Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Jun 15, 2017 |
  • 7 years ago |
  • 4.6K views

ការអានសៀវភៅឲ្យកូនស្តាប់ នឹងជួយឲ្យខួរក្បាលកូនឆ្លាត និងលូតលាស់បានល្អ

ឪពុកម្តាយគ្រប់រូប គួរតែចំណាយពេលឲ្យបានច្រើនបន្តិច សម្រាកពីការងាររបស់អ្នក ហើយយកសៀវភៅមកអានឲ្យកូនរបស់អ្នកស្តាប់ ទោះបីជាគេនៅតូច មិនទាន់អាចនិយាយគ្នាបានក៏ដោយ។  ការសិក្សាជាច្រើនបានរកឃើញថា ការទម្លាប់អានសៀវភៅឲ្យកូនស្តាប់ ឬឲ្យគេអានដោយខ្លួនឯងអាចជួយបណ្តុះគំនិត និងជំនាញរបស់គេឲ្យកាន់តែល្អឡើងៗ។ ការអានសៀវភៅឲ្យកូនស្តាប់ នឹងជួយឲ្យគេឆាប់ចេះ ឆាប់ស្តាប់ និងឆាប់ចេះនិយាយ ព្រមទាំងឆ្លាតទៀតផង ជាពិសេស ពេលគេចាប់ផ្តើមចូលរៀន។ កូនអាយុបួនឆ្នាំ គឺជាពេលវេលាដ៏ល្អបំផុតសម្រាប់អ្នក ក្នុងការអប់រំ និងជួយឲ្យគេមានជំនាញស្តាប់ និងអភិវឌ្ឍខួរក្បាលឲ្យកាន់តែរស់រវើក។ ការសិក្សាក៏បានណែនាំផងដែរថា អ្នកគួរតែចាប់ផ្តើមបិទទូរទស្សន៍ និងទុកទូរស័ព្ទឲ្យឆ្ងាយពីដៃរបស់កូន ដើម្បីឲ្យគេងាកមកចាប់អារម្មណ៍ទៅលើសៀវភៅ និងការអាន។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Parenting
Share
  • Jun 15, 2017 |
  • 7 years ago |
  • 4.5K views

ផ្តាសាយអ៊ីចឹង? តើគួរមកជួបពេទ្យ ឬញ៉ាំថ្នាំនៅផ្ទះដោយខ្លួនឯង?

អាការៈញឹកញាប់នៃជំងឺផ្តាសាយ ជាទូទៅ មានរយៈពេលពីមួយទៅបីថ្ងៃ បន្ទាប់ពីអ្នកឆ្លងវីរុសដែលនាំឲ្យផ្តាសាយ។ រោគសញ្ញា និងសញ្ញាអាចខុសគ្នាពីមនុស្សម្នាក់ទៅមនុស្សម្នាក់ទៀត ដែលអាចមានដូចជា៖ • ហៀរសំបោរ • ឈឺបំពង់ក • តឹងច្រមុះ • ក្អក • មានស្លេស្ម • កណ្តាស់ • អស់កម្លាំង • ក្តៅខ្លួនតិចៗ។ សំបោរដែលហូរចេញពីច្រមុះ នឹងចាប់ផ្តើមខាប់ ឬឡើងជាពណ៌លឿង ឬបៃតង ដោយសារជំងឺផ្តាសាយ ប៉ុន្តែ វាមិនមែនជាសញ្ញានៃការឆ្លងបាក់តេរីឡើយ។ តើខ្ញុំគួរញ៉ាំថ្នាំនៅផ្ទះ ទុកឲ្យវាជាដោយខ្លួនឯង ឬប្រញាប់ទៅមន្ទីរពេទ្យ? ជាធម្មតា ជំងឺនេះមានសភាពស្រាល ហើយនឹងបាត់ទៅវិញដោយខ្លួនឯង ប៉ុន្តែ សូមប្រញាប់ទៅប្រឹក្សាជាមួយគ្រូពេទ្យរបស់អ្នក ក្នុងករណីដូចខាងក្រោមនេះ។ សម្រាប់មនុស្សធំ សូមប្រញាប់ទៅមន្ទីរពេទ្យភ្លាម ប្រសិនបើអ្នក ៖ • គ្រុនក្តៅលើសពី ៣៨,៥ អង្សារសេ • គ្រុនក្តៅមានរយៈពេលលើសពី ៥ ថ្ងៃ ហើយមិនបាត់សោះ • ពិបាកដកដង្ហើម • ដកដង្ហើមលឺសូរខុសធម្មតា • ឈឺបំពង់កខ្លាំង • ឈឺក្បាលមិនបាត់។ សម្រាប់កូនក្មេង បើមានសញ្ញាខាងក្រោមនេះ សូមប្រញាប់នាំកូន ទៅកាន់មន្ទីរពេទ្យភ្លាម ៖ • ក្តៅខ្លួនលើសពី ៣៨ អង្សារសេ • ក្តៅខ្លួនមិនបាត់ក្នុងរយៈពេលពីរបីថ្ងៃ • រោគសញ្ញាកាន់តែធ្ងន់ធ្ងរទៅៗ ដូចជា ក្អក ឬឈឺក្បាលជាដើម • ពិបាកដកដង្ហើម • ឈឺក្នុងត្រចៀក • សន្លឹម មិនសូវមានសកម្មភាព • មិនញ៉ាំអាហារ។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Cough, Cold & Flu
Share
  • Jun 15, 2017 |
  • 7 years ago |
  • 5.4K views

អ្នកស្គាល់ឫសដូងច្រមុះច្បាស់ហើយឬនៅ?

អ្នកដែលចាប់អារម្មណ៍ដែរឬទេថាមានមនុស្សមួយចំនួនហាក់បីដូចជាមានអាការៈដូចផ្តាសាយរយៈពេលយូរ និងមិនបានធូរស្បើយបើទោះបីជាបានប្រើប្រាស់ថ្នាំផ្តាសាយហើយក៏ដោយ? បើដូច្នោះ ឫសដូងច្រមុះជាជំងឺមួយដែលគួរតែត្រូវបានគិតដល់។ យ៉ាងណាមិញរោគសញ្ញាផ្សេងៗមួយចំនួនទៀតអាចឲ្យធ្វើរោគវិច្ឆ័យបានទៅលើជំងឺនេះផងដែរ។ ការពិតអ្នកអាចនឹងមានឫសដូងច្រមុះដោយមិនដឹងខ្លួនដោយសារជាញឹកញាប់វាមិនបង្ហាញនូវរោគសញ្ញាណាមួយឡើយ។ តើឫសដូងច្រមុះគឺជាអ្វី? តើវាសម្គាល់បានដោយរោគសញ្ញាអ្វីខ្លះ? ឫសដូងច្រមុះ (Nasal polyps) គឺជាដុំសាច់ធម្មតាមិនមែនមហារីកដែលដុះនៅក្នុងច្រមុះ ឬប្រហោងឆ្អឹងមុខហើយដូចដែលបានបញ្ជាក់ពីខាងលើជាទូទៅដុំសាច់នេះមិនបង្ហាញជារោគសញ្ញាអ្វីគួរកត់សម្គាល់ឡើយពីព្រោះដុំសាច់នោះមានសភាពទន់ និងមិនបង្កឲ្យមានការឈឺចាប់ទេជាពិសេសនៅពេលសាច់ដុះនោះតូច។ ប៉ុន្តែករណីដែលដុំសាច់នេះធំឬមានចំនួនច្រើនវាអាចបិទទៅលើរន្ធឆ្អឹងមុខ (Sinus) ហើយបង្កឲ្យមានការស្ទះ និងការប្រមូលផ្តុំនៃសារធាតុអន្ធិលរបស់ប្រហោងឆ្អឹងមុខអាចបង្កឲ្យមានការឆ្លងរោគធ្ងន់ធ្ងរដែលសម្គាល់បានដោយការឡើងខាប់នៃសារធាតុអន្ធិល និងការប្តូរពណ៌របស់វា។ ក្នុងខណៈពេលនោះ រោគសញ្ញាមួយចំនួនអាចនឹងសង្កេតឃើញមានដូចជាតឹងច្រមុះ ហៀរសំបោរ កណ្តាស់ ស្លេស្ម៍នៅក្នុងបំពង់ក ឈឺមុខ ឈឺក្បាលការថយចុះឬបាត់បង់តែម្តងនូវសមត្ថភាព ក្នុងការហិតក្លិនបាត់បង់ការដឹងរសជាតិ រមាស់ឆៀបនៅជុំវិញភ្នែក មានអារម្មណ៍ធ្ងន់នៅថ្ងាសឬមុខ គេងស្រមុក បាត់ដង្ហើមពេលគេង ដកដង្ហើមតាមមាត់ជាដើម។ ក្រៅពីនេះអ្នកជំងឺខ្លះអាចនឹងមានការវិវឌ្ឍនូវរោគសញ្ញានៃជំងឺហឺត ដូចជាថប់ដង្ហើម និងខ្លះទៀតក៏អាចមានការកើតឡើងនូវការប្រតិកម្មជាមួយថ្នាំមួយចំនួន ពិសេសគឺអាស្ពីរីនតែម្តង។ មូលហេតុអ្វីបានជាមានឫសដូងច្រមុះ? ទោះបីជាមូលហេតុនៃការដុះសាច់ច្រមុះនៅមិនទាន់បានកំណត់ឲ្យច្បាស់លាស់នៅឡើយតែការរលាកច្រមុះរ៉ាំរ៉ៃ និងប្រវត្តិគ្រួសារ (តំណពូជ) ហាក់មានទំនោរបង្កឲ្យមានឫសដូងច្រមុះនេះកើតឡើង។ ជាក់ស្តែង មនុស្សមួយចំនួនអាចកើតមានឫសដូងច្រមុះដោយគ្មានមូលហេតុ ប៉ុន្តែកត្តាមួយចំនួនត្រូវបានរកឃើញថាចូលរួមចំណែកបង្កើនហានិភ័យនៃជំងឺដែលក្នុងនោះរួមមានអ្នកជំងឺហឺត ភាពខុសប្រក្រតីនៃប្រព័ន្ធភាពស៊ាំ ការរលាកប្រហោងឆ្អឹងមុខរ៉ាំរ៉ៃឬក៏រើឡើងវិញ  និងការអាលែ្លកហ្ស៊ីជាមួយថ្នាំអាស្ពីរីនឬប្រភេទថ្នាំមួយចំនួនទៀតជាដើម។ អ្នកណាខ្លះងាយនិងប្រឈមនឹងជំងឺនេះ? ថ្វីត្បិតមនុស្សគ្រប់វ័យអាចវិវត្តនូវឫសដូងច្រមុះនេះក៏ប៉ុន្តែអ្នកដែលស្ថិតក្នុងវ័យកណ្តាល ឬលើសពីអាយុ៤០ឆ្នាំត្រូវបានសង្កេតឃើញថាមានការប្រឈមខ្ពស់ជាងគេហើយក្នុងនោះផងដែរបុរសមានភាគរយកើតខ្ពស់ជាងស្រ្តី។ មានករណីកម្រណាស់ដែលកុមារអាយុក្រោម១០ឆ្នាំមានកើតនូវជំងឺនេះ។ ផលវិបាកអ្វីខ្លះដែលអាច នឹងកើតឡើងដោយសារឫសដូងច្រមុះ? ផលវិបាកនៃជំងឺគឺការប្រឈមនឹងហានិភ័យខ្ពស់នឹងការរលាកប្រហោងឆ្អឹងមុខរ៉ាំរ៉ៃ និងការកើនឡើងនូវការរើឡើងនៃអាការៈជំងឺហឺតជាដើម។ ក្រៅពីនោះការព្យាបាលដោយការវះកាត់នឹងផ្តល់នូវផលរំខានមួយចំនួនផងដែររួមមានការហូរឈាមច្រមុះការឆ្លងរោគផ្សេងៗ និងអាចឈានទៅដល់ការរលាកស្រោមខួរទៀតផង។ រីឯការប្រើប្រាស់ថ្នាំប្រភេទ Corticosteroid យូរក៏អាចបង្កឲ្យរាងកាយមានការថយចុះនូវភាពធន់ទៅនឹងការឆ្លងរោគផងដែរ។ ឫសដូងច្រមុះត្រូវព្យាបាលដោយរបៀបណា? គួរបញ្ជាក់ជាមុនថាគោលដៅនៃការព្យាបាលគឺដើម្បីកាត់បន្ថយទំហំ ឬបង្រួញ និងបំបាត់ដុំសាច់ដុះនោះចេញ។ ការប្រើប្រាស់ថ្នាំជាជម្រើសទីមួយក្នុងការព្យាបាលហើយប្រភេទថ្នាំដែលត្រូវយកមកប្រើប្រាស់រួមមាន៖ • ស្ព្រៃយន៍បាញ់ច្រមុះប្រភេទ Corticosteroid អាចជួយកាត់បន្ថយការរលាកនៅក្នុងច្រមុះហើយក៏ត្រូវបានប្រើក្នុងរយៈពេលយូរសម្រាប់ការពារការលាប់ឡើងនូវឫសដូងច្រមុះផងដែរ • ថ្នាំគ្រាប់និងថ្នាំចាក់ប្រភេទ Corticosteroid នឹងត្រូវបានយកមកប្រើប្រាស់តែឯង ឬរួមផ្សំជាមួយស្ព្រៃយន៍បាញ់ច្រមុះក្នុងករណីដែលការប្រើប្រាស់ស្ព្រៃយន៍បាញ់ច្រមុះតែឯងពុំមានប្រសិទ្ធភាព។ ដោយឡែក ចំពោះប្រភេទថ្នាំចាក់នឹងត្រូវប្រើតែក្នុងករណីដែលរលាកធ្ងន់ធ្ងរប៉ុណ្ណោះ រីឯការប្រើប្រាស់ថ្នាំគ្រាប់ក៏ត្រូវប្រើក្នុងរយៈពេលខ្លីផងដែរដោយសារតែផលរំខានធ្ងន់ធ្ងររបស់វា • ថ្នាំមួយចំនួនទៀតដែលអាចនឹងត្រូវបានប្រើប្រាស់បន្ទាប់បន្សំដើម្បីព្យាបាលនិងការពារការលាប់ឡើងវិញរួមមានដូចជា ថ្នាំ Antihistamine (ប្រឆាំងអាលែ្លកហ្ស៊ី) ថ្នាំផ្សះ (ប្រឆាំងបាក់តេរី)។ • ថ្នាំសម្រាប់ព្យាបាលអាស្រ័យនឹងរោគសញ្ញាខ្លះត្រូវបានប្រើសម្រាប់សម្រួលអាការៈរបស់អ្នកជំងឺ រួមមាន ថ្នាំបំបាត់ការតឹងច្រមុះ ហៀរសំបោរ និងបំបាត់ការឈឺចាប់ជាដើម។ • ចុងក្រោយគឺការព្យាបាលដោយការដកភាពស៊ាំ (Desensitization) ទៅនឹងថ្នាំអាស្ពីរីន ឬសារធាតុណាមួយក៏ត្រូវបានពិចារណាផងដែរក្នុងករណីដែលមូលហេតុពិតប្រាកដនៃការរលាកទាក់ទងនឹងការឆ្លើយតបយ៉ាងខ្លាំងនៃប្រពន្ធ័ភាពស៊ាំទៅនឹងសារធាតុឬថ្នាំទាំងនោះ។ បន្ទាប់មក ការវះកាត់ជាជម្រើសមួយទៀតក្នុងការព្យាបាលនៅដំណាក់កាលដែលឫសដូងច្រមុះរីកធំ ឬបង្កការស្ទះដល់ការជ្រាបទៅដល់របស់ថ្នាំ នាំឲ្យការប្រើប្រាស់ថ្នាំមិនមានប្រសិទ្ធភាព។ ការវះកាត់ធ្វើឡើងដើម្បីកាត់ដុំសាច់ចេញ ឬកែតម្រូវបញ្ហាដែលមានមូលហេតុទាក់ទង នឹងប្រហោងឆ្អឹងមុខជាដើម។ អ្វីដែលអ្នកគួរកត់សម្គាល់បំផុតនោះគឺការងាយនឹងកើតឡើងវិញបន្ទាប់ពីការព្យាបាលដោយជោគជ័យទៅលើឫសដូងច្រមុះដូចនេះអ្នកជំងឺជាទូទៅត្រូវបន្តប្រើស្ព្រៃយន៍បាញ់ច្រមុះប្រភេទ Corticosteroid ដើម្បីប្រឆាំងនឹងការរលាកឬការលាប់ឡើងវិញ។ ក្រៅពីនោះការលាងច្រមុះដោយទឹកសាលីន(ស៊ីរ៉ូមប្រៃ) ក៏ត្រូវបានណែនាំផងដែរដើម្បីឲ្យរបួសពីការវះកាត់ឆាប់បានជាសះស្បើយ។ លើសពីនេះអ្នកជំងឺក៏គួរធ្វើការត្រួតពិនិត្យ ឬថតឆ្លុះសាច់ច្រមុះឲ្យបានទៀតទាត់ដើម្បីតាមដាននិងការពារការកកើតឡើងវិញ។ ជាមួយគ្នាផងដែរការគ្រប់គ្រងជំងឺហឺត ឬអាលែ្លកហ្ស៊ីដែលមានស្រាប់របស់អ្នកជំងឺក៏អាចកាត់បន្ថយហានិភ័យនេះមួយភាគធំ។ ពេលណាអ្នកជំងឺគួរទៅជួបជាមួយគ្រូពេទ្យជាបន្ទាន់? សញ្ញាគ្រោះថ្នាក់ដែលអាចឲ្យប្រឈមមុខនឹងគ្រោះថ្នាក់មានដូចជា៖ • ការពិបាកដកដង្ហើមខ្លាំង • ភាពវិវត្តទៅជាធ្ងន់ធ្ងរយ៉ាងឆាប់រហ័សនៃអាការៈជំងឺ • ការមើលឃើញពីការថយចុះសមត្ថភាពក្នុងការមើល ឬការរេចុះឡើងនៃភ្នែក • ការហើមធ្ងន់ធ្ងរនៅជុំវិញភ្នែក • ការឈឺក្បាលខ្លាំងក្លារួមជាមួយនឹងកម្តៅក្នុងខ្លួនកើនឡើងឬពិបាកក្នុងការឱនក្បាលទៅមុខ។ មានវិធីសាស្ត្រ អ្វីខ្លះក្នុងការបង្ការឫសដូងច្រមុះ? • គ្រប់គ្រងជំងឺហឺត និងអាការៈអាលែ្លកហ្ស៊ីឲ្យបានត្រឹមត្រូវ • ចៀសវាងនូវសារធាតុដែលធ្វើឲ្យរលាកដល់ច្រមុះ ដូចជាផ្សែង បារី ថ្នាំជក់ ធូលីដី លម្អងផ្កាជាដើម • ត្រូវអនុវត្តអនាម័យស្អាត និងត្រឹមត្រូវដើម្បីចៀសវាងនូវការឆ្លងរោគផ្សេងៗ • ផ្តល់សំណើមដល់បរិយាកាសក្នុងផ្ទះដើម្បីសម្រួលដល់ចរន្តចេញចូលនៃសារធាតុអន្ធិលរបស់ប្រហោងឆ្អឹងមុខនិងការពារការកកស្ទះរបស់វា • ប្រើប្រាស់ទឹកលាងច្រមុះ(ស៊ីរ៉ូមប្រៃ)សម្រាប់ឲ្យមានចរន្តចេញចូលស្រួលនៃសារធាតុអន្ធិលរបស់ប្រហោងឆ្អឹងមុខព្រមទាំងលាងសម្អាតចេញនូវសារធាតុដែលបង្កឲ្យរលាកផ្សេងៗចេញផងដែរ។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Other Diseases Ear Nose Throat
Share
  • Jun 14, 2017 |
  • 7 years ago |
  • 7.3K views

