Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Jan 25, 2017 |
  • 7 years ago |
  • 4.3K views

ខ្លះៗនៃស្លាកយីហោពីcellcard

ការបង្កើត ឬប្រកបរបរអ្វីមួយដែលមានស្លាកយីហោផ្ទាល់ខ្លួន ប្រាកដណាស់ជាភាពល្អប្រសើរមួយសម្រាប់ទាក់ទាញអតិថិជន យ៉ាងណាមិញ ការរុករកវិធីសាស្រ្តដើម្បីផ្សព្វផ្សាយផលិតផលទាំងនោះ ជាកត្តាមួយ ដ៏សំខាន់ និងគួរតែយកចិត្តទុកដាក់ដោយធ្វើយ៉ាងណាឲ្យផលិតផលរបស់អ្នកអាចបន្តដំណើរតទៅមុខបាន។        តាមរយៈប្រសាសន៍របស់Christine Arce-Cabrera ដែលជាប្រធានផ្នែកទំនាក់ទំនងខាងម៉ាកផលិតផលនៅក្រុមហ៊ុនCellcard «ការសាងកេរ្តិ៍ឈ្មោះ ឬស្លាកយីហោរបស់ក្រុមហ៊ុនរួមចំណែកយ៉ាងខ្លាំងក្នុងការបង្កើតនូវលក្ខណៈពិសេសរបស់ខ្លួនតាមរយៈការភ្ជាប់ទំនាក់ទំនង និងយកឈ្នះលើទឹកចិត្តអតិថិជន»។ គួរបញ្ជាក់ផងដែរថា Christineបានបញ្ចប់ការសិក្សាថ្នាក់បរិញ្ញាប័ត្រផ្នែក Integrated Marketing Communications (IMC) និងថ្នាក់អនុបណ្ឌិតផ្នែក Advertising ពី University of Asia and the Pacific (UA&P Philippines)។ ហេលស៍ថាម៖ និយាយពីការធ្វើឲ្យអតិថិជនស្គាល់ស្លាកយីហោមួយ តើមានអ្វីខ្លះជាចាំបាច់? ដំបូង ត្រូវធ្វើឲ្យអតិថិជនគោលដៅស្គាល់ច្បាស់ពីយើង ហើយបន្សល់នូវការចងចាំជាអារម្មណ៍ដិតដាមនៅក្នុងចិត្តរបស់ពួកគេ តាមរយៈវិធីសាស្រ្តផ្សេងៗទៅតាមផលិតផល ឬសេវាកម្មរបស់ក្រុមហ៊ុននីមួយៗ។ ហេលស៍ថាម៖ តើស្លាកយីហោមានសារសំខាន់យ៉ាងណាខ្លះចំពោះក្រុមហ៊ុន? ក្នុងពិភពដែលផលិតផលជាច្រើនកំពុងតែប្រជែងគ្នា ដើម្បីដណ្តើមចំណាប់អារម្មណ៍របស់អតិថិជន ស្លាកយីហោជាអ្វីដែលបង្កើតឲ្យមានភាពខុសគ្នារវាងក្រុមហ៊ុននីមួយៗ។ វាបញ្ជាក់ពីគុណភាព ទំនុកចិត្ត កេរ្តិ៍ឈ្មោះ ព្រមទាំងបណ្តុះនូវទឹកចិត្តស្រឡាញ់ និងពេញចិត្ត ដែលជាឱកាសមួយអាចឲ្យអ្នកឈរជើងនៅលេខរៀងមុខគេសម្រាប់អតិថិជន។ តួយ៉ាង កាហ្វេមួយកែវដែលមានស្លាកសញ្ញាច្បាស់លាស់ ប្រាកដណាស់វានឹងទទួល បានការជាវមុនគេ ក៏ដោយសារតែកម្លាំង និងថាមពលនៃស្លាកយីហោ ដែលមានឥទ្ធិពលដល់ផ្នត់គំនិតអ្នកប្រើប្រាស់ និងអាចបញ្ជាក់ពីកម្រិតសង្គមដែលខ្លួនកំពុងរស់នៅ។ ហេលស៍ថាម៖ តើគុណតម្លៃអ្វីដែលស្លាកយីហោគួរផ្តល់ជូនអ្នកប្រើប្រាស់ ដើម្បីក្លាយខ្លួនជាជម្រើសដំបូងរបស់ពួកគេ? វាពឹងផ្អែកថាតើអ្វីជាគោលដៅនៃទីផ្សារ និងការចង់បានរបស់អ្នកជាវ។ គ្រប់ច្បាប់ ឬវិធីសាស្រ្តមួយមិនប្រាកដថាអាចប្រើប្រាស់បានជោគជ័យគ្រប់បុគ្គលទាំងអស់នោះទេ។ សំខាន់ គឺត្រូវមានការសិក្សាឲ្យបានច្បាស់លាស់ពីអតិថិជនគោលដៅ ពីព្រោះពួកគេជាគុណតម្លៃ និងជារង្វាស់មួយដែលអាចកំណត់បានថាតើផលិតផលរបស់យើងឈានដល់ដំណាក់កាលដែលអាចបន្តទៅមុខបាន ឬក៏បោះបង់ចោល។  អ្វីដែលសំខាន់ គឺ ត្រូវមានការប្រកាន់ខ្ជាប់ និងស្វែងយល់ពីតម្រូវការខុសៗគ្នារបស់អ្នកប្រើប្រាស់ ដោយហេតុថាអតិថិជនតែងតែចង់ទទួលបានអ្វីដែលខុសៗគ្នា ដើម្បីស្របទៅតាមចំណង់ចំណូលចិត្តរបស់ពួកគេ បុគ្គលខ្លះចង់បាននូវអ្វីដែលធ្វើឲ្យខ្លួនលេចធ្លោ និងទាក់ទាញ ស្របពេលដែលអ្នកមួយចំនួនទៀតគិតគូរខ្លាំងទៅលើគុណភាពនៃផលិតផលទាំងនោះជាចម្បង។ ហេលស៍ថាម៖ តើធ្វើដូចម្តេចទើបអាចកសាងនូវឈ្មោះផលិតផលបានប្រកបដោយភាពជោគជ័យ? សារដើម្បីផ្សព្វផ្សាយផលិតផលអាចធ្វើទៅបាន តាមរយៈប្រព័ន្ធផ្សព្វផ្សាយនានា ប៉ុន្តែត្រូវធានាថាសារទាំងនោះបង្កប់នូវអ្វីដែលជាភាពទាក់ទាញដល់អតិថិជន និងត្រូវគោលដៅដែលអ្នកចង់បង្ហាញទៅតាមពេលវេលា និងទីកន្លែងដែលស័ក្តិសម។ ប្រព័ន្ធផ្សព្វផ្សាយពាណិជ្ជកម្មតាមរយៈទូរទស្សន៍ វិទ្យុ ស្លាកសញ្ញាតាមទីសាធារណៈ បណ្តាញសង្គមដូចជា ហ្វេសប៊ុក ការផ្សព្វផ្សាយតាមការប្រគុំតន្រ្តី ឬកម្មវិធីផ្សេងៗជាដើមសុទ្ធតែជាអ្វីដែលអ្នកពុំគួរមើលរំលង។  យ៉ាងណាមិញ ដោយហេតុថាបណ្តាញផ្សព្វផ្សាយទាំងនោះកំពុងតែមានការប្រកួតប្រជែងគ្នាយ៉ាងខ្លាំង ដូច្នេះ ត្រូវមានការសម្រេចចិត្តដ៏ឆ្លាតវៃមួយ ដើម្បីធ្វើយ៉ាង-ណាចៀសវាងនូវការជះភាពរំខានដល់អារម្មណ៍ និងទឹកចិត្តរបស់អតិថិជន។ ហេលស៍ថាម៖ តើធ្វើបែបណាខ្លះ ទើបអាចរក្សាកេរ្តិ៍ឈ្មោះស្លាកយីហោឲ្យបានស្ថិតស្ថេរ? ធ្វើយ៉ាងណារក្សាឲ្យបាននូវវត្តមាន និងភាពទាក់ទាញរបស់ផលិតផលទាំងនោះទៅដល់មហាជនទូទៅទាំងអស់ ពីព្រោះថាបើគ្មានភាពទាក់ទាញ ក៏មិនមានឱកាសទទួលបានការស្រឡាញ់ និងពេញចិត្តពីសំណាក់អតិថិជនផងដែរ។ ដូច្នេះហើយ ត្រូវកែប្រែ និងរក្សានូវអ្វីដែលជាការចង់បាន ភាពពេញចិត្ត និងតម្រូវការរបស់អតិថិជនទាំងអស់ទៅតាមសម័យកាល។ ហេលស៍ថាម៖ ជាចុងក្រោយនេះ តើChristineមានពាក្យពេចន៍អ្វីខ្លះចែកជូនដល់មិត្តអ្នកអាន? ការងារផ្នែកនេះប្រហែលជាត្រូវបានគេគិតថា មានភាពឡូយឆាយ និងភាពច្នៃប្រឌិតច្រើន តែស្របពេលជាមួយគ្នា វាក៏មិនខុសពីការងារដទៃទេ គឺទាមទារនូវការអត់ធ្មត់ និងលះបង់ច្រើន។ តួយ៉ាង នាងខ្ញុំមានភាពមមាញឹកច្រើន ទាំងពេលថ្ងៃ និងពេលយប់ ហើយពេលខ្លះត្រូវប្រឈមមុខនឹងកំហឹងរបស់អតិថិជន ប៉ុន្តែទោះបីជាយ៉ាងណា នាងខ្ញុំមិនដែលស្តាយក្រោយ ឬគិតថាចង់បោះបង់ចោលមួយវិនាទីណាមួយឡើយ។

Career & Education
Share
  • Jan 24, 2017 |
  • 7 years ago |
  • 3.8K views

អាថ៌កំបាំងនៃពេលសាកល្បងសមត្ថភាព(Probation) ពី CamHR

  បន្ទាប់ពីឆ្លងកាត់នូវការធ្វើបទសម្ភាសន៍ដោយជោគជ័យមក បេក្ខភាពនឹងឈានដល់ដំណាក់កាលនៃការសាកល្បងសមត្ថភាព (Probation) ដែលជាដំណាក់កាល មួយដែលក្រុមហ៊ុននឹងធ្វើការពិចារណា និងវាយតម្លៃសមត្ថភាពការងាររបស់បេក្ខភាព បន្ថែមពីលើអ្វីដែលគេបានបង្ហាញនៅក្នុង CV និងរៀបរាប់ក្នុងពេលសម្ភាសន៍។  ចង់ដឹងទេថា «តើគួរធ្វើបែបណាខ្លះ ដើម្បីធានាបាននូវការពេញចិត្តពីថ្នាក់លើ ហើយអាចក្លាយខ្លួនជាបុគ្គលិកពេញសិទ្ធិ?» ដើម្បីដោះស្រាយនូវចម្ងល់ទាំងនេះ ហេលស៍ថាម ក៏បានអញ្ជើញតំណាងកិត្តិយសពីក្រុមហ៊ុន ខេម អេច អ (CAMHR) គឺលោក វ៉ែន ប៊ុនលី ដែលជានាយកពាណិជ្ជកម្ម មានបទពិសោធន៍ ជាង ១០ឆ្នាំមកហើយក្នុងផ្នែកធនធានមនុស្ស។ រយៈពេលនៃការសាកល្បងការងារ សម្រាប់ក្រុមហ៊ុនយើងខ្ញុំក៏មិនខុសគ្នាជាមួយក្រុមហ៊ុនដទៃទៀតដែរ គឺជាទូទៅរយៈពេលសាកល្បងការងារ(Probation)មានរយៈពេល៣ខែ ដែលមានលក្ខណៈដូចនឹងក្រុមហ៊ុនអន្តរជាតិ និងក្រុមហ៊ុនក្នុងស្រុកជាច្រើនផងដែរ។ ចំពោះបុគ្គលិកដែលត្រូវបានផ្តល់ឱកាសឲ្យឆ្លងកាត់រយៈពេលសាកល្បងការងារ គឺមើលទៅលើ៥ចំណុចធំៗដែលបេក្ខភាពត្រូវមានជាចាំបាច់ដែលមានដូចជា៖  -ត្រូវមានភាពស្មោះត្រង់ជាមួយក្រុមហ៊ុន -ត្រូវមានលក្ខណៈសម្បត្តិដែលសមស្របជាមួយលក្ខខណ្ឌការងារ  និងបរិស្ថានការងារ -ត្រូវមានអាកប្បកិរិយាល្អគួបផ្សំនឹងបទពិសោធន៍ការងារខ្លះៗពីមុនមក -ឧស្សាហ៍ព្យាយាមក្នុងការងារដែលប្រធានបានប្រគល់ឲ្យធ្វើ និងអាចធ្វើការងារជាក្រុមបាន -មានចំណង់ចំណូលចិត្ត ឬចូលចិត្តការងារ ព្រមទាំងមានភាពអត់ធ្មត់នឹងការងារ ដែលជាតួនាទីដែលមេប្រគល់ជូន។ គួរបញ្ជាក់ផងដែរថា ចំណុចខាងលើនេះនឹងត្រូវបានបន្តធ្វើការវាយតម្លៃដោយប្រធានផ្នែកនីមួយៗរបស់គេ បន្ទាប់ពីបេក្ខភាពជាប់ចូលទៅក្នុងដំណាក់កាលសាកល្បងការងារ។ ទង្វើដែលគួរធ្វើ និងមិនគួរធ្វើ ជាការពិតណាស់ យើងឃើញបុគ្គលិកមួយចំនួនព្យាយាមបង្ហាញសមត្ថភាពរបស់គាត់លើសព្រំដែន នៅពេលចាប់ផ្ដើមការងារដំបូង ដើម្បីបង្ហាញឲ្យនិយោជកឃើញ ប៉ុន្តែទង្វើនេះធ្វើឲ្យគាត់ពិបាកធ្វើការងារជាក្រុមជាមួយបុគ្គលិកដែលចូលមុនៗ ដូច្នេះ បុគ្គលិកដែលជាប់ក្នុងរយៈពេលសាកល្បងការងារគួរយល់ដឹងពីចំណុចមួយចំនួនដូចខាងក្រោមនេះ  ៖ ទង្វើគួរប្រតិបត្តិ -គួរសម្របខ្លួនធ្វើការងារជាក្រុម -រៀនយល់ពីអត្តចរិតរបស់មិត្តរួមការងារ -ស្វែងយល់ពីច្បាប់ការងារ និងគោរពច្បាប់ការងារដែលក្រុមហ៊ុនចែង -ព្យាយាមបង្ហើយរាល់ការងារដែលប្រធានក្រុម និងក្រុមហ៊ុនដាក់ឲ្យធ្វើដោយមិនរអ៊ូរទាំឡើយ ទង្វើមិនគួរប្រតិបត្តិ -ធ្វើហួសសិទ្ធិដែលខ្លួនមាន ដោយព្យាយាមបង្ហាញនូវភាពអស្ចារ្យរបស់ខ្លួន -មានអំនួតជ្រុលលើខ្លួនឯង និងចាត់ទុកអ្នកដទៃអន់ជាងខ្លួន -រិះគន់ទៅលើច្បាប់ការងារ ឬបរិស្ថានការងាររបស់ក្រុមហ៊ុន ដោយមិននាំមកនៅការស្ថាបនា។ តើការប្រឹងប្រែងអួតជារឿងល្អដែរឬទេ? អ្នកខ្លះហាក់ដូចជាខំអួតបង្ហាញនូវសមត្ថភាពឲ្យនិយោជកឃើញនៅក្នុងរយៈពេល Probation ដើម្បីងាយនឹងបានឱកាសក្លាយជាបុគ្គលិកពេញសិទ្ធិ សកម្មភាពនេះបើចំពោះក្រុមហ៊ុនតូច គេអាចនឹងបែងចែកការងាររបស់គាត់ទៅទំនាក់ទំនងនៅខាងក្រៅ វាប្រហែលជាគ្មានបញ្ហាទេ តែប្រសិនបើធ្វើការងារជាក្រុម វាអាចប៉ះពាល់ដល់សតិអារម្មណ៍របស់អ្នកផ្សេងដែលនៅជុំវិញខ្លួន។ ទោះបីជាអាចបំពេញនូវពាក្យអំនួតរបស់ខ្លួនបានក៏ដោយ តែវាធ្វើឲ្យមានការបាក់ទឹកចិត្តទៅលើបុគ្គលិកចាស់ដែលគេមិនអាចធ្វើបាន។  ចំណុចដែលត្រូវធ្វើការវាយតម្លៃ ក្នុងរយៈពេលProbationនេះផងដែរ ផ្នែកធនធានមនុស្សនឹងធ្វើការវាយតម្លៃលើចំណុចខ្លះចំពោះការបំពេញការងាររបស់បុគ្គលិកដែលមានដូចជា៖ -ការងារដែលដាក់ឲ្យ អាចធ្វើបានប៉ុណ្ណា? ទោះបីជាបានត្រឹមតែ៣០-៤០%ក៏មិនមានបញ្ហាដែរ ព្រោះវាអាចជាការងារដែលមានលក្ខណៈថ្មី សម្រាប់បុគ្គលិកដែលទើបតែចូលដំណាក់កាលសាកល្បង -មើលទៅលើវប្បធម៌ទូទៅ ដែលយើងមើលទៅលើសមត្ថភាពរបស់គាត់អាចទទួលយកនូវការងារដែលយើងដាក់ទៅ ឬក៏អត់ -មើលទៅលើចំណង់ក្នុងការធ្វើការងារនៅពេលដែលដាក់ការងារឲ្យធ្វើ ថាតើមានសកម្មភាពតបតមកវិញយ៉ាងណា។ លក្ខណៈសម្បត្តិ ដើម្បីក្លាយជាបុគ្គលិកពេញសិទ្ធិ ចំពោះឱកាសក្លាយជាបុគ្គលិកពេញសិទ្ធិវិញ លុះត្រាតែបុគ្គលិកមានលក្ខណៈសម្បត្តិ៥យ៉ាងដូចខាងក្រោម ៖ -ភាពស្មោះត្រង់ជាមួយក្រុមហ៊ុន -មានឥរិយាបថល្អ -មានចំណេះដឹង និងព្យាយាមរៀនពីការងារដែលដាក់ឲ្យធ្វើ -មានបុគ្គលិកលក្ខណៈល្អ ដែលអាចធ្វើការងារជាក្រុមបាន និងចង់បានការលើកស្ទួយពីក្រុមហ៊ុននៅថ្ងៃក្រោយ -មានបទពិសោធន៍ការងារខ្លះ និងចង់រៀនបន្ថែមពីក្រុមហ៊ុន។ ចំណុចខុសគ្នារវាងបុគ្គលិក Probation និងបុគ្គលិកពេញសិទ្ធិ -បុគ្គលិកពេញសិទ្ធ៖ មានកិច្ចសន្យាការងារច្បាស់លាស់ ទទួលបានការអនុញ្ញាតមួយចំនួន និងមានច្បាប់ឈប់សម្រាកប្រចាំឆ្នាំ។  -បុគ្គលិក Probation ៖ ជាបុគ្គលិកបណ្ដោះអាសន្ន គ្មានច្បាប់ឈប់សម្រាកប្រចាំឆ្នាំ មានការចរចារលើប្រាក់ខែបន្ទាប់ពីចប់Probation និងមិនអាចចូលរួមធ្វើការងារមួយចំនួន ព្រោះខាងក្រុមហ៊ុនមិនទាន់អាចទុកចិត្តបាន។ អនុសាសន៍ ជាចុងក្រោយ លោកក៏សូមផ្ដាំផ្ញើដល់អ្នកដែលទើបតែចូលធ្វើការ ឬអ្នកដែលទើបតែជាប់ការងារថ្មី  អ្នកគួរតែសម្របខ្លួនជាមួយបរិយាកាសការងារ ក៏ដូចជាមិត្តរួមការងារ ហើយចៀសវាងការព្យាយាមផ្តល់ជាដំបូន្មាន ឬបង្គាប់បញ្ជាទៅដល់បុគ្គលិកចាស់ ដែលវានាំឲ្យមានភាពលំបាក ឬទើសទាល់ក្នុងដំណាក់កាលសាកល្បងការងារ។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

