនេះ អ្នកត្រូវស្តាប់តាមការណែនាំរបស់វេជ្ជបណ្ឌិត ឬឱសថការី ពេលទទួលឱសថមកព្យាបាល តាមរយៈការសាកសួរឲ្យបានច្បាស់លាស់អំពីគោលបំណងនៃការប្រើប្រាស់ របៀបប្រើប្រាស់ កម្រិតប្រើប្រាស់ និងរយៈពេលប្រើប្រាស់ឱសថ នោះអ្នកនឹងអាចចៀសផុតពីការប្រើប្រាស់ឱសថមិនបានត្រឹមត្រូវ។  ការផ្ទៀងផ្ទាត់ឡើងវិញ ក្រោយទទួលបានឱសថជាមួយនឹងឱសថការី៖ •កត់ព័ត៌មានសំខាន់ៗដែលបានណែនាំដោយឱសថការី •សួរឡើងវិញនូវឈ្មោះឱសថ គោលបំណងនៃការប្រើប្រាស់ របៀបប្រើប្រាស់កម្រិតប្រើប្រាស់ រយៈពេលប្រើប្រាស់  ផលរំខាន ប្រតិកម្ម ឬអន្តរកម្មជាមួយនឹងឱសថដទៃ ឬអាហារផ្សេងៗ ការរក្សាទុក និងការចៀសវាងផ្សេងៗអំឡុងពេលប្រើប្រាស់ឱសថជាដើម •គួរទទួលឱសថដែលមានការសរសេរសេចក្តីណែនាំពីលើកញ្ចប់  ឬប្រអប់ឱសថទើបជាការប្រសើរ  •សួរជានិច្ចប្រសិនអ្នកមិនយល់  ឬកត់សម្គាល់មានអ្វីប្លែក  ដូចជាការផ្លាស់ប្តូរមុខថ្នាំ ឬកម្រិតថ្នាំខុសពីមុន •អ្នកគួរនិយាយ ឬបញ្ជាក់ឡើងវិញឲ្យឱសថការីស្តាប់ដើម្បីប្រាកដថាអ្នកបានយល់ច្បាស់ អំពីរបៀបប្រើប្រាស់ កម្រិតប្រើប្រាស់ និងរយៈពេលប្រើប្រាស់ឱសថ •ប្រសិនបើអ្នកមិនអាចស្តាប់នូវការណែនាំបានល្អ អ្នកគួរឲ្យគ្រួសារ ឬមិត្តភក្តិជូនអ្នកទៅ ដើម្បីឲ្យពួកគេជួយស្តាប់ការណែនាំ។  គន្លឹះក្នុងការប្រើប្រាស់ឱសថប្រកបដោយសុវត្ថិភាព៖ •ត្រូវរក្សាការភ្ជាប់ទំនាក់ទំនងជាមួយនឹងវេជ្ជបណ្ឌិត ឬឱសថការី ដើម្បីធានាពីភាពជាប់លាប់នៃការប្រើប្រាស់ឱសថ និងការពន្យល់ណែនាំពេលមានចម្ងល់ ជាពិសេសសម្រាប់អ្នកមានជំងឺរ៉ាំរ៉ៃ (ជំងឺទឹកនោមផ្អែម ជំងឺលើសឈាម ។ល។)  •កត់ត្រា និងរក្សាទុកបញ្ជីថ្នាំ ឬឱសថបំប៉នផ្សេងៗដែលអ្នកកំពុងប្រើ សារធាតុ ឬឱសថដែលអ្នកមានប្រតិកម្មជាមួយ និង ប្រវត្តិជំងឺជាប់ខ្លួនដើម្បីទុកបង្ហាញទៅកាន់វេជ្ជបណ្ឌិត   ឬឱសថការីនៅពេលទៅទទួលការពិគ្រោះ ឬព្យាបាលណាមួយ •ប្រាប់ទៅកាន់វេជ្ជបណ្ឌិត ឬឱសថការីអំពីរបៀបដែលអ្នកប្រើឱសថជាក់ស្តែង ជាពិសេសនៅពេលដែលវាខុសពីការណែនាំ (ឧទាហរណ៍អ្នកពិបាកលេបឱសថទាំងមូល ដូចនេះអ្នកតែងកិន ឬកាច់វាមុននឹងពិសា ឬឱសថខ្លះត្រូវដាក់ចូលក្នុងទឹកមួយកែវ បែរជាច្រឡំកាច់លេប ឬការពិបាកក្នុងការប្រើប្រាស់ឧបករណ៍បាញ់ប្រភេទស្រៃ្ពយន៍ក្នុងការព្យាបាលជំងឺហឺត ឬតឹងច្រមុះជាដើម) •ចៀសវាងប្រើប្រាស់ឱសថផ្សេងៗសម្រាប់បំបាត់អាការៈណាមួយនៃជំងឺដោយខ្លួនឯង ក្រោយពីបានទទួលការព្យាបាលដោយឱសថដែលបានចេញដោយវេជ្ជបណ្ឌិត ឬឱសថការីហើយ •ចៀសវាងប្រើប្រាស់ឱសថរបស់អ្នកដទៃដែលមានអាការៈប្រហែលគ្នា ឬឲ្យឱសថរបស់អ្នកទៅអ្នកដទៃ •រៀបចំទុកដាក់ឱសថនៅកន្លែងដែលសុវត្ថិភាពចំពោះឱសថ និងអ្នកប្រើប្រាស់ (ឧ ផុតពីដៃក្មេង ទុកដាក់ក្នុងសីតុណ្ហភាពដែលត្រឹមត្រូវ កុំឲ្យត្រូវពន្លឺថ្ងៃជាដើម) •កំណត់ពេលវេលាលេបឱសថរបស់អ្នកដោយប្រើឧបករណ៍ជំនួយ(នាឡិការោទិ៍ កម្មវិធីទូរស័ព្ទជាដើម)។ ឥទ្ធិពលទៅលើប្រសិទ្ធភាពនៃការព្យាបាល និងសុវត្ថិភាពរបស់អ្នកជំងឺ ធ្វើឲ្យរាល់ការព្យាបាលដោយឱសថ ចាំបាច់ត្រូវស្ថិតក្រោមការណែនាំ ឬតាមដានពីវេជ្ជបណ្ឌិត ឬឱសថការី និងចៀសវាងការប្រើប្រាស់ឱសថដោយខ្លួនឯង ពីព្រោះអ្នកមិនបានដឹងទេថា ការប្រើប្រាស់ឱសថមិនបានត្រឹមត្រូវនោះអាចផ្តល់ផលអវិជ្ជមាន និងធ្ងន់ធ្ងរកម្រិតណាដល់អ្នកផ្ទាល់។ អត្ថបទយោង៖ (1) Medication Errors: Technical Series on Safer Primary Care. Geneva: World Health Organization; 2016. ប្រឹក្សាយោបល់ដោយ ៖ បណ្ឌិត បូរី សុថ្ថាវីរៈ សាស្ត្រាចារ្យនៃសាកលវិទ្យាល័យវិទ្យាសាស្ត្រសុខាភិបាល ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

Medicine
Share
  • Sep 07, 2017 |
  • 6 years ago |
  • 3.7K views

ថ្នាំ Mavyret សម្រាប់ជំងឺរលាកថ្លើម C ក្រោមការសម្រេចពីFDA

យោងតាមការផ្សព្វផ្សាយនាថ្ងៃទី ៣ ខែសីហា ឆ្នាំ២០១៧ នៅលើគេហទំព័រ The U.S Food and   Drug Administration (FDA) បានសម្រេចលទ្ធផលពីការប្រើប្រាស់ថ្នាំ Mavyret សម្រាប់ធ្វើការព្យាបាលទៅលើជំងឺរលាកថ្លើមប្រភេទ C (ប្រភេទហ្សែន ១ - ៦) ក្នុងលក្ខខណ្ឌជំងឺពុំទាន់ឈានដល់ដំណាក់កាលក្រិនថ្លើម។  Mavyret ជាឱសថរួមបញ្ចូលពី glecaprevir និង  pibrentasvir ត្រូវបានប្រើប្រាស់រយៈពេល ៨សប្តាហ៍ដំបូងក្នុងការព្យាបាលជំងឺរលាកថ្លើម C ក៏ដូចជាចំពោះអ្នកជំងឺមានបញ្ហាតម្រងនោមកម្រិតមធ្យម ឬធ្ងន់ធ្ងរ និងអ្នកកំពុងទទួលការព្យាបាលដោយការលាងឈាម។ ប្រសិទ្ធភាព និងសុវត្ថិភាពរបស់ឱសថ Mavyret បានមកពីការសិក្សាស្រាវជ្រាវដោយមានការចូលរួមពីមនុស្សពេញវ័យប្រមាណ ២,៣០០ នាក់ដែលបានឆ្លងនូវជំងឺរលាកថ្លើម C (HCV) ប្រភេទហ្សែន (genotype) ១, ២, ៣, ៤, ៥ និង៦។ លទ្ធផលនៃការសិក្សាបង្ហាញថា អ្នកជំងឺក្នុងអត្រា៩២% ទៅ ១០០% ដែលបានទទួលបានការព្យាបាលដោយ Mavyret ក្នុងរយៈពេល ៨, ១២ និង ១៦សប្តាហ៍ ត្រូវបានជាសះស្បើយ ដោយមិនឃើញមានវត្តមានវីរុសបង្កជំងឺនៅក្នុងឈាមបន្ទាប់ពីការព្យាបាលបានបញ្ចប់។ យ៉ាងណាមិញ ឥទ្ធិពលឱសថ Mavyret ក៏បានបង្កឲ្យមានផលវិបាកមួយចំនួនដូចជា អាការៈឈឺក្បាល អស់កម្លាំង និងចង្អោរជាដើម។ គួរបញ្ជាក់ផងដែរ ជំងឺរលាកថ្លើមប្រភេទ C ជាជំងឺធ្វើឲ្យមានការរលាកលើសរីរាង្គថ្លើម ដែលអាចបណ្តាលឲ្យមានការថយចុះមុខងារថ្លើម និងខ្សោយថ្លើម។ ផ្អែកលើមជ្ឈមណ្ឌលគ្រប់គ្រង និងការពារជំងឺ (Centers for Disease Control and Prevention) គេបានប៉ាន់ប្រមាណថាមានមនុស្សចំនួន ២.៧ ទៅ ៣.៩ លាននាក់ក្នុងសហរដ្ឋអាមេរិកបានទទួលរងពីជំងឺរលាកថ្លើមប្រភេទ C រ៉ាំរ៉ៃ និងបានបង្កជាផលលំបាកយ៉ាងច្រើន។  ឯកសារយោង៖ FDA approves Mavyret for Hepatitis C ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Sep 05, 2017 |
  • 6 years ago |
  • 7.9K views

ស្វែងយល់ពីឱសថបញ្ចុះខ្លាញ់ទាំង7

នៅពេលអ្នកមានកម្រិតជាតិកូលេស្តេរ៉ុល ខ្ពស់ រឿងដំបូងដែលគ្រូពេទ្យនឹងណែនាំអ្នកឲ្យធ្វើគឺ ការគ្រប់គ្រងរបបអាហារ និងលំហាត់ប្រាណ។ ប្រសិនបើវាមិនមានការថយចុះនូវកម្រិតជាតិកូលេស្តេរ៉ុល អាក្រក់ដល់រាងកាយ (LDL) គ្រប់គ្រាន់ គ្រូពេទ្យនឹងស្នើឲ្យអ្នកញ៉ាំថ្នាំបន្ថែមទៀត។ បច្ចុប្បន្នឱសថបញ្ចុះខ្លាញ់ត្រូវបានបែងចែកជាប្រភេទខុសៗគ្នាជាច្រើនដោយផ្អែកលើសកម្មភាពដោយឡែកៗរបស់វា ដូចខាងក្រោម៖ ឱសថរារាំងការបញ្ចេញអង់ស៊ីម HMG CoA reductase ឬ STATINS  Statin រារាំងការសំយោគកូលេស្តេរ៉ុល ដោយផ្អាកការបញ្ចេញអង់ស៊ីម HMG CoA reductase រំខានដល់ការបំលែងពី HMG CoAទៅជា Mevalonate ដែលជាដំណាក់កាលចាំបាច់ក្នុងការសំយោគកូលេស្តេរ៉ុល ដូច្នេះហើយទើប Mevalonate មិនអាចសំយោគជាកូលេស្តេរ៉ុលបាន។ ជាទូទៅ Statins មានប្រសិទ្ធភាពបន្ថយបរិមាណ LDL ដែលជាកូលេស្តេរ៉ុលមិនល្អ រួមទាំងជួយបន្ថយកម្រិតទ្រីគ្លីសេរីត (Triglycerides) និងបង្កើន HDL ដែលជាកូលេស្តេរ៉ុលល្អក្នុងឈាម។ សារធាតុសកម្មនៃឱសថស្ថិតក្នុងក្រុម Statins រួមមាន Atorvastatin, Fluvastatin, Lovastatin, Pitavastatin, Pravastatin, Rosuvastatin, Simvastatin។ គួរបញ្ជាក់ថា ការប្រើប្រាស់ Statins អាចមានផលរំខានដូចជា បញ្ហាសាច់ដុំ ទល់លាមក ចង្អោរ រាក ឈឺពោះ រមួលក្រពើ និងឈឺសាច់ដុំជាដើម។ FIBRATES ដេរីវេរបស់អាស៊ីត Fibric (Fibrates) ជាក្រុមថ្នាំដែលបន្ថយកម្រិតទ្រីគ្លីសេរីត (Triglyceride)ដោយកាត់បន្ថយការផលិត VLDL (Triglyceride ដែលទៅស្តុកក្នុងឈាម) និងបង្កើនល្បឿនក្នុងការដក Triglyceride ពីក្នុងឈាម។ Fibrates ក៏មានឥទ្ធិពលដល់ការបង្កើនកម្រិតHDL នៅក្នុងឈាម ប៉ុន្តែវាមិនមាសមត្ថភាពក្នុងការកាត់បន្ថយកម្រិត LDL ឡើយ។ សារធាតុសកម្មរបស់Fibrates មានដូចជា Fenofibrate, Gemfibrozil Clofibrate ហើយអាចផ្តល់ផលរំខានជាទូទៅ ដូចជា ចង្អោរ ឈឺក្រពះ និងរាកក្នុងអំឡុងពេលប្រើប្រាស់។ RESINS Resins ត្រូវបានដឹងថាជា bile acid sequestrant ឬ bile acid-binding drugs ប្រភេទថ្នាំបន្ថយ LDL នៅក្នុងពោះវៀន ដោយបង្កើនការបញ្ចេញកូលេស្តេរ៉ុល។ ជាការពិត ថ្លើមមានតួនាទីផលិតទឹកប្រមាត់ពីកូលេស្តេរ៉ុលសម្រាប់រំលាយអាហារក្នុងពេលប្រើប្រាស់ពពួក Resins វាបានទៅភ្ជាប់ជាមួយនឹងទឹកប្រមាត់ ធ្វើឲ្យទឹកប្រមាត់មិនអាចរំលាយអាហារបាន។ សកម្មភាពនេះ ភ្ញោចឲ្យថ្លើមបង្កើតទឹកប្រមាត់បន្ថែមទៀត។ ទឹកប្រមាត់ដែលថ្លើមរបស់អ្នកផលិតច្រើនប៉ុណ្ណា កូលេស្តេរ៉ុលក៏ត្រូវបានប្រើច្រើនប៉ុណ្ណោះ។ មានន័យថា កូលេស្តេរ៉ុលតិចណាស់ដែលនៅសល់ចូលក្នុងចរន្តឈាមរបស់អ្នក។ សារធាតុសកម្មនៃ Resins ដែលគេតែងជួបប្រទះនៅលើទីផ្សារមានដូចជា Cholestyramine, Colestipol, Colesevelam Hcl រួមនឹងអាចផ្តល់ផលរំខានមួយចំនួនដូចជា ទល់លាមក ហើមពោះ ចង្អោរ និងមានខ្យល់ក្នុងពោះ។ NIACIN (វីតាមីន-B3) វីតាមីន B3 ដែលត្រូវបានគេស្គាល់ថាជាអាស៊ីត Nicotinic មាននៅក្នុងចំណីអាហារ ប៉ុន្តែវាមានកម្រិតខ្ពស់ត្រូវបានរកឃើញក្នុងវេជ្ជបញ្ជាមួយចំនួន ក្នុងគោលបំណងបន្ថយកម្រិត LDL និងបង្កើន HDL កូលេស្តេរ៉ុល។ វីតាមីន B3 រារាំងការបញ្ចេញអាស៊ីតខ្លាញ់សេរីពីជាលិកាខ្លាញ់ ដែលជាលទ្ធផលវាបន្ថយអត្រានៃការបញ្ចេញ VLDL។ សារធាតុសកម្មរបស់ Niacin លើទីផ្សាររួមមាន Niaspan, Nicoar ដែលការប្រើឱសថប្រភេទនេះ អាចមានផលរំខានដូចជា រមាស់លើស្បែក ឈឺក្បាល ឈឺក្រពះ និងក្អួតចង្អោរជាដើម។ ឱសថរារាំងការស្រូបកូលេស្តេរ៉ុល (CHOLESTEROL ABSORPTION INHIBITOR) ថ្នាំនេះមានសកម្មភាពបញ្ឃប់ការស្រូបរបស់កូលេស្តេរ៉ុល ពីពោះវៀនតូច ទៅចរន្តឈាម។  វាការពារផងដែរ នូវកូលេស្តេរ៉ុលដែលត្រូវបានបញ្ចេញពីបំពង់ទឹកប្រមាត់ទៅក្នុងពោះវៀន និងការស្រូបត្រឡប់មកវិញនៅក្នុងចរន្តឈាម។ លទ្ធផលជារួម គឺបន្ថយកម្រិតកូលេស្តេរ៉ុលក្នុងឈាម។ Ezetimibe ជាសារធាតុសកម្មតែមួយគត់នៅក្នុងក្រុមឱសថរារាំងការស្រូបកូលេស្តេរ៉ុល ដែលការប្រើប្រាស់វាអាចមានផលរំខានមួយចំនួនដូចជា ឈឺពោះ ឈឺខ្នង អស់កម្លាំង និងរាក ។ Omega-3 Fatty Acid Ethyl Esters  Omega-3 Fatty Acid Ethyl Esters បានដេរីវេ ចេញពីខ្លាញ់ត្រី ជួយបន្ថយកម្រិតជាតិទ្រីគ្លីសេរីត (Triglyceride) ពីក្នុងឈាម ដែលបានណែនាំសម្រាប់អ្នកជំងឺដែលមានការកើនឡើងនូវទ្រីគ្លីសេរីតកម្រិតខ្ពស់ ញ៉ាំជារបបអាហារប្រចាំថ្ងៃ។ អាស៊ីតខ្លាញ់អូមេហ្គា៣ អាចមានផលរំខានច្រើនហើយក៏ងាយនឹងមានប្រតិកម្មជាមួយនឹងថ្នាំផ្សេងទៀត ពិសេសអាចធ្វើឲ្យពិបាករំលាយអាហារ។ ឱសថរារាំង PCSK9i (PCSK9 Inhibitors) PCSK9 Inhibitors គឺជាក្រុមថ្មីនៃប្រភេទឱសថចាក់ដែលត្រូវបានបង្ហាញថាមានលទ្ធភាពបន្ថយLDLបានខ្ពស់បំផុត រហូតដល់៦០% នៅពេលប្រើវាជាមួយនឹងពពួកStatin។ PCSK9i គឺជាអង់ទីក័រម៉ូណូក្លូណាល់ (monoclonal Antibodies) ដែលស្ថិតក្នុងប្រភេទឱសថជីវសាស្ត្រ។ពួកវាដំណើរការដោយការភ្ជាប់ និងបង្អាក់សកម្មភាពប្រូតេអុីនក្នុងថ្លើមដែលមានឈ្មោះថា “Proprotein convertase subtilisin kexin 9 (PCSK9)”។ បន្ទាប់មកវាធ្វើឲ្យប្រូតេអុីន PCSK9(Proprotein Convertase Sublitisin Kexin 9) ក្នុងថ្លើមអសកម្ម ដែលជាហេតុឲ្យរេស៊ិបទ័រផ្សេងទៀត នឹងអាចចាប់យក LDL សម្រាប់ធ្វើមេតាបូលីស និងបញ្ចេញពីក្នុងឈាម។ PCSK9iប្រើជាធម្មតាចំពោះក្មេងដែលមានលក្ខខណ្ឌសេនេទិក ហៅថា Heterozygous familial hypercholesterolemiaដែលធ្វើឲ្យពួកគេពិបាកក្នុងការបន្ថយកម្រិតកូលេស្តេរ៉ុល ឬសម្រាប់អ្នកជំងឺដែលមានជំងឺបេះដូងស្រាប់។ សារធាតុសកម្មរបស់ឱសថនេះនៅលើទីផ្សារគឺ Alirocumab, Evolocumab ។សូមបញ្ជាក់ថា ក្រោយការចាក់ឱសថប្រភេទនេះចូលក្នុងរាងកាយ លោកអ្នកអាចជួបនឹងផលរំខាននានាជារួម មានរមាស់ ហើម ឈឺនៅត្រង់កន្លែងចាក់ រួមជាមួយនឹងឈឺខ្នង ប្រតិកម្មលើស្បែក និងផ្តាសាយជាដើម។ ប្រភេទឱសថខាងលើសុទ្ធតែអាចជាជម្រើសដ៏ល្អសម្រាប់ការបញ្ចុះជាតិខ្លាញ់ ប៉ុន្តែរាល់ការប្រើប្រាស់របស់វា ចាំបាច់ត្រូវមានការប្រឹក្សាជាមួយវេជ្ជបណ្ឌិតជំនាញជាមុនសិន… ©2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine
Share
  • Sep 05, 2017 |
  • 6 years ago |
  • 3K views

ពិព័រណ៍ពាណិជ្ជកម្មឧស្សាហកម្មសុខភាព និងសម្ផស្សបានត្រឡប់មកកម្ពុជាសាជាថ្មី

ពិព័រណ៍ និងសន្និសីទអន្តរជាតិស្តីពីឧស្សាហកម្មឱសថ វេជ្ជសាស្ត្រ មន្ទីរពិសោធន៍ និងទន្តពេទ្យនៅកម្ពុជា ជាមួយ ពិព័រណ៍និងសន្និសីទអន្តរជាតិស្តីពីសម្រស់ គ្រឿងសំអាង ផលិតផលថែរក្សាសក់ ផលិតផលថែរក្សាស្បែក និងស៉្បាទី 2 បានចាប់ពីថ្ងៃទី 15 ដល់ថ្ងៃទី 17 ខែកញ្ញាឆ្នាំ 2017 ។កម្មវិធីនេះរៀបចំដោយក្រុមហ៊ុនMinh Vi Exhibition and Advertisement Services ដោយមានការគាំទ្រពីក្រសួងពាណិជ្ជកម្ម និងក្រសួងសុខាភិបាលនៃព្រះរាជាណាចក្រកម្ពុជា។  កម្មវិធីនេះត្រូវបានប្រារព្ធឡើងនៅមជ្ឈមណ្ឌលសន្និបាតនិងពិព័រណ៍កោះពេជ្ររាជធានីភ្នំពេញដែលមានទំហំ 1500 ម៉ែត្រការ៉េជាមួយវត្តមានពី 80 ក្រុមហ៊ុនមកពីសហរដ្ឋអាមេរិក, កូរ៉េខាងត្បូង, សិង្ហបុរី, ថៃ, ចិន, ឥណ្ឌា, ម៉ាឡេស៊ី, កម្ពុជា និងវៀតណាម។ ក្នុងនោះមានក្រុមហ៊ុនដ៏ល្បីឈ្មោះដូចជា Shimadzu Asia Pacific Pte., Ltd., Incontech Pte., Ltd., Esco Micro Pte., Ltd ។ Cambodia Phar - Med 2017 និង Beauty Connect Cambodia 2017 រំពឹងថានឹងស្វាគមន៍ទស្សនាប្រមាណ 3,000 នាក់ ។  Cambodia Phar - Med 2017 និងសម្ផស្ស Connect Cambodia 2017 មានបំណងធ្វើជាស្ពាន      តភ្ជាប់អាជីវកម្មក្នុង និងក្រៅប្រទេសលើវិស័យឱសថ, វេជ្ជសាស្ត្រ, មន្ទីរពិសោធន៍, ទន្តពេទ្យ, គ្រឿងសំអាង, ផលិតផលកែសម្ផស្ស និងស្ប៉ា។ កម្មវិធីនេះបង្ហាញពីផលិតផលនិងបច្ចេកវិទ្យាថ្មីៗ ដែលមានភាពទាន់សម័យស្រប និងនិន្នាការទីផ្សារ ។    Cambodia Phar – Med 2017 ជាវេទិកាពាណិជ្ជកម្មដ៏ល្អ សម្រាប់ផ្នែកឱសថ មន្ទីរពិសោធន៍ វេជ្ជសាស្រ្តនិងទន្តពេទ្យនៅកម្ពុជាបានបើកឱកាសធំ ៗ នៅគ្រប់ផ្នែកទីផ្សារទាំងអស់។ The 3rd Cambodia Phar – Med Expo ត្រូវបានប្រារព្ធធ្វើផ្សាភ្ជាប់ជាមួយ Lab Cambodia Expo 2017 និង Dental Cambodia Expo 2017។ ពិព័រណ៍ពាណិជ្ជកម្មនេះគឺជាព្រឹត្តិការណ៍ប្រចាំឆ្នាំដែលផ្តោតលើ ឱសថ ឧបករណ៍វេជ្ជសាស្រ្ត ឧបករណ៍មន្ទីរពិសោធន៍ និងមន្ទីរពេទ្យ។ វាគឺជាសកម្មភាពអាជីវកម្មមួយដ៏មានប្រសិទ្ធភាពបំផុតនៅក្នុងផ្នែកសុខភាព និងមន្ទីរពិសោធន៍ហើយបានប្រមូលផ្តុំអ្នកតំណាងផលិត និងអ្នកផ្គត់ផ្គង់ 50 ក្រុមហ៊ុនមកពីជាង  ប្រទេសមកពី 9 ប្រទេស: សហរដ្ឋអាមេរិក កូរ៉េខាងត្បូង សិង្ហបុរី ថៃ ចិន ឥណ្ឌា ម៉ាឡេស៊ី កម្ពុជានិងវៀតណាម ជាមួយនឹងការរំពឹងថាចំនួនអ្នកចូលរួមទស្សនាអាចលើសពី 2,000 នាក់។ ដើម្បីសម្រាប់ខ្លួនជាមួយទីផ្សារ Cambodia Phar – Med 2017  មានកម្មវិធីផ្គូរផ្គងជំនួញដ៏ធំបំផុតនៅក្នុងឧស្សាហកម្មសុខភាពនៅកម្ពុជាដែលម្ចាស់ហាងឱសថ, អ្នកចែកចាយ និងអ្នកផ្គត់ផ្គង់សំខាន់ៗអាចជួបក្រុមហ៊ុនឈានមុខគេនៅក្នុងឧស្សាហកម្មឱសថដូចជា including Shimadzu Asia Pacific Pte., Ltd., Incontech Pte., Ltd., Esco Micro Pte., Ltd., N.A.Z Medical Supplies SDN BHD, West – Coast Pharmaceutical Works Ltd., Blue Opportunity Medical Co., Ltd.., Atul Drug House. ។ ប្រធានបទទូលំទូលាយ និងការធ្វើបច្ចុប្បន្នភាពជាពិសេសអំពីទីផ្សារថែទាំសុខភាពនៅកម្ពុជាក៏ដូចជាបទប្បញ្ញត្តិរបស់រដ្ឋាភិបាល និងដំណើរការចុះបញ្ជីផលិតផលក្នុងប្រទេសកម្ពុជាផងដែរ។ កម្មវិធីនេះក៏មានសិក្ខាសាលាដែលត្រូវបានតាក់តែងជាពិសេសសម្រាប់ទីផ្សារកម្ពុជាដើម្បីផ្តល់ឱ្យអ្នកទស្សនានូវការយល់ដឹងយ៉ាងជ្រាលជ្រៅចំពោះការវិភាគទីផ្សារ។ គួរកត់សម្គាល់ផងដែរថា Cambodia Phar - Med 2017 បានផ្តល់បទពិសោធន៍ដល់អ្នកទស្សនាលើវិស័យថែទាំសុខភាព, ឱសថ, ឧបករណ៍វេជ្ជសាស្រ្ត, ឧបករណ៍មន្ទីរពិសោធន៍ និងមន្ទីរពេទ្យ ជាមួយនឹងការតាំងពិព័រណ៍លើកទី 1 នៃពិព័រណ៍ Lab Cambodia 2017 Expo និងទន្តពេទ្យកម្ពុជាឆ្នាំ 2017។ Lab Cambodia 2017 Expo ផ្តល់ជូននូវបរិក្ខារនិងឧបករណ៍វិភាគប្រកបដោយភាពច្នៃប្រឌិតគ្រប់ប្រភេទសម្រាប់ មន្ទីរពិសោធន៍ស្រាវជ្រាវ និងអភិវឌ្ឍន៍គុណភាពពិសោធន៏។ សិក្ខាសាលាដែលធ្វើឡើងដោយអ្នកឯកទេសខាងមន្ទីរពិសោធន៍នឹងធ្វើបច្ចុប្បន្នភាពជូនអ្នកទស្សនាជាមួយ និន្នាការ, ការវិវត្តន៍ចុងក្រោយបំផុតរបស់ទីផ្សារសកល ។        Dental Cambodia 2017 ផ្តល់នូវការរៀនសូត្រ និងការចែករំលែកបទពិសោធន៍ដ៏ល្អសម្រាប់ទន្តពេទ្យកម្ពុជាជាមួយសមាជិកនៃទន្តពេទ្យអន្តរជាតិ។ Beauty Connect Expo (cambodia 2017) ពិធីតាំងពិព័រណ៌ និងសន្និសិទអន្តរជាតិលើកទី ២ លើផ្នែកសម្រស់ គ្រឿងសំអាង ផលិតផលថែរក្សាសក់ ផលិតផលថែរក្សាស្បែក និងស្បាឆ្នាំ ២០១៧ នឹងត្រូវធ្វើឡើងនៅថ្ងៃទី ១៥ ដល់ ១៧ ខែកញ្ញា ឆ្នាំ ២០១៧ នៅឯមជ្ឈមណ្ឌលសន្និបាតនិងពិព័រណ៍កោះពេជ្ររាជធានីភ្នំពេញ ដោយមើលឃើញពីការអភិវឌ្ឍន៍នៃពាណិជ្ជកម្ម និងសេវាកម្មផ្នែកកែសម្ផស្ស ។កម្មវិធីនេះមានការចូលរួមរបស់ផលិតផលល្បី ៗ នៅក្នុងឧស្សាហកម្មសម្រស់ គ្រឿងសំអាង ផលិតផលថែរក្សាសក់ ផលិតផលថែរក្សាស្បែក និងស្ប៉ា មកពីប្រទេសបារាំង, ហុងកុង, ថៃ, សិង្ហបុរី, កម្ពុជា និងប្រទេសវៀតណាម។ ពិព័រណ៍ពាណិជ្ជកម្ម នេះជាវេទិកាមួយដែលនាំយកសហគ្រាសគ្រឿងកែសម្ផស្សក្នុងស្រុកនិងអន្តរជាតិទៅក្នុង កិច្ចសហប្រតិបត្តិការពាណិជ្ជកម្មពង្រីកអាជីវកម្មនិង ការច្នៃប្រឌិតថ្មីៗ ជាមួយអតិថិជនសំខាន់ៗនិងទទួលបានទិដ្ឋភាពទូទៅនៃនិន្នាការទីផ្សារ។ អ្នកទស្សនាក៏អាចបង្កើតទំនាក់ទំនងបណ្តាញអាជីវកម្ម និងធ្វើការប្រៀបធៀបផលិតផលក៏ដូចជាបច្ចេកវិទ្យាជាមួយអ្នកតាំងពិព័រណ៍ដោយផ្ទាល់។ ពិព័រណ៍ពាណិជ្ជកម្មនេះជាវេទិកាមួយដែលនាំយកសហគ្រាសគ្រឿងកែសម្ផស្សក្នុងស្រុកនិងអន្តរជាតិទៅក្នុង កិច្ចសហប្រតិបត្តិការពាណិជ្ជកម្មពង្រីកអាជីវកម្មនិង ការច្នៃប្រឌិតថ្មីៗ ជាមួយអតិថិជនសំខាន់ៗនិងទទួលបានទិដ្ឋភាពទូទៅនៃនិន្នាការទីផ្សារ។  ក្រៅពីការតាំងផលិតផលសកម្មភាពមួយចំនួនក៏នឹងត្រូវ ធ្វើឡើងក្នុងកំឡុងពេលពិព័រណ៍នេះដើម្បីផ្តល់ឱកាសដល់អ្នកទស្សនាដើម្បីបង្កើនវិជ្ជាជីវៈ និងបច្ចេកទេស តាមរយៈការសំដែង និង ការបង្ហាញ។   សម្រាប់ព័ត៍មានបន្ថែម សូមទំនាក់ទំនងៈ Minh Vi Exhibition and Advertisement Services Co., Ltd. (VEAS Co., Ltd.) Address: Floor 8, Room 805, Hado Airport Building, 2 Hong Ha, Ward 2, Tan Binh District, Ho Chi Minh City, Vietnam Email: info@veas.com.vn Tel: +84 28 3848 8561 Fax: +84 28 3848 8564 Website: www.pharmed-cambodia.com / www.beautyconnectasia.com  Media Contact - Veas Cambodia Office:  Ms. Harin Eng Email: office.cambo@veas-exhbitions.com Cell: +855 93 535778 No. 1233 Phoum Prek Tano, Sangkat Chak Angrer Lue, Khan Mean Chey, Phnom Penh, Cambodia ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Medicine News & Events
Share
Top