Articles

Feb 07, 2017 |
7 years ago |
5.9K views

អាចប្រើបានហើយ! ប្រព័ន្ធពង្រឹងសមត្ថភាព និងតេស្តសមត្ថភាពដោយខ្លួនឯងសម្រាប់សិស្សថ្នាក់ទី១២

ការដាក់ឲ្យដំណើរការប្រព័ន្ធពង្រឹងសមត្ថភាព និងតេស្តសមត្ថភាពដោយខ្លួនឯងសម្រាប់សិស្សថ្នាក់ទី១២ លើប្រព័ន្ធអ៊ីនធើណែត ក្រសួងអប់រំ យុវជន និងកីឡា មានកិត្តិយស សូមជម្រាបជូនសាធារណជន ពិសេសសិស្សានុសិស្សថ្នាក់ទី១២ មេត្តាជ្រាបថា៖ លើមូលដ្ឋាននៃការអនុវត្តកំណែទម្រង់ក្នុងវិស័យអប់រំ យុវជន និងកីឡា តាមរយៈការបង្កើនគុណភាពការបង្រៀន និងការរៀន ក្រសួងបានបង្កើតប្រព័ន្ធសិក្សាពីចម្ងាយ (E-Learning Management System) ដែលអនុញ្ញាតឲ្យសិស្សានុសិស្សថ្នាក់ទី១២ ប្រើប្រាស់ពេលវេលាទំនេរពីការសិក្សាក្នុងថ្នាក់ ដើម្បីឆ្លើយសំណួរ ឬធ្វើលំហាត់លើមុខវិទ្យា គណិតវិទ្យា រូបវិទ្យា គីមីវិទ្យា ជីវវិទ្យា និង ប្រវត្តិវិទ្យា តាមប្រព័ន្ធអនឡាញ (On-line) ដោយអាចប្រើប្រាស់ ទូរស័ព្ទស្មាតហ្វូន Tablet ឬកុំព្យូទ័រ ។ ប្រព័ន្ធនេះនឹងជួយពង្រឹងសមត្ថភាពរបស់សិស្សានុសិស្ស មួយកម្រិតថែមទៀត លើចំណេះដឹងដែលទទួលបានពីលោកគ្រូ អ្នកគ្រូនៅក្នុងថ្នាក់រៀន។ ក្រសួងអប់រំ យុវជន និងកីឡា នឹងប្រកាសដាក់ឲ្យប្រើប្រាស់ជាផ្លូវការនៅថ្ងៃទី១៣ ខែកុម្ភៈ ឆ្នាំ២០១៧ នៅទីស្តីការក្រសួងអប់រំ យុវជន និងកីឡា វេលាម៉ោង 0៨:០០ នាទី ព្រឹក។ បន្ទាប់ពីការដាក់ឲ្យប្រើប្រាស់ជាផ្លូវការ សិស្សានុសិស្សអាចអនុវត្តកម្មវិធីនេះបានតាមរយៈតំណភ្ជាប់នៅលើគេហទំព័រក្រសួង: http://bacii.moeys.gov.kh ។ សម្គាល់៖ រាល់លំហាត់ និងសំនួរទាំងនេះគឺសម្រាប់ឲ្យសិស្សានុសិស្សអនុវត្តការវាស់ស្ទង់សម្ថភាពខ្លូនឯងនិងការពង្រឹងសម្ថភាពលើមុខវិជ្ជា ដែលមានក្នុងប្រព័ន្ធនេះ។ លំហាត់ និងសំនួរទាំងនេះមិនត្រូវបានប្រើប្រាស់ក្នុងគោលបំណងផ្សេងឡើយ។ #BacII #BacII2017 ::គេហទំព័រ៖ www.moeys.gov.kh ::បណ្ដាញសង្គម៖ facebook.com/moeys.gov.kh | google.com/+moeys | twitter.com/moeyscambodia ::ទំព័រធនធានអប់រំ៖ http://oer.moeys.gov.kh/ | www.krou.moeys.gov.kh | facebook.com/krou.moeys.gov.kh ::បណ្ដាញ YouTube៖ www.youtube.com/moeyscambodia

News & Events

Share

Feb 07, 2017 |
7 years ago |
5K views

ទីក្រុងឈ្មោះវែងបំផុត លើពិភពលោក

តើអ្នកដឹងទេ? ទីក្រុងបាងកក នៃព្រះរាជាណាចក្រថៃ ជាទីក្រុង ដែលមានឈ្មោះវែងបំផុត លើពិភពលោក។ ឈ្មោះផ្លូវការសព្វថ្ងៃគឺ៖ «ក្រុងទេពមហានគរ អមររ័តនកោសិន្ទ្រ៍ មហិន្ទ្រាយុធ្យា មហាតិលកភព នពរ័តនរាជធានីបូរីរម្យ៍ ឧត្តមរាជនិវេសន៍មហាស្ថាន អមរពិមានអវតារស្ថិត ស័ក្កៈទ័ត្តិយវិស្ណុកម្មប្រៈសិទ្ធិ៍» (กรุงเทพมหานคร อมรรัตนโกสินทร์ มหินทรายุธยา มหาดิลกภพ นพรัตนราชธานีบูรีรมย์ อุดมราชนิเวศน์มหาสถาน อมรพิมานอวตารสถิต สักกะทัตติยวิษณุกรรมประสิทธิ์)។ យោងតាមពង្សាវតារសម័យឰយុធ្យា ក្រុងបាងកក មានឈ្មោះថា «ធនបុរីស្រីមហាសមុទ្រ» (ธนบุรีศรีมหาสมุทร)។ ពេលដែល ព្រះបាទសម្ដេច ព្រះបរមោរុរាជាមហាច័ក្រីបរមនាថ៌ ព្រះពុទ្ធយ៉តហ្វាចុឡាលោក (រាមាទី១ នៃរាជវង្សចក្រី) បានលើករាជធានី មកជ្រោយខាងកើតទន្លេ ទីក្រុងនេះ បានរក្សាឈ្មោះឰយុធ្យា ដោយមានឈ្មោះមួយចំនួន ដូចជា «ក្រុងទេពទ្វារវតីស្រីអយុធ្យា» (กรุงเทพทวารวดีศรีอยุธยา) និង «ក្រុងទេពមហានគរស្រីអយុធ្យា» (กรุงเทพมหานครศรีอยุธยา)។ ចាប់ពីរជ្ជកាល ព្រះបាទសម្ដេចព្រះបរមេន្ទ្រមហាមង្កុដ ព្រះចមក្លៅចៅយូហួ (រាមាទី៤ នៃរាជវង្សចក្រី) ទីក្រុងបាងកក ក៏បានប្ដូរឈ្មោះផ្លូវការ ដូចសព្វថ្ងៃ ដោយសរសេរកាត់ថា «ក្រុងទេពមហានគរ» (អានថា គ្រង់ថេបម៉ៈហាណៈខន) ឬ «ក្រុងទេព។» (กรุงเทพฯ)។ ស្រដៀងគ្នាដែរ តាមព្រះរាជពង្សាវតារប្រទេសកម្ពុជា នៅ គ.ស. ១៤៣៤ ព្រះបាទពញាយ៉ាត (អានថា ព្ញា-យ៉ាត មិនមែន ពញ់-ញា-យ៉ាត នោះទេ) ទ្រង់យាងចេញចាកចោល ព្រះរាជវាំងបាសាណ នៅខែត្រស្រីសន្ធរ មកតាំងព្រះរាជវាំង នៅទិសអាគ្នេយ៍ នៃភ្នំដូនពេញ ដោយទ្រង់បានសន្មត តាំងគោរមនាម ព្រះនគរជាផ្លូវការថា៖ «ក្រុងចតុម្មុខមង្គលសកលកម្ពុជាធិបតីសិរីសោធរ បវរឥន្ទបត្តបុរីរដ្ឋរាជសីមាមហានគរ» រីឯឈ្មោះទន្លេច្រាបឈាម ទ្រង់បានបញ្ញត្តឲ្យហៅថា «ទន្លេចតុម្មុខ» វិញ។ លុះមកដល់ គ.ស. ១៤៣៧ នៅពេលដែល ធ្វើសម្ពោធក្រុងនេះ ព្រមទាំងធ្វើ ព្រះរាជពិធីរាជាភិសេក ថ្វាយព្រះនាមទ្រង់ ជាថ្មីផងនោះ ព្រះអង្គក៏បាន ឲ្យសន្មតនាមក្រុង ជាថ្មីម្ដងទៀត ដោយថែមពាក្យ «ភ្នំដូនពេញ» មកទៀត តែឲ្យខ្លីជាងមុនថា «ក្រុងចតុម្មុខមហានគរភ្នំដូនពេញ» ដូច្នោះវិញ ដើម្បីកុំឲ្យបាត់ឈ្មោះ និង កេរ្តិ៍ដំណែលរបស់ដូនពេញ ដែលក្រោយតមក គេហៅកាត់ខ្លីត្រឹមតែ «ភ្នំពេញ» ដរាបមកដល់សព្វថ្ងៃ៕

