Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Jul 21, 2017 |
  • 7 years ago |
  • 3.1K views

ការសិក្សាបង្ហាញថា៖ អាពាហ៍ពិពាហ៍ និងភាពជាឪពុកធ្វើឲ្យបុរសឡើងទម្ងន់

ការសិក្សាថ្មីមួយដែលធ្វើឡើងដោយសាកលវិទ្យាល័យ Bath នៃចក្រភពអង់គ្លេសបានរកឃើញថា «អាពាហ៍ពិពាហ៍ធ្វើឲ្យបុរសឡើងទម្ងន់ហើយ ថ្ងៃដំបូងនៃភាពជាឪពុកបានធ្វើឲ្យបញ្ហាកាន់អាក្រក់» និងបានបង្ហាញឲ្យដឹងថា «បុរសដែលបានរៀបអាពាហ៍ពិពាហ៍រួច មានម៉ាសរាងកាយ (Body Mass Index ឬBMI) ខ្ពស់ជាងបុរសដែលមិនទាន់រៀបអាពាហ៍ពិពាហ៍ប្រហែលជា៣ផោន» នោះគឺភាគច្រើនបណ្ដាលមកពីការទទួលទានអាហារ ដែលមិនសូវល្អសម្រាប់សុខភាព។   នៅពេលដែលក្លាយជាឪពុក យើងបានឃើញថាបុរសមានការកើនឡើងនៃ BMI បន្ទាប់ពីកំណើតកូនរបស់ពួកគេ ប៉ុន្តែមិនមែននៅពេលដែល ប្រពន្ធរបស់ពួកគេកំពុងមានផ្ទៃពោះនោះទេ។ ក្រុមអ្នកស្រាវជ្រាវបាននិយាយថា លទ្ធផលនេះបានបញ្ជាក់ពីទ្រឹស្ដីមួយចំនួន ដែលបានលើកឡើង នៅក្នុងការស្រាវជ្រាវចាស់ៗ។   ទិន្នន័យបានបង្ហាញថា មនុស្សដែលនៅលីវហើយកំពុងស្វែងរកអាពាហ៍ពិពាហ៍ គឺមាននិន្នាការក្នុងការរក្សារាង និងមានការខិតខំប្រឹងប្រែង ជាងដៃគូរបស់ពួកគេ ហើយក៏បានបញ្ជាក់ថា អាពាហ៍ពិពាហ៍នាំឲ្យមានការជួបជុំគ្នាញឹកញាប់ក្នុងសង្គម ដែលការជួបជុំទាំងនោះជាទូទៅមាន អាហារដ៏ច្រើន។         អ្នកដឹកនាំការស្រាវជ្រាវ លោកស្រីវេជ្ជបណ្ឌិត Joanna Syrda បាននិយាយថា “វាពិតជាមានប្រយោជន៍សម្រាប់បុគ្គលម្នាក់ក្នុងការស្វែងយល់អំពី កត្តាសង្គមមួយណាដែលអាចជះឥទ្ធិពលទៅលើការឡើងទម្ងន់ ជាពិសេស គឺអ្នកដែលរៀបអាពាហ៍ពិពាហ៍រួច និងអ្នកដែលក្លាយជាឪពុកគេរួចហើយ ដើម្បីឲ្យពួកគេអាចធ្វើការសម្រេចចិត្តបានត្រឹមត្រូវអំពីបញ្ហាសុខភាព និងសុខុមាលភាពរបស់ពួកគេ។ សម្រាប់បុរសដែលរៀបអាពាហ៍ពិពាហ៍រួច ហើយមានបំណងចង់ជៀសវាងការកើនឡើងនៃ BMI នោះមានន័យថា ពួកគេត្រូវគិតអំពីការផ្លាស់ប្ដូរចិត្តគំនិត អាកប្បកិរិយា និងទម្លាប់ នៃការញ៉ាំរបស់ពួកគេ។”                 ការសិក្សានេះបានសិក្សាទៅលើគូស្វាមីភរិយាដែលស្រលាញ់ភេទផ្ទុយគ្នាក្នុងសហរដ្ឋអាមេរិករវាងឆ្នាំ ១៩៩៩ និងឆ្នាំ ២០១៣ ដោយប្រើទិន្នន័យដែលបាន មកពី  Panel Study of Income Dynamics ដែលត្រូវបានផ្សព្វផ្សាយក្នុងទស្សនាវដ្ដី Social Science and Medicine។ ការសិក្សាកន្លង មកបាន  បង្ហាញថា «បុរសដែលមាន BMI ខ្ពស់គឺមានការផ្សារភ្ជាប់ទៅនឹងបញ្ហាសុខភាពផ្សេងទៀតជាច្រើន»។   យោងទៅតាមការសិក្សាមួយកាលពីឆ្នាំ២០១៦ដែលធ្វើឡើងដោយសហគមន៍អឺរ៉ុបសម្រាប់ការសិក្សាអំពីភាពធាត់ ហើយសិក្សាទៅលើបុរសប្រមាណ ១៥០០០០ នាក់ដែលមានកម្រិត BMI ខ្ពស់ និងទំហំចង្កេះធំត្រូវបានផ្សារភ្ជាប់ជាមួយនឹងការកើនឡើងហានិភ័យនៃជំងឺមហារីកក្រពេញប្រូស្តេត។ ក្រុមអ្នកស្រាវជ្រាវបានកំណត់ថារាល់ការកើនឡើង ៥គីឡូក្រាមក្នុងមួយម៉ែត្រការ៉េក្នុង BMI នាំឲ្យមានការកើនឡើង១០%នៃការវិវឌ្ឍជាជំងឺមហារីក ហើយរាល់ការកើនឡើង ១០សង់ទីម៉ែត្រទៅលើទំហំចង្កេះ គឺអាចបង្កើនហានិភ័យដល់ទៅ១៣%។         ការសិក្សាមួយទៀតក្នុងឆ្នាំ២០១៦ដែលធ្វើឡើងដោយ Elsevier Health Sciences ក្នុងប្រទេសហូឡង់ ក៏បានរកឃើញពីទំនាក់ទនងរវាងបុរស វ័យជំទង់ ដែលមានបញ្ហាលើសទម្ងន់ និងហានិភ័យក្នុងការវិវឌ្ឍជាជំងឺថ្លើមធ្ងន់ធ្ងរនៅពេលចាស់ទៅ។         បើភាពជាឪពុកម្តាយ ធ្វើឲ្យអ្នកជាឪពុក និងម្តាយឃ្លាយឆ្ងាយពីការទៅកន្លែងហាត់ប្រាណនោះ អ្នកឯកទេសផ្នែកសម្បទា Harley Pasternak បានផ្ដល់គន្លឹះនៃការហាត់ប្រាណមួយចំនួនដែលអ្នកអាចធ្វើបាននៅផ្ទះដូចជា៖ 1. ផ្លាស់ប្តូរបរិយាកាសរបស់អ្នក៖ ប្រសិនបើអាកាសធាតុល្អ អ្នកគួរតែចំណាយពេលខ្លះនៅខាងក្រៅផ្ទះ ដោយធ្វើការហែលទឹក ឬ ហាត់ប្រាណនៅតាមសួនច្បារ។ 2.  ការហាត់ប្រាណបែបបន្ទន់ជង្គង់ងើបចុះឡើង ឬបន្ទន់រាងកាយផ្នែកខាងលើ (Lunges and squats)៖ អ្នកមិនចាំបាច់ទៅកន្លែងហាត់ប្រាណ ដើម្បីធ្វើការហាត់ប្រាណនោះទេ។​ 3.  លើកដុំទម្ងន់ (Hand weights)៖ អ្នកអាចរកទិញដុំទម្ងន់ទាំងនោះ ដើម្បីធ្វើការហាត់ប្រាណនៅផ្ទះបានដោយចាប់ផ្ដើមជាមួយនឹងដុំទម្ងន់មួយគូសិន ហើយអ្នកអាចតម្លើងដុំទម្ងន់បន្ថែម នៅពេលដែលអ្នកកាន់តែរឹងមាំ។   ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Weight Management
Share
  • Jul 14, 2017 |
  • 7 years ago |
  • 3.5K views

ដោះស្រាយបែបណាចំពោះកុមារលើសទម្ងន់?