[ខ្លឹមៗ] កុំចេះតែគិតថា «ពាក់វ៉ែនតាធ្វើឲ្យភ្នែកឡើងដឺក្រេ និងមានអារម្មណ៍ថាកូនមិនល្អដូចអ្នកដទៃ»

លោកសាស្រ្តាចារ្យវេជ្ជបណ្ឌិត ប៉ោក ធន បានមានប្រសាសន៍ថា «ភាពលូតលាស់មិនស្របគ្នារវាងកញ្ចក់ភ្នែក និងទំហំនៃគ្រាប់ភ្នែក (វាស់ពីមុខមកក្រោយ) ដែលវាកើតឡើងមកពីភ្នែកទៅជារីកធំខុសពីធម្មតា ឬកញ្ចក់ភ្នែកកោងខ្លាំងពេក ដែលកំណោងកញ្ចក់ភ្នែកធ្វើឲ្យមានការបត់កាំពន្លឺជាកំនុំរូបភាពនៅខាងមុខបាតភ្នែកជាមូលហេតុនៃការម៉្ញូប ដែលពុំទាន់រកឃើញពីមូលហេតុច្បាស់លាស់ តែ៩០%ត្រូវ បានគេសន្និដ្ឋានថា បណ្តាលមកពីតំណពូជ តែមិនទាន់ដឹងថាកំណត់ដោយក្រូម៉ូសូមប្រាកដណាមួយ»។  មានការព្យាបាលដែរឬទេសម្រាប់អ្នកភ្នែកម៉្ញូប? -ករណីដែលម៉្ញូបទាក់ទងនឹងហ្ស៊ែននោះ ពុំមានវិធីក្នុងការបញ្ឈប់ការវិវឌ្ឍទៅរកភាពម៉្ញូប ឬឡើងដឺក្រេភ្នែកទេ។  -ចំពោះម៉្ញូបដែលកើតមាននៅវ័យក្មេង ការវិវឌ្ឍនឹងមានសភាពលឿន ប៉ុន្តែវានឹងថយចុះវិញនៅក្រោយអាយុ១៩ឆ្នាំ ឬ២២ឆ្នាំ។ ក្នុងករណីដែលការម៉្ញូបរបស់គាត់ឈប់មានការវិវឌ្ឍ មានន័យថា គាត់បានជោគជ័យក្នុងការព្យាបាល តែករណីដែលការវិវឌ្ឍនៅតែបន្តនោះ ការព្យាបាលនឹងត្រូវធ្វើជាបន្ត ហើយការពាក់វ៉ែនតា ឬធ្វើការវះកាត់បន្តទៀតក៏ត្រូវបានពិចារណាដដែល។ ដូចនេះ ការព្យាបាលដាច់ ឬក៏អត់ គឺអាស្រ័យនឹងការវិវឌ្ឍរបស់ម៉្ញូប។  បញ្ជាក់ ៖ ពុំមានថ្នាំណាមួយសម្រាប់បញ្ឈប់ការឡើងដឺក្រេបានទេ ហើយក៏ពុំមានការបញ្ជាក់ណាមួយពីប្រសិទ្ធភាពរបស់វាដែរ។ -ការព្យាបាលដែលងាយបំផុត គឺពាក់វ៉ែនតាមុននឹងឈានដល់ដំណាក់កាលវះកាត់ ដែលជាទូទៅវ៉ែនតាប្រភេទដកត្រូវប្រើចំពោះអ្នកម៉្ញូប ឯ Hyperopia ត្រូវប្រើប្រាស់វ៉ែនតាបូក រីឯអាស្ទីម៉ាតអាចមានបូក និងដកទៅតាមការពិនិត្យ និងវាស់ឃើញជាក់ស្តែង ។ -រីឯការវះកាត់លើកញ្ចក់ភ្នែកដូចជាការប្រើប្រាស់ឡាស៊ែរ ការបញ្ចូលកងទៅនឹងកម្រាស់កញ្ចក់ភ្នែក ដើម្បីធ្វើកំណោងកញ្ចក់ភ្នែកមានកំណោងមកធម្មតាវិញ។ សម្រាប់ដែលមានម៉្ញូបកម្រិតខ្ពស់ (២០ Diopters) អាចធ្វើការវះកាត់ដោយបញ្ចូលកញ្ចក់សិប្បនិម្មិតតម្រូវនឹងភ្នែករបស់យើងជំនួសកញ្ចក់ភ្នែករបស់យើង។ គោលបំណងនៃការវះកាត់គឺ ដើម្បីឲ្យភ្នែករបស់យើងត្រលប់មកធម្មតាវិញ ប៉ុន្តែអ្នកជំងឺអាចប្រើប្រាស់វ៉ែនតាក្នុងកម្រិតស្រាលមួយដើម្បីមើលច្បាស់ ពីព្រោះការវះកាត់ជាក់ស្តែងអាចជួយអ្នកជំងឺបន្ថយដឺក្រេភ្នែកបាន ប៉ុន្តែមិនទាំងស្រុងទេ។ ចំពោះជំនឿរបស់បងប្អូនយើង ជាពិសេសមាតាបិតាដែលថា «ការពាក់វ៉ែនតាធ្វើឲ្យភ្នែកកូនចេះតែឡើងដឺក្រេ និងមានអារម្មណ៍ថាកូនមិនល្អដូចអ្នកដទៃទៅវិញ» គួរតែត្រូវបានពិចារណាឡើងវិញ ពីព្រោះអ្វីដែលសំខាន់ គឺគំហើញច្បាស់របស់កូនដែលអាចជួយឲ្យជីវិតពួកគេប្រសើរឡើងរួមទាំងការរៀនសូត្រ ការប្រកបការងារព្រមជាមួយនឹងគុណភាពជីវិតដ៏ល្អផងដែរ។ យល់ដឹងបន្ថែមពី បញ្ហាភ្នែកម៉្ញូប © 2017 រក្សាសិទ្ធិគ្រប់យ៉ាងដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Other Diseases Parenting Eye Health
Share
  • Jun 14, 2017 |
  • 7 years ago |
  • 3.4K views

