Menu

អត្ថបទ

ហាត់ប្រាណរបៀបណាទើបសមនឹងខ្ញុំ?

ការហាត់ប្រាណនៅពេលព្រឹកព្រលឹម សម្រាកថ្ងៃត្រង់ និងល្ងាច តើពេលណាមួយដែលល្អបំផុតសម្រាប់អ្នក?  មនុស្សម្នាក់ៗមានភាពខុសគ្នាច្រើនយ៉ាង រួមទាំងការទទួលបានលទ្ធផលពីការហាត់ប្រាណក្នុងពេលជាក់លាក់ណាមួយផងដែរ។ ដូចនេះ មិនប្រាកដថាអ្នកនឹងត្រូវហាត់ប្រាណតាមពេលវេលារបស់អ្នកផ្សេងទៀតដើម្បីទទួលបានលទ្ធផលដូចគ្នានោះឡើយ សំខាន់អ្នកត្រូវស្វែងរកពេលវេលាដែលល្អបំផុតក្នុងការទទួលបានលទ្ធផលតាមដែលអ្នកត្រូវការ។  ១.ពេលព្រឹកព្រលឹម គុណសម្បតិ្ត៖ ការហាត់ប្រាណនៅពេលព្រឹកអាចធ្វើឲ្យមេតាបូលីសចាប់ផ្តើមដំណើរការដុតបំផ្លាញជាតិខ្លាញ់បានល្អពេញមួយថ្ងៃតែម្តងដែលមានន័យថាល្អបំផុតសម្រាប់ការសម្រកទម្ងន់។ ម្យ៉ាងទៀត ការហាត់នៅពេលនេះធ្វើឲ្យជាតិស្ករដែលស្តុកទុកទៅជាកម្លាំងដែលអាចបំលែងជាតិខ្លាញ់ទៅជាអង់ដូហ្វីនដែលអាចជំរុញឲ្យមានថាមពល អារម្មណ៍ល្អ និងសុទិដ្ឋិនិយមក្នុងការចាប់ផ្តើមថ្ងៃថ្មីប្រកបដោយភាពសកម្មទៀតផង។ ក្រៅពីនោះ ការហាត់ភ្លាមក្រោយពីក្រោកពីគេងជាពេលដែលខួរក្បាលស្រឡះល្អ មិនមានការរំខានអារម្មណ៍ដែលអាចឲ្យអ្នកផ្តោតលើការយកឈ្នះខ្លួនឯងក្នុងពេលហាត់ប្រាណបានយ៉ាងប្រសើរ។ ចំពោះអ្នកដែលមានបញ្ហាពិបាកគេង ការហាត់ប្រាណនៅពេល ព្រឹកក៏ជាជម្រើសដ៏ល្អផងដែរ។ ចំណុចគួរពិចារណា៖ ការហាត់ប្រាណជាមួយនឹងពោះទទេនៅពេលព្រឹក មានន័យថាអ្នកត្រូវហាត់ជាមួយនឹងកម្លាំងដែលមានកម្រិត ហើយអ្នកក៏អាចងាយប្រឈមនឹងការរងបួសដូចជាឈឺសាច់ដុំជាដើម ដោយសារសាច់ដុំមិនទាន់កម្តៅបានល្អ (ត្រូវការពេលយូរកម្តៅសាច់ដុំ)។ ការហាត់នៅពេលព្រឹកក៏តម្រូវឲ្យអ្នកគេងបានគ្រប់គ្រាន់ និងក្រោកយ៉ាងហោចមួយម៉ោងលឿនជាងធម្មតា ដែលអាចជាការលំបាកសម្រាប់អ្នកសម្រាកយប់ជ្រៅ និងត្រូវចេញបំពេញភារកិច្ចតាំងពីព្រឹក ដោយវាអាចនឹងបំផ្លាញថ្ងៃថ្មីរបស់អ្នកទៅវិញបើអ្នកបង្ខំខ្លួនឯងពេក។ ដោយឡែក មនុស្សភាគច្រើនពិបាកជំនះនឹងការហាត់ប្រាណក្នុងសីតុណ្ហភាពត្រជាក់ពេលព្រឹក ពិសេសនៅរដូវរងាផងដែរ។ ២.ពេលសម្រាកថ្ងៃត្រង់ គុណសម្បត្តិ៖ ហាក់ដូចជាប្លែកសម្រាប់មនុស្សភាគច្រើន ក៏ប៉ុន្តែនេះជាជម្រើសល្អបំផុតសម្រាប់អ្នកមិនសូវមានពេលវេលា។ ក្រៅពីអាចសម្រាកបានគ្រប់គ្រាន់នៅពេលព្រឹក និងមានពេលវេលាសម្រាកលំហែនៅពេលល្ងាច ការហាត់ប្រាណនៅក្នុងអំឡុងពាក់កណ្តាលថ្ងៃ ក៏អាចជួយសម្រាលការនឿយហត់ និងស្ត្រេសពីការសិក្សា ឬការងារបានមួយកម្រិតធំ ព្រមទាំងជំរុញឲ្យអ្នកមានអារម្មណ៍ស្រស់ថ្លាឡើងវិញក្នុងការបំពេញភារកិច្ចក្នុងពាក់កណ្តាលថ្ងៃទៀតបានកាន់តែល្អ។ សម្រាប់ការហាត់ប្រាណមុនពេលអាហារថ្ងៃត្រង់ អ្នកក៏អាចសង្កេតឃើញថាអ្នកនឹងពិចារណាបានច្រើនក្នុងការជ្រើសរើសអាហារ និងបន្ថយបរិមាណអាហារថ្ងៃត្រង់ និងល្ងាចទៀតផង។ សម្រាប់អ្នកចូលចិត្តទៅក្លឹបហាត់ប្រាណ ក៏អាចចៀសពីការរំខានពីមនុស្សច្រើន ឬការរង់ចាំម៉ាស៊ីនយូរផងដែរ។  ចំណុចគួរពិចារណា៖ ពេលវេលាសម្រាកខ្លី មិនអនុញ្ញាតឲ្យអ្នកធ្វើការហាត់បានយូរ ព្រមទាំងអាចមានការរំខានអារម្មណ៍ជាមួយបញ្ហាដែលសេសសល់សម្រាប់ពេលថ្ងៃផងដែរ។ តាមការសិក្សា មុខងារនៃសួតក៏មិនសូវពេញលេញដែរនៅអំឡុងពេលថ្ងៃត្រង់។ ក្រៅពីនោះ អាកាសធាតុនៅពេលថ្ងៃ គឺជាឧបសគ្គចម្បងមួយសម្រាប់មនុស្សភាគច្រើន ដែលអាចធ្វើឲ្យជម្រើសនៃការហាត់ប្រាណនៅខាងក្រៅត្រូវបានច្រានចោល។  ៣.