Career & Education Career & Education
Share
  • Jan 24, 2017 |
  • 7 years ago |
  • 5.5K views

ក្តីប្រាថ្នានៃអ្នកគ្រូពេទ្យសោភ័ណសល្យសាស្រ្ត

នាងខ្ញុំឈ្មោះ ម៉ម គឹមអេង ជានិស្សិតឯកទេសសោភ័ណសល្យសាស្រ្តនៃសាកលវិទ្យាល័យវិទ្យាសាស្ត្រសុខាភិបាល។ ដោយសារនាងខ្ញុំស្ថិតក្នុងគ្រួសារដែលមានជីវភាពមធ្យម ដូចនេះ ការទទួលបានអាហារូបករណ៍ឥតបង់ថៃ្ល ជាឱកាសមួយធ្វើឲ្យនាងខ្ញុំអាចចូលសិក្សាក្នុងសាកលវិទ្យាល័យវិទ្យាសាស្រ្តសុខាភិបាលបាន។ មួយវិញទៀត ដោយក្តីស្រឡាញ់តាំងពីកេ្មង ព្រមទាំងមានការលើកទឹកចិត្តពីក្រុមគ្រួសារ នាងខ្ញុំក៏សម្រេចចិត្តជ្រើសរើសមុខវិជ្ជាវេជ្ជសាស្រ្តនេះតែម្តង។ ជាទូទៅ បន្ទាប់ពីការសិក្សា អស់រយ:ពេល៦ឆ្នាំ បញ្ចប់បរិញ្ញាបត្រវេជ្ជសាស្រ្ត និសិ្សតទាំងអស់មានផ្លូវពីរដែលត្រូវជ្រើសរើសទីមួយ គឺបន្ត២ឆ្នាំទៀត ដើម្បីក្លាយជាវេជ្ជបណ្ឌិតទូទៅ និងទីពីរ គឺប្រឡងប្រជែងជាមួយនិសិ្សតដទៃទៀតដើម្បីបានចូលរៀនថ្នាក់ជំនាញឯកទេសរយ:ពេល៤ឆ្នាំ ។ ទាក់ទងនឹងជំនាញឯកទេសសោភ័ណសល្យសាស្រ្ត (វះកាត់កែលម្អ) Plastic surgery មានមនុស្សជាច្រើនយល់ច្រឡំថា វាគ្រាន់តែជាការវះកាត់កែសម្ផស្សតែប៉ុណ្ណោះ។ ប៉ុន្តែតាមពិតទៅ Plastic surgery នេះ ចូលរួមចំណែកយ៉ាងធំដូចជា ភាពមិនគ្រប់លក្ខណ:ពីកំណើតនៅលើមុខ មាត់ ឬក្រអូមមាត់ឆែប ពិការភាពអវ:យវ: គ្រោះថ្នាក់ដែលធ្វើឲ្យមានភាពមិនប្រក្រតី ឬរលាកលើរូបរាងកាយ និងរួមចំណែកជាមួយនឹងការវះកាត់ដុំមហារីកផងដែរ។ នាងខ្ញុំសម្រេចចិត្តជ្រើសរើសជំនាញនេះ ដោយសារវាជាការវះកាត់ដែលប្រើបច្ចេកទេស និងប្រើកម្លាំងស្រាល ដែលនាងខ្ញុំអាចធ្វើបាន។ ម៉្យាងទៀត នាងខ្ញុំស្រលាញ់ជំនាញមួយនេះតាំងពីឆ្នាំទី៤ដែលជាឆ្នាំដំបូងនៃការចុះកម្មសិក្សានៅឯមន្ទីរពេទ្យមកម៉្លេះ។ ការសិក្សាផ្នែកនេះ មានការលំបាកច្រើនដូចនិស្សិតឯកទេសដទៃទៀតដែរ ទាំងការយាម ការឈរវះកាត់រយ:ពេលយូរ ព្រមទាំងប្រឈមនឹងការឆ្លងរោគកម្រិតខ្ពស់។ បញ្ហាមួយទៀត គឺការចំណាយ ព្រោះថ្នាក់ឯកទេសមិនមានការផ្តល់អាហារូបករណ៍ទៀតនោះទេ ដូច្នេះ ការសិក្សារយៈពេលយូរ និស្សិតត្រូវការថវិកាបង់ថៃ្លសិក្សា រួមទាំងការចាយវាយផេ្សងៗទៀតច្រើន។ ការសិក្សាផ្នែកវះកាត់កែលំអនេះ បែងចែកជាពីរដំណាក់កាលគឺ ក្នុងរយៈពេល២ឆ្នាំដំបូង និស្សិតត្រូវធ្វើកម្មសិក្សាវះកាត់ទូទៅ និង២ឆ្នាំបន្ទាប់គឺ ធ្វើកម្មសិក្សាវះកាត់ឯកទេស។ ទោះជាជួបព្យុះភ្លៀងយ៉ាងណាក៏ដោយ នាងខ្ញុំមិនដែលគិតថានឹងបោះបង់វានោះទេ ព្រោះនាងខ្ញុំតែងតែទទួលបានការលើកទឹកចិត្តពីមនុស្សជាទីស្រឡាញ់របស់ខ្ញុំ ក្រុមគ្រួសារ លោកគ្រូអ្នកគ្រូ និងមិត្តភក្តិជានិច្ច។ ជាការពិត​ ជំនាញនេះជាជំនាញដែលខ្ញុំស្រលាញ់ ហើយខ្ញុំអាចជាសមាជិកម្នាក់គត់ ដែលជាទីពំនាក់ពេលក្រុមគ្រួសារ ឬបងប្អូនឈឺ។ ដើម្បីចូលរួមជួយដល់កិច្ចការសង្គម ក្រៅពីការសិក្សានៅសាលា នាងខ្ញុំមានតែកម្លាំងកាយ ចិត្ត និងជំនាញ ចុះជួយវះកាត់ព្យាបាលដល់ប្រជាជននៅតាមខេត្ត ដោយឥតគិតថ្លៃ និងស្វែងរកថវិកាពីសប្បុរសជន ដើម្បីជួយអ្នកជំងឺក្រីក្រ។ សម្រាប់គម្រោងនាថៃ្ងអនាគត នាងខ្ញុំមានបំណងចង់បើកគ្លីនិកផ្ទាល់ខ្លួន ដើម្បីជីវភាពគ្រួសារ និងប្រសិនបើមានលទ្ធភាព ខ្ញុំចង់បង្កើតជាអង្គការចាស់ជរាមួយ ព្រោះថាសព្វថៃ្ងនេះមានតែអង្គការកុមារកំព្រា និងមន្ទីរពេទ្យប៉ុណ្ណោះដែលព្យាបាលមិនគិតថ្លៃសម្រាប់អ្នកជំងឺក្រីក្រ។ ជាចុងក្រោយ នាងខ្ញុំសូមផ្តាំផ្ញើទៅកាន់ប្អូនៗជំនាន់ក្រោយថា «ប្អូនគួរតែសម្រេចចិត្តជ្រើសរើសនូវអ្វីដែលខ្លួនស្រឡាញ់ ហើយជាអ្វីដែលប្អូនអាចធ្វើបាន ព្រោះថាប្អូនត្រូវប្រកបរបរនេះអស់មួយជីវិត។ រីឯការរៀនភាសាបន្ថែម ទាំងភាសាអង់គេ្លស និងភាសាបារាំង សុទ្ធតែចាំបាច់សម្រាប់ការសិក្សាស្រាវជ្រាវ ក៏ដូចជាដើម្បីសិក្សាបន្តនៅក្រៅប្រទេសនានាផងដែរ។ មិនតែប៉ុណ្ណោះ ត្រូវមានការអត់ធ្មត់ តស៊ូ និងលះបង់ប្រកបដោយសីលធម៌​ទើបយើងអាចឆ្លងរួចនូវការលំបាកទាំងនេះបាន។» ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education For Health Practitioners
Share
  • Jan 23, 2017 |
  • 7 years ago |
  • 4.2K views

ដំណើរនៃការផ្តួចផ្តើមអាជីវកម្មថ្មី

ដើម្បីជាការចូលរួមចំណែកមួយផ្នែកក្នុងការលើកស្ទួយនូវការផ្តួចផ្តើមអាជីវកម្មថ្មីនៅកម្ពុជា Park Café រួមសហការជាមួយនឹង Educational Development Institute បានរៀបចំនូវវេទិកាស្តីអំពីការផ្តើមអាជីវកម្ម ដោយផ្តោតសំខាន់លើប្រធានគួរឲ្យចាប់អារម្មណ៍ផ្សេងៗ និងបានបែងចែកប្រធានបទទាំងនោះទៅតាមខែនីមួយៗក្នុងរយៈពេលមួយឆ្នាំពេញតែម្តង។ ក្នុងនោះផងដែរ សិក្ខាសាលាលើកទី១ប្រចាំឆ្នាំ២០១៧នេះ នឹងឈានចូលមកដល់ក្នុងពេលឆាប់ៗ គឺ នៅថ្ងៃច័ន្ទ ទី៣០ ខែមករា ឆ្នាំ២០១៧ វេលាម៉ោង ០៥:៣០ ដល់ម៉ោង០៨ :០០ ល្ងាច ជាមួយនឹងវត្តមាននៃវាគ្មិនកិត្តិយសចំនួន ២រូប គឺ លោក ឡែម ចាន់សំរេច ជានាយកគ្រប់គ្រងនៃCambodia Investor Club (CIC) និង លោក ស៊ីម ចាន់គិរីរ័ត្ន ជាស្ថាបនិក និងនាយកប្រតិបត្តិនៃBanhji ក្រោមការសម្របសម្រួលពីសំណាក់លោក ហេង សេងលី ជានាយកគ្រប់គ្រងទូទៅនៃPark Café។ ប្រធានបទពិភាក្សាសម្រាប់សិក្ខាសាលាលើកនេះ រួមមាន៖ -វិធីសាស្រ្តក្នុងការផ្តើមអាជីវកម្ម -យុទ្ធសាស្រ្តក្នុងការរៀបចំគម្រោងអាជីវកម្ម -និន្នាករទីផ្សារ និងទីផ្សារបច្ចុប្បន្ន -យុទ្ធសាស្រ្តក្នុងការស្វែងរកឥណទានសម្រាប់ផ្តើមអាជីវកម្ម -ជួបជាមួយអ្នកជំនាញផ្តល់ឥណទាន ទាំងនេះសុទ្ធតែជាគន្លឹះដ៏មានគុណប្រយោជន៍សម្រាប់សហគ្រិន អនាគតសហគ្រិន និងអ្នកមានគំនិតផ្តើមអាជីវកម្មថ្មីនាពេលអនាគត ជាពិសេស គឺ ចាប់ផ្តើមដោយទទួលបានការផ្តល់ជូននូវឥណទាន។ តម្លៃសំបុត្រសម្រាប់ចូលរួម គឺត្រឹមតែ ១៥ដុល្លាប៉ុណ្ណោះ និងមានរាប់បញ្ចូលនូវអាហារសម្រន់ជាលក្ខណៈ Cocktails Reception ផងដែរ…សម្រាប់ព័ត៌មានបន្ថែម លោកអ្នកអាចធ្វើការទំនាក់ទំនងបានតាមរយៈទូរស័ព្ទលេខ 012​ 232 823 ​/ 077​ 67​6 423 ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education News & Events
Share
  • Jan 23, 2017 |
  • 7 years ago |
  • 3.4K views

ចង់ជោគជ័យត្រូវមានមោទនភាពចំពោះក្រុមហ៊ុនរបស់ខ្លួន ...

