Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Jul 24, 2019 |
  • 5 years ago |
  • 4.5K views

ការដុះថ្គាមទាល់បែបណាគួរដកចេញ?

ករណីថ្គាមទាល់ដុះចេញ ត្រូវបានបង្ហាញឡើងជាមួយនឹងសំណួរជុំវិញបញ្ហានេះជាច្រើន។ ជាទូទៅការដុះថ្គាមទាល់អាចបង្កការឈឺចាប់មួយរយៈ និងបាត់ទៅវិញដោយឯកឯង។ យ៉ាងណាមិញទោះបីវាហាក់ដូចជាមិនបង្កផលរំខាននានាផ្សេងទៀតតែចម្ងល់ក្នុងការដកថ្គាមទាល់ចេញនៅតែជាបញ្ហាក្នុងការសម្រេចចិត្តរបស់ប្រជាជនមួយចំនួន។ តើថ្គាមទាល់បែបណាដែលអ្នកគួរដកចេញ? អត្ថបទខាងក្រោមនេះអាចជាចម្លើយរបស់អ្នក៖ សំណួរ៖ ខ្ញុំមានអាយុ ៣០ឆ្នាំ ភេទស្រី រស់នៅខេត្តបាត់ដំបង។ ខ្ញុំមានថ្គាមទាល់ដុះចេញតែពាក់កណ្តាល និងមានសាច់គ្របពីលើពាក់កណ្តាល។ តើខ្ញុំគួរតែដកចេញ ឬយ៉ាងណា បើពេលនេះវាមិនផ្តល់ការឈឺចាប់អ្វីឡើយ? ចម្លើយ៖ ប្អូនគួរតែដកចេញ ទោះបីជាពេលនេះវាមិនមានការឈឺចាប់ក៏ដោយព្រោះវានឹងអាចបង្កការឈឺចាប់នៅពេលអនាគតនិងធ្វើឲ្យប៉ះពាល់ ឬខូចខាតដល់ធ្មេញជិតខាងដោយសារការសម្អាតមិនបានស្អាតល្អធ្វើឲ្យមានរោគពុកធ្មេញ រោគអញ្ចាញនិងបញ្ហាផ្សេងៗដូចជាបញ្ហាក្លិនមាត់ជាដើម។ បកស្រាយដោយ៖ ទន្តបណ្ឌិត សុខ ជា អគ្គនាយកមន្ទីរព្យាបាលមាត់ធ្មេញសុខ ជា និងជាសាស្រ្តាចារ្យនៅសាកលវិទ្យាល័យវិទ្យាសាស្រ្តសុខាភិបាល អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨១ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Oral Health Oral Health
Share
  • Jul 23, 2019 |
  • 5 years ago |
  • 2.2K views

សិទ្ធិក្នុងការជ្រើសរើស និងការយល់ព្រម

អតិថិជនមានសិទ្ធិក្នុងការជ្រើសរើស ឬផ្លាស់ប្តូរមូលដ្ឋានសុខាភិបាលគ្រូពេទ្យព្យាបាល ឬអ្នកផ្តល់សេវាដទៃទៀត។ សម្រាប់អតិថិជនដែលជាស្រ្តីភេទមានសិទ្ធិជ្រើសរើសអ្នកផ្តល់សេវាដែលជាស្រ្តីដូចគ្នាបានក្នុងកាលៈទេសៈសមស្រប។ ដោយឡែកអតិថិជនក៏មានសិទ្ធិមិនព្រមទទួល ឬផ្អាកការព្យាបាល និងអន្តរាគមន៍វេជ្ជសាស្ត្រនានា។ តើការអនុវត្តចំពោះសិទ្ធិក្នុងការជ្រើសរើស និងការយល់ព្រមមានអ្វីខ្លះ? • អ្នកផ្តល់សេវាត្រូវផ្តល់ព័ត៌មានពីការជ្រើសរើសការថែទាំព្យាបាល និងព័ត៌មានស្តីពីគុណសម្បត្តិ និងគុណវិបត្តិនូវរាល់ការថែទាំព្យាបាល ឬអន្តរាគមន៍ដល់អតិថិជនឲ្យបានអស់លទ្ធភាព និងផ្តល់អនុសាសន៍អំពីជម្រើសដែលល្អជាងគេ។ • អ្នកផ្តល់សេវាត្រូវធានាថាព័ត៌មានដែលបានប្រាស្រ័យទាក់ទងគ្នា គឺប្រើពាក្យសម្តីសាមញ្ញៗដែលងាយយល់ និងស្តាប់បាន។ • អ្នកផ្តល់សេវាត្រូវផ្តល់សេវាសុខាភិបាលឲ្យបានត្រឹមត្រូវទៅតាមតម្រូវការរបស់អតិថិជន និងស្តង់ដារជាតិ។ • ត្រូវពន្យល់ឲ្យបានច្បាស់លាស់ដល់អតិថិជនអំពីផលវិបាកដែលអាចកើតមាននៅពេលដែលគេបដិសេធ ឬបញ្ឈប់នូវការធ្វើអន្តរាគមន៍។ • អ្នកផ្តល់សេវាត្រូវពន្យល់ឲ្យបានច្បាស់លាស់ដល់អតិថិជនអំពីផលវិបាកដែលអាចកើតមាននៅពេលគេបដិសេធ ឬបញ្ឈប់នូវការធ្វើអន្តរាគមន៍។ • ប្រសិនបើអតិថិជន ឬអ្នកតំណាងរបស់គាត់នៅតែសម្រេចចិត្តបដិសេធ ឬបញ្ឈប់នោះអ្នកផ្តល់សេវាសុខភាពត្រូវស្នើសុំឲ្យមានការយល់ព្រមពីអតិថិជន ឬអ្នកតំណាងដោយសរសេរជាលាយល័ក្ខអក្សរ។ • ប្រសិនបើអតិថិជន ឬអ្នកតំណាងរបស់គាត់បដិសេធផ្តល់ការយល់ព្រមហើយអ្នកផ្តល់សេវាសុខភាព ឬគ្រូពេទ្យយល់ឃើញថាកិច្ចអន្តរាគមន៍មួយត្រូវតែធ្វើដើម្បីផលប្រយោជន៍ដល់អាយុជីវិតអតិថិជនការសម្រេចចិត្តនោះត្រូវបញ្ជូនទៅគណៈកម្មការគ្រប់គ្រងមន្ទីរពេទ្យ ឬមណ្ឌលសុខភាព។ • ការយល់ព្រមពីអតិថិជនគឺជាការចាំបាច់ចំពោះរាល់ការរក្សាទុក ឬប្រើប្រាស់សារធាតុទាំងឡាយរបស់អតិថិជនទោះក្នុងការធ្វើរោគវិនិច្ឆ័យធម្មតាការព្យាបាល និងការថែទាំក្តី។ ក្នុងករណីចាំបាច់ខ្លះទាមទារឲ្យមានការយល់ព្រមជាលាយល័ក្ខអក្សរពីអតិថិជន។ • ការយល់ព្រមពីអតិថិជនដោយបានការពន្យល់ច្បាស់លាស់គឺជាការចាំបាច់សម្រាប់ឲ្យគាត់ចូលរួមនៅពេលបង្រៀនមុខវិជ្ជាគ្លីនិក។ អ្នកផ្តល់សេវាជានិច្ចកាលត្រូវតែស្នើសុំការយល់ព្រមពីអតិថិជន ឬអ្នកតំណាងរបស់គាត់មុននឹងធ្វើការបង្រៀនមុខវិជ្ជាគ្លីនិកដែលមានការចូលរួមពីអតិថិជន។ • ការយល់ព្រមពីអតិថិជនដោយបានពន្យល់ច្បាស់លាស់ គឺជាការចំាបាច់សម្រាប់ឲ្យចូលរួមក្នុងការស្រាវជ្រាវវិទ្យាសាស្រ្ត។ • រាល់វិធីស្រាវជ្រាវទាំងអស់ត្រូវដាក់ជូនឲ្យគណៈកម្មការក្រមសីលធម៌ ដើម្បីធ្វើការពិនិត្យការស្រាវជ្រាវមិនត្រូវអនុវត្តទៅលើអតិថិជនទាំងឡាយណាដែលគេមិនអាចមានលទ្ធភាពបញ្ចេញឆន្ទៈឲ្យធ្វើនោះទេបុគ្គលិកណាដែលមានការយល់ព្រមពីតំណាងស្របច្បាប់ ហើយការស្រាវវជ្រាវនោះសោតនឹងអាចមានប្រយោជន៍សម្រាប់អតិថិជនផង និងសាធារណជនផង។ តើការទទួលខុសត្រូវចំពោះសិទ្ធិក្នុងការជ្រើសរើស និងការយល់ព្រមមានអ្វីខ្លះ? • អតិថិជន ឬអ្នកតំណាងរបស់គាត់ទទួលខុសត្រូវនូវរាល់ផលវិបាកទាំងឡាយដែលកើតមានឡើងមកពីការសម្រេចចិត្តរបស់គាត់ ជាពិសេសនៅពេលសម្រេចចិត្តមិនធ្វើតាមអនុសាសន៍របស់អ្នកផ្តល់សេវាសុខភាព។ • អតិថិជនត្រូវតែស្គាល់ច្បាស់ពីសិទ្ធិទាំងនោះ។ គាត់អាចស្វែងរកសមាជិកគណៈកម្មការគ្រប់គ្រងមណ្ឌលសុខភាព ឬគណៈកម្មការគ្រប់គ្រងមន្ទីរពេទ្យបង្អែកដែលបានទទួលការណែនាំដើម្បីធ្វើការបញ្ជាក់បំភ្លឺ និងធ្វើអន្តរាគមន៍នៅពេលមិនច្បាស់ឬមានបញ្ហា។ បកស្រាយដោយ៖ វេជ្ជបណ្ឌិត ឡាក់ ឡេង ឯកទេសសុខភាពសាធារណៈ អនុប្រធានមជ្ឈមណ្ឌលជាតិ លើកកម្ពស់សុខភាព ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

For Health Practitioners For Health Practitioners
Share
  • Jul 22, 2019 |
  • 5 years ago |
  • 5.3K views

ស្បែកក្បាលស្ងួតហើយងាយប្រតិកម្ម គួរធ្វើបែបណា?