[ខ្លឹមៗ] ៥ វិធី ឳពុកម្តាយរួមចំណែកព្យាបាលការថយចុះការលូតលាស់របស់កូន

រោគសញ្ញាមួយចំនួនដូចជា កុមារដែលមានការលូតលាស់ផ្នែករាងកាយមិនបានល្អ ជាពិសេសមិនឡើងទម្ងន់បើធៀបនឹងអាយុ និងកម្ពស់របស់គាត់នោះ ឬកុមារមិនឡើងទម្ងន់ ឬស្រកទម្ងន់ជារៀងរាល់ខែ  កុមារមិនញ៉ាំចំណី កុមារអស់កម្លាំងល្វឹងល្វើយ ស្លេកស្លាំង កុមារមានរោគសញ្ញារាករ៉ាំរ៉ៃបណ្ដាលមកពីជំងឺពោះវៀន ឬប្រតិកម្មអាល្លែកហ្ស៊ីធ្ងន់ធ្ងរ និងកុមារមានសកម្មភាពមិនរហ័សរហួន សុទ្ធតែបញ្ជាក់ថាកុមារមានការថយចុះការលូតលាស់។ ក្នុងនាមជាឪពុកម្តាយ ដើម្បីឲ្យកុមារមានការរីកលូតលាស់ឡើងវិញ លោកអ្នកគួរតែ៖ -ព្យាយាមបំប៉នចំណីអាហារដែលមានជីវជាតិគ្រប់គ្រាន់ដល់កុមារ -ព្យាបាលជំងឺដែលកុមារមានតាំងពីកំណើត  -ព្យាយាមតាមដាន និង ស្វែងរកជំងឺរ៉ាំរ៉ៃ ព្រមទាំងព្យាបាលវា -ថែទាំកុមារ និងចិញ្ចឹមកុមារឲ្យបានល្អ -ជ្រើសរើសចំណីអាហារបំប៉នណាដែលមិនប្រតិកម្មនឹងខ្លួនរបស់កុមារ។ ជាក់ស្តែង ចំណីអាហារដែលអាចធ្វើឲ្យកុមាររីកធំធាត់ គឺចំណីអាហារណាដែលមានអនាម័យល្អ និងមានជីវជាតិគ្រប់គ្រាន់ មានន័យថាកុមារអាចបៅទឹកដោះម្ដាយ បរិភោគបបរគ្រឿងគ្រប់មុខ ឬ បាយជាមួយម្ហូបដែលមានសាច់ បន្លែ ស៊ុត គ្រឿងក្នុងមាន់  ឬជ្រូក រួមទាំងផ្លែឈើ និងភេសជ្ជៈណាដែលទ្រទ្រង់សុខភាព។ ព័ត៌មានបន្ថែមអំពី សារធាតុចិញ្ចឹម៣ប្រភេទចាំបាច់សម្រាប់កុមារ ស្វែងយល់ឲ្យកាន់តែលម្អិតពី ការថយចុះការលូតលាស់របស់កុមារ © 2017 រក្សាសិទ្ធិគ្រប់យ៉ាងដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

Other Diseases Parenting
Share
  • Jun 14, 2017 |
  • 7 years ago |
  • 3.8K views

[ខ្លឹមៗ] អាចកើតមានជំងឺរលាកស្រោមខួរ និងអាប់សែខួរក្បាល បើព្យាបាលរលាកត្រចៀកក្នុងកម្រិត៣ មិនទាន់ពេល

ជំងឺ Labyrinthitis (រលាកត្រចៀកខាងក្នុង) គឺជាជំងឺដែលរលាកនៅត្រង់កន្លែងណាមួយនៃត្រចៀកខាងក្នុងដែលមានរោគសញ្ញាដូចជា ៖ វិលមុខ គ្រាប់ភ្នែករេទៅម្ខាងដោយឯកឯង ពោល គឺទៅខាងដែលរលាក (Nyst-agmus) ចង្អោរ ក្អួតជាដើម ថយចុះនូវការស្តាប់ ឬស្តាប់មិនលឺតែម្តង (សម្រាប់ករណីធ្ងន់ធ្ងរ)។ គួរបញ្ជាក់ផងដែរថា ជំងឺនេះមាន៣កម្រិត រួមមាន៖ -កម្រិតទី ១ ហៅថា Circumscribed labyrinthitis : កើតនៅតែមួយកន្លែងនៃត្រចៀកខាងក្នុង ហើយអាចព្យាបាលជាដោយធ្វើការវះកាត់ និងប្រើជេលហ្វូម រួមទាំងកម្ទេចឆ្អឹងទៅបិទនៅនឹងកន្លែងប្រហោងដែលបណ្តាលឲ្យរលាកនោះ។បន្ទាប់មកត្រចៀកម្ខាងទៀតរបស់អ្នកជំងឺ នឹងធ្វើការប៉ះប៉ូវនូវមុខងាររបស់ត្រចៀកដែលរលាកដោយឯកឯង នៅពេលនោះអ្នកជំងឺនឹងមិនមានអាការៈវិលមុខបន្តទៀតទេ ហើយការរលាកនេះនឹងជាសះស្បើយបន្តិចម្តងៗ។ -កម្រិតទី ២ ហៅថា Diffuses serous labyrinthitis: ការរលាកបានសាយភាយពីកន្លែងមួយទៅកន្លែងផ្សេងទៀតរបស់ត្រចៀកខាងក្នុងរួចទៅហើយ ហើយមានការ ពិបាកក្នុងការព្យាបាល។ -កម្រិតទី ៣ ហៅថា  Diffuse suppurative labyrinthitis: វត្តមានខ្ទុះបានលេចឡើងនៅក្នុងត្រចៀកខាងក្នុង ហើយបានសាយភាយទៅដល់ស្រោមខួរ ដែលការព្យាបាល មានការពិបាក និងអាចបណ្តាលឲ្យអ្នកជំងឺបាត់បង់ជីវិត។  ករណីដែលអ្នកជំងឺមិនបានមកជួបគ្រូពេទ្យ ដើម្បីធ្វើការព្យាបាលឲ្យទាន់ពេលវេលានោះ ជំងឺនេះនឹងវិវឌ្ឍបន្តិចម្តងៗទៅដំណាក់កាលចុងក្រោយ ហើយក៏អាចបណ្តាលឲ្យកើតជំងឺរលាកស្រោមខួរ និងអាចឈានដល់អាប់សែខួរក្បាលថែមទៀត។ បកស្រាយដោយ ៖ លោកសាស្ត្រាចារ្យ វេជ្ជបណ្ឌិត ប៉ូ រដ្ឋា ឯកទេសវះកាត់ និងព្យាបាលជំងឺ ត្រចៀក ច្រមុះ បំពង់ក ដែលបានបញ្ចប់ការសិក្សាថ្នាក់ឯកទេសពីប្រទេសថៃ  និងជាប្រធានផ្នែកត្រចៀក ច្រមុះបំពង់កនៃមន្ទីរពេទ្យព្រះអង្គឌួង អនុប្រធាននៃគ្លីនិកលុច្ស និងជាអនុប្រធានសមាគមជាតិ ត្រចៀក ច្រមុះ បំពង់ក សល្យសាស្ត្រក្បាលនិងកម្ពុជា យល់ដឹងបន្ថែមពី ជំងឺរលាកត្រចៀកខាងក្នុង  © 2017 រក្សាសិទ្ធិគ្រប់យ៉ាងដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

Other Diseases Ear Nose Throat
Share
  • Jun 14, 2017 |
  • 7 years ago |
  • 3.1K views

[ខ្លឹមៗ] ពេលភ្លឺមើលឃើញធម្មតា បែរជាមិនធម្មតាតែពេលងងឹត?