ក្រុមហ៊ុនមេនូឡាយហ្វ៍ ខេមបូឌា ជាក្រុមហ៊ុនធានារ៉ាប់រងអាយុជីវិតដែលមានភាគហ៊ុនបរទេស ១០០% ដែលមានការប្តេជ្ញាចិត្តក្នុងការផ្ដល់ជូនអតិថិជននូវផលិតផល និងសេវាកម្មផ្នែកការការពារហិរញ្ញវត្ថុដែលជាតម្រូវការជាចាំបាច់របស់ពួកគាត់។ ជាបុគ្គលគំរូមួយរូបសម្រាប់ជំនាន់ក្រោយ លោក Robert Elliott ដែលជាអគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា បានផ្តល់នូវកិត្តិយសដ៏ថ្លៃថ្លាផ្តល់កិច្ចសម្ភាសន៍ជាមួយនឹងហេលស៍ថាម ដែលមានអត្ថន័យខ្លឹមសារដូចខាងក្រោម ៖ ទស្សនវិស័យរបស់ក្រុមហ៊ុន មេនូឡាយហ្វ៍ ទស្សនវិស័យរបស់យើង គឺធ្វើយ៉ាងណាជួយសម្រេចឲ្យបាននូវក្ដីសុបិន និងបំណងប្រាថ្នារបស់អតិថិជនយើងតាមរយៈផលិតផល និងសេវាកម្មធានារ៉ាប់រងអាយុជីវិតលំដាប់ថ្នាក់អន្តរជាតិរបស់យើង។ យើងមានការប្ដេជ្ញាចិត្ត ដើម្បីជួយប្រជាជនកម្ពុជាកសាងអនាគតហិរញ្ញវត្ថុដ៏ប្រសើរ និងមានសុវត្ថិភាពជាងមុនសម្រាប់ក្រុមគ្រួសារតាមរយៈការបំពេញនូវតម្រូវការរបស់ពួកគេដោយប្រើប្រាស់គម្រោងការពារប្រាក់ចំណូលការសិក្សាអប់រំសម្រាប់បុត្រធីតា ការសន្សំ និងការចូលនិវត្តន៍ជាដើម។ «ភាពជោគជ័យនៃក្រុមហ៊ុនធានារ៉ាប់រង» សម្រាប់ក្រុមហ៊ុន មេនូឡាយហ្វ៍ យើងកំណត់ភាពជោគជ័យរបស់យើងតាមរយៈការបំពេញនូវតម្រូវការរបស់អតិថិជនរបស់យើង។ នៅក្រុមហ៊ុន មេនូឡាយហ្វ៍ យើងយកអតិថិជនគ្រប់រូបជាស្នូលនៃរាល់ប្រតិបត្តិការអាជីវកម្មដែលយើងធ្វើ។ នេះជាលើកទីមួយនៃប្រវត្តិសាស្ត្ររបស់ប្រជាជនកម្ពុជាជាច្រើនដែលពួកគេបានដឹងអំពីការធានារ៉ាប់រងអាយុជីវិត និងអត្ថប្រយោជន៍វិជ្ជមានរបស់ការធានារ៉ាប់រងអាយុជីវិតសម្រាប់ពួកគេ និងក្រុមគ្រួសាររបស់ពួកគេ។  សមិទ្ធផលទាំងនេះបានមកពីកិច្ចសហការគ្នាយ៉ាងស្អិតរមួត និងការគាំទ្រពីបុគ្គលិកទាំងអស់នៅក្នុងក្រុមហ៊ុនរបស់យើង ហើយដរាបណាយើងនៅតែរក្សាវប្បធម៌សាមគ្គីនេះ ខ្ញុំជឿជាក់ថាអាជីវកម្មរបស់យើងនៅកម្ពុជានឹងរីកចម្រើនទៅមុខយ៉ាងលឿនពីមួយឆ្នាំទៅមួយឆ្នាំ។ កត្តាដែលជម្រុញឲ្យមានភាពជោគជ័យសម្រាប់ក្រុមហ៊ុន មេនូឡាយហ្វ៍ នៅព្រះរាជាណាចក្រកម្ពុជា •ចំណុចដែលសំខាន់បំផុតគឺសមត្ថភាពរបស់បុគ្គលិក និងការសហការគ្នារបស់បុគ្គលិក។ ការខិតខំប្រឹងប្រែង និងការជឿជាក់របស់ពួកគេ ដើម្បីជួយក្រុមគ្រួសារកម្ពុជាធានាឲ្យបាននូវអនាគតហិរញ្ញវត្ថុដ៏ប្រសើរមួយគឺជាកត្តាគោលមួយនៃភាពជោគជ័យរបស់យើងរហូតមកដល់ពេលនេះ។ •ការគាំទ្រពីក្រសួងសេដ្ឋកិច្ច និងហិរញ្ញវត្ថុ ជួយយើងឲ្យឈានជើងចូលមកកាន់ទីផ្សារកម្ពុជា ពង្រីកអាជីវកម្មរបស់យើង និងផ្ដល់ជូននូវផលិតផល និងសេវាកម្មដែលសមស្របទៅតាមតម្រូវការរបស់ប្រជាជនកម្ពុជា។ខ្ញុំធានាថាក្រុមហ៊ុន មេនូឡាយហ្វ៍ នឹងនៅតែរក្សាការរីកចម្រើន និងការប្តេជ្ញាចិត្តរបស់ខ្លួន ដើម្បីការពារក្រុមគ្រួសារកម្ពុជាឲ្យបានកាន់តែច្រើន។ •វគ្គសិក្ខាសាលាសម្រាប់សាធារណជន និងអតិថិជន ព្រមទាំងសកម្មភាពទីផ្សារផ្សេងៗជួយយើងក្នុងការអប់រំប្រជាជនគោលដៅអំពីការធានារ៉ាប់រងអាយុជីវិត ការនាំមកនូវទំនុកចិត្តជូនដល់សហគមន៍តាមរយៈបទពិសោធន៍ជិត ១៣០ ឆ្នាំរបស់យើងពីប្រទេសកាណាដាទៅសហរដ្ឋអាមេរិក និងទីផ្សារចំនួន ១១ ក្នុងតំបន់អាស៊ីព្រមទាំងភាពរឹងមាំដែលកើនឡើងឥតឈប់ឈរនៃកេរ្តិ៍ឈ្មោះរបស់យើងនៅកម្ពុជា។ កត្តាដែលជម្រុញឲ្យលោកអគ្គនាយកបន្តការអភិវឌ្ឍសមត្ថភាពជាលំដាប់ ខ្ញុំជឿជាក់លើវិស័យមួយនេះហើយខ្ញុំជឿជាក់លើមហស្ចារ្យនៃការធានារ៉ាប់រងអាយុជីវិត។ វាជាផលិតផលដែលអាចផ្ដល់អត្ថប្រយោជន៍ច្រើនបំផុតនៅពេលដែលអតិថិជនរបស់យើងត្រូវការវាខ្លាំងបំផុតហើយខ្ញុំមានមោទនភាពណាស់ដែលក្រុមហ៊ុនយើងបានផ្ដល់អត្ថប្រយោជន៍ជាទឹកប្រាក់ជាង ១៩ពាន់លានដុល្លារអាមេរិកជារៀងរាល់ឆ្នាំជូនដល់អតិថិជនរបស់យើងនៅទូទាំង ពិភពលោក។  ខណៈពេលដែលក្រុមគ្រួសារផ្ញើសារ និងកាយវិការរំលែកទុក្ខ ទីប្រឹក្សាធានារ៉ាប់រងអាយុជីវិតរបស់យើងបានធ្វើការជូនសំណងជាថវិកាដល់ពួកគេដែលកំពុងតែត្រូវការថវិកានោះខ្លាំងបំផុត។ មហស្ចារ្យនៃការធា-នារ៉ាប់រងអាយុជីវិតតែងតែជម្រុញឲ្យខ្ញុំដើរទៅមុខជានិច្ចនៅក្នុងវិស័យមួយនេះ។ អត្ថន័យនៃពាក្យថា «ជោគជ័យ» សម្រាប់លោកអគ្គនាយក ធ្វើឲ្យប្រសើរជាងមុន! ពង្រឹងអាជីវកម្មរបស់យើង! អភិវឌ្ឍសមត្ថភាពបុគ្គលិករបស់យើង! ជួយឲ្យអតិថិជនរបស់យើងកសាងអនាគតហិរញ្ញវត្ថុដែលជោគជ័យជាងមុន និងមានសុវត្ថិភាពជាងមុន! តួនាទីសំខាន់ៗដែលអគ្គនាយកប្រតិបត្តិនៃក្រុមហ៊ុនលំដាប់ថ្នាក់អន្តរជាតិមួយរូបត្រូវមាន កសាងក្រុមការងារដ៏ល្អមួយហើយបង្កើតបរិយាកាសមួយដែលពួកគេអាចរីកលូតលាស់បាន។ ប្រសិនបើយើងអាចជួយដោះស្រាយបញ្ហារបស់ពួកគេបាន នោះពួកគេនឹងដោះស្រាយបញ្ហារបស់អតិថិជនរបស់យើងបាន។ ដូច្នេះ ពួកយើងទាំងអស់គ្នាសុទ្ធតែជាអ្នកឈ្នះ! ដំបូន្មានសម្រាប់យុវជនជំនាន់ក្រោយ ត្រូវមានមោទនភាពចំពោះក្រុមហ៊ុនរបស់ខ្លួន បុគ្គលិករបស់ខ្លួន អតិថិជនរបស់ខ្លួន និងផលិតផលរបស់ខ្លួន! ប្រសិនបើបុគ្គលិករបស់យើងមានការសហការគ្នាល្អនោះអតិថិជនរបស់យើងនឹងទទួលបានសេវាកម្មដែលល្អប្រសើរជាងមុន! ត្រូវរៀនស្ដាប់ និងទទួលយកដំបូន្មានថ្មីៗ! ត្រូវធ្វើអ្វីដែលត្រូវ! As a role model for the next generation, Mr. Robert Elliott, the CEO and general manager of Manulife Cambodia, believes that “There is no limit to what a person can do or where he or she can go if he or she doesn’t mind who gets the credit.”, has offered distinguished valuable interviews with Health Time as follows: Visions of Manulife Our vision is to help our customers achieve their dreams and aspirations through our world-class life insurance products and services. We are committed to helping Cambodians build a better and more secure financial future for their families by meeting their needs through income protection, children’s education, savings and retirement plans. Meaning of  “Success” in an insurance company For Manulife, we measure success by meeting the needs of our customers. At Manulife, we put our customers at the center of everything we do.  For many Cambodians, for the first time in their history they are aware of life insurance and the positive benefits it brings to them and their families.  This success comes from collaboration and support from every employee in our company, and as long as we retain this collaborative spirit, I am very confident that our business in Cambodia is going to grow very fast in the coming years.   Factors leading to success of Manulife in Cambodian context •The most important point is the quality and the engagement of our staff. Their commitment and belief that they are helping Cambodian families secure a better financial future is a key factor of our success so far.  •The supports from the Ministry of Economy and Finance helped us to enter into Cambodia, expand our business and provide the products and services that fit the needs of the Cambodian people. I am sure that Manulife will maintain the growth and commitment to protect more families in Cambodia. •Public education seminars, client seminars and marketing activities help us educate the target population on life insurance, bringing trust to the community through our global experience for nearly 130 years from Canada to the U.S. and 11 countries in Asia, and our increasing brand strength in Cambodia. Personal inspiration which keeps you in the high spirit of growing and developing oneself I believe in our industry, I believe in the miracle of life insurance. It’s a product that pays out the most when our customers need it the most, and I’m very proud that my company pays over US $19 billion in benefits to our clients every year across the globe. When most people are sending family their respect and condolences, our advisors are able to give our customers the cash they need. The miracle of life insurance keeps me motivated. Personal meaning of “Success”  Doing better! Growing our business! Developing our staff! Helping our customers build a more successful and secure financial future! Key roles of a CEO in a global company Build the good team, and create the environment for them to flourish. If you solve their problems, they will solve problems of our customers. Everybody wins! Advice to the next generations Be passionate about your company, your staffs, your customers, and your products! If your staff is engaged, your customers will be better served! Learn to listen and take advice! Do the right thing!

Career & Education Career & Education Career & Education Career & Education
Share
  • Jan 21, 2017 |
  • 7 years ago |
  • 3.5K views

លី តារា«សំខាន់ យើងជឿជាក់លើគោលដៅរបស់យើង»

