Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Mar 12, 2019 |
  • 5 years ago |
  • 4.5K views

លំហាត់ប្រាណ ៤ប្រភេទជួយដល់សុខភាពសួតកាន់តែប្រសើរ

តើអ្នកមានដឹងទេថា សូម្បីតែសរីរាង្គសួតរបស់អ្នកក៏ត្រូវការលំហាត់ប្រាណដើម្បីសុខភាពដែរ? ដោយហេតុថាសួតមានមុខងារសំខាន់ក្នុងការបញ្ជូនអុកស៊ីសែនពីបរិយាកាសខាងក្រៅចូលទៅក្នុងចរន្ដឈាម និងបញ្ចេញនូវឧស្ម័នកាបូនិកទៅក្នុងបរិយាកាស។ ដូចនេះ ហេលស៍ថាម ប្រូ សូមណែនាំនូវលំហាត់ប្រាណដែលជួយដល់សុខភាពសួតរបស់អ្នកឲ្យកាន់តែប្រសើរ និងរឹងមាំ៖ • Aerobic៖ ការធ្វើលំហាត់ប្រាណតាមបែប Aerobic អាចធ្វើបានច្រើនវិធីសាស្រ្ត ឬច្រើនរបៀបដើម្បីបង្កើនសមត្ថភាពរបស់កោសិកាសួតនិងបេះដូងរបស់អ្នកសម្រាប់ការស្រូបយកអុកស៊ីសែន និងជួយសម្រួលដល់ការដកដង្ហើមផងដែរ ដោយហេតុថាវាអាចជួយធ្វើឲ្យសាច់ដុំធំៗក្នុងរាងកាយធ្វើការក្នុងចង្វាក់ស៊ីមេទ្រីគ្នា។ ផ្ទុយទៅវិញ វាក៏ជួយកាត់បន្ថយនូវភាពអស់កម្លាំង បង្កើនភាពរឹងមាំ ជួយជំរុញ ឬពង្រឹងកោសិកាសួត និងបេះដូងឲ្យមានសុខភាពល្អ ព្រមទាំងជួយការគ្រប់គ្រងទម្ងន់ បង្កើនកាល់ឡូរីដែលរាងកាយប្រើប្រាស់។ ដូច្នេះ យ៉ាងហោចណាស់អ្នកគួរចំណាយពេលត្រឹមតែ ២០នាទីជារៀងរាល់ថ្ងៃ ដើម្បីទទួលបានលទ្ធផលជាទីគាប់ចិត្ត។ គួរបញ្ជាក់ថាការធ្វើលំហាត់ប្រាណតាមបែប Aerobic រួមមានការដើរ ការជិះកង់ និងការរត់ជាដើម។ • Abdominal Breathing៖ ថ្វីត្បិតការធ្វើលំហាត់ប្រាណបែបនេះស្តាប់ទៅសាមញ្ញ តែវាអាចជួយបង្កើនសមត្ថភាព និងពង្រឹងសរីរាង្គសួតឲ្យមានសុខភាពល្អ មិនចាញ់ការធ្វើលំហាត់ប្រាណផ្សេងទៀតឡើយ។ លើសពីនេះ វាក៏ជួយដល់លំហូរឈាមក្នុងរាងកាយ និងសម្រួលក្នុងការដកដង្ហើមផងដែរ។ អ្នកគ្រាន់តែគេងនៅលើកម្រាលរាបស្មើ ដោយយកដៃម្ខាងដាក់លើពោះដៃម្ខាងដាក់លើដើមទ្រូង យកខ្នើយដាក់ទ្រនៅចំជង្គង់របស់អ្នករួចធ្វើការដកដង្ហើមចូលឲ្យវែងរយៈពេល៧វិនាទី បន្ទាប់មកធ្វើការដកដង្ហើមចេញយឺតៗ ធ្វើបែបនេះសារចុះសារឡើងឲ្យបាន១០ដង។ ត្រឹមតែ ៥នាទីជារៀងរាល់ថ្ងៃ ដើម្បីទទួលបានសុខភាពសួត និងបេះដូងរបស់អ្នកកាន់តែល្អ និងគ្មានជំងឺ។ • Rib Stretch៖ អ្នកធ្លាប់សាកល្បងធ្វើលំហាត់ប្រាណបែបនេះហើយឬនៅ? វាពិតជាប្លែក ហើយថែមទាំងអាចជួយកាត់បន្ថយនូវភាពតានតឹង ស្ត្រេស ជាពិសេសជួយពង្រឹងសមត្ថភាពសួត និងបេះដូងរបស់អ្នកឲ្យមានសុខភាពល្អផងដែរ។ ផ្ទុយទៅវិញការធ្វើលំហាត់ប្រាណបែបនេះត្រូវធ្វើការជ្រើសរើសទីតាំង ឬទីកន្លែងដែលមានទេសភាពស្រស់បំព្រងស្ងប់ស្ងាត់ អាកាសធាតុល្អ រួមជាមួយវាលស្មៅខៀវខ្ចី នោះនឹងធ្វើឲ្យអ្នកកាន់តែធ្វើបានយ៉ាងមានប្រសិទ្ធភាព។ ជំហានដំបូង អ្នកត្រូវឈរដោយលាដៃសន្ធឹងឲ្យស្របនឹងដងខ្លួន និងរក្សាខ្នងឲ្យត្រង់ ឬយកដៃទាំងពីរសង្កត់នៅលើឆ្អឹងជំនីរទាំងសងខាង បន្ទាប់មកធ្វើការដកដង្ហើមចូលរយៈពេល ១០ ទៅ១៥វិនាទី ទើបដកដង្ហើមចេញយឺតៗមកវិញ។ អ្នកគ្រាន់តែយកដៃទាំងពីរមកច្រត់លើចង្កេះរបស់អ្នកហើយធ្វើការបង្វិលទៅស្តាំបន្តិច ទៅឆ្វេង ៤ ទៅ៥ដងដើម្បីសម្រួលដល់លំហូរឈាម និងដកដង្ហើមបានកាន់តែប្រសើរ។ អ្នកអាចអនុវត្តលំហាត់ប្រាណបែបនេះពីរ ទៅបីដងក្នុងមួយថ្ងៃ ដោយធ្វើមួយដង រយៈពេល ២ ទៅ៥នាទីជាការស្រេច។ • ការហែលទឹក៖ សកម្មភាពលំហាត់ប្រាណមួយដ៏ល្អបំផុត សម្រាប់មនុស្សគ្រប់រូប មិនថាបុរស ឬស្រ្តីក្មេង ឬចាស់នោះទេ សុទ្ធតែអាចធ្វើបានទាំងអស់។ ការធ្វើលំហាត់ប្រាណហែលទឹកមានសារប្រយោជន៍ច្រើនណាស់សម្រាប់សុខភាពរបស់អ្នក ពិសេសសុខភាពសួត និងបេះដូង ដោយអាចជួយលើកកម្ពស់ការដកដង្ហើមឲ្យបានធូរស្រាល ពីព្រោះសកម្មភាពនៃការហែលទឹកបានរួមបញ្ចូលការបន្សាំនៃការប្រើប្រាស់អុកស៊ីសែនពេលរាងកាយស្ថិតនៅក្រោមទឹក។ ម៉្យាងវិញទៀត វាក៏ជួយរក្សាបរិមាណខ្យល់នៅក្នុងសួត កាត់បន្ថយភាពតានតឹង លើកកម្ពស់ដំណើរឈាមរត់ឲ្យប្រសើរឡើង ព្រមទាំងធ្វើឲ្យអ្នកទទួលបានអារម្មណ៍រីករាយផងដែរ។ គួរកត់សម្គាល់ដែរថា ការថែរក្សាសុខភាពសួតឲ្យបានល្អ មិនស្ថិតនៅលើការទទួលទានអាហារដែលមានសារធាតុបំប៉នតែមួយមុខនោះទេ ប៉ុន្តែត្រូវគួបផ្សំជាមួយការធ្វើលំហាត់ប្រាណផងដែរ។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Health Tips Health Tips
Share
  • Mar 11, 2019 |
  • 5 years ago |
  • 2.8K views