My Diary

Share

Feb 07, 2017 |
7 years ago |
4.3K views

តោះ!ធ្វើតេស្ត«សុខភាពសក់»ជាមួយវេជ្ជបណ្ឌិត Anna Roslyakova

ការចាំងត្រូវថ្ងៃអាហារដែលមិនល្អដល់សុខភាព ធូលីដី ការប្រើប្រាស់ផលិតផលសក់ច្រើនពេក និងកត្តាតំណពូជ បណ្តាលឲ្យសក់របស់អ្នកជ្រុះ។ ជាច្រើនលើកច្រើនដង មនុស្សភាគច្រើនយល់ថាសក់របស់ខ្លួនមានសុខភាពល្អ ដោយមិនបានគិតថាសក់របស់ពួកគាត់ចាប់ផ្តើមរលោះបន្តិចម្តងៗនោះទេ។ វេជ្ជបណ្ឌិត Anna Roslyakova ណែនាំថា វា ជារឿងសំខាន់ដែលអ្នកចាំបាច់ត្រូវធ្វើការវាយតម្លៃពីសុខភាពសក់របស់អ្នកគ្រប់ពេល។ ឆ្លើយនឹងកម្រងសំណួរខាងក្រោម និងវាយតម្លៃពីស្ថានភាពសុខភាពសក់អ្នកដែលបង្ហាញពីសម្ផស្សរបស់អ្នក។ ១. តើអ្នកអាយុប៉ុន្មាន? ក. ក្មេងជាង ១៨ឆ្នាំ ខ. អាយុចន្លោះពី ១៨ទៅ៣០ឆ្នាំ គ. ច្រើនជាង ៣០ឆ្នាំ ២. ភេទ៖ ក. ស្រី ខ.ប្រុស ៣. តើអ្នកមានសក់ប្រភេទណា? ក. សក់ធម្មតា ខ. សក់ស្ងួត គ. សក់ប្រេង ៤. តើសក់អ្នកមានសភាពដូចម្តេច? ក. សក់ត្រង់ ខ. សក់ទឹករលក គ. សក់រួញ ៥. តើអ្នកផ្លុំសក់ឲ្យស្ងួត ឬកៀបត្រង់ ឬកៀបឲ្យរួញ ញឹកញាប់ប៉ុណ្ណា? ក. មួយខែម្តង ខ. ២ដងក្នុងមួយខែ គ. រៀងរាល់ថ្ងៃ ៦. តើអ្នកកាត់សក់ញឹកញាប់ប៉ុណ្ណា? ក. រៀងរាល់៦ខែម្តង ខ. ២ ឬ៣ដងក្នុងមួយមួយឆ្នាំ គ. មិនដែល ៧. ដាក់ទឹកក្នុងចានដែក ហើយទម្លាក់សក់អ្នកចូលក្នុងទឹកនោះ។ ពិនិត្យមើលថាតើសក់អ្នកមានសភាពបែបណា? ក. អណ្តែត ខ. លិចចូលក្នុងទឹក ៨. យកម្រាមដៃអ្នកច្បូតសក់? តើអ្នកមានអារម្មណ៍ថាវាល្មមឬក៏ក្រាស់? ក. ក្រាស់ ខ. ស្តើង គ. ល្មម ៩. តើរយៈពេលប៉ុន្មាន ថ្ងៃទើបសក់អ្នកឡើងប្រេង? ក. ៣ទៅ៤ថ្ងៃ ខ. ១ទៅ២ថ្ងៃ គ. មិនដល់១ថ្ងៃផង ១០. តើអ្នកលាបសក់ ឬប្រើសារធាតុគីមីផ្សេងទៀតទេ? ក. ទេ ខ. ប្រើ ១១. តើអ្នកឧស្សាហ៍ស្រេ្តសទេ? ក. ទេ ខ. ចាស/បាទ គ. ខ្លះដែរ ១២. តើអ្នកផឹកទឹកប៉ុន្មានកែវក្នុងមួយថ្ងៃ? ក. ៦ទៅ៨កែវ ខ. ៣ទៅ៥កែវ គ. ១ទៅ២កែវ លទ្ធផល ចម្លើយភាគច្រើន ក៖ សក់របស់អ្នកមានសុខភាពល្អ ហើយអ្នកមិនចាំបាច់ព្រួយបារម្ភពីវាទេ។ គ្រាន់តែថែទាំសក់អ្នកដូចអ្វីដែលអ្នកធ្លាប់ធ្វើ និងទុកឲ្យសក់អ្នកភ្លឺរលោងដូចធម្មតាចុះ។ ចម្លើយភាគច្រើន ខ៖ សក់អ្នកល្អភាគច្រើន។ មើលថែសក់អ្នកច្រើនជាងធម្មតាបន្តិច អាចឲ្យវាកាន់តែរឹងមាំ។ កុំឧស្សាហ៍កក់សក់ លាបពណ៌សក់ ឬអ៊ុតសក់ពេក។ ឧស្សាហ៍តម្រឹមសក់អ្នក ដើម្បីឲ្យវាដុះកាន់តែល្អ។ ទុកឲ្យសក់អ្នកលូតលាស់ខ្លួនឯងព្រោះមិនមានការបញ្ជាក់ច្បាស់លាស់ទេ។ ចម្លើយភាគច្រើន គ៖ សក់របស់អ្នកត្រូវការការយកចិត្តទុកដាក់ពីអ្នក។ បន្ថយការប្រើប្រាស់ផលិតផលលើសក់។ ផ្តល់សំណើមដល់សក់អ្នក។ មិនត្រូវកៀបសក់ ឬធ្វើអ្វីផ្សេងដែលឲ្យសក់អ្នកប៉ះកំដៅទេ តែបើអ្នកមិនអាចចៀសបានទេនោះ ប្រើសេរ៉ូមការពារកំដៅមុននឹងធ្វើវា។ ទុកពេលឲ្យសក់អ្នកដកដង្ហើមផង។ អ្នកអាចប្រើប្រេងបន្ទន់ធម្មជាតិធ្វើពីទឹកឃ្មុំ ស៊ុត ទឹកដោះគោជូ ដើម្បីចិញ្ចឹមសក់អ្នក និងថ្នមសក់អ្នកឲ្យមានសុខភាពល្អវិញ។ ©2017រក្សាសិទ្ធិគ្រប់យ៉ាងដោយHealthtime Corporationចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Skin, STD & Beauty