មានអារម្មណ៍ថារមាស់ស្បែកក្បាលណាស់មែនទេ? ឆ្ងល់ណាស់ហេតុអ្វីស្បែកក្បាលដែលធ្លាប់តែមានសុខភាពល្អប្រែជាស្ងួត រមាស់ ហើយងាយប្រតិកម្ម ប្រើផលិតផលអ្វីក៏មិនត្រូវសោះ? តើនេះមកពីអ្វី? តើគួរដោះស្រាយបែបណា?  មូលហេតុដែលបណ្តាលឲ្យស្បែកក្បាលស្ងួតងាយប្រតិកម្ម តាមពិត មានហេតុផលច្រើនយ៉ាងដែលបណ្តាលឲ្យស្បែកក្បាលមានសភាពស្ងួតខុសប្រក្រតី និងឆាប់អាល្លែកហ្ស៊ី ដែលកត្តាទាំងនោះអាចមានដូចជា៖ - កត្តាតំណពូជ - បម្រែបម្រួលអ័រម៉ូន ជាពិសេសវ័យជំទង់ - ទទួលទានសុរាច្រើនពេក - បរិភោគអាហារដែលមានជាតិផ្អែម ឬជាតិប្រៃខ្ពស់ ឬហឹរពេក - កង្វះសារធាតុចិញ្ចឹម ដូចជាពពួកអាស៊ីតខ្លាញ់ (Fatty acid) និងវីតាមីនបេ - បម្រែបម្រួលអាកាសធាតុ - ស្ត្រេស - ការប្រើប្រាស់សាប៊ូដែលមានសារធាតុគីមីច្រើន និងរយៈពេលយូរ - ការបង្ករោគដោយពពួកផ្សិត - ប្រើប្រាស់ទឹកមិនស្អាត ជាពិសេសប្រភេទទឹករឹង (ជាប្រភេទទឹកដែលសម្បូរទៅដោយរ៉ែ ជាពិសេសកាល់ស្យូម និងម៉ាញ៉េស្យូម) - ប្រើប្រាស់ផលិតផលធ្វើម៉ូតសក់ញឹកញាប់ពេក - ព្រងើយកន្តើយក្នុងការថែរក្សាសុខភាពស្បែកក្បាល ក៏ដូចជាសរសៃសក់។ ដំណោះស្រាយ ដើម្បីដោះស្រាយចំពោះបញ្ហាដែលមានខាងលើ អ្នកចាំបាច់ត្រូវកំណត់អំពីប្រភេទនៃមូលហេតុបង្កជាមុនសិន។ ជាក់ស្តែងប្រសិនបើបញ្ហានេះបណ្តាលមកពីអាហារ ស្ត្រេស ការប្រើប្រាស់ផលិតផលមិនត្រឹមត្រូវ ឬចូលចិត្តធ្វើម៉ូតសក់ជាដើម អ្នកចាំបាច់ត្រូវព្យាយាមផ្លាស់ប្តូរទម្លាប់ទាំងអស់នោះ។ ខាងក្រោមនេះ ជាដំណោះស្រាយសំខាន់ៗ ៨ចំណុចដែលគួរអនុវត្តបន្ថែម៖ ១. ប្រើប្រាស់សាប៊ូដែលស្រាលស្រទន់ចំពោះស្បែកក្បាល ជាទូទៅ សាប៊ូប្រភេទនេះគ្មានពណ៌ គ្មានក្លិន គ្មានសារធាតុគីមីដែលងាយធ្វើឲ្យស្បែកក្បាលមានប្រតិកម្មឡើយ។ លក្ខណៈពិសេសរបស់សាប៊ូទាំងនេះគឺកាត់បន្ថយរមាស់ ប្រឆាំងនឹងបាក់តេរីដែលបង្ករោគលើស្បែកក្បាល បង្កើនសំណើមដល់ស្បែកក្បាលព្រមទាំងអាចកាត់បន្ថយការរលាកផងដែរ។ ២. កុំប្រើទឹកក្តៅកក់សក់ ខណៈពេលស្បែកក្បាលអ្នកកំពុងមានបញ្ហាបែបនេះសូមកុំប្រើទឹកក្តៅរាល់ពេលលាងសម្អាតសក់ ព្រោះទឹកក្តៅអាចបណ្តាលឲ្យស្បែកក្បាលកាន់តែខូចខាតជាពិសេសអាចរំខានដល់ការលូតលាស់សរសៃសក់ទៀតផង។ ទោះជាយ៉ាងណា អ្នកអាចប្រើប្រាស់ទឹកក្តៅឧណ្ហៗ បន្ទាប់មកប្រើប្រាស់ទឹកត្រជាក់បន្ថែមប្រសិនបើអ្នកមានអារម្មណ៍ថាសីតុណ្ហភាពស្បែកក្បាលប្រែប្រួល។ ទង្វើបែបនេះ អាចជួយស្រោបគល់សក់ធ្វើឲ្យសក់ភ្លឺ និងជួយជំរុញលំហូរឈាមទៅចិញ្ចឹមស្បែកក្បាលផងដែរ។ ៣. បន្ថែមសារធាតុចិញ្ចឹម និងផ្តល់សំណើមឲ្យបានទៀងទាត់ ជាប្រភេទផលិតផលដែលមាននាទីជាក់លាក់ក្នុងការបំប៉ន និងផ្តល់សំណើមដល់ស្បែកក្បាលបានយ៉ាងប្រសើរ។ អ្នកគួរចាប់ផ្តើមប្រើប្រាស់ផលិតផលនេះដើម្បីជំនួយសុខភាពស្បែកក្បាល ជាជាងការប្រើប្រាស់ផលិតផលនានាដែលមានតួនាទីចំពោះសរសៃសក់។ សូមអនុវត្តការប្រើប្រាស់ទៅតាមការណែនាំរបស់ផលិតផលនីមួយៗ។  ៤. ជម្រុះកោសិកាស្បែក ដូចគ្នាទៅនឹងកោសិកាស្បែកដែលការអនុវត្តការខាត់ស្បែកមិនគួរត្រូវបានមើលរំលង ប៉ុន្តែចំពោះស្បែកក្បាលកំពុងមានបញ្ហាបែបនេះ អ្នកគួរជ្រើសរើសប្រភេទផលិតផលណាដែលស្រាល មិនកាត់ខ្លាំង និងផ្តល់សំណើមដល់ស្បែកក្បាលបន្ថែម។ ជាទូទៅ អ្នកគួរអនុវត្តម្តង ឬ ២ដងក្នុងមួយសប្ដាហ៍។ ៥. កុំអេះ ឬកេះស្បែកក្បាល ជឿជាក់ថា ស្បែកក្បាលបែបនេះបណ្តាលឲ្យអ្នកពិបាកទ្រាំ មិនឲ្យអេះខ្លាំងណាស់ ប៉ុន្តែចូរអ្នកចងចាំថាការអេះអាចបណ្តាលឲ្យស្បែកក្បាលកាន់តែមានបញ្ហាធ្ងន់ធ្ងរ។ ហេតុនេះ ដើម្បីកាត់បន្ថយផលរំខានអ្នកអាចប្រើថូនឺរសម្រាប់ជូតស្បែកក្បាលដែលរមាស់និងស្ងួតរាល់ពេលមានបញ្ហា។ ៦. ពិសាទឹកឲ្យបានច្រើន ទឹកមានសារៈសំខាន់ណាស់ចំពោះសុខភាពស្បែក។ អ្នកគួរព្យាយាមពិសាទឹកឲ្យបានច្រើន ជាមធ្យម ២លីត្រ ក្នុងមួយថ្ងៃ (ប៉ុន្តែអាស្រ័យតាមសកម្មភាព ទម្ងន់ និងអាកាសធាតុផងដែរ)។ ពិសាទឹកបានគ្រប់គ្រាន់ អាចជួយថែរក្សាសុខភាពស្បែកក្បាល ក៏ដូចជាជួយការលូតលាស់របស់សក់បានកាន់តែល្អ។ ៧. ទទួលទានអាហារដែលជួយចិញ្ចឹមស្បែកក្បាល ស្បែកក្បាលក៏ដូចជាប្រភេទស្បែកផ្សេងទៀតនៃរាងកាយដែរ គឺត្រូវការចាំបាច់ណាស់នូវប្រភេទអាហារចម្រុះ ប្រកបទៅដោយសារធាតុចិញ្ចឹមផ្សេងៗគ្នា។ ប្រភេទវីតាមីននិងសារធាតុចិញ្ចឹមទាំងនោះមានដូចជា ប្រូតេអុីន ជាតិដែកដែលសម្បូរនៅក្នុងសាច់ក្រហម គ្រាប់អាល់ម៉ុន ប្រូខូលី និងស្ពៃខៀវ។ ក្រៅពីនេះ សង្ក័សីដែលសម្បូរក្នុងគ្រាប់ធញ្ញជាតិ ស៊ុត ព្រមទាំងប្រភេទអាស៊ីតខ្លាញ់អូមេហ្គា៣ ដែលមានក្នុងគ្រាប់ផ្លែឈើ និងត្រី ក៏ជាប្រភពដ៏សំខាន់ក្នុងការចូលរួមចំណែកជួយទ្រទ្រង់សុខភាពស្បែកក្បាលឲ្យបានប្រសើរឡើងវិញផងដែរ។ ៨. ជួបអ្នកជំនាញ ក្នុងករណី ការសាកល្បងជាមួយវិធីសាស្ត្រនានាមិនបានជោគជ័យ ការជួបពិគ្រោះយោបល់ជាមួយគ្រូពេទ្យជំនាញស្បែកពិតជាមានសារៈសំខាន់ណាស់។ គ្រូពេទ្យនឹងធ្វើការតាមដានសភាពស្បែក ក៏ដូចជាមូលហេតុពិតប្រាកដដែលបង្កជាបញ្ហាជាពិសេសការជ្រើសរើសប្រភេទផលិតផលដែលសមស្របចំពោះសុខភាពស្បែកក្បាលអ្នក។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Skin, STD & Beauty Skin, STD & Beauty Skin, STD & Beauty
Share
  • Jul 20, 2019 |
  • 5 years ago |
  • 11K views