ការឃាត់ឃាំងកុមារក្នុងការទទួលបាននូវចំណីអាហារ នៅពេលពួកគេមានបញ្ហាលើសទម្ងន់មិនមែនជាវិធីសាស្រ្តត្រឹមត្រូវនោះទេ ដោយអ្នកត្រូវ យល់ថាការបង្អត់អាហារអាចអនុវត្តបានតែចំពោះបុគ្គលដែលពេញវ័យតែប៉ុណ្ណោះ។ កុមារ ជាវ័យដែលគួរទទួលបាននូវរបបអាហារដែលមានជីវជាតិ និងក្នុងកម្រិតមួយដែលគ្រប់គ្រាន់សម្រាប់សុខភាព ក៏ដូចជាការលូតលាស់បានល្អ ចំណែកបញ្ហានៃការលើសទម្ងន់ ភាគច្រើនបណ្តាលមកពីភាពមិនស្មើគ្នារវាងការបញ្ចូលថាមពល (ញ៉ាំអាហារ) និងការបញ្ចេញថាមពល (ធ្វើចលនា ឬលំហាត់ប្រាណរបស់កុមារ)។ ដូច្នេះ វិធានការដោះស្រាយការលើសទម្ងន់ គួរតែធ្វើឡើងដោយសុវត្ថិភាព មិនមែនដោយការបង្អត់អាហារនោះទេ ដែលចំណុចខាងក្រោមអាចជាការណែនាំដ៏ល្អសម្រាប់អាណាព្យាបាលទាំងអស់។ 1.  កំណត់តម្រូវការកាឡូរី៖ កម្រិតកាឡូរី​ប្រចាំថ្ងៃរបស់កុមារអាចប្រែប្រួលពីចន្លោះ ១,០០០ ទៅ២,០០០ កាឡូរី សម្រាប់កុមារ​ដែលមានអាយុចន្លោះ ៣ ទៅ ១៣ឆ្នាំ។ បើទោះបីកុមារមានបញ្ហាលើសទម្ងន់ ពួកគេនៅតែអាចទទួលបានចំនួនកាឡូរីគ្រប់គ្រាន់ក្នុងវ័យនីមួយៗ គ្រាន់តែទាមទារឲ្យមានការ ធ្វើចលនា នៃរាងកាយឲ្យបានច្រើន ដើម្បីអាចប្រើប្រាស់នូវថាមពលដែលបានបញ្ចូលពីចំណីអាហារទាំងនោះ។ 2.  ចាប់ផ្តើមដោយជំហានតូច៖ ផ្តាច់ចំណី មិនត្រូវបានណែនាំនោះទេ អ្នកគួរចាប់ផ្តើមកែប្រែបន្តិចម្តងៗរហូតដល់ក្លាយជាទម្លាប់ តួយ៉ាងដូចជា៖ •   ផ្តល់ទឹកដោះគោ ឬភេសជ្ជៈដែលមិន​មានជាតិធាត់ (nonfat) ជំនួសពីផលិតផល​ដែលមានជាតិស្ករ។ •   អាហារពេលព្រឹកត្រូវតែមានជីវជាតិគ្រប់គ្រាន់​​ ដោយអ្នកអាចរៀបចំជាពពួកគ្រាប់ធញ្ញជាតិ ព្រោះអាហារប្រភេទនេះអាចឲ្យកុមា ​ញ៉ាំឆាប់ឆ្អែត ក្នុងនោះបន្លែ និងផ្លែឈើក៏មិន​គួរមើលរំលងសម្រាប់ជារបបអាហារប្រចាំ​ថ្ងៃផងដែរ។ •   កាត់បន្ថយការញ៉ាំអាហារខាងក្រៅ ជាពិសេសប្រភេទ Fast Food។ 3.  ធ្វើចលនារាងកាយ៖ កុមារគ្រប់រូបគួរចំណាយពេលសម្រាប់ការធ្វើចលនា ដើម្បីបញ្ចេញថាមពល យ៉ាងហោចណាស់​ ៦០នាទីជារៀងរាល់ថ្ងៃ ដែលការធ្វើចលនានោះអាច​រួមបញ្ចូលដូចជា៖ •  ដើរកំសាន្ត ឬជិះកង់ជាមួយគ្រួសារ •  ការហែលទឹក រាំ ឬរត់នៅតាមសួនកុមារ​ជាដើម •  ឲ្យកុមារចំណាយពេល និងធ្វើសកម្មភាពនៅខាងក្រៅ ជាជាងបណ្តោយឲ្យពួកគេមើលទូរទស្សន៍ ឬប្រើប្រាស់គ្រឿងអេឡិចត្រូនិច។ 4.  ធ្វើជាគំរូល្អ៖ មិនគួរចាត់វិធានចំពោះ កូនរបស់អ្នកតែម្នាក់នោះទេ ក្រុមគ្រួសារ ទាំងមូលរួមទាំងអ្នកផ្ទាល់ក៏គួរតែចាប់ផ្តើមអនុវត្តនូវគម្រោងអាហារ និងការថែរក្សា សុខភាពរាងកាយ ដែលនេះជាគំរូយ៉ាងល្អសម្រាប់ឲ្យកុមារអនុវត្តតាម និងអាចបណ្តុះទម្លាប់របស់ពួកគេ។ 5.  រក្សាភាពអត់ធ្មត់៖ ការចាប់ផ្តើមដំបូងតែងតែមានភាព តឹងតែង កុមារអាចនឹងមិនព្រម​ទទួល ឬរឹងទទឹង តែយ៉ាងណាមិញ ​អ្នកត្រូវមានភាពអត់ធ្មត់ បន្តផ្តល់ឲ្យកុមារនូវទម្លាប់ ថ្មីនោះជារៀងរាល់ថ្ងៃ ដោយសារការសិក្សាបានបង្ហាញថា វាត្រូវការពេលវេលាខ្លះសម្រាប់ឲ្យកុមារអាចទទួលយក និងសម្របខ្លួន បានជាមួយនឹងអ្វីដែលថ្មី។   ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។  

Health Tips Parenting Weight Management
Share
  • Jul 14, 2017 |
  • 7 years ago |
  • 3.8K views

សម្រកទម្ងន់តាមរបៀបរស់នៅរបស់ស្ត្រីអស់រដូវ

ស្ត្រី ជាពិសេសនៅជុំវិញវ័យអស់រដូវរបស់ពួកគេ ជាធម្មតាតែងសង្កេតឃើញនូវការផ្លាស់ប្តូរជាច្រើន ដែលក្នុងនោះការឡើងទម្ងន់ជាបញ្ហាដែលគួរឲ្យ បារម្ភមួយ ស្របពេលដែលស្ត្រីកំពុងស្ថិតក្នុងដំណាក់កាលដែលងាយនឹងរងឥទ្ធិពលលើបញ្ហាសុខភាពនានា។ បាតុភូតធម្មជាតិមួយចំនួនដែលកើតមាននៅជុំវិញវ័យអស់រដូវ និងកើនឡើងជាបន្តបន្ទាប់ទៅតាម អាយុ ត្រូវបានបង្ហាញថាជាមូលហេតុនៃ ការឡើងទម្ងន់របស់ស្ត្រី ដែលក្នុងនោះរួមមាន៖ • ការថយចុះនូវល្បឿនក្នុងការធ្វើមេតាបូលីសដែលធ្វើឲ្យការដុតបំផ្លាញកាឡូរីថយចុះ • ការប្រែប្រួលនូវដំណើរអ័រម៉ូន ដែលអាចបង្កើននូវការស្តុកទុកនៃសារធាតុខ្លាញ់ • ការបាត់បង់នូវជាលិកាសាច់ដុំ ដែលធ្វើឲ្យបន្ថយការធ្វើសកម្មភាព និងការហាត់ប្រាណ • ការសម្រាកមិនបានស្រួល ដោយសាររោគសញ្ញានៃការអស់រដូវដូចជាភាពក្តៅ និងបែកញើសពេលយប់ជាដើម ដែលមានទំនាក់ទំនងនឹងការឡើងទម្ងន់ • ការកើនឡើងនៃការប្រើប្រាស់មិនបាននៃអាំងស៊ុយលីនក្នុងខ្លួន ដែលធ្វើឲ្យជាតិស្ករមិនត្រូវបានប្រើប្រាស់ និងស្តុកទុកធ្វើឲ្យឡើងទម្ងន់។ ទម្ងន់ដែលលើសរបស់ស្ត្រីអាចផ្តល់នូវផលអវិជ្ជមាន ដែលជះឥទ្ធិពលលើគុណភាពជីវិតរបស់ពួកគេបន្ថែមទៀតដោយក្នុងនោះរួមមានផងដែរ នូវជំងឺរ៉ាំរ៉ៃដូចជា ជំងឺសរសៃឈាមបេះដូង និងទឹកនោមផ្អែម ជាដើម។ ដើម្បីបញ្ចៀសនូវរាល់បញ្ហាទាំងនេះ ការបន្ថយ ក៏ដូចជាគ្រប់គ្រងទម្ងន់តាមរយៈ ការផ្លាស់ប្តូរនូវបែបបទ ក្នុងការរស់នៅពិតជាចូលរួមចំណែក យ៉ាងចាំបាច់។ 1. របបអាហារ ការគ្រប់គ្រងទម្ងន់ ពឹងផ្អែកលើការគ្រប់គ្រងរបបអាហារដល់ទៅជាង ៨០%។ មិនខុសពីអាហារសុខភាពដទៃ តុល្យភាពនៃអាហារគួរតែមានរួមបញ្ចូល នូវអាហារសរសៃ បន្លែផ្លែឈើស្រស់ និងអាហារដែលជាប្រភពនប្រូតេអុីនជាដើម។ គួរបញ្ជាក់ថា ថ្វីត្បិតការកាត់បន្ថយអាហារសម្បូរ កាឡូរីអាចជួយ ក្នុងការ សម្រក ទម្ងន់ ក៏ប៉ុន្តែករណីដែលអ្នកកាត់បន្ថយអាហារទាំងនេះខ្លាំងពេកនោះ អ្នកបែរជាប្រឈមនឹងការកើនទម្ងន់ទៅវិញដោយសារ តែការបាត់បង់ នូវការកសាងសាច់ដុំ និងការកាត់បន្ថយមេតាបូលីស។ 2. សកម្មភាពប្រចាំថ្ងៃ គួរចងចាំថា អាការៈរំខានដែលកើតឡើងនៅពេលអស់រដូវអាចធ្វើឲ្យស្ត្រីផ្ទាល់មិនចង់ធ្វើសកម្មភាព ឬជំរុញខ្លួនឯងឲ្យធ្វើលំហាត់ប្រាណ ក៏ប៉ុន្តែ ការរក្សាភាពសកម្មនៅក្នុងវ័យនេះ ពិតជាអាចជួយឲ្យពួកគេទប់ទល់នឹងអាការៈទាំងនេះបាន និងផ្តល់នូវអារម្មណ៍កាន់តែប្រសើរទៅវិញបន្ទាប់ពីបាន ធ្វើវា។ ការដើរ រត់ត្រឹកៗ ជិះកង់ ហែលទឹក ឡើងចុះជណ្តើរ និងរាំជាដើម ជាសកម្មភាព ក៏ដូចជាលំហាត់ប្រាណដែលធ្វើឲ្យមានការប្រើប្រាស់អុកស៊ីហ្សែន បានល្អ ហើយវាក៏ជំរុញផងដែរនូវការដុតបំផ្លាញកាឡូរីក្នុងចំនួនដ៏ច្រើន។ សកម្មភាពនេះ មិនត្រឹមអាចការពារពីការឡើងទម្ងន់  តែក៏កាត់បន្ថយ ការប្រឈម នឹងជំងឺបេះដូងដែលកើតមានជាញឹកញាប់ចំពោះស្ត្រីផងដែរ។ 3. លំហាត់ប្រាណដ៏សម្បូរបែប ការហ្វឹកហាត់ដែលជួយដល់ការកសាងសាច់ដុំ ការហាត់ប្រាណបែបទាញ លំហាត់ប្រាណរក្សាលំនឹង និងចលនាយោគៈ សមាធិព្រមទាំងលំហាត់ប្រាណ បែបសម្រាកផ្សេងទៀត គួរតែត្រូវបាន រួមបញ្ចូលក្នុងកាលវិភាគហាត់ប្រាណរបស់ស្ត្រីអស់រដូវ ដោយសារវាសុទ្ធសឹងតែមានអត្ថប្រយោជន៍ចំពោះស្រ្តី ក្នុងការកាត់បន្ថយការប្រឈមនឹងបញ្ហាសុខភាពទាំងរាងកាយ និងផ្លូវចិត្តដែលអាចនឹងកើតមានឡើងនៅអំឡុងវ័យអស់រដូវ។ 4. បង្កើនគុណភាពក្នុងការរស់នៅ • សម្រាកឲ្យបានគ្រប់គ្រាន់ និងពេញលេញ៖ ការសម្រាកគ្រប់គ្រាន់ធ្វើឲ្យអ្នកអាចចៀសវាងនូវការកើននៃអ័រម៉ូនដែលជំរុញឲ្យឃ្លាន និងកើនទម្ងន់។ ដោយឡែក ដើម្បីសម្រាកលក់ស្រួល ស្ត្រីត្រូវកាត់បន្ថយការរំខានការសម្រាកដោយអាការៈនៃការអស់រដូវដោយ ការស្លៀកសម្លៀកបំពាក់ស្តើង ការរក្សាជាតិទឹកក្នុងខ្លួន កន្លែងគេងមានផាសុកភាព សីតុណ្ហភាពបន្ទប់សមស្រប និងគន្លឹះផ្សេងៗទៀតដែលណែនាំដោយអ្នកជំនាញ។ • រក្សាទំនាក់ទំនងសង្គម៖ មិនថាទំនាក់ទំនងក្នុងគ្រួសារ មិត្តភក្តិ អ្នកជិតខាង ឬសហគមន៍ និងការស្គាល់មនុស្សថ្មីៗ អាចជួយឲ្យស្ត្រីរក្សានូវ ការធ្វើសកម្មភាព មានភាពរីករាយ កាត់បន្ថយភាពធុញថប់ និងស្ត្រេស ដើម្បីការពារការកើនទម្ងន់។ • ទៅជួបពិភាក្សាជាមួយអ្នកជំនាញ៖ ដំបូន្មានល្អៗសម្រាប់ការរស់នៅ ក៏ដូចជាការរក្សាទម្ងន់ពីអ្នកជំនាញ ជួយឲ្យអ្នកទប់ទល់នឹងបញ្ហានានា ដែលអាចកើតឡើងប្រកបដោយប្រសិទ្ធភាព។ ដូចនេះ ចំពោះស្ត្រីទាំងអស់ ការចាប់ផ្តើមផ្លាស់ប្តូរទម្លាប់ក្នុងការរស់នៅឲ្យបានកាន់តែឆាប់ គឺកាន់តែល្អ ដើម្បីចៀសផុតពីបញ្ហាកើនទម្ងន់ដ៏ពេញនិយម ក៏ដូចជាកាត់បន្ថយរោគសញ្ញារំខានផ្សេងៗនៃការអស់រដូវ និងឆ្លងកាត់ជីវិតក្នុងដំណាក់កាលថ្មីនេះ ប្រកបដោយភាពរីករាយ។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Women's Health Weight Management
Share
  • Jun 30, 2017 |
  • 7 years ago |
  • 3.2K views

វិធីសាស្រ្តសម្រកទម្ងន់គ្រោះថ្នាក់ ដែលអ្នកគួរតែចៀសវាង!

អ្នកប្រហែលជាបានដឹងអំពីវិធីសាស្រ្តមួយចំនួន ដើម្បីសម្រកទម្ងន់របស់អ្នកហើយ។ វិធីសាស្រ្តខ្លះមានប្រសិទ្ធភាព ស្របពេលដែលខ្លះទៀតគ្មានបាន ប្រយោជន៍នោះទេ។ ប៉ុន្តែ​ តើអ្នកប្រាកដទេថា វិធីសាស្រ្តដែលធ្វើឲ្យអ្នកស្រកទម្ងន់លឿនបែបនេះ មានសុវត្ថិភាពចំពោះសុខភាពរបស់អ្នក?   តើអ្នកដឹងទេថា យុទ្ធសាស្រ្តនៃការសម្រកទម្ងន់មួយចំនួន គឺពិតជាមិនមានសុខភាពល្អ ហើយធ្វើឲ្យអ្នកប្រឈមមុខខ្ពស់ទៅនឹងបញ្ហាជាច្រើនទៅថ្ងៃក្រោយ ឬភ្លាមៗ ក្រោយពីអ្នកអនុវត្តវា?   អ្នកគួរចងចាំថា រូបរាងមិនសំខាន់ដូចសុខភាពនោះទេ ហើយទោះបីជាអ្នកស្រកទម្ងន់បានមែន ក៏មិនប្រាកដថា អ្នកស្អាតតាមដែលអ្នកចង់នោះដែរ។ យ៉ាងណាមិញ ចូរធ្វើវាបន្តិចម្តងៗ ហើយអ្នកកុំមានភាពតានតឹងច្រើន ចំពោះបញ្ហានេះឲ្យសោះ។   ខាងក្រោមនេះ គឺជាវិធីសាស្រ្តទាំង ៨ ដែលអ្នកគួរតែចៀសវាងដាច់ខាត ទោះបីជាអ្នកចង់សម្រកទម្ងន់ខ្លាំងយ៉ាងណាមក៏ដោយ ៖   1.    ញ៉ាំអាហារគ្មានសារធាតុចិញ្ចឹម ឬកាឡូរីទាល់តែសោះ 2.    ញ៉ាំថ្នាំសម្រកទម្ងន់ 3.    សម្អាតរាងកាយ ដោយការប្រើថ្នាំបញ្ចុះលាមកជាប្រចាំ 4.    តម ឬមិនញ៉ាំអាហារមួយ ឬពីរពេល 5.    ជក់បារី 6.    ហាត់ប្រាណលើសកម្រិត 7.    ប្រើអាហារបំប៉នគ្មានគុណភាព ឬប្រភពច្បាស់លាស់ 8.    ញ៉ាំទឹកខ្មេះជាប្រចាំ៕ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Weight Management
Share
  • Jun 02, 2017 |
  • 7 years ago |
  • 13.7K views

អាហារពេលព្រឹក ល្អបំផុតសម្រាប់អ្នកចង់សម្រកទម្ងន់

សព្វថ្ងៃ បញ្ហាទម្ងន់ បានក្លាយជាប្រធានបទក្តៅ និងទទួលបានការចាប់អារម្មណ៍ច្រើន។ គ្រប់គ្នាចង់ដឹងណាស់ថា តើគួរធ្វើដូចម្តេចទើបអាចសម្រកទម្ងន់ បាន? តើគួរធ្វើដូចម្តេច ទើបញ៉ាំហើយ មិនឡើងគីឡូ?  ថ្ងៃនេះ គេហទំព័រយើង មានប្រធានបទពិសេសមួយ ដើម្បីណែនាំឲ្យបងប្អូនបានដឹងថា របបអាហារពេលព្រឹកពិតជាល្អបំផុតសម្រាប់អ្នកដែលចង់ សម្រកទម្ងន់។ ជាការពិតណាស់ អាហារពេលព្រឹក គឺជាអាហារចាំបាច់បំផុត ដែលមនុស្សគ្រប់គ្នាមិនគួរមើលរំលង ឬខកខានក្នុងការទទួលទាននោះទេ ជាពិសេស អ្នកដែលចង់សម្រកទម្ងន់។ ការសិក្សាបានបង្ហាញថា អ្នកដែលមិនញ៉ាំអាហារពេលព្រឹក នឹងឡើងគីឡូច្រើនជាងអ្នកញ៉ាំអាហារពេលព្រឹកដែលត្រឹមត្រូវ ទៅទៀត។   តើអាហារពេលព្រឹកបែបណាទើបល្អ?  កាហ្វេ? ឬបាយ? ជាការពិត អ្នកគួរតែញ៉ាំអាហារពេលព្រឹក មិនថានំប៉័ង បបរ បាយ ឬគុយទាវនោះទេ។ ការញ៉ាំបែបនេះ នឹងធ្វើឲ្យអ្នកឆ្អែតបានយូរ ហើយមិនញ៉ាំអាហារផ្សេងៗទៀត ដែលនាំឲ្យអ្នកឡើងគីឡូនោះឡើយ។ ការសិក្សាក៏បានបង្ហាញផងដែរថា ការញ៉ាំអាហារពេលព្រឹកគឺជាផ្នែកមួយ នៃការសម្រកទម្ងន់ ប្រកបដោយសុវត្ថិភាព និងមានប្រសិទ្ធភាពខ្ពស់។  អ្នកខ្លះ មិនព្រមញ៉ាំអាហារពេលព្រឹក ពីព្រោះ ពួកគេគិតថា វាអាចកាត់បន្ថយកាឡូរី និងបរិមាណអាហារដែលគេទទួលទាននោះ គេប្រាកដជាស្គម។ ប៉ុន្តែ ផ្ទុយទៅវិញ គេបែរជាញ៉ាំច្រើននៅអាហារថ្ងៃត្រង់ អាហាររសៀល បូករួមនឹងអាហារសម្រន់ផ្សេងៗទៀត ហើយជាលទ្ធផលគឺធាត់លើសដើម។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។​

Health Tips Weight Management
Share
  • May 29, 2017 |
  • 7 years ago |
  • 5.2K views

អ៊ីចឹងតើ...បានជានារីជនជាតិជប៉ុនស្រស់ស្អាត ហើយមានរាងស្វែល គួរឲ្យខ្នាញ់ម្លេះ!