ហេតុអ្វីបានជាមនុស្សម្នាក់ៗត្រូវមានការកំណត់គោលដៅសម្រាប់ជីវិតប្រចាំថ្ងៃរបស់ខ្លួន? បើតាម លោក លី តារា ដែលជាអតីតនិស្សិតនៃសាកលវិទ្យាល័យពុទ្ធិសាស្រ្ត និងជាបុគ្គលមួយរូបដែលចាត់ទុកការអានជាសិល្បៈនៃជីវិតដែលខួរក្បាលទទួលយក រក្សាទុក និងប្រើប្រាស់ព័ត៌មានប្រកបដោយប្រសិទ្ធភាព «ជីវិតដែលមានគោលដៅនឹងជួយឲ្យបុគ្គលមួយរូបចំណេញកម្លាំង ពេលវេលា និងធនធាន»។ គួរបញ្ជាក់ផងដែរថា លោកទើបតែបានសម្រេចនូវគោលដៅអានសៀវភៅចំនូន៧៧៩ក្បាលក្នុងពេល៣ឆ្នាំ ក៏ដូចជាទើបតែចេញផ្សាយនូវស្នាដៃនិពន្ធរបស់ខ្លួនដែលកំពុងទទួលបានប្រជាប្រិយភាពជាខ្លាំង។ ចង់ដឹងថា ប្រសិនបើចង់ឲ្យគោលដៅមួយសម្រេចទៅបានដោយជោគជ័យ គួរតែធ្វើបែបណាខ្លះនោះ? តោះ! តាមដានជាមួយគ្នា... ហេលស៍ថាម ៖ តើគោលដៅដ៏ល្អគួរមានលក្ខណៈសម្បតិ្តយ៉ាងដូចម្តេចខ្លះ? ចំណាយពេលតិច ចំណាយធនធានតិច និងមានកម្រិតនៃការបត់បែន ឬផ្លាស់ប្តូរតូច។  ហេលស៍ថាម ៖ តើមានអ្វីខុសគ្នារវាងគោលដៅដែលត្រូវនឹងចំណូលចិត្តខ្លួន និងការកំណត់របស់អ្នកដទៃ? អ្នកដែលដើរតាមក្តីសុបិន្តរបស់ខ្លួន៖ ប្រៀបដូចជាការដើរពីងងឹតទៅភ្លឺ ហើយក៏ដើរយូរៗទៅកាន់តែច្បាស់ និងងាយស្រួលទៅៗ ដោយសារតែវាជាគោលដៅដែលកើតចេញពីខ្លួនយើងផ្ទាល់ ព្រមទាំងជម្រុញឲ្យមានទំនួលខុសត្រូវ និងស្វែងយល់ពីដំណើរជីវិតកាន់តែច្បាស់។ អ្នកដែលដើរតាមការកំណត់របស់អ្នកដទៃ៖ ប្រៀបដូចជាការដើរពីភ្លឺទៅងងឹត ដោយហេតុថា ដំបូងមានអ្នកចង្អុលផ្លូវឲ្យដើរ លុះយូរៗទៅក៏ផ្តើមស្រពិចស្រពិល និងគ្មានទិសដៅច្បាស់លាស់។ ជួនកាល ត្រូវឈានទៅដល់ការសួរខ្លួនឯងថាហេតុអ្វីបានជាដើរតាមផ្លូវនេះ? ហើយចុងបញ្ចប់ក៏ប្រឈមនឹងការស្តាយក្រោយ។ ហេលស៍ថាម ៖ ពេលផ្តើមរៀបចំគម្រោងសម្រាប់គោលដៅមួយ តើត្រូវគិតដល់អ្វីខ្លះ? ចំណុចសំខាន់ពីរ គឺ «ល្បឿន និងរយៈពេល» ព្រោះថាគោលដៅខ្លះអាចនឹងត្រូវសម្រេចបានលឿនជាងការគ្រោងទុក ប្រសិនបើល្បឿនរបស់យើងបានល្អប្រសើរនោះ។ ប្រសិនបើអាច អ្នកគួរតែមានគោលដៅតូចៗ ដើម្បីជាផ្នែកមួយនៃកម្លាំងជម្រុញទឹកចិត្តឆ្ពោះទៅកាន់គោលដៅធំនៃជីវិតរបស់យើង។  ហេលស៍ថាម ៖ តើអ្វីខ្លះដែលមិនអាចខ្វះបាន ចំពោះអ្នកចង់សម្រេចគោលដៅ? សំខាន់គឺ ត្រូវតែមានភាពជឿជាក់លើខ្លួនឯង ប្រកបដោយមានទំនួលខុសត្រូវ និងឯករាជ្យភាព ដរាបណាយើងជឿជាក់លើខ្លួនឯងកាន់តែខ្លាំង នោះលទ្ធផលដែលរំពឹងទុកនឹងកាន់តែមកកៀកយើងដូចគ្នា។ ហេលស៍ថាម ៖ ប្រសិនបើបរាជ័យ តើមានទង្វើអ្វីខ្លះដែលគួរធ្វើ និងចៀសវាង? សម្រាប់ខ្ញុំ នៅពេលគោលដៅមួយបរាជ័យ ខ្ញុំរៀបចំគោលដៅថ្មីដែលធំជាងមុន។ សម្រាប់បុគ្គលទូទៅ គួរតែចេះក្រោកឈរឡើង គ្រប់ពេលដែលដួល មិនសំខាន់អ្នកបរាជ័យប៉ុន្មានដង សំខាន់អ្នកមិនឈប់ស្ងៀមនៅត្រង់នោះ ហើយព្យាយាមរៀបចំគោលដៅថ្មីសម្រាប់ខ្លួនឯងទៀត។  ហេលស៍ថាម ៖ ក្រៅពីខ្លួនឯងផ្ទាល់ តើមានកត្តាអ្វីខ្លះទៀតដែលជួយឲ្យសម្រេចគោលដៅបាន? ប្រាកដណាស់ គឺមនុស្សនៅជុំវិញខ្លួនដែលរួមមាន ក្រុមគ្រួសារដែលតែងតែលើកទឹកចិត្ត និងមើលថែទាំទាំងផ្លូវកាយ និងផ្លូវចិត្ត មិត្តភកិ្តដែលអាចជួយជម្រុញ ពិភាក្សា និងចែករំលែករឿងរ៉ាវជាច្រើនជាមួយគ្នា រួមផ្សំនឹងកត្តាខាងក្រៅដទៃទៀត ដូចជា សាលារៀន និងបណ្តាញទំនាក់ទំនងសង្គមផងដែរ។ ហេលស៍ថាម ៖ ក្រោយពីការចាប់យកគោលដៅមួយតើត្រូវឆ្លុះបញ្ចាំងលើចំណុចអ្វីខ្លះរបស់គោលដៅនោះ? ចំណុចវិជ្ជមាន (ភាពជោគជ័យ) ៖ ការដើរតាមគោលដៅនោះបានជួយឲ្យរៀន និងស្គាល់អ្វីខ្លះ  ចំណុចអវិជ្ជមាន (បរាជ័យ)៖ បញ្ហាប្រឈមអ្វីខ្លះដែលបង្កឡើង ឧបសគ្គ ៖ ស្វែងយល់ពីមូលហេតុនៃភាពបរាជ័យ ថាតើមានអ្វីខ្លះដែលរារាំងដល់គោលដៅ? ឱកាសអភិវឌ្ឍខ្លួន៖ ត្រៀមខ្លួនសម្រេចនូវគោលដៅថ្មីដោយកាត់បន្ថយនូវអ្វីដែលអាចក្លាយជាឧបសគ្គ ហេលស៍ថាម ៖ តើតារាមានជាអនុសាសន៍អ្វីចែកជូនដល់មិត្តអ្នកអានដែរឬទេ? ចំពោះអ្នកដែលស្រលាញ់ការអានសៀវភៅ៖ ចូលរួមផ្សព្វផ្សាយវប្បធម៌នៃការអាន  សម្រាប់អ្នកដែលមិនទាន់ចូលចិត្តការអានសៀវភៅ៖ ព្យាយាមអានមនុស្សដែលនៅជុំវិញខ្លួនសិន ដោយបង្កើតទំនាក់ទំនងល្អ ជាមួយពួកគេ តាមរយៈការនិយាយ ស្តាប់ និងអង្កេតមើល។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education
Share
  • Jan 19, 2017 |
  • 7 years ago |
  • 4.5K views

5ជំហានមិនអាចខ្វះបានក្នុងការកសាងកេរ្តិ៍ឈ្មោះ

បុគ្គលម្នាក់ៗមាននាមជាសម្គាល់ រីឯផលិតផល ឬស្ថាប័នក៏មានស្លាកយីហោសម្រាប់ជាអ្វីដែលនាំឲ្យអ្នកផងទាំងពួងបានស្គាល់ផងដែរ ហើយទំនុកចិត្តពីសំណាក់អតិថិជនក៏មានទៅតាមកេរ្តិ៍ឈ្មោះនៃបុគ្គល  ឬស្ថាប័នដែរ។ ជាក់ស្តែង លោក សោម សម្បតិ្តដែលជានាយកប្រតិបត្តិនៃក្រុមហ៊ុនខាំផែន(ថ្នាំពណ៌ជាតិ) ក៏បានលើកឡើងផងដែរថា «មិនសំខាន់ អ្នកស្គាល់អ្នកណា សំខាន់ នរណាខ្លះស្គាល់អ្នក» ហើយសិល្បៈនៃការកសាងកេរ្តិ៍ឈ្មោះ ក៏មិនមានអ្វីខុសគ្នាពីសិល្បៈនៃការធ្វើទីផ្សារដែរ។  យ៉ាងណាមិញ កេរ្តិ៍ឈ្មោះដែលគេស្គាល់ និងទុកចិត្តនោះ គឺមិនអាចនឹងកសាងឡើងបានក្នុងរយៈពេលខ្លីនោះទេ ហើយបើអាចក៏នឹងមិនអាចស្ថិតស្ថេរបានយូរអង្វែងនោះដែរ។ តើគួរធ្វើបែបណាទើបគេស្គាល់ហើយស្គាល់យូរទៀត? មានជំហាន៥យ៉ាងដែលលោកអ្នកមិនគួរមើលរំលងក្នុងដំណើរនៃការសាងកេរ្តិ៍ឈ្មោះនេះ… គុណភាព ៖ «បើគ្មានគុណភាព កេរ្តិ៍ឈ្មោះក៏មិនអាចមានដែរ»  សម្រាប់បុគ្គល អ្នកដែលមានគុណសម្បត្តិល្អ   និងជួយឲ្យស្ថាប័នមួយរីកចម្រើនត្រូវបានគេហៅថាHuman Capital រីឯផលិតផលវិញក៏មិនខុសគ្នាដែរ មុននឹងឲ្យគេស្គាល់ទាល់តែមានគុណភាពដែលអាចទទួលយកបានសិន។ អ្វីដែលគួរចៀសវាងនោះ គឺការគិតលើប្រាក់ចំណេញភ្លាម និងរយៈពេលខ្លីដែលជាដៃគូនឹងតម្លៃថោក និងគុណភាពទាប។ សរុបទៅ គឺ គ្រប់ប្រភេទ និងផ្នែកទាំងអស់ សុទ្ធតែត្រូវការគុណភាពជាចម្បង ហើយក៏ត្រូវអាស្រ័យលើចំណែកទីផ្សារដែលចង់ចូលផងដែរ។ ការរចនា និងវេចខ្ចប់ ៖ មានគុណភាពតែមួយមុខ គឺមិនទាន់មានអ្វីដែលប្លែកខុសពីគេនោះទេ ហើយអ្វីដែលត្រូវការបន្ថែមនោះ ជាការរចនាម៉ូតព្រមទាំងការវេចខ្ចប់ប្លែក ដើម្បីបង្កើននូវភាពទាក់ទាញ។ សម្រាប់បុគ្គល ការតុបតែងខ្លួនទៅតាមវិជ្ជាជីវៈជាអ្វីដែលមិនអាចខ្វះបាន ព្រោះថាទោះចង់ ឬមិនចង់ វាជាអ្វីដែលអ្នកដទៃក្រឡេកឃើញមុនគេ។ ការកំណត់ជំហរ  ៖ ដរាបណាមានគោលជំហរច្បាស់លាស់ មិនថាស្ថិតនៅក្នុងចំណែកទីផ្សារណានោះទេ បុគ្គល ឬស្ថាប័នក៏នឹងមិនភ័យខ្លាចនឹងទទួលបានការស្គាល់ពីអ្នកដទៃដែរ។ សំខាន់…ត្រូវដឹងថាផលិតផលរបស់ខ្លួននឹងបំពេញតម្រូវការរបស់ក្រុមអតិថិជនប្រភេទណា ហេតុនេះហើយ ទើបទីផ្សារបច្ចុប្បន្នមិនមានទីផ្សារផ្តាច់មុខ។ តែអ្វីដែលយើងសង្កេតឃើញនោះ គឺក្រុមហ៊ុនច្រើនបំពេញតម្រូវការក្នុងចំណែកទីផ្សារដូចគ្នា ហើយក្រុមហ៊ុនដែលលេចធ្លោនឹងមានចំណែកទីផ្សារធំជាងគេ។ ការកសាងក្រុម ៖ «ជោគជ័យមិនមែនជាស្នាដៃរបស់បុគ្គលទេ វាគឺជាស្នាដៃ ឬសមិទ្ធផលរួមគ្នា ហើយមេដឹកនាំដែលពូកែ ចេះកសាងមនុស្សពូកែនៅជុំវិញខ្លួនឲ្យបានច្រើន ដោយបង្កើនថាមពល និងធ្វើឲ្យក្រុមហ៊ុនកាន់តែខ្លាំង។ ជាក់ស្តែង មនុស្សខ្លាំងពិត មានសមត្ថភាពចេះដឹកនាំគេឲ្យក្លាយជាមនុស្សមិនធម្មតា ហើយរួមគ្នាធ្វើការបង្កើតអ្វីដែលមិនធម្មតា ហើយលទ្ធផលដែលល្អប្រសើរ និងអស្ចារ្យនឹងត្រូវបានគេចាប់អារម្មណ៍ ហើយចង់ដឹង និងស្គាល់ពីហេតុ ឬអ្នកដែលនៅពីក្រោយភាពជោគជ័យនោះ។  ពេលវេលា ៖ អ្វីគ្រប់យ៉ាង សុទ្ធតែត្រូវការពេលវេលា ជាក់ស្តែង ការកសាងកេរ្តិ៍ឈ្មោះ និងទំនុកចិត្តរបស់បុគ្គល ឬស្ថាប័នមិនអាចធ្វើទៅបានជោគជ័យក្នុងរយៈពេលខ្លីនោះទេ។ ប្រសិនបើចង់បានលទ្ធផលឆាប់ រហ័សពេក ខ្លាចលោថាតែមិនអាចទទួលបានជាមួយនឹងកម្រិតគុណភាពដែលប្រាថ្នា។ លោកនាយកប្រតិបត្តិក៏បានបញ្ជាក់ផងដែរថា ដំណើរនៃការសាងកេរ្តិ៍ឈ្មោះរបស់ស្ថាប័ន និងបុគ្គល គឺកើតឡើងមុនក្រោយគ្នាតែបន្តិចប៉ុណ្ណោះ ដរាបណាអ្នកមាន«ចំណេះដឹង ជំនាញ និងចំណង់» ដែលត្រឹមត្រូវតាមសម័យកាលនោះ។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education Career & Education
Share
  • Jan 18, 2017 |
  • 7 years ago |
  • 8.6K views