អ្នកប្រើប្រាស់ភ្នែកច្រើនពេលយប់ ប្រាកដជាធ្លាប់ចាប់អារម្មណ៍ហើយថា គំហើញរបស់ខ្លួនហាក់ដូចជាប្រក្រតីនៅពេលដែលសម្លឹងមើលទីកន្លែងដែលមានពន្លឺគ្រប់គ្រាន់ តែប្រែជាមើលរូបភាពមិនឃើញនៅទីងងឹត ដឹងទេថា នេះជារោគសញ្ញានៃជំងឺម៉្ញួបយប់ (Noctunal myopia or nightmyopia) បើយោងតាមប្រសាសន៍របស់លោកវេជ្ជបណ្ឌិត សាលី ធារិទ្ធ។ លោកបានបញ្ជាក់ផងដែរថា វាមិនមែនបង្កឡើងពីតំណពូជនោះទេ តែច្រើនមកពីលក្ខខណ្ឌការងារ ហើយវាក៏អាចនឹងបាត់ទៅវិញពេលចូលដល់វ័យ៤០ឆ្នាំ ពេលដែលសាច់ដុំភ្នែកលែងត្រូវបានប្រើប្រាស់ខ្លាំង ហើយការព្យាបាលដែលអាចធ្វើបានមុនចូលដល់វ័យនោះ គឺការកែគំហើញរបស់អ្នកជំងឺដោយការប្រើប្រាស់វ៉ែនតា។ ថ្វីត្បិតថា ផលវិបាកនៃជំងឺនេះមិនធ្ងន់ធ្ងរ តែអាចនឹងបង្កគ្រោះថ្នាក់ក្នុងពេលបំពេញការងារក្នុងទីងងឹត ដូចនេះ អ្នកមិនត្រូវធ្វេសប្រហែសឡើយ… ស្វែងយល់បន្ថែមពី ជំងឺម៉្ញួបយប់ © 2017 រក្សាសិទ្ធិគ្រប់យ៉ាងដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

Other Diseases Eye Health
Share
  • Jun 14, 2017 |
  • 7 years ago |
  • 3.1K views

[ខ្លឹមៗ]អ្នកមានភាពមិនប្រក្រតីនៃសន្លាក់ឆ្អឹងពីកំណើតត្រូវឆាប់ទៅពិនិត្យ កុំចាំដល់ចេញរោគសញ្ញា!!!

លោកវេជ្ជបណ្ឌិត លី ជាតិតា ឯកទេសសន្លាក់ឆ្អឹង សាច់ដុំ និងជានាយផ្នែកខាងជំងឺសន្លាក់ឆ្អឹង សាច់ដុំ ទឹកនោមផ្អែម តម្រងនោម និងជំងឺទូទៅនៅមន្ទីរពេទ្យមិត្តភាពខ្មែរ-សូវៀត ហើយក៏ជាសាស្ត្រាចារ្យផ្នែកសន្លាក់ឆ្អឹងនៅសាកលវិទ្យាល័យវិទ្យាសាស្ត្រសុខាភិបាល បានបញ្ជាក់ថា «ការព្យាបាលជំងឺរលាកសន្លាក់ឆ្អឹង ដែលទាក់ទងទៅនឹងការសឹករេចរឹលនៃសន្លាក់ដោយសារការប្រើប្រាស់នាពេលកន្លងមក គឺអាស្រ័យនឹងមូលហេតុដែលបង្កជំងឺផ្ទាល់»។  -បើអ្នកជំងឺកំពុងមានអាការៈឈឺចាប់ខ្លាំង ត្រូវសម្រាកមួយរយៈពីការងារ ឬផ្លាស់ប្តូរការងារតែម្តង ប្រសិនបើខ្លួនកំពុងធ្វើការងារប្រភេទប្រើកម្លាំងធ្ងន់ធ្ងរ។  -ករណីអ្នកជំងឺលើសទម្ងន់ទាមទារឲ្យគាត់ធ្វើការបន្ថយទម្ងន់ជាចាំបាច់។ ម្យ៉ាងទៀត ត្រូវស្វែងរកការព្យាបាលឲ្យបានឆាប់រហ័ស និងត្រឹមត្រូវ ប្រសិនបើមានជំងឺសន្លាក់ឆ្អឹងផ្សេងៗក៏ដូចជាមានគ្រោះថ្នាក់ ឬប៉ះទង្គិចនានាត្រង់សន្លាក់ឆ្អឹង ដើម្បីចៀសវាងការវិវឌ្ឍឈានទៅរកការរលាកសន្លាក់ឆ្អឹង និងកាត់បន្ថយផលវិបាកនៃជំងឺ។ ផ្ទុយទៅវិញ បើមិនទទួលការព្យាបាល ឬព្យាបាលមិនបានត្រឹមត្រូវនោះទេ អ្នកជំងឺអាចនឹងចៀសមិនផុតពីការកកើតនៃជំងឺរលាកសន្លាក់ឆ្អឹងទេ ដោយហេតុថាជាធម្មជាតិមនុស្សគ្រប់រូបគឺមានឱកាសប្រឈម នឹងជំងឺនេះស្រាប់ទៅហើយបូកផ្សំជាមួយកត្តាជម្រុញខាងលើ និង តែងាយឲ្យកកើតជាជំងឺរលាកសន្លាក់ឆ្អឹងនេះឡើង។ សម្រាប់អ្នកជំងឺដែលមានភាពមិនប្រក្រតីនៃសន្លាក់ឆ្អឹងពីកំណើតត្រូវឆាប់ទៅពិនិត្យ ក៏ដូចជាព្យាបាលជាមួយអ្នកជំនាញពីវ័យក្មេងតែម្តងដោយមិនត្រូវរង់ចាំដល់ពេលពេញវ័យ ឬដល់ពេលលេចចេញជារោគសញ្ញាច្បាស់នោះទេ ព្រោះក្នុងដំណាក់កាលនេះ គឺការព្យាបាលមិនសូវទទួលបានលទ្ធផល និងអាចបណ្តាលឲ្យមានផលអវិជ្ជមានដល់ការរស់នៅរបស់អ្នកជំងឺទៅថ្ងៃក្រោយ។ ទន្ទឹមនឹងនេះ ក៏មានការព្យាបាលដោយការប្រើប្រាស់ថ្នាំមួយចំនួនផងដែរដូចជា ថ្នាំបំបាត់ការឈឺចាប់បំបាត់ការរលាក និងថ្នាំជំនួយដល់ការលូតលាស់កោសិកាសន្លាក់ឆ្អឹង និងឆ្អឹងខ្ចីដើម្បីឲ្យវាបំពេញតួនាទីបានល្អឡើងវិញ។ ករណីដែលអ្នកជំងឺមានឆ្អឹងស្ពោត ឬពុកតម្រូវឲ្យមានការព្យាបាលឆ្អឹងបន្ថែមទៀត ដើម្បីជម្រុញប្រសិទ្ធភាពនៃការព្យាបាលជំងឺរលាកសន្លាក់ឆ្អឹងនេះ។ ជម្រើសចុងក្រោយ គឺធ្វើការវះកាត់ប្តូរសន្លាក់ឆ្អឹង ក្នុងករណីដែលការព្យាបាលដោយប្រើប្រាស់ថ្នាំមិនទទួលបានជោគជ័យ។ យល់ដឹងបន្ថែមពី ភាពរំខាននៃជំងឺសន្លាក់ឆ្អឹង © 2017 រក្សាសិទ្ធិគ្រប់យ៉ាងដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Other Diseases Bones & Articulations
Share
  • Jun 14, 2017 |
  • 7 years ago |
  • 10.8K views