ប្រទេសនីមួយៗសុទ្ធតែមានអ្វីប្លែក និងគួរឲ្យចាប់អារម្មណ៍ ដែលធ្វើឲ្យមនុស្សទូទាំងសកលលោកស្ងើចសរសើរ។ តាមប្រពៃណីនិងទំនៀមទម្លាប់របស់ប្រទេសនីមួយៗ វាក៏មានដូចជា របៀបរស់នៅប្រចាំថ្ងៃ និងអ្វីច្រើនទៀត ដែលអ្នកត្រូវរៀនសូត្រផងដែរ។ ឧទាហរណ៍ ប្រទេសឥណ្ឌាមានយូហ្កា និងក្បួនថ្នាំបូរាណ ដើម្បីបង្អួតពិភពលោក។ អ៊ីចឹង តើអ្នកមានឆ្ងល់ទេថា ហេតុអ្វីនារីជនជាតិជប៉ុនស្រស់ស្អាត ហើយមិនងាយចាស់? ជាការពិត អាចនិយាយបានថា ជនជាតិជប៉ុនទាំងប្រុស ទាំងស្រី ភាគច្រើន មានស្បែកស្រស់ស្អាត ហើយមិនងាយចាស់នោះទេ ហើយបើនិយាយរូបរាងវិញ គឺស្រឡូន គួរឲ្យខ្នាញ់តែម្តង។ បើចង់ដឹង អ្នកគួរតែមើលទម្លាប់នៃការរស់នៅរបស់ពួកគេហើយ ៖ · ពួកគេញ៉ាំតែបៃតង ពីព្រោះ វាជាអង់ទីអុកស៊ីដង់ ដែលជួយពន្យារភាពចាស់ជរា។ វាក៏ជួយការពារប្រឆាំងជំងឺមហារីក និងជំងឺបេះដូងផងដែរ។ ជនជាតិជប៉ុនតែងតែញ៉ាំតែបៃតងមួយ ឬពីរពែងជាប្រចាំថ្ងៃ។ · ពួកគេចូលចិត្តអាហារសមុទ្រ ច្រើនជាងសាច់មាន់ សាច់ជ្រូក និងសាច់គោ។ ជាការពិត សាច់ក្រហម ត្រូវបានផ្សារភ្ជាប់ទៅនឹងការរលាក ជំងឺធាត់ លើសទម្ងន់ និងការឡើងកូឡេសស្តេរ៉ូល។ · ជនជាតិជប៉ុនចូលចិត្តត្រីសាលម៉ុន ត្រីធូណា និងបង្គា។ ត្រី ជាប្រភពដ៏ល្អនៃប្រូតេអ៊ីន និងអាស៊ីតខ្លាញ់អូមេហ្កាបី។ · ជនជាតិជប៉ុនញ៉ាំអាហារប្រើមេ ដូចជា kimchi, tempeh, miso, sauerkraut, kombucha និង kefir ដែលវាសំបូរអង់ស៊ីម វីតាមីន និងប្រូប្យូទិក ព្រមទាំងបង្កើនបាក់តេរីល្អៗ ក្នុងក្រពះពោះវៀន។ · ជនជាតិជប៉ុនដើរច្រើនបំផុត ការដើរអាចកាត់បន្ថយស្រ្តេស និងជួយថែរក្សារាងកាយឲ្យមានសុខភាពល្អ និងស្រស់ស្អាត។ · ជនជាតិជប៉ុនភាគច្រើនហាត់ក្បួនការពារខ្លួន ដូចជា ការ៉ាត់តេ យូដូ និងអាគីដូជាដើម ដែលជាហេតុធ្វើឲ្យពួកគេ មានរាងកាយស្រស់ស្អាត រឹងមាំ ងាយបត់បែន និងពូកែអត់ទ្រាំ។ · ជនជាតិជប៉ុនញ៉ាំអាហារតិចៗ ប៉ុន្តែ មានគុណភាព និងមានសុខភាពល្អ។ · ពួកគេចូលចិត្តសមាធិ និងសម្រួលអារម្មណ៍ ដើម្បីកាត់បន្ថយស្រ្តេស និងសម្ពាធការងារ។ ត្រូវចងចាំថា បើគ្មានភាពតានតឹង គុណភាពជីវិតរស់នៅរបស់អ្នក នឹងកើនឡើង៕ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។  

Health Tips Weight Management
Share
  • May 17, 2017 |
  • 7 years ago |
  • 11.8K views

របៀបញ៉ាំ ៨យ៉ាងដុតបំផ្លាញកាឡូរីកាន់តែច្រើន

ការដុតបំផ្លាញកាឡូរីបានល្អ មិនត្រឹមជួយអ្នកឲ្យស្រកទម្ងន់ ប៉ុន្តែវាក៏ធ្វើឲ្យអ្នកគេងលក់ស្រួល ចៀសពីជំងឺមួយចំនួននិងមានកម្លាំងរឹងមាំទៀតផង។ ប៉ុន្តែ កាឡូរីដ៏លើសលប់របស់អ្នករឹងរូសហួសពីការគិត ដែលការហាត់ប្រាណតែម្យ៉ាងមិនអាចជួយអ្វីបានច្រើនទេបើមិនធ្វើរួមជាមួយរបៀបនៃការញ៉ាំដ៏ត្រឹមត្រូវនោះ។ 1. ចាប់ផ្តើមតាំងពីព្រឹក រីករាយដុតបំផ្លាញកាឡូរីតាំងពីពេលចាប់ផ្តើមថ្ងៃថ្មីរបស់អ្នកតាមរយៈការញ៉ាំអាហារពេលព្រឹក ដើម្បីដាស់មេតាបូលីសរបស់អ្នកនិងធ្វើឲ្យវាដំណើរការបានពេញមួយថ្ងៃ។ កុំភ្លេចរបបអាហារសមរម្យដែលល្អគ្រប់គ្រាន់សម្រាប់អាហារពេលព្រឹកដូចជា ទឹកដោះគោជូរ និងផ្លែឈើ ឬនំបុ័ង គ្រាប់ធញ្ញជាតិ។ 2. ញ៉ាំឲ្យគ្រប់គ្រាន់ និងច្រើនពេល ការបរិភោគតិចជាងតម្រូវការរបស់រាងកាយ នោះរាងកាយរបស់អ្នកនឹងបញ្ឈប់ដំណើរការមេតាបូលីសរបស់អ្នកដូចគ្នា ដែលចុងក្រោយអ្នកមិនត្រឹមតែអស់កម្លាំងនោះទេ ថែមទាំងសល់កាឡូរីលើសដើម។ ដូចនេះ ក្រៅពីអាហារចម្បង ៣ពេលសមរម្យអ្នកក៏អាចបន្ថែមអាហារសម្រន់សុខភាពនៅចន្លោះអាហារនីមួយៗផងដែរ ដើម្បីឲ្យមេតាបូលីសអាចដំណើរការបានធម្មតា និងដុតកាឡូរីរបស់អ្នកមិនឈប់ឈរ។ 3. ទឹកត្រជាក់ ការបរិភោគទឹកត្រជាក់មួយថ្ងៃ ៦កែវយ៉ាងតិច ត្រូវបានបង្ហាញថាបង្កើនការដុតបំផ្លាញកាឡូរីដោយមេតាបូលីស ដល់ទៅ ៥០កាឡូរីក្នុងមួយថ្ងៃ ដែលការកើនឡើងនេះបានពីការប្រើប្រាស់ថាមពលដើម្បីសម្របសម្រួលសីតុណ្ហភាពរបស់ទឹកទៅនឹងសីតុណ្ហភាពរបស់រាងកាយ។ 4. បញ្ចូលគ្រឿងហឹរទៅក្នុងអាហារ អាហារហឹរមានសារធាតុធម្មជាតិ ដែលអាចជំរុញមេតាបូលីសរបស់អ្នកឲ្យកាន់តែស្វាហាប់។ ទោះបីជាឥទ្ធិពលនេះនឹងកើតមានជាបណ្តោះអាសន្ន ប៉ុន្តែការចម្អិនអាហារដោយបន្ថែមម្ទេសក្រហម ឬបៃតង ម្រេច ខ្ញី ខ្ទឹមសជាដើមឲ្យបានញឹកញាប់ពិតជាអាចធ្វើឲ្យអត្ថប្រយោជន៍កើនឡើងជាលំដាប់។ 5. ជ្រើសរើសអាហារសរីរាង្គ សារធាតុពុលដែលចេញពីថ្នាំសម្លាប់សត្វល្អិត អាចរារាំងដំណើរការមេតាបូលីស ដែលជាលទ្ធផលធ្វើឲ្យការដុតកាឡូរីត្រូវបានកាត់បន្ថយ។ ដូចនេះ អ្នកគួរតែជ្រើសរើសបន្លែ ផ្លែឈើសរីរាង្គសម្រាប់បរិភោគជានិច្ច។ 6. អាហារទំពាច្រើន ជ្រើសរើសប្រភេទអាហារដែលទាមទារឲ្យអ្នកទំពាច្រើន ដូចជាសាច់សុទ្ធ គ្រាប់ធញ្ញជាតិ ផ្លែឈើ ឬបន្លែទាំងមូល ជាជាងអាហារដែលត្រូវបានចិញ្ច្រាំ ចិតជាចំណិតតូចៗ ឬធ្វើឲ្យល្អិតហើយស្រេច ដើម្បីភ្ញោចដល់មេតាបូលីស។ 7. ប្តូរមកជាតែ និងកាហ្វេ បើអ្នកជ្រើសរើសកាហ្វេសម្រាប់បង្កើនថាមពល និងធ្វើឲ្យអ្នកមានស្មារតីល្អនោះអ្នកនឹងរីករាយជាមួយនឹងការបង្កើនអត្រានៃការធ្វើមេតាបូលីសផងដែរ ប្រសិនបរិភោគក្នុងកម្រិតល្មម។ រីឯឥទ្ធិពលរួមគ្នានៃ Caffeine និង Catechins របស់តែបៃតង ឬតែអូឡុងអាចបង្កើនមេតាបូលីសបានដល់ ២ទៅ ៣ម៉ោង។ 8. បំបែកខ្លាញ់ដោយជាតិកាកសរសៃ ការស្រាវជ្រាវបង្ហាញថា ជាតិកាកសរសៃអាចបង្កើនការដុតកាឡូរីបានដល់ទៅជាង ៣០% ដែលជាលទ្ធផលធ្វើមានការស្រកទម្ងន់យ៉ាងរហ័ស។ អាហារសម្បូរដោយកាកសរសៃមាននៅក្នុងបន្លែ ផ្លែឈើ និងធញ្ញជាតិ។ រួមផ្សំជាមួយរបៀបក្នុងការបរិភោគអាហារខាងលើ របបអាហារសុខភាពប្រចាំថ្ងៃរបស់អ្នកក៏ចាំបាច់បំផុតផងដែរ ជាពិសេសគឺកុំភ្លេចនូវអាហារដែលមានប្រូតេអ៊ីន ខ្លាញ់ អូមេហ្គា៣ វីតាមីន និងជាតិរ៉ែផ្សេងៗ ដែលសុទ្ធសឹងអាចជំរុញការដុតបំផ្លាញកាឡូរីប្រកបដោយប្រសិទ្ធភាព។ អ្នកក៏គ្មានផ្លូវជួបកាឡូរីដ៏លើសលប់នោះទៀតទេ បើអ្នករក្សាការធ្វើលំហាត់ប្រាណទៀតទាត់ និងប្រកាន់យករបៀបរស់នៅដ៏ល្អ (ភាពសកម្ម ការគេង សម្រាក…)។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Weight Management
Share
  • May 16, 2017 |
  • 7 years ago |
  • 3.2K views

អ្វីខ្លះដែលនឹងកើតឡើងក្រោយពីអ្នកសម្រកទម្ងន់?