ប្រភេទអាហារដែលធ្វើឲ្យអ្នកឡើងទម្ងន់ខ្លាំង

តើអ្នកកំពុងពិបាកចិត្តជាមួយការឡើងទម្ងន់ខ្លាំងមែនទេ? តើអ្នកធ្លាប់ពិនិត្យមើលរបបអាហាររបស់អ្នកដែរឬទេ? តើអ្នកមានដឹងទេថាមានប្រភេទអាហារអ្វីខ្លះ ដែលធ្វើឲ្យអ្នកឡើងទម្ងន់កាន់តែលឿន? ខាងក្រោមនេះនឹងបង្ហាញអ្នកអំពីប្រភេទអាហារដែលមានកាល់ឡូរីខ្ពស់ និងធ្វើឲ្យអ្នកឡើងទម្ងន់ខ្លាំងជាងរបបអាហារធម្មតា។ ១. បង្អែម នៅពេលអ្នកញ៉ាំរបស់ផ្អែមៗ ដូចជា នំខេក ទឹកក្រឡុកការ៉េម ឬប្រភេទបង្អែមដែលមានរសជាតិផ្អែមខ្លាំងវាអាចបង្កឲ្យអ្នកឡើងទម្ងន់ដោយមិនបានចាប់អារម្មណ៍។ ក្នុងនោះ ប្រភេទនំដុតក៏មានផ្ទុកកាល់ឡូរីជាច្រើនផងដែរ ដូចនេះ អ្នកគួរកាត់បន្ថយទម្លាប់នៃការញ៉ាំរបស់ផ្អែមច្រើន ឬពិនិត្យទម្លាប់ញ៉ាំឡើងវិញប្រសិនបើអ្នកចង់រក្សាទម្ងន់របស់អ្នក។ ២. អាហារបែបអឺរ៉ុប ឬ Fast Food ក្នុងនោះមានដូចជា ភីហ្សា ប៊ឺហ្គឺ មាន់បំពង ឈីសជាដើម ដែលសម្បូរដោយជាតិខ្លាញ់ និងផ្ទុកកាល់ឡូរីខ្ពស់គួរឲ្យកត់សម្គាល់។ ជាមួយគ្នានេះ គេបានបន្ថែមអំបិល ស្ករ និងខ្លាញ់ជាច្រើន ក្នុងការចម្អិនវាឲ្យមានរសជាតិ និងជាទីចាប់ចិត្តរបស់អ្នកញ៉ាំ ប៉ុន្តែអ្នកមិនបានដឹងថាវាមានជាតិកាល់ឡូរីដល់ទៅជាង ២០០ឯណោះក្នុងម្សៅឈីសដែលនឹងមិនងាយលាយតាមវិធីធម្មតា។ ៣. សាច់ក្រហម និងសាច់ជាប់ខ្លាញ់ ប្រាកដណាស់ ការញ៉ាំសាច់ច្រើនពេក ក៏បណ្តាលឲ្យអ្នកធាត់បានដែរ ជាពិសេសសាច់ក្រហម និងសាច់ជាប់ខ្លាញ់ព្រោះវាសម្បូរទៅដោយប្រភេទខ្លាញ់ឆ្អែតដែលបណ្តាលឲ្យកើនបរិមាណកូឡេស្តេរ៉ុលក្នុងខ្លួនហើយវាមិនត្រឹមតែធ្វើឲ្យអ្នកធាត់ទេ ថែមទាំងបង្កជំងឺដល់បេះដូងទៀតផង។ ៤. ប្រភេទភេសជ្ជៈប៉ូវកម្លាំង និងសូដា ភេសជ្ជៈទាំងនេះផ្ទុកជាតិស្ករច្រើនហួសប្រមាណដែលអាចបន្ថែមគីឡូទៅលើរាងកាយរបស់អ្នក ជាពិសេសត្រង់ផ្នែកក្បាលពោះ ថែមទាំងធ្វើឲ្យប៉ះពាល់ដល់សុខភាពអ្នកផងដែរ។ ជាក់ស្ដែងប្រភេទភេសជ្ជៈទាំងនោះមានដូចជាគ្រឿងកំប៉ុង ភេសជ្ជៈប៉ូវកម្លាំង ទឹកក្រូច ឬទឹកសូដា ជាដើម។ ៥. កាបូអុីដ្រាតចម្រាញ់ កាបូអុីដ្រាតចម្រាញ់ ឬជាតិស្ករចម្រាញ់ គឺជាផលិតផលចេញពីគ្រាប់ធញ្ញជាតិដែលត្រូវបានកែច្នៃដោយក្រុមហ៊ុនផលិតអាហារ ទៅជាផលិតផលផ្សេងៗទៀត ជាក់ស្ដែង ដូចជាដំណើរការយកអង្ករទៅធ្វើជាម្សៅ រួចយកម្សៅទៅផលិតជា នំប៉័ង នំឃុកគី នំដូណាត់ ដែលទាំងនោះសុទ្ធតែធ្វើឲ្យអ្នកឡើងទម្ងន់ខ្លាំងប្រសិនបើអ្នកញ៉ាំច្រើន ឬញឹកញាប់ពេក។ ៦. សុរា ដូចគ្នានេះដែរ អ្នកក៏នឹងអាចឡើងទម្ងន់ដោយសារការទទួលទានជាតិអាល់កុល ឬស្រា ជាពិសេសសង្កេតឃើញការកើនឡើងទម្ងន់នៅត្រង់តំបន់ក្បាលពោះ។ យ៉ាងណាមិញ នៅក្នុងស្រាមានជាតិកាល់ឡូរីខ្ពស់ រួមទាំងការបញ្ជូនជាតិស្ករទៅក្នុងឈាមបានកាន់តែលឿនជាងធម្មតា។ ៧. អាហារចៀន បំពង និងដុត ការចៀន និងបំពងគឺទាមទារការប្រើប្រាស់ខ្លាញ់ ឬប្រេងច្រើនខ្លាំងជាងធម្មតា ដូចនេះ អ្នកគួរចៀសវាងប្រភេទអាហារទាំងនេះដើម្បីរក្សារាងកាយឲ្យមានតុល្យភាព និងសុខភាពល្អជាជាងការញ៉ាំតាមការចង់បាន។ ម៉្យាងវិញទៀត អាហារបែបដុតធម្មតា ឬប្រើប្រាស់ Microwave ក៏មានផ្ទុកនូវសារជាតិ ដែលអាចឲ្យអ្នកធាត់បានដោយមិនចាប់អារម្មណ៍ផងដែរ។ ប្រសិនបើអ្នកមានបំណងចង់រក្សារាងឲ្យបានស្អាត អ្នកគួរពិនិត្យ និងកែប្រែទម្លាប់ក្នុងការញ៉ាំប្រភេទអាហារទាំងនេះឲ្យនៅកម្រិតទាបបំផុត។ តាមរយៈការកាត់បន្ថយនេះអ្នកមិនត្រឹមតែទប់ស្តាត់ការឡើងទម្ងន់ទេ អ្នកថែមទាំងទទួលបានសុខភាពល្អ ជារង្វាន់លើកទឹកចិត្តទៀតផង។ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Weight Management Weight Management Weight Management
Share
  • Jul 19, 2019 |
  • 5 years ago |
  • 2.4K views