មជ្ឈមណ្ឌលជាតិផ្នែកមហារីកដំបូងគេបង្អស់នៅកម្ពុជាជិតមានវត្តមានហើយ…

ក្តីសុបិន្តនៃការបង្កើតមជ្ឈមណ្ឌលថែទាំជំងឺមហារីកដំបូងគេបង្អស់នៅកម្ពុជារបស់លោកវេជ្ជបណ្ឌិត អ៊ាវ សុខា ប្រធានផ្នែកជំងឺមហារីក និងជំងឺឈាម (Onco-Hematology) នៃមន្ទីរពេទ្យកាល់ម៉ែត ជិតលេចចេញជារូបរាងពិតហើយ ដោយហេតុថា មជ្ឈមណ្ឌលជាតិផ្នែកជំងឺមហារីក (National Cancer Center) នេះ ត្រូវបានគ្រោងនឹងរៀបចំសម្ពោធនៅចុងឆ្នាំនេះ។  គួរបញ្ជាក់ផងដែរថា គ្រឿងបរិក្ខារផ្សេងៗត្រូវបាន និងកំពុងរៀបចំតំឡើង ស្របពេលដែលម៉ាស៊ីនព្យាបាលដោយកាំរស្មី ឬតាមបែបវិទ្យុសាស្រ្ត (Radiotherapy Machine) ដែលនឹងជាម៉ាស៊ីនទីពីរដែលមានវត្តមាននៅប្រទេសយើង កំពុងត្រូវបាននាំយកមកពីសហរដ្ឋអាមេរិច។ យ៉ាងណាមិញ បុគ្គលិកពាក់ព័ន្ធដែលនឹងត្រូវមានមុខងារយ៉ាងសំខាន់ក្នុងមជ្ឈមណ្ឌលថ្មីនេះ ក៏កំពុងតែមមាញឹកផងដែរក្នុងការត្រៀមខ្លួនបំពេញតួនាទីរបស់ខ្លួន។ សម្រាប់ប្រទេសកម្ពុជាយើង ដែលជាប្រទេសមួយកំពុងអភិវឌ្ឍ មហារីក ជាជំងឺមួយដែលជាមូលហេតុចម្បងមួយនៃមរណភាពនៅក្នុងប្រទេស ដោយឃើញមានប្រមាណ១៥,០០០ករណីនៃជំងឺមហារីកក្នុងមួយឆ្នាំ ក្នុងចំណោមប្រជាជាន១៥លាននាក់។ ៩០% នៃអ្នកជំងឺត្រូវការការព្យាបាលដោយកាំរស្មី ប៉ុន្តែម៉ាស៊ីនតែមួយដែលមាននៅមន្ទីរពេទ្យមិត្តភាពខ្មែរ-សូវៀត មានលទ្ធភាពព្យាបាលអ្នកជំងឺបានតែ៥០០នាក់ប៉ុណ្ណោះ។ ក្នុងនោះ ក៏មានអ្នកជំងឺប្រមាណតែ១,៥០០នាក់ ដែលមានលទ្ធភាពទទួលសេវាព្យាបាលនៅប្រទេសជិតខាង។ យោងតាមគម្រោងរបស់លោកវេជ្ជបណ្ឌិត អ៊ាវ សុខា គឺមជ្ឈមណ្ឌលនឹងចាប់ផ្តើមដំណើរការជាមួយនឹងម៉ាស៊ីនព្យាបាលដោយកាំរស្មីមួយសិន ដោយគ្រោងនឹងបន្ថែម២ទៀតនៅឆ្នាំបន្ទាប់។ ដល់ឆ្នាំ២០២៥ មជ្ឈមណ្ឌលថ្នាក់តំបន់ផ្នែកជំងឺមហារីកចំនួនពីរ (១នៅភាគខាងជើង និង១ទៀតនៅភាគខាងលិចនៃប្រទេស) នឹងបើកដំណើការដោយមានម៉ាស៊ីនព្យាបាលរៀងខ្លួន និង ដោយគ្រឿងបរិក្ខារវេជ្ជសាស្រ្តដែលប្រើសារធាតុវិទ្យុសកម្មដើម្បីធ្វើរោគវិនិច្ឆ័យ និងព្យាបាលជំងឺ (nuclear medicine facilities) ដែលអាចនឹងជួយដល់៧០%នៃប្រជាជនសរុប។ លោកវេជ្ជបណ្ឌិតក៏បានបន្ថែមថា «ទោះបីជាមិនទាន់អាចគ្របដណ្តប់បានទាំងស្រុង តែយ៉ាងហោចណាស់ក៏មានលក្ខណៈល្អប្រសើរច្រើនជាងអ្វីដែលយើងមានរាល់ថ្ងៃនេះ»។ ការធ្វើរោគវិនិច្ឆ័យជំងឺមហារីក គម្រោងក៏មានផងដែរនូវការតំឡើងម៉ាស៊ីនPET-CT និង cyclotron ជាម៉ាស៊ីនដែលប្រើអាតូមនៃវិទ្យុសកម្មដើម្បីផ្ដិតយករូបភាពវេជ្ជសាស្ត្រ ឬស្រាវជ្រាវសភាពជំងឺ សម្រាប់ការផលិតកម្មនៃradiopharmaceutical។ ធនធានមនុស្សជាធនធានដ៏សំខាន់ផងដែរសម្រាប់គម្រោងការដ៏ធំមួយនេះ ដោយពាក់កណ្តាលនៃបុគ្គលិកគោលទាំងអស់បានឆ្លងកាត់វគ្គហាត់ការ និងហ្វឹកហាត់នៅក្នុងមន្ទីរពេទ្យផ្សេងៗក្នុងតំបន់ និងនៅអឺរ៉ុប ជាមួយនឹងInternational Atomic Energy Agency (IAEA) ដោយបានទទួលទាំងការហ្វឹកហាត់បច្ចេកទេស និងយុទ្ធសាស្រ្តក្នុងការធ្វើការងារជាមួយនឹងអ្នកជំងឺ។ គួរបញ្ជាក់ផងដែរថា នៅពីក្រោយគម្រោងនេះ រាជរដ្ឋាភិបាលកម្ពុជាបានចំណាយទឹកប្រាក់ជាង៣៦លានដុល្លា ក្នុងរយៈពេល៣ឆ្នាំកន្លងមកនេះ រីឯជំនួយក្នុងការសហការសរុបពីIAEAវិញ គឺប្រមាណ១.២លានអ៊ឺរ៉ូ។ ការបង្ការជំងឺមហារីក អគ្គនាយកមន្ទីរពេទ្យកាល់ម៉ែត ឯកឧត្តម ឈាង រ៉ា មានប្រសាសន៍ថា «ប្រសិនបើមានរឿងមួយដែលខ្ញុំអាចធ្វើបាន ដើម្បីផ្លាស់ប្តូរទាក់ទិននឹងជំងឺមហារីកនោះ គឺការធ្វើរោគវិនិច្ឆ័យ» ព្រោះថាជាង៧០%នៃអ្នកជំងឺមហារីកដេលមកដល់មន្ទីរពេទ្យ គឺស្ថិតនៅដំណាក់កាលចុងក្រោយ ដែលមានសង្ឃឹមតិចក្នុងការព្យាបាលទៅហើយ ហើយវត្តមាននៃមជ្ឈមណ្ឌលប្រាកដជាអាចសម្រួលដល់បញ្ហានេះបាន។ ជាមួយនឹងកិច្ចសហការអន្តរជាតិ ក្នុងនោះមានជាមួយនឹងIAEA លោកវេជ្ជបណ្ឌិត អ៊ាវ សុខា សង្ឃឹមថាលោកនឹងអាចតបស្នងទៅលើអ្វីដែលបានទទួលកន្លងមក តាមរយៈការគាំទ្រនូវការហ្វឹកហាត់ផ្សេងៗសម្រាប់ប្រទេសដទៃ។ នេះជាការផ្លាស់ប្តូរដ៏ធំមួយសម្រាប់វិស័យសុខាភិបាល ផ្នែកជំងឺមហារីកនៅក្នុងប្រទេសកម្ពុជាយើង…ហើយប្រាកដណាស់ ជាដំណឹងល្អសម្រាប់ប្រជាជាតិយើង!!!  ប្រភព ៖ IAEA  © 2017 រក្សាសិទ្ធិគ្រប់យ៉ាងដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​  