តោះ! ចូលរួមសិក្សាវគ្គខ្លីផ្នែកហិរញ្ញវត្ថុសម្រាប់វិស័យគ្លីនិក/មន្ទីរពេទ្យ

តើអ្នកកំពុងគិតរៀបចំផែនការណ៍ដើម្បីបើកគ្លីនិក/មន្ទីរពេទ្យមែនទេ?ចុះតើអ្នកបានគិតដល់ជំនាញគ្រប់គ្រងហិរញ្ញវត្ថុដែលជាជំនាញដ៏សំខាន់ និងមិនអាចមើលរំលងបានហើយឬនៅ?  ការរៀបចំបើកបម្រើគ្លីនិក ឬមន្ទីរពេទ្យណាមួយ មិនអាចពឹងផ្អែកតែលើជំនាញបច្ចេកទេសក្នុងការផ្តល់សេវាកម្មព្យាបាលសម្រាប់អ្នកជំងឺតែប៉ុណ្ណោះទេ ការធានាឲ្យបាននូវភាពរលូន និងគុណភាពនៃដំណើរការទាំងអស់ក៏ត្រូវចូលរួមចំណែកពីផ្នែកផ្សេងៗផងដែរ ដូចជាចំណេះដឹងផ្នែកទីផ្សារ លក់ ការគ្រប់គ្រងធនធានមនុស្ស និងជាពិសេសចំណេះដឹងហិរញ្ញវត្ថុដែលជាផ្នែកចម្បងមួយសម្រាប់បន្តការរស់រានមានជីវិតរបស់គ្លីនិក ឬមន្ទីរពេទ្យនីមួយៗ។  ដោយមើលឃើញអំពីតម្រូវការបន្ថែម និងចាំបាច់របស់អ្នកប្រកបរបរវិជ្ជាជីវសុខាភិបាលទាំងឡាយទាក់ទងនឹងចំណេះដឹងក្នុងការគ្រប់គ្រងហិរញ្ញវត្ថុក្នុងគ្លីនិក/មន្ទីរពេទ្យ ហេលស៍ថាមក៏បានបង្កើតវគ្គសិក្សាខ្លីមួយឈ្មោះថា “ចំណេះដឹងហិរញ្ញវត្ថុ សម្រាប់អ្នកគ្រប់គ្រងមិនមែនជាអ្នកហិរញ្ញវត្ថុក្នុងវិស័យ គ្លីនិក/មន្ទីរពេទ្យ” ដែលនឹងប្រព្រឹត្តទៅរយៈពេល ២ថ្ងៃ ដោយផ្តោតសំខាន់អំពី៖ • ការបង្កើតគម្រោងហិរញ្ញវត្ថុសម្រាប់ មន្ទីរពេទ្យ/គ្លីនិក  • ការរៀបចំរចនាសម័្ពន្ធចំណូល និងចំណាយ • ការអភិវឌ្ឍលើផ្នែកតម្លៃឲ្យសមស្របនឹងគុណភាពសេវាកម្ម • របៀបពង្រីកមធ្យោបាយផ្សេងៗ ដើម្បីធ្វើឲ្យគ្លីនិក/មន្ទីរពេទ្យមានស្ថេរភាព ក្នុងរយៈពេល ២ថ្ងៃពេញ ដោយចាប់ពីថ្ងៃ សៅរ៍ ទី ១៦ ដល់ ថ្ងៃ អាទិត្យ ទី ១៧ ខែ មីនា ឆ្នាំ ២០១៩ នេះអ្នកចូលរួមនឹងទទួលបានការសិក្សាស្វែងយល់ពីសំណាក់វាគ្មិនកិត្តិយស ដែលនឹងធ្វើការចែករំលែកចំណេះដឹងរួមមាន៖ • ថ្ងៃទីមួយ នឹងមានការចូលរួមចែករំលែកចំណេះដឹង និងបង្រៀនអំពីការគ្រប់គ្រងហិរញ្ញវត្ថុចំពោះអ្នកមិនមែនជាអ្នកហិរញ្ញវត្ថុពីសំណាក់ លោក យន ម៉ាលឹមឆេង ដែលជាមន្រ្តីជំនាញជាន់ខ្ពស់ទទួលបន្ទុកថវិកានៃក្រសួងសេដ្ឋកិច្ច និងហិរញ្ញវត្ថុ ព្រមទាំងជាបុគ្គលដែលជោគជ័យក្នុងមុខជំនួញ និងមានបទពិសោធន៍អស់រយៈពេលជាច្រើនឆ្នាំនៅក្នុងស្ថាប័នរដ្ឋ។  • ថ្ងៃទីពីរ ក៏មានការចូលរួមដោយវាគ្មិនកិត្តិយសពីររូបបន្ថែមទៀតគឺ វេជ្ជបណ្ឌិត វ៉ា ជីវ័ន នាយកប្រតិបត្តិ អង្គការថែទាំសុខភាពគ្រួសារកម្ពុជា (រ៉ាក់) និងសាស្ត្រាចារ្យ ទន្តបណ្ឌិត សុខ ជា នាយកគ្រប់គ្រងទូទៅនៃមន្ទីរព្យាបាលមាត់ធ្មេញ សុខ ជា សម្រាប់កិច្ចពិភាក្សា និងការចែករំលែកបទពិសោធន៍ផ្ទាល់លើផ្នែកហិរញ្ញវត្ថុសម្រាប់គ្លីនិក/មន្ទីរពេទ្យ ក៏ដូចជាការសិក្សាបន្ត និងធ្វើការអនុវត្តលើមេរៀនអំពីហិរញ្ញវត្ថុក្នុងវិស័យសុខាភិបាលនេះផងដែរ។   វគ្គសិក្សាខ្លីនេះគឺជាសកម្មភាពសិក្សាបន្ថែម និងអនុវត្តផ្ទាល់ ដើម្បីជួយបំពេញតម្រូវដ៏សំខាន់សម្រាប់អ្នកគ្រប់គ្រងគ្លីនិក ឬមន្ទីរពេទ្យ។ លើសពីនេះការសិក្សានឹងអាចឲ្យអ្នកគ្រប់គ្រងត្រៀមខ្លួនបានជាមុន សម្រាប់ប្រតិបត្តិការគ្លីនិក/មន្ទីរពេទ្យឲ្យបានជោគជ័យ៕ «បើគ្រាន់តែមានផែនការគឺគ្មានន័យអ្វីទេ។ ការរៀបចំផែនការហើយយើងអាចសម្រេចបាននោះគឺជាអ្វីគ្រប់យ៉ាង។» សម្រាប់ការចូលរួម៖  វគ្គសិក្សាខ្លីពិសេស៖ ចំណេះដឹងហិរញ្ញវត្ថុ សម្រាប់អ្នកគ្រប់គ្រងមិនមែនជាអ្នកហិរញ្ញវត្ថុក្នុងវិស័យ គ្លីនិក/មន្ទីរពេទ្យ កាលបរិច្ឆេទ៖ សៅរ៍ ១៦ មីនា ២០១៩ និង ១៧ មីនា ២០១៩ (ពីរថ្ងៃ) វេលាម៉ោង៖ 08:00 ព្រឹក ដល់ម៉ោង 05:00 ល្ងាច ទីតាំង៖ បន្ទប់តូក្យូលេខ៩ នៅ មជ្ឈមណ្ឌលប្រតិបត្តិការកម្ពុជា-ជប៉ុន (CJCC)  តំលៃសំបុត្រ៖ ១០០ ដុល្លារ  សម្រាប់ពត៌មានបន្ថែម និងទំនាក់ទំនងជាវសំបុត្រ៖ 077 888 075 ផ្តល់ជូនអាហារសម្រន់ និងអាហារថ្ងៃត្រង់  * បញ្ចុះតម្លៃ១៥% សម្រាប់សមាជិកសហគមន៍Healthtime Pro  ***បញ្ជាក់៖ ចំនួនកន្លែងមានកំណត់!!! ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេង ឬថតចំលងគ្រប់រូបភាពដោយគ្មានការអនុញ្ញាតឡើយ

News & Events News & Events News & Events
Share
  • Mar 11, 2019 |
  • 5 years ago |
  • 5.8K views

