Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Aug 08, 2017 |
  • 8 years ago |
  • 21.6K views

ចេះតែអស់កម្លាំង ហើយមានអារម្មណ៍ថាខ្សោយៗ​ តាមពិតបែបហ្នឹងសោះ...

តើអ្នកធ្លាប់មានអារម្មណ៍ថាខ្សោយ គ្មានកម្លាំង នៅក្នុងខ្លួនដែរឬទេ? អ្នកប្រាកដជាឆ្ងល់ថា ហេតុអ្វីបានជាអ្នកចេះតែខ្សោយ ល្ហិតល្ហៃក្នុងខ្លួន ហើយជួនកាល​ អ្នកអាចគិតថា ខ្លួនឯងមានជំងឺ ឬមកពីធ្វើការច្រើនពេក លើសកម្លាំង។ល។​ ​ ហេលស៏ថាម នឹងលើកនូវបញ្ហា៥យ៉ាង​ ដែលធ្វើឲ្យអ្នកអស់់កម្លាំង ចុះខ្សោយ និងទ្រុឌទ្រោម​​ ដើម្បីឲ្យប្រិយមិត្តអានទាំងអស់បានយល់ពីមូលហេតុ និងគួរធ្វើការជៀសវាង។ បាត់បង់ជាតិទឹក៖​   នៅពេលដែលអ្នកបាត់បង់ជាតិទឹកប្រហែលជា៣ភាគរយនៃទម្ងន់របស់អ្នក ធ្វើឲ្យរាងកាយមាន សភាពចុះខ្សោយ អស់កម្លាំង ល្ហិតល្ហៃ និងចង់សម្រាក។ មនុស្សខ្លះយល់ថាខ្លួនអស់កម្លាំងដោយសារតែញុំអាហារមិនបានគ្រប់គ្រាន់ តែតាមពិត មកពីការបាត់បងជាតិទឹក នៅក្នុងខ្លួន ។ ដូចនេះ នៅពេលអ្នកឃ្លាន សូមសាកល្បងញ៉ាំទឹក ២កែវ ជាមុនសិន ដើម្បីពិនិត្យមើលថា រាងកាយអ្នក ត្រូវការទឹក ឬអាហារ។ អ្នកគួរតែឩស្សាហ៏ ទទួលទានទឹកឲ្យបាន​ ញឹកញាប់ ដើម្បីជៀសវាងការខ្សោះ អស់កម្លាំង​ កុំចាំដល់ពេលស្រេកទឹក ទើបរកទឹក ញ៉ាំនោះ។ ទូរស័ព្ទដៃ៖​​   ការមើលទូរស័ព្ទមុនពេលចូលគេងធ្វើឲ្យខួរក្បាលរបស់អ្នកមានសកម្មភាព ហើយនឹងពិបាកក្នុងការឈប់សម្រាកវិញ។​ គ្រឿងម៉ាស៊ីន មានពណ៏ខៀវ នៅក្នុងទូរស័ព្ទ អាចប៉ះពាល់អ័រម៉ូនមេឡាតូនីននៅពេលគេង ។ ការស្រាវជ្រាវឆ្នាំ ២០១១ National Sleep Foundation បានរកឃើញថា មានមនុស្ស ២០% ក្នុងចន្លោះអាយុ ពី១៩ដល់២៩ឆ្នាំ ត្រូវបានដាស់ដោយសម្លេងទូរស័ព្ទរោទិ៍ សម្លេងសារ​ ឬអ៊ីម៉ែល យ៉ាងតិច ពីរទៅបីដង ក្នុងមួយយប់ៗ ដែលធ្វើឲ្យ អ្នកគេងមិនបានគ្រប់គ្រាន់ ទៅជាហេវហត់អស់កម្លាំង ដូចនេះ អ្នកគួរតែបិទទូរស័ព្ទមុនគេង ។ ថ្នាំពេទ្យ៖   ថ្នាំពេទ្យជាច្រើនបានលាក់ទុក នូវសារធាតុធ្វើឲ្យខ្សោយថាមពល។ នៅក្នុងចំណោមថ្នាំទាំងអស់ ​ថ្នាំកែរោគ ខ្សោយកម្លាំង និងថ្នាំព្យាបាល ទប់ទល់នឹង ការឡើងខ្ពស់នៃសម្ពាធឈាម មានឥទ្ធិពលធ្វើឲ្យអ្នកអស់កម្លាំង បន្ទាប់ពីការទទួលទានវារួច។ បើសិនអ្នកទើបតែ ចាប់ផ្ដើមសាកល្បងប្រើថ្នាំ ប្រភេទនេះ លើកដំបូង ហើយវាធ្វើឲ្យអ្នកមានអារម្មណ៏មិនស្រួល អ្នកគួរតែប្រញាប់់ទៅជួបពេទ្យ  ដើម្បីពិភាក្សានឹងពិនិត្យឡើងវិញ។ បើសិនជាគ្មានបញ្ហាអ្វីនោះទេ អ្នកគួរតែ​ ទទួលទានវាមុនពេលចូលគេង ទើបប្រសើរ។ ហាត់ប្រាណហួសកម្រិត៖​ លំហាត់ប្រាណ ត្រឹមត្រូវ សមស្របនឹងរាងកាយអ្នក នឹងនាំមកនូវសុខភាពល្អ រាងកាយមាំមួនដល់អ្នក ចៀសវាងបាននូវ​ជំងឺបៀតបៀន មួយចំនួន។ ទន្ទឹមនឹងនេះ ការធ្វើលំហាត់ប្រាណហួសកម្រិត ជាការណ៏មួយ ធ្វើឲ្យថាមពលរបស់អ្នក ត្រូវបានបំផ្លាញទៅវិញ ហើយឆាប់អស់កម្លាំង។​ ដូចនេះ អ្នកមិនគួរ ហាត់ប្រាណជ្រុលពេកនោះទេ គ្រាន់តែហាត់ដើម្បីសុខភាពល្អទៅបានហើយ កុំព្យាយាមឲ្យហួសប្រមាណ។  ​ ខ្វះជាតិដែក៖ សារធាតុរ៉ែ ដឹកជញ្ជូនអុកស៊ីសែនទៅជុំវិញរាងកាយរបស់អ្នកនឹងជម្រុះនូវកាកសំណល់ពីកោសិកា។ បើសិនជារាងកាយមិនបានទទួល អុកស៊ីសែន ១៨ មីលីក្រាម​ ក្នុងមួយថ្ងៃទេ រាងកាយរបស់អ្នកនឹងធ្វើការខុសប្រក្រតី ហើយធ្វើឲ្យអ្នកមានអារម្មណ៏ថាអស់កម្លាំងខ្លាំង និងចុះខ្សោយទៀតផង។ កម្រិតជាតិដែកទាប​ក្នុងអាហារ អាចធ្វើឲ្យអ្នកមានជំងឺខ្វះជាតិដែក និងខ្វះឈាមក្នុងរាងកាយ។​ បើសិនជាអ្នកមានអារម្មណ៏ថាស្ពឹកខ្លួន អស់កម្លាំងខ្លាំង អ្នកគួរតែទៅជួបនឹងគ្រូពេទ្យ ដើម្បីធ្វើតេស្តឈាម ឬញ៉ាំអាហារបំប៉នបន្ថែម។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។  