News & Events
Share
  • Jun 14, 2017 |
  • 7 years ago |
  • 4.3K views

គ្រាន់តែធ្វើចលនាម្រាមដៃទាំងនេះ....លទ្ធផលមិនគួរឲ្យជឿ

ធ្លាប់ដឹងដែរឬទេថា ដៃរបស់អ្នកមានទំនាក់ទំនងបែបណាខ្លះទៅនឹងថាមពលផ្លូវកាយ និងផ្លូវចិត្តរបស់អ្នក?  ការធ្វើចលនាតែបន្តិចបន្តួចនៅលើដៃរបស់អ្នក គឺពិតជាមានឥទ្ធិពលលើការសម្រាលដល់បញ្ហាខ្លះដែលអ្នកអាចនឹងមិនធ្លាប់នឹកគិតដល់ នេះបើយោងតាមការសិក្សាស្រាវជ្រាវរបស់អ្នកជំនាញផ្នែករេផ្លិច (Reflexologist)… មេដៃ មេដៃ ពាក់ព័ន្ធនឹងអាការៈថប់អារម្មណ៍ និងឈឺក្បាល។ប្រសិនបើអ្នកកំពុងមានការឈឺក្បាល ចូរអ្នកសាកល្បងក្ដាប់មេដៃរបស់អ្នកថ្នមៗរយៈពេល៥នាទី។ អ្នកជំនាញផ្នែករេផ្លិចបាននិយាយថា វានឹងជួយបំបាត់នូវការឈឺចាប់។ ចង្អុលដៃ ម្រាមនេះគ្រប់គ្រងការឈឺចាប់សាច់ដុំ ក៏ដូចជាអារម្មណ៍អស់សង្ឃឹម ភ័យខ្លាច និងភាពអាម៉ាស់។ តាមរយៈការសិក្សានៅឯ University of Minnesota បានបង្ហាញថា អ្នកជំងឺដែលមានបញ្ហាឈឺខ្នង និងឈឺសាច់ដុំបានធូរស្បើយក្រោយពេលទទួលបានការព្យាបាលតាមរយៈរេផ្លិច។ ក្ដាប់ម្រាមចង្អុលរបស់អ្នកដោយដៃម្ខាងទៀតរបស់អ្នករយៈពេល៥នាទី។ ម្រាមកណ្ដាល ការប្រើដៃម្ខាងទៅក្ដាប់ម្រាមកណ្ដាលនៃដៃម្ខាងទៀតអាចជួយឲ្យអ្នកបានធូរស្រាលជាងមុន ប្រសិនបើអ្នកមានអារម្មណ៍រំខានធុញថប់ ខឹង ឬក៏នឿយហត់ជាងធម្មតា។ ការសិក្សាបានបង្ហាញថា ការធ្វើបែបនេះអាចបន្ថយសម្ពាធឈាម និងធ្វើឲ្យអ្នកមានអារម្មណ៍ស្ងប់ជាងមុន។ ម្រាមដៃនាង អារម្មណ៍បែបអវិជ្ជមាន និងការកើតទុក្ខនឹងរលាយបាត់ទៅវិញ ប្រសិនបើអ្នកក្ដាប់ម្រាមដៃនាងរបស់អ្នកថ្នមៗរយៈពេល៥នាទី។ កុំភ្លេចធ្វើចិត្តឲ្យស្ងប់ និងផ្ដោតអារម្មណ៍ទៅនឹងការដកដង្ហើមរបស់អ្នក។ ម្រាមកូនដៃ កូនដៃ មានទំនាក់ទំនងទៅនឹងការគោរព និងផ្ដល់ភាពជឿជាក់ដល់ខ្លួនឯង អារម្មណ៍តានតឹង និងភាពភ័យខ្លាច។ ប្រសិនបើអ្នកងាយនឹងបន្ថយតម្លៃខ្លួនឯង អ្នកគួរតែគិតអំពីការម៉ាស្សាដោយក្ដាប់កាន់កូនដៃរបស់អ្នករយៈពេល៥នាទី ហើយអ្នកគួរព្យាយាមគិតពីអ្វីដែលល្អៗ ពេលដែលធ្វើសកម្មភាពបែបនេះ។ បាតដៃ ប្រើម្រាមដៃរបស់អ្នកសង្កត់ឲ្យចំចំណុចកណ្ដាលនៃបាតដៃម្ខាងទៀត ហើយម៉ាស្សាវាក្នុងចលនាជារាងរង្វង់ និងដកដង្ហើមចេញចូលឲ្យបានវែងៗចំនួន៣ដង។ អ្នកជំនាញផ្នែករេផ្លិចបានប្រាប់ថា ការម៉ាស្សាបែបនេះឲ្យបានទៀងទាត់អាចជួយបង្ការការចង្អោរ ភាពតានតឹងផ្លូវចិត្ត រាគ និងការទល់លាមកជាដើម។ ការផ្គុំដៃទាំងពីរចូលគ្នា ការដាក់ដៃបែបនេះច្រើនត្រូវបានប្រើជាញឹកញាប់ក្នុងការតាំងសមាធិ។ វាជួយឲ្យអ្នកផ្ដោតអារម្មណ៍បានល្អ និងធ្វើឲ្យគំនិតរបស់អ្នកគ្មានភាពច្របូកច្របល់។ ការផ្គុំដៃទាំងសងខាងរបស់អ្នកចូលគ្នាអាចបង្កើនចលនាឈាមឲ្យបានល្អ។ លាតបាតដៃ ហើយយកម្រាមដៃនាងផ្គួបនឹងមេដៃ (Surya Mudra) ការធ្វើដៃបែបនេះនឹងជួយការរំលាយអាហារ និងប្រតិកម្មមេតាបូលីសក្នុងរាងកាយអ្នកកាន់តែប្រសើរឡើង។ តិចនិកនេះ គឺត្រូវបានប្រើសម្រាប់អ្នកដែលមានសីតុណ្ហភាពទាបក្នុងឈាម និងអ្នកដែលបាត់បង់ចំណង់អាហារ។ រឿងបែបៗនេះ បើមិនសាក គឺមិនដឹងពីប្រសិទ្ធភាពនោះឡើយ…ដើម្បីដឹងថាអ្វីដែលបានលើកឡើងខាងលើនេះ ពិតជាមានភាពអស្ចារ្យប៉ុណ្ណានោះ សូមសាកល្បងទាំងអស់គ្នា… ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។​​​