អស់បារម្ភពីស្នាមមុនតូច ធំជាមួយវិធីសាស្រ្ត​ថ្មីៗ

ស្លាកស្នាមមុនជាផលវិបាកមួយដែលគួរឲ្យរំខានបន្ទាប់ពីបញ្ហាមុនបានកើតឡើងរួចរាល់ មិនត្រឹមតែផ្តល់ផលរំខានទៅលើផ្នែកសម្រស់ខាងក្រៅប៉ុណ្ណោះទេ វាក៏អាចបង្កជាបញ្ហាផ្លូវចិត្តថែមទៀតផង។ ដូច្នេះបើអ្នកចង់ដឹងអំពីវិធីសាស្ត្របំបាត់ស្លាកស្នាមនេះ សូមស្វែងយល់លម្អិតពីអាថ៌កំបាំងនៃដំណោះស្រាយទាំងនេះជាមួយវេជ្ជបណ្ឌិតឯកទេសស្បែកខាងក្រោម។ ប្រភេទនៃស្នាមមុន ស្លាកស្នាមមុនមានលក្ខណៈខុសៗគ្នាអាស្រ័យទៅតាមប្រភេទមុនដែលបានកើតឡើងលើមុខរបស់បុគ្គលម្នាក់ៗ ដែលមានច្រើនប្រភេទដូចជាពណ៌ក្រហម ពណ៌ក្រម៉ៅ ពណ៌ស បើសិនក្នុងអំឡុងពេលព្យាបាលតាមបច្ចេកទេសត្រឹមត្រូវ លក្ខណៈស្នាមទាំងនេះអាចជាសះស្បើយដោយខ្លួនឯងបានគ្រាន់តែចំណាយពេលយូរបន្តិច ចំណែកមុនដែលបណ្តាលមកពីមុនដែលមានការរលាក ការកខ្ទុះ អាប់សែ ឬគីសក្រោយជាសះស្បើយនឹងផ្តល់ជាស្លាកស្នាមដែលមិនអាចជាសះដោយខ្លួនឯង មានជាស្នាមពកផ្លែ និងខូងរូង ដែលជាទូទៅត្រូវចែកចេញជា២ប្រភេទធំៗគឺ Hypertrophic Acne Scar ឬ Keloid និង Atrophic ឬ Depressed Acne Scar ។ Hypertrophic Acne Scar ឬ Keloid ជាប្រភេទស្លាកស្នាមដែលជាដុំពកនៃជាលិកា ដោយសាររាងកាយផលិតកូឡាជែនច្រើនពេក ឬអាចហៅម៉្យាងទៀតថា ស្នាមផ្លែ  Atrophic or Depressed Acne Scar ជាប្រភេទស្លាកស្នាមខូងផតចូលក្នុងស្បែកដោយសារមានការបាត់បង់កូឡាជែន ដែលវាត្រូវបានចែកជា ៣ទម្រង់រួមមាន៖  • Ice Pick Scars ជាទម្រង់ស្លាកស្នាមតូច ជ្រៅអាចស៊ីចូលដល់ស្រទាប់ទី ២នៃស្បែក សភាពស្បែកមើលទៅហាក់ដូចជាត្រូវបានរបស់មុតស្រួចចាក់ចូលទៅជ្រៅ រូបរាងនៃស្នាមនេះអាចប្រៀបបានដូចជាអក្សរ V។  • Boxcar Scars មានរាងមូល ឬរាងក្រពើ ផត ខូងចុះក្រោមក្នុងជម្រៅមធ្យម រាក់ជាង Ice Pick Scars តែមានទំហំធំជាង Ice Pick Scars រូបរាងនៃស្នាមនេះអាចប្រៀបបានដូចជាអក្សរ U ប្រហាក់ប្រហែលនឹងស្លាកស្នាមក្រោយកើតអ៊ុតស្វាយ។  • Rolling Scars មានសភាពដូចទឹករលក មិនស្មើសាច់ មានទំហំតូចជាង ២មីលីម៉ែត្រ និងមានជម្រៅរាក់ស្រដៀង Boxcar Scars។ ប្រភេទបច្ចេកទេសបំបាត់ស្នាម រហូតដល់ពេលបច្ចុប្បន្នមានវិធីសាស្ត្រជាច្រើនដែលត្រូវបានយកមកព្យាបាលបំបាត់ស្លាកស្នាមស្របតាមប្រភេទនីមួយៗ៖  • Hypertrophic Acne Scar៖ តម្រូវឲ្យប្រើប្រាស់វិធីសាស្ត្រ ២រួមបញ្ចូលគ្នារវាងការប្រើសារធាតុរាវនីត្រូជែន (Nitrogen) និងការចាក់ថ្នាំ ទ្រីយ៉ាមស៊ីណូឡូន (Triamcinolone) ទៅលើស្នាមផ្លែ ឬការចាក់ថ្នាំ Triamcinolone និងបិតជែលស៊ីលីកូន (Silicone) ឬការចាក់ថ្នាំ Triamcinolone និងការបញ្ចាំងកាំរស្មីឡេសឺរៀងរាល់បួនសប្តាហ៍ម្តង ឬការរួមគ្នានៃការបញ្ចាំងកាំរស្មីឡេសឺប្រភេទ Vascular Specific Laser និងការបិតជែល ស៊ីលីកូន។ ក្រៅពីនេះ គេអាចធ្វើការវះកាត់ស្នាមផ្លែនេះតែម្តង រួចទើបធ្វើការចាក់ថ្នាំ Triamcinolone បន្ត។  • Atrophic Acne Scar៖ គ្រូពេទ្យអាចប្រើប្រាស់វិធីសាស្ត្រជួសជុលដោយសារធាតុគីមី ដូចជាលាបអាស៊ីត Trichloroacetic កំហាប់ ៦៥ ទៅ១០០% (TCA CROSS) ឬប្រើប្រាស់វិធីសាស្ត្រចាក់ម្ជុលក្រោមស្លាកស្នាម (Subcision) បូករួមជាមួយការបញ្ចាំងកាំរស្មីឡេសឺទៅលើស្នាមខូងដើម្បីភ្ញោចការផលិតកូឡាជែនឡើងវិញ ទៅតាមប្រភេទស្នាម៖ Ice Pick Scars៖ ត្រូវប្រើប្រាស់វិធីសាស្រ្ត TCA CROSS Technique ដោយលាបអាស៊ីត Trichloroacetic កំហាប់ ៦៥ ទៅ១០០% ចូលក្នុងស្នាមជ្រៅនោះ ឬអាចប្រើប្រាស់វិធីសាស្ត្រ PunchExcision។ Boxcar Scars៖ ប្រើប្រាស់វិធីសាស្ត្រ CROSS Technique ដោយលាប Trichloroacetic Acid លើស្នាមតូចៗ បូកជាមួយការប្រើឡេសឺប្រភេទ Ablative Laser Resurfacing, fractional laser, dermal fillers ឬRadiofrequency ។ Rolling Scars៖ អាចប្រើប្រាស់វិធីសាស្ត្រ ដោយម្ជុលកាត់ផ្តាច់កូឡាជែនឲ្យបង្កើតបំពេញជំនួសនូវកូឡាជែនថ្មីឡើងវិញ (Subcision) ឬ Dermal fillers ជាការចាក់បំពេញនូវ Hyaluronic ភ្លាមលើស្នាមខូងផត ជួនប្រើ Radiofrequency (RF), Fractional Laser ។ បុគ្គលដែលគួរទទួលយកការព្យាបាល ប្រសិនអ្នកធ្លាប់កើតមុនរលាក មុនខ្ទុះ មុនពកធំៗ ដែលបណ្តាលឲ្យមានស្លាកស្នាមប្រភេទខូងខ្លាំង ឬស្នាមផ្លែ ព្រមទាំងត្រូវប្រាកដថាបញ្ឈប់ការប្រើប្រាស់ថ្នាំប្រភេទ Isotretinoin ដែលជាថ្នាំបំបាត់មុនក្នុងរយៈពេល ៦ខែមិនមែនជាស្រ្តីមានផ្ទៃពោះ និងមិនមានប្រវត្តិកើតជំងឺរើម។ គុណសម្បត្តិ និងគុណវិបត្តិនៃការបំបាត់ស្នាម ក្រោយទទួលបានការព្យាបាល ស្បែកមុខរបស់អ្នកនឹងត្រឡប់មកសភាពស្មើស្រស់ស្អាត ម៉ត់ រលោងដូចធម្មតាវិញ ថែមទាំងបង្កើននូវទំនុកចិត្តលើខ្លួនឯងភាពសប្បាយចិត្តដែលជាលទ្ធផលអ្នកអាចកម្ចាត់បាននូវភាពតានតឹងដែលធ្លាប់កើតឡើង។ ការព្យាបាលនេះមិនបានបង្កជាផលវិបាកធ្ងន់ធ្ងរគួរឲ្យកត់សម្គាល់ឡើយបើក្នុងករណីទទួលបានការព្យាបាលតាមក្បួនបច្ចេកទេសត្រឹមត្រូវ គ្រាន់តែផ្តល់ផលរំខានដូចជា អាចធ្វើឲ្យក្រហមស្បែក ជួនស្នាមស និងឈឺចាប់បន្តិចបន្តួច ប៉ុន្តែវានឹងបាត់ទៅវិញក្នុងរយៈពេលកំណត់មួយ។ ទោះជាយ៉ាងណាក៏ដោយ ប្រសិនបើអ្នកមិនទទួលបានការព្យាបាលត្រឹមត្រូវទេនោះ ការប្រឈមនឹងការឆ្លងរោគ (Infection) និងភាពធ្ងន់ធ្ងរនៃស្លាកស្នាមនឹងអាចកើតមានឡើងផងដែរ។ គួរចងចាំថា ជំងឺមុនមិនមែនជាជំងឺដែលត្រូវព្យាបាលដោយខ្លួនឯងនោះទេអ្នកត្រូវមកទទួលការពិនិត្យ និងព្យាបាលដោយវេជ្ជបណ្ឌិតជំនាញសើស្បែកព្រោះថាបើការព្យាបាលមិនបានត្រឹមត្រូវ និងទាន់ពេលវេលា នឹងនាំមកនូវស្លាកស្នាមដែលពិបាកព្យាបាលជាពិសេស អ្នកដែលមានបញ្ហាស្លាកស្នាមខូង និងផ្លែដាច់ខាតត្រូវតែមកទទួលការព្យាបាលជាមួយគ្រូពេទ្យជំនាញ និងទីកន្លែងព្យាបាលដែលមានឧបករណ៍ទំនើបៗគ្រប់គ្រាន់ក្នុងការព្យាបាលក្នុងន័យដើម្បីចំណេញទាំងថវិកា ពេលវេលា ព្រមទាំងទទួលបាននូវសុវត្ថិភាពនិងប្រសិទ្ធភាពផងដែរ។ “ព្យាបាលកាន់តែឆាប់ កាន់តែមានប្រសើរ” បកស្រាយដោយ៖ វេជ្ជបណ្ឌិត ដេង អង្គាបុស្ស ឯកទេសជំងឺសើស្បែក កាមរោគ និងឡេសឺនាយរងផ្នែកជំងឺសើស្បែក និងកាមរោគនៃមន្ទីរពេទ្យមិត្តភាពខ្មែរ-សូវៀត ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Skin, STD & Beauty Skin, STD & Beauty Skin, STD & Beauty
Share
  • Mar 09, 2019 |
  • 5 years ago |
  • 2.7K views

ជំងឺបា​​យ​ភ្នែកអាចព្យាបាលឲ្យជាដោយមិនបាច់វះកាត់

ជំងឺបាយភ្នែក ធ្វើឲ្យមានការពិបាកក្នុងការមើល តែងកើតលើភ្នែកម្ខាង ឬសងខាង ពិសេសមនុស្សចាស់ អ្នកជំងឺទឹកនោមផ្អែម អ្នកជក់បារី ហើយជាទូទៅមានតែការវះកាត់ប៉ុណ្ណោះដែលជាវិធីសាស្ត្រប្រកបដោយប្រសិទ្ធភាព និងត្រូវបានណែនាំពីគ្រូពេទ្យឯកទេស។ យោងតាម Fred Hollow Foundation ប្រជាជនប្រហែលជាង ៣២.៤ លាននាក់នៅលើពិភពលោកកំពុងជួបភាពពិការភ្នែកដែលភាគច្រើនដោយសារជំងឺបាយភ្នែក។  ដោយឡែកថ្មីៗនេះ អ្នកវិទ្យាសាស្ត្រកំពុងសិក្សាលើការស្រាវជ្រាវថ្មីមួយនៅសហរដ្ឋអាមេរិក ដោយបង្កើតថ្នាំបន្តក់ភ្នែកផ្ទាល់តែម្តងសម្រាប់ការព្យាបាលជំងឺបាយភ្នែក ដោយថ្នាំនោះអាចមានលទ្ធភាពរំលាយវាបាន ព្រោះតែការវះកាត់មានតម្លៃថ្លៃ។ ដោយការសិក្សានេះ កំពុងបន្តស្រាវជ្រាវដើម្បីចៀសវាងផលវិបាកផ្សេងៗ ហើយគំហើញថ្មីនឹងចំណាយច្រើនបន្តិចក្នុងការផ្សាយចេញជាផ្លូវការ។ ក្នុងការសិក្សានោះដែរអ្នកវិទ្យាសាស្ត្របានធ្វើតេស្តនៅលើសត្វទន្សាយ លទ្ធផលទទួលបានក្នុងចំណោម ១៣ករណី មាន ២ករណីមានការប្រែប្រួលពីជំងឺបាយភ្នែកធ្ងន់ធ្ងរ ទៅជាធូរស្រាលបន្ទាប់ពីការពិសោធន៍មួយអាទិត្យដំបូងហើយអ្នកវិទ្យាសាស្រ្តទទួលបានលទ្ធផលដូចគ្នាក្នុងការពិសោធន៍ជាមួយនឹងសត្វឆ្កែផងដែរ។ ប្រសិនការស្រាវជ្រាវនេះជោគជ័យលើមនុស្ស វានឹងចេញលក់លើទីផ្សារ ហើយអាចជួយដល់អ្នកជំងឺបាយភ្នែកជាច្រើនក្នុងពិភពលោក។ ឯកសារយោង៖ - https://futurism.com/goodbye-surgery-scientists-just-made-eye-drops-that-dissolve-cataracts-2?fbclid=IwAR3JyUstCt-Tj5Lav3Fy9D2My9vt_DAu1pIZdIjpMXX9zMm8zg-kE9gDsyk - https://nei.nih.gov/health/cataract/cataract_facts ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events News & Events News & Events News & Events News & Events News & Events
Share
  • Mar 08, 2019 |
  • 5 years ago |
  • 4.5K views