Health Tips
Share
  • Aug 08, 2017 |
  • 8 years ago |
  • 9.6K views

ទំនាក់ទំនងជំងឺធ្លាក់ទឹកចិត្ត និងការធ្វើអត្តឃាត ពីអ្នកឯកទេសចិត្តសាស្រ្ត

អត្រាធ្វើអត្តឃាតចំពោះមនុស្សវ័យក្មេងមានកើនឡើងខ្ពស់ជាងមនុស្សធម្មតា​ ព្រោះពួកគេច្រើនតែរស់នៅជាមួយនឹងបញ្ហាផ្លូវចិត្ត ដូច្នេះ ពួកគេគួរតែដឹង​អំពីរោគសញ្ញាប្រកាសអាសន្នរបស់វា និងអ្វីដែលត្រូវធ្វើ។ លោក ហឿ សេធុល អ្នកឯកទេសពិគ្រោះយោបល់ផ្លូវចិត្ត និងជាអ្នកចិត្តសាស្រ្ត បានផ្តល់កិតិ្តយស ដើម្បីបកស្រាយនូវសញ្ញាទូទៅ និងដំណោះស្រាយចំពោះការធ្វើអត្តឃាតដូចខាងក្រោម៖ អត្តឃាតកម្ម និងវ័យរបស់មនុស្សអាចប្រឈម អត្តឃាតកម្មមានន័យថា គឺជា«ទង្វើទាំងឡាយណាដែលបង្កឲ្យមានគ្រោះថ្នាក់ដល់បុគ្គលខ្លួនឯងដោយចេតនារហូតដល់បាត់បង់អាយុជីវិត ប្រសិនបើមិនមានអន្តរាគមន៍ពីក្រុមគ្រួសារ ឬមិត្តភក្តិ»។ តាមការសិក្សាស្រាវជ្រាវនៅប្រទេសកម្ពុជាយើង គេរកឃើញថា មនុស្សដែលប្រឈមនឹងការធ្វើអត្តឃាត ក្នុងកម្រិតច្រើនជាងគេគឺ​  វ័យមនុស្សជំទង់មានអត្រាច្រើនជាងមនុស្សចាស់។ ប្រសិនបើស្ថិតនៅប្រទេសកំពុងអភិវឌ្ឍមួយចំនួន ដូចជា ប៉ែកអឺរ៉ុប ជាដើម អត្រានៃការធ្វើអត្តឃាតខ្ពស់ភាគច្រើនជាមនុស្សចាស់។​ ដោយឡែក នៅក្នុងបរិបទប្រទេសកម្ពុជាយើងរកឃើញមនុស្សវ័យកណ្តាលចាប់ពីអាយុ ២០ឆ្នាំជាង រហូតដល់អាយុជាង៤០ឆ្នាំជាអត្រាដែលធ្វើអត្តឃាតខ្ពស់។ អាកប្បកិរិយាគួរកត់សម្គាល់នៃការធ្វើអត្តឃាត មនុស្សដែលងាយនឹងមានទំនោរចិត្តធ្វើអត្តឃាតបំផុត គឺមនុស្សដែលមានការធ្លាក់ទឹកចិត្ត នៅពេលរងសម្ពាធផ្នែកផ្លូវចិត្តធ្ងន់ធ្ងរ។ ម៉្យាងទៀត យើងមើលតាមការស្វែងយល់ពីលក្ខណៈនៃការធ្លាក់ទឹកចិត្តរបស់មនុស្សនោះ ដើម្បីឲ្យអាចដឹងថា គាត់មានអាកប្បកិរិយាបែបណាដែលងាយនឹងធ្វើអត្តឃាត។ មនុស្សមានការធ្លាក់ទឹកចិត្ត អាចបណ្តាលមកពីបញ្ហាមួយចំនួនដូចជា មានបញ្ហាទុក្ខកង្វល់អ្វីមួយក្នុងគ្រួសារ ជួបឧបសគ្គមួយធ្ងន់ធ្ងរក្នុងឆាកជីវិត ហើយ ពេលជួនបញ្ហា ដូច្នោះ គឺគាត់បង្ហាញឃើញអាការៈធ្លាក់ទឹកចិត្តមួយចំនួនដូចជា៖ · មានអារម្មណ៍ស្រុតចុះជាមួយនឹងភាពក្រៀមក្រំ សោកសៅ និងបង្ហាញពីភាពអស់សង្ឃឹម ដោយគិតថាជីវិតគ្មានន័យ · ពុំចាប់អារម្មណ៍ ពុំសប្បាយរីករាយនឹងអ្វីដែលខ្លួនធ្លាប់ចូលចិត្ត · ពុំសូវចងចាំបានល្អ ភ្លេចភ្លាំងច្រើន · ចូលចិត្តនៅឯកោ ជួនកាលមិនសូវចាប់អារម្មណ៍ក្នុងការថែទាំខ្លួនប្រាណ · អសកម្មក្នុងការសិក្សា ឬការងារផ្សេងៗក្នុងជីវិតប្រចាំថ្ងៃ · ករណីធ្ងន់ធ្ងរបំផុតចំពោះអ្នកធ្លាក់ទឹកចិត្ត គឺច្រើនមានអារម្មណ៍ទុទិដ្ឋិនិយម អស់សង្ឃឹមក្នុងជីវិត ហើយប៉ុនប៉ងធ្វើអត្តឃាត។ មនុស្សមានទំនោរអត្តឃាតជាង ៧០%បង្ហាញអាកប្បកិរិយាឲ្យយើងដឹងមុន ដូច្នេះ យើងអាចការពារបានតាមរយៈការបង្ហាញខាងលើនោះ។ ហើយម៉្យាងទៀត គេអាចបង្ហាញឲ្យដឹងតាមរយៈពាក្យសម្តីថ្លោយមកកាន់យើង។ ផលប៉ះពាល់នៃមនុស្សធ្វើអត្តឃាតចំពោះកូនៗ យោងតាមការសិក្សាស្រាវជ្រាវបានឲ្យដឹងថា មិនត្រឹមតែការធ្វើអត្តឃាតប៉ុណ្ណោះទេដែលជះឥទ្ធិពលដល់កូនៗ សូម្បីតែអំពើហឹង្សាក្នុងគ្រួសារក៏មានឥទ្ធិពលដែរ។ បើសិនជានៅក្នុងគ្រួសារមានសមាជិកណាម្នាក់ ធ្លាប់ធ្វើអត្តឃាត អ្នកជំនាន់ក្រោយក្នុងគ្រួសារ​ គឺមានទំនោរចិត្តក្នុងការធ្វើអត្តឃាតខ្ពស់។ ចំណុចនេះមិនមែនជាតំណពូជនោះទេ ប៉ុន្តែវាជាគំរូមិនល្អក្នុងគ្រួសារ។ វាហាក់ដូចជា អំពើហឹង្សាក្នុងគ្រួសារដែរ បើសិននៅក្នុងគ្រួសារហ្នឹង មានអ្នកណាម្នាក់ចូលចិត្ត​ ប្រើអំពើហឹង្សាក្នុងគ្រួសារ អ្នកជំនាន់ក្រោយក៏មានទំនោរចិត្តទៅរកអំពើហឹង្សាដែរ។ មូលហេតុនៃការធ្វើអត្តឃាត វាអាស្រ័យទៅលើបរិបទវប្បធម៌នៃប្រទេសនីមួយៗ។ ក្នុងន័យទូលំទូលាយ នៅក្នុងបរិបទប្រទេសមួយចំនួន ដូចជា ប្រទេស ជប៉ុន និងកូរ៉េ អត្រាធ្វើអត្តឃាត​ខ្ពស់ជាងគេក្នុងពិភពលោក ប៉ុន្តែមូលហេតុមានខុសៗគ្នា។ អ្នកដែលធ្វើអត្តឃាតភាគច្រើននៅប្រទេសជប៉ុន និងកូរ៉េ គឹទាក់ទងទៅនឹងកិតិ្តយស មុខមាត់​នៅក្នុងសង្គម មានន័យថាវប្បធម៌នៃប្រទេសទាំងពីរនេះឲ្យតម្លៃទៅលើកិតិ្តយស មុខមាត់ជាធំ។ ប្រសិនបើបានធ្វើអ្វីមួយដែលនាំឲ្យអាប់ឱនខ្លាំងដល់កិត្តិយសគ្រួសារ គេងាយ​នឹងធ្វើអត្តឃាត ដើម្បីបញ្ជាក់ថា គេមានទំនួលខុសត្រូវ។ ដោយឡែក នៅស្រុកខ្មែរយើង អ្នកដែលងាយធ្វើអត្តឃាតភាគច្រើន គឹដោយសារសម្ពាធគ្រួសារ និងកត្តាជីវភាព។ ម៉្យាងទៀត ក្នុងរយៈពេលចុងក្រោយនេះ យើងឃើញថាមានស្ត្រីមួយចំនួន​បានធ្វើអត្តឃាត ដោយសារស្វាមីរបស់ខ្លួនបង្កើតទំនាក់ទំនងស្នេហាជាមួយនារីដទៃ(ផិតក្បត់នាង)។ ប្រតិកម្មផ្លូវចិត្ត នៅពេលឃើញមនុស្សជាទីស្រឡាញ់ធ្វើអត្តឃាត បើយោងតាមបទពិសោធន៍នៃការសិក្សាយោបល់ផ្នែកផ្លូវចិត្ត លោកក៏បានមានប្រសាសន៍បន្ថែមថា «នៅពេលមនុស្សម្នាក់ បានឃើញមនុស្សជាទីស្រឡាញ់​របស់ខ្លួនបានធ្វើអត្តឃាតនៅនឹងមុខ មនុស្សនោះនឹងប្រឈមមុខការប៉ះពាល់ផ្លូវចិត្ត»។ ការប៉ះពាល់ផ្លូវចិត្ត អាចធ្វើឲ្យគាត់មានអារម្មណ៍បាក់ស្បាតទៅជាខ្លាច ទៅជាភ័យ។​​ ម៉្យាងទៀត គាត់ក៏អាចមានអារម្មណ៍សោកសង្រែង មានអារម្មណ៍ថាបាត់បង់អ្វីគ្រប់យ៉ាង ក្នុងជីវិតរបស់គាត់ ក៏ចាប់ផ្តើមដកថយក្នុងសង្គម៕ អត្ថបទដោយ៖​ ​លោក ​ហឿ សេថុល អ្នកឯកទេស ពិគ្រោះយោបល់ផ្លូវចិត្ត និងជាអ្នកចិត្តសាស្ត្រ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Other Diseases Mental Health​ & Entertainment
Share
  • Aug 07, 2017 |
  • 8 years ago |
  • 6.8K views