អត់បានទៅមិនដឹងស្ដាយប៉ុណ្ណា! មានសុទ្ធតែប្រូម៉ូសិនច្រើនយ៉ាងហ្នឹង

មានគម្រោងទៅណាទេថ្ងៃអាទិត្យនេះ? បើមិនទាន់ដឹងត្រូវទៅណាទេ នាំគ្រួសារឬមិត្តភក្តិមក CKCC មក ចូលរួម ទិវាលើកកម្ពស់សុខភាព Healthtime Festival ដែលរៀបចំឡើងដោយក្រុមហ៊ុន ហេលស៍ថាម ទាំងអស់គ្នាណា ព្រោះបានទាំងសប្បាយ បានទាំងចំណេះ បានទាំងសុខភាពល្អទៀត។ រកណាមាន? ក្រៅពីសិក្ខាសាលាដែលពោរពេញដោយប្រធានបទល្អៗ និងគួរឲ្យចាប់អារម្មណ៍ពីសំណាក់វាគ្មិនល្បីៗរបស់យើងហើយនោះ លោកអ្នកក៏អាចរីករាយជាមួយនឹងសកម្មភាពនៅតាមស្តង់ពិពណ៌នៅក្នុងទិវានេះផងដែរ ដូចជាការលេងហ្គេមសប្បាយៗជាមួយនឹងការឈ្នះរង្វាន់អនុស្សាវរីយ៍ និងការផ្តល់ជូនពិសេសផ្សេងៗទៀតពីក្រុមហ៊ុន Grab ការផ្តល់ជូនការបញ្ចុះតម្លៃ ៥០%លើកញ្ចប់ Pre-Scan ពីក្រុមហ៊ុន Brain Scan ការធ្វើតេស្តកម្រិតចងចាំរបស់អ្នកពីក្រុមហ៊ុន Mega ផ្តល់នូវសៀវភៅស្តីពីអាហារូបត្ថម្ភជាពីអង្គការ Hellen Keller និងការផ្តល់ជូនជាច្រើនទៀតពីដៃគូដទៃទៀតរបស់យើងដូចជាក្រុមហ៊ុន Prudential ផលិតផល Co-Plaster ផលិតផល Coxil ផលិតផល One Q Gummy ក្រុមហ៊ុន Cocane ក្រុមហ៊ុន VIPASSA ក្រុមហ៊ុន Khmer Organic។ មិនត្រឹមតែប៉ុណ្ណោះ ក៏មានផងដែរនូវការបញ្ចុះតម្លៃពិសេសលើកញ្ចប់ពិនិត្យសុខភាពក្នុងតម្លៃពិសេសពីសំណាក់គ្លីនិកជាដៃគូ ដូចជា គ្លីនិកឯកទេសអេគីប បញ្ចុះតម្លៃលើការពិនិត្យរកមេរោគក្នុងក្រពះ គ្លីនិកសើស្បែកប៊ីស៊ី ផ្តល់ជូនតម្លៃពិសេសលើការម៉ាស្សា និងព្យាបាលផ្ទៃមុខ មន្ទីរពហុព្យាបាលជាតិខេមានិងគ្លីនិកខេមាផ្តល់ជូនកញ្ចប់ពិនិត្យពិសេសត្រឹមតែ១៥ដុល្លារ មន្ទីរពេទ្យទន្តសាស្ត្ររំចង់ផ្តល់ជូនបណ្ណបញ្ចុះតម្លៃ ១០%ចំពោះសេវាកម្មសម្អាតធ្មេញនិងធ្វើឲ្យធ្មេញសនៅមន្ទីរពេទ្យផ្ទាល់ រួមជាមួយនឹងការផ្តល់ជូនផ្សេងៗទៀតពីមន្ទីរពេទ្យភ្នែកដុកទ័រ គង់ ពិសិដ្ឋ មជ្ឈមណ្ឌលព្យាបាលជំងឺទឹកនោមផ្អែម។ កុំភ្លេចចូលរួមទាំងអស់គ្នាណា! បើមិនបានចូលរួម ស្តាយស្លាប់ហើយបើការផ្តល់ជូនច្រើនអីច្រើនយ៉ាងនេះនោះ! តោះ! លើកទូរស័ព្ទហើយហៅមកកាន់លេខ 0៧៧ ៨៨៨ ០៧៥ ដើម្បីកក់សំបុត្រជាមុនទាន់មានតម្លៃពិសេសណា។ ជួបគ្នាថ្ងៃអាទិត្យ ទី២១ កក្កដា ឆ្នាំ២០១៩នេះ នៅសាលពហុបំណងរបស់ CKCC ចាប់ពីម៉ោង៨ព្រឹកដល់ម៉ោង៥ល្ងាច ដើម្បីសុខភាពយើង និងគ្រួសារយើង។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events News & Events
Share
  • Jul 19, 2019 |
  • 5 years ago |
  • 5.3K views