អ្នកណាថាការព្យាយាមសម្រកទម្ងន់គឺដើម្បីតែសម្រស់នោះ ការសិក្សាជាច្រើនបង្ហាញឲ្យឃើញថា ការគ្រប់គ្រងលើទម្ងន់ដងខ្លួនបានល្អ ផ្តល់សារប្រយោជន៍ជាច្រើន ដល់សុខភាព  និងការរស់នៅប្រចាំថ្ងៃរបស់អ្នក។ ការស្រកទម្ងន់ចាប់ពី ៥ ទៅ១០ភាគរយនៃទម្ងន់សរុប នឹងអាចជួយអ្នក ដូចនេះ​ ហេលស៍ថាម នឹងនាំបង្ហាញ​ អ្នកទាំងអស់គ្នា អំពីហេតុការណ៍ដែលអាចកើតឡើងក្រោយការស្រកទម្ងន់។ ការសម្រកទម្ងន់តាមរូបភាពផ្សេងៗដូចជា   ការយកចិត្តទុកដាក់លើរបបអាហារ និងការធ្វើសម្មភាពនានា អាចឲ្យអ្នកចៀសវាងការកើតនូវជំងឺមួយចំនួន ក៏ដូចជាជួយការពារការវិវឌ្ឍទៅជាធ្ងន់ធ្ងរនៃជំងឺផងផ្សេងៗដូចខាងក្រោម៖ • បញ្ចៀសជំងឺដាប់សរសៃឈាម និងជំងឺគាំងបេះដូង៖ ហានិភ័យនៃជំងឺនេះ គឺកើតឡើងដោយសារការកើនឡើងខ្ពស់នៃសម្ពាធឈាម និងកូឡេស្តេរ៉ូល។   នៅពេលទម្ងន់ស្រកចុះ អ្នកនឹងអាចកាត់បន្ថយ​ LDL (Low Density Lipoprotein)ដែលជាប្រភេទកូឡេស្តេរ៉ូលមិនល្អអាចតោងជាប់សរសៃឈាម តែផ្ទុយទៅវិញ វាចូលរួមបង្កើន HDL (High Density Lipoprotein)ដែលជាពពួកកូឡេស្តេរ៉ូលល្អ ជាមួយនឹងតួនាទីក្នុងការដឹកនាំខ្លាញ់មិនល្អ ទៅបញ្ចេញចោល។ ទាំងនេះជាហេតុផល អាចបន្ថយការឡើងសម្ពាធឈាម ដែលអាចឈានដល់ការស្ទះ ឬដាច់សរសៃឈាម និងការពារការកើតជំងឺគាំងបេះដូង ជាដើម។ • បញ្ចៀសជំងឺទឹកនោមផ្អែមប្រភេទទី២៖ ការកើតជំងឺនេះគឺទាក់ទងនឹងការឡើងទម្ងន់ ព្រោះខ្លាញ់ក្នុងរាងកាយបានរារាំងការស្រូបយកជាតិស្ករចូលកោសិកាដែលជាហេតុបង្កឲ្យជាតិស្ករកើនឡើងក្នុងឈាម។  ផ្ទុយមកវិញ   ការស្រកទម្ងន់អាចបង្ការការកើតជំងឺនេះ   និងទប់ស្កាត់ផលវិបាកដែលអាចកើតឡើងផ្សេងៗ ដូចជា ការខូចតម្រងនោម ការងងឹតភ្នែក និងជំងឺបេះដូងជាដើម។  ការស្រកទម្ងន់ក៏ជួយឲ្យបរិមាណជាតិស្ករក្នុងឈាមថយចុះ និងធ្វើឲ្យអ្នកកាត់បន្ថយ ការប្រើប្រាស់ឱសថបញ្ចុះជាតិស្ករបានមួយកម្រិតទៀតផង។ ការសិក្សាបង្ហាញថា ការសម្រកទម្ងន់៧ភាគរយនៃទម្ងន់សរុបរបស់អ្នក នឹងជួយអ្នក ពីការកើតជំងឺនេះបានដល់ទៅ ៥៨ភាគរយ។ • បញ្ចៀសជំងឺរលាកសន្លាក់៖ កើតឡើងដោយសារដំណើរការមិនប្រក្រតីនៃសន្លាក់ ត្រង់ឆ្អឹង និងឆ្អឹងខ្ចី។ ពេលលើសទម្ងន់ សន្លាក់ឆ្អឹងត្រង់ជង្គង់ ចង្កេះ និងឆ្អឹងកងខ្នង នឹងធ្វើការកាន់តែខ្លាំង។ តាមការសិក្សា បង្ហាញថា បើអ្នកឡើងទម្ងន់១០គីឡូក្រាម នោះសន្លាក់ឆ្អឹងរបស់អ្នកនឹងត្រូវទ្រទម្ងន់បន្ថែម ពី៣០ ទៅ៦០គីឡូក្រាម មានន័យថា សន្លាក់អ្នកនឹងរងទម្ងន់ ៣ទៅ៦ដងនៃទម្ងន់ដែលបានលើស។ តែប្រសិនអ្នកស្រកទម្ងន់ ៥ភាគរយវិញគឺអាចកាត់បន្ថយកម្លាំងសង្កត់លើសន្លាក់ឆ្អឹង និងការឈឺចាប់បាន។ លើសពីនេះទៀត បើអ្នកស្រកអស់១០ភាគរយ អ្នកក៏អាចបង្ការរោគសញ្ញានៃជំងឺរលាកសន្លាក់ជង្គង់បាន ២៨ភាគរយផងដែរ។ • បញ្ចៀសជំងឺមហារីក៖ តាមការសិក្សាស្រាវជ្រាវ របស់The World Cancer Research Fund បង្ហាញថាការបញ្ចុះទម្ងន់ ៥ភាគរយ នៃទម្ងន់ខ្លួនសរុប អាចកាត់បន្ថយហានិភ័យនៃជំងឺមហារីក ដូចជា មហារីកសុដន់ មហារីកប្រូស្តាត និងមហារីកពោះវៀនធំ។ ទាំងនេះគឺដោយសារតែ មានការថយចុះនូវ អ័រម៉ូនអាំងស៊ុយលីន អឺស្រ្តូសែន និងអង់ត្រូសែន ដែលជាអ័រម៉ូនអាចបង្កឲ្យមានជំងឺមហារីក។ •បញ្ចៀសពីអាការៈគេងបាត់ដង្ហើម និងស្រមុក៖ អាការៈនេះកើតឡើងដោយសារតែការស្ទះចលនាខ្យល់ក្នុងប្រព័ន្ធដកដង្ហើម។ ចំពោះអ្នកលើសទម្ងន់ គឺមានកោសិកាទន់ៗច្រើននៅត្រង់ក ដែលបង្កើតជាសម្លេងស្រមុកនៅពេលគេង ហើយក៏ជាមូលហេតុមួយនៃអាការៈគេងបាត់ដង្ហើម ដែលតម្រូវឲ្យអ្នកគេងត្រូវភ្ញាក់ឡើង ដើម្បីចាប់ផ្តើមដកដង្ហើមវិញផងដែរ។ ការសិក្សាបង្ហាញថា ការសម្រកទម្ងន់១០ភាគរយ អាចជួយកាត់បន្ថយជាតិខ្លាញ់ ដែលនៅជាប់នឹងបំពង់សម្លេង ក៏អាចបំបាត់អាការៈគេងបាត់ដង្ហើមបាន២៦ភាគរយ និងធ្វើឲ្យអ្នកគេងលក់ស្រួល។ • បញ្ចៀសគ្រោះថ្នាក់នៅពេលសម្រាល៖ ចំពោះអ្នកលើសទម្ងន់ ឬធាត់ អាចទទួលការរំខានដល់ការធ្វើមេតាបូលីសនៃអ័រម៉ូនភេទ ដែលអាចធ្វើឲ្យប្រែប្រួលដល់វដ្តរដូវ និងអាចឈានដល់ការមិនអាចមានកូន ឬអារ។ អំឡុងពេលមានផ្ទៃពោះ បើអ្នកលើសទម្ងន់ នោះអ្នកនឹងប្រឈមនឹងផលប៉ះពាល់ទាំងម្តាយ និងកូន ដូចជាជំងឺក្រឡាភ្លើង ជំងឺលើសឈាម ឬជំងឺទឹកនោមផ្អែម។ ចំពោះកូនក្នុងផ្ទៃវិញ អាចប្រឈមនឹការលើសទម្ងន់ និងស្ថិតក្នុងទំហំដែល បង្កការពិបាក នៅពេលឆ្លងទន្លេ តែការស្រកទម្ងន់អាចជួយកែប្រែបញ្ហាទាំងនេះបាន។ ក្រៅពីហេតុការណ៍ចំពោះសុខភាពរបស់អ្នកខាងលើ​ ក៏នៅមានហេតុការណ៍ដទៃទៀត ដែលអាចកើតមានពេលស្រកទម្ងន់ផងដែរ ដែលរួមមាន៖ • ទទួលអារម្មណ៍ស្រស់ស្រាយ៖ ដោយសារអ្នកបានសម្រេចគោលបំណង ក្នុងការបន្ថយទម្ងន់ខ្លួនឯងបានសម្រេច និងការរារាំងនូវការបញ្ចេញអ័រម៉ូនស្រេ្តស ដែលជាលទ្ធផលធ្វើឲ្យអ្នកមានភាពរីករាយ។ • បង្កើនសម្រស់៖ ជាក់ស្តែង អ្នកនឹងមានទំនុកចិត្តលើខ្លួនឯងជាងមុន និងមានអារម្មណ៍ល្អជាមួយខ្លួនឯងជាងមុនដូចគ្នា។ ម្យ៉ាងទៀត អ្នកអាចស្លៀកពាក់ និងតុបតែងខ្លួនបានយ៉ាងសម្បូរបែបជាងមុន ជាមួយនឹងទំហំដងខ្លួនស្រស់ស្អាតរបស់អ្នក។ • សន្សំសំចៃថវិកា៖ បន្ទាប់ពីបានសម្រកទម្ងន់ហើយ   អ្នកនឹងមិនសូវប្រឈមនឹងជំងឺ ហើយនេះក៏ជាការសន្សំថវិកាមួយពីការព្យាបាលផងដែរ។ ©2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Health Tips Weight Management
Share
  • May 02, 2017 |
  • 7 years ago |
  • 6.5K views