ពេលរសៀល ឬល្ងាច  គុណសម្បត្តិ៖ ការសិក្សាបានបង្ហាញថា នៅអំឡុងម៉ោង ២ រសៀលទៅ ៦ល្ងាច ជាពេលដែលរាងកាយមានកម្តៅខ្ពស់បំផុត ដែលអាចបង្កើនមុខងារ កម្លាំង និងភាពបត់បែននៃសាច់ដុំ សកម្មភាពអង់ស៊ីម ព្រមទាំងភាពធន់ ដែលមានន័យថា រាងកាយរបស់អ្នកបានត្រៀមរួចរាល់បានយ៉ាងល្អសម្រាប់ការហាត់ប្រាណ។ ការកម្តៅសាច់ដុំបានក្នុងរយៈពេលខ្លី រួមជាមួយសម្ពាធឈាមស្ថិតក្នុងកម្រិតទាប ដែលអាចជួយកាត់បន្ថយការរបួស និងគ្រោះថ្នាក់មួយចំនួន ក៏ជាគុណសម្បត្តិនៃការហាត់ពេលល្ងាចផងដែរ។ ម្យ៉ាងទៀត ការហាត់ក្នុងកម្រិតល្មមនៅពេលល្ងាច អាចឲ្យអ្នកគេងបានលក់ស្រួលដូចគ្នា ប៉ុន្តែបានយូរជាងបើធៀបនឹងការហាត់ពេលព្រឹក។ នេះក៏ជាពេលល្អ ដើម្បីបន្ធូរអារម្មណ៍តានតឹងពីថ្ងៃ និងបង្កើននូវថាមពលមកវិញដើម្បីគិតគម្រោងថ្មីៗបន្តនៅពេលយប់ផងដែរ។ ពេលល្ងាចក៏ត្រូវបានណែនាំផងដែរសម្រាប់ការហាត់បង្កើនសាច់ដុំ និងកម្លាំង។ ផ្ទុយពីការយល់ឃើញភាគច្រើន ការហាត់នៅពេលល្ងាចអាចឲ្យអ្នកកាត់បន្ថយចំណង់ក្នុងការបរិភោគទៀតផង។   ចំណុចគួរពិចារណា៖ ជាញឹកញាប់អ្នកអាចនឹងត្រូវបែងចែកពេលវេលាពេលល្ងាចសម្រាប់លំហែជា-មួយមិត្តភក្តិ អ្នករួមការងារ ឬដៃគូ ដែលធ្វើឲ្យអ្នកខកខានក្នុងការហាត់ប្រាណ។ ម្យ៉ាងទៀត ការងារនៅសេសសល់មួយចំនួន អាចធ្វើឲ្យអ្នកមិនចង់ចំណាយពេលទៅហាត់ប្រាណ។ ប្រសិនបើអ្នកហាត់ប្រាណលើសកម្រិត ឬហាត់នៅកៀកម៉ោងចូលគេង (តិចជាង ៣ម៉ោង) នោះវាអាចរំខានដល់ការគេងទៀតផង។ អ្នកក៏អាចខាតបង់ឥទ្ធិពលនៃការដុតបំផ្លាញជាតិខ្លាញ់ក្រោយពីហាត់ប្រាណផងដែរ ដោយសារមេតាបូលីសនឹងធ្លាក់ចុះនៅពេលគេង។ តើអ្នកនឹងសម្រេចចិត្តជ្រើសយកពេលវេលាណាមួយ?  ការជ្រើសរើសពេលវេលាដែលល្អបំផុតសម្រាប់អ្នកពិតជាសំខាន់ តែសំខាន់ជាងនោះគឺភាពជាប់លាប់នៃការហាត់ប្រាណ។ ដូចនេះ មិនថាគោលបំណងនៃការហាត់ប្រាណរបស់អ្នកគឺជាអ្វី ពេលវេលារបស់អ្នកក៏ត្រូវយោងតាមកត្តាជាច្រើនទៀតផងដែរ ទើបអាចធានានូវភាពជាប់លាប់ ប្រសិទ្ធភាពព្រមទាំងផាសុកភាពសម្រាប់អ្នកផ្ទាល់ ក្នុងនោះរួមមាន ដៃគូហាត់ប្រាណ ឬគ្រូបង្វឹក កាលវិភាគប្រចាំថ្ងៃ កន្លែងហាត់ប្រាណ និងម៉ោងអាហាររបស់អ្នកជាដើម។ អ្នកប្រហែលជាអាចមានការប្រឆាំងគ្នាខ្លះក្នុងជ្រើសរើសពេលវេលាដោយយោងតាមកត្តាផ្សេងៗ តែអ្នកត្រូវចងចាំថា អ្នកបានសម្រេចចិត្តត្រឹមត្រូវរួចមកហើយក្នុងការជ្រើសរើសការហាត់ប្រាណ ឯពេលវេលាដែលអ្នកអាចសម្របខ្លួនបានជាពេលវេលាល្អបំផុតរបស់អ្នក។ ប្រសិនបើអ្នកមិនច្បាស់ថា ពេលវេលាណាមួយត្រូវនឹងអ្នក អ្នកក៏អាចសាកល្បងទៅតាមពេលនីមួយៗជាមុនសិនផងដែរ។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