ការថែទាំសម្រន់សម្រាប់ជំងឺមហារីកដំណាក់កាលចុងក្រោយ

ជំងឺមហារីក ជាជំងឺមិនឆ្លងចម្បងទី២ដែលសម្លាប់ប្រជាជនកម្ពុជា ព្រោះថាទម្រាំដឹងថាខ្លួនមានជំងឺដ៏កាចសាហាវនេះភាគច្រើននៃអ្នកជំងឺគឺហួសពេលក្នុងការព្យាបាលឲ្យជាសះស្បើយទៅហើយ។ អ្នកជំងឺនៅដំណាក់កាលចុងក្រោយនេះទទួលរងការឈឺចាប់យ៉ាងខ្លាំង ដែលពិបាក និងមិនអាចពិពណ៌នាបានអំពីទំហំនៃការឈឺចាប់ឲ្យអ្នកដទៃ ឬមនុស្សជាទីស្រឡាញ់របស់ពួកគាត់បានដឹងឡើយ។ នៅពេលដែលការព្យាបាលមិនអាចជាសះស្បើយបាន ការថែទាំបំបាត់ការឈឺចាប់ និងការថែទាំសម្រន់គឺមានសារសំខាន់ណាស់សម្រាប់អ្នកជំងឺមហារីកក្នុងដំណាក់កាលចុងក្រោយដោយផ្តល់ឲ្យពួកគាត់រស់នៅប្រកបដោយគុណភាព និងមានភាពសុខស្រួល។ និយមន័យការថែទាំសម្រន់ ការថែទាំសម្រន់ (Palliative care) គឺសំដៅទៅលើការលើកកម្ពស់គុណភាពជីវិតរបស់អ្នកជំងឺដែលប្រឈមការបាត់បង់ជីវិតទាំងផ្នែកផ្លូវកាយ ផ្លូវចិត្ត សង្គម និងជំនឿសាសនា។ គោលបំណងចម្បងមិនមែនដើម្បីព្យាបាលឲ្យជាសះស្បើយនោះទេ ប៉ុន្តែដើម្បីការពារ និងកាត់បន្ថយការឈឺចាប់ បំបាត់រោគសញ្ញារំខានផ្សេងៗដូចជាពិបាកដកដង្ហើម ក្អក ដង្ហក់។ល។ អ្នកជំងឺដែលត្រូវការការថែទាំសម្រន់ អ្នកជំងឺដែលស្ថានភាពជំងឺរបស់ពួកគាត់ធ្ងន់ធ្ងរហើយមិនអាចធ្វើការព្យាបាលឲ្យជាសះស្បើយបានជាពិសេសគឺជំងឺមហារីក។ អ្នកជំងឺផ្សេងទៀតដែលអាចទទួលបានការថែទាំសម្រន់ផងដែរគឺអ្នកជំងឺខ្សោយសរីរាង្គដំណាក់កាលចុងក្រោយ ដូចជាជំងឺក្រិនថ្លើមធ្ងន់ធ្ងរដែលអាចវិវឌ្ឍជាទាចទឹក និងជំងឺខ្សោយផ្លូវដង្ហើមធ្ងន់ធ្ងរដែលនាំឲ្យមានទឹកក្នុងសួតជាដើម។ ផលប្រយោជន៍នៃការថែទាំសម្រន់ ការថែទាំសម្រន់ពិតជាផ្តល់ផលប្រយោជន៍យ៉ាងច្រើនដល់អ្នកជំងឺ និងគ្រួសាររបស់គាត់ដែលក្នុងនោះមានដូចជា៖ • ផ្នែករាងកាយ៖ ជួយកាត់បន្ថយការឈឺចាប់ខ្លាំងពិបាកក្នុងការដកដង្ហើម ពិបាកបន្ទោបង់ និងរោគសញ្ញារំខានផ្សេងទៀតដែលអាចកើតឡើងពីជំងឺមហារីកផ្ទាល់ ឬការឈឺចាប់អំឡុងពេលព្យាបាល (ចាក់ថ្នាំគីមី ឬបាញ់កាំរស្មី) • ផ្នែកអារម្មណ៍៖ អាចជួយអ្នកជំងឺឲ្យរួចផុតពីជំងឺផ្លូវចិត្តដូចជា ជំងឺបាក់ទឹកចិត្ត (Depression) ឬជំងឺថប់បារម្ភ (Anxiety) ជាដើម • ផ្នែកសង្គម៖ អាចទទួលបានការលើកទឹកចិត្តពីក្រុមគ្រូពេទ្យជំនាញ ក្រុមគ្រួសារមិត្តភក្តិ និងអ្នករាប់អានទាំងអស់ឡើងវិញ • កាត់បន្ថយការចំណាយថវិកាពីការព្យាបាលដែលគ្មានប្រយោជន៍ចំពោះអ្នកជំងឺពីព្រោះក្នុងដំណាក់ចុងក្រោយនេះពុំអាចមានការព្យាបាលណាធ្វើឲ្យពួកគាត់បានជាសះស្បើយឡើយ • រក្សាបាននូវពេលវេលាចុងក្រោយដ៏មានតម្លៃដើម្បីឲ្យអ្នកជំងឺបំពេញការងារដែលគាត់ចង់ធ្វើជាពិសេសការចំណាយពេលវេលាជាមួយគ្រួសារជាទីស្រឡាញ់របស់គាត់។  ដើម្បីផ្តល់ជូនអ្នកជំងឺនូវការថែទាំដ៏ប្រសើរ គឺតម្រូវឲ្យមានការចូលរួមពីក្រុមវេជ្ជបណ្ឌិតឯកទេស និងក្រុមការងារដែលមានជំនាញជាច្រើនទៀតដូចជា៖ • វេជ្ជបណ្ឌិតឯកទេសថែទាំសម្រន់៖ ធ្វើការពិនិត្យពិគ្រោះ ចេញវេជ្ជបញ្ជាផ្តល់ថ្នាំ និងតាមដានស្ថានភាពជំងឺ • គិលានុបដ្ឋាក៖ ចូលរួមជាមួយវេជ្ជបណ្ឌិតក្នុងអំឡុងពេលពិគ្រោះជំងឺ ផ្តល់ថ្នាំទៅតាមវេជ្ជបញ្ជា និងពន្យល់ការប្រើប្រាស់ថ្នាំឲ្យបានត្រឹមត្រូវដល់អ្នកជំងឺ ឬក្រុមគ្រួសារ • អ្នកធ្វើការសង្គម៖ ផ្តល់ប្រឹក្សាផ្នែកផ្លូវចិត្តដល់អ្នកជំងឺឬ/និងក្រុមគ្រួសារអ្នកជំងឺដែលប៉ះពាល់ផ្លូវចិត្តធ្ងន់ធ្ងរ • ឱសថការី៖ គ្រប់គ្រងស្តុកថ្នាំ តាមដានការប្រើប្រាស់ថ្នាំប្រចាំថ្ងៃ ធ្វើរបាយការណ៍ប្រើប្រាស់ថ្នាំប្រចាំខែ។   បញ្ហាប្រឈមផ្សេងៗ គួរបញ្ជាក់ផងដែរថា មានការលំបាកមួយចំនួនដែលកំពុងប្រឈមប្រចាំថ្ងៃរបស់ក្រុមការងារបច្ចេកទេសវេជ្ជសាស្រ្តនៃអង្គការបំបាត់ការឈឺចាប់គ្មានព្រំដែនដែលមានដូចជា៖ • ពិបាកក្នុងការតាមដាន និងថែទាំអ្នកជំងឺជាប្រចាំ ព្រោះអ្នកជំងឺភាគច្រើននៅតាមទីជនបទដាច់ស្រយាលហើយដែលមិនមែនជាតំបន់គ្របដណ្តប់របស់អង្គការ DSF • ពិបាកក្នុងការទាក់ទង ដើម្បីមកពិគ្រោះជំងឺ និងទទួលថ្នាំ ឬតាមដានព័ត៌មានផ្សេងៗ • កង្វះថវិការបស់អ្នកជំងឺដើម្បីធ្វើដំណើរមកពិគ្រោះជំងឺ និងទទួលថ្នាំ នៅទីក្រុងភ្នំពេញ • ធនធានមនុស្សសម្រាប់បម្រើការងារនេះនៅមានកម្រិតនៅឡើយ • ដោយថវិកាមានកំណត់ជាមូលហេតុអង្គការ DSFមិនអាចពង្រីកសកម្មភាពថែទាំសម្រន់ដល់ផ្ទះអ្នកជំងឺឲ្យបានគ្រប់ខេត្ត ក្រុង។ សម្រាប់អ្នកជំងឺដែលស្ថិតក្នុងដំណាក់កាលចុងក្រោយ សូមកុំអស់សង្ឃឹមទោះបីជំងឺមិនអាចព្យាបាលឲ្យជាសះស្បើយក៏ដោយ ប៉ុន្តែនៅមានការថែទាំសម្រន់ដែលអាចផ្តល់ឲ្យក្នុងរយៈពេលចុងក្រោយដោយភាពសុខស្រួល។ ចំពោះក្រុមគ្រួសារអ្នកជំងឺ ត្រូវយកចិត្តទុកដាក់ និងមើលថែអ្នកជំងឺឲ្យបានល្អ ដើម្បីធានាឲ្យបាននូវទំនាក់ទំនង និងភាពស្និទ្ធស្នាល។ សម្រាប់ប្រជាជនគ្រប់រូបគួរតែពិនិត្យសុខភាពឲ្យបានទៀងទាត់ដើម្បីអាចដឹងពីស្ថានភាពជំងឺរបស់ខ្លួនបានឆាប់ និងទទួលបានការព្យាបាលទាន់ពេលវេលា។ "ការថែទាំសម្រន់ផ្តោតសំខាន់លើ គុណភាពជីវិតជាជាងបរិមាណជីវិត" អង្គការ DSF បង្កើតនៅឆ្នាំ១៩៩៦ ជាអង្គការតែមួយគត់ដែលធ្វើសកម្មភាពផ្តល់ការថែទាំសម្រន់ដល់អ្នកជំងឺមហារីកដំណាក់កាលចុងក្រោយក្នុងពេលបច្ចុប្បន្ន។ប្រសិនបើអ្នកបានស្គាល់អ្នកជំងឺមហារីកដំណាក់កាលចុងក្រោយ ដែលមិនអាចព្យាបាលឲ្យជាសះស្បើយបាន ហើយកំពុងរស់នៅជាមួយការឈឺចាប់ដោយសារជំងឺរបស់គាត់ និងអស់សង្ឃឹមក្នុងជីវិត សូមទាក់ទងមកកាន់អង្គការបំបាត់ការឈឺចាប់គ្មានព្រំដែនតាមរយៈលេខទូរស័ព្ទ ០២៣ ២១៤ ៩៥៤ ដើម្បីទទួលបានការថែទាំសម្រន់។ បកស្រាយដោយ៖ វេជ្ជបណ្ឌិត ម៉េង ឡាង ឯកទេសជំងឺទូទៅ និងជំនាញថែទាំសម្រន់នៃអង្គការបំបាត់ការឈឺចាប់គ្មានព្រំដែន (DSF) ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ   