Share

Feb 07, 2017 |
7 years ago |
8.3K views

ស្វែងយល់ពីការងារក្នុងមន្ទីរពិសោធន៍

ការងារក្នុងមន្ទីរពិសោធន៍មិនមែនជាការងារមួយងាយស្រួលនោះឡើយ ដែលចំណេះដឹងពីសាលារៀនមិនអាចគ្រប់គ្រាន់នោះទេ។ ដើម្បីជាការចែករំលែកនូវបទពិសោធន៍ការងារកន្លងមក ហេលស៍ថាម ក៏បានជួបផ្ទាល់ជាមួយនឹងលោកស្រីឱសថបណ្ឌិតឯកទេសវេជ្ជសាស្រ្ត តោ ពើទី ស្ថាបនិកនៃ«មន្ទីរពិសោធន៍វេជ្ជសាស្រ្តស្តង់ដារអន្តរជាតិ» ដែលបានបន្តការសិក្សានៅរាជធានីភ្នំពេញ និងទទួលបានសញ្ញាបត្រឱសថការីឧត្តមនៅសាកលវិទ្យាល័យវិទ្យាសាស្រ្តសុខាភិបាល មុននឹងបម្រើការងារជាអ្នកគ្រប់គ្រងមន្ទីរពិសោធន៍លោហិតសាស្រ្តគីមីជីវសាស្រ្ត និងអ៊ីមុយណូសេរ៉ូមសាស្រ្ត នៅវិទ្យាស្ថានប៉ាស្ទ័រ។ ក្នុងអំឡុងពេលធ្វើការ លោកស្រីក៏ត្រូវបានលើកទឹកចិត្តឲ្យរៀនបន្តថា្នក់ឯកទេសជីវវេជ្ជសាស្រ្តក្នុងឆ្នាំ 2011 ហើយដល់ឆ្នាំ 2014 ក៏បានជាប់អាហារូបករណ៍ Erasmus Mundus ទៅសិក្សាថ្នាក់អនុបណ្ឌិតរយៈពេល 10 ខែផ្នែកស្រាវជ្រាវលើជំងឺគ្រុនចាញ់នៅក្នុងក្រុងទូឡូស ប្រទេសបារាំង។ លក្ខណៈសម្បត្តិដែល បុគ្គលិកបម្រើការងារក្នុង Lab មួយរូបគួរតែមាន • ភាពម៉ត់ចត់ក្នុងការងារមានភាពច្បាស់លាស់មានទំនួលខុសត្រូវ និងមាន Master Plan ៖ ការផ្តល់លទ្ធផលវិភាគវេជ្ជសាស្រ្តដែលមានគុណភាពត្រឹមត្រូវ នឹងឆ្លើយតបទៅនឹងស្ថានភាពពិតប្រាកដរបស់អ្នកជំងឺ អាចជួយឲ្យអ្នកជំងឺទទួលបានការព្យាបាល និងថែទាំត្រឹមត្រូវ និងអាចចំណេញពេលវេលា និងថវិកា។ • មានឆន្ទៈក្នុងការរៀនបន្ថែម ៖ វិទ្យាសាស្រ្តមានការរីកចម្រើន ការស្រាវជ្រាវថ្មីៗមានបន្តជាហូរហែដើម្បីឲ្យការប្រតិបត្តិសព្វថ្ងៃកាន់តែមានប្រសិទ្ធភាព និងមានភាពឆាប់រហ័សជាងមុន។ល។ យើងត្រូវបន្តរៀនសូត្រ និងខិតខំស្វែងយល់អំពីរបកគំហើញថ្មីៗដើម្បីឲ្យមានគំនិតក្នុងការរកមធ្យោបាយអភិវឌ្ឍខ្លួនឯង។ • ចំណេះដឹងភាសាអង់គ្លេស និងបើអាចភាសាបារាំង ៖ ឯកសារជាច្រើននៅក្នុងវិស័យសុខាភិបាល ឬក៏របកគំហើញថ្មីៗត្រូវបានសរសេរជាភាសាអង់គ្លេស ឬបារាំង ហើយក៏អាចជួយយើងឲ្យមានឱកាសទៅសិក្សានៅក្រៅប្រទេសថែមទៀត។ • សីលធម៌ និងចេះរក្សាការសម្ងាត់ជូនអ្នកជំងឺ ៖ ត្រូវគិតទៅលើផលប្រយោជន៍របស់អ្នកជំងឺជាធំ និងត្រូវចេះរក្សារាល់ការសម្ងាត់របស់គាត់។ អ្វីគួរត្រៀម សម្រាប់អ្នកដែលចង់បើកដំណើរការ Lab នាពេលអនាគត • មានគម្រោងអាជីវកម្មមួយច្បាស់លាស់ និងលម្អិត • ចាប់ដៃគូសហការដែលមានឥទ្ធិពល និងមានចក្ខុវិស័យដូចគ្នា • មានចំណេះដឹងពិតប្រាកដ និងច្បាស់លាស់។ យើងគួរតែខិតខំសិក្សាបន្ថែមឲ្យបានច្រើនឲ្យទាន់ការវិវឌ្ឍន៍របស់វិទ្យាសាស្រ្តសម័យបច្ចុប្បន្ន។ ភាពលំបាកនៃការចាប់ផ្តើមការងារដំបូងនៅក្នុងមន្ទីរពិសោធន៍ (Lab) • ការគ្រប់គ្រងបុគ្គលិកត្រូវមើលថារាល់លទ្ធផលវិភាគវេជ្ជសាស្រ្តដែលពួកគេធ្វើត្រូវតែត្រឹមត្រូវ និងមានគុណភាព។ • ចំណេះដឹងផ្នែកបច្ចេកទេសនៅពេលដែលមានលទ្ធផលវិភាគរបស់អ្នក ជំងឺដែលខុសប្រក្រតីខ្លាំងគឺត្រូវទាក់ទងជាមួយគ្រូពេទ្យព្យាបាល ដើម្បីសួរនាំ និងផ្តល់ជាដំណឹង។ ដើម្បីឲ្យការពិភាក្សាកាន់តែមានប្រសិទ្ធភាព តម្រូវឲ្យមានចំណេះដឹងទូលំទូលាយ និងច្បាស់លាស់។ • ការរកទីតាំងមួយដែលសមស្របសម្រាប់ប្រកបអាជីវកម្ម ។ • ផ្តល់សេវាកម្មមួយដែលមានគុណភាពប៉ុន្តែប្រឈមនឹងការកំណត់តម្លៃឲ្យបានសមស្របទៅតាមកម្រិតជីវភាពនៃប្រជាជនខ្មែរយើងភាគច្រើនទាំងនៅក្នុងទីក្រុង និងជនបទ ។ • ចំនួនបុគ្គលិកមានកំណត់ រីឯការងារដែលត្រូវចាប់ផ្តើមមានច្រើនជាហេតុធ្វើឲ្យការរៀបចំពេល និងរបៀបរៀបរយនៃការធ្វើការងារពុំទាន់បានសុក្រឹតល្អនៅក្នុងដំណាក់កាលដំបូងនេះ។ កត្តាដែលជួយជម្រុញឲ្យបាននូវឱកាសកន្លងមក គឺបណ្តាលមកពីការចាប់យកឱកាសការងារល្អៗដោយហ៊ានសាកល្បងនូវរាល់ការងារនៅចំពោះមុខ។ ពេលដែលយើងទទួលបានការងារនោះហើយ គឺត្រូវពង្រីកចំណេះដឹងឲ្យបានជ្រៅជ្រះ និងមានភាពច្បាស់លាស់ដែលជាកត្តាញ៉ាំងឲ្យអ្នកដែលនៅក្រោមបង្គាប់អាចផ្តល់ទំនុកចិត្តលើយើងបាន និងត្រូវមានការប្រាស្រ័យទាក់ទងល្អជាមួយអ្នករួមការងារដោយមានទំនួលខុសត្រូវខ្ពស់។ យ៉ាងណាមិញ ក្រុមហ៊ុន ឬ អង្គភាពនីមួយៗ តែងមានចក្ខុវិស័យផ្សេងៗគ្នា ដូចជាវិទ្យាស្ថានប៉ាស្ទ័រមានគោលការណ៍លើកទឹកចិត្តដល់បុគ្គលិកថ្នាក់ខ្ពស់មួយចំនួនឲ្យមានឱកាសសិក្សាបន្ថែម។ ជាឧទាហរណ៍ ជាក់ស្តែង នាងខ្ញុំបានទទួលនូវឱកាសការងារនៅក្នុងវិទ្យាស្ថានប៉ាស្ទ័រកម្ពុជាបន្ទាប់ពីបញ្ចប់ការសិក្សានៅសាកលវិទ្យាល័យ ដែលជាហេតុធើ្វឲ្យខ្ញុំមានឱកាសទទួលបានការបណ្តុះបណ្តាលបន្ថែមជ្រៅជ្រះសមស្របនៅក្នុងការបំពេញការងាររបស់ខ្ញុំ។ សារជូនដល់អ្នកជំនាន់ក្រោយ លោកស្រីឱសថបណ្ឌិតឯកទេសក៏មានជាសារខ្លីផងដែរថា «ការគោរពក្រមសីលធម៌វិជ្ជាជីវៈ ជាកត្តាសំខាន់ណាស់ក្នុងនាមជាអ្នកផ្តល់នូវសេវាសុខភាពដល់អ្នកជំងឺ»។ យើងមានតួនាទីផ្តល់នូវលទ្ធផលវិភាគជាក់លាក់ច្បាស់លាស់ ប្រកបដោយគុណភាពឆ្លើយតបទៅនឹងសភាពជំងឺជាក់ស្តែងរបស់គាត់ដូចនឹងពាក្យស្លោករបស់មន្ទីរពិសោធន៍វេជ្ជសាស្រ្តស្តង់ដារអន្តរជាតិ គឺ«ការវិភាគដែលមានគុណភាព លទ្ធផលដែលអ្នកជឿជាក់»។ ©2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Career & Education For Health Practitioners

Share

Feb 07, 2017 |
7 years ago |
2.6K views

មិនថាផ្តាសាយនៅតែឡូយ...

រដូវរងាចូលមកដល់ ជាពេលដែលល្អក្នុងការតុបតែងខ្លួនស្អាតៗ ប៉ុន្តែបញ្ហាគឺជំងឺផ្តាសាយក៏អាចមករំខាន ធ្វើឲ្យបាត់បង់ពេលវេលាដ៏មានតម្លៃក្នុងការរីករាយនឹងអាកាសធាតុ និងភាពឡូយៗ ដែលចង់បង្អួតនៅរដូវរងានេះ។ គ្មានអីត្រូវបារម្ភទេ យកចិត្តទុកដាក់ថែសុខភាពអ្នកចុះ តែថែតាមវិធីខាងក្រោមផង៖ កន្សែងបង់ក ជាម៉ូតសម័យថ្មីស្រាប់ទៅហើយ អញ្ចឹងអាចចាត់ទុកថាជាឱកាសល្អក្នុងការបង្អួតកន្សែងបង់ក និងស្ទាយបង់កបែបប្លែកៗ ដែលជា Fashion trend នៅរដូវត្រជាក់វិញទៅ។ ម្យ៉ាង ការរុំកន្សែងបង់ក នៅរាល់ពេលចេញទៅក្រៅអាចឲ្យយើងទទួលបាននូវភាពកក់ក្តៅ និងមានអារម្មណ៍ល្អ។ ម៉ាស់ ការពាក់ម៉ាស់អាចការពារខ្លួនលោកអ្នកពីជំងឺផ្តាសាយ និងការឆ្លងទៅអ្នកដទៃបាន ជាពិសេសធូលីដីហើរតាមខ្យល់ក្នុងរដូវរងាអាចឲ្យអ្នកកើតជំងឺទាក់ទងនឹងផ្លូវដង្ហើមបានយ៉ាងងាយស្រួល។ ដូចនេះព្យាយាមរកទិញម៉ាស់ខ្យូតៗតាមទីផ្សារ ឬហាងនានាតាមចិត្តស្រឡាញ់ ហើយមើលរូបរាងថ្មីនិងអារម្មណ៍ប្លែកៗពីការពាក់ម៉ាស់នេះ។ បំពង់ទឹកក្តៅ ខ្លួនប្រាណយើងតែងតែត្រូវការកម្តៅ ជាតិទឹកគ្រប់គ្រាន់ដើម្បីធានាឲ្យខ្លួនប្រាណខាងក្នុងមានដំណើរការល្អ ជាពិសេសពេលកំពុងមានការរំខានដោយអាការៈផ្តាសាយតែម្តង។ ការមានបំពង់ទឹកក្តៅមួយជាប់ខ្លួនជានិច្ចមើលទៅដូចជាសំពីងសំពោង តែហេតុអ្វីអ្នកមិនរកបំពង់ទឹកក្តៅស្អាតៗ ឬច្នៃមួយសម្រាប់ខ្លួនឯង? ហើយអាចបន្ថែមកាបូបស្អាតៗសម្រាប់ដាក់បំពង់ទៀតកាន់តែល្អ អញ្ចឹងពេលដកញ៉ាំម្តងៗ គឺមានជំនឿចិត្ត ហើយប្រហែលជាឧស្សាហ៍ដកញ៉ាំទៀតផង។ អាវរងា ងាយឯណាមានឱកាសពាក់អាវរងា? មួយឆ្នាំពាក់បានប៉ុន្មានដងហ្នឹង... ហើយទោះជាវាមិនសូវត្រជាក់យ៉ាងណានោះ តែពេលអ្នកផ្តាសាយអ្នកពិតជាត្រូវការវា និងមើលទៅស័ក្តិសម មិនឆ្គងទេ ព្រោះអីយើងកំពុងឈឺ និងត្រូវការភាពកក់ក្តៅ។ ម្យ៉ាងទៀត អាវក្រៅអាចការពារខ្លួនអ្នកពីខ្យល់ត្រជាក់ខ្លាំងនៅខាងក្រៅដែលជាហេតុបង្កឲ្យស្បែកស្ងួត ប្រេះស្រកាមើលទៅមិនស្រស់ស្អាត។ យកល្អអ្នកគួរជ្រើសរើសប្រភេទអាវខាងក្រៅដែលមានហោប៉ៅងាយស្រួលសូកដៃចូលពេលត្រជាក់ ហើយវាមើលទៅក៏កាន់តែឡូយខ្លាំង។ ស្បែកជើងកវែង ឬស្បែកជើងឃ្លុប ជើងរបស់អ្នកមិនអាចត្រូវត្រជាក់បានទេនៅអំឡុងពេលនេះ វានឹងធ្វើឲ្យអ្នកមិនស្រួលខ្លួន គ្មានផាសុកភាព ដូចនេះពាក់ស្បែកជើងឃ្លុបជិត ឬស្បែកជើងកវែង តែម្តងទៅ វានឹងធ្វើឲ្យអ្នកមើលទៅស្វាហាប់បន្តិច ហើយវាកាន់តែសមនៅរដូវត្រជាក់បែបនេះ។ អ្នកក៏គួរតែមានខោរឹបខ្មៅជើងវែងមួយផង បើសិនជាអ្នកស្លៀកសំពត់ ឬខោជើងខ្លី ឬមួយបែបទៀតគឺពាក់ជាមួយស្រោមជើងវែងៗ។ ក្រែមសម្រាប់លាបដៃ និងសម្រាប់សម្អាតមេរោគ ប្រអប់ដៃរបស់អ្នកប្រហែលជាស្ងួតរបកព្រោះតែអាកាសធាតុត្រជាក់ខ្លាំង ហេតុដូចនេះ ប្រើប្រាស់ក្រែមលាបដៃជាការប្រសើរបំផុតដើម្បីរក្សាសំណើមដៃឲ្យនៅស្រស់ស្អាត ទន់ និងមានក្លិនក្រអូប។ ម្យ៉ាង ក៏គួរតែមានទឹកលាងដៃសម្លាប់មេរោគ ទំហំអាចដាក់ហោប៉ៅបានផងដែរ។ និយាយទៅ បើអ្នកចង់ឡូយ មិនថាធ្វើអ្វីក៏ឡូយ ឈឺហើយក៏រិតតែត្រូវឡូយ។ ហេតុអីត្រូវឲ្យអាការៈប៉ុណ្ណឹងធ្វើឲ្យបាក់កាលីបនោះ?