Vuthy Rathviriya Young UP student with big Dream

មិនមែនជារឿងងាយទេ ដែលនិស្សិតពេទ្យមួយរូបមានកាលវិភាគសិក្សារវល់ ដែលត្រូវធ្វើការងារផង តែនៅតែអាចរៀនពូកែទៀត។ និស្សិតពេទ្យភាគច្រើនប្រាកដជាចង់ឲ្យលទ្ធផលនៃការសិក្សារបស់ខ្លួនបានជោគជ័យ បើទោះជាមានកាលវិភាគមិនសូវជាទំនេរក៏ដោយ។ ហេតុនេះហើយ ដើម្បីជាគន្លឹះសម្រាប់ចែកជូនមិត្តនិស្សិត ហេលស៍ថាម ក៏បានធ្វើបទសម្ភាសន៍ជាមួយនឹងយុវនិស្សិតស្រីវ័យក្មេងស្អាត  ឆ្លាតហើយថែមទាំងពូកែ ដែលតែងតែប្រកាន់ខ្ជាប់ជានិច្ចនូវសម្តីខ្លី តែមានន័យជ្រៅថា «Little Girl, Big Dream» គឺ កញ្ញា វុឌ្ឍី រ័ត្នវីរីយ៉ា។  ខ្លះៗពីវីរីយ៉ា ជាមួយនឹងក្តីប្រាថ្នាក្លាយជាវេជ្ជបណ្ឌិតតាំងពីតូច ដើម្បីជួយសង្រ្គោះជីវិតមនុស្ស ព្រមទាំងមានសុខភាពល្អ និងមានរាងកាយរឹងមាំរួចផុតពីជំងឺផ្សេងៗ និងដោយសារតែមានលោកឳពុកជាវេជ្ជបណ្ឌិតមួយរូបស្រាប់ ហេតុនេះហើយកញ្ញាមានការស៊ាំទៅនឹងការរស់នៅក្នុងមជ្ឈដ្ឋាននេះ  ដោយសព្វថ្ងៃនេះ កញ្ញាជានិស្សិតផ្នែកវេជ្ជសាស្រ្តនៅសាកលវិទ្យាល័យពុទ្ធិសាស្រ្ត (UP) និងបម្រើការងារក្រៅម៉ោងនៅគ្លីនិកស្បែកប៊ីស៊ី (BC Skin Clinic) ជាជំនួយការគ្រូពេទ្យផ្ទាល់រយៈពេល៣ឆ្នាំមកហើយ។ មូលហេតុនៃការសម្រេចចិត្តចូលសិក្សានៅUP ជានិស្សិតពូកែ និងគម្រូមួយរូបរបស់ UP  វីរីយ៉ាក៏បានបង្ហើបប្រាប់ដល់ហេលស៍ថាមផងដែរ អំពីមូលហេតុដែលកញ្ញាជ្រើសរើស UP ជាសាលាដែលកញ្ញាចូលសិក្សាក្នុងនោះរួមមានដូចជា  ប្រព័ន្ធសិក្សាដែលប្រើប្រាស់ភាសាអង់គ្លេសជាគោលដែលជួយសម្រួលដល់និស្សិតដែលមានបំណងសិក្សាផ្នែកវេជ្ជសាស្រ្ត ហើយមានចំណេះតែភាសាអង់គ្លេស។ ហេតុផលចម្បងមួយទៀត គឺ ដំណើរការដោយមានគោលការណ៍ច្បាស់លាស់ និងមានគម្រោងល្អៗជាច្រើនក្នុងការជម្រុញនិស្សិតឲ្យទទួលបានចំណេះដឹង និងសមត្ថភាពពិតប្រាកដដែលនឹងអាចយកទៅប្រើប្រាស់បានយ៉ាងជាក់លាក់។ ទន្ទឹមនឹងគ្នានេះដែរ UP ក៏មានទំនាក់ទំនងយ៉ាងជិតស្និទ្ធជាមួយស្ថាប័នរដ្ឋ ជាពិសេសក្រសួងសុខាភិបាល និងសាកលវិទ្យាល័យ ព្រមទាំងមន្ទីរពេទ្យនានា។ ក្រៅពីស្ថាប័នជាតិ  UP ក៏មានកិច្ចសហប្រតិបត្តិការជាមួយនឹងស្ថាប័នអន្តរជាតិនៅតាមបណ្តាប្រទេសផ្សេងៗផងដែរ។ គន្លឹះនៃការសិក្សាមុខវិជ្ជាពេទ្យ ចំពោះការយល់ឃើញរបស់យុវតីក្នុងវ័យ២១ឆ្នាំដ៏មានប្រជាប្រិយភាព និងរូបសម្ផស្សស្រស់សោភាជាទីចាប់អារម្មណ៍របស់អ្នកគ្រប់គ្នារូបនេះ ក៏បានប្រាប់ថាការសិក្សាមុខវិជ្ជាអ្វីក៏មានភាពលំបាកដែរ មិនថាតែមុខវិជ្ជាពេទ្យដែលខ្លួនកំពុងសិក្សានោះឡើយ។ យ៉ាងណាមិញ ការសិក្សាផ្នែកវេជ្ជសាស្រ្តនេះ គឺប្រាកដណាស់មានភាពលំបាកដូចដែលគ្រប់គ្នានិយាយមែន។ ជាក់ស្តែង ចំនួនមេរៀនដែលត្រូវសិក្សាមានច្រើន។  កញ្ញាក៏បានលើកឡើងផងដែរថា ការសិក្សាផ្នែកនេះទាមទារឲ្យប្រើប្រាស់នូវការស្រមៃច្រើនបន្តិច ព្រោះពេលដែលទើបចូលរៀនដំបូង គឺនិស្សិតត្រូវនៅតែសាលារៀនដោយមិនទាន់មានឱកាសទៅមន្ទីរពេទ្យនោះទេ ហេតុនេះហើយ រាល់ពេលដែលសាស្រ្តាចារ្យនិយាយ ឬណែនាំអំពីជំងឺអ្វីមួយ  និស្សិតចាំបាច់ស្រមៃមើលថាតើក្នុងករណីដែលមានជំងឺនោះកើតមានមែន តើមានទិដ្ឋភាពបែបណាខ្លះ? កញ្ញាក៏បន្ថែមទៀតថា របស់ខ្លះមិនអាចមើលឃើញដោយភ្នែកទទេនោះទេ ដែលជាការចាំបាច់ក៏ទាមទារនូវការស្រមៃដូចគ្នា។ មិនត្រឹមតែប៉ុណ្ណោះ និស្សិតគ្រប់រូបត្រូវមានការស្វែងយល់ពីមេរៀនឲ្យបានច្បាស់ ដោយមិនពឹងផ្អែកតែលើការទន្ទេញទាំងស្រុងនោះឡើយ ព្រោះថាការទន្ទេញនឹងមិនជួយឲ្យមានការចងចាំបានយូរនោះទេ។ អ្វីដែលមិនអាចខ្វះបាននោះ គឺ ការព្យាយាមស្រាវជ្រាវបន្ត ដើម្បីធ្វើការតាមដាននូវការវិវឌ្ឍថ្មីនៃផ្នែកវិទ្យាសាស្រ្ត តាមរយៈការអាននូវឯកសារ ឬប្រភពព័ត៌មានផ្សេងៗដែលមាននៅក្នុងសៀវភៅ ឬប្រព័ន្ធអ៊ីនធឺណែតឲ្យបានច្រើន។  ជាការពិតណាស់ ពេលដែលរៀននៅសាលា កម្រិតនៃការយល់ដឹងអាចនៅមិនទាន់គ្រប់គ្រាន់នៅឡើយ ហេតុនេះហើយ និស្សិតគួរណាស់តែអាន និងស្រាវជ្រាវបន្ថែមទៀតពេលដែលទៅដល់ផ្ទះ។ ប្រសិនបើនៅតែមិនទាន់សូវច្បាស់ទៀត ការពិភាក្សាជាមួយនឹងមិត្តភក្តិជាជម្រើសមួយដ៏ប្រសើរ ព្រោះថាបុគ្គលម្នាក់ៗមិនអាចចេះ ឬយល់ដឹងគ្រប់ដប់នោះទេ ប៉ុន្តែការពិភាក្សាបំពេញនូវចន្លោះគ្នាបែបនេះ នឹងជួយយ៉ាងហោចណាស់ក៏បានខ្លះៗដែរ។ គន្លឹះសាមញ្ញ តែប្រកបដោយប្រសិទ្ធភាពមួយទៀត គឺ ការត្រងត្រាប់ស្តាប់នូវការពន្យល់របស់សាស្រ្តាចារ្យឲ្យបានច្បាស់លាស់ ហើយមិនត្រូវរួញរាក្នុងការសាកសួរ រាល់ពេលដែលមានចម្ងល់ផ្សេងៗ។ និយាយដល់ត្រង់ចំណុចនេះ យុវតីវ័យក្មេងរូបសម្រស់ស្រស់សោភារូបនេះ ក៏បានលើកឡើងផងដែរថា  កញ្ញាមានការអរគុណចំពោះការផ្តល់នូវឱកាសដ៏ពិសេសរបស់ UP ដែលអាចឲ្យនិស្សិតធ្វើការសាកសួរ ក៏ដូចជាពិភាក្សាជាមួយនឹងសាស្រ្តាចារ្យ ដើម្បីដោះស្រាយនូវរាល់ចម្ងល់ ឬបញ្ហាផ្សេងៗ។ ឱកាសពិសេសផ្តល់ជូនដោយUP UP បានផ្តល់នូវលក្ខណៈងាយស្រួល ក៏ដូចជាសម្រួលដល់ការសិក្សារបស់និស្សិតផ្នែកវេជ្ជសាស្រ្តជាច្រើន។ជាក់ស្តែងសាស្រ្តាចារ្យ ដែលបម្រើការងារនៅ UP  សុទ្ធតែមានទឹកចិត្តទូលាយ និងតែងតែបង្កើតនូវភាពស្និទ្ធស្នាលនិស្សិតគ្រប់រូបដោយមិនប្រកាន់ខ្លួន ដែលជាឱកាសដ៏ល្អសម្រាប់ដល់និស្សិតធ្វើការពិភាក្សា ឬបញ្ចេញមតិយោបល់របស់ខ្លួនទាក់ទិននឹងមេរៀនដែលខ្លួនបានសិក្សា។ មិនត្រឹមតែសាស្រ្តាចារ្យនោះទេ បុគ្គលិកបម្រើការងារផ្នែកដទៃទៀត ក៏តែងតែរួសរាយរាក់ទាក់ជាមួយនឹងនិស្សិត ដែលជាហេតុជួយសម្រួលឲ្យទំនាក់ទំនងរវាងនិស្សិត និងសាលាមានភាពរលូន។  ស្របពេលជាមួយគ្នានេះផងដែរ UP តែងតែផ្តល់នូវឱកាសជូនដល់និស្សិតក្នុងការបញ្ចេញសមត្ថភាពផ្ទាល់ខ្លួនមិនថាតែនៅក្នុងថ្នាក់រៀន សាលា ឬនៅក្រៅប្រទេសនោះឡើយ។ ជាក់ស្តែង វីរីយ៉ា ផ្ទាល់ក៏ធ្លាប់បានចុះកម្មសិក្សា និងធ្វើបទបង្ហាញជាលក្ខណៈអន្តរជាតិអំពីវិស័យសុខាភិបាល នៅឯប្រទេសសិង្ហបុរីជាមួយនឹងនិស្សិត UP ចំនួន៤រូបទៀត ក្រោមការអញ្ជើញពីសំណាក់ សាកលវិទ្យាល័យមួយឈានមុខគេនៅអាស៊ី គឺ National University of Singapore (NUS) ។   អំពីសកម្មភាពក្រៅម៉ោងសិក្សានៅសាលា ចំពោះនិស្សិតវិស័យវិទ្យាសាស្រ្តសុខាភិបាល ចាំបាច់ណាស់ត្រូវឆ្លងកាត់នូវការចុះកម្មសិក្សានៅតាមស្ថាប័នផ្សេងៗទៅតាមជំនាញ ក៏ដូចជាមុខវិជ្ជាដែលខ្លួនសិក្សា។ ជាក់ស្តែង គ្លីនិកស្បែក និងឡាស៊ែBC តែងតែផ្តល់ឱកាសជានិច្ចចំពោះនិស្សិតឆ្នាំទី៥ ឬ៦ ដែលអាចឲ្យពួកគេធ្វើការហ្វឹកហាត់ខ្លួនឯងឲ្យស៊ាំនឹងបរិយាកាសការងារក្នុងការអនុវត្តផ្ទាល់ ព្រមទាំងអាចទទួលបាននូវថវិកាខ្លះផងដែរ។ ការចុះហ្វឹកហាត់ការងារបែបនេះពិតជាផ្តល់នូវអត្ថប្រយោជន៍ច្រើនណាស់ដល់និស្សិត ដែលរួមមាន បទពិសោធន៍ពិតៗក្នុងការធ្វើការងារជាមួយនឹងអ្នកជំងឺ ដែលជាលទ្ធផល គឺនិស្សិតមិនមានការភ័យខ្លាចពេលដែលចុះបំពេញការងារ ក៏ដូចជាជួបអ្នកជំងឺ។ សម្រាប់វីរីយ៉ាផ្ទាល់ ពេលម៉ោងទំនេរពីការសិក្សា កញ្ញាតែងតែធ្វើការងារនៅគ្លីនិក ដើម្បីទទួលបានចំណេះបន្ថែមពីលើទ្រឹស្តីដែលបានសិក្សាពីក្នុងថ្នាក់។ ក្រៅពីនេះ  កញ្ញាក៏ប្រាប់ដល់ហេលស៍ថាមផងដែរថា កញ្ញាក៏បានចូលរួមក្នុងការងារសង្គមដោយធ្វើការចុះទៅតាមសហគមន៍ផ្សេងៗ  និងការងារស្ម័គ្រចិត្តដោយធ្វើការពិនិត្យជំងឺជូនដល់ប្រជាជនដោយឥតគិតថ្លៃ តាមរយៈអង្គការ ឬគម្រោងជាតិ និងអន្តរជាតិមួយចំនួន។ ទន្ទឹមនឹងគ្នានេះ យុវតីរាងស្រលូនគួរឲ្យស្រលាញ់ក៏ឆ្លៀតធ្វើលំហាត់ប្រាណ ហើយកីឡាដែលកញ្ញាចូលចិត្តជាងគេ គឺកីឡាហែលទឹក ដើម្បីសុខភាពផ្លូវកាយ និងផ្លូវចិត្តផងដែរ។ កត្តានាំឲ្យការសិក្សាបានជោគជ័យ ចំពោះកញ្ញាផ្ទាល់ កត្តាដែលជម្រុញឲ្យការសិក្សារបស់និស្សិតពេទ្យទទួលបានជោគជ័យ គឺនិស្សិតគោរពតាម និងអនុវត្តតាមគុណតម្លៃទាំង៣របស់UP «គោរពខ្លួនឯង គោរពអ្នកដទៃ អភិវឌ្ឍសង្គម» ដែលការគោរពខ្លួនឯង គឺត្រូវខិតខំស្រាវជ្រាវ ឬរៀនបន្ថែមដោយខ្លួនឯង ហើយគោរពពេលវេលា និងពាក្យសន្យាដែលខ្លួនបាននិយាយ។ ចំណែកឯការគោរពអ្នកដទៃវិញ  គឺការឲ្យតម្លៃទៅលើពួកគេ តាមរយៈការផ្តល់សិទ្ធិ និងធ្វើការចែករំលែកជូនដល់គាត់។ កញ្ញាក៏បានបន្ថែមទៀតដែរថា «ដើម្បីក្លាយជាគ្រូពេទ្យល្អម្នាក់មិនមែនត្រឹមតែរៀនពូកែ ចេះខ្លាំងហើយអាចព្យាបាលគេជានោះទេ សំខាន់ គឺត្រូវមានឆន្ទៈមួយដែលមិនគិតលុយជាធំ។» គោលបំណងទៅថ្ងៃអនាគត ពេលដែលហេលស៍ថាម ធ្វើការសាកសួរអំពីគោលបំណងនៃថ្ងៃអនាគតវិញកញ្ញាក៏ផ្តើមបញ្ចេញនូវស្នាមញញឹមដ៏ស្រស់ មុននឹងផ្តល់នូវចម្លើយថា ក្នុងនាមជានិស្សិតផ្នែកវេជ្ជសាស្រ្តមួយរូប មុខរបរនាពេលអនាគត គឺគ្មានអ្វីក្រៅពីក្លាយខ្លួនជាវេជ្ជបណ្ឌិតមួយរូបនោះឡើយ។ ប៉ុន្តែ វីរីយ៉ា មិនត្រឹមតែចង់ធ្វើជាវេជ្ជបណ្ឌិតសាមញ្ញមួយរូបនោះទេ គឺ កញ្ញាប្រាថ្នាចង់ក្លាយជាបុគ្គលមួយរូបដ៏សំខាន់ និងសកម្មនៅក្នុងសង្គម ដើម្បីចូលរួមអភិវឌ្ឍ ក៏ដូចជាជួយស្តារនូវវិស័យសុខាភិបាលនៅក្នុងប្រទេសកម្ពុជា។  បន្ថែមពីលើនេះ យុវតីក្មេងវ័យ តែចិត្តគំនិតគួរឲ្យស្ញប់ស្ញែងរូបនេះ ក៏មានបំណងបង្កើតនូវមូលនិធិ និងមន្ទីរពេទ្យដែលអាចជួយអ្នកជំងឺក្រីក្រដោយឥតគិតថ្លៃព្រមទាំងឧបត្ថម្ភនូវគ្រឿងបរិក្ខារពេទ្យជូនដល់មន្ទីរពេទ្យផ្សេងៗទៅតាមលទ្ធភាពដែលអាចធ្វើបាន ដើម្បីធានាឲ្យបាននូវការទទួលបានសេវាព្យាបាល និងថែទាំសុខភាពជូនដល់ប្រជាជនកម្ពុជា ឲ្យដូចជាប្រជាជននៃជាតិសាសន៍ដទៃទៀត។ មិនត្រឹមតែប៉ុណ្ណោះ ប្រសិនបើមានឱកាស កញ្ញាក៏ចង់បម្រើការងារជាសាស្រ្តាចារ្យមួយរូប ដើម្បីធ្វើការចែករំលែកនូវបទពិសោធន៍ និងចំណេះដឹងនានាដែលខ្លួនមានទៅកាន់និស្សិតជំនាន់ក្រោយផងដែរ។  សារជូនដល់និស្សិតពេទ្យ «ត្រូវស្រលាញ់អ្វីដែលយើងធ្វើ មិនថាខ្លួនឯងកំពុងសិក្សា ឬធ្វើការងារអ្វីនោះទេចាំបាច់ណាស់ត្រូវមានចិត្តស្រលាញ់ និងឲ្យតម្លៃទៅលើវា។ ម្យ៉ាងទៀត ត្រូវតែគោរពអ្នកដទៃដោយមិនគិតតែពីប្រយោជន៍ផ្ទាល់ខ្លួនតែមួយមុខ។ អ្វីដែលមិនអាចភ្លេចបានទៀតនោះ គឺការតស៊ូប្រឹងប្រែងរៀនសូត្រ ដោយកុំចុះចាញ់បើទោះជាពិបាកយល់ ឬពិបាកចាំ ព្រោះថាមនុស្សគ្រប់គ្នាមិនអាចចាំបានទំាងអស់នោះទេ គឺត្រូវព្យាយាមមើលម្តងហើយម្តងទៀត ដោយមានភាពក្លាហានក្នុងការសួរ និងឆ្លើយរាល់ពេលដែលមានចម្ងល់។ ជាចុងក្រោយ ក៏សូមអរគុណគ្រប់គ្នាដែលតែងតែស្រលាញ់រាប់អាននាងខ្ញុំរហូតមក។» ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education For Health Practitioners
Share
  • Jan 17, 2017 |
  • 7 years ago |
  • 4.3K views