Cancer & Blood Disease Cancer & Blood Disease Cancer & Blood Disease
Share
  • Mar 07, 2019 |
  • 5 years ago |
  • 4.9K views

ហាត់ប្រាណហើយហេតុអ្វីទម្ងន់មិនស្រក?

ធ្វើលំហាត់ប្រាណជាប្រចាំ តែទម្ងន់ខ្លួននៅតែគ្មានភាពប្រែប្រួល នេះប្រហែលជាបញ្ហាមួយតែងចោទ និងធ្វើឲ្យគោលដៅនៃការសម្រកទម្ងន់ត្រូវបានបរាជ័យដែលជារឿងគួរឲ្យធុញទ្រាន់ និងអាចឈានដល់ដំណាក់កាលដែលសម្រេចថានឹងបោះបង់ចោល។ប៉ុន្តែ មុនពេលអ្នកសម្រេចចិត្តថានឹងបន្តរស់នៅជាមួយការឡើងទម្ងន់ជារៀងរហូតអ្នកគួរសង្កេតមើលឡើងវិញពីកត្តាផ្សេងទៀតដែលបង្អាក់ការសម្រកទម្ងន់របស់អ្នកក្រៅពីការធ្វើលំហាត់ប្រាណ។ កំហុសឆ្គងក្នុងការហាត់ ប្រហែលវាជាហេតុផលមួយដែលគួរឲ្យធុញទ្រាន់បំផុតដែលទម្ងន់ខ្លួនហាក់មិនស្រកទាល់តែសោះ បើទោះបីអ្នកប្រឹងប្រែងហាត់ប្រាណជាប្រចាំក៏ដោយ ប៉ុន្តែអ្វីដែលនៅពីក្រោយពីប្រសិទ្ធភាពនៃលំហាត់ប្រាណដែលអ្នកមិនបានដឹងនោះ គឺការជ្រើសរើសប្រភេទលំហាត់ប្រាណ ឬកីឡាណា ដែលស័ក្តិសមសម្រាប់ការបន្ថយទម្ងន់ និងទៅតាមតម្រូវការបុគ្គលម្នាក់ៗ។ ជាក់ស្តែង បុគ្គលមួយចំនួនមានទំនោរធ្វើលំហាត់ប្រាណដោយគ្រាន់តែការដើរ ឬរត់សាមញ្ញ និងមិនបានហ្វឹកហាត់សាច់ដុំ ដូច្នេះចៀសវាងចំណាយពេលដោយឥតប្រយោជន៍ អ្នកគួរសិក្សាជាមុន ឬអាចស្វែងរកការណែនាំពីសំណាក់អ្នកជំនាញក្នុងការចាប់ផ្តើមលំហាត់ប្រាណណាមួយដែលល្អសម្រាប់ខ្លួនអ្នក។  ហាត់ប្រាណហួសកម្រិត ប្រសិនអ្នកធ្វើលំហាត់ប្រាណច្រើន នោះការដុតបំផ្លាញកាល់ឡូរីក៏ស្ថិតក្នុងកម្រិតច្រើនហួសប្រមាណ (លើសពី ១២០០កាល់ឡូរីក្នុងមួយថ្ងៃ) ដែលមិនអំណោយផលដល់ការហាត់នោះទេ វាបែរជានាំឲ្យរាងកាយអ្នកបង្កើនតម្រូវការអាហារក្នុងទម្រង់ជាខ្លាញ់ ដើម្បីអាចបន្តផ្តល់ថាមពលសម្រាប់ការបំពេញមុខងារប្រចាំថ្ងៃទៅវិញ។ ជារួមអ្នកគួរហាត់ប្រាណក្នុងកម្រិតមួយដែលរាងកាយអាចទទួលយកបាន និងជាប្រសិទ្ធភាពសម្រាប់ការសម្រកទម្ងន់។ កើនឡើងទម្ងន់សាច់ដុំ ស្របពេលដែលជាតិខ្លាញ់ត្រូវបានដុតបំផ្លាញតាមរយៈការហាត់ប្រាណ ខ្លួនប្រាណអ្នកក៏អាចកំពុងតែបង្កើននូវទម្ងន់នៃសាច់ដុំ (ភាពហាប់ណែន) ដែលធ្វើឲ្យអ្នកយល់ថាទម្ងន់ខ្លួនប្រាណហាក់គ្មានភាពប្រែប្រួល។ យ៉ាងណាមិញ ការកើនឡើងនេះមិនត្រូវបានចាត់ចូលជាបញ្ហាក្នុងការសម្រកទម្ងន់នោះទេ ដរាបណាអ្នកអាចធ្វើការគ្រប់គ្រងបានចំពោះជាតិខ្លាញ់ដែលមាននៅក្នុងខ្លួន។ យកល្អ អ្នកគួរធ្វើការហាត់ដើម្បីបំផ្លាញជាតិខ្លាញ់ ជាជាងព្រួយបារម្ភពីទម្ងន់នៃសាច់ដុំ។  ប៉ះប៉ូវតាមការញ៉ាំ ប្រសិនអ្នកបន្តការញ៉ាំក្នុងកម្រិតដែលខ្ពស់ជាង ចំនួនកាល់ឡូរីដែលអ្នកបានដុតបំផ្លាញបន្ទាប់ពីការហាត់ប្រាណ នៅក្រោមហេតុផលដែលអ្នកចង់ផ្តល់រង្វាន់ ឬប៉ះប៉ូវសម្រាប់ការប្រឹងប្រែងរបស់អ្នកនោះ វាជាកំហុសឆ្គងមួយ បណ្តាលឲ្យបាត់បង់គោលដៅក្នុងការសម្រេចបានការស្រកទម្ងន់។ ដូច្នេះ កុំឲ្យការប្រឹងប្រែងប្រែជាអាសាបង់ អ្នកគួរចៀសវាងបរិភោគអាហារទៅតាមការចង់បាន តែជំនួសមកវិញនូវរបបអាហារ ដែលជាពពួកប្រូតេអ៊ីន បន្លែ ផ្លែឈើនិងបង្កើនការញ៉ាំទឹកបន្ថែមឲ្យបានច្រើន។ មិនបានគ្រប់គ្រងស្រេ្តស ពិតណាស់លំហាត់ប្រាណជារឿងល្អតែទាមទារការអត់ធ្មត់ខ្ពស់ ដែលវាអាចជាកត្តាបង្កភាពស្រេ្តសទៅលើរាងកាយរបស់អ្នកទៅវិញ។ ប្រសិនការហាត់ប្រាណត្រូវបានចាត់ទុកជាបន្ទុកបន្ថែមពីលើការបំពេញការងារប្រចាំថ្ងៃរបស់អ្នក នោះប្រាកដណាស់អ្នកនឹងមិនអាចស្រកទម្ងន់ទៅតាមការរំពឹងទុកនោះទេ ដោយវាអាចធ្វើឲ្យអ្នកផ្លាស់ប្តូរមិនត្រឹមតែការញ៉ាំនោះទេ ថែមទាំងបាត់បង់គុណភាពនៃការគេងផងដែរ។ ជាទូទៅការគេងមិនបានគ្រប់គ្រាន់អាចនាំឲ្យអ្នកញ៉ាំកាន់តែច្រើន ជាពិសេសចំពោះអាហារដែលមានកម្រិតជាតិស្ករខ្ពស់ ដែលវាអាចប៉ះពាល់ដល់ការសម្រកទម្ងន់របស់អ្នក។ កុំបោះបង់ការតាំងចិត្ត បើទោះបីលទ្ធផលហាក់មិនទាន់ផ្តល់ឲ្យ ពីព្រោះការហាត់ប្រាណជាចំណែកមួយតែប៉ុណ្ណោះ ក្នុងការបំពេញគោលដៅរបស់អ្នកសម្រាប់ការសម្រកទម្ងន់ ដោយអ្នកត្រូវយកចិត្តទុកដាក់ផងដែរទៅលើរបបអាហារ របៀបរបបរស់នៅ និងផ្លូវចិត្តក្នុងការបន្តដំណើរទៅមុខ។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Weight Management
Share
  • Mar 06, 2019 |
  • 5 years ago |
  • 4.2K views

ឈឺក្បាលរាល់ព្រឹក គួរប្រើថ្នាំទេ?