៧វិធី ជៀសវាងការឡើងទម្ងន់ដោយសារតែបរិភោគរាល់ពេលអផ្សុក

តើអ្នកឩស្សាហ៍បរិភោគអាហារសម្រន់ រាល់ពេលដែលអ្នកធុញទ្រាន់ដែរទេ? តើអ្នកតែងតែដើរទៅកាន់ចង្រ្កានបាយ​ ឬចំណីចំណុកខ្លះៗ ពេលមើលទូរទស្សន៍ ហើយចំពេលផ្សាយស្ព៉តពាណិជ្ជកម្មដែរទេ? មិត្តអ្នកអានភាគច្រើនប្រាកដជាមានទម្លាប់បែបនេះមិនខាន ហើយប្រហែលជាឡើងទម្ងន់ដោយមិនដឹងខ្លួនផងដែរ។ ហេតុផលនៃការបរិភោគមិនចេះចប់នេះក៏ព្រោះដោយសារតែមានអារម្មណ៍ធុញជាជាងព្រោះតែឃ្លាន។ ​ហេតុដូចនេះហើយ ដើម្បីជៀសវាងការបន្តឡើងទម្ងន់ដោយសារលក្ខខណ្ឌបែបនេះ សូមធ្វើការសាកល្បងនូវវិធីទាំង៧ខាងក្រោមទាំងអស់គ្នា ៖ · ងើបដើរចេញក្រៅ ៖ ការងើបដើរចេញទៅក្រៅយូរម្តងៗនឹងជួយបន្លប់អ្នកពីការនឹកឃ្លានដោយសារតែមិនមានអីធ្វើ​។ ព្យាយាមដើរឆ្លងហាងលក់ទំនិញផ្សេងៗដោយមិនយកប្រាក់តាមខ្លួន នោះនឹងអាចបន្ថយការទិញចំណីចំណុកដែលមានកាឡូរីខ្ពស់ ពេលដែលអ្នកឆ្លងកាត់។ · ទទួលទានទឹក ៖ មនុស្សភាគច្រើនយល់ច្រលំការស្រេកទឹកនឹងការឃ្លាន។ មុននឹងទទួលទានចំណីចំណុកផ្សេងៗ សាកល្បងទទួលទានទឹកជាមុនសិន  ហើយចាំមួយសន្ទុះ។ ពេលនោះអារម្មណ៍ឃ្លាននឹងបាត់ទៅវិញ។ ភេសជ្ជៈដទៃក៏មានអត្ថប្រយោជន៍ដែរ​ តែទឹកបរិសុទ្ធមានប្រសិទ្ធភាព និងប្រសើរជាងដោយវានឹងបំពេញជាតិទឹកក្នុងខ្លួនដោយមិនបន្ថែមកាឡូរីអ្វីបន្ថែមឡើយ។ · អង្គុយទទួលទានអាហារ ៖ ការអង្គុយទទួលទានពេលឈរធ្វើឲ្យអ្នកមិនមានអារម្មណ៍ថាខ្លួនឯងមិនមែនកំពុងបរិភោគឡើយ នោះនឹងធ្វើអ្នកញ៉ាំបានកាន់តែច្រើន និងភ្លេចគិតពីកាឡូរី។ · ធ្វើកិច្ចការហត្ថកម្មផ្សេងៗ ៖ មនុស្សខ្លះអផ្សុកពេក ទំនេរដៃមិនដឹងធ្វើអ្វីក៏ទាញយកចំណីមកដាក់ក្នុងមាត់។ តែដើម្បីជៀសវាងបាន រាល់ពេលដែលខ្លួនចាប់ផ្តើមនឹកឃើញចង់ទំពារអ្វីនោះ អ្នកគួរទាញយកក្រណាត់ចាក់រូប ក្រងខ្សែដៃ ឬប្រកបកិច្ចការផ្សេងៗដែលអ្នកចូលចិត្ត។ នោះដៃរបស់អ្នកនឹងរវល់ ហើយជំនួសឲ្យការឡើងទម្ងន់នោះ អ្នកនឹងមានសមិទ្ធផលសម្រាប់បង្ហាញដល់មិត្តភក្តិទៀតផង។ · កុំទទួលទានចំណីពេលកំពុងមើលទូរទស្សន៍ ៖ ក្រោយពេលដែលបើកទូរទស្សន៍មើលហើយ មនុស្សយើងទម្លាប់ទាញចំណីកំប៉ិកកំប៉ុកដាក់ចូលមាត់មិនឈប់។ ហេតុនេះហើយ សាកល្បងធ្វើការងារផ្សេងៗដែលនាំឲ្យដៃរវល់ ដូចជាការអានសៀវភៅជាដើម។ · ធ្វើខ្លួនឯងឲ្យរវល់ ៖ សាកសួរខ្លួនឯងមើលថា តើអ្នកទទួលទានដោយសារតែអ្នកធុញទ្រាន់? គ្មានអ្វីធ្វើ? ចម្លើយភាគច្រើន គឺមកពីទំនេរពេក ដូច្នេះហើយ សាករកការងារឲ្យខ្លួនឯងធ្វើ ដូចជាការអានសៀវភៅ ការអានកាសែត ទស្សនាវដ្តី។ល។ · រៀបចំកន្លែងជុំវិញខ្លួនឲ្យមានរបៀប ៖​ ក្រៅពីការធ្វើការងារហត្ថកម្ម អ្នកក៏អាចបន្លប់ខ្លួនឯងជាមួយនឹងការរៀបចំទូខោអាវ ទូដាក់សៀវភៅ តុរៀន តុធ្វើការ ផ្ទះបាយ បន្ទប់គេង បន្ទប់ទឹក ផងដែរ។ មុននឹងរកអាហារសម្រាប់ទទួលទាន ត្រូវសួរខ្លួនឯងបញ្ជាក់សិនថាតើ ខ្លួនឯងពិតជាឃ្លានមែន ឬដោយសារតែខ្លួនឯងទំនេរពេកទេ។ ការបរិភោគអាហារសម្រន់ ឬចំណីចំណុកបែបនេះ អាចនឹងក្លាយជាទម្លាប់មួយដែលនាំឲ្យសារពាង្គកាយរបស់អ្នកកើនឡើងនូវបរិមាណកាឡូរីជាច្រើន។ ហេតុនេះ ត្រូវទទួលទានអាហារដែលឲ្យបានត្រឹមត្រូវ និងគ្រប់គ្រាន់ ដើម្បីកុំឲ្យឆាប់ឃ្លាន។ អ្វីដែលអ្នកគួរធ្វើ គឺបន្លប់ជាមួយនឹងការងារផ្សេងៗ ដើម្បីកុំឲ្យដៃទំនេរ។ © 2017 រក្សាសិទ្ធិគ្រប់យ៉ាង​ដោយ Health Time Corporation ​​​​ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។                                             

Health Tips Weight Management
Share
  • Apr 11, 2017 |
  • 7 years ago |
  • 7.1K views