វេទិកាពិសេសសម្រាប់អ្នកមានក្តីស្រមៃ​ក្លាយជាសហគ្រិន

ប្រសិនបើជាអ្នកដែលកំពុងតែមានក្តីស្រមៃក្លាយខ្លួនជាសហគ្រិន ឬក្តីសុបិន្តបើកដំណើរការនូវអាជីវកម្មផ្ទាល់ខ្លួននោះ ឬក៏កំពុងតែជាសហគ្រិនវ័យក្មេង និងម្ចាស់អាជីវកម្មស្រាប់ ហើយមានបំណងស្វែងយល់បន្ថែមពីភាពជោគជ័យនៃវាគ្មិនកិត្តិយសដែលជារៀមច្បងដែលមានបទពិសោធន៍ស្រាប់ក្នុងវិស័យនេះនោះ គួរតែកុំរំលងនូវឱកាសមួយនេះអី… សូមស្វាគមន៍មកកាន់ «វេទិកាធុរកិច្ច ២០១៧» ក្រោមប្រធានបទចំនួន៤ដែលរួមមានដូចជា៖ «ការផ្លាស់ប្តូរផ្នត់គំនិត» ដោយលោក គឹម ចាន់ណា (ស្ថាបនិកនៃ Mindbook) ការផ្លាស់ប្តូរផ្នត់គំនិតពីភាពអកម្មទៅជាការផ្តួចផ្តើមក្នុងការពង្រីកនូវអាជីវកម្ម និងព្យាករណ៍ទុកជាមុននូវសកលដ៏ធំទូលាយ ជាផ្នែកមួយដ៏សំខាន់ក្នុងសហគ្រិនភាព។ លោកនឹងធ្វើបទបង្ហាញអំពីមតិយោបល់ដ៏មានប្រជាប្រិយភាពមួយ របស់ Robert Kiyosaki គឺ «The Cash flow Quadrant»។ «ទំនោរនៃអាជីវកម្ម» ដោយលោក ជី សិលា (នាយកប្រតិបត្តិនៃ Sabay Company)  ការយល់ដឹងអំពីនិន្នាការនៃសេដ្ឋកិច្ចពិភពលោក និងទំនោរនៃប្រជាជនទាក់ទិននឹងតម្រូវការ និងការចង់បាន ជាកត្តាមួយដ៏សំខាន់ក្នុងអភិវឌ្ឍសហគ្រាសអាជីវកម្ម ដើម្បីកាត់បន្ថយនូវហានិភ័យនៅតិចតាមដែលធ្វើបាន។ «ការចាប់ផ្តើមអាជីវកម្ម» ដោយលោក គង់ សូលីយ៉ា (សហស្ថាបនិកនៃ Joonaak Delivery) ការចាប់ផ្តើមអាជីវកម្មថ្មីមួយមិនត្រឹមតែជាកិច្ចការមួយងាយស្រួលនោះទេ ព្រោះថាផែនការអាជីវកម្មត្រូវឆ្លងកាត់ការអភិវឌ្ឍដោយមានភាពស្មុគស្មាញដោយដាក់បញ្ចូលនូវព័ត៌មានលម្អិត និងភាពដែលអាចអនុវត្តបាន។ ហេតុដូច្នេះហើយ ការយល់ដឹងអំពីអាជីវកម្មអាចនឹងនាំឲ្យមានលំនឹង ការគ្រប់គ្រងដ៏មានប្រសិទ្ធភាព ការគ្រប់គ្រងហិរញ្ញវត្ថុ ។ល។ កត្តាប្រកបដោយគុណតម្លៃទាំងនេះនឹងត្រូវបានបកស្រាយ ក៏ដូចជាបង្ហាញណែនាំចាពាក្យសម្រាយ និងងាយយល់។ «សារៈសំខាន់នៃស្លាកយីហោ» ដោយលោក សោម សម្បត្តិ (នាយកប្រតិបត្តិនៃCampaint) ធ្វើយ៉ាងណាអាចផ្សព្វផ្សាយនូវស្លាកយីហោរបស់ខ្លួនបាន ព្រោះស្លាកយីហោត្រូវបានចាត់ទុកជាកត្តាជម្រុញដ៏មានគុណតម្លៃមួយសម្រាប់អាជីវកម្មដែលជោគជ័យ ដោយវាដើរតួនាទីយ៉ាងសំខាន់ក្នុងការបញ្ចេញនូវប្រជាប្រិយភាព និងការទាក់ទាញអតិថិជននៅក្នុងទីផ្សារដែលកំពុងតែមានការប្រកួតប្រជែងខ្លាំងក្លា។ ជាក់ស្តែងណាស់ ប្រធានបទទាំង៤ដែលបានលើកឡើងខាងលើនេះ សុទ្ធតែជាកត្តាសំខាន់ដែលនឹងធ្វើឲ្យអាជីវកម្មរបស់លោកអ្នកទទួលបានជោគជ័យ ហើយសិក្ខាសាលានេះផងដែរ ជាឱកាសមួយយ៉ាងពិសេសសម្រាប់បងប្អូន និងប្រជាជនកម្ពុជា ដែលមានចំណាប់អារម្មណ៍ទៅលើមុខជំនួញអាជីវកម្ម ឬធុរកិច្ច ដើម្បីត្រៀមខ្លួនក្លាយជាសហគ្រិនវ័យក្មេងក្នុងសហសម័យថ្មីនេះ។ អ្នកចូលរួមទាំងអស់នឹងទទួលបាននូវការចែករំលែកបទពិសោធន៍  ទ្រឹស្តី និងគោលគំនិតសំខាន់ៗនៃភាពជោគជ័យពីសំណាក់វាគ្មិន ដែលធ្លាប់បានឆ្លងកាត់ការលំបាក និងភាពបរាជ័យជាច្រើនក្នុងវិស័យជំនួញ។ ស្របពេលជាមួយគ្នាផងដែរ លោកអ្នក ទទួលបានឱកាសបង្កើតបណ្តាញទំនាក់ទំនងរវាងសហគ្រិននានាផងដែរ។   កាលបរិច្ឆេទ ៖  ថ្ងៃអាទិត្យ ទី ២២ ខែមករា ឆ្នាំ២០១៧ វេលាម៉ោង    ៖  ១:០០ រហូតដល់ ៥:០០ ល្ងាច ទីកន្លែង       ៖  មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) សម្រាប់ព័ត៍មានបន្ថែម សូមទំនាក់ទំនងមកកាន់ ៖  •    ខៀន អានិកា (នៅវិទ្យាស្ថាន CamEd) 017 606 044 •    អ៊ឹង ហាំង (នៅវិទ្យាស្ថាន IFL) 086 639 914 •    គង់ គីរីវណ្ណ (អ្នករៀបចំកម្មវិធី) 017 494 968 or 010 494 941 •    ង៉ោ សុខចេង (Marketing Manager) 012 226 289 ឬ ចូលទៅកាន់ Facebook Page របស់ពួកយើង https://www.facebook.com/ibccambodia/?pnref=story ចុះឈ្មោះពេលនេះ ដើម្បីទទួលបានបន្តោងសោរដ៏ស្រស់ស្អាត ហើយតម្លៃតែ១៥,០០០រៀលប៉ុណ្ណោះ!!!

Career & Education News & Events
Share
  • Jan 17, 2017 |
  • 7 years ago |
  • 32.1K views

អ្វីខ្លះដែលផ្នែកHR ពិចារណាមុនដំឡើងប្រាក់ខែ ឬមុខតំណែង?

  តើអ្នកធ្លាប់ទទួលបានការដំឡើងប្រាក់ខែ ឬមុខតំណែងពីសំណាក់ប្រធានក្រុមហ៊ុនរបស់អ្នកទេ? អ្នកធ្លាប់សួរខ្លួនឯងទេថា ហេតុអ្វីបានជាមិត្តរួមការងារបានទទួលការដំឡើងប្រាក់ខែ ឬមុខតំណែង? ​តែអ្នកហាក់ដូចជាគ្មានឱកាសទទួលបានតំណែងទាំងនោះទាល់តែសោះ…ជាក់ស្តែង ការទទួលបានការសរសើរ ឬដំឡើងមុខតំណែង ឬប្រាក់ខែ ពីសំណាក់ប្រធានក្រុមហ៊ុនផ្ទាល់ ជាការឆ្លុះបញ្ចាំងពីសមត្ថភាព និងជំនាញរួមជាមួយនឹងគុណតម្លៃយ៉ាងជាក់លាក់មួយរបស់អ្នកដែលបានផ្តល់ទៅកាន់ក្រុមហ៊ុន ហើយវាក៏ជាលើកទឹកចិត្តក្នុងការបន្តកិច្ចការងាររបស់អ្នកតទៅមុខទៀតផងដែរ។ ហេលស៍ថាម សូមនាំជូនមិត្តអ្នកអាននូវគនឹ្លះសំខាន់ៗក្នុងការរៀបចំខ្លួនសម្រាប់ការទទួលបានការដំឡើងប្រាក់ខែ ឬមុខតំណែងដោយមានការចែករំលែកពីសំណាក់លោក អួង​ បូរិន ដែលបានបញ្ចប់ថ្នាក់បរិញ្ញាបត្រជាន់ខ្ពស់នៅសាកលវិទ្យាល័យន័រតុនក្នុងឆ្នាំ២០០៨ខាងផ្នែកគ្រប់គ្រងអាជីវកម្ម ហើយសព្វថ្ងៃលោកកំពុងបម្រើការងារជាប្រធានផ្នែកធនធានមនុស្សនៅ Aplus Consulting Co., Ltd និងជាសាស្រ្តាចារ្យមួយរូបនៅសាកលវិទ្យាល័យន័រតុនផងដែរ។ តើក្រុមហ៊ុននឹងសម្លឹងមើលលើអ្វីខ្លះជាលក្ខខណ្ឌក្នុងការដំឡើងប្រាក់ខែ ឬមុខតំណែងដល់បុគ្គលិកមួយរូប? ជាទូទៅ សម្រាប់ក្រុមហ៊ុនមានលក្ខខណ្ឌពីរក្នុងការពិចារណាដំឡើងប្រាក់ខែ ឬមុខតំណែង៖ • លទ្ធផលការងារផ្ទាល់ខ្លួនដែលយើងហៅថា KPI (Key Performance Indicator)៖ ជាធម្មតា បុគ្គលិកទាំងអស់ត្រូវធ្វើយ៉ាងណាឲ្យការងាររបស់ខ្លួនទទួលបានKIPពីរឆ្នាំជាប់ៗគ្នា ដូច្នេះ ទើបគាត់មានលទ្ធភាពទទួលបានការដំឡើងមុនគេមិនថាតែប្រាក់ខែ ឬមុខតំណែងនោះទេ។ • លទ្ធភាពមួយទៀត គឺការកែប្រែក្រុមហ៊ុន (Company Review)៖ កាលណាក្រុមហ៊ុនមានការប្រែប្រួលដោយមានភាពរីកចម្រើននោះ គេនឹងចាប់ផ្តើមធ្វើការពិនិត្យឡើងវិញនូវរចនាសម្ព័ន្ធរបស់ក្រុមហ៊ុនទាំងមូល ជាទូទៅគេធ្វើរយៈពេលមួយឆ្នាំម្តងហើយបុគ្គលិកទាំងអស់នឹងទទួលបានកាំប្រាក់ថ្មី។ប៉ុន្តែវាប្រែប្រួលទៅតាមបុគ្គល បើបុគ្គលិកមិនមានប្រសិទ្ធិភាពការងារល្អ ទោះបីជាក្រុមហ៊ុនមានការរីកចម្រើនក៏ដោយ បុគ្គលិកប្រភេទនេះក៏ពុំទទួលបានលទ្ធផលល្អដែរ។ តើបុគ្គលិកថ្មីមានឱកាសទទួលបានការដំឡើងតំណែង ឬប្រាក់ខែទេ? ប្រាកដណាស់ ពួកគាត់ពិតមានឱកាសទទួលបានលទ្ធភាពទាំងនោះ បើទោះបីជាពួកគាត់ជាបុគ្គលិកថ្មីក៏ដោយ តែសំណួរសួរថា «តើបុគ្គលិកថ្មីទាំងនោះ គឺថ្មីកម្រិតណា» ជាធម្មតាការក្លាយខ្លួនជាបុគ្គលិកឆ្នើម អ្នកទាំងនោះគួរតែបានបំពេញការងាររយៈពេល២ឆ្នាំយ៉ាងតិច ពីព្រោះក្នុងអំឡុងពេលនេះ ពួកគាត់នឹងស្វែងយល់ពីការងាររបស់ក្រុមហ៊ុនកាន់តែច្បាស់ ហើយការសម្រេចភារកិច្ចរបស់ខ្លួនក៏ទទួលបានជោគជ័យ និងល្អប្រសើរ សម្រាប់ទទួលបានតំណែង និងប្រាក់ខែថ្មីទៅតាមហ្នឹងដែរ។ ចុះចំណែកបុគ្គលិកដែលមិនទទួលបានការដំឡើងតំណែង ឬប្រាក់ខែវិញមានលក្ខណៈសម្បតិ្តយ៉ាងណាខ្លះដែរ? •  បុគ្គលិកពុំសម្រេចបាននូវគោលដៅ ដូច្នោះហើយ ក្រុមហ៊ុនពុំរវីរវល់ក្នុងការដំឡើងប្រាក់ខែ ឬតំណែងនោះទេ។ •  បុគ្គលិកពុំមានជំនាញបន្ទាប់បន្សំសមរម្យ (Soft Skills) ហើយមានអត្តចរិត និងអាកប្បកិរិយាមិនសូវល្អរួមមានដូចជា ការនិយាយស្តីមិនសមរម្យ ការមិនគោរពវិន័យ ឬដាក់ច្បាប់សុំឈប់សម្រាកច្រើនជាដើម។ ភាពទាំងអស់នោះ ជាភាពកំសោយមួយរបស់បុគ្គលិកដែលក្រុមហ៊ុនមិនពិចារណាក្នុងការដំឡើងតំណែង ឬប្រាក់ខែនោះទេ ហើយអ្វីដែលជាការប្រឈមនោះ គឺពួកគាត់អាចត្រូវបានក្រុមហ៊ុនដកមុខតំណែង និយាយរួម គឺដេញចេញពីការងារតែម្តង។ មានកត្តាអ្វីខ្លះដែលផ្នែកធនធានមនុស្សពិចារណា រាល់ពេលដំឡើងប្រាក់ខែ និងមុខតំណែងដល់បុគ្គលិក? មានកត្តា៤ដែលរួមមាន៖ «លទ្ធផលការងារ វិន័យ ការងារក្រុម​​ និង កត្តាក្រុមហ៊ុនទាំងមូល»។ បុគ្គលគ្រប់រូបគួរតែប្រកាន់ខ្ជាប់នូវកត្តាទាំង៤នេះ បើខ្លួនអ្នកពិតជាចង់ទទួលបានឱកាសផ្សេងៗក្នុងមុខតំណែងរបស់ខ្លួន។ រវាងបុគ្គលិកចាស់ និងបុគ្គលិកថ្មី តើមួយណាដែលមានឱកាសច្រើនជាង? ខ្ញុំយល់ថាវាឈរលើបរិបទ២យ៉ាង៖ • ផ្អែកតាមLogic៖ជាទូទៅ ស្ថាប័នការងារមិនសូវជាគិតគូរខ្លាំងពីរយៈពេលដែលបុគ្គលិកបំពេញការងារនោះទេ ប៉ុន្តែគេសង្កេតខ្លាំងទៅលើសមត្ថភាព ដែលបុគ្គលិកបានបំពេញការងារ ដូច្នេះឱកាសដូចគ្នា។ • ផ្អែកតាមEmotion៖ពាក្យថា«អារម្មណ៍»ត្រង់ចំណុចនេះ គឺចង់ឲ្យក្រឡេកមើលឡើងវិញថាមុខតំណែងនីមួយៗដែលបុគ្គលិកកំពុងបំពេញជាប្រភេទអ្វីតួយ៉ាង មុខតំណែងដូចជាCashier គឺមិនត្រូវការអ្វីដែលថ្មី ដែលតម្រូវឲ្យពួកគាត់នាំចូលដល់ក្រុមហ៊ុននោះទេ ក្រៅពីការគ្រប់គ្រងថវិកាឲ្យបានល្អ ដូច្នេះហើយ ការដំឡើងប្រាក់ខែ ឬមុខតំណែងផ្សេងៗ គឺត្រូវមើលផងដែរនូវតួនាទីនៃប្រភេទមុខតំណែងដែលនិយោជិកកំពុងបំពេញ។ តើមានគន្លឹះអ្វីខ្លះដែលនិយោជិកគួរប្រតិបត្តិ ដើម្បីក្លាយជាបុគ្គលិកប្រកបដោយសក្តានុពលមួយរូប? ខ្ញុំសូមចែករំលែកនូវគោលការណ៍៥យ៉ាង ដែលនិយោជិកអាចមានឱកាសទទួលបានតំណែងថ្មី និងល្អ រួមនឹងប្រាក់ខែដែលជាទីគាប់ចិត្ត៖ • ត្រូវយល់ពីអាជីវកម្មរបស់ប្រធានក្រុមហ៊ុនឲ្យបានច្បាស់៖ ជួនកាល បុគ្គលិកខ្លះមិនបានយល់ច្បាស់ពីគោលបំណងរបស់អតិថិជន និងដៃគូប្រកួតប្រជែងក្នុងក្រុមហ៊ុនដែលខ្លួនកំពុងបម្រើការនោះទេ ដែលនេះហើយជាចំណុចមួយដែលពួកគាត់មិនទទួលបានជោគជ័យ។ • ត្រូវឲ្យតម្លៃលើតួនាទី និងកាតព្វកិច្ចរបស់ខ្លួនឯង៖ គួរយល់ឲ្យច្បាស់នូវចំណែករបស់ខ្លួន សម្រាប់ការរីកចម្រើនរបស់ស្ថាប័ន ហើយព្យាយាមធ្វើឲ្យបានល្អបំផុត។ • ត្រូវមានទំនាក់ទំនងល្អជាមួយអ្នកជុំវិញខ្លួន៖ ត្រូវតែប្រកាន់ខ្ជាប់នូវភាពល្អរបស់ខ្លួនដែលធ្វើទៅកាន់អ្នកដទៃ ហើយត្រូវចៀសឲ្យបាននូវឥទ្ធិពលអាក្រក់ពីអ្នកដទៃ ដែលធ្វើឲ្យផ្លាស់ប្តូរដល់ខ្លួនអ្នកផ្ទាល់។ • ត្រូវបង្ហាញពីសមិទ្ធផលរបស់ខ្លួន៖ និយោជិកត្រូវយកលទ្ធផលជាមូលដ្ឋាន ហើយកាត់បន្ថយហេតុផលដែលធ្វើឲ្យការងារមិនបានសម្រេច ព្រោះវាជាអំណាចនៃបុគ្គលិកឆ្នើម។ • បុគ្គលិកគួរតែចេះបារម្ភពីនិរន្តភាពរបស់ក្រុមហ៊ុន៖ ត្រូវចេះផ្តល់គំនិត ឬយោបល់សម្រាប់ដោះស្រាយភាពលំបាកក្នុងក្រុមហ៊ុនក្នុងគោលបំណងឲ្យស្ថាប័ននៅតែអាចបន្តទៅមុខទៀត។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education
Share
  • Jan 16, 2017 |
  • 7 years ago |
  • 5K views