ការវិនិយោគលើឧបករណ៍វេជ្ជសាស្រ្តទំនើប ក្នុងការលើកកម្ពស់ វិស័យសុខាភិបាល

ធនធានមនុស្ស និងធនធានបច្ចេកទេស ទន្ទឹមនឹងការរីកចំរើននៃវិទ្យាសាស្ត្រសុខាភិបាល ដែលរួមមានទាំងធនធានមនុស្ស ក៏ដូចជាបច្ចេកទេស​​​​ និងឧបករណ៍វេជ្ជសាស្ត្រសុខាភិបាលថ្មីៗផងដែរនោះ ដែលទាំងនេះជាចលករ មួយដ៏ធំក្នុងការលើកកម្ពស់ និងប្រសិទ្ធភាពកាន់តែខ្ពស់ ជាមួយនឹងផ្តល់ភាពងាយស្រួលដល់ការព្យាបាលផងដែរ។ តួយ៉ាងមន្ទីរពេទ្យសូរិយា ដែលជាមន្ទីរពេទ្យមួយ មានទាំងវេជ្ជបណ្ឌិតជំនាញឯកទេស និងមានឧបករណ៍វេជ្ជសាស្រ្ត ទំនើបៗ។ លោកវេជ្ជបណ្ឌិត អ៊ុន កែវសិលា ដែលជាវេជ្ជបណ្ឌិតជំនាញឯកទេស ផ្នែក ក្រពះ ពោះវៀន និងថ្លើម នៅមន្ទីរពេទ្យសូរិយាបានបញ្ជាក់ថា នៅមន្ទីរពេទ្យសូរិយា បានវិនិយោគទៅលើ ឧបករណ៍ឆ្លុះដែលជាបច្ចេកវិទ្យាចុងក្រោយ (ដែលនៅអឺរ៉ុប កំពុងតែប្រើបច្ចេកវិទ្យានេះ) មានតម្លៃដល់ទៅ ១៥មឺុនដុល្លារ ដែលសូម្បីតែមន្ទីរពេទ្យ ប្រទេសជិតខាងមួយចំនួន ក៏មិនទាន់មានដែរ។ គួរបញ្ជាក់ផងដែរថា មន្ទីរពេទ្យសូរិយាជា មន្ទីរពេទ្យមួយដែល ស្ថិតនៅចំកណ្តាលទីក្រុងភ្នំពេញ និងជាមន្ទីរមួយដែល សេវាកម្មលើផ្នែកជំងឺទូទៅ និងមានជំនាញឯកទេសសំខាន់ៗមួយចំនួន ដូចជា ផ្នែកសម្ភពនិងរោគស្ត្រី ជំនាញឯកទេសក្រពះ ពោះវៀន និងថ្លើម ក៏ដូចជាឬសដូងបាត ជំនាញឯកទេសជំងឺទឹកនោមផ្អែមផងដែរ។ អ្វីដែលពិសេសនៅមន្ទីរពេទ្យសូរិយា លោកវេជ្ជបណ្ឌិត សិលា បានឲ្យដឹងទៀតថា «នៅទីនេះ យើងក៏មាន ម៉ាស៊ីនកៀបសុដន់ ដើម្បីឆែកមើលរកដុំមហារីកផងដែរ ព្រោះយើងចង់លើកកម្ពស់ ការការពារឲ្យមុន ព្រោះយើងមិនចង់ឲ្យហួសពេល ហើយបានព្យាបាលទេ។»  ទស្សនៈវិស័យដើម្បីលើកកម្ពស់វិស័យសុខាភិបាល លោកវេជ្ជបណ្ឌិតសិលា បានសង្កត់ធ្ងន់លើចំនុចសំខាន់មួយ គឺផ្តល់សេវាទៅដល់អ្នកជំងឺ ក្នុងតំលៃមួយដែលអាចទទួលយកបាន ជាមួយបច្ចេកទេសទំនើប។ ស្របទៅនឹងទស្សនៈវិស័យមួយនេះ លោកវេជ្ជបណ្ឌិតបានបន្ថែមថា ដូច្នេះហើយទើបមន្ទីរពេទ្យសូរិយា វិនិយោគលើគ្រឿងម៉ាស៊ីនដែលមានតម្លៃថ្លៃ ទោះជាដឹងថា ការដាក់ប្រើប្រាស់មិនចំនេញសោះឡើយ ក៏ព្រោះតែដើម្បីលើក កម្ពស់តំហែទាំសុខភាពអ្នកជំងឺ ឲ្យបានកាន់តែល្អប្រសើរថែមមួយកម្រិតទៀត។ មិនតែប៉ុណ្ណោះ ចំពោះជំនាញឯកទេស ក្រពះ ពោះវៀន ថ្លើម នៅមន្ទីរពេទ្យសូរិយា ក៏បានសហការ ជាមួយគ្រូពេទ្យ ២នាក់ទៀត ក៏ដូចជាគ្រូពេទ្យជំនាញផ្នែក ឬសដូងបាត និងផ្នែកវះកាត់ផងដែរ។ ដើម្បីពង្រីកការយល់ដឹងបន្ថែម របស់ប្រជាពលរដ្ឋទូទៅ លោកវេជ្ជបណ្ឌិតបង្ហាញប្រាប់ថា ជាទូទៅនៅមន្ទីរពេទ្យសូរិយា តែងតែបណ្តុះបណ្តាល ចំណេះដឹងដល់អ្នកជំងឺ តាមរយៈ ប្រព័ន្ធ ទំនាក់ទំនងសង្គមផ្សេងៗ  ដោយបន្តុះបណ្តាលឲ្យយល់ពីជំងឺនីមួយៗផងដែរ។ មួយវិញទៀត ប្រសិនបើអ្នកជំងឺមកពិគ្រោះផ្ទាល់ ខាងមន្ទីរពេទ្យតែងតែប្រាប់ពី ដំណើរការដែលត្រូវព្យាបាល ហើយយើងឲ្យគាត់ជាអ្នកសម្រេច ចិត្តខ្លួនឯង ថាពួកគាត់ចង់ព្យាបាលតាមបែបណាមួយ។ ចំណេះដឹងបន្ថែមសម្រាប់ការថែទាំសុខភាព ក្នុងនោះផងដែរលោកវេជ្ជបណ្ឌិត សិលា បានគូសបញ្ជាក់ពីការថែទាំផ្នែកប្រព័ន្ធរំលាយអាហរ របស់ប្រជាជនទូទៅ នៅប្រទេសកម្ពុជាថា ប្រជាជនទូទៅភាគច្រើន មិនទាន់មានតំហែទាំល្អប៉ុន្មានឡើយ ដោយសារសព្វថ្ងៃ អាហារ មានគីមីច្រើន ហើយអ្នកជំងឺភាគច្រើនមិនសូវយកចិត្តទុកដាក់ ឲ្យបានម៉ត់ចត់។ បើនិយាយពីរបបអាហាររបស់ ពួកគាត់ ភាគច្រើន គឺមិនសូវទទួលទានបន្លែឲ្យបានច្រើន ព្រោះជាចាំបាច់ បើនិយាយពីប្រព័ន្ធរំលាយអាហារ គឺបន្លែបៃតង ការហាត់ប្រាណ និងការហូបទឹកឲ្យបានច្រើន ការហូបគ្រឿងស្រវឹងមានកម្រិត គឺជាផ្នែកមួយក្នុងការថែទាំផ្នែកប្រព័ន្ធ រំលាយអាហារឲ្យបានល្អ បូករួមទាំងការទៅត្រួតពិនិត្យជាមួយគ្រូពេទ្យផងដែរ។  លោកគ្រូពេទ្យសិលា ក៏បានបន្ថែមទៀតថា ចំពោះអ្នកជំងឺដែលមានអាយុចាប់ពី ៥០ឆ្នាំឡើងទៅ គួរឆ្លុះក្រពះ ពោះវៀន ដើម្បីតាមដានសុខភាព ប្រព័ន្ធរំលាយអាហារ ទោះបីអត់មានរោគសញ្ញា ណាមួយក៏ដោយ តែបើគាត់មានបងប្អូន សាច់ឈាមបង្កើតរបស់គាត់ មានប្រវត្តិជំងឺ មហារីកពោះវៀន គាត់ត្រូវប្រឈម មុខគ្រោះថ្នាក់។ ដូច្នេះគាត់ចាំបាច់ត្រូវពិនិត្យឲ្យបានមុនអាយុ៥០ឆ្នាំ។ តែអ្នកជំងឺភាគច្រើន គ្រាន់តែលឺឆ្លុះ ក្រពះ ពោះវៀន គឺមានការភ័យខ្លាចបាត់ទៅហើយ ព្រោះកាលពីមុន ការឆ្លុះក្រពះ ពោះវៀន គឺមានការក្អូតចង្អោរ តែឥឡូវយើងប្រើថ្នាំឲ្យអ្នកជំងឺលេប ហើយសម្រាករយៈពេល១០ទៅ ១៥នាទី ទើបយើងធ្វើការឆ្លុះត្រួតពិនិត្យមើល។   ផលវិបាកដែលធ្លាប់ឆ្លងកាត់ លោកវេជ្ជបណ្ឌិត សិលាប្រាប់ឲ្យដឹងថា កន្លងមកខាងមន្ទីរពេទ្យក៏មាន ផលវិបាកមួយចំនួនផងដែរ ដែលកន្លងមកអ្នកជំងឺភាគច្រើនមកជួបយើង នៅហួសពេលក្នុងការព្យាបាលហើយ ដែលតាមការពិតទៅ ពួកគាត់មិនបានធ្វើការព្យាបាល និងការពារឲ្យបានត្រឹមត្រូវ។ លោកវេជ្ជបណ្ឌិតក៏បានធ្វើការ ប្រៀបធៀបពីដំណើរការធ្វើការព្យាបាលផងដែរថា« បើប្រៀបធៀបជាមួយនឹងស្រុកបារាំង ចំពោះការចំនាយផ្សេងៗ គឺជាទំនួលខុសត្រូវរបស់រដ្ឋ ហេតុនេះតំលៃនៃការព្យាបាលមិនបានចោទជាបញ្ហា។ តែចំពោះស្រុកខ្មែរយើងខុសគ្នា ព្រោះការចំនាយជាបន្ទុករបស់អ្នកជំងឺទាំងស្រុង ដូចនេះការព្យាបាលគឺមើលថាជំងឺមួយណា​ ធ្ងន់ធ្ងរជាង។» ដោយប្រៀបធៀបការទៅពិគ្រោះនៅក្រៅប្រទេស និងក្នុងស្រុក របស់អ្នកជំងឺផងដែរថា ពេលពួកគាត់ត្រូវមកជួបពេទ្យក្នុងស្រុកច្រើនដង គាត់តែងតែមិនពេញចិត្ត បើគាត់ទៅពេទ្យក្រៅប្រទេស ត្រូវអស់លុយច្រើនក៏ពួកគាត់មិនមាត់ដែរ។  យើងមើលឃើញថា  អ្នកជំងឺមានកំរិតយល់ដឹងរបស់គាត់នៅមានកំរិតនៅឡើយ។ ជាចុងក្រោយ លោកវេជ្ជបណ្ឌិត សិលា បង្ហាញថាគោលការណ៍សំខាន់ ក្នុងនាមជាវេជ្ជបណ្ឌិត គឺទី១ ត្រូវគោរពក្រមសីលៈធម៌គ្រូពេទ្យ ត្រូវមានសុជីវធម៌ ហើយអ្វីដែលសំខាន់ គឺត្រូវគិតពីផលប្រយោជន៍របស់អ្នកជំងឺជាចំបង។ ពេលយើងទទួលអ្នកជំងឺ មកព្យាបាល យើងត្រូវគិតយ៉ាងម៉េចឲ្យអ្នកជំងឺ ចំណាយអស់តិចបំផុត ហើយពេលគាត់ចំនេញវិញបានច្រើន។ ជាចុងក្រោយលោកវេជ្ជបណ្ឌិត ក៏បានផ្តល់ជាសារដល់ប្រជាពលរដ្ឋទូទៅថា «ខ្ញុំ គឺគ្រាន់តែចង់ឲ្យប្រជាជនយើង ធ្វើការត្រួតពិនិត្យសុខភាពរបស់គាត់ ទោះបីគាត់អត់មានរោគសញ្ញាអ្វីក៏ ដោយ»៕   

Other Diseases News & Events News & Events
Share
  • Aug 07, 2017 |
  • 8 years ago |
  • 4K views