ផលវិបាកនៃការមិនអាចគ្រប់គ្រងការបត់ជើងតូចបាន

Urinary Incontinence គឺជារោគសញ្ញានៃការចេញទឹកនោមដោយមិនដឹងខ្លួន ឬមិនអាចគ្រប់គ្រងការបត់ជើងតូចបាន។ យោងតាមទិន្នន័យនៅប្រទេសអភិវឌ្ឍមួយចំនួនបានបង្ហាញថា បញ្ហានេះតែងកើតលើស្ត្ រី២ដងច្រើនជាងបុរស។ ក្នុងស្ថិតិនោះ ២៥%-៣០%ជាស្ត្រីអាយុចន្លោះពី ៥០ឆ្នាំ-៦៥ឆ្នាំ ១០%ជាស្ត្រីមិនធ្លាប់បានសម្រាលកូន ឬមិនធ្លាប់មានផ្ទៃពោះ ១៥-២០%ជាស្ត្រីសម្រាលដោយការវះកាត់ និង២០-៣០%ជាស្ត្រីធ្លាប់ឆ្លងទន្លេ ឬមានកូនច្រើន។ មូលហេតុ និងកត្តាជំរុញ អាស្រ័យដោយទម្រង់រូបរាងនៃប្រព័ន្ធតម្រងនោមរបស់បុរស និងស្ត្រីមានលក្ខណៈខុសគ្នា ដូច្នេះវាអាចមានមូលហេតុផ្សេងគ្នា៖ • ស្ត្រី៖ ភាគច្រើនបណ្តាលមកពីការថយចុះនៃមុខងារ ឬដំណើរការសាច់ដុំបាតផ្នែកខាងក្រោមដែលភ្ជាប់ពីឆ្អឹងខាងលើមកឆ្អឹងកញ្ចូញគូទមានតួនាទីទប់ទឹកនោម-លាមក មិនឲ្យហូរចេញផ្តេសផ្តាស និងបញ្ហាប្លោកនោមលៀនចេញមកក្រៅ • បុរស៖ កើតមានជាពិសេសចំពោះអ្នកដែលទើបតែវះកាត់ ឬកោសក្រពេញប្រូស្តាត។  ក្រៅពីនេះ លក្ខខណ្ឌខ្លះអាចជាកត្តាជំរុញផងដែរដូចជាអ្នកជំងឺទឹកនោមផ្អែម ស្លាប់មួយចំហៀងខ្លួន ឬពិការជើងទាំងពីរកម្រើកមិនរួច អ្នកជំងឺរលាកខួរឆ្អឹងខ្នង អ្នកជំងឺធ្លាក់ទឹកចិត្ត ស្ត្រីអស់រដូវ ស្ត្រីមានកូនច្រើន អ្នកមានកម្រិតអ័រម៉ូនអឺស្ត្រូហ្សែនថយចុះ អ្នកលើសទម្ងន់ ក្អករ៉ាំរ៉ៃ ករណីជនពិការដែលពិបាកក្នុងការដើរអ្នកឧស្សាហ៍ទល់លាមក អ្នកញៀនស្រា ឬញៀនបារី អ្នកប្រើថ្នាំមួយចំនួន (ថ្នាំបំបាត់ការធ្លាក់ទឹកចិត្ត ថ្នាំបន្ថយការកន្ត្រាក់សាច់ដុំ ថ្នាំសរសៃប្រសាទ)។ សញ្ញាសម្គាល់ អ្នកជំងឺអាចដឹងដោយខ្លួនឯងថាមិនអាចគ្រប់គ្រងការបត់ជើងតូចបាន ឬទឹកនោមចេញមកដោយឯងៗអាស្រ័យនឹងប្រភេទនៃ Urinary Incontinence ខាងក្រោម៖ • Stress Incontinence៖ ការចេញទឹកនោមដោយឯងៗនៅពេលមានចលនាដូចជាសើច ក្អក កណ្តាស់ ហាត់កីឡា ឬធ្វើការងារធ្ងន់ៗដោយសារមានការកើនឡើងនូវសម្ពាធក្នុងពោះ សង្កត់ និងរុញទឹកនោមឲ្យចេញមកដោយខ្លួនឯង • Urge Incontinence៖ ការចេញទឹកនោមបន្ទាន់ដោយមិនដឹងខ្លួន ដែលតែងកើតមានឡើងនៅពេលយប់ • Mixed Incontinence៖ ការចេញទឹកនោមទាំង ២ប្រភេទខាងលើកើតរួមគ្នាដោយអ្នកជំងឺស្រាប់តែឈឺបត់ជើងតូចភ្លាមៗ ហើយគាត់ក្អក ឬកណ្តាស់ក្នុងពេលនោះ ធ្វើឲ្យទឹកនោមចេញមកភ្លាមៗ។ ការវិនិច្ឆ័យបញ្ជាក់ ដំបូងគ្រូពេទ្យនឹងធ្វើការសាកសួរយ៉ាងលម្អិត និងក្បោះក្បាយអំពីប្រវត្តិរបស់អ្នកជំងឺ លើការមានផ្ទៃពោះការអស់រដូវ។ បើជាបុរសគ្រូពេទ្យនឹងសួរអំពីប្រវត្តិនៃការវះកាត់ក្រពេញប្រូស្តាត ឬការធ្លាប់មានរងរបួសផ្សេងៗ។ ក្រៅពីនេះ អ្នកជំងឺអាចនឹងត្រូវពិនិត្យគ្លីនិកបន្ថែមទៀតតាមរយៈ៖ • ការពិនិត្យដោយឈរ៖ អ្នកជំងឺតម្រូវឲ្យញ៉ាំទឹកដើម្បីមានទឹកនោមច្រើនបន្ទាប់មកឲ្យគាត់ប្រឹងក្អក ពេលនោះអ្នកជំងឺនឹងលេចចេញទឹកនោមមកជាមួយដែរ។ • ការពិនិត្យដោយគេង៖ ដំបូងគ្រូពេទ្យនឹងបាញ់ទឹកចូលក្នុងប្លោកនោមពី២៥០ ទៅ៣០០សេសេ រួចដកចេញមកវិញដោយឲ្យអ្នកជំងឺប្រឹងទប់ ឬប្រឹងខ្ជឹប។ តេស្តពិសេសចំពោះស្ត្រីមួយគឺ ប្រើម្រាមដៃ ២លើកបង្ហួរនោម (បន្ទាប់ពីបាញ់ទឹកចូល ៣០០សេសេ)។ ករណីខ្លះអ្នកជំងឺអាចនឹងតម្រូវឲ្យធ្វើតេស្តបន្ថែមទៀតដោយយកសំឡីត្បារត្រចៀករុកចូលក្នុងបង្ហួរនោម និងតេស្តបញ្ជាក់ពីភាពខ្សោយ ដោយដាក់ម្រាមដៃ ២ចូលក្នុងទ្វារមាសហើយឲ្យអ្នកជំងឺខ្ជឹប។ លើសពីនេះអ្នកជំងឺនឹងតម្រូវឲ្យធ្វើតេស្តរកមើលការបង្ករោគនៅក្នុងទឹកនោម ការពិនិត្យអេកូសាស្ត្រដើម្បីរកសញ្ញាណមិនប្រក្រតីផ្សេងទៀតនិងការធ្វើរោគវិនិច្ឆ័យពិសេសមួយទៀតហៅថា Balance urodynamics។ ម៉្យាងទៀត អ្នកជំងឺនឹងត្រូវបានណែនាំឲ្យកត់ត្រាបន្ថែមនូវពេលវេលា បរិមាណ ចំនួនដងក្នុងមួយថ្ងៃ និងលក្ខខណ្ឌណាមួយនៃការចេញទឹកនោមឯងៗរបស់គាត់ ដើម្បីអាចវាយតម្លៃការព្យាបាលនៅពេលអនាគត។ ការព្យាបាលសមស្រប ភាគច្រើននៃអ្នកជំងឺអាចទទួលបានការព្យាបាលជាសះស្បើយរហូតដល់ ៧០-៨០% ដែលការព្យាបាលត្រូវបានបែងចែកតាមកម្រិតរួមមាន៖ • ការព្យាបាលដោយមិនប្រើថ្នាំ ឬមិនវះ៖ អ្នកជំងឺនឹងត្រូវបានណែនាំឲ្យទទួលទានទឹកឲ្យបានច្រើន ២-៣លីត្រក្នុងមួយថ្ងៃ នៅពេលព្រឹក និងពេលថ្ងៃ ចៀសវាងការទទួលទានស្រា ឬគ្រឿងស្រវឹង និងហាមជក់បារី។ ករណីអ្នកជំងឺមាននូវកត្តាហានិភ័យរួមផ្សំណាមួយដូចខាងលើ គាត់ត្រូវធ្វើការព្យាបាល ឬកាត់បន្ថយកត្តាទាំងនោះដាច់ខាត។ • ការព្យាបាលដោយធ្វើឲ្យសាច់ដុំកម្រើកឡើងវិញ៖ អ្នកជំងឺត្រូវធ្វើលំហាត់ប្រាណ ឬយោគៈ និងអនុវត្តតិកនិក Rééducation vésicale រាល់ថ្ងៃ ដោយត្រូវគេងសន្ធឹងលើគ្រែ ដកដង្ហើមធម្មតាហើយប្រឹងខ្ជឹបសាច់ដុំដូចទប់បត់ជើងតូច និងបត់ជើងធំក្នុងរយៈពេល១០វិនាទី រួចរលាវិញ ១០វិនាទីទើបចាប់ផ្តើមខ្ជឹបម្តងទៀត រហូតបាន ១៥ដងក្នុង ១វគ្គ (១ថ្ងៃ៣វគ្គ ព្រឹក ថ្ងៃ និងល្ងាច)។ • ការព្យាបាលដោយប្រើថ្នាំ៖ ធ្វើឡើងក្នុងករណីវិធីសាស្ត្រខាងលើបរាជ័យដើម្បីកុំឲ្យប្លោកនោមកន្ត្រាក់ខ្លាំង ដោយប្រើថ្នាំប្រភេទ Anticholinergics តាមការណែនាំរបស់គ្រូពេទ្យអាស្រ័យលើស្ថានភាពជាក់ស្តែងរបស់អ្នកជំងឺ។ តិកនិកទំនើបមួយទៀតក្នុងប្រទេសជឿនលឿន គឺការចាក់ឆ្អឹងខ្នងដើម្បីឲ្យសាច់ដុំកន្ត្រាក់ឡើងវិញ។ • ដំណាក់កាលចុងក្រោយអ្នកជំងឺនឹងត្រូវធ្វើការវះកាត់ ប្រសិនបើការព្យាបាលខាងលើមិនទទួលបានជោគជ័យ ឬបរាជ័យ ដោយប្រើតិកនិក TVT (Tension-free Vaginal Tape), TOT (Transobturator Tape) និងSphincter artificial។ ផលវិបាក និងការការពារ ករណីអ្នកជំងឺមិនធ្វើការព្យាបាលទេនោះ ផលវិបាកដែលអាចកើតមានដូចជា រំខានរហូតទៅជាស្ត្រេស មិនហ៊ានចេញក្រៅ ឬចូលរួមក្នុងសង្គម ប៉ះពាល់ដល់ការងារ និងសកម្មភាពផ្លូវភេទរបស់គាត់។ បន្ថែមពីនេះ អ្នកជំងឺអាចមានការរលាក ឡើងក្រហម ដំបៅ រហូតមានការបង្ករោគពីបាក់តេរី និងអាចវិវឌ្ឍរហូតមានមេរោគក្នុងឈាមដែលប៉ះពាល់ដល់អាយុជីវិតទៀតផង។ ទោះជាយ៉ាងណាក៏ដោយ Urinary Incontinence អាចចៀសវាងដោយលុបបំបាត់កត្តាហានិភ័យទាំងឡាយដូចជា លើសទម្ងន់ ទល់លាមក ធ្វើការងារ ឬហាត់កីឡាធ្ងន់ៗ ពិសាបារី ទទួលទានកាហ្វេ ស្ត្រេស និងហាត់តិកនិក Rééducation vesical ករណីសង្ស័យ។ រោគសញ្ញានៃការមិនអាចគ្រប់គ្រងការបត់ជើងតូចផ្តល់នូវរំខានខ្លាំង ដូច្នេះអ្នកជំងឺគួរជួបប្រឹក្សាជាមួយគ្រូពេទ្យឯកទេសផ្នែកតម្រងនោមដើម្បីការពារនូវផលវិបាកនាពេលអនាគតដែលអាចនឹងកើតមាន។ បកស្រាយដោយ៖ វេជ្ជបណ្ឌិត ទូច រ៉ាណូ ឯកទេសផ្នែកមូត្រសាស្រ្តនៅមន្ទីរពេទ្យព្រះកុសុមៈ និងមន្ទីរសម្រាកព្យាបាលតម្រងនោមភ្នំពេញ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨១ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Other Diseases Other Diseases Other Diseases Other Diseases
Share
  • Jul 18, 2019 |
  • 5 years ago |
  • 2.1K views

សិទ្ធិក្នុងការទទួលភាពឯកជនរបស់អ្នកជំងឺ

អតិថិជនដែលបានមកពិនិត្យ ឬសម្រាកព្យាបាលនៅមូលដ្ឋានសុខាភិបាលមានសិទ្ធិទទួលបាននូវភាពបិទបាំងសមរម្យ ពិសេសនៅពេលធ្វើការពិនិត្យសារពាង្គកាយ និងនៅពេលព្យាបាល។ តើការអនុវត្តចំពោះសិទ្ធិក្នុងការទទួលភាពជាឯកជនមានអ្វីខ្លះ? • រាល់អង្គភាពសុខាភិបាលត្រូវមានមូលដ្ឋានសុខាភិបាលសមស្របដើម្បីធានានូវភាពឯកជនសម្រាប់អតិថិជននៅពេលធ្វើអន្តរាគមន៍វេជ្ជសាស្រ្តបានន័យថានៅពេលធ្វើការពិនិត្យ និងព្យាបាលជំងឺត្រូវធ្វើនៅក្នុងបន្ទប់បិទបាំង និងមានតែអ្នកដែលចាំបាច់។ • អ្នកគ្រប់គ្រងមន្ទីរពេទ្យត្រូវរៀបចំកន្លែងសម្រាប់បុរស-ស្រ្តីដាច់ដោយឡែកនៅក្នុងអំឡុងពេលពិនិត្យ និងព្យាបាលជំងឺ។ • រាល់អង្គភាពសុខាភិបាលត្រូវផ្តល់បន្ទប់ទឹកសម្រាប់ស្រ្តី បុរស និងជនពិការ។ តើការទទួលខុសត្រូវចំពោះសិទ្ធិក្នុងការទទួលភាពឯកជនមានអ្វីខ្លះ? • អតិថិជនត្រូវទទួលខុសត្រូវក្នុងការផ្តល់ដំណឹងទៅអ្នកផ្តល់សេវាសុខភាពពីតម្រូវការឯកជនរបស់ខ្លួន  និងផ្តល់ព័ត៌មាន ត្រឡប់ដើម្បីធ្វើការកែលម្អ។ បកស្រាយដោយ៖ វេជ្ជបណ្ឌិត ឡាក់ ឡេង ឯកទេសសុខភាពសាធារណៈ អនុប្រធានមជ្ឈមណ្ឌលជាតិ លើកកម្ពស់សុខភាព អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

For Health Practitioners For Health Practitioners
Share
  • Jul 17, 2019 |
  • 5 years ago |
  • 4.4K views

ស្នាមដំបៅរមាស់រាលលើដើមទ្រូងបណ្តាលមកពីអ្វី?