Health Tips

Share

Feb 06, 2017 |
7 years ago |
2.1K views

តើនារីៗចង់បានអ្វីនៅថ្ងៃបុណ្យនៃក្តីស្រឡាញ់?

ថ្ងៃបុណ្យនៃក្តីស្រឡាញ់កាន់តែខិតជិតមកដល់ ដើម្បីកំុឲ្យខាតពេលវេលាយូរ តេាះទៅតាមដានទាំងអស់គ្នា ថាតើនារីៗចង់បានអ្វីឲ្យពិតប្រាកដ?

Entertainment

Share

Feb 06, 2017 |
7 years ago |
2.6K views

Valentine ខ្ញុំ

ឲ្យតែចូលដល់ខែកុម្ភៈ ម្នាក់ៗតាំងចាប់ផ្តើមនឹកគិតដល់ពាក្យបួនម៉ាត់ហើយ…គឺថា…ពាក្យអីដែលតំណាងឲ្យថ្ងៃ១៤ ខែកុម្ភៈហោ៎!!! ប្រាកដជាគិតឃើញហើយ…គឺ Valentine’s Day នុះអី!!! ទាំងអ្នកមានលិឍ និងអ្នកអត់លិឍ ឬអ្នកសីងហ្គលអាជីពដូចខ្ញុំ ចេះតែជ្រួលជ្រើមតាមគ្នា។ មិនចង់និយាយទេ៎…តែវាជារឿងពិតដែលថា មិនដែលស្គាល់ជាតិគេសារភាពស្នេហ៍ដាក់ (#sadbuttrue) នេះមិនមែនមានន័យថាអត់អ្នកស្រលាញ់ទេណា៎…គ្រាន់តែមិនទាន់ជួបអ្នកមានភាពក្លាហានមកសារភាព…ហើយឲ្យតែថាមើលរឿងកុន ឬរឿងភាគស្នេហាលើកណា ក៏បានត្រឹមតែប្រកាច់ប្រកិនតែម្នាក់ឯងរហូតហ្នឹង…គឺ បានត្រឹមស្រមៃរហូតមក ១៤កុម្ភៈឆ្នាំនេះ…ដូចរាល់ឆ្នាំដែរ…ខ្ញុំបានចំណាយពេលមួយព្រឹកទៅមជ្ឈមណ្ឌលកុមារកំព្រា ដើម្បីចែករំលែកក្តីស្រឡាញ់ជាមួយពួកគេ…តែអ្វីដែលប្លែក គឺថាមិនមែនទៅម្នាក់ឯងទេឆ្នាំនេះ…(កុំគិតដល់ណាណីហា៎) គឺ…ទៅលើកនេះ ទៅលក្ខណៈជាថ្នាក់តែម្តង។ ដោយហេតុថា ទើបតែចំណេញលុយពីលក់អីអីក្នុងកម្មវិធីសប្បុរសធម៌នៅសាលា ហើយពេលដែលប្រាប់គំនិតនេះដល់មិត្តរួមថ្នាក់ ក៏គេទារមកដែរ… ក៏ម្យ៉ាងដែរ…កុំឲ្យតែឯងដូចរាល់ដងពេក…សំខាន់ គឺថាមានcrushនៅក្នុងចំណោមហ្នឹងដែរ…ម្នាក់ហ្នឹង គេសង្ហា!!! រៀនមិនសូវពូកែ តែមានដុងខាងសិល្បៈកប់ស៊េរី…ម៉ាសាលា នរណាក៏ស្គាល់ថាគេជាអ្នកលេងហ្គីតាដៃឯក(ដូចអួតពេកហើយ!!! តែមែនតើ…) ដែរ។ និយាយរួមទៅ បើមើលពីសម្បកក្រៅទៅ គឺអ៊ែមហ្មង…លើកលែងតែរឿងមួយគត់ គឺថា…មាត់ឆៅ ចិត្តក្តៅ មិនចេះទុកមុខទុកមាត់ឲ្យគេ…តែចរិតហ្នឹង ធ្វើដាក់តែនរណាដែលអាក្រក់ដាក់គេមុននោះទេ។ ចំពោះមនុស្សល្អដូចខ្ញុំនេះ គេឡើងសុភាពហើយគួរឲ្យស្រលាញ់ណាស់ ក្រោយពីចែកសម្ភារៈសិក្សាដល់សិស្សគ្រប់គ្នាហើយ ក៏ដល់វេលាកំសាន្តម្តង…អ្នកខ្លះប្រញាប់ប្រញាល់រៀបចំហ្គេមលេង ហើយអ្នកខ្លះទៀតត្រៀមសម្តែងមានទាំងអ្នកច្រៀង អ្នករាំ និងលេងកំប្លែង (ស្តាប់ទៅ ដូចធំដុំណាស់…តែក៏មិនតូចតាចម៉ានដែរ)។ មនុស្សសំឡេងបានដូចខ្ញុំ ក៏បានត្រឹមតែធ្វើជាអ្នកចម្រៀងហ្នឹងឯង…និយាយពីថា រឿងអីមិនដឹង តែបើរឿងច្រើនហ្នឹង កុំឲ្យមេក្រូកាន់ឲ្យសោះ ធានាថាបេះមិនចេញវិញនោះទេ។ ភ័យអរភ័យអរ…ឌឹបឌឹប!!!ឌឹបឌឹប!!! បេះដូងស្ទើរលោតចេញក្រៅ ដោយសារតែត្រូវច្រៀងជាមួយនឹងអាប៉ិដែលខំក្រាស់តាំងពីឆ្នាំទីមួយម៉ោហ្នឹង…ភ្លេចប្រាប់ទៅថា ខ្ញុំឈ្មោះ«ណាវីន» ហើយគេគ្រប់គ្នាហៅម្នាក់ហ្នឹងថា«ឌែន»។ ហ៊ើយ!!! មិនបានត្រៀមចិត្ត ព្រោះតួឯកពិតមិនស្រួលខ្លួន (មករាកអីចំពេលល្អម្ល៉េះទេ!!! មកធ្វើឲ្យបេះដូងឯងលោតឡើងញាប់យ៉ាងហ្នឹងហា៎) ទើបត្រូវជំនួស… ដឹងថាបទអីទេ? «យើងពីរនាក់ស្រលាញ់គ្នាបានទេ៎?» ព្រះអើយ!!! គេឡើងធម្មតា ហើយខ្ញុំឡើងញ័រអស់ហើយដៃហ្នឹង…តែត្រូវប្រឹងទប់ មិនចឹងទេ បែកធ្លាយពេញហ្នឹងឡូវហើយ…មិនដឹងហេតុអី…មុខគេឡើងខ្យូត ជាពិសេសភ្នែកឡើងទាក់ទាញយ៉ាងហ្នឹង (អា៎!!! មិនមែនក្នុងន័យអីទេ គឺថាទាក់ទាញបែប…បែបស្រទន់ ប្រកបដោយមន្តស្នេហ៍) ច្រៀងបណ្តើរ បន្លំសំឡឹងភ្នែកបណ្តើរ…ទោះមិនមែនជាតួឯកពិតដូចក្នុងបទចម្រៀង តែប៉ុន្មាននាទីដែលបានច្រៀងហ្នឹង ក៏គ្រប់គ្រាន់ហើយ…ក្តីសុខតូចតាច តែមានន័យ…ងាយណា៎ បានច្រៀងបទឆ្លើយឆ្លងចឹងចឹងជាមួយក្រាស់ហូ៎…(ច្រណែនទេ៎???) ក្រោយពីចប់កម្មវិធី ក៏បំបែកគ្នាទៅផ្ទះរៀងខ្លួន ជាពិសេស អ្នកមានគូ តែ…នៅសល់ប៉ុន្មាននាក់ដែរ ដែលមិនចង់ចូលផ្ទះ (គឺស៊េរីអ្នកអត់លិឍហ្នឹងឯង)។ ខ្ញុំលឺតែឌែនក៏ចង់ចេញក្រៅដែរ ក៏នឹកដល់អត្ថបទ«លេសបបួលcrushចេញក្រៅ» (នៅក្នុងគេហទំព័រនេះដែរ ត្រង់ផ្នែកកំសាន្ត) ភ្លាម ហើយក៏សាកល្បងប្រើស្នៀតទៅញ៉ាំអីមុនគេ… បានសម្រេច!!! ក៏ព្រោះតែដល់ម៉ោងឃ្លានល្មមហ្នឹងឯង…គេ និងខ្ញុំសុទ្ធតែពូកែញ៉ាំដូចគ្នា (ជានិស្ស័យឲ្យច្បាស់ក្រឡែតនៀក៎…) ក្រោយមកក៏ទៅដល់វគ្គទៅច្រៀងខារ៉ាអូខេ…ក្រុមកូរឥតល្ហែ!!! ២ម៉ោង ឡើងស្អកក ហើយចុកអស់ដៃ និងជើង…តែសប្បាយខ្លាំង (ព្រោះវត្តមានគេច្រើនជាង) គិតថានឹងបបួលគេមើលកុនដែរ តែថ្ងៃពិសេសបែបនេះ មិនបានកក់មុន ដឹងតែមិនបាច់ចូលទេ…ណាមួយ ទៅកន្លែងបែបហ្នឹង នាំតែឈឺចាប់ទេ ក៏ព្រោះថា ដឹងតែឃើញគេបណ្តើរគ្នាមួយគូៗមិនខានទេ…ក៏រាងព្រលប់ដែរហើយ យើងក៏ស្រុះស្រួលគ្នាទៅអង្គុយញ៉ាំអីផឹកអីនៅPubវិញ។ កុម្ម៉ង់បានដូចចិត្ត ត្រង់ថាទៅកន្លែងដែលមានគេច្រៀងផ្ទាល់ (ស្រួលបានឡើងច្រៀងពេលស្រវឹងស្រឿងៗ) Blue Margarita ទើបតែអស់ប៉ុន្មានកែវ…ក៏មានអារម្មណ៍ថាក្តៅៗមុខបាត់ហើយ…ហើយតាប៉ិឌែននោះ ឡើងខ្សោយ។ មុខក្រហម ហើយឡើងសឺៗមុនគេបាត់…ដល់ថ្នាក់និយាយស្តាប់គ្នាមិនសូវបានហើយ គេក៏ងើបឡើងទៅសុំគេច្រៀងមួយបទ «Will you be my girl?»។ ពូកែរើសបទណាស់ ប៉ិហ្នឹង!!!ស្រីៗស្រែកហ៊ោពេញហ្នឹង ម្នាក់ៗជ្រួលជ្រើមណាស់… ច្រៀងហើយ ឡើងស្វាងហ្មង ហើយក៏ដើរមកវិញដូចគ្មានរឿងអីកើតឡើង…តែអ្វីដែលសំខាន់ អង្គុយឡើងកៀហើយខ្សឹបថា«ពិរោះអត់? ហើយណាកាដូគេ?» ខ្ញុំបើកភ្នែកធំៗ ហើយក៏ប្រឹងស្រវាទាញកាបូបតែក៏យឺតពេល ព្រោះឌែនទាញទៅបាត់ហើយ។ អូយយយយ៎!!! លេងចឹងហ្មង…មិនដឹងថាឃើញកាដូហ្នឹងតាំងពីពេលណា…គឺ សូកូឡាដែលបានរៀនធ្វើប៉ុន្មានខែមុនហ្នឹងណា៎!!! ខំលួចផ្ញើទូទឹកកកគេគ្រប់កន្លែង ក៏ព្រោះតែខ្លាចរលាយ។ គេបើកប្រអប់កាដូទាំងមុខញញឹមបែបច្រឡឺម ហើយក៏ដកប្រអប់សូកូឡាចែកមិត្តផ្សេងទៀតញ៉ាំដែរ(ឡើងចិតត្តបានណាស់ មិនគិតដល់ទឹកចិត្តអ្នកធ្វើសោះ)។ តែ…គេដកយកសំបុត្រនោះទុកក្នុងកាតាប ហើយខ្សឹបម្តងទៀតថា«ចាំទុកអាននៅផ្ទះម្នាក់ឯងវិញ!!! ខ្លាចអ្នកខ្លះអៀន…» ខ្ញុំវាយគេមួយដៃ ហើយក៏ត្រូវគេញីសក់លេងដោយទឹកមុខញញឹមស្រស់ (ទើបតែមើលភ្នែកគេជិតបែបនេះលើកទីមួយ ហើយក៏មានអារម្មណ៍កក់ក្តៅណាស់) ពិតជាមិនចង់ឲ្យស្រីផ្សេងមើលឃើញស្នាមញញឹមបែបនេះឡើយ។ មួយសន្ទុះក្រោយមក…ភ្លើងក៏ដាច់…ភ្លឹប!!! អៀវ៎…. ខ្ញុំក៏ភ្ញាក់ខ្លួនព្រើត…ពេលឌែនចាប់ទាញសក់មកដាក់ច្រមុះ។ What??? មុនហ្នឹងគេងយល់សប្តិទេ៎??? ហ៊ើយ!!! ទេវតាលេងសើចណាស់…តាមពិត ពេលនេះគឺខ្ញុំស្ថិតក្នុងសភាពស្រវឹងរកកន្លែងដេកហើយ…ខ្ញុំខំប្រឹងរកមើលប្រអប់សូកូឡា តែក៏បែរជាឃើញនៅលើតុ ហើយឌែនក៏ប្រាប់ថាអ្នករត់តុយកមកឲ្យ។ ដោយសារតែឃើញគេង ក៏ខ្ជិលដាស់ ហើយម្នាក់ៗក៏ភ្លក្សម្នាក់មួយទៅ…ក៏មិនដឹងនិយាយអីទៀត បានត្រឹមនិយាយថា«មិនអីទេ» ចប់តង់ចុងក្រោយហើយ យើងក៏បំបែកគ្នាទៅផ្ទះ…ហើយឌែនក៏ជិះបណ្តើរមកផ្ទះ ព្រោះផ្ទះមិនឆ្ងាយពីគ្នាប៉ុន្មានដែរ…មុននឹងលាគ្នា គេអេះអុញ ធ្វើដូចមានរឿងអីចង់និយាយ ហើយខ្ញុំនេះ ក៏ទ្រាំមិនបានហើយសួរថា «មានអីនិយាយមែន៎?» «អឺម!!! មិនទេ៎…តែចង់សួរមួយ» «សួរឡូវ ឬចង់សួរពេលក្រោយ?» «ចង់សួរថា..នឹងគិតឲ្យសំបុត្រនោះមកអត់ហ្នឹង? ប្រុងទុកដល់ពេលណា៎?» (ស្លាប់ហើយ!!!ឡើងមើលឃើញមែន៎??? មកសួរត្រង់ៗចឹងទៀត…ខ្លាំងណាស់យើងហ្នឹង!!!) មិនបាច់រ៉ាយរ៉ាប់ទៀតទេ៎…ដឹងត្រឹមថា ពេលដល់ផ្ទះ ម្នាក់ហ្នឹងsend relationship requestមក…ហើយចម្លើយខ្ញុំមិនបាច់ប្រាប់ ក៏អ្នកដឹងដែរ… មានតែប៉ុណ្ណឹងឯង…Valentineខ្ញុំនោះ…ចុះអ្នកវិញ??? បានទៅណាខ្លះ? មានអ្វីពិសេសចង់ចែករំលែកអត់?