“អាការៈឈឺក្បាលតែងកើតឡើងជាធម្មតាដោយសារហេតុផលច្រើនយ៉ាងដូចជាការគេងមិនគ្រប់គ្រាន់ ស្រេ្តស ឬការជួបប្រទះនឹងរឿងរ៉ាវដែលតែងកើតមានប្រចាំថ្ងៃ ប៉ុន្តែប្រសិនអ្នកឈឺនៅពេលព្រឹកព្រលឹមវិញនោះ មូលហេតុអាចមានលើសពីនេះ។” សំណួរ៖ ខ្ញុំបាទអាយុ២១ឆ្នាំ កម្ពស់១ម៉ែត្រ៧០ ទម្ងន់៥៦គីឡូក្រាម មុខរបរជាបុគ្គលិកផ្នែកលក់ក្នុងក្រុមហ៊ុនឯកជនមួយ។ រយៈពេលជាង ៥ខែមកនេះ ខ្ញុំតែងឈឺក្បាលរាល់ព្រឹក បន្ទាប់ពីក្រោកពីគេង និងមានអាការៈវិលមុខជាប្រចាំ។ ខ្ញុំមិនធ្លាប់បានទៅព្យាបាល ឬប្រើថ្នាំប្រចាំកាយអ្វីមួយទេ។ តើរោគសញ្ញាខាងលើបណ្តាលមកពីមូលហេតុអ្វី? តើខ្ញុំគួរធ្វើដូចម្តេច? ចំលើយ៖ ចំពោះការឈឺក្បាលនៅពេលព្រឹក បន្ទាប់ពីក្រោកពីគេង អាចកើតមានលើមនុស្សទូទៅដូចគ្នា។ ហេតុនេះចំពោះករណីប្អូនគួរពិចារណាថា តើគេងបានគ្រប់គ្រាន់ទេ មានយល់សប្តិពេលគេង ឬអត់ មានឈឺក្បាល ក្អួតចង្អោរ ឬព្រិលភ្នែកដែរឬទេ? បើមានករណីទាំងនេះបន្ថែមពីការឈឺក្បាល គួរតែទៅជួបវេជ្ជបណ្ឌិត មានជំនាញឯកទេសខាងជំងឺខួរក្បាល។ គួរចងចាំថាចំពោះការឈឺក្បាលណាដែលមិនចាំបាច់ព្យាបាល គួរកុំផ្សំថ្នាំញ៉ាំដោយខ្លួនឯងដោយមិនបានឆ្លងកាត់ការប្រឹក្សាយោបល់ជាមួយវេជ្ជបណ្ឌិត ហើយចំពោះជំងឺខ្លះអាចទទួលដំបូន្មានពីគ្រូពេទ្យ ដោយចាំបាច់ប្រើប្រាស់ថ្នាំបានតាមវេជ្ជបញ្ជា ឬមិនចាំបាច់ក៏អាចធ្វើឲ្យជំងឺជាសះស្បើយបាន។ បកស្រាយដោយ៖ សាស្ត្រាចារ្យវេជ្ជបណ្ឌិត ជុំ ណាវុធ ឯកទេសប្រព័ន្ធសរសៃប្រសាទ សរសៃឈាម នាយផ្នែកសរសៃប្រសាទខួរក្បាលនៃមន្ទីរពេទ្យមិត្តភាពខ្មែរ-សូវៀត ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Neurology Neurology
Share
  • Mar 05, 2019 |
  • 5 years ago |
  • 4.7K views

អត្ថប្រយោជន៍ និងផលវិបាកនៃការតរោមភ្នែក

ការតរោមភ្នែកបច្ចុប្បន្ន គឺជាទីពេញនិយមសម្រាប់នារីសម័យថ្មីទាំងឡាយ ព្រោះការតរោមភ្នែកនេះវាជួយលើកសម្រស់ផ្ទៃមុខនារីៗឲ្យកាន់តែស្អាតមួយកម្រិតទៀត។ យ៉ាងណាមិញ គ្លីនិកហ្វេសឡាញខេមបូឌៀ សូមបង្ហាញពីអត្ថប្រយោជន៍ និងផលវិបាក និងអត្ថប្រយោជន៍មួយចំនួន នៃការតរោមភ្នែកដូចខាងក្រោម៖ អត្ថប្រយោជន៍ប្រយោជន៍នៃការតរោមភ្នែក ធ្វើឲ្យភ្នែកមានភាពទាក់ទាញលើកសម្រស់ផ្ទែមុខបានមួយកម្រិតបន្ថែមទៀត។ ការតរោមភ្នែកមានភាពងាយស្រួលដល់មិត្តនារី ដោយមិនចាំបាច់បិតរោមភ្នែកជារៀងរាល់ថ្ងៃ ហើយអ្នកអាចជ្រើសរើសទំហំ កម្រាស់ និងប្រវែងតាមចំណង់ចំណូលចិត្តទៀតផង។ ការតរោមភ្នែកដែលជ្រើសរើសគ្លីនិកត្រឹមត្រូវនឹងមិនផ្តល់ឲ្យអ្នកមានការឈឺចាប់ អាចផ្តល់ជូនលោកអ្នកនូវសរសៃរោមភ្នែកទន់ និងការប្រើកាវដែលមិនប៉ះពាល់សុខភាពភ្នែក ជួយរក្សាសម្រស់ភ្នែកឲ្យស្អាតបានយូរ និងមិនធ្វើឲ្យដាច់រោមភ្នែក។ ផលវិបាកក្រោយការតរោមភ្នែក  ប្រសិនបើការតរោមភ្នែកមិនប្រព្រឹត្តទៅត្រឹមត្រូវ ភ្នែករបស់អ្នកនាងអាចមានបញ្ហាដូចជា៖ ខុសទម្រង់ភ្នែក ដាច់រោមភ្នែក រលាកគល់រោមភ្នែក។ ដូច្នេះ មិត្តនារីគួរមានការសម្រេចចិត្តឲ្យបានត្រឹមត្រូវ មុនជ្រើសរើសគ្លីនិក ដើម្បីទទួលយកការតរោមភ្នែកដែលអ្នករំពឹងទុក។ តំហែទាំក្រោយការតរោមភ្នែក ក្រោយទទួលបានការតរោមភ្នែកពីគ្លីនិកដែលអាចផ្តល់សុវត្ថភាពសម្រស់ភ្នែករបស់អ្នកហើយ មិត្តនារីគួរយកចិត្តទុកដាក់ធ្វើតំហែទាំឲ្យបានត្រឹមត្រូវ ដើម្បីរក្សារោមភ្នែកឲ្យវែងស្អាតបានយូរ។ ទាំងនេះ ជាចំណុចមួយចំនួនដែលមិត្តអ្នកនាងគួរធ្វើ បន្ទាប់ពីទទួលការតរោមភ្នែករួច៖  -បន្ទាប់ពីទទួលការតរោមភ្នែកហើយ មិត្តនារីគួរចៀសវាងការធ្វើឲ្យរង្វង់ភ្នែកសើមរយៈពេល៤ ទៅ៥ម៉ោង ដើម្បីចាំឲ្យកាវបានស្ងួតល្អ។  -រាល់ពេលលាងមុខ មិនត្រូវញីខ្លាំងនៅត្រង់បរិវេណភ្នែក មិនត្រូវមានទម្លាប់ច្បូត ឬទាញរោមភ្នែកលេងដែលធ្វើឲ្យរោមភ្នែកស្អាតរបស់មិត្តអ្នកនាងឆាប់ជ្រុះចេញក្នុងរយៈពេលខ្លី។  -មិត្តនារីមិនចាំបាច់ប្រើម៉ាស្ការ៉ាសិតបន្ថែមទៅលើរោមភ្នែកដែលតហើយនោះឡើយ ព្រោះថាការប្រើម៉ាស្ការ៉ាអាចធ្វើឲ្យរោមភ្នែករបស់អ្នកនាងឆាប់ជ្រុះទៅវិញទេ។

Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty
Share
  • Mar 05, 2019 |
  • 5 years ago |
  • 4.2K views