គន្លឹះកសាងកេរ្តិ៍ឈ្មោះ និងសក្តានុពលរបស់ស្ថាប័នអប់រំ ពីលោកឧកញ៉ាវេជ្ជបណ្ឌិត គួច ម៉េងលី

  វិស័យអប់រំចូលរួមចំណែកមួយផ្នែកធំក្នុងការកសាងអនាគតនៃសង្គមជាតិ ដែលពឹងផ្អែកសើ្ទរតែទាំងសុ្រងទៅលើគុណភាពនៃស្ថាប័នអប់រំ។ ដើម្បីចែករំលែកនូវគុណតម្លៃដ៏មានសារសំខាន់ដែលស្ថាប័នអប់រំមួយមិនអាចខ្វះបាន ហេលស៍ថាម ក៏បានជួបសម្ភាសន៍ផ្ទាល់ជាមួយនឹងលោកឧកញ៉ាវេជ្ជបណ្ឌិត គួច ម៉េងលី ដែលជាអតីតសាស្រ្តាចារ្យផ្នែកកាយវិភាគវិទ្យា ជីវវិទ្យា និងសុខភាពសាធារណៈទូទៅនៅសហរដ្ឋអាមេរិក ដែលបានត្រឡប់មកមាតុប្រទេសវិញក្នុងឆ្នាំ២០០២ ក្នុងនាមជាគ្រូពេទ្យស្ម័គ្រចិត្ត និងទីប្រឹក្សាផែ្នកសុខភាពសាធារណៈតាមអង្គការដៃគូសម្រាប់អភិវឌ្ឍ មុននឹងក្លាយជាសាស្រ្តាចារ្យ និងស្ថាបនិកព្រឹទ្ធបុរសមហាវិទ្យាល័យផ្នែកសុខភាពសាធារណៈនៅសាកលវិទ្យាល័យមួយនៅកម្ពុជា។ គួរបញ្ជាក់ផងដែរ លោកឧកញ៉ាក៏ជាស្ថាបនិកនៃវិទ្យាស្ថាន និងសាលារៀនអន្តរទ្វីបអាមេរិកាំង ដែលក្នុងស្ថាប័នរបស់លោកឧកញ៉ាក៏មានបន្ថែមនូវ Student Health Center សម្រាប់មើលថែទាំបឋមដល់សុខភាពទូទៅរបស់សិស្សក៏ដូចជាបុគ្គលិកសិក្សាទៀតផង។ ហេលស៍ថាម ៖ ចំពោះស្ថាប័នអប់រំដែលចាប់ផ្តើមដំបូង គួរតែមានគុណតម្លៃបែបណាខ្លះ ដើម្បីទទួលបានទំនុកចិត្តពីសំណាក់សិស្សានុសិស្ស ក៏ដូចជាអាណាព្យាបាល? ចាំបាច់ណាស់ ត្រូវតែមានការចុះឈ្មោះ និងទទួលស្គាល់គុណភាពជាផ្លូវការ ដោយបំពេញនូវសេវាកម្មស្របតាមស្តង់ដាអាជីពជាស្ថាប័នអប់រំ។ ស្របពេលជាមួយគ្នាផងដែរ គុណភាពគ្រូបង្រៀន និងបុគ្គលិកក៏ជាចំណុចដែលត្រុវយកចិត្តទុកដាក់ ដោយបន្ថែមពីលើចំណេះដែលគាត់មានស្រាប់ពិសេសគួរផ្តល់ជូននូវវគ្គបង្ហាត់បង្រៀន ដើម្បីធានាបាននូវគុណភាព និងក្រមសីលធម៌ល្អប្រកបដោយវិជ្ជាជីវៈ។ ចំពោះកម្មវិធីសិក្សា ត្រូវស្រប និងមានការអភិវឌ្ឍតាមក្រសួងអប់រំ និងស្តង់ដារអន្តរជាតិយ៉ាងណា កុំកៀបសង្កត់សិស្សពេក ព្រោះការដាក់សមា្ពធធ្ងន់ពេកទៅលើសិស្សដែលជាសសរទ្រូងនៃប្រទេសជាតិនាពេលអនាគតនឹងនាំមកនូវផលវិបាក គឺ សិស្សនឹង «ពូកែរៀនតែមិនពូកែចេះ រៀនច្រើនមិនពូកែចំណេះ ចេះច្រើនមិនយល់ដឹងច្រើន ហើយថែមទាំងមិនចេះអតា្ថធិប្បាយ»។ ហេលស៍ថាម ៖ ស្ថាប័នអប់រំមួយដែលមានគុណភាព និងសក្តានុពលមានលក្ខណៈសម្បតិ្តបែបណាខ្លះ? អ្វីដែលចម្បងជាងគេ គឺ ការទទួលស្គាល់គុណភាពពីស្ថាប័នជាតិហើយទីតាំង និងបរិស្ថានទៀតសោតចាំបាច់ត្រូវតែមានសុវត្ថិភាព និងអំណោយផលដល់ការសិក្សារបស់សិស្ស។ មិនត្រឹមតែប៉ុណ្ណោះ អគារសិក្សាគយរតែមានបំពាក់នូវគ្រឿងបរិក្ខារប្រកបដោយបច្ចេកវិទ្យា និងហេដ្ឋារចនាសម្ព័ន្ធតាមបែបទំនើប និងទាន់សម័យកាល។ ឯកម្មវិធីសិក្សាត្រូវតែស្របតាមស្តង់ដាររបស់ក្រសួង រួមផ្សំនឹងកម្មវិធីក្រៅម៉ោងសិក្សាឲ្យបានច្រើនសិក្សាឲ្យបានច្រើន ដើម្បីឲ្យសិស្សរៀនដោយភាពសប្បាយរីករាយ និងមានចំណូលចិត្តពិត។ ទន្ទឹមនឹងគ្នានេះផងដែរ ប្រព័ន្ធគ្រប់គ្រងក្នុងស្ថាប័នត្រូវតែសុក្រឹតយុត្តិធម៌ ដោយចៀសវាងដាច់ខាតនូវវប្បធម៌ពុករលួយដែលលក់ពិន្ទុ ឬសញ្ញាបត្រ ដោយមិនខ្វល់ខ្វាយពីគុណភាពអប់រំ ឬអនាគតរបស់សិស្ស។ កត្តាសំខាន់មួយទៀត គឺ លោកគ្រូ អ្នកគ្រូចាំបាច់ស្រឡាញ់សិស្សឲ្យដូចកូនរបស់ខ្លួនប្រៀបដូចពាក្យដែលគេតែងនិយាយថា «ឳពុកម្តាយទី២របស់សិស្សគឺ គ្រូ ហើយផ្ទះទី២របស់សិស្ស គឺសាលារៀន»។ ពិសេសគ្រូត្រូវមានភាពអំណត់អត់ធ្មត់ និងការបំពេញតួនាទីជាគ្រូបង្រៀនប្រកបដោយចំណេះដឹងសីលធម៌ និងចិត្តសាស្រ្តខ្ពស់ វិន័យនិងសណ្តាប់ធ្នាប់ត្រឹមត្រូវ ហើយចាំបាច់ត្រូវតាមដានការសិក្សារបស់សិស្ស ពិសេសត្រូវផ្សារភ្ជាប់ទំនា ក់ទំនងជាមួយនឹងអាណាព្យាបាលឲ្យបានត្រឹមត្រូវ ព្រោះវាជាកត្តាដែលមិនអាចខ្វះបាន។ ហេលស៍ថាម ៖ នាមជាស្ថាប័នអប់រំដែលមានសក្តានុពលមួយ តើមានគុណសម្បត្តិ និងគុណវិបត្តិអ្វីខ្លះ? គុណសម្បត្តិដែលធំជាងគេ គឺនឹងត្រូវបានគេទទួលស្គាល់ច្រើន ស្របពេលដែលចូលរួមចំណែកក្នុងការកសាងធនធានមនុស្ស ដែលមានតួនាទីក្នុងការបម្រើសង្គមជាតិឲ្យមានការលូតលាស់ ដែលសកម្មភាពនេះពិតជារួមចំណែកក្នុងការកសាងសង្គម ឬយុវជនឲ្យប្រទេសជាតិយើងពិតប្រាកដ ព្រោះថាវប្បធម៌នៃការចែករំលែកនូវចំណេះមានអត្ថន័យខ្លឹមសារជាងអ្វីៗទាំងអស់ បើយើងក្រឡេកមកមើលមួយផ្នែកទៀតនោះ គឺលទ្ធភាពក្នុងការប្រមូលចំណូលក្នុងកម្រិតមួយសមរម្យដើម្បីឧបត្ថម្ភ បណ្តុះបណ្តាល និងផ្តល់ជូននូវអត្ថប្រយោជន៍ផ្សេងៗជូនដល់បុគ្គលិក និងលោកគ្រូអ្នកគ្រូ។ ចំពោះគុណវិបត្តិវិញ គឺប្រាកដណាស់មានផលលំបាកច្រើនក្នុងការគ្រប់គ្រងដោយមានប្រភេទមនុស្សច្រើននៅក្នុងស្ថាប័ន។ ពុំនោះទៀតសោត ដៃគូប្រកួតប្រជែង ក៏មានច្រើនដែរ រីឯការចំណាយក៏មិនតិចដែរ ប្រៀបបានដូចនឹងពាក្យដែលគេនិយាយថា«ទូកធំ ក្តោងធំ»។ ហេលស៍ថាម ៖ នៅក្នុងប្រទេសកម្ពុជា តើប្រព័ន្ធអប់រំបែបណារួមចំណែកពិតក្នុងការអភិវឌ្ឍសង្គម? ដោយសារតែសង្គមកម្ពុជានាពេលបច្ចុប្បន្ន មានតម្រូវកា រនៃការវិនិយោគលើយុវជនច្រើនតាមរយៈរូបភាពផ្សេងៗ ព្រោះពួកគេជាសសរទ្រូងនៃប្រទេសជាតិ និងបង្កឲ្យមានបញ្ញវន្តលើកស្ទួយដល់អនាគតនៃជាតិខេមរា។ វាជាការពិតដែលថា «បច្ចុប្បន្នយុវជនត្រូវការយើង អនាគតយើងនឹងត្រូវការយុវជនវិញ»ហេតុនេះហើយ ប្រព័ន្ធអប់រំត្រូវតែអនុវត្តតាមកម្មវិធីសិក្សារបស់ក្រសួងឲ្យបានពេញលេញ ដោយមិនឆក់កណ្តៀត ឬកេងប្រវ័ញ្ចម៉ោងសិក្សា ព្រមទាំងមានវិន័យតឹងរឹងចំពោះអវត្តមាន តែមិនត្រូវជិះជាន់ ឬរំលោភបំពានលើសិទ្ធិនោះ ឡើយ។ អ្វីដែលសំខាន់ គឺថាការបង្រៀនត្រូវតែឲ្យចេះពិតប្រាកដ ក្នុងកម្រិតមួយដែលអាចយកទៅអនុវត្ត និងប្រើប្រាស់បានជាក់ស្តែង ដើម្បីលុបបំបាត់នូវភាពល្ងង់ខ្លៅ ក៏ដូចជាអនក្ខរភា ព។ ជាក់ស្តែង «មនុស្សចេះ គឺមិនល្ងង់ មិនឲ្យគេធ្វើបាប មិនរងសម្ពាធ ហើយក្លាហាន ជាហេតុមិនឲ្យគេមើលងាយ ហើយក៏មានទំនុកចិត្ត និងហ៊ានប្រឡូកក្នុងសង្គមប្រកបដោយជោគជ័យ» ។ ហេលស៍ថាម ៖ តើលោកឧកញ៉ាមានសារអ្វីខ្លះចែកជូនដល់យុវជនជំនាន់ក្រោយ? ជាចម្បង ត្រូវដឹងថាខ្លួនជានរណា? កំពុងធ្វើអ្វី? ហើយអ្វីដែលធ្វើមានសារសំខាន់អ្វីខ្លះ? បន្ទាប់មក ចាំបាច់ត្រូវរៀបចំផែនការឲ្យបានច្បាស់លាស់ អនុវត្ត តាមដាន កែប្រែ និងអភិវឌ្ឍ ព្រមទាំងរៀបចំឡើងវិញដោយធ្វើកា រដឹកនាំខ្លួនឯងឲ្យបានថ្លៃថ្លា ដឹកនាំគ្រួសារឲ្យបានត្រជា ក់ត្រជុំ ដើម្បីជាទុនក្នុងការដឹកនាំគ្រួសារ និងសង្គមជាតិឲ្យមានការរីកចម្រើន។ យ៉ាងណាមិញក្នុងជីវិតម្នាក់ៗមិនអាចចៀសវាងនូវកំហុសនោះទេ តែបើខុស ត្រូវចេះទទួលស្គាល់កំហុស និងកែប្រែឡើងវិញ។ រាល់ពេល មុននឹងនិយាយទិតៀនអ្នកដទៃ ត្រូវសួរខ្លួនឯងសិនថា តើចាំបាច់ឬទេ? មានប្រយោជន៍ទេ? ព្រោះថា «សម្តីមួយម៉ាត់សម្លាប់គេមួយជីវិត»។ អ្វីដែលរឹតតែមិនអាចខ្វះបាននោះ គឺភាសា៧ ដែលរួមមាន ភាសាជាតិ ភាសាសាកល(អង់គ្លេស ) ភាសាបច្ចេកវិទ្យា ភាសាបច្ចេកទេស ឬជំនាញរបស់ខ្លួន ភាសាទំនាក់ទំនង ឬការទូត ភាសាកាយវិការ (Body Language) និងភាសាអាស៊ាន (វប្បធម៌)។ បន្ថែមពីលើជំនាញដែលសិក្សា ជំនាញទន់ និងអត្តចរិតឫកពាក៏សំខាន់ណាស់ដែរ ជាក់ស្តែង គឺចៀសវាងនូវការប្រកា ន់ឫកឬ ចង្អៀតចង្អល់ ហើយគួរតែកុំលាក់ចំណេះ កុំត្រែះគំនិត បើកចំហបេះដូង ដើម្បីទទួលយកនូវគំនិតថ្មីរបស់អ្នកដទៃ។ ចូរចងចាំជានិច្ចថា ត្រូវខិតខំរៀនសូត្រ ឲ្យចំណេះដឹងបានដូច«បឹងពោរពេញដោយត្រី ស្រីពោរពេញដោយប្រុស សម្រ ស់ពោ រពេញដោយស្នេហ៍» ហើយការដើរលេងនៅក្រៅប្រទេសក៏បន្ថែមនូវចំណេះដឹងសកល ដែលនាំឲ្យបានស្គាល់ និងស្វែងយល់ពីពិភពលោកខាងក្រៅនោះ គឺជាឱកាសក្នុងការនាំអនាគតមកកាន់បច្ចុប្បន្នសម្រាប់សង្គមកម្ពុចាឲ្យកាន់តែខ្ពស់ជាងមុនដែរ។ ជាចុងក្រោយ គ្រប់ពេលដែលជួបប្រទះនឹងបញ្ហាសូមកុំមើលរំលងវា តែតូ្រវ «មើលបញ្ហា ឲ្យឃើញជាបញ្ហា ទើបយើងមិនមានបញ្ហា» ។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education
Share
  • Jan 15, 2017 |
  • 7 years ago |
  • 26.2K views