[ខ្លឹមៗ] មនុស្សវ័យណាគួរទៅពិនិត្យផ្នែកប្រព័ន្ធរំលាយអាហារ

ផ្នែកប្រព័ន្ធរំលាយអាហារ ដើរតួនាទីយ៉ាងសំខាន់ក្នុងការកិនបំបែកចំណីអាហារ និងស្រូបយកសារធាតុចិញ្ចឹម តែបើកាលណាប្រព័ន្ធរំលាយអាហារយើងមិនល្អនោះ វាអាចធ្វើឲ្យមានការរំខាន ដល់ការរស់នៅរបស់យើង ដែលធ្វើឲ្យគុណភាពនៃការរស់នៅ របស់យើងថយចុះផង។ លោកវេជ្ជបណ្ឌិត ឈាង​ ស៊ីដេត ប្រធានប្រតិបត្តិនៃគ្លីនិក អេគីប បានបង្ហាញពីក្រុមអាយុធំៗ​ ដែលពួកគាត់គួរតែមកពិគ្រោះ និងពិនិត្យជាមួយ​ គ្រូពេទ្យឯកទេស ផ្នែកប្រព័ន្ធរំលាយអាហារ៖ • មនុស្សធម្មតាមានអាយុចាប់ពី ៤៥ឆ្នាំឡើងទៅ ដែលមិនមានប្រវត្តិគ្រួសារ មានបញ្ហាក្រពះ ពោះវៀនធ្ងន់ធ្ងរ ឬមហារីក ពួកគាត់អាចពិនិត្យរៀងរាល់ ៣ ទៅ៥ឆ្នាំម្តង។ • តែផ្ទុយទៅវិញបើ គ្រួសាររបស់គាត់មាន ប្រវត្តិសុខភាពមិនល្អ ដូចជា បញ្ហាក្រពះ ពោះវៀន វាអាចទាក់ទងនឹង តំណរពូជ ឬសេនេទិច ឧទាហរណ៍ ដូចជា​ ដុំមហារីកជាដើម នោះគ្រូពេទ្យនឹងធ្វើការអង្កេត វិភាគរោគបន្តបន្ទាប់ ដើម្បីគួរទទួលការព្យាបាលឲ្យត្រឹមត្រូវ។ • ចំពោះលក្ខខណ្ឌមនុស្សវ័យក្រោម ៤៥ឆ្នាំ បើគាត់មាន ជំងឺបាក់ទឹកចិត្ត ឬតានតឹង ហើយមិនមានរោគសញ្ញាគំរាមកំហែងធ្ងន់ធ្ងរ ពេលខ្លះពួកគាត់ អាចប្រឹក្សា និង ធ្វើការពិនិត្យលើរបៀបរបបនៃការរស់នៅប្រចាំថ្ងៃរបស់គាត់ឡើងវិញ ឬអាចញ៉ាំថ្នាំតិចតួច។ បន្ទាប់មក បើអាការៈជំងឺនៅតែ​មិនមាន ភាពប្រសើរឡើង គ្រូពេទ្យឯកទេស នឹងធ្វើការអង្កេតបន្តបន្ទាប់ទៀត ដើម្បីមើលពីបញ្ហាផ្សេងៗទៀត។ ទាក់ទងនឹងការថែទាំសុខភាពទូទៅ ក៏ដូចជាផ្នែកក្រពះ ពោះវៀន លោកវេជ្ជបណ្ឌិតក៏បានផ្តាំផ្ញើផងដែរថា យើងត្រូវចាំបាច់យកចិត្តទុកដាក់ លើការថែទាំសុខភាព ទាំងការពិនិត្យ ទាំងការរស់នៅប្រចាំថ្ងៃ ដោយចៀសវាងការពិសារគ្រឿងស្រវឹង ចៀសវាងការពិសារអាហារ ដែលមិនមានអនាម័យ ឬមិនសមស្របតាមបច្ចេកទេសចំអិនល្អ និងត្រូវហាត់ប្រាណឲ្យបានទៀងទាត់។ ស្វែងយល់បន្ថែមអំពី តំហែទាំលើប្រព័ន្ធរំលាយអាហារ  ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Other Diseases Gastrointestinal
Share
  • Aug 07, 2017 |
  • 8 years ago |
  • 4.2K views

[ខ្លឹមៗ] អ្វីទៅជាកង្វះអុកស៊ីសែនលើការដកដង្ហើមរបស់ទារក?

ទារកដែលស្ថិតក្រោមអាយុមួយឆ្នាំ តែងតែប្រឈមមុខចំពោះជំងឺគ្រប់ប្រភេទ ដោយសារប្រព័ន្ធភាពស៊ាំនៅខ្សោយ ហើយអ្វីដែលគួរឲ្យកត់សម្គាល់នោះគឺ ការខ្វះអុកស៊ីសែនសម្រាប់ដកកង្ហើមរបស់ទារក។ បញ្ហាមួយនេះ មានហានិភ័យខ្ពស់ ព្រោះវាអាចកើតឡើងដោយចៃដន្យ និងដោយការបង្ករោគ នៅផ្លូវដង្ហើម ឬប្រព័ន្ធរំលាយអាហារ។ កង្វះអុកស៊ីសែនដកដង្ហើមរបស់ទារកត្រូវបានផ្តល់អត្ថន័យថា ជាការមិនអាចពន្យល់បាននូវការបញ្ឈប់ភ្លាមៗនៃការដកដង្ហើមក្នុងរយៈពេល២០វិនាទី​ ឬច្រើនជាងនេះ ឬក៏មិនមានការដកដង្ហើមរយៈពេលខ្លី រួមជាមួយនឹងការចុះខ្សោយនៃចង្វាក់បេះដូង ឬកង្វះអុកស៊ីសែននៅក្នុងសរសៃឈាម ភាពស្លេកស្លាំង និងមាន ឬគ្មានការចុះខ្សោយនៃសាច់ដុំបេះដូង។ ជាទូទៅ គឺសំដៅលើទារកដែលមានអាយុក្រោម ៣៧អាទិត្យ។ កង្វះអុកស៊ីសែនដកដង្ហើមលើទារក កើតមិនគ្រប់ខែ ត្រូវបានគេផ្តល់អត្ថន័យថា ជាការបញ្ឈប់ការដកដង្ហើមនៅពេលចុងក្រោយ និងភ្លាមៗយ៉ាងតិច ២០វិនាទី ឬរួមជាមួយនឹងដំណើរការ នៃការដើររបស់បេះដូងចុះខ្សោយ ឬជាមួយនឹងកង្វះអុកស៊ីសែន (Cyanosis) ចំពោះទារកដែលមានអាយុតិចជាង ៣៧អាទិត្យ។ វេជ្ជបណ្ឌិត ជា ​គឹមហោ ឯកទេសផ្នែករោគកុមារ មានប្រសាសន៍ជាចុងក្រោយថា ប្រសិនបើឪពុកម្តាយដែលមានទារកក្រោមអាយុមួយឆ្នាំ គួរឧស្សាហ៍សង្កេត មើលអាការៈមិនប្រក្រតីនៃការដកដង្ហើមរបស់ទារកតូចៗ និងគួរយកមកមន្ទីរពេទ្យជាបន្ទាន់ប្រសិនបើឃើញមានករណីសង្ស័យណាមួយកើតឡើង។ ស្វែងយល់បន្ថែម៖ កង្វះអុកស៊ីសែនលើការដកដង្ហើមរបស់ទារក ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Pregnancy & Baby
Share
  • Aug 07, 2017 |
  • 8 years ago |
  • 10.8K views

អតីតនិស្សិតអាហារូបករណ៍ជំនាញឯកទេសក្រពះ-ពោះវៀន-ថ្លើម ពីប្រទេសបារាំងចែករំលែកពីការរើសជំនាញ និងសិក្សានៅបរទេស