ចំណេះដឹងខ្លះៗ អំពីការធ្វើចិញ្ចើម

ការប៉ាក់ចិញ្ចើម គឺជា semi-permanent makeup វាធ្វើឲ្យចិញ្ចើមរបស់អ្នកស្អាតក្នុងរយៈពេលវែង។ ការប៉ាក់ចិញ្ចើមបច្ចុប្បន្ន គឺជាទីពេញនិយមរបស់ស្ត្រីដែលចូលចិត្តធ្វើការតុបតែងមុខ តែមិនសូវពូកែគូសចិញ្ចើម ឬមិនសូវមានពេលវេលាគ្រប់គ្រាន់ក្នុងការតុបតែងមុខរៀងរាល់ថ្ងៃ ដូច្នេះ ពួកគាត់ជ្រើសរើសយកការប៉ាក់ចិញ្ចើម ដើម្បីជួយសន្សំពេលវេលារបស់គាត់។ ដើម្បីទទួលបានចិញ្ចើមស្អាត មិនអាចគ្រាន់តែសម្រេចចិត្តថាប៉ាក់ហើយក៏ទៅប៉ាក់បានទេ ត្រូវការឲ្យមិត្តនារីជ្រើសរើសកន្លែងប៉ាក់ឲ្យបានត្រឹមត្រូវផងដែរ ព្រោះថាការប៉ាក់ចិញ្ចើមនៅកន្លែងដែលមិនមានការសិក្សាច្បាស់លាស់ បច្ចេកទេសនឹងមិនមានលក្ខណៈស្តង់ដា ការប្រើទឹកថ្នាំមិនល្អ ទឹកថ្នាំអាចបែកទៅជាក្រហម ឬខៀវ បើសិនជាទឹកថ្នាំមានលាយជាតិគីមីខ្ពស់ អាចប៉ះពាល់ដល់សុខភាពរបស់លោកអ្នក។ រីឯការគូសទម្រង់ និងរាងចិញ្ចើមដែលគ្មានជំនាញ និងធ្វើឲ្យចិញ្ចើមមិនសាកសមជាមួយទម្រង់មុខ ឬទម្រង់ចិញ្ចើមសងខាងមិនដូច ឬស្មើគ្នា។ ការឆូតដែលគ្មានជំនាញច្បាស់លាស់ នឹងនាំលោកអ្នកប្រឈមនឹងការរលាកធ្ងន់ធ្ងរនៅបរិវេណដែលធ្វើរួច អាចទៅជាកើតសំលាក ឬផ្លែសាច់ក្រោយការធ្វើ។ ចំពោះការប៉ាក់ចិញ្ចើមនៅ គ្លីនិកកែសម្ផស្សហ្វេសឡាញ ហៅថា Microblading ។ លក្ខណៈពិសេសទាំងបី ដែលគ្លីនិកយើងមាននោះគឹ ៖ ការប្រើផលិតផលដែលផលិតពីប្រទេស Austria ទឹកថ្នាំដែលផ្សំពីធាតុផ្សំធម្មជាតិមិនប់ះពាល់ដល់សុខភាព និងស្បែក និងមិនងាយប្រែពណ៌ក្លាយទៅជាក្រហម ឬខៀវ បន្ទាប់ពីធ្វើរួច។ យើងធ្វើតាមបច្ចេកវិទ្យាពិសេសរបស់ Phi-brows ដែលល្បីនៅអឺរ៉ុបនិង អាស៊ី។ ឧបករណ៍វាស់ និងគូសរូបរាងចិញ្ចើមដែលល្អជាងគេបំផុត ដែលអាចផ្តល់ឲ្យការគូសចិញ្ចើមសមស្របមួយទៅនឹងទម្រង់មុខ និងលើករាសី។ បច្ចេកទេសនៃការប៉ាក់ចិញ្ចើមឲ្យមើលទៅឃើញដូចជាចិញ្ចើមធម្មជាតិពិតៗ និងមានទម្រង់ស្អាតសាកសមនឹងទម្រង់មុខ។ អនាម័យខ្ពស់ ចៀសវាងបាននូវផលវិបាកក្រោយពេលប៉ាក់ ដូចជាការលាក សំលាក ឬស្នាម ការហើម និងការឈឺចាប់។ យើងមានផ្តល់ជូននូវផលិតផលថែរក្សាក្រោយពេលប៉ាក់រួច ដែលអាចធានានូវលទ្ធផលល្អ និងសុវត្ថិភាពសម្រាប់ស្បែក។ លទ្ធផល៧០%នៃការធ្វើ Microblading គឺអាស្រ័យលើការថែទាំជាមួយនឹងផលិតផលដែលមានគុណភាព និងការថែទាំ។ មិត្តនារីអានអត្ថបទនេះហើយ គួរមានការប្រុងប្រយ័ត្នក្នុងការជ្រើសរើសគ្លីនិក ដើម្បីធ្វើការផ្លាស់ប្តូររូបរាងចញ្ចើមរបស់អ្នកនាង...

Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty Skin, STD & Beauty
Share
  • Mar 05, 2019 |
  • 5 years ago |
  • 3.9K views

សញ្ញាបញ្ជាក់ពីជំងឺភ័យខ្លាចក្រោ​​​​​យ​​​​មា​ន​​​គ្រោះ​​​​ថ្នាក់

ជំងឺភ័យខ្លាចក្រោយពេលមានគ្រោះថ្នាក់ ឬ​ Post-Traumatic Stress Disorder (PTSD) គឺជាបញ្ហាសុខភាពផ្លូវចិត្តដែលត្រូវបានបង្កឡើងដោយព្រឹត្តិការណ៍ដ៏គួរឲ្យរន្ធត់មួយដែលអ្នកបានឆ្លងកាត់ ឬបានឃើញហេតុការណ៍ណាមួយដោយផ្ទាល់ ហើយវាហាក់បីដូចជានៅដក់ជាប់ក្នុងខួរក្បាល និងលងបន្លាចអ្នកជានិច្ច។ រោគសញ្ញាដែលអ្នកជំងឺតែងជួបប្រទះមានដូចជាភាពញឹកញាប់នៃការរំឭកហេតុការណ៍នោះឡើងវិញសុបិន្តអាក្រក់ និងការថប់បារម្ភកម្រិតធ្ងន់ធ្ងរ ព្រមទាំងមិនអាចគ្រប់គ្រងការគិតអំពីព្រឹត្តិការណ៍នោះបាន។ ជំងឺភ័យខ្លាចនេះអាចបង្កជាផលវិបាកយ៉ាងធ្ងន់ធ្ងរណាស់ដល់សុខភាពផ្លូវចិត្ត ផ្លូវកាយ សមត្ថភាពក្នុងការធ្វើការងារប្រចាំថ្ងៃ ការប្រាស្រ័យទាក់ទងក្នុងសង្គម ហើយពេលខ្លះអាចឈានដល់ការធ្វើអត្តឃាតទៀតផង ប្រសិនបើអ្នកជំងឺមិនបានទទួលការព្យាបាលឲ្យបានទាន់ពេលវេលានោះទេ។   បើយោងតាមមជ្ឈមណ្ឌលជាតិព្យាបាលជំងឺ PTSD របស់សហរដ្ឋអាមេរិកបានឲ្យដឹងថា ដើម្បីព្យាបាលជំងឺនេះឲ្យកាន់តែមានប្រសិទ្ធភាព អ្នកជំងឺត្រូវទទួលការព្យាបាលពីរប្រភេទ គឺការព្យាបាលដោយប្រើប្រាស់ថ្នាំ និងមិនប្រើប្រាស់ថ្នាំ។ ខណៈពេលដែលការសិក្សាជាច្រើនបានបង្ហាញថាការប្រើប្រាស់ថ្នាំបានជួយបំបាត់រោគសញ្ញាបានលឿន ចំណែកការព្យាបាលដោយមិនប្រើប្រាស់ថ្នាំក៏អាចជួយសម្រាលអាការៈយ៉ាងសន្សឹមៗ និងមានប្រសិទ្ធភាពផងដែរ។ ម៉្យាងវិញទៀត អ្នកជំងឺត្រូវប្រញាប់ស្វែងរកការព្យាបាលឲ្យបានកាន់តែឆាប់កាន់តែប្រសើរ ដោយហេតុថាការព្យាបាលនៅដំណាក់កាលដំបូងអាចទទួលបានប្រសិទ្ធភាពខ្ពស់ ហើយងាយក្នុងការព្យាបាល។ ដូច្នេះ ដើម្បីជាជំនួយក្នុងការបញ្ជាក់ថាអ្នកកំពុងមានជំងឺនេះ អ្នកអាចឆ្លើយនឹងសំណួរចំនួន ៨ ខាងក្រោម។ ប្រសិនបើអ្នកឆ្លើយថា “យល់ព្រម” ចាប់ពី ៣ សំណួរឡើងទៅ នោះអ្នកប្រហែលជាអាចមានជំងឺភ័យខ្លាចពិតប្រាកដមែន ហេតុនេះអ្នកចាំបាច់គួរតែទៅជួបជាមួយគ្រូពេទ្យជំនាញដើម្បីពិនិត្យ និងព្យាបាលឲ្យបានត្រឹមត្រូវ។ សំណួរទាំងនោះមានដូចតទៅ៖ ១. តើអ្នកធ្លាប់ជួបប្រទះជាមួយព្រឹតិ្តការណ៍ដែលអាចគ្រោះថ្នាក់ដល់ជីវិត ឬការរំលោភបំពានផ្លូវកាយ និងផ្លូវចិត្តដែរទេ? ២. តើព្រឹតិ្តការណ៍ទាំងនោះបានធ្វើឲ្យអ្នកមានអារម្មណ៍ភ័យខ្លាច ឬធ្វើឲ្យ អ្នកអស់សង្ឃឹមយ៉ាងខ្លាំងក្នុងជីវិតមែនទេ? ៣.តើអ្នកពិបាកក្នុងការជម្រុះចោលហេតុការណ៍ទាំងនោះចេញពីជីវិតមែនទេ? ៤. តើអ្នកយល់ថា អ្នកងាយភ្ញាក់ផ្អើល មានភាពឆេវឆាវ តានតឹង ឆាប់ខឹងជាងកាលពីមុនដែលអ្នកមិនទាន់ជួបព្រឹត្តិការណ៍នេះមែនទេ? ៥. តើអ្នកតែងព្យាយាមចៀសពីសកម្មភាព ឬមនុស្សម្នាទាំងឡាយដែលធ្វើឲ្យអ្នកអាចគិតដល់ព្រឹតិ្តការណ៍នោះឡើងវិញមែនទេ? ៦. តើបញ្ហាពិបាកគេង ឬពិបាកក្នុងការផ្ចង់អារម្មណ៍របស់អ្នកកាន់តែមានភាពធ្ងន់ធ្ងរជាងពេលដែលអ្នកមិនទាន់ជួបព្រឹតិ្តការណ៍នោះមែនទេ? ៧. តើអាការៈនេះកើតឡើងរយៈពេលលើសពី១ខែហើយមែនទេ? ៨. តើបញ្ហានេះបណ្តាលឲ្យអ្នកពិបាកក្នុងការធ្វើការងារប្រចាំថ្ងៃ និងការងារផ្សេងៗទៀតមែនឬទេ? ប្រសិនបើអ្នកមានការស្ទាក់ស្ទើរក្នុងការស្វែងរកជំនួយ សូមចងចាំក្នុងចិត្តថា  PTSD មិនមែនជាសញ្ញានៃភាពទន់ខ្សោយនោះទេ ហើយវិធីតែមួយគត់ដើម្បីយកឈ្នះវាបានគឺ ហ៊ានប្រឈមមុខនឹងអ្វីដែលបានកើតឡើងចំពោះអ្នក ព្រមទាំងរៀនទទួលស្គាល់ថាវាជាផ្នែកមួយនៃអតីតកាលរបស់អ្នកតែប៉ុណ្ណោះ។ គួរបញ្ជាក់ថា ដំណើរការនេះនឹងកាន់តែមានភាពងាយស្រួលនៅពេលដែលអ្នកទទួលបានការណែនាំ និងការគាំទ្រពីអ្នកជំនាញ ឬគ្រូពេទ្យឯកទេស។​ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Mental Health​ & Entertainment Mental Health​ & Entertainment
Share
  • Mar 04, 2019 |
  • 5 years ago |
  • 3.2K views