លំហាត់​ប្រាណ
ហាត់ប្រាណនៅតែសំខាន់ទោះអ្នកក្រិនថ្លើមក៏ដោយ!

ម្តងហើយម្តងទៀតដែលគ្រូពេទ្យបានកត់សម្គាល់ផលល្អនៃលំហាត់ប្រាណសម្រាប់អ្នកជំងឺថ្លើម និងចំណុចដែលត្រូវបង្កើនគុណភាពជីវិត និងព្យាករណ៍ បានកាន់តែប្រសើរ ដូចទៅនឹងហេតុផលដើម្បីជាការណែនាំនូវការហាត់ប្រាណជាទៀងទាត់ ស្ថិតក្នុងផ្នែកមួយ នៃកម្មវិធីព្យាបាលរបស់ពួកគេ។   ខាងក្រោមជាអត្ថប្រយោជន៍ចំពោះសរីរាង្គថ្លើមដែលត្រូវបានបង្ហាញនៅក្នុងការស្រាវជ្រាវមួយទាក់ទងនឹងការធ្វើលំហាត់ប្រាណជាទៀងទាត់៖ •បន្ថយហានិភ័យនៃស្លាកស្នាមនិងក្រិនថ្លើម៖  ជាការពិតណាស់ លំហាត់ប្រាណជាទៀងទាត់ បន្ថយការលើសទម្ងន់ដោយចៃដន្យចំពោះអ្នកជំងឺរលាកថ្លើមប្រភេទ C។  តាមការស្រាវជ្រាវបង្ហាញថា ការការពារការលើសទម្ងន់ ជួយការពារលក្ខខណ្ឌមួយចំនួន ដូចជា ខ្លាញ់រុំថ្លើម ការកើនកម្រិតជាតិស្ករក្នុងឈាម ជំងឺទឹកនោមផ្អែម ការកើនឡើងអាំងស៊ុលលីនក្នុងឈាម ដែលអាចនាំទៅដល់បញ្ហាក្រិនថ្លើម។ •បង្កើនអារម្មណ៍ល្អ៖  ភាពស្ត្រេសគឺជាបញ្