Health Tips
Share
  • Jun 14, 2017 |
  • 7 years ago |
  • 3.2K views

ចំណុច៤យ៉ាងដែលអាចបំផ្លាញសុខភាពទ្វារមាស

សម័យបច្ចុប្បន្នស្រ្តីភាគច្រើនតែងតែរកវិធីសាស្រ្តថ្មីៗ ប្លែកៗដើម្បីទទួលបានចំណាប់អារម្មណ៍ពីអ្នកដទៃ។ អ្វីដែលគួរឲ្យកត់ចំណាំ និងព្រួយបារម្ភនោះ គឺបញ្ហាដែលជះឥទ្ធិពលមកពីការចង់បានភាពស្រស់ស្អាតទាំងនោះ។ អត្ថបទមួយនេះនឹងបង្ហាញស្រ្តីគ្រប់រូបពីចំណុចសំខាន់ បួនផ្សេងៗដែលបង្កការរំខានដល់សុខភាពមនុស្សស្រីជាពិសេសទ្វារមាស។   ១. ខោទ្រនាប់ ស្រ្តីទូទៅវ័យក្មេងជាច្រើន និយមចូលចិត្តស្លៀកខោទ្រនាប់ស៊ិចស៊ីដែលផលិតឡើងពីសារធាតុសំយោគខ្សែតូចងាយមានសំណើមជាហេតុនាំឲ្យមេរោគឆ្លងបានរហ័សទៅលើទ្វារមាស។ ដូច្នេះ អ្នកជំនាញសំណូមពរឲ្យមិត្តស្រ្តីទាំងអស់គួរជ្រើសរើសខោទ្រនាប់ផលិតឡើងពីកប្បាសដោយវាមានលក្ខណៈទន់សមស្របនឹងរូបរាងងាយស្រួលបត់បែន លើសពីនេះវាក៏មានលក្ខណៈស៊ិចស៊ីមានភាពទាន់សម័យផងដែរ។   ២. ជម្រុះសក់ជុំវិញទ្វារមាស មនុស្សស្រីមួយចំនួនតែងយល់ខុសហើយធ្វើការជម្រុះសក់ជុំវិញទ្វារមាសដើម្បីទទួលបានភាពស៊ិចស៊ីតែនេះគឺជាការយល់ខុសទាំងស្រុង។ យោងទៅតាមអ្នកឯកទេសខាងរោគស្រ្តី ការជម្រុះសក់ជុំវិញទា្វរមាសបង្កភាពងាយស្រួលក្នុងការចម្លងរោគផ្សេងៗក្នុងនោះក៏អាចឆ្លងតាមរយៈការរួមភេទផងដែរដូចជា ជំងឺស្វាយ ប្រមេះ ជាដើម។   ៣. ប្រើប្រាស់ទឹកបាញ់សម្រាប់លាងទា្វរមាស ជាការពិតនៅជុំវិញទ្វារមាសមានបាក់តេរីល្អៗមួយចំនួនដែលអាចការពារស្រ្តីពីការឆ្លងមេរោគផ្សេងៗបង្កឡើងពីបរិស្ថានខាងក្រៅជាដើម។ ប្រសិនបើអ្នកប្រើប្រាស់ទឹកបាញ់លាងទ្វារមាសនោះវាអាចធ្វើឲ្យបាត់បង់នូវបាក់តេរីល្អៗទាំងនោះហើយគ្មានអ្វីការពារពីមេរោគខាងក្រៅទៀតទេ។ បញ្ហាធ្ងន់ធ្ងរអាចធ្វើឲ្យស្រ្តីមិនអាចបង្កកំណើតបានទៀតផង។ ដូច្នេះស្រ្តីគួរចៀសវាងវិធីសាស្រ្តសំអាតដោយប្រើទឹកបាញ់លាងនេះទៀតទៅ គួរតែជ្រើសរើសវិធីសាស្រ្តរក្សាអនាម័យផ្សេងវិញ។   ៤. ការបរិភោគអាហារដែលមានក្លិនឆួលខ្លាំង និងសារធាតុផ្អែម ធម្មតា បើទ្វារមាសរងការឆ្លងមេរោគផ្សេងៗនោះនឹងបង្កឲ្យមានក្លិនមិនល្អកើតឡើង។ មិនតែប៉ុណ្ណោះអាហារដែលយើងបរិភោគមានក្លិនឆួលខ្លាំងដូចជាខ្ទឹមស ទំពាំងបារាំង ឬគ្រឿងការីសុទ្ធតែធ្វើឲ្យមានក្លិនមិនល្អ មិនត្រឹមតែក្នុងមាត់ទេតែក៏អាចធ្វើឲ្យមានក្លិនមិនល្អដល់ទ្វារមាសផងដែរបើយោងតាមសេចក្តីសន្និដ្ឋានពីការស្រាវជ្រាវរបស់អត្ថបទស្រាវជ្រាវមួយចំនួន។ ដូចគ្នានេះដែរ ការទទួលទានជាតិផ្អែមច្រើនក៏ជាផ្នែកមួយប៉ះពាល់ដល់សុខភាពស្រ្តី និងទ្វារមាស។ ជាតិផ្អែមទាំងនោះជាហេតុនាំឲ្យពពួកផ្សិតមេរោគដុះលូតលាស់លឿន និងងាយរីកធំធាត់។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Health Tips Women's Health
Share
  • Jun 14, 2017 |
  • 7 years ago |
  • 9.5K views

ការប្រើប្រាស់ថ្នាំបំបាត់រាកលើសកម្រិតបណ្តាលឲ្យមានជំងឺបេះដូងធ្ងន់ធ្ងរ

Loperamide ត្រូវបានប្រើប្រាស់ជាថ្នាំបំបាត់អាការៈរាកដោយមិនត្រូវការវេជ្ជបញ្ជា ប៉ុន្តែឱសថការីប្រហែលជាមិនបានចាប់អារម្មណ៍ទៅលើឥទ្ធិពលជម្រុញសកម្មភារបស់វាលើរេសិបទ័រmu របស់សារធាតុអាភៀន។   ឥទ្ធិពលរបស់សារធាតុអាភៀនទៅលើប្រព័ន្ធប្រសាទកណ្តាលមិនត្រូវបានគេរកឃើញទាក់ទងនឹង Loperamide ទេនៅពេលដែលវាត្រូវបានគេប្រើប្រាស់ក្នុងកម្រិតតាមការណែនាំ ដោយសារតែការជ្រៀបចូលរបស់វាទៅក្នុងប្រព័ន្ធប្រសាទកណ្តាលមានកម្រិតទាប។ ប៉ុន្តែ ឥទ្ធិពលរបស់សារធាតុអាភៀនទៅលើប្រព័ន្ធប្រសាទកណ្តាល ពិតជាមាននៅពេលដែលអ្នកជំងឺប្រើប្រាស់ថ្នាំនេះហួសកម្រិត។   ការប្រើប្រាស់ Loperamide ដើម្បីបំបាត់រាកដោយខ្លួនឯង មានការកើនឡើង ហើយបច្ចុប្បន្នបញ្ហាចង្វាក់បេះដូងថតក្រោមមិនប្រក្រតី និងការពន្យឺតនៃចង្វាក់ QRS (Prolongation of the QRS duration) និងចន្លោះQTc ត្រូវបានរាយការណ៍ថាកើតឡើងក្រោយអ្នកជំងឺញៀននឹងថ្នាំ Loperamide ដែលប្រើលេបតាមមាត់។   Loperamideត្រូវបានគេរកឃើញថាក្នុងការសិក្សាលើកោសិកា ឬសរីរាង្គក្នុងមន្ទីរពិសោធន៍ វាមានឥទ្ធិពលបិទផ្លូវចេញចូលរបស់សូដ្យូមនៅត្រង់បេះដូង និងពន្យឺតចង្វាក់ QRS នៅពេលប្រើថ្នាំនេះលើសកម្រិត ហើយឥទ្ធិពលនេះក៏ត្រូវបានរកឃើញផងដែរក្នុងការសិក្សាលើសារពាង្គកាយរស់។ Loperamideក៏បង្អាក់នូវការហូរត្រឡប់ចូលកោសិកាវិញរបស់ប៉ូតាស្យូមផងដែរក្នុងការសិក្សាលើកោសិកាឬសរីរាង្គក្នុងមន្ទីរពិសោធន៍។   ឥទ្ធិពលទាំងនេះ សុទ្ធតែអាចបណ្តាលឲ្យប៉ះពាល់ដល់បេះដូងប្រសិនបើប្រើប្រាស់ថ្នាំក្នុងកម្រិតខ្ពស់។តម្លៃទាប ងាយស្រួលរកទិញ និងការអនុញ្ញាតឲ្យប្រើប្រាស់របស់ Loperamide បានធ្វើឲ្យអ្នកជំងឺញៀននឹងឥទ្ធិពលអាភៀនរបស់វា។   CPR និង ACLS ត្រូវបានគេគិតថាជាការព្យាបាលជម្រើសទីមួយចំពោះបញ្ហាគាំងបេះដូងដែលបណ្តាលមកពីការប្រើលើសកម្រិតនៃ Loperamide។ ទិន្នន័យនៃការសិក្សាលើសត្វ និងមនុស្សបានបង្ហាញថា Naloxone អាចនឹងប្រើប្រាស់ចំពោះអ្នកជំងឺដែលមានបញ្ហាថប់ដង្ហើម ឬបាត់ដង្ហើមបន្ទាប់ពីញៀនLoperamide។   ការលោតខុសចង្វាក់នៃបេះដូងថតក្រោម ដូច ជាមួយនឹងការលោតញាប់នៃបេះដូងថតក្រោមក្នុងទម្រង់ខុសៗគ្នា ត្រូវបានព្យាបាលដោយជោគជ័យជាមួយនឹងម៉ាញេស្យូមស៊ូលផាត និងសូដ្យូមកាបូណាត ប្រើចាក់តាមសរសៃវ៉ន។ ការចាក់ isoproterenol តាមសរសៃវ៉ែន និងការឆក់ភ្ញោចឲ្យបេះដូងមានចលនា (Transcutaneous pacing) ត្រូវបានប្រើប្រាស់ដោះស្រាយបញ្ហាចង្វាក់QTc យឺតនៅពេលប្រើថ្នាំលើសកម្រិត។   វាជារឿងចាំបាច់ដែលឱសថការីនៅតាមមន្ទីរពេទ្យត្រូវដឹងពីបញ្ហាទាំងនេះ និងត្រូវសាកសួរអ្នកជំងឺពីការញៀន Loperamide នៅពេលដែលពួកគាត់សន្លប់ដោយគ្មានមូលហេតុ ឬចង្វាក់ the QRS ឬ QTc យឺតជាងធម្មតា។ ចំណែកឱសថការីនៅសហគមន៍វិញ ត្រូវមានការប្រុងប្រយ័ត្នទៅលើការទិញ Loperamide ក្នុងចំនួនច្រើនហួស។ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

Medicine
Share
Top