My Diary

Share

Feb 06, 2017 |
7 years ago |
2K views

សហគមន៍ អឺរ៉ុបបានយល់ព្រមដាក់ឈ្មោះថា Mangue au Cambodge

ឯកឧត្ដមបណ្ឌិត ម៉ុង ឫទ្ធី H.E Oknha Mong Rethth យោងតាមការស្នើសុំយ៉ាងទទូចទៅដល់ភាគី ខាងសហគមន៍ អឺរ៉ុប ដើម្បីបានដាក់ឈ្មោះផ្លែស្វាយ ជាផលិតផលរបស់ព្រះរាជាណាចក្រកម្ពុជាយើង ដែលបានដាក់លក់នៅលើទីផ្សារ សហគមន៍ អឺរ៉ុប នៅពេលនេះភាគីអ្នកទទួលទិញនៅសហគមន៍ អឺរ៉ុបបានយល់ព្រមដាក់ឈ្មោះថា Mangue au Cambodge ។ ដូចច្នេះហើយចាប់ពីថ្ងៃនេះតទៅសូមបងប្អូនខ្មែរយើង ដែលនិយមគាំទ្រផលិតផលផ្លែស្វាយរបស់ខ្មែរយើង ពេលចូលទៅក្នុងទីផ្សារនឹងបានឃើញផលិតផលរបស់ជាតិយើងហើយ ។ សូមចូលរួមអបអរសាទរ នេះជាមោទនភាព ជាតិយើងទាំងអស់គ្នា ។

News & Events

Share

Feb 06, 2017 |
7 years ago |
19.4K views

ឈឺក្រពះ? រលាកក្រពះ? ដំបៅក្រពះ? មហារីកក្រពះ?