ការជ្រើសរើសជំនាញឯកទេស បន្ទាប់ពីការសិក្សាអស់រយៈពេល៦ឆ្នាំ នៅសាកលវិទ្យាល័យវិទ្យាសាស្ត្រសុខាភិបាល មិនមែនជារឿងដែលពិបាកខ្លាំង ឬងាយស្រួលនោះដែរ។ លោកវេជ្ជបណ្ឌិត អ៊ុន កែវសិលា ជានិស្សិតម្នាក់ ក្នុងចំណោមពីរនាក់ ដែលបានជាប់អាហារូបករណ៍ជំនាញឯកទេស ក្រពះ ពោះវៀន ថ្លើម ទៅសិក្សានៅប្រទេសបារាំង ក្នុងឆ្នាំ២០១៥- ២០១៦។ លោកវេជ្ជបណ្ឌិត បានសិក្សានៅទីក្រុងលីយ៉ង់ នៅសាកលវិទ្យាល័យ Claude Bernard Lyon1 រយៈពេល១ឆ្នាំ។ សព្វថ្ងៃលោកវេជ្ជបណ្ឌិត សិលា បម្រើការនៅមន្ទីពេទ្យព្រះកុសមៈ និងនៅមន្ទីរពេទ្យសូរិយាផងដែរ ជំនាញក្រពះ ពោះវៀន និងថ្លើម។   អ្វីដែលជួយក្នុងការសម្រេចជ្រើសរើសជំនាញមួយត្រូវតាមចំណង់ចំណូលចិត្ត? លោកវេជ្ជបណ្ឌិត សិលាបានប្រាប់ពីការរើសជំនាញមួយនេះថា សម្រាប់លោកវេជ្ជបណ្ឌិតផ្ទាល់ ពេលនោះលោកវេជ្ជបណ្ឌិបានចុះកម្មសិក្សា រយៈពេល១ ទៅ២ខែ ដើម្បីទៅសិក្សាស្វែងយល់បន្ថែមនៅមន្ទីរពេទ្យផ្ទាល់ ក៏ដូចជាដើម្បីសង្កេតមើលថា យើងពេញចិត្តនឹងជំនាញដែរឬទេ ហើយបើយើងយល់ថាយើងពិតជាស្រលាញ់ជំនាញមួយណាហើយអាចកំណត់ផ្លូវតទៅមុខទៀត ចៀសវាងការសម្រចដែលខុសពីចំណូលចិត្តខ្លួនឯង ដែលទោះជាចង់បកក្រោយបន្ទាប់ពីរើសហើយនោះ ក៏ពិបាកដែរ។ លោកសិលាបង្ហាញឲ្យដឹងថា ពេលដំបូងលោកក៏មិនជាសូវស្រលាញ់ជំនាញមួយនេះទេ​​ ដោយហេតុថាវាមិនស្អាត មានក្អួតចង្អោរ រាគ មានរាគឈាម មានក្លិនស្អុយ តែបន្ទាប់ពីបានឃើញពីទុក្ខលំបាក់របស់អ្នកជំងឺ និងការជួយព្យាបាលគាត់ហើយ លទ្ធផលដែលធ្វើឲ្យអ្នកជំងឺបានជាសះស្បើយ ជាកត្តាជំរុញទឹកចិត្តខ្ញុំឲ្យចាប់ផ្តើមស្រលាញ់ខាងជំនាញនេះ ហើយម្យ៉ាងវិញទៀតឯកទេសនេះមានការអភិវឌ្ឍតទៅមុខទៀតតាមការវិវឌ្ឍនៃឧបករណ៍ ឬម៉ាស៊ីនក្នុងការព្យាបាល។»  អ្វីដែលគួរត្រៀម ដើម្បីបានអាហារូបករណ៍ទៅសិក្សានៅក្រៅប្រទេស? លោកវេជ្ជបណ្ឌិត សិលា បានចែករំលែកបទពិសោធន៍មួយចំនួន  ពីការសិក្សារបស់លោកនៅប្រទេសបារាំងដែរថា ៖ «មុនពេលទៅបន្តការសិក្សានៅប្រទេសបារាំង យើងត្រូវត្រៀមខ្លួនឲ្យបានល្អ តួយ៉ាងយើងត្រូវមានកំរិតការសិក្សាល្អនៅសាលា ហើយអ្វីដែលសំខាន់គឺ ត្រូវមានកំរិតភាសាបារាំងល្អ ក្នុងលក្ខខណ្ឌកំណត់មួយ។» លោកវេជ្ជបណ្ឌិត ក៏បានបន្តឲ្យដឹងថា យើងត្រូវមានពិន្ទុភាសាបារាំងខ្ពស់ ដើម្បីជាប់អាហារូបករណ៍ មួយនេះដែលឧបត្ថម្ភគាំទ្រទាំងស្រុងដោយរដ្ឋាភិបាលបារាំង។  អ្វីដែលទទួលបានអំឡុងពេលសិក្សានៅបរទេស? លោកវេជ្ជបណ្ឌិត សិលា បានឲ្យដឹងផងដែរថា អាហារូបករណ៍ដែលលោកទទួលបាន គឺរួមបញ្ចូលទាំងថ្លៃការសិក្សា និងទទួលបានប្រាក់ខែគោលប្រហែល ១៤០០អឺរ៉ូ ដែលអាចរ៉ាប់រងការហូបចុក និងស្នាក់នៅផងដែរ។ ចំពោះការស្នាក់នៅ លោកសិលា ទទួលបានការអនុញ្ញាតឲ្យស្នាក់នៅក្នុងមន្ទីរពេទ្យ ដែលចំណាយអស់តិចជាង ការស្នាក់នៅខាងក្រៅ (ដោយការស្នាក់នៅក្នុងមន្ទីរពេទ្យអស់ត្រឹមតែ ១០០អឺរ៉ូ បើគិតជាលុយដុល្លារអាមេរិចប្រហែល ១២០ ហើយបើស្នាក់នៅខាងក្រៅត្រូវអស់ប្រហែល៥០០ ទៅ៦០០ឯណោះ)។  អ្វីជាផលវិបាកដែលជួបប្រទះអំឡុងពេលសិក្សានៅបរទេស? ចំពោះការសិក្សានៅប្រទេសបារាំង លោកវេជ្ជបណ្ឌិត សិលាបានរៀបរាប់ឲ្យដឹងពីផលវិបាកមួយចំនួន តួយ៉ាងគឺ ភាសាតែម្តង។ លោកបានបញ្ជក់ថា «ចំពោះការសិក្សានៅទីនោះមានការលំបាកខ្លាំង ដោយសារតែនៅទីនោះមានតែនៅមន្ទីរពេទ្យ និងនៅសាលាប៉ុណ្ណោះដែលប្រើប្រាស់ភាសាបារាំង ដូច្នេះបើទោះបីជាយើងរៀនបានច្រើនប៉ុណ្ណា ពេលដែលយើងទៅដល់ទីនោះ យើងមានអារម្មណ៍ថាពិបាកស្តាប់ ដោយសារភាគច្រើនគេនិយាយគ្នា ប្រើគ្រៀមភាសា ដូចនេះត្រូវចំណាយពេល ២ទៅ៣ខែដើម្បីបន្សាំខ្លួន។» មួយវិញទៀតនោះ លោកសិលាក៏បានលើកឡើងពីបញ្ហាអាកាសធាតុផងដែរ ដោយពេលលោកសិលាទៅដល់ដំបូង គឺក្នុងខែ១០ នៅទីនោះគឺចាប់ផ្តើម ត្រជាក់ ចុះដល់១០អង្សាសេ ដូច្នេះវាមានការលំបាកបន្តិចដែរ។ រឿងមួយទៀតផងដែរនោះគឺ ចំណីអាហារហូបចុក ព្រោះនៅបារាំង គេមិនបានហូបបាយដូចយើងឡើយ ហើយលោកវេជ្ជបណ្ឌិតប្រៀបធៀបថា បើទោះម្ហូបនៅទីនោះឆ្ងាញ់ ប៉ុណ្ណាក៏ដោយក៏មិនដូចនៅស្រុកខ្មែរដែរ។  ជាចុងក្រោយ ដូចដែលយើងដឹងហើយថា ការបន្តការសិក្សានៅកំរិតជាន់ខ្ពស់ និងជាពិសេសគឺការសិក្សាអប់រំនៅបរទេស ជាការប្រសើរ មួយដែលក្នុងការលើកកម្ពស់ និងអភិវឌ្ឍធនធានមនុស្សនៅកម្ពុជា និងជាពិសេសផ្នែកសុខាភិបាលតែម្តង។ លោកវេជ្ជបណ្ឌិត សិលាបានបញ្ជាក់ពីការយល់ដឹង យ៉ាងទូលំទូលាយបន្ទាប់ពីបានទទួលការសិក្សានៅប្រទេសបារាំងថា «អ្វីដែលពិសេសនោះគឺ ពេលដែលយើងទៅដល់ខាងក្រៅ យើងបានឃើញ បានដឹងរឿងរ៉ាវជាច្រើនដែលយើងអត់ដឹង ព្រោះមានបច្ចេកទេស មួយចំនួនដែលរហូតមកដល់សព្វថ្ងៃនេះ យើងមិនទាន់ឃើញប្រើនៅស្រុកយើងនៅឡើយទេ។» លោកសិលាក៏បានផ្តល់យោបល់មួយចំនួន ដល់សិស្សនិស្សិតដែល ចង់បន្តការសិក្សាទៅប្រទេសបារាំងផងដែរថា អ្វីដែលគួរត្រៀមសំខាន់ បំផុតនោះគឺត្រូវមានភាសាបារាំងល្អ។ បើយើងចេះខ្លាំង ទំនាក់ទំនងបានល្អ ការងារផ្សេងៗ ក៏ធ្វើឲ្យមានភាពងាយស្រួល ជាងមុនដែរ។ លោកសិលាក៏បានបន្ថែមផងដែរថា បើនិយាយពីរឿងអាកាសធាតុ ចំណីអាហារ ដូចជាមិនមែនជា បញ្ហាចោទខ្លាំងនោះទេ ព្រោះទៅបានតែមួយរយៈយើងនឹងទម្លាប់បាន។ មួយវិញទៀត ចំពោះបច្ចេកទេស ក៏យើងរៀនបានខ្លះដែរ តែបើកាលណាភាសាយើងទៅអត់រួចហើយ គឺមិនអាច ទៅរួចឡើយ ជាពិសេសចំពោះការទំនាក់ទំនងគ្នា ជាចំបាច់គឺជាមួយអ្នកជំងឺផ្ទាល់តែម្តង។  © 2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

Career & Education
Share
  • Aug 07, 2017 |
  • 8 years ago |
  • 6K views

ញ៉ាំត្រីចំណេញអ្វីខ្លះដល់សុខភាពបេះដូង?

បេះដូង គឺជាសរីរាង្គយ៉ាងសំខាន់សម្រាប់មនុស្ស ដែលមានតួនាទីស្រោចស្រពឈាម ទៅគ្រប់ផ្នែកនៃសារពាង្គកាយ ដូច្នេះ ការថែទាំបេះដូងឲ្យមានសុខភាព ជារឿងសំខាន់បំផុតដែលមនុស្សគ្រប់គ្នាត្រូវធ្វើ។ លោកស្រី Elisa Zied អ្នកឯកទេសរបបអាហារ អតីតអ្នកនាំពាក្យឲ្យសមាគមរបបអាហារអាមេរិក នឹងជាករីនិពន្ធសៀវភៅ «Nutrition at your fingertips» បានកត់សម្គាល់ថា ត្រីមានលក្ខណៈមិនដូចសាច់គោនោះទេ ពីព្រោះវាផ្ទុកនូវខ្លាញ់ធ្វើឲ្យស្ទះនៅសរសៃអាក់ទែកម្រិតទាប។ លើសពីនេះទៅទៀត សារធាតុ ប៉ូតាស្យូម ម៉ាញ៉េស្យូ​ម និងសារធាតុ Niacin នៅក្នុងត្រីជួយបញ្ចុះ សម្ពាធឈាម និងបង្កើនកម្រិតកូឡេស្តេរ៉ូលល្អនៅក្នុងរាងកាយ។​  ទោះជាយ៉ាងណា គុណសម្បត្តិលើកកម្ពស់សុខភាពបេះដូងរបស់ត្រី គឺនៅក្នុងអាស៊ីតធាតុ Omega3។ ខ្លាញ់ត្រីប្រភេទនេះជំនួយដល់សុខភាពបេះដូងបានច្រើនវិធី ដូចជាវាមានប្រសិទ្ធភាព ការពារសរសៃអាក់ទែពីការបំផ្លាញដោយការរក្សាកោសិកា គ្មានអេម្ល៉ូក្លូប៊ីន ពីការជាប់ស្អិតគ្នា ម្យ៉ាងទៀត វាមានគុណប្រយោជន៏បង្កើនកម្រិត កូឡេស្តេរ៉ូលល្អ បញ្ចុះកម្រិតសម្ពាតឈាម  និងកម្រិត tirglyceride និងការពារចង្វាក់បេះដូង ដើរមិនទៀង ដែលអាចបណ្ដាលឲ្យស្លាប់មួយរំពេច។ ក្នុងការសិក្សាស្រាវជ្រាវធ្វើឡើងចំពោះមនុស្ស៣០០០នាក់ ចុះផ្សាយនៅខែឧសភា ឆ្នាំ២០០៧ របស់ទស្សនាវដ្ដី សារធាតុចិញ្ចឹមវេជ្ជសាស្ត្រអាមេរិក ក្រុមអ្នកសិក្សាស្រាវជ្រាវបានរកឃើញថា «មនុស្សដែលទទួលទានត្រីចំនួន២ដងក្នុងមួយសប្ដាហ៏ ប្រឈមគ្រោះថ្នាក់នៃចង្វាក់បេះដូងដើរមិនប្រក្រតីគម្រាមកំហែងដល់អាយុកជីវិតក្នុងកម្រិត២៩% កម្រិតនេះទាបជាងមនុស្សដែលទទួលទានត្រីម្ដងម្កាល» ដោយសារមានភស្ដុតាងជាច្រើនបញ្ចាក់ថា ត្រីមានគុណសម្បតិ្តការពារបេះដូង ទើបសមាគមសុខភាពបេះដូងអាមេរិច ណែនាំមនុស្សឲ្យទទួលទានត្រី ឲ្យបាន២ដងក្នុងមួយសប្ដាហ៏៕ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Heart & Blood Vessels Vitamins & Nutrition
Share
  • Aug 05, 2017 |
  • 8 years ago |
  • 18.7K views

យាមនៅពេទ្យ មានអ្វីខ្លះគួរធ្វើ និងគួរចៀសវាង?