ការរកឲ្យឃើញពីមូលហេតុបង្កលើស្បែកខុសៗគ្នា ស្ថិតនៅទីតាំងដោយឡែកៗជាគន្លឹះនាំទៅរកការព្យាបាលប្រកបដោយប្រសិទ្ធភាព។ ជាក់ស្តែង ដូចជាស្នាមដំបៅ រមាស់រាលលើដើមទ្រូងនៃករណីរបស់បុរសម្នាក់ខាងក្រោម៖ សំណួរ៖ ខ្ញុំបាទ អាយុ ៣១ឆ្នាំ ភេទប្រុស កម្ពស់ ១ម៉ែត្រ៧២ រាល់ថ្ងៃធ្វើការងារនៅក្នុងស្ថាប័នឯកជនមួយកន្លែង។ ខ្ញុំបាទមានជំងឺសើស្បែកនៅលើដើមទ្រូងមានរាងដូចស្នាមដំបៅ ហើយរមាស់ថែមទៀតផង។ អាការៈនេះកើតឡើងយូរមកហើយ លាប និងលេបថ្នាំអ្វីក៏មិនបាត់ ឥលូវកើតកាន់តែច្រើន។ តើជំងឺនេះបណ្តាលមកពីអ្វី? អាចបង្កគ្រោះថ្នាក់ដែរឬទេ? ចម្លើយ៖ ចំពោះដំបៅលើទ្រូងដូចប្អូនបានលើកឡើងហាក់ជាជំងឺកម្រមួយដែលពុំធ្លាប់បានជួបប្រទះ។ ម៉្យាង ការរៀបរាប់របស់ប្អូនពុំច្បាស់លាស់ និងអាចមិនសូវត្រូវតាមបច្ចេកទេស ព្រោះជំងឺដំបៅលើទ្រូងមិនអាចគ្មាននូវរោគសញ្ញារួមផ្សំផ្សេងទៀតលេចចេញនោះឡើយ ជួនកាលប្រហែលវាអាចជាក្រម៉ ឬរបកដែលប្អូនហៅថាជាដំបៅ។ ជាទូទៅ ដំបៅគឺជាជំងឺដែលបង្កឡើងដោយមេរោគ ដូច្នេះប្រសិនវាជាដំបៅពិតមែន ប្អូននឹងត្រូវបានចេញវេជ្ជបញ្ជាឲ្យប្រើប្រាស់ថ្នាំផ្សះ នោះប្អូននឹងជាសះស្បើយ ព្រោះទ្រូងមិនមែនជាទីតាំងពិសេសនៃជំងឺរ៉ាំរ៉ៃទេ លុះត្រាតែតំបន់ប៉ះផ្ទាល់ជាមួយកម្តៅថ្ងៃទើបចាត់ចូលជាជំងឺរ៉ាំរ៉ៃ។ ករណីស្នាមនោះមិនមែនជាដំបៅ តែវាជាក្រម៉ អង្គែរបកសារចុះសារឡើងវិញ វាអាចទាក់ទងនឹងជំងឺ Psoriasis, Seborrheic dermatitis និងជំងឺផ្សេងទៀតជាច្រើនដែលទាមទារឲ្យមានការវិនិច្ឆ័យច្បាស់លាស់ពីគ្រូពេទ្យឯកទេស។ បកស្រាយដោយ៖ វេជ្ជបណ្ឌិត ប៉ុក សាវឿន ប្រធានគ្លីនិកជាតិសើស្បែក និងកាមរោគ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨១ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Skin, STD & Beauty Skin, STD & Beauty
Share
  • Jul 16, 2019 |
  • 5 years ago |
  • 3.3K views

សេចក្តីជូនដំណឹងស្តីអំពីការចុះទិដ្ឋាការបញ្ជិកាឱសថ ឧបករណ៍បរិក្ខារពេទ្យ និងចុះប្រវេទន៍គ្រឿងសម្អាងតាមប្រព័ន្ធអនឡាញ

សេចក្តីជូនដំណឹងថ្ងៃទី ២០ ខែមិថុនា ឆ្នាំ២០១៩ ពីក្រសួងសុខាភិបាលនៃព្រះរាជាណាចក្រកម្ពុជា សូមជម្រាបជូនដល់អគ្គនាយកគ្រឹះស្ថានផលិតឱសថ គ្រឹះស្ថានអាហរ័ណនីហរ័ណឱសថ និងគ្រឿងសម្អាងព្រមទាំងសាធារណជនទាំងអស់ឲ្យបានជ្រាបថា៖ ដើម្បីពង្រឹងការងារគ្រប់គ្រងឱសថ ឧបករណ៍បរិក្ខារពេទ្យ និងគ្រឿងសម្អាងឲ្យកាន់តែល្អប្រសើរបន្ថែមទៀតនោះ ក្រសួងសុខាភិបាលនឹងអនុវត្តការចុះទិដ្ឋាការ បញ្ជិកាឱសថ ឧបករណ៍បរិក្ខារពេទ្យ និងចុះប្រវេទន៍គ្រឿងសម្អាងតាមប្រព័ន្ធអនឡាញចាប់ពីខែសីហា ឆ្នាំ២០១៩ នេះតទៅ។ ការចុះទិដ្ឋាការ បញ្ជិកាឱសថ ឧបករណ៍បរិក្ខារពេទ្យ និងចុះប្រវេទន៍គ្រឿងសម្អាងតាមប្រព័ន្ធអនឡាញ (Online) នេះមានគោលបំណង៖  • ធានាបាននូវតម្លាភាពជូនអតិថិជន និងប្រសិទ្ធភាពនៃការចុះទិដ្ឋាការ បញ្ជិកា និងប្រវេទន៍  • បង្កលក្ខណៈងាយស្រួល និងឆាប់រហ័សក្នុងការផ្តល់សេវាជូនអតិថិជន  • ផ្តល់ព័ត៌មានត្រឡប់ដល់អតិថិជនបានទាន់ពេលវេលា  • កាត់បន្ថយការចំណាយពេលវេលា និងថវិការបស់អតិថិជន  • គ្រប់ឯកសារទាំងអស់របស់អតិថិជនត្រូវបានរក្សាទុកជាការសម្ងាត់ និងមានសុវត្ថិភាព  • អាជ្ញាធរមានសមត្ថកិច្ចក្នុងការគ្រប់គ្រងឱសថ និងអតិថិជនអាចទទួលបានព័ត៌មានឆាប់រហ័ស។ ម៉្យាងទៀត ក្រសួងសុខាភិបាលនឹងអនុវត្តប្រើប្រព័ន្ធ QR Code នៅលើប្រអប់ផលិតផលឱសថ ឧបករណ៍បរិក្ខារពេទ្យ និងគ្រឿងសម្អាងដែលប្រព័ន្ធនេះធានាបាននូវព័ត៌មានជាក់លាក់របស់ផលិតផល ដូចជាលេខទិដ្ឋាការ បញ្ជិកា ឬប្រវេទន៍ ប្រភពផលិតផល កាលបរិច្ឆេទផលិត និងផុតកំណត់ការប្រើប្រាស់ ឈ្មោះក្រុមហ៊ុនដែលនាំចូល និងចែកចាយ ហើយប្រព័ន្ធនេះបង្កលក្ខណៈងាយស្រួលដល់ភ្នាក់ងារត្រួតពិនិត្យឱសថ ក៏ដូចជាអ្នកប្រើប្រាស់អាចតាមដាននូវផលិតផលឱសថ និងគ្រឿងសម្អាងក្លែងក្លាយ ឬក្លែងបន្លំ ឬគ្មានច្បាប់អនុញ្ញាតពីក្រសួងសុខាភិបាលនៅលើទីផ្សារនៃព្រះរាជាណាចក្រកម្ពុជា។ ចំពោះប្រព័ន្ធ QR Code ក្រសួងសុខាភិបាលនឹងពិភាក្សាជាមួយវិស័យឯកជនបន្ថែម និងកំណត់ពេលវេលាជាក់លាក់សម្រាប់អនុវត្តនៅពេលឆាប់ៗខាងមុខនេះ។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events
Share
  • Jul 15, 2019 |
  • 5 years ago |
  • 4.3K views