ការឈឺចាប់ឆ្អល់ក្រហាយនៅម្តុំចុងដង្ហើមអ្នកជំងឺតែងចោទថាខ្លួនមានរោគក្រពះ។ ប៉ុន្តែវាមិនសុទ្ធតែអញ្ចឹងទេ។ សញ្ញារោគដូច្នេះក្រៅពីបញ្ហាក្រពះវាក៏អាចបណ្តាលមកពីរឿងរ៉ាវនៃសរីរាង្គនៅតំបន់ក្បែរខាងដែរដូចជា ផ្នែកក្រោមនៃបំពង់អាហារ (lower esophagus)ឫ ថ្លើមស្តាំ ឫផ្លូវប្រម៉ាត់ ឫលំពែង។ ដូចនេះហើយ មានតែគ្រូពេទ្យទេដែលអាចវិភាគបែងចែករោគទាំងនេះបាន។ យើងខ្ញុំសូមនាំមកជូនមិត្តអ្នកអាននូវការបកស្រាយយ៉ាងក្បោះក្បាយរបស់លោកសាស្ត្រាចារ្យ តាន់ តេកស្រេង លើប្រធានបទជំងឺក្រពះ។ •ឈឺក្រពះ និយាយពីបញ្ហាក្រពះចំពោះគ្រូពេទ្យអាការៈនេះពុំសំដៅលើជំងឺអ្វីមួយរបស់ក្រពះឡើយ។ •រលាកក្រពះ រលាកក្រពះមានន័យថាស្រទាប់ភ្នាស (the mucosa lining) មានរលាក (inflammation) ហើយមូលហេតុរបស់វាមានច្រើនដែលគ្រូពេទ្យគឺជាអ្នកត្រូវស្រាវជ្រាវរក។ •ដំបៅក្រពះ ដំបៅក្រពះ (ulcer) បង្ហាញខ្លួនដូចដំបៅ។ Helicobacter pylori (Hp) ក៏ជាមូលហេតុបង្កដំបៅនេះដែរក្នុងអត្រាមួយខ្ពស់។ មូលហេតុចម្បងមួយទៀត គឺការប្រើថ្នាំឈឺសន្លាក់ប្រភេទ AINS។ ក្រៅពីនោះមានស្រា បារី។ល។ Hp ត្រូវបានគេសិក្សា និងស្គាល់ច្រើនជាងប្រភេទមីក្រុបផ្សេងៗទៀត។ វានៅតែក្នុងក្រពះទេហើយវាឲ្យរលាកក្រពះតាមបែបផែនដោយឡែកមួយដែលយូរទៅអាចបង្កដំបៅ(ulcer) ឫឈានដល់មហារីកតែម្តង ដោយសារវាបញ្ចេញជាតិពុលម៉្យាង។ រលាកក្រពះដោយសារ Hp និងមូលហេតុផ្សេងទៀតអាចដឹងបានដោយការច្រិបស្រទាប់ភ្នាសក្រពះយកទៅវិភាគ។ •មហារីកក្រពះ គ្រូពេទ្យត្រូវគិតដល់ជំងឺនេះមុនជំងឺផ្សេងៗទៀត ព្រោះវាអាចបណ្តាលឲ្យអ្នកជំងឺបាត់បង់ជីវិតបាន។ តើមហារីកក្រពះបណ្តាលពីអ្វី? មកដល់សព្វថ្ងៃនេះគេនៅមិនទាន់ច្បាស់នៅឡើយទេពីមូលហេតុនៃជំងឺមួយនេះប៉ុន្តែក្នុងចំណោមមូលហេតុច្រើនដែលគេសង្ស័យហើយមានអំណះអំណាងរឹងមាំជាងគេនោះ គឺការមានវត្តមានមេរោគឈ្មោះ helicobacter pylori (Hp) ក្នុងក្រពះ។ Hp គ្រាន់តែជាមីក្រុបមួយប្រភេទប៉ុណ្ណោះរបស់ក្រុមមីក្រុប Helicobacter។ សព្វថ្ងៃគេរកឃើញមានរហូតដល់ជាង ៣០ ប្រភេទនៃក្រុមមីក្រុបនេះដែលគេឲ្យឈ្មោះថាNPHS (Non Pylori Helicobacter Species)។ វាបោះទីតាំងរស់នៅខុសៗគ្នាក្នុងខ្លួនមនុស្សខ្លះនៅពោះវៀនតូច-ធំ ផ្លូវប្រម៉ាត់ ឬថ្លើម ។ល។ បច្ចុប្បន្ន គេកំពុងសិក្សារកបែបបទបង្ករោគរបស់ពួកវាទាំងនេះ។ ក្នុងន័យទប់ស្កាត់ការពារមហារីកក្រពះគ្រូពេទ្យឯកទេសផ្នែកផ្លូវអាហារគ្រប់ប្រទេសសំណូមពរធ្វើការសុងឆ្លុះក្រពះ(gastroscopy) ព្រោះចំណេញច្រើនចំណុច គឺ៖ • បានឃើញរូបភាពស្រទាប់ភ្នាសក្រពះផ្ទាល់។ • បានយកសាច់ភ្នាសក្រពះទៅវិភាគរកមេរោគHp ផង និងសិក្សាពីភាពធ្ងន់ស្រាលនៃរលាកផង។ • បានឃើញផ្ទាល់នូវចលនាលឿន ឫយឺតនៃបំពង់អាហារ ឫវត្តមានទឹកប្រម៉ាត់នៅក្នុងក្រពះ។ (ឧទា. ច្រាលទឹកប្រម៉ាត់)។ កត់ចំណាំ៖ កុំប្រើឱសថ១ចំនួនពិសេសប្រភេទថ្នាំផ្សះមុនពេលឆ្លុះសុងព្រោះធ្វើបែបនេះអាចបិទបាំងនិងធ្វើឲ្យពិបាករក Hp។ ជាចុងក្រោយលោកសាស្ត្រចារ្យក៏បានផ្តាំផ្ញើផងដែរថា ប្រជាជនគួរបញ្ឈប់ទម្លាប់អវិជ្ជមានដែលប្រើប្រាស់ឱសថមុនឆ្លុះសុងដូចជាអ្នកខ្លះកំពុងលេបថ្នាំហើយពេលទៅលេងបរទេសក៏ឆ្លៀតឆ្លុះសុង។ ការធ្វើបែបនេះនាំឲ្យខាតថវិកាដោយសារលទ្ធផល ដែលទទួលបានមិនពេញលក្ខណ:បច្ចេកទេសហើយ ពេលនៅឈឺទៀតធ្វើឲ្យគ្រូពេទ្យលំបាកនឹងសម្រេចថាធ្វើការឆ្លុះសុងម្តងទៀតឬយ៉ាងណា។ ម្យ៉ាងទៀត សូមកុំរួញរាក្នុងការឆ្លុះសុងក្រពះបើអ្នកមានអាយុលើសពី៤៥ ឆ្នាំ។ បកស្រាយដោយសាស្រ្តាចារ្យវេជ្ជបណ្ឌិត តាន់ តឹកស្រេង ប្រធានសមាគមគ្រូពេទ្យ ថ្លើម ក្រពះ ពោះវៀន កម្ពុជា។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Other Diseases Gastrointestinal Gastrointestinal