ជាសិស្សក៏អាចកសាងកេរ្ត៍ឈ្មោះបានដែរ…

ចង់មានកិត្តិនាមល្អក្នុងអំឡុងពេលជាសិស្សដែរឬទេ? ជាការពិតណាស់ ការសិក្សាបានលទ្ធផលល្អជាកូនសោរដឹកនាំជីវិតអ្នកឲ្យជួបតែភាពជោគជ័យនៅពេលអនាគត យ៉ាងណាមិញតើអ្នកបានដឹងទេថាការមានការសិក្សាជោគជ័យ ប៉ុន្តែពុំមានគោលដៅ និងអត្តចរិតមិនសមប្រកបអាចធ្វើឲ្យអ្នកបាត់បង់អ្វីដែលជាការប៉ងប្រាថ្នា? លោកសាស្រ្តាចារ្យ អៀង រ័ត្នមុនី ដែលលោកកំពុងបម្រើការនៅសាកលវិទ្យាល័យវិទ្យាសាស្រ្តសុខាភិបាលបានផ្តល់ជាបទពិសោធន៍ និងដំបូន្មានល្អៗសម្រាប់ចែកជូនដល់សិស្សានុសិស្សក៏ដូចជាអ្នកអាន ដើម្បីជាទុនក្នុងការអភិរឌ្ឍខ្លួនឲ្យក្លាយជាអ្នកមានកេរ្ត៍ឈ្មោះល្អប្រសើរក្នុងសង្គមដែលខ្លួនកំពុងតែរស់នៅ។ ប្រវត្តិសិក្សា និងការងារ ខ្ញុំជាអតីតនិស្សិតអាហារូបករណ៍ថ្នាក់បរិញ្ញាបត្រឱសថសាស្រ្តនៅសាកលវិទ្យាល័យវិទ្យាសាស្រ្តសុខាភិបាល(ស.វ.ស) រួចក៏បានបន្តសិក្សាថ្នាក់ឱសថបណ្ឌិតនៅស.វ.សដដែល មុននឹងមានឱកាសបន្តការសិក្សាថ្នាក់បណ្ឌិតវិទ្យាសាស្រ្តឯកទេសឱសថវិទ្យានៅសាកលវិទ្យាល័យ Paul Sabatier (Toulouse III) នៃសាធារណរដ្ឋបារាំង ។ សព្វថ្ងៃ ខ្ញុំជាព្រឹទ្ធបុរសរងមហាវិទ្យាល័យឱសថសាស្រ្តនៃស.វ.ស និង ជាប្រធានផ្នែកកិច្ចការនិស្សិតស.វ.ស ដែលជាដៃគូសហការជាមួយគ្រប់មហាវិទ្យាល័យ/សាលា/ផ្នែកពាក់ព័ន្ធនានារបស់ស.វ.ស។ គួររំឮកផងដែរ ខ្ញុំក៏ជាបុគ្គលិកកិច្ចសន្យាក្នុងការិយាល័យសិក្សា និងជាគ្រូជាប់កិច្ចសន្យាបង្រៀនមុខវិជ្ជាសរីរៈវិទ្យា និងឱសថវិទ្យា។ អ្វីដែលធ្វើឲ្យមហាជន ជាពិសេសសិស្សានុសិស្សចាប់ផ្តើមស្គាល់លោកសាស្រ្តាចារ្យ ខ្ញុំផ្ទាល់មិនអាចដឹងថានិស្សិតចាប់ផ្តើមស្គាល់ខ្ញុំពីពេលណាមកទេ តែខ្ញុំយល់ថានិស្សិតបានស្គាល់ខ្ញុំតាមរយៈសកម្មភាពរបស់ផ្នែកកិច្ចការនិស្សិតស.វ.ស និងផ្នែកកិច្ចការនិស្សិតនៅតាមមហាវិទ្យាល័យ/សាលា/ផ្នែក ក៏ដូចជាសកម្មភាពផ្សេងៗរបស់ស.វ.ស ដែលរួមមានដូចជា វគ្គបំប៉នជំនាញខ្លីៗស.វ.ស សិក្ខាសាលាជំនួយស្មារតី ការប្រកួតដេញដោលមតិរបស់និស្សិត ការងារស្រាវជ្រាវរបស់និស្សិតស.វ.ស កម្មវិធីសប្បុរសធម៌ស.វ.ស និងសកម្មភាពកីឡានិស្សិតជាដើម ជាពិសេសតាមរយៈការគាំទ្ររបស់គ្រប់ផ្នែកពាក់ព័ន្ធក្នុងការជួយដោះស្រាយបញ្ហានានារបស់និស្សិតទាំងក្នុងពេលសិក្សានៅស.វ.ស និងទាំងបញ្ចប់ការសិក្សាផងដែរ។ កត្តាធ្វើឲ្យមានកិត្តិនាមយ៉ាងល្បីល្បាញនៅក្នុងស្រទាប់សិស្សនិស្សិត ខ្ញុំមិនមានភាពល្បីល្បាញអ្វីគួរឲ្យគត់សម្គាល់ទេ ប៉ុន្តែមន្រ្តីរាជការ បុគ្គលិក និងនិស្សិតដែលបានស្គាល់ខ្ញុំ គឺដោយសារតែខ្ញុំមានឱកាសក្នុងការបង្រៀន និងការបំពេញការងារយ៉ាងប្រកៀកជាមួយគ្រប់ផ្នែកពាក់ព័ន្ធទាំងអស់របស់សាកលវិទ្យាល័យ និងក្នុងសង្គមចាប់ពីកម្មករ និស្សិតរហូតដល់ថ្នាក់ដឹកនាំផងដែរ។ ជាពិសេស ខ្ញុំមានការសហការគ្នាយ៉ាងជិតស្និទ្ធជាមួយសមាគមនិស្សិតស.វ.ស និងដោយសារមានការគាំទ្រពីគ្រប់ផ្នែកពាក់ព័ន្ធក្នុងការបំពេញភារកិច្ចរបស់ខ្ញុំខាងលើនេះ ហើយទើបខ្ញុំមានឱកាសបានស្គាល់និស្សិតជាច្រើនមកដល់ពេលនេះ។ លក្ខណៈសម្បត្តិនៃបុគ្គលគម្រូ ជាទូទៅ ខ្ញុំខិតខំបំពេញភារកិច្ចអស់ពីសមត្ថភាពដែលខ្ញុំមានដោយសហការជាមួយគ្រប់ផ្នែកពាក់ព័ន្ធ ទាំងមន្រ្តីបុគ្គលិកក្រោមបង្គាប់ និងទាំងថ្នាក់ដឹកនាំ ដើម្បីទទួលបានលទ្ធផលតាមផែនការសកម្មភាពនានារបស់មហាវិទ្យាល័យ និងផ្នែកដែលសាកលវិទ្យាល័យបានកំណត់ តួយ៉ាង គ្រប់ពេលវេលាខ្ញុំតែងតែខិតខំអនុវត្តភារកិច្ចឲ្យអស់ពីសមត្ថភាព ផ្តល់តម្លៃលើការសិក្សាបន្ត ឧត្តមភាព និង គុណភាព ប្រតិបត្តិការងារប្រកបដោយគណនេយ្យភាព តម្លាភាព វិជ្ជាជីវៈ ប្រកបដោយភាពទទួលខុសត្រូវតាមឋានៈ និង ភារកិច្ច គោរពគ្នាទៅវិញទៅមកតាមឋានានុក្រម និង ភាពថ្លៃថ្នូរ លើកកម្ពស់គំនិតច្នៃប្រឌិត លើកកម្ពស់ស្មារតីការងារជាក្រុម លើកកម្ពស់គោលការណ៍លើកទឹកចិត្តតាមលទ្ធផលការងារ និងលើកកម្ពស់ភាពជាដៃគូ។ ការកសាងកិត្តិនាមក្នុងនាមជាសិស្ស និស្សិត គឺជាយុវជនរបស់សង្គមដែលជាអ្នកបន្តវេនក្នុងពេលអនាគត ចំណែកការវិនិយោគលើយុវជន គឺជាការវិនិយោគសម្រាប់អនាគតរបស់ប្រទេសជាតិយើង ហើយការវិនិយោគដែលមានសារៈសំខាន់បំផុត គឺការអប់រំ។ ហេតុនេះ និស្សិតត្រូវយកចិត្តទុកដាក់សំខាន់បំផុត ដើម្បីទទួលបាននូវការអប់រំទាំងក្នុង និងក្រៅកម្មវិធីសិក្សាប្រកបដោយគុណភាពលើចំណេះដឹង ជំនាញ និងឥរិយាបថ ដើម្បីផ្តល់សេវាប្រកបដោយការទុកចិត្តដល់ប្រជាជនយើង។ ភាពជោគជ័យក្នុងការអប់រំ គឺជារង្វាស់ជោគជ័យ និងអាចកសាងកិត្តិនាមនៃជីវិតនិស្សិតជាយុវជនម្នាក់ៗ។ គុណប្រយោជន៍ក្នុងការកសាងកេរ្តិ៍ឈ្មោះ ការកសាងឈ្មោះរបស់និស្សិតស្តែងចេញពីភាពជោគជ័យក្នុងការសិក្សារបស់ខ្លួន។ នៅពេលដែលនិស្សិតមានភាពជោគជ័យ វាមានសារៈសំខាន់ជាសាកល ពោលគឺ ជោគជ័យរបស់និស្សិតផ្ទាល់ ជាជោគជ័យរបស់ក្រុមគ្រួសារនិស្សិត ជាជោគជ័យរបស់សាកលវិទ្យាល័យ ជាជោគជ័យនៃការងារបណ្តុះបណ្តាលជារួមរបស់សង្គមយើង និងជាជោគជ័យរបស់ប្រទេសជាតិយើងផងដែរ។ ភាពខ្លាំងនៃ Brand របស់បុគ្គល យោងតាមបទពិសោធន៍ជីវិតជិត៤០ឆ្នាំរបស់ខ្ញុំ  ខ្ញុំយល់ថាគ្រប់អ្នកដែលមានជោគជ័យក្នុងជីវិតតែងមានផែនការក្នុងជីវិតរបស់ពួកគាត់ក្នុងការបំពេញភារកិច្ចទើបឱកាសនៃការទទួលជោគជ័យមានខ្ពស់។ ជាសង្ខេប និស្សិតម្នាក់ៗត្រូវស្គាល់សំណួរ៤យ៉ាងសាមញ្ញ និងចេះដោះស្រាយសំណួរទាំង៤នោះដើម្បីទទួលបានជោគជ័យតាមតម្រូវការរបស់ខ្លួន៖ ១.តើយើងនៅទីណា? ២.តើគោលដៅខ្លី និងវែងរបស់យើងជាអ្វី? ៣.តើយើងធ្វើដូចម្តេចទើបបានទៅដល់គោលដៅដែលបានកំណត់នោះដោយមិនបៀតបៀនអ្នកដទៃ? ៤.តើយើងធ្វើម្តេច ដើម្បីដឹងថាយើងទៅដល់គោលដៅនោះ?”។ ប្រសិនបើនិស្សិតម្នាក់ៗគ្រាន់តែស្គាល់ វាមិនទាន់គ្រប់គ្រាន់ទេ តែសូមឲ្យនិស្សិតនោះចាប់ផ្តើមជាសកម្មភាពតែម្តងដោយមិនចាំថ្ងៃស្អែករួមជាមួយភាពអត់ធ្មត់ និងការលះបង់។ សារចុងក្រោយសម្រាប់មិត្តអ្នកអាន ខ្ញុំសូមផ្តាំដល់មិត្តអ្នកអានក៏ដូចជានិស្សិតជំនាន់ក្រោយនូវចំណុចចំនួន៣ដែលកំណត់អនាគតយើងម្នាក់ៗក្នុងការសម្រេចគោលដៅរបស់យើងដោយមិនបៀតបៀនអ្នកដទៃ៖ សមត្ថភាពរបស់ខ្លួនយើងផ្ទាល់ ៖ ប្រសិនបើមិនមានសមត្ថភាពទេ គឺមានន័យថាយើងពឹងច្រមុះអ្នកដទៃសម្រាប់ដកដង្ហើមរហូត។ ឱកាសដែលអ្នកដទៃជុំវិញខ្លួនផ្តល់ឲ្យ ៖ ទោះបីយើងមានសមត្ថភាពប៉ុណ្ណាក៏ដោយ តែបើយើងជាមនុស្សដែលគ្មានគុណធម៌ចំពោះអ្នកដទៃ នោះយើងនឹងមិនមានឱកាសក្នុងការកសាងខ្លួនយើងតាមផែនការកំណត់នោះទេ។ លទ្ធភាព ៖ ប្រសិនបើយើងជាបុគ្គលបានទទួលការជោគជ័យហើយ កុំភ្លេចបែរក្រោយចែករំលែកសមត្ថភាព ឱកាស  និងលទ្ធភាពដល់យុវជនជំនាន់ក្រោយយើងផង ដើម្បីភាពជោគជ័យនៃសង្គមទាំងមូលរបស់យើងទាំងអស់គ្នា។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education
Share
Top