ហេតុផលនានាដែលអ្នកគួរ​ប្រើវី​​​​​តា​មី​ន ​E

វីតាមីន E ជាអង់ទីអុកស៊ីដង់មានប្រសិទ្ធភាពក្នុងការប្រយុទ្ធប្រឆាំងនឹងផលប៉ះពាល់នៃរ៉ាឌីកាល់សេរីដែលផលិតដោយការបំប្លែងអាហារ និងជាតិពុលក្នុងបរិស្ថាន។ កាន់តែពិសេសនោះគឺអត្ថប្រយោជន៍របស់វីតាមីន E ក្នុងការជួយការពារស្បែករបស់អ្នកពីបញ្ហាមួយចំនួនរួមមាន៖ - ការពារស្បែកពីការខូចដោយសារកម្តៅថ្ងៃ ពន្លឺព្រះអាទិត្យបង្កើតរ៉ាឌីកាល់សេរីដែលបណ្តាលឲ្យស្បែកមានស្នាមជ្រួញ ប៉ុន្តែការប្រើក្រែមដែលមានផ្ទុកនូវសារធាតុវីតាមីន Eពីធម្មជាតិអាចជួយការពារស្បែកប្រឆាំងនឹងការខូចដោយពន្លឺព្រះអាទិត្យបានយ៉ាងមានប្រសិទ្ធភាពបំផុត។ ដោយឡែកយោងតាមការសិក្សាស្រាវជ្រាវវេជ្ជសាស្រ្តបានរកឃើញថាក្រែមដែលផ្សំពីវីតាមីនE ជាមួយនឹងវីតាមីនC មានសមត្ថភាពខ្ពស់ក្នុងការការពារស្បែកពីពន្លឺព្រះអាទិត្យ។ ដូច្នេះអ្នកគួរជ្រើសរើសប្រើប្រាស់ក្រែមដែលមានជាតិវីតាមីនE ជាជាងប្រើឡេការពារកម្តៅថ្ងៃតែមួយមុខ។ - ការពារស្បែកពីភាពចាស់ជ្រីវជ្រួញ ភាពចាស់ជ្រីវជ្រួញត្រូវបានបង្កឡើងដោយអាយុ ការថែរក្សាស្បែកមិនបានត្រឹមត្រូវការប៉ះពន្លឺព្រះអាទិត្យ ការខូចដោយរ៉ាឌីកាល់សេរី កត្តាបរិស្ថាន និងរបបអាហារមិនល្អផងដែរ។ ជាក់ស្តែង ជាមួយនឹងប្រេង ឬក្រែមវីតាមីន E អាចជួយទប់ស្កាត់ការវិវឌ្ឍរបស់ស្បែក ប្រឆាំងនឹងរ៉ាឌីកាល់សេរី ជំនួយក្នុងការផលិតជាតិកូឡាជែន និងផ្តល់សំណើមដល់ស្បែក។ លើសពីនេះ វាក៏អាចជួយកាត់បន្ថយសា្នមសង្វា និងស្នាមខ្មៅនៅក្រោមភ្នែកបានយ៉ាងមានប្រសិទ្ធភាព។ ដូច្នេះ អ្នកគួរប្រើប្រាស់ប្រេងវីតាមីន E លាបស្បែកមុខ និងរង្វង់ភ្នែកនៅពេលចូលគេងអាចជួយរក្សាស្បែករបស់អ្នកឲ្យមានសុខភាពល្អមានសំណើម និងបំបាត់នូវភាពជ្រីវជ្រួញ។ - ការពារជំងឺមហារីកស្បែក ទាក់ទងនឹងស្បែក វីតាមីន E មានអត្ថប្រយោជន៍ក្នុងការកាត់បន្ថយនូវហានិភ័យជំងឺមហារីកស្បែក។ ដោយឡែកតាមការសិក្សាស្រាវជ្រាវមួយកាលពីឆ្នាំ ២០១៣ បានធ្វើការពិសោធទៅលើសត្វកណ្តុរដោយចាក់ថ្នាំវីតាមីន E ចូលទៅក្នុងខ្លួនរបស់វាពេលនោះគេសង្កេតឃើញថាវាហាក់ដូចជាមិនសូវវិវឌ្ឍទៅរកជំងឺមហារីកស្បែកទេ។ ជាក់ស្តែង ដោយសារតែវីតាមីនE ផ្ទុកនូវសារធាតុប្រឆាំងនឹងការរលាក ប្រឆាំងអុកស៊ីតកម្ម និងរ៉ាឌីកាល់សេរីដែលជាជំនួយក្នុងការធ្វើឲ្យស្បែកមានសំណើម ទន់រលោង និងមានសុខភាពល្អផងដែរ។ ដូច្នេះ អ្នកគួរជ្រើសរើសប្រើប្រាស់ក្រែម ឬឡេដែលមានផ្ទុកនូវសារធាតុវីតាមីន E ដើម្បីការពារស្បែក ឬបញ្ចៀសពីបញ្ហាមហារីកស្បែក។ - ការពារបញ្ហាស្បែកស្ងួត វីតាមីន E ជាជាតិសំណើមសម្បូរបែប និងមានសារធាតុប្រឆាំងនឹងអុកស៊ីតកម្មដែលចាំបាច់ក្នុងការព្យាបាលកោសិកាស្បែករបស់លោកអ្នកឲ្យឆាប់ជាសះស្បើយ។ លើសពីនេះ វាអាចជួយការពារស្បែក មិនឲ្យឆាប់ចាស់ ការពារស្បែកពីការបំផ្លាញនៃរ៉ាឌីកាល់សេរី ជាពិសេសអាចការពារស្បែករបស់អ្នកពីបញ្ហាស្បែកស្ងួតបានផងដែរ។ ការប្រើប្រាស់វីតាមីន E ក្នុងមួយថ្ងៃពេញ នៅពេលអ្នកដើរលេងកម្សាន្តអាចជួយទប់ស្កាត់ការខូចកោសិកាស្បែក និងធ្វើឲ្យស្បែកមានសុខភាពល្អ មានសំណើម និងរលោង។ - ការពារបញ្ហាប្រេះបបូរមាត់ មិនត្រឹមតែជួយការពារស្បែកប៉ុណ្ណោះទេ ប៉ុន្តែវាក៏អាចការពារបបូរមាត់របស់អ្នកពីបញ្ហាប្រេះបានផងដែរ។ ជាក់ស្តែងសារធាតុមួយចំនួនដែលមានផ្ទុកនៅក្នុងវីតាមីនE ដូចជា សារធាតុប្រឆាំងអុកស៊ីតកម្ម ប្រឆាំងការរលាក សារធាតុចិញ្ចឹមផ្សេងៗទៀតអាចជួយឲ្យបបូរមាត់របស់អ្នកមានភាពស្រស់ស្អាត ទន់រលោង និងមានសំណើមជាពិសេសក្នុងខែរងា។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Skin, STD & Beauty Skin, STD & Beauty
Share
  • Jul 13, 2019 |
  • 5 years ago |
  • 3.1K views

អ្នកគិតពីសុខភាពត្រូវម៉ាច់ហ្មង!