Share

Feb 06, 2017 |
7 years ago |
3.7K views

Codingate អភិវឌ្ឍយុវជនកម្ពុជាផ្នែកបច្ចេកវិទ្យា

វិស័យបច្ចេកវិទ្យានៅកម្ពុជាថ្វីត្បិតថាមិនទាន់មានការរីកចម្រើនដល់កម្រិតកំពូលមួយដូចជាប្រទេសដទៃក៏ពិតមែន តែយើងក៏អាចឃើញពីភាពរីកលូតលាស់ជាជំហានៗគួរឲ្យកត់សម្គាល់ផងដែរ។ មានស្ថាប័នជាច្រើនដែលកំពុង និងបន្តរួមចំណែកជួយឲ្យកាន់តែមានភាពប្រសើរឡើងទៀតនូវវិស័យមួយនេះ ក្នុងនោះផងដែរ ហេលស៍ថាម ក៏មានឱកាសជួបផ្ទាល់ជាមួយនឹងសហស្ថាបនិក Codingate គឺ លោក សុខ សុភមង្គល ដែលជាម្ចាស់ពានរង្វាន់សហគ្រិនឆ្នើមវ័យឆ្លាតផ្នែកព័ត៌មានវិទ្យាប្រចាំឆ្នាំ ២០១៦។ ប្រវត្តិនៃការស្ថាបនាCodingate បុរសសង្ហាខ្មែរអង្គររូបនេះ មានទឹកដីកំណើតមកពីខេត្តសៀមរាបដែលធ្លាប់បានទទួលអាហារូបករណ៍ផ្នែកគ្រប់គ្រងព័ត៌មានវិទ្យាទៅសិក្សានៅសាធារណរដ្ឋឆេកកាលពីឆ្នាំ២០០៩។ ក្នុងពេលបម្រើការងារក្នុងអង្គការប្រព័ន្ធទិន្នន័យកម្ពុជាហៅថា DDD (Digital Divide Data) លោកក៏បានជួបនឹងក្រុមនិស្សិតផ្នែកITមួយក្រុមដែលមានទឹកចិត្តតស៊ូ និងភាពមុតមាំក្នុងការទទួលបានជោគជ័យនៅក្នុងជីវិត តែខ្វះខាតនូវសម្ភារៈសិក្សា គឺកុំព្យូទ័រ។ ពួកគេទាំងនោះហើយជាកម្លាំងជម្រុញទឹកចិត្តមួយឲ្យលោកមានបំណងក្នុងការជួយជ្រោមជ្រែងដល់ពួកគេ ដោយសន្យាថានឹងព្យាយាមដោះស្រាយបញ្ហានោះឲ្យបាន។ ជាមួយនឹងដៃគូពាណិជ្ជកម្មរបស់ខ្លួន លោកសុភមង្គលក៏បានព្យាយាមធ្វើការជាមួយនឹងគម្រោងមួយចំនួន ហើយជាលទ្ធផលក៏បានទទួលឧបករណ៍សិក្សាសម្រាប់ពួកគេគ្រប់គ្នា រួមផ្សំនឹងការប្រឹងប្រែងអភិវឌ្ឍខ្លួនរបស់និស្សិតម្នាក់ៗផង ខណៈនោះក៏បានក្លាយជាពេលដែល Codingate ចាប់បដិសន្ធិតែម្តង។ គោលដៅក្នុងការបង្កើត Codingate Codingate ត្រូវបានបង្កើតឡើងក្នុងគោលដៅអភិវឌ្ឍយុវជនកម្ពុជាក្នុងផ្នែកបច្ចេកវិទ្យាតាមរយៈការសម្លឹងមើលឃើញនូវចន្លោះគម្លាតដ៏ធំមួយ ដែលបច្ចេកវិទ្យានៅក្នុងប្រទេសភាគច្រើនត្រូវបាននាំចូលពីក្រៅប្រទេស ហើយសមិទ្ធផលដែលបានបង្កើតឡើងនៅក្នុងប្រទេស គឺត្រូវនាំចេញទៅក្រៅវិញ។ ប៉ុន្តែ Codingate កំពុងតែព្យាយាមទទួលធ្វើគម្រោងនៅក្រៅប្រទេសដែលក្នុងរយៈពេល៣ឆ្នាំកន្លងមកនេះ មានប្រមាណដល់ទៅជាង១៣០គម្រោង ដើម្បីស្វែងរក និងសន្សំទុនធ្វើការអភិវឌ្ឍវិស័យនេះនៅក្នុងប្រទេស។ មូលហេតុនៅពីក្រោយការស្ថាបនា មូលហេតុចម្បង គឺបញ្ហាអនក្ខរភាពដែលអាចនឹងផ្តល់នូវផលប៉ះពាល់មិនតែចំពោះបុគ្គលជាអនក្ខរជននោះទេគឺចំពោះសង្គម និងប្រទេសជាតិតែម្តង ហើយលោកមានការចាប់អារម្មណ៍ខ្លាំងទៅលើការអភិវឌ្ឍធនធានមនុស្ស។ ជាក់ស្តែង Codingateមិនផ្តោតសំខាន់លើប្រាក់ចំណូលនោះឡើយ តែជាការបង្កើតនូវអ្វីដែលថ្មីជាសមិទ្ធផល និងមោទនភាពរបស់ប្រទេសជាតិ ក៏ដូចជាជួយឲ្យអតិថិជនប្រើប្រាស់នូវបច្ចេកវិទ្យាជាមួយនឹងផលប្រយោជន៍ពេញលេញ ដើម្បីសម្រេចនូវគោលដៅរបស់ពួកគេ។ មិនថានៅក្នុងកាលៈទេសៈបែបណាក៏ដោយលោកនៅតែប្រកាន់ខ្ជាប់នូវគោលជំហររឹងមាំក្នុងការស្វែងរក និងបង្កើតឱកាសការងារជូនដល់យុវជនកម្ពុជាក្នុងផ្នែកបច្ចេកវិទ្យា ព្រមទាំងការអភិវឌ្ឍថ្មីនៅក្នុងវិស័យដដែលនេះផងដែរ។ លក្ខន្តិកៈនៃការចូលជាសមាជិក ដើម្បីអាចក្លាយខ្លួនជាសមាជិករបស់ Codingate ជាចម្បង បុគ្គលមួយរូបត្រូវស្គាល់ពីខ្លួនឯងថាតើមានភាពខ្លាំង និងភាពខ្សោយអ្វីខ្លះ? ព្រោះថាក្រោយពីចូលជាសមាជិកហើយ Codingate នឹងផ្តល់នូវឱកាសការងារមួយដែលជួយពង្រឹងចំណុចខ្លាំងរបស់សមាជិកឲ្យកាន់តែខ្លាំង និងហ្វឹកហាត់ ដើម្បីលុបបំបាត់នូវចំណុចខ្សោយវិញ។ អ្វីដែលចាំបាច់មួយទៀត គឺការប្តេជ្ញាចិត្តខ្ពស់ និងចំណង់ចំណូលចិត្តខ្លាំងក្នុងការបង្កើតនូវអ្វីដែលថ្មី និងមានគុណប្រយោជន៍។ គួរបញ្ជាក់ផងដែរ សមាជិកភាគច្រើនរបស់ Codingate មានការគិតបែបសម័យថ្មី ព្រោះថាការធ្វើការងារជាមួយនឹងបច្ចេកវិទ្យា គឺដើម្បីដោះស្រាយនូវបញ្ហា និងផ្លាស់ប្តូរនូវផ្នត់គំនិត និងទម្លាប់នៃការរស់នៅមួយចំនួន។ ជាក់ស្តែង មានបច្ចេកវិទ្យាដែលត្រូវបានបង្កើតឡើងក្នុងគោលបំណងបង្កើតនូវភាពកក់ក្តៅ និងជិតស្និទ្ធនៅក្នុងក្រុមគ្រួសារជាពិសេសរវាងឳពុកម្តាយ និងកូន តាមរយៈការប្រើប្រាស់នូវកម្មវិធីនៅក្នុងទូរស័ព្ទដៃ។ គុណប្រយោជន៍នៃការបង្កើតបច្ចេកវិទ្យាថ្មី វាពិតជាមានគុណប្រយោជន៍ច្រើនដល់អ្នកប្រើប្រាស់ រួមមានការបញ្ជូននូវព័ត៌មានថ្មីៗទៅបានរហ័ស និងប្រកបដោយប្រសិទ្ធភាព។ ដោយសារតែមានបទពិសោធន៍ជាច្រើនឆ្នាំជាមួយនឹងការងារផ្នែកនេះ លោកក៏បានណែនាំផងដែរអំពី Information and Communication Technology (ICT) ដែលអ្វីដែលត្រូវគិតដល់មុនគេគឺអ្នកបង្កើត ដែលចាំបាច់ត្រូវមានការយល់ដឹងអំពីឥរិយាបថរបស់អ្នកប្រើប្រាស់គោលដៅ ដោយមានការពិចារណា និងគិតគូរល្អិតល្អន់ទៅលើការងារគ្រប់ផ្នែក រួមមានការរចនាបែបបទនៃការបង្ហាញព័ត៌មានជាដើម។ អាថ៌កំបាំងនៅពីក្រោយភាពជោគជ័យ ថ្វីត្បិតតែទើបដំណើរការមិនបានយូរប៉ុន្មាន តែ Codingate ក៏បានទទួលជោគជ័យគួរឲ្យកត់សម្គាល់ដែរ មិនថានៅក្នុងប្រទេសកម្ពុជាផ្ទាល់ ឬនៅក្រៅប្រទេសនោះទេ ភាពជោគជ័យនេះត្រូវបានលោកសុភមង្គលជាសហស្ថាបនិកផ្ទាល់បង្ហើបប្រាប់ដល់ក្រុមការងារយើងផងដែរថា ជាចម្បង គឺបណ្តាលមកពីការគាំទ្រ និងទុកចិត្តពីអតិថិជនដោយសារតែឆន្ទៈច្បាស់លាស់ក្នុងការបំពេញការងារមិនថាតូច ឬធំនោះឡើយ។ ភាពខ្លាំងមួយទៀត ជាសិល្បៈនៃការទំនាក់ទំនងទាំងនៅក្នុងក្រុមហ៊ុនផ្ទាល់ និងជាមួយនឹងដៃគូក៏ដូចជាអតិថិជន ដោយមិនលាក់លៀមនូវបែបផែននៃការធ្វើការងាររបស់ក្រុមហ៊ុនលោកឡើយ។ លោកក៏បានបញ្ជាក់ផងដែរថា ការបញ្ចប់ការសិក្សាមកពីក្រៅប្រទេស និងមានខ្សែបណ្តាញច្រើននៅទូទាំងប្រទេសក៏ជាហេតុផលមួយ ដែលនាំឲ្យមានអតិថិជនជាបន្តបន្ទាប់រហូត។ ជាក់ស្តែង តាំងពីពេលចាប់ផ្តើមមក Codingateមិនធ្លាប់បានចំណាយប្រាក់ច្រើនទៅលើ Marketing ឡើយដោយជាទូទៅ គឺមានការណែនាំតៗគ្នាពីអតិថិជនមួយទៅកាន់អតិថិជនមួយច្រើនជាង។ ទន្ទឹមនឹងគ្នានេះផងដែរ ទំនាក់ទំនងការបរទេសជាមួយនឹងដៃគូពាណិជ្ជកម្ម ក៏ជាកត្តាមួយសំខាន់ផងដែរ ដោយតាំងពីចាប់ផ្តើមដំបូង គឺមានការគាំទ្រពីដៃគូសហការនៅប្រទេសញូហ្សេលេនដែលតែងតែជួយជ្រោមជ្រែងជាពិសេសផ្នែកចំណេះដឹង។ សារជូនដល់មិត្តអ្នកអាន មុននឹងបញ្ចប់កិច្ចសម្ភាសន៍ លោកក៏មានសារជាការលើកទឹកចិត្តចំពោះយុវជនខ្មែរឲ្យចាប់ផ្តើមធ្វើការស្វែងយល់ពីបច្ចេកវិទ្យា ដើម្បីប្រើប្រាស់សម្រាប់ការដោះស្រាយបញ្ហាផ្សេងៗ ព្រោះថា បច្ចេកវិទ្យាជាចំណុចមួយនៃការបង្កើននូវល្បឿនសម្រាប់អភិវឌ្ឍខ្លួនឯង ក្រុមហ៊ុន សហគមន៍ ក៏ដូចជាប្រទេសជាតិផ្ទាល់តែម្តង ។ ជាការពិតណាស់ ការប្រើប្រាស់នូវបច្ចេកវិទ្យាបានត្រឹមត្រូវនឹងផ្តល់នូវតម្លៃព្រមទាំងផលវិជ្ជមានជាច្រើនក្នុងជីវិតរស់នៅ។ ដូចគ្នាផងដែរ លោកក៏ជម្រុញទឹកចិត្តចំពោះអ្នកដែលមានគំនិតច្នៃប្រឌិត ក៏ដូចជាអ្នកដែលមានគំនិតផ្តួចផ្តើមក្នុងការបង្កើត ឬច្នៃនូវអ្វីដែលថ្មី ដើម្បីភាពប្រសើរឡើង។