អាថ៌កំបាំងនៃការឲ្យទារកប៉ះទ្រូងម្តាយភ្លាមក្រោយកើត

ការឲ្យទារកប៉ះស្បែកម្តាយក្រោយពេលកើតភ្លាម ត្រូវបានហៅម៉្យាងទៀតថា “ស្បែកប៉ះស្បែក” ឬ “ការថែរក្សាកូនតាមបែបសត្វកង់ហ្គូរូ”។ វិធីសាស្ត្រនេះត្រូវ បានអនុវត្តទូទាំងពិភពលោក ក្នុងគោលបំណងជួយទារកសម្របខ្លួនទៅនឹងជីវិតនៅខាងក្រៅស្បូន និងជួយម្តាយដើម្បីចាប់ផ្តើមបំបៅកូនដោយទឹកដោះម្តាយព្រមទាំងដើម្បីបង្កើតទំនាក់ទំនងជិតស្និទ្ធរវាងកូន និងម្តាយទៀតផង។ ស្បែកប៉ះស្បែកក៏ជួយដល់ការលូតលាស់ផ្នែករាងកាយ និងចិត្តរបស់កូនផងដែរ។ អ្វីជាស្បែកប៉ះស្បែក? វិធីសាស្ត្រនេះជាទូទៅត្រូវបានសំដៅដល់ការអនុវត្តដែលទារកត្រូវបានជូតឲ្យស្ងួតជាមុន រួចយកទៅដាក់ផ្ទាល់ទៅលើទ្រូងរបស់ម្តាយក្រោយពេលសម្រាលទាំងម្តាយទាំងកូនត្រូវបានគ្របដណ្តប់ដោយភួយដ៏កក់ក្តៅជាមួយគ្នា និងទុកចោលយ៉ាងហោចណាស់មួយម៉ោង ឬរហូតដល់ទារកបានបៅដោះដំបូងរួចរាល់។ គួរបញ្ជាក់ថា ទារកត្រូវស្វែងរកការបៅដោះម្តាយដោយខ្លួនឯង មិនត្រូវមានជំនួយពីម្តាយ ឬក្រុមគ្រូពេទ្យឡើយ។ ការប៉ះស្បែក និងស្បែកក៏អាចកើតមានគ្រប់ពេលដែលទារកត្រូវការការលួងលោម ភាពស្ងប់ស្ងាត់ និងដើម្បីជួយបង្កើនការផ្គត់ផ្គង់ទឹកដោះម្តាយផងដែរ។ ផលប្រយោជន៍ មានភស្តុតាងកាន់តែច្រើនឡើងៗដែលបានអះអាងអំពីសារសំខាន់នៃស្បែកប៉ះស្បែកក្រោយសម្រាលដែលក្នុងនោះមានដូចជា៖  • ជួយដល់ម្តាយ និងទារកអាចសម្រាក សម្រួលអារម្មណ៍ • ជួយគ្រប់គ្រងកម្រិតចង្វាក់បេះដូង និងការដកដង្ហើមរបស់ទារក ហេតុនេះពួកគេអាចសម្របខ្លួនបានល្អជាងមុនពេលនៅខាងក្រៅស្បូន • ជំរុញការរំលាយអាហារ និងបង្កើនចំណង់បៅដោះម្តាយ • ជួយរក្សាសីតុណ្ហភាពរាងកាយបានល្អ • ចម្លងបាក់តេរីល្អដែលមានលើស្បែកម្តាយដល់ទារក ដើម្បីជួយការពារប្រឆាំងនឹងការឆ្លងមេរោគ • ជំរុញការបញ្ចេញអ័រម៉ូនសម្រួលដល់ការបញ្ចេញទឹកដោះ។ ក្រៅពីនេះ ទារកអាចទទួលបានផលប្រយោជន៍ជាច្រើនទៀតដូចជា៖ • ជួយសម្រួលការស្រូបចូលអុកស៊ីសែន • កាត់បន្ថយអ័រម៉ូនស្ត្រេស (cortisol) • លើកទឹកចិត្តដល់ឥរិយាបថមុនពេលបំបៅ • ជួយបង្កើនការលូតលាស់ • កាត់បន្ថយការស្នាក់នៅក្នុងមន្ទីរពេទ្យ • ជួយបង្កើនបរិមាណទឹកដោះ និងបរិមាណអង់ទីករដែលមានក្នុងទឹកដោះដំបូង។ ដើម្បីឲ្យវិធីសាស្ត្រនេះប្រព្រឹត្តដោយភាពជោគជ័យបាន លុះណាតែមានជំនួយពីក្រុមគ្រូពេទ្យ ដោយក្នុងនោះ៖ • ម្តាយទាំងអស់ត្រូវប៉ះស្បែក និងស្បែកជាមួយកូនក្រោយពេលសម្រាល យ៉ាងហោចណាស់រហូតក្រោយការបំបៅដំបូងរួចរាល់ ឬកាន់តែយូរតាមតែទារកចង់បាន • ម្តាយទាំងអស់ត្រូវបានលើកទឹកចិត្តឲ្យបំបៅដោះដំបូងខណៈពេលនោះ គឺនៅពេលដែលទារកបង្ហាញសញ្ញាត្រៀមខ្លួនដើម្បីបៅ • ម្តាយ និងទារកដែលមិនមានទំនាក់ទំនងជាមួយការប៉ះស្បែកភ្លាមៗក្រោយពេលសម្រាល ត្រូវបានគេលើកទឹកចិត្តឲ្យចាប់ផ្តើមទំនាក់ទំនងនេះឲ្យបានកាន់តែឆាប់តាមដែលអាចធ្វើទៅបាន មិនថានៅពេលណា ឬកន្លែងណាក៏ដោយ។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

Pregnancy & Baby
Share
  • Mar 02, 2019 |
  • 5 years ago |
  • 2.8K views

បញ្ឈប់ការផ្សព្វផ្សាយរបស់គណនីឈ្មោះ Narichat Jing

សេចក្តីជូនដំណឹងថ្ងៃទី ២៧ ខែធ្នូ ឆ្នាំ ២០១៨ ពីក្រសួងសុខាភិបាលនៃព្រះរាជាណាចក្រកម្ពុជា សូមជម្រាបជូនដល់សាធារណជនទាំងអស់ឲ្យបានជ្រាបថា៖ យោងតាមការពិនិត្យឃើញលើបណ្តាញសង្គមហ្វេសប៊ុករៀងរាល់ថ្ងៃមានគណនីមួយឈ្មោះ Narichat Jing កំពុងផ្សព្វផ្សាយផលិតផលឱសថ និងផលិតផលគ្រឿងសម្អាងជាច្រើនមុខ ដោយគ្មានចុះបញ្ជិកា គ្មានការត្រួតពិនិត្យគុណភាព និងគ្មានច្បាប់អនុញ្ញាតឲ្យផ្សព្វផ្សាយពីក្រសួងសុខាភិបាលដែលមានឈ្មោះដូចខាងក្រោម៖ ១-Super Weight Gain ២-Digestica Tablets ៣-Super Colostrum Chew ៤-Easy Slim ៥-DAFLEXION ៦-ផលិតផលគ្រឿងសម្អាងឈុតបំបាត់មុន ស្នាមមុន និងជាំ ៧-ផលិតផលគ្រឿងសម្អាង ឈុតបំបាត់អាចម៍រុយ ៨-សាប៊ូ និងក្រែមបន្ទន់សក់ ៩-ផលិតផលគ្រឿងសម្អាងឈុតបំបាត់ជាំ និងផ្តល់សំណើម និងផលិតផលឱសថដទៃផ្សេងទៀត។ ដើម្បីចៀសវាងការខាតបង់ប្រាក់កាស និងប៉ះពាល់សុខភាព ឬអាចឈានដល់ការបាត់បង់ជីវិតរបស់អ្នកប្រើប្រាស់មិនត្រឹមត្រូវទៀតនោះ ក្រសួងសុខាភិបាលសូមជូនដំណឹងដល់បងប្អូនប្រជាពលរដ្ឋដែលបានប្រើប្រាស់ផលិតផលឱសថខាងលើនេះត្រូវបញ្ឈប់ការប្រើប្រាស់ជាបន្ទាន់។ ក្នុងករណីបងប្អូនប្រជាពលរដ្ឋបានជួបប្រទះឃើញជនណាកំពុងលក់ ចែកចាយ ផលិតផលឱសថគ្មានការអនុញ្ញាតពីក្រសួងសុខាភិបាលខាងលើនេះ សូមបងប្អូនប្រញាប់ផ្តល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាង សូមទំនាក់ទំនងតាមរយៈលេខទូរស័ព្ទ៖ ០១១ ៥៧៤ ៧៨៧ , ០៩២ ៣៥៩ ៣៩៩, ០១២ ៩៨៣ ៣៣៤, ០១៧ ៦០៦ ៦៧០។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events News & Events
Share
Top