តើអ្នកណាមិនចង់បានសុខភាពល្អ? ចម្លើយគឺគ្មានទេ។ មានតែអ្នកចង់បានសុខភាពល្អព្រោះវាជាកត្តាចម្បងមួយដែលនាំគ្រប់គ្នាទៅកាន់សុខសុភមង្គលក្នុងគ្រួសារទាំងមូល។ ប៉ុន្តែ តើមានមនុស្សប៉ុន្មានអ្នកដឹងថាតើដើម្បីទទួលបានសុខភាពល្អ ត្រូវធ្វើអ្វីខ្លះ? ឬដឹងត្រឹមថាផឹកស្អាត ហូបស្អាត និងរស់នៅស្អាតគឺគ្រប់គ្រាន់ហើយ? តែតើផឹកយ៉ាងម៉េចទើបគេហៅថាផឹកស្អាត? ហូបបែបណាទើបគេហៅថាហូបស្អាត? ហើយរស់នៅដូចម្តេចទើបគេហៅថារស់នៅស្អាតនោះ?  ចង់ដឹងចម្លើយទាំងនេះណាស់មែនទេ? តោះៗ! ទៅ CKCC នៅថ្ងៃទី២១ ខែកក្កដាឆ្នាំ២០១៩នេះ ហេលស៍ថាមនឹងស្រាយចម្ងល់ទាំងនេះជូនអ្នកទាំងអស់គ្នាពេញមួយថ្ងៃតែម្តងចាប់ពីម៉ោង៨ព្រឹករហូតដល់ម៉ោង៥រសៀល ក្នុងទិវាលើកកម្ពស់សុខភាព Healthtime Festival។ តែឥលូវមកយល់ត្រួសៗថាទិវានេះគេធ្វើអីខ្លះសិនណា... ទិវាលើកកម្ពស់សុខភាព Healthtime Festival របស់ក្រុមហ៊ុន Healthtime Corporation ត្រូវបានរៀបចំធ្វើឡើងក្នុងគោលបំណងបណ្តុះនូវធាតុផ្សំចម្បងនៃជីវិតប្រកបដោយភាពរីករាយ និងសុខភាពល្អ តាមរយៈការរស់នៅប្រកបដោយសុខភាពល្អ ការវិនិច្ឆ័យរោគបានក្នុងដំណាក់កាលដំបូងៗនិងការទទួលបាននូវចំណេះដឹងត្រឹមត្រូវស្តីពីសុខភាពជូនដល់សាធារណជនជាពិសេសអ្នកដែលមានអាយុចន្លោះពី ២០ ទៅ៣៥ឆ្នាំដែលសុទ្ធសឹងតែជាយុវជនពេញកម្លាំងក្នុងការអភិវឌ្ឍសង្គម។  ចូលរួមក្នុងទិវាលើកកម្ពស់សុខភាព Healthtime Festival លោកអ្នកនឹងរីករាយជាមួយនឹងសកម្មភាពសប្បាយជាច្រើនដែលរៀបចំឡើងដោយក្រុមការងាររបស់យើងរួមជាមួយនឹងការទទួលបាននូវអត្ថប្រយោជន៍ជាច្រើនថែមទៀតទៅលើសុខភាពរបស់លោកអ្នក ដូចជា៖ • ការហាត់យោគៈជាមួយគ្រូជំនាញល្បីឈ្មោះពី Angkor Yoga • ការពិគ្រោះ និងពិនិត្យសុខភាពជាមួយគ្លីនិកកំពូលៗនៅកម្ពុជា ដូចជាគ្លីនិកឯកទេសអេគីប គ្លីនិកស្បែកប៊ីស៊ីជាដើម • តេស្តឧបនិស្ស័យ និងអត្តចរិតរបស់អ្នកជាមួយ Brain Scan Test • កម្មវិធីពង្រឹងសុខភាពផ្លូវចិត្ត ដោយលោក នឹម ឈុន្នី សហស្ថាបនិក ក្រុមហ៊ុនបណ្តុះបណ្តាល VIPASSA • ការចែករំលែកពីការថែទាំសុខភាព និងអាហារូបត្ថម្ភ ដោយវាគ្មិនល្បីឈ្មោះ • សិក្ខាសាលាពីជំងឺកាចសាហាវនៅកម្ពុជា និងការពិភាក្សាជាក្រុមជាមួយវេជ្ជបណ្ឌិតល្បីៗក្នុងប្រទេស។ ចាប់អារម្មណ៍ជាមួយសកម្មភាពដែលបានរៀបរាប់មកទេ? ម៉ោះ! ទូរស័ព្ទមកកាន់លេខ ០៧៧ ៨៨៨ ០៧៥ ដើម្បីធ្វើការកក់សំបុត្ររបស់លោកអ្នកជាមុនដើម្បីទទួលបានតម្លៃពិសេស ឬបើមិនទាន់ប្រាកដចិត្ត អាចសួរព័ត៌មានសិនក៏បាន។ អូ! ភ្លេច! ឆាតមកផេក Healthogo by Healthtime ក៏បានដែរណា! ជួបគ្នាថ្ងៃទី២១ កក្កដា ឆ្នាំ២០១៩ នៅCKCC ណា អ្នកស្រលាញ់សុខភាពទាំងអស់គ្នា! ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events
Share
  • Jul 13, 2019 |
  • 5 years ago |
  • 3.4K views

ទម្លាប់នៃការញ៉ាំអាហារចាប់ផ្តើមប្រែប្រួលតើត្រូវដោះស្រាយបែបណា?

ការឡើងទម្ងន់ ឬស្រកទម្ងន់ខ្លាំងពេកបានក្លាយជាកង្វល់របស់បុគ្គលភាគច្រើន ដោយសារតែការមិនអាចបង្ហាញដងខ្លួនដែលស្អាត ស៊ិចស៊ីដល់មនុស្សជុំវិញខ្លួនបាន។ មិនត្រឹមតែប៉ុណ្ណោះ ការចំអកឡកឡាយពីគ្រួសារ មិត្តភក្តិ ក្លាយជាសម្ពាធមួយ ដែលធ្វើឲ្យពួកគេស្វែងរកដំណោះស្រាយ ហើយមូលហេតុនៃបញ្ហាទម្ងន់ដែលគ្រប់គ្នា នឹងគិតដល់មុនគេនោះគឺអាហារ។ ហេតុដូច្នេះហើយ របបអាហារក៏ត្រូវចាប់ផ្តើមប្រែប្រួល ដោយបុគ្គលខ្លះធ្វើការតមអាហារយ៉ាងគំហុកដើម្បីសម្រកទម្ងន់ ឯអ្នកខ្លះទៀត ក៏ចាប់ផ្តើមបង្កើនបរិមាណនៃការញ៉ាំឲ្យបានច្រើនដើម្បីឲ្យទម្ងន់កើនឡើង។ សកម្មភាពនេះមើលទៅដូចជាមិនមានអ្វីប្លែកទេ ប៉ុន្តែបើអ្នកសង្កេតឲ្យបានម៉ត់ចត់ជាងនេះវាអាចជាសម្ពាធមួយដែលធ្វើឲ្យមនុស្សទាំងនោះទទួលរងនូវជំងឺផ្លូវចិត្តម្យ៉ាងដែលគេឲ្យឈ្មោះថា Eating Disorder។ តើធ្វើយ៉ាងម៉េចទើបអាចដឹងថាខ្លួនអ្នកមានជំងឺ Eating Disorder? ចម្លើយនេះ អ្នកដែលបានតាមដានទស្សនាវដ្តីហេលស៍ថាមលេខ ៧៧ ដែលចេញផ្សាយក្នុងខែមីនា ឆ្នាំ២០១៩ ប្រាកដជាបានដឹងនិងបានធ្វើតេស្តខ្លះៗហើយមែនទេ? តែសម្រាប់អ្នកដែលមិនទាន់បានអានវិញ អាចចូលអានអត្ថបទនេះតាមតំណនេះ៖ អ្នកអាចកំពុងមានជំងឺផ្លូវចិត្តទាក់ទង Eating Disorders សិនណាសឹមយើងទៅស្វែងយល់ជាមួយគ្នាបន្តពីដំណោះស្រាយនៃបញ្ហានេះ។ តើ Eating Disorder អាចព្យាបាលបែបណា? តោះ! បើបានដឹងថាខ្លួនមានបញ្ហានេះហើយ មកតាមដានទាំងអស់គ្នាពីការដោះស្រាយម្តង... - ការពិនិត្យសុខភាពទូទៅ៖ កង្វល់ធ្ងន់ធ្ងរជាងគេក្នុងការព្យាបាលជំងឺ Eating Disorder គឺការរកមើលថាតើមានបញ្ហាសុខភាពណាមួយទេ ដែលបណ្តាលមកពីការប្រែប្រួលទម្លាប់បរិភោគអាហារនេះ។ - ការបំពេញអាហារូបត្ថម្ភ៖ អ្នកជំងឺនឹងត្រូវបានណែនាំឲ្យបរិភោគតាមធម្មតាវិញហើយគ្រូពេទ្យនឹងរៀបចំគម្រោងអាហារផ្ទាល់ខ្លួនសម្រាប់អ្នកជំងឺម្នាក់ៗដើម្បីឲ្យទម្ងន់ត្រឡប់មកធម្មតាវិញ និងរក្សាទម្ងន់ដែលសមស្រប។ - ការព្យាបាលផ្នែកផ្លូវចិត្ត៖ ការព្យាបាលផ្នែកផ្លូវចិត្តរបស់អ្នកជំងឺ អាចមានទម្រង់ផ្សេងៗគ្នា ដោយមានការចូលរួមពីបុគ្គលខ្លួនឯងផ្ទាល់ ក្រុមគ្រួសារ ឬមនុស្សនៅជុំវិញខ្លួន អាស្រ័យទៅតាមមូលហេតុនៃ Eating Disorder របស់អ្នកជំងឺនីមួយៗ។ ការព្យាបាលនេះ គឺជាផ្នែកមួយសំខាន់ក្នុងការធ្វើឲ្យអ្នកជំងឺមានឱកាសជាសះស្បើយឡើងវិញ និងព្យាបាលការប៉ះទង្គិចផ្លូវអារម្មណ៍របស់ពួកគាត់ហើយក៏អាចស្វែងរកគុណភាពជីវិតរបស់ខ្លួនឯងមកវិញផងដែរ។ - ការព្យាបាលដោយឱសថ៖ ឱសថមួយចំនួនអាចមានប្រសិទ្ធភាពក្នុងការដោះស្រាយបញ្ហាអារម្មណ៍តានតឹងដែលអាចកើតឡើងរួមគ្នាជាមួយនឹងការប្រែប្រួលទម្លាប់នៃការញ៉ាំ។ បើទោះបីជាអ្នកបានដឹងពីវិធីសាស្រ្តក្នុងការព្យាបាលជំងឺ Eating Disorder នេះហើយក៏ដោយតែអ្នកមិនត្រូវភ្លេចធ្វើការតាមដានស្ថានភាពរបស់ខ្លួនជាមួយនឹងគ្រូពេទ្យជំនាញនោះឡើយ ព្រោះការព្យាបាលជំងឺនេះ គឺត្រូវការចំណាយពេលវេលាយូររួមជាមួយនឹងការខិតខំប្រឹងប្រែងរបស់អ្នកផ្ទាល់ ព្រមទាំងការគាំទ្រពីក្រុមគ្រួសារ មិត្តភក្តិនិងមនុស្សជុំវិញខ្លួនផងដែរ។ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Mental Health​ & Entertainment Mental Health​ & Entertainment Mental Health​ & Entertainment
Share
Top