ក្នុងជីវិតជានិស្សិតពេទ្យ និងពេទ្យ ប្រាកដណាស់ គឺធ្លាប់ស្គាល់ច្បាស់ពាក្យថា«យាម»…គ្រាន់តែតិច និងច្រើន… អារម្មណ៍ពេលគេងយាម ដំបូងៗលក្ខណៈថា ទីស្ងាត់តែចិត្តមិនស្ងប់ ភ្នែកបិទតែចិត្តនៅបើក…ប្លែកកន្លែងមធ្យម ងំចេះតែគិតផ្តេសផ្តាស។ លុះក្រោយមក បានតែជាង១ខែ ក៏អាចបន្សាំខ្លួនបាន…អស់រយៈកាលប៉ុន្មានឆ្នាំមកនេះ មិនហ៊ាននិយាយថាជាអ្នកជំនាញ ឬមានបទពិសោធន៍អ្វីច្រើននោះទេ គ្រាន់តែនិយាយទៅតាមអ្វីដែលធ្លាប់បានឆ្លងកាត់កន្លងមក… បើគេចមិនបានហើយ អ្វីដែលត្រូវធ្វើនោះ គឺស្វែងយល់ពីទង្វើដែលគួរធ្វើ និងមិនគួរធ្វើ ដើម្បីឲ្យពេលវេលានោះមានតែរឿងល្អៗ និងភាពសប្បាយរីករាយ…ហើយខាងក្រោមនេះ ជាDos និង Don’ts សម្រាប់ពេលទៅយាមនៅមន្ទីរពេទ្យ… Dos មានភាពរួសរាយរាក់ទាក់ជាមួយនឹងបុគ្គលិកនៅទីនោះ ៖ ជាពិសេស នៅឆ្នាំដំបូងដែលត្រូវចុះស្តារ អ្នកត្រូវតែមានទំនាក់ទំនងល្អជាមួយគ្រប់គ្នានៅទីនោះ ហើយត្រូវចាំថាអ្នកទៅទីនោះ ដើម្បីរៀនសូត្រ មិនមែនដើម្បីមានបញ្ហា ឬបង្កជម្លោះជាមួយនរណាម្នាក់ឡើយ។ ការរាប់អាន និងបង្កើតចំណងមិត្តភាពជាមួយពួកគាត់ ប្រសើរជាងធ្វើឲ្យពួកគាត់ស្អប់អ្នក។ មានចិត្តចង់ជួយជានិច្ច ៖ ដរាបណាអ្នកមានចិត្តចង់ធ្វើការ និងចង់ចេះចង់ដឹងនោះ នឹងមានការងារច្រើនណាស់សម្រាប់សាកល្បង និងសិក្សា ហើយវាក៏ជាឱកាសសម្រាប់អភិវឌ្ឍជំនាញរបស់អ្នកផងដែរ។ មិនយល់មិនច្បាស់ ត្រូវសួរ ៖ ជាថ្មីម្តងទៀត ត្រូវតែចាំក្នុងចិត្តថា មូលហេតុចម្បងដែលអ្នកនៅទីនោះ គឺដើម្បីរៀនសូត្រ។ ពេលវេលាដែលត្រូវចំណាយនៅទីនោះ នឹងបង្រៀនអ្នកនូវបទពិសោធន៍ក្នុងការអនុវត្តជាក់ស្តែងដែលមិនអាចរកបាននៅក្នុងសៀវភៅ ឬឯកសារនោះទេ។ បន្ថែមពីលើអ្វីដែលអ្នកបានរៀនពីសាស្រ្តាចារ្យនៅសាលា អ្នកនឹងអាចពង្រឹងជំនាញរបស់អ្នកបន្ថែមទៀត ជាមួយនឹងបទពិសោធន៍នៅក្នុងមន្ទីរពេទ្យ។ យកអាហារមកជាមួយ ៖ ការធ្វើការងារនៅមន្ទីរពេទ្យ គឺបង្កឲ្យមានភាពនឿយហត់ ហេតុនេះហើយ អាហារគឺជាអ្វីដែលមិនអាចខ្វះបាន មិនថាសម្រាប់ខ្លួនអ្នក បុគ្គលិក និងមិត្តភក្តិនោះទេ។ អាហារនឹងជួយបង្កើនថាមពល ក៏ដូចជាភាពស្និទ្ធស្នាល។ មានស្មារតីរឹងមាំ ៖ ជាពិសេស នៅពេលយប់…កុំស្លន់ស្លោ និងគិតផ្តេសផ្តាស។ បើដឹងថាខ្លួនឯងខ្លាច ចៀសវាងការទៅណាមកណាតែម្នាក់ឯង យកល្អបបួលមិត្តភក្តិនៅបានជាគ្នា ក្នុងករណីដែលគិតថាមានអ្វីមិនស្រួល។ Don’ts កុំពាក់ព័ន្ធនឹងបញ្ហាលុយកាក់ ៖ សូមរំលឹកខ្លួនឯងថា អ្នកគ្រាន់តែជានិស្សិត ដែលនៅទីនោះដើម្បីចុះអនុវត្តនូវទ្រឹស្តីបានទទួលពីសាលា មិនមែនដើម្បីរកប្រាក់ចំណូលនោះឡើយ។ សូមចៀសវាងដាច់ខាតនូវការទទួលយកប្រាក់កាសពីអ្នកជំងឺ ឬក្រុមគ្រួសាររបស់អ្នកជំងឺ។ កុំរអ៊ូរទាំនៅចំពោះមុខអ្នកជំងឺ ៖ ក៏ដឹងថា…អ្នកមានភាពហត់នឿយ ដែលមានកិច្ចការងារត្រូវបំពេញច្រើន ហើយជួនកាលក៏ត្រូវគេងមិនគ្រាន់ដោយសារតែមានអ្នកជំងឺចូលមកពាក់កណ្តាលយប់ទៀត តែទោះជាយ៉ាងណាក៏ដោយ គឺត្រូវតែរក្សាជំហរខ្លួនឯងឲ្យបាន និងចេះបិទបាំងនូវអារម្មណ៍អវិជ្ជមានរបស់អ្នក។ ត្រូវតែធ្វើល្អ និងផ្តល់នូវការសេវាថែទាំ ក៏ដូចជាព្យាបាលដែលល្អប្រសើរបំផុតជូនដល់អ្នកជំងឺ។ ហាមលួចគេច ៖ កុំប្រើលេសយាមយប់ ដើម្បីដើរដាច់យប់ឲ្យសោះ។ អ្វីដែលសំខាន់ គឺគួរចៀសវាងការចេញពីពេទ្យពេលយប់ជ្រៅ ប្រសិនបើមិនមានភារៈចាំបាច់នោះទេ ព្រោះថាសន្តិសុខ និងសុវត្ថិភាពនាពេលយប់ គឺមិនល្អឡើយ។ ម្យ៉ាងទៀត ហាមដាច់ខាតនូវការលេងសើចចំពោះកាតព្វកិច្ចមួយនេះ។ សូមបញ្ជាក់ផងដែរថា នេះគ្រាន់តែជាមតិយោបល់ខ្លះៗប៉ុណ្ណោះ…អាចនឹងមានចំណុចមួយចំនួនដែលមិនបានលើកឡើង តែក៏សង្ឃឹមថាចំណុចខាងលើនឹងបានជាជំនួយខ្លះដល់មិត្តអ្នកអានជាពិសេសអ្នកដែលត្រូវឆ្លងកាត់បទពិសោធន៍មួយនេះ… ហើយក៏មិនភ្លេចអរគុណដល់មិត្តរបស់ខ្ញុំម្នាក់ ដែលជានិស្សិតពេទ្យ ហើយតែងតែផ្តល់ជាមតិយោបល់ និងចែករំលែកនូវបទពិសោធន៍របស់គេជានិច្ច...បើគ្មានគេ អត្ថបទមួយនេះ និងមួយចំនួនទៀត ក៏ប្រហែលជាមិនអាចមានវត្តមាននៅទីនេះបានដែរ...អរគុណ!!!

Career & Education
Share
  • Aug 05, 2017 |
  • 8 years ago |
  • 3.1K views

អត្ថបទពេញនិយមប្រចាំសប្តាហ៍ទី១នៃខែសីហា

ថ្វីត្បិតថាសន្ទុះនៃចំនួនអ្នកអានមិនមានការកើនឡើងខ្ពស់ ប៉ុន្តែកំណើននៃអ្នកប្រើប្រាស់ចូលរួមចែករំលែកចំណេះដឹងហាក់ដូចជាមានសន្ទុះខ្លាំង ដែលជាក់ស្តែង សម្រាប់សប្តាហ៍ទី១នៃខែសីហានេះ អត្ថបទដែលមានអ្នកចូលអានច្រើនជាងគេទាំង៣ សុទ្ធសឹងតែជាអត្ថបទដែលត្រូវបានចេញផ្សាយដោយសាធារណជន។ ចង់ដឹងថាមានអត្ថបទអ្វីខ្លះ? តាមដានខាងក្រោមនេះជាមួយគ្នា… រៀនពេទ្យមិនងាយស្រួល តែក៏អាចទៅរួចបានដោយរបៀបណាខ្លះទៅ?  លឺតែរៀនពេទ្យ គិតដល់អីមុនគេ? ប្រាកដជាគេគ្រប់គ្នា និយាយថាពាក្យ«មិនងាយស្រួល» នោះទេ តែ«ពិបាក»ហ្នឹង មិនមានន័យថា«មិនអាចទៅរួច» ឬ«មិនអាចធ្វើបាន» នោះទេ។ ព្រោះថាមាននិស្សិតពេទ្យមិនតិចទេ ដែលបានបញ្ចប់ការសិក្សាដោយជោគជ័យដែរជារៀងរាល់ឆ្នាំ។ ជាការចែករំលែកនូវបទពិសោធន៍ដល់និស្សិតក្នុងផ្នែកដូចគ្នា និស្សិតផ្នែកវេជ្ជសាស្រ្តមួយរូបបានធ្វើការចែករំលែកនូវគន្លឹះខ្លះៗដែលគាត់ផ្ទាល់ធ្លាប់បានប្រើប្រាស់ និងឆ្លងកាត់ក្នុងដំណើរនៃការសិក្សារបស់គាត់… ស្វែងយល់ ជំងឺធ្លាក់ទឹកចិត្ត  បុគ្គលគ្រប់រូបតែងតែមានអារម្មណ៍ស្រងូតស្រងាត់ ឬធ្លាក់ទឹកចិត្តក្នុងឱកាសណាមួយនៃដំណើរជីវិតរស់នៅ ប្រចាំថ្ងៃរបស់ពួកគេ ក៏ប៉ុន្តែសភាពបែបនេះនឹងបាត់ទៅវិញតែប៉ុន្មានថ្ងៃក្រោយមក។ នេះគ្រាន់តែជាប្រតិកម្មធម្មតា ប៉ុណ្ណោះ ផ្ទុយទៅវិញ ជំងឺធ្លាក់ទឹកចិត្ត ជាជំងឺធ្ងន់ធ្ងរទាំងក្នុងផ្នែកវេជ្ជសាស្រ្ត និងចិត្តសាស្រ្ត ដែលមានរយ:ពេលយូរជាង ធម្មតា និងប៉ះពាល់ដល់អារម្មណ៍ ការគិត ដំណេក អាកប្បកិរិយា តួនាទីមុខងារក្នុងសង្គម និងជីវិតរស់នៅប្រចាំថ្ងៃរបស់លោកអ្នក។ លោកវេជ្ជបណ្ឌិត យឹម សុបុត្រា ក៏បានបន្តទៀតថា… អត្ថប្រយោជន៍នៃការធ្វើអេកូសាស្រ្តថ្លើម  យើងទាំងអស់គ្នាសុទ្ធតែបានដឹងហើយថា ជំងឺរលាកថ្លើមគឺជាជំងឺដ៏កាចសាហាវមួយដែលតែ ធ្វើឲ្យមានការប៉ះពាល់ដល់សុខភាព និង អាយុជីវិតយើងបាន ប្រសិនបើយើងមានការធ្វេសប្រហែសមិនបានធ្វើការព្យាបាល និង តាមដានអំពីការវិវឌ្ឍនៃជំងឺក៏ដូចជាសភាពរបស់សាច់ថ្លើម ហើយជួនកាលវាអាចមានការវិវឌ្ឍលឿនរហូតដល់ដំណាក់កាលចុងក្រោយ (មហារីកថ្លើមនៅលើថ្លើមក្រិន) ដោយស្ទើរតែមិនមានផ្តល់ជារោគសញ្ញា ឫ មានការធ្វើទុក្ខដល់អ្នកជំងឺឲ្យបានដឹងជាមុននោះឡើយ។ មន្ទីរសំរាកព្យាបាលអេគីប បានឲ្យដឹងថា «ការពិនិត្យ និង វិភាគសាច់ថ្លើម បើទៅតាមបច្ចេកទេសវេជ្ជសាស្ត្រគឺយើងអាចធ្វើបានតាមច្រើនវិធី ឧទាហរណ៍ដូចជា…» គួរបញ្ជាក់ផងដែរថា លោកអ្នកក៏អាចចែករំលែកនូវចំណេះដឹងដូចជាពួកគាត់ដែរ តាមរយៈ ការបង្កើតអត្ថបទផ្ទាល់ខ្លួន  © 2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Recap Articles
Share
  • Aug 05, 2017 |
  • 8 years ago |
  • 3.7K views

[ខ្លឹមៗ] វិធីសាស្ត្រការពារឆ្អឹងស្ពោតសម្រាប់ស្រ្តីត្រៀម ឬអស់រដូវ

ស្ត្រីដែលស្ថិតនៅក្នុងវ័យត្រៀម ឬអស់រដូវ​តែងតែជួបបញ្ហាជាច្រើនដែលទាក់ទងនឹងផ្លូវចិត្ត និងផ្លូវកាយ។ បញ្ហាទាំងអស់នេះ តម្រូវឲ្យស្ត្រី ខាងលើគួរគប្បីយកចិត្តទុកដាក់ និងតាមដានរាល់អាការៈរោគផ្សេងៗជាមួយគ្រូពេទ្យផងដែរ។ បញ្ហាឆ្អឹងស្ពោតបានដើរតួយ៉ាងសំខាន់ក្នុងបញ្ហាចម្បងៗ នៃសុខភាពស្ត្រីត្រៀម ឬអស់រដូវ។ លោកវេជ្ជបណ្ឌិត ឌុក គុណសេណា ជាវេជ្ជបណ្ឌិតឯកទេសខាងឆ្អឹងមកពីប្រទេសបារាំង និងជាវេជ្ជបណ្ឌិតបម្រើការងារ នៅមន្ទីរពេទ្យកាល់ម៉ែត ផ្នែកវះកាត់ឆ្អឹង បានបង្ហាញពីវិធីសាស្ត្របង្ការបញ្ហាឆ្អឹងស្ពោត​ដូចខាងក្រោម ៖   • ជ្រើសរើសទទួលទានចំណីអាហារដែលសម្បូរជាតិកាល់ស្យូម (ត្រីសាម៉ុង ផលិតផលពីទឹកដោះគោ បន្លែបៃតង) • ទទួលទានផងដែរនូវចំណីដែលសម្បូរវីតាមីនដេ (ត្រីធូណា​ ស៊ុតក្រហម ខ្លាញ់ត្រី ថ្លើមសត្វ...) • ការហាលសំដិលខ្លួននឹងពន្លឺថ្ងៃក៏ជាគន្លឹះសំខាន់មួយផងដែរ ដោយសារវាជួយសម្រួលក្នុងការផលិតវីតាមីនដេ៣នៅក្រោមស្បែក។ ដូចនេះ​ គួរចំណាយ ពេលយ៉ាងតិច ៥ ទៅ ៣០ នាទីក្នុងមួយថ្ងៃ និងយ៉ាងតិច២ដងក្នុងមួយសប្តាហ៍ ដើម្បីសំដិលខ្លួនក្រោមពន្លឺថ្ងៃ។ • ធ្វើលំហាត់ប្រាណ ឲ្យបានទៀងទាត់ដូចជា ការដើរ រត់យឺតៗ ឬរាំជាដើម និងចៀសវាងការដួល ឬប៉ះទង្គិចដដែលៗ ដែលធ្វើអោយឆ្អឹងខ្សោយ និង ងាយបាក់។ • ចុងក្រោយ យើងអាចប្រើប្រាស់នូវឱសថបំប៉នឆ្អឹង  (calcium carbonate និង calcium citrate) ករណីអ្នកជំងឺមិនអាចបរិភោគអាហារ គ្រប់គ្រាន់បាន ឬមានជំងឺប្រចាំកាយណាមួយ ឬមិនសូវ មានទម្លាប់ចេញក្រៅឲ្យត្រូវពន្លឺថ្ងៃជាដើម។    ស្វែងយល់បន្ថែម បញ្ហាឆ្អឹងស្ពោតរបស់ស្រ្តី    ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Other Diseases Women's Health
Share
  • Aug 05, 2017 |
  • 8 years ago |
  • 8.1K views

បង្ការដុះសាច់ច្រមុះ តើគួរញ៉ាំអី?

នៅពេលបច្ចប្បន្ននេះ អត្រានៃអ្នកជំងឺដុះសាច់ច្រមុះកាន់តែកើនឡើងជាលំដាប់។ វាបណ្ដាលឲ្យអ្នកជំងឺពិបាកក្នុងការដកដង្ហើមដង្ហើមខ្លីៗ មិនដល់ក្រោម។ ជាងនេះទៅទៀត ការដុះសាច់ច្រមុះធ្វើឲ្យបាត់បង់សមត្ថភាពក្នុងការស្រង់ក្លិន។ វាធ្វើឲ្យប៉ះពាល់ប្រព័ន្ធដង្ហើមដែលអាចធ្វើឲ្យកើតមាន ជំងឺជាច្រើនទៀត។ ហេលស៍ថាម មើលឃើញនូវភាពលំបាករបស់មិត្តអ្នកអានទាំងអស់គ្នាដែលប្រឈមនឹងការកើនជំងឺដុះសាច់ច្រមុះ។ សូមណែនាំនូវអាហារ៦ ប្រភេទដែលអ្នកទាំងអស់គ្នាគួរទទួលទាន។ ១ អាហារមានផ្ទុកសារធាតុ Quercetin៖ សារធាតុហេ្លវ៉ូណូអ៊ីត គឺជាក្រុមសារធាតុធម្មជាតិមាននៅក្នុងរុក្ខជាតិ។ វាបានផ្ដល់ឲ្យផ្លៃឈើ និងបន្លែនូវពណ៌ និងការពារពីការបំផ្លាញដោយពពួកមីក្រុបនឹងសត្វល្អិត។សារធាតុធម្មជាតិនេះមានផ្ទុកភាពគ្រឹះដែលអនុញ្ញាតឲ្យពួកគេបំពេញតួនាទីជាអង់ទីអុកស៊ីតករ អ្នកការពារពីរ៉ាឌីកាល់សេរី។ ដូចនេះហើយទើបវាអាចជួយទប់ស្កាត់ការដុះសាច់ច្រមុះបាន។ អាហារដែលមានផ្ទុកសារធាតុ Quercetin មានដូចជា ខ្ទឹមក្រហម ផ្លែប៉ោម ផ្កាខាត់ណាបៃតង ទំពាំងបាយជូរក្រហម ផ្លែឈឺរី តែ​និង​ស្រាក្រហម ។ ២ បង្កើនសារធាតុអាស៊ីតអូមេហ្គា6៖ គឺជាប្រភេទអាស៊ីតខ្លាញ់ដែលមានតូនាទីជួយធ្វើឲ្យមុខងារក្នុងរាងកាយដំណើរការបានត្រឹមត្រូវ។ ប៉ុន្តែ បរិមាណ លើសចំនួនរបស់អាស៊ីតអូមេហ្គា 6 អាចធ្វើឲ្យមានការកើនឡើងនូវការរោល ឬរលាកនៅក្នុងរាងកាយ។ ចំណែកឯសារធាតុអាស៊ីតអូមេហ្គា 3មានអង់ទីករ ការពារការរលាកឬរោលនៅក្នុងរាងកាយ។ ដូចនេះអ្នកគួរតែផ្លាស់ប្ដូរទម្លាប់មកទទួលទានអាហារមានផ្ទុកសារាធាតុអាស៊ីតអូមេហ្គា3​ដែលមាននៅក្នុង ប្រេងបន្លែ ប្រេងពោត ត្រីសូម៉ុង ផ្លែវាល់ណាត់ សណ្ដែកសៀង។ ៣ ចៀសវាងអាហារអាល្លែកហ្ស៊ី៖ អាហារដែលធ្វើឲ្យមានជំងឺអាល្លែកហ្ស៊ីក៏ជាអាហារបណ្ដាលឲ្យកើតមានការដុះសាច់ច្រមុះដែរ។ ដូចនេះ របបអាហារដែល មានសារសំខាន់ក្នុងការប្រឆាំងនឹងការដុះសាច់ច្រមុះគឺការលុបចោលអាហារ អាឡែកស៊ី។អាហារដែលអាចបណ្ដាលឲ្យមានអាល្លែកហ្ស៊ីគឺស៊ុត មេដំបែ ទឹកត្រី អាហារផលិតពីជាតិទឹកដោះគោ ស្ករគ្រាប់ បន្លែកំប៉ុង សាច់ក្រក ប៊័រ​ ឈីសជាដើម។ ដោយឡែក បន្លែស្លឹកផ្ទីមានផ្ទុកសារធាតុប៉េតាការ៉ូទីន អាចជួយ ការពារប្រមុះរបស់អ្នកពីការដុះសាច់បាន​។ ៤ អាហារមានវីតាមីនAខ្ពស់ និងប៉េតាការ៉ូទីនខ្ពស់៖ វីតាមីនAជួយការពារភ្នាស់ស្ដើងនៅត្រង់ច្រមុះនឹងជាអង់ទីអុកស៊ីដាយ ដ៏មានប្រសិទ្ធភាពទៀតផង។ ចំណែកឯសារប៉េតាការ៉ូទីនដែលមាននៅក្នុងបន្លែ​​ផ្លែឈើពណ៌លឿង(ទឹកក្រូច)និងបៃតងដូចជាផ្ទី ការ៉ុត ដំឡូងបារាំង ស្វាយ ត្រសក់ស្រូវ មាននាទីសំខាន់ ក្នុងការប្រឆាំងនឹងការដុះសាច់ ច្រមុះ។ ៥ អាហារសម្បូរវីតាមីន C និង E៖ រ៉ាឌីកាល់សេរីអាចចូលទៅបំផ្លាញជាលិកានៅក្នុងច្រមុះ។វីតាមីន Cគឺជាអង់ទីអុកស៊ីដាយដែលអាចជួយក្នុងការការពារ រាងកាយពីការបំផ្លាញដោយរ៉ាឌីកាល់សេរី។តាមរយៈការស្រាវជ្រាវបានបង្ហាញថាកម្រិតវីតាមីនCខ្ពស់ជួយកាត់បន្ថយសារធាតុគីមីនោះបានឆាប់រហ័ស។ ចំណែកឯវីតាមីន Eគឺជាប្រភេទ អង់ទីអុកស៊ីដាយដែលជួយការពារការដុះសាច់ច្រមុះ។វីតាមីន C និង E នឹងបង្កើនការការពារទប់ស្កាត់នឹងការដុះ សាច់ច្រមុះ បានយ៉ាងមានប្រសិទ្ធភាព ។ ៦ អាហារមានផ្ទុកសារធាតុសេឡេនាម៖ អាហារមានផ្ទុកសារធាតុសេឡេនាមមានដូចជាផ្សិតកម្ពឹសអាចជួយការពារ ឬព្យាបាលការដុះសាច់ច្រមុះ។ អ្នកអាចទទួលទានអាហារដែលមានផ្ទុកសារធាតុសេឡេនាមនិងវីតាមីនE ច្រើនដើម្បីផ្ដល់ប្រយោជន៏ដល់សុខភាពរបស់អ្នក។ ក្រៅពីនេះ ការទទួលទាន ទឹកច្រើនក៏អាចជួយទប់ស្កាត់អ្នកពីការអាល្លែកហ្ស៊ីក៏ដូចជាទប់ស្កាត់ពីការដុះសាច់ច្រមុះផងដែរ៕ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips
Share
  • Aug 05, 2017 |
  • 8 years ago |
  • 9K views

ជំងឺលើសសម្ពាធឈាមដោយតម្រងនោម

១.និយមន័យ ជំងឺលើសឈាមដែលបណ្តាលមកពីតម្រងនោម គឺជាការលើសសម្ពាធឈាមដោយសារសរសៃឈាមតូចក្នុងតម្រងនោមក្រិន ផ្តើមឡើងដោយជាតិខ្លាញ់ នៅក្នុងសរសៃឈាមនៃតម្រងនោមស្ទះ ធ្វើឲ្យឈាមទៅចិញ្ចឹមតម្រងនោមមិនគ្រប់គ្រាន់ ដែលជាហេតុនាំឲ្យតម្រងនោមបញ្ចេញអ័រម៉ូនពីរប្រភេទគឺ អាល់ដូស្តេរ៉ូន និង រ៉េទីន ដែលធ្វើឲ្យសរសៃឈាមរួមតូច សម្ពាធឈាមកើនឡើង។  ២.មូលហេតុ មូលហេតុនៃជំងឺលើសសម្ពាធឈាមដោយសារតម្រងនោមនេះ មាន២ប្រភេទផ្សេងគ្នា។ - ទី១ ៖ បណ្តាលមកពីអត្រាជាតិខ្លាញ់ក្នុងសរសៃឈាមខ្ពស់ដែលជាមូលហេតុធ្វើឲ្យមានវត្តមានខ្លាញ់កកនៅសរសៃឈាមតូចៗ - ទី២ ៖ កោសិការបស់តម្រងនោមខ្លួនឯងវិវត្តទៅរឹងក្រិន ដែលនេះជាមូលហេតុឲ្យសរសៃឈាមរួមតូចដែរ តែមូលហេតុមួយនេះមិនសូវមានប៉ុន្មានទេ ហើយកើតឡើងលើមនុស្សចាស់ដែលមានវ័យលើសពី៥០ឆ្នាំ និងភាគច្រើនជាស្ត្រី។ ៣.រោគសញ្ញា រោគសញ្ញានៃជំងឺនេះ ស្តែងឡើងដោយសារការលើសឈាមនៅវ័យក្មេង ហើយលើសភ្លាមៗ និងពិបាកធ្វើការព្យាបាល។ ឯរោគសញ្ញាផ្សេងទៀតមានដូចជា ឈឺក្បាលខ្លាំង មុខងារតម្រងនោមអន់ភ្លាមៗ ស្ទះសរសៃឈាមតូចៗនៅតម្រងនោម ជើង ខួរក្បាល និងភ្នែកដែលនាំច្រាលទៅតំបន់មួយចំនួន ហើយ កើតមានរោគសញ្ញាខូចស្រោមសួត ខូចស្រោមបេះដូង និងទាចទឹកជាដើម។ ៤.ការធ្វើរោគវិនិច្ឆ័យ ជំងឺនេះ ត្រូវបានធ្វើរោគវិនិច្ឆ័យតាមរយៈការធ្វើតេស្តឈាមដើម្បីពិនិត្យមុខងារតម្រងនោម និងអត្រាជាតិខ្លាញ់ក្នុងឈាម។ ហើយក៏មានការថត សរសៃឈាមតម្រងនោម ដើម្បីពិនិត្យសភាពសរសៃឈាម និងការពិនិត្យដោយថត MRI លើតម្រងនោម។ ៥.ការព្យាបាល ជំងឺនេះអាចព្យាបាលឲ្យជាទាំងស្រុង ប្រសិនបើអ្នកជំងឺមកជួបគ្រូពេទ្យបានទាន់ពេល ពោលគឺព្យាបាលនៅដំណាក់កាលដំបូង។ ការព្យាបាលនេះ ដំបូងត្រូវព្យាបាលឲ្យសម្ពាធឈាមត្រឡប់មកធម្មតាវិញ និងព្យាបាលទៅលើមូលហេតុនៃជំងឺពោលគឺ បន្ថយអត្រាជាតិខ្លាញ់ករណីអ្នកជំងឹលើសជាតិខ្លាញ់ និងព្យាបាលមុខងារតម្រងនោមក្នុងករណីអ្នកជំងឺមានបញ្ហាលើតម្រងនោម។ ក្រៅពីការព្យាបាលដោយប្រើប្រាស់ថ្នាំនេះ អ្នកជំងឺក៏ត្រូវផ្លាស់ប្តូរទម្លាប់ ការរស់នៅរបស់ខ្លួនផងដែរ ដូចជាត្រូវបរិភោគអាហារដែលមានជាតិខ្លាញ់ទាប និងសាច់តិច មិនត្រូវបរិភោគអាហារប្រៃ ត្រូវសម្រកទម្ងន់ ប្រសិនបើ អ្នកជំងឺលើសទម្ងន់ ត្រូវហាត់ប្រាណ ៣០ នាទីរាល់ថ្ងៃឲ្យបានទៀតទាត់ និងឧស្សាហ៍ទីពិនិត្យសុខភាពរបស់ខ្លួន ជាពិសេសអ្នកដែលមានអាយុលើសពី ៤០ឆ្នាំ។ ប្រសិនបើអ្នកជំងឺមិនបានព្យាបាលជំងឺនេះឲ្យបានទាត់ពេលទេ វានឹងវិវឌ្ឍទៅរកជំងឺលើសសម្ពាធឈាមដែលព្យាបាលមិនជា។ ក្រៅពីនេះ ផលវិបាក ជាច្រើននឹងលេចឡើងចំពោះអ្នកជំងឺ មានដូចជា ខូចតម្រងនោមទាំងស្រុងដែលរហូតឈានទៅដល់ការលាងឈាមជំងឺដាច់សរសៃឈាមខួរក្បាល ហើមសួត ជំងឺទាចទឹកចូលស្រោមបេះដូង និងទឹកចូលស្រោមពោះដែលហៅថាទាចទឹក។ យ៉ាងណាមិញ ជំងឺនេះអាចការពារបានដោយការចាត់វិធានការ មួយចំនួនដូចជា ការពិនិត្យសុខភាពឲ្យបានទៀងទាត់ចំពោះអ្នកដែលមានអាយុពី៤០ឆ្នាំឡើងទៅ ត្រូវសម្រកទម្ងន់ប្រសិនបើគាត់ធាត់ ត្រូវទៅជួប ពិគ្រោះជាមួយគ្រូពេទ្យប្រសិនបើគាត់ជាអ្នកជក់បារី និងផឹកស្រាច្រើន ត្រូវពិនិត្យជាតិស្ករក្នុងឈាមឲ្យបានទៀងទាត់ប្រសិនគាត់ជាអ្នកជំងឺទឹកនោមផ្អែម ត្រូវតាមដានជាតិខ្លាញ់ជាប្រចាំ និងបរិភោគអាហារដែលផ្តល់សុខភាពល្អដល់អ្នក។ ៦.ការរំពឹងទុក ចំពោះការរំពឹងទុកលើជំងឺមួយនេះវិញ ករណីមិនបានព្យាបាល វាបណ្តាលឲ្យអ្នកជំងឺស្លាប់បានដោយសារតែការលើសសម្ពាធឈាមដែលមិនអាចគ្រប់គ្រង បាន រួមផ្សំនឹងការលេចឡើងនូវផលវិបាកដែលបានរៀបរាប់ខាងលើ។ ប៉ុន្តែប្រសិនបើអ្នកជំងឺទទួលបានការព្យាបាលបានទាន់ពេល ជំងឺលើសសម្ពាធឈាម នេះអាចព្យាបាលឲ្យបានជាទាំងស្រុង ដោយខុសពីជំងឺលើសសម្ពាធឈាមផ្សេងទៀតដែលទាមទារឲ្យអ្នកជំងឺត្រូវទទួលការព្យាបាលអស់មួយជីវិត៕ បកស្រាយដោយ លោកវេជ្ជបណ្ឌិតឯកទេស ចាន់ សុវណ្ណឌី វេជ្ជបណ្ឌិតនៃមន្ទីរពេទ្យព្រះកុសុមៈ និងមន្ទីរពេទ្យសាកលវិទ្យាល័យអន្តរជាតិសែនសុខ ផ្នែកសង្គ្រោះបន្ទាន់កម្រិតធ្ងន់ និងតម្រងនោម។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Other Diseases Heart & Blood Vessels
Share
Top