Career & Education

Share

Feb 06, 2017 |
7 years ago |
11.9K views

ដំណោះស្រាយបញ្ហាសក់ជាមួយនឹងការញ៉ាំអាហារងាយៗ

ប្រាថ្នាចង់បានសក់ស្រស់ស្អាត ក្រាស់រឹងមាំ និងទន់រលោងមែនទេ? ប៉ុន្តែបែរជាជួបបញ្ហាសក់ស្តើង មិនភ្លឺរលើបរលោង ហើយស្រួយទៅវិញ ដូច្នេះតើគួរធ្វើដូចម្តេចទៅ? ឈប់ខ្វល់ខ្វាយទៀតទៅ...ព្រួញមួយបាញ់បានចាបដល់ទៅពីរ បានទាំងញុំាអាហារឆ្ងាញ់ៗ ហើយថែមទាំងអាចជួយសុខភាពសក់ថែមទៀតផង។ ចូរតាមដានជាមួយអាហារ៦ប្រភេទដែលអាចជួយបំប៉នសក់របស់លោកអ្នកបានមួយផ្នែក ជាមួយហេលស៍ថាមទាំងអស់គ្នា... ចង់បានសក់ភ្លឺរលោង? ប្រភេទសាច់ត្រីដូចជា ត្រីសាម៉ុន ត្រីសាឌីន និងប្រភេទត្រីផ្សេងទៀតមានផ្ទុកនូវប្រភេទខ្លាញ់ត្រីអូមេហ្គា៣ ដែលសារធាតុនេះមានតួនាទីសំខាន់ទៅបើកគល់ឫសសក់ជួយឲ្យសក់ដុះលូតលាស់បានល្អ និងមានភាពភ្លឺរលោង។ ដោយសារតែខ្លួនរបស់យើងមិនអាចបង្កើតនូវខ្លាញ់ប្រភេទនេះបានទើបទាមទារឲ្យបរិភោគតាមចំណីអាហារ ឬថ្នាំជំនួយផ្សេងៗវិញ។ មានបញ្ហាសក់ជ្រុះ? សារជាតិដែកមាននាទីការពារកុំឲ្យសក់ជ្រុះព្រោះវាចូលរួមយ៉ាងសំខាន់ក្នុងការដឹកនាំអុកស៊ីហែ្សនទៅចិញ្ចឹមឫសសក់។ តួយ៉ាង លោកអ្នកអាចរកសារជាតិដ៏ល្អបែបនេះបាននៅក្នុងអាហារ និងបន្លែមួយចំនួនដូចជា គ្រាប់ធញ្ញជាតិ សណ្តែកសៀង ស្ពៃ សាច់គោ និងបន្លែបៃតងផងដែរ។ មានបញ្ហាសក់ស្ងួត និងមិនភ្លឺរលោង? ចង់បានសក់មានសំណើម និងភ្លឺ? ដំឡូងផ្អែម មានផ្ទុកនូវសារធាតុចិញ្ចឹមប្រឆាំងនឹងអុកស៊ីតកម្មម្យ៉ាង ដែលហៅថា Beta carotene វានឹងត្រូវបានបំលែងទៅជាវីតាមីនអេបន្ទាប់ពីទទួលទានចូល ហើយវីតាមីនប្រភេទនេះ មាននាទីការពារសក់កុំឲ្យសក់ស្ងួត និងមានសភាពស្រអាប់។ ក្នុងនោះផងដែរ វានឹងទៅជម្រុញក្រពេញសេបូម (ក្រពេញខ្លាញ់) នៅស្បែកក្បាលឲ្យបញ្ចេញសារធាតុប្រេងនៅលើសក់ ។ លោកអ្នកក៏អាចរកសារធាតុប្រភេទនេះនៅក្នុងបន្លែមួយចំនួនដូចជាការ៉ុត ល្ពៅ ស្វាយជាដើម។ ចង់បានសក់រឹងមាំ និងមានសុខភាពល្អ? សារធាតុរ៉ែស័ង្កសីដែលមាននៅក្នុងអាហារសមុទ្រដូចជាក្តាម បង្កង អ័យស្ទ័រ និងសាច់គោ បានចូលរួមធ្វើឲ្យសក់មានសភាពរឹងមាំ ហើយសុខភាពល្អ សូម្បីតែរោមភ្នែកក៏ឲ្យដុះលូតលាស់លឿន និងការពារមិនឲ្យជ្រុះដែរ។ បញ្ហាសក់ផុយស្រួយ? Walnut ជាប្រភពនៃវីតាមីនB7(Biotin) ដែលមានតួនាទីជួយពង្រឹងសក់របស់អ្នកឲ្យមានភាពរឹងមាំ កាត់បន្ថយសក់ជ្រុះ និងឲ្យសក់ដុះលូតលាស់លឿនថែមទៀងផង។ មិនតែប៉ុណ្ណោះ វាក៏មានផ្ទុកនូវវីតាមីន E ការពារការពុកផុយស្រួយនៃសរសៃសក់ដែលជាក្តីកង្វល់របស់លោកអ្នករាល់ពេលសិតសក់។ មានបញ្ហាសក់បែកចុង? តែបៃតងត្រូវបានគេជឿជាក់ថាជាប្រភេទតែដែលមានសមត្ថភាពអាចព្យាបាលសក់បែកចុងយ៉ាងមានប្រសិទ្ធភាព ព្រោះវាមានផ្ទុកនូវសារធាតុវីតាមីនB5។ បន្ថែមពីនេះ វាក៏ជួយឲ្យសក់ទន់ និងមានដំណុះសក់ល្អ ដោយសារសារធាតុប្រឆាំងអុកស៊ីតកម្ម។ លោកអ្នកអាចទទួលលទ្ធផលគាប់ប្រសើរនេះតាមរយៈការផឹកតែបៃតងផ្ទាល់ជារៀងរាល់ថ្ងៃ។ ©2017រក្សាសិទ្ធិគ្រប់យ៉ាងដោយHealthtime Corporationចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Vitamins & Nutrition

Share

Feb 06, 2017 |
7 years ago |
4.4K views

ជំនួបពិភាក្សារវាង Healthtime Corporation និងសមាគមគ្រូពេទ្យឯកទេស

កាលពីថ្ងៃទី២៥ ខែមករា ឆ្នាំ២០១៧ ក្រុមហ៊ុន Health Time Corporation បានរៀបចំកម្មវិធីជំនួបពិភាក្សាជាមួយសមាគមគ្រូពេទ្យឯកទេសចំនួន ៧ ដូចជា សមាគមគ្រូពេទ្យសើស្បែកកម្ពុជា សមាគមគ្រូពេទ្យទឹកនោមផ្អែមនិងក្រពេញកម្ពុជា សមាគមសម្ភពរោគស្ត្រីកម្ពុជា សមាគមគ្រូពេទ្យប្រសាទសាស្ត្រកម្ពុជា សមាគមទន្តពេទ្យកម្ពុជា សមាគមគ្រូពេទ្យភ្នែកកម្ពុជា និងសមាគមគ្រូពេទ្យបេះដូងកម្ពុជា នៅទីតាំងសណ្ឋាគារសាន់វ៉េ។ កម្មវិធីនេះ ធ្វើឡើងក្នុងគោលបំណងទទួលយកគំនិតនិងយោបល់បន្ថែមពីសំណាក់សមាគមគ្រូពេទ្យឯកទេសទាំង៧ ដើម្បី Health Time Corporation ធ្វើការពង្រឹងសមត្ថភាពគុណភាពរបស់ខ្លួន រួមជាមួយនឹងការអភិវឌ្ឍខ្លួនឲ្យកាន់តែប្រសើក្នុងការបន្តចូលរួមចំណែកផ្តល់ជូននូវចំណេះដឹងស្តីពីផ្នែកសុខាភិបាលជូនដល់សាធារណជនឲ្យបានកាន់តែមានប្រសិទ្ធភាព។ សបញ្ជាក់ផងដែរថា Health Time Corporation បានចូលរួមផ្សព្វផ្សាយចំណេះដឹងស្តីពីសុខភាពដល់សាធារណជនចាប់តាំងពីឆ្នាំ២០១២មកម្ល៉េះ ដោយក្រុមហ៊ុនបានធ្វើការបោះពុម្ពផ្សាយនូវទស្សនាវដ្តីសុខភាពចំនួនបីមុខគឺ Health Time Student Kit, Health Time Pro, Health Time Pub ព្រមទាំងចេញផ្សាយអត្ថបទតាមរយៈគេហទំព័រ www.healthtime.tips។

News & Events

Share

Your cart (4)

Basic hooded sweatshirt in pink

Black and white sport cap

Mid-rise slim cropped fit jeans

Men fashion gray shoes

Have difficulty in sleeping? Here are 4 tips from Herbalife to improve sleeping effectively

Physiolac ensures the baby milk powder supply in Cambodia despite the lack of supply the US

Why is Malaysia the preferred country for healthcare travel?

Save Ralph, short film to end cosmetic testing on animals around the world

អាចប្រើបានហើយ! ប្រព័ន្ធពង្រឹងសមត្ថភាព និងតេស្តសមត្ថភាពដោយខ្លួនឯងសម្រាប់សិស្សថ្នាក់ទី១២

ទីក្រុងឈ្មោះវែងបំផុត លើពិភពលោក

តោះ!ធ្វើតេស្ត«សុខភាពសក់»ជាមួយវេជ្ជបណ្ឌិត Anna Roslyakova

ស្វែងយល់ពីការងារក្នុងមន្ទីរពិសោធន៍

មិនថាផ្តាសាយនៅតែឡូយ...

តើនារីៗចង់បានអ្វីនៅថ្ងៃបុណ្យនៃក្តីស្រឡាញ់?

Valentine ខ្ញុំ

សហគមន៍ អឺរ៉ុបបានយល់ព្រមដាក់ឈ្មោះថា Mangue au Cambodge

ឈឺក្រពះ? រលាកក្រពះ? ដំបៅក្រពះ? មហារីកក្រពះ?

Codingate អភិវឌ្ឍយុវជនកម្ពុជាផ្នែកបច្ចេកវិទ្យា

ដំណោះស្រាយបញ្ហាសក់ជាមួយនឹងការញ៉ាំអាហារងាយៗ

ជំនួបពិភាក្សារវាង Healthtime Corporation និងសមាគមគ្រូពេទ្យឯកទេស