ក្បាច់ហែលទឹក៤យ៉ាង ដែលអាចដុតកាឡូរីបានល្អ

អាកាសធាតុកំពុងតែក្តៅខ្លាំង បែកញើសអស់ជាតិទឹកពីខ្លួនមួយចំនួនហើយ បើទៅហាត់ប្រាណរឹតតែអស់ជាតិទឹកពីខ្លួនថែមទៀត មិនទាន់បានដុតកាឡូរីផង។ មានតែការហែលទឹកជាជម្រើសល្អបំផុត ដែលអាចដុតកាឡូរីបានដោយមិនបាត់បង់ជាតិតាមញើសតែ តើការហែលទឹកប្រភេទណាដែលស័ក្តិសមនឹងអ្នក នៅមិនទាន់ដឹងមែនទេ?   យោងតាមការចែករំលែកពីលោក ស៊ិន មករា គ្រូបង្វឹកហែលទឹកប្រចាំនៅក្លឹបហាត់ប្រាណ  Superfit Fitness and Health Club​ ការហែលទឹកមាន៤ប្រភេទដែលពេញនិយម ហើយប្រភេទនីមួយៗមិនត្រឹមមានការធ្វើចលនាមិនដូចគ្នា វាក៏មានអត្ថប្រយោជន៍ ព្រមទាំងលទ្ធភាពក្នុងការបំផ្លាញកាឡូរីខុសៗពីគ្នាផងដែរ ដែលនឹងបង្ហាញអ្នកដូចខាងក្រោមនេះ បន្ទាប់មកអ្នកក៏ដឹងថាតើប្រភេទណាមួយ ត្រូវនឹងអ្នកជាងគេ។ ១ ហែលបែបកង្កែប៖ ជាប្រភេទនៃការហែលទឹកពេញនិយមមួយដែលចលនាជើងមានលក្ខណៈដូចកង្កែប ប្រើដៃជើងមួយៗ  និងមានចលនាយឺតជាងក្បាច់ផ្សេងទៀត ដែលភាគច្រើនក៏អាចហាត់សម្រាប់ការហែលដែលមានចម្ងាយវែងផងដែរ។ ការហែលទឹកក្បាច់នេះច្រើនតែត្រូវបានណែនាំសម្រាប់អ្នកហាត់រៀនហែលលើកដំបូង ព្រោះវាជាតិចនិកងាយអនុវត្ត។ វាជំរុញមុខងារស្មាជើង សាច់ដុំសរសៃពួរគន្លាក់ជើង សាច់ដុំ triceps និងសាច់ដុំទ្រូងឲ្យរឹងមាំ។ ម៉្យាងវិញទៀត ហែលស្ទាយបែបនេះត្រឹមតែមួយម៉ោង  អាចដុតបំផ្លាញកាល់ឡូរីបានរហូតដល់៧២០កាឡូរី។   ២ ហែលផ្ងារ ឬចាក់កាណូត៖ ជាការហែលដែលប្រើចលនាជើងប្រហាក់ប្រហែលនឹងការហែលបែបសេរី ខុសតែចលនាដៃវាជួយអ្នកក្នុងការពង្រឹងជំហរដងខ្លួន ពិសេសសម្រាប់អ្នកធ្វើការនៅមុខកុំព្យូទ័ររយៈពេលយូរជាប្រចាំ។ វាជាប្រភេទនៃការហែលទឹកសាមញ្ញមួយ ដែលមានការប្រើប្រាស់ដៃ ស្មា ជើង និងពោះរួមគ្នា និងអាចដុតបំផ្លាញកាឡូរីរហូតដល់ ៥០០កាឡូរីក្នុងមួយម៉ោង។  ការហែលបែបនេះ ក៏មិនតម្រូវឲ្យអ្នកប្រើប្រាស់កម្លាំងច្រើន ហើយក៏អាចដកដង្ហើម បានស្រួលផងដែរខណៈដែលក្បាលរបស់អ្នកផ្ងារ និងបណ្តែតតាមបណ្តោយទឹក។ ៣ ហែលសេរី៖ ជាការហែលបែបឯករាជ្យ សាមញ្ញ និងជាក្បាច់ដែលមានល្បឿនលឿនជាងគេបំផុត។ ជាទូទៅត្រូវបានគេជ្រើសរើសជាក្បាច់សម្រាប់ការប្រកួតក្នុងរយៈចម្ងាយឆ្ងាយ ពីព្រោះវាមិនតម្រូវឲ្យចំណាយថាមពលច្រើននោះទេ។ ការហែលសេរីអាចដុតបំផ្លាញកាឡូរីរវាង ៥០០-៧០០កាល់ឡូរី។ ដោយឡែក ហែលបែបសេរី អាចឲ្យអ្នកបានបញ្ចេញកម្លាំង និងចលនាក្នុងកម្រិតស្មើគ្នាទាំងដៃ និងជើងដែលវាល្អចំពោះគ្រប់ផ្នែកនៃរាងកាយ។ យ៉ាងណាមិញដោយសារការដកដង្ហើមដោយផ្អៀងមកចំហៀង ធ្វើឲ្យការហែលសេរីជាក្បាច់ដែលពិបាកហាត់បន្តិច។ ៤ ហែលបែបមេអំបៅ៖ ជាប្រភេទហែលទឹកមានលក្ខណៈជាការសន្ទះដៃទាំងពីរស្របពេលជាមួយគ្នាដូចមេអំបៅ។ អត្ថប្រយោជន៍នៃការហែលទឹកប្រភេទនេះ គឺវាបង្កើននូវមុខងារនៃការបត់បែនរបស់ប្រអប់ដៃទាំងមូល ខ្នង ពោះ និងទ្រូង។ នេះជាក្បាច់ពិបាកជាងគេ ដោយហេតុថា វាទាមទារឲ្យមានថាមពលគ្រប់គ្រាន់ ដូចនេះ ហើយត្រឹមតែ១ម៉ោងអ្នកអាចដុតកាល់ឡូរីពីក្នុងខ្លួនរហូតដល់៨០០កាឡូរី។   ការហែលទឹកបានទាំងដុតបំផ្លាញកាឡូរីល្អសម្រាប់រាងកាយហើយថែមទាំងបានត្រជាក់ស្រួលទៀតដូចនេះរដូវក្តៅនេះអ្នកនឹងបំផ្លាញកាឡូរីបានយ៉ាងសន្ធឹក ដោយមិនបាច់បែកញើសជោកខ្លួន។ អញ្ចឹងឆាប់ជ្រើសរើសក្បាច់មួយណាទៅ ដើម្បីសម្រេចក្តីស្រមៃនៃការសម្រកខ្លាញ់របស់អ្នកដោយប្រសិទ្ធភាព។ © 2017 រក្សាសិទ្ធិគ្រប់យ៉ាង​ដោយ Health Time Corporation ​​​​ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។  

Health Tips Weight Management
Share
  • Feb 04, 2017 |
  • 7 years ago |
  • 4.8K views

ដើរកម្សាន្តដែលមិនធ្វើឲ្យអ្នកឡើងទម្ងន់

បែបមិនបានដឹងទេថា  ការដែលអ្នកដើរកម្សាន្តម្តងៗ  ពេលខ្លះក៏អាចឲ្យអ្នកឡើងទម្ងន់ដោយមិនដឹងខ្លួន? នេះគឺដោយសារតែការដើរលេងរមែងមានការញ៉ាំនេះ ញ៉ាំនោះ ដោយមិនសូវបានចាប់អារម្មណ៍ពីការលើសកាឡូរី ដោយសារតែមានអារម្មណ៍ហត់ផង និងចង់ភ្លក្សរបស់ប្លែកៗមិនចេះឈប់ផង ជាពិសេសមិនងាយគេចផុតទេ ពិធីជប់លៀងពេលយប់ដែលសម្បូរអីញ៉ាំឆ្ងាញ់ៗ ភេសជ្ជៈផ្អែមៗ ឬអាល់កុល ដែលកាន់តែធ្វើឲ្យអ្នកប្រឈមនឹងការឡើងគីឡូ បើមិនច្រើន ក៏តិចដែរ.... អញ្ចឹង...  មិនមានន័យថា   អ្នកត្រូវកាត់បន្ថយការដើរកម្សាន្តទេ    គ្រាន់តែគួរដើរទៅតាមវិធី៤យ៉ាងងាយៗទៅ ក៏អាចចៀសវាងបញ្ហានេះបានហើយ... ១ ត្រៀមអាហារសម្រន់ អ្នកគួរត្រៀមនូវអាហារសម្រន់ប្រភេទជាផ្លែឈើស្រស់ដូចជា ផ្លែប៉ោម ឬផ្លែចេក ទៅតាមកាបូប ឬកន្រ្តកស្បៀង នៅពេលអ្នកត្រូវដើរកម្សាន្ត។ អត្ថប្រយោជន៍នៃអាហារសម្រន់នេះគឺ  សម្បូរដោយជាតិសរសៃ និងមិនមានកាឡូរីខ្ពស់ ដូចប្រភេទអាហារស្រាប់មួយចំនួន ហើយអាចជួយឲ្យអ្នកមិនសូវឃ្លានតាមតែចិត្តចង់      ព្រមទាំងសម្រួលការបន្ទោរបង់របស់អ្នកទៀតផង។ ២ គេងឲ្យបានគ្រប់គ្រាន់ ពិតណាស់ដែលថាពេលដើរលេងអ្នកបា្រកដជាគេងបានតិច ប៉ុន្តែតើអ្នកដឹងទេថាអ្នកមិនងាយស្រកទម្ងន់នោះទេ បើអ្នកគេងមិនគ្រប់គ្រាន់។ វាមិនត្រឹមតែធ្វើឲ្យអ្នកធាត់ទ្វេដងប៉ុណ្ណោះទេ  ថែមទាំងបង្កើននូវចំណង់អាហារថែមទៀត  ពេលនោះ អ្នកនឹងញ៉ាំកាន់តែច្រើន។     ដូចនេះ  យកល្អអ្នកមិនគួរគ្រោងដំណើរកម្សាន្តដែលប្រញាប់ប្រញាល់ពេកនោះទេ។ ៣ កម្សាន្តបែបដើរ បើបានជាជ្រុលមកដើរលេង  គួរតែដើរឲ្យបានច្រើន ដើរច្រើនកាលណាអ្នកនឹងបានឃើញទេសភាពច្រើនប៉ុណ្ណោះដែរ។ ការដើរអាចជួយដុតបំផ្លាញកាឡូរីដែលលើសបានប្រហែលពី១៣៧ ទៅ២៧៧កាឡូរីក្នុងមួយម៉ោងអាស្រ័យនឹងល្បឿននៃការដើរ និងទម្ងន់របស់អ្នកផ្ទាល់។ ៤ រក្សាការញ៉ាំទឹក ពេលដើរលេង អ្នកប្រាកដណាស់ប្រឈមជាមួយនឹងការប្រែប្រួលអាកាសធាតុ  បរិស្ថាន  រួមនឹងសកម្មភាពដែលធ្វើឲ្យអ្នកបាត់បង់ជាតិទឹកច្រើនជាងធម្មតា។ ដូចនេះ  អ្នកគួរយកទឹកតាមខ្លួនជាការប្រសើរមិនត្រឹមតែបង្គ្រប់ជាតិទឹកប៉ុណ្ណោះទេ ថែមទាំងអាចកាត់បន្ថយការឃ្លានបានមួយកម្រិតទៀតផង។ តែប៉ុណ្ណេះ លែងបារម្ភរឿងដើរលេងហើយឡើងគីឡូទៀតហើយ...ដើរម៉ាអស់ដៃហ្មងទៅ៎!!! 

Health Tips Weight Management
Share
  • Jan 31, 2017 |
  • 7 years ago |
  • 12.2K views

វេជ្ជបណ្ឌិត ប៉ែន កក្កដា«លើសទម្ងន់ និងជំងឺធាត់ហួសលើកុមារ កំពុងជាក្តីបារម្ភធំនៃឳពុកម្តាយគ្រប់រូប»

និយមន័យ ភាពធាត់របស់កុមារ គឺអាស្រ័យទៅលើទំនាក់ទំនងរវាងទម្ងន់ និងគ្រោះថ្នាក់ (ជំងឺ) ដែលអាចកើតមានឡើង ទាំងរយៈពេលខ្លី និងវែង ចំពោះកុមារ។ ករណីគ្រោះថ្នាក់រយៈពេលខ្លី ពុំសូវជួបប្រទះនោះទេនៅវ័យកុមារ និងជំទង់ ប៉ុន្តែច្រើនប្រឈមមុខក្នុងពេលពេញវ័យតែម្តង។ ដូចនេះ និយមន័យអាចខុសគ្នា ទៅតាមការសិក្សានីមួយៗដែលជាទូទៅ៖ •បញ្ហាលើសទម្ងន់ (Overweight) របស់កុមារគឺ ការលើសនូវទម្ងន់២០% (ចាប់ពី៩៧ percentile) លើសពីកម្ពស់រំពឹងទុក។ •ជំងឺធាត់ហួស (Obesity) របស់កុមារ គឺការលើសនូវទម្ងន់៥០% លើសពីកម្ពស់រំពឹងទុក។ ការឲ្យនិយមន័យនេះ គឺគិតទៅលើរូបមន្តមួយ ហៅថាសន្ទស្សន៍ទម្ងន់ BMI (Body Mass Index)ដោយធ្វើការចែកទម្ងន់(គិតជាគីឡូក្រាម) និងកម្ពស់(គិតជាម៉ែត្រ)លើកជាការេ ។ ប៉ុន្តែរូបមន្តនេះ មិនត្រូវបានអនុវត្ត ចំពោះក្មេងក្រោមអាយុ២ឆ្នាំនោះទេ។ បើយោងតាមអង្គការសុខភាពពិភពលោក បានឲ្យនិយមន័យថា គឺជាការប្រមូលផ្តុំមិនធម្មតា ឬលើសជាតិខ្លាញ់ ដែលអាចផ្តល់គ្រោះថ្នាក់ដល់សុខភាព។ មូលហេតុ និងកត្តាជម្រុញ ការលើសទម្ងន់ និងជំងឺធាត់ហួស ចំពោះកុមារអាចមានមូលហេតុ និងកត្តាជម្រុញជាច្រើនរួមមាន៖ •កត្តាចំណីអាហារ៖ ក្មេងៗចូលចិត្តបរិភោគអាហារសម្បូរដោយខ្លាញ់ ហើយមានកាឡូរីខ្ពស់ ព្រោះតែងាយស្រួលក្នុងការទិញ និងមានរសជាតិឆ្ងាញ់ (fast food)។ •កត្តាអសកម្មភាព៖ កុមារគ្មានការនិយមលេងកម្សាន្ត ហាត់កីឡា នេះក៏ព្រោះតែមានការកើនឡើងនូវបច្ចេកវិទ្យាថ្មីៗ។ •កត្តាតំណពូជ៖ តាមការសិក្សាមួយបានបង្ហាញថា ឳពុកម្តាយធាត់ទាំងពីរនាក់ អាចមានហានិភ័យខ្ពស់ដល់កូន រហូតដល់៨០% បើធាត់តែម្នាក់ក្នុងចំណោមពួកគាត់ អត្រាហានិភ័យអាចនៅត្រឹម៤០% ប៉ុន្តែអាចមានហានិភ័យត្រឹម៧% ទោះជាគ្មាននរណាម្នាក់ធាត់ក៏ដោយ។ ម៉្យាងទៀត ជំងឺក្រូម៉ូសូមទី២១ រួមនឹង ជំងឺ Turner Syndrome ក៏ជាជំងឺតពូជ ដែលអាចឲ្យក្មេងប្រឈមនឹងធាត់ហួសនេះដែរ។ •ការប្រើប្រាស់ថ្នាំ៖ ភាគច្រើនគឺពពួកអាំងស៊ុយលីន ថ្នាំពន្យារកំណើត និងពពួក Cortisol។ •ជំងឺអង់ដូគ្រីន៖ កង្វះអ័រម៉ូនទីរ៉ូអ៊ីត ឬកង្វះអ័រម៉ូនលូតលាស់ (Growth Hormone)។ •កត្តាចិត្តសាស្រ្ត៖ កុមារមួយចំនួនចូលចិត្តញ៉ាំរាល់ពេលដែលពួកគេធុញទ្រាន់ និងតានតឹងក្នុងអារម្មណ៍។ •កត្តាបរិយាកាស៖ ការផ្សព្វផ្សាយអំពីចំណីអាហារដែលប៉ះពាល់ដល់សុខភាពក្រោមរូបភាពផ្សេងៗ។ •កត្តាសង្គម និងវប្បធម៌៖ ទម្លាប់ក្នុងការបរិភោគក្នុងគ្រួសារ ក៏ដូចជាឳពុកម្តាយជាដើម។ រោគសញ្ញា និងការធ្វើរោគវិនិច្ឆ័យ កុមារម្នាក់អាចកំណត់បានថាលើសទម្ងន់ តាមការគណនាសន្ទស្សន៍ទម្ងន់ (BMI) ដោយយកទម្ងន់(គិតជាគីឡូក្រាម)ចែកជាមួយកម្ពស់(គិតជាម៉ែត្រ)លើកជាការេ។ ជាលទ្ធផល ទទួលបាន៖ •ខ្វះទម្ងន់៖  < ១៨,៥ •ធម្មតា៖ ១៨,៥-២៥ •លើសទម្ងន់៖  ២៥-៣០ •ធាត់ហួស៖  > ៣០ ការព្យាបាល វាពិតជាមានការលំបាកក្នុងការព្យាបាលក្មេងដែលមានបញ្ហានេះ ព្រោះវាតម្រូវឲ្យមានការចូលរួមជាក្រុម ពីគ្រូពេទ្យជំនាញជាច្រើន រួមមាន គ្រូពេទ្យផ្នែករោគកុមារ អ្នកឯកទេសខាងចំណីអាហារ និងគ្រូពេទ្យឯកទេសចិត្តសាស្រ្ត ទាំងគ្រួសារ និងកុមារផ្ទាល់។ គោលការណ៍សំខាន់ក្នុងការព្យាបាលរួមមាន៖ •ការអប់រំ និងលើកទឹកចិត្តពីគ្រួសារ  សាលារៀន ព្រមទាំងគ្រូពេទ្យ •ការផ្លាស់ប្តូររបបចំណីអាហារ •ការបង្កើតសកម្មភាពដូចជារត់លេង ឬហាត់ប្រាណ •ឳពុកម្តាយត្រូវដើរជាគម្រូ •ការប្រើប្រាស់ថ្នាំ ជាប្រភេទថ្នាំលេប ដែលមានការណែនាំពីគ្រូពេទ្យឲ្យបានត្រឹមត្រូវ •ការវះកាត់ខ្លាញ់ ពិសេសខ្លាញ់ក្បាលពោះ លុះត្រាតែនៅក្នុងករណីមានផលវិបាកណាមួយកើតឡើងដែលតម្រូវការឲ្យមានការវះកាត់ទើបបានប្រើវិធីនេះ។ ផលវិបាក ករណីមិនទទួលយកការព្យាបាលឲ្យទាន់ពេលវេលាទេនោះ កុមារអាចប្រឈមនឹងបញ្ហាមួយចំនួនដូចជា៖ •បញ្ហាបេះដូង និងសរសៃឈាម៖ លើសឈាមកើនឡើងពពួកខ្លាញ់ក្នុងសរសៃឈាម ដាច់សរសៃឈាមខួរក្បាល •ប្រឈមនឹងជំងឺសួត៖ ជំងឺហឺត ជំងឺស្ទះផ្លូវដង្ហើមស្លាប់ ឬដេកស្លាប់ (sleep apnea) •ប្រឈមនឹងជំងឺតម្រងនោម៖ រលាកតម្រងនោម •ប្រឈមនឹងជំងឺក្រពះពោះវៀន ថ្លើម៖ ងាយហើមពោះ ក្រួសក្នុងថង់ទឹកប្រម៉ាត់ ច្រាលទឹកក្រពះ ខ្លាញ់រុំថ្លើមទៅជាក្រិនថ្លើម •ប្រឈមនឹងជំងឺអង់ដូគ្រីន៖ ជំងឺទឹកនោមផ្អែមប្រភេទ២ •ប្រឈមនឹងជំងឺស្បែក៖ ដុះផ្សិត និងប្រេះស្រកា •វិបត្តិសាច់ដុំ និងឆ្អឹង៖ ងាយបាក់ឆ្អឹង និងពុកឆ្អឹង •ប្រឈមនឹងបញ្ហាផ្លូវចិត្ត៖ ធ្លាក់ទឹកចិត្ត ថយចុះគុណភាពជីវិត លែងចង់ទៅរៀន ឯកកា ដកខ្លួនពីសង្គម •ជំងឺមហារីក៖ មហារីកសុដន់ មហារីកមាត់ស្បូន និងមហារីកថ្លើម។ ការបង្ការ នេះមិនមែនជាជំងឺឆ្លងទេ ហើយវាអាចការពារបានដោយវិធីមួយចំនួន៖ • កុមារខ្លួនឯងផ្ទាល់៖  ត្រូវកំណត់ការបរិភោគអាហារណាដែលសម្បូរដោយជាតិខ្លាញ់ និងស្ករ បង្កើនការបរិភោគបន្លែ និងសកម្មភាពកីឡាឲ្យបានច្រើន រួមទាំងផ្លាស់ប្តូររបៀបក្នុងការរស់នៅដូចជា កាត់បន្ថយការជិះយានជំនិះ ឬអង្គុយមួយកន្លែងលេងហ្គេមជាដើម។ •សាលារៀន ៖ ត្រូវផ្តល់ឲ្យនូវរបបអាហារសុខភាពអប់រំ ព្រមទាំងបង្ហាញនូវផលប៉ះពាល់ដល់ក្មេង ពីការបរិភោគមិនល្អមួយចំនួន។ •គ្រួសារ ៖ ត្រូវធ្វើការផ្លាស់ប្តូរទម្លាប់ក្នុងការញ៉ាំ និងការរស់នៅ។ គ្មានអព្ភូតហេតុធ្វើឲ្យស្គមនោះទេ គឺមានតែការធ្វើឲ្យមានតុល្យភាពរវាងការញ៉ាំ និងការលេងកីឡាប៉ុណ្ណោះ ទើបអាចរក្សានូវទម្ងន់បានល្អ... ©2017រក្សាសិទ្ធិគ្រប់យ៉ាងដោយHealthtime Corporationចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Other Diseases Parenting Weight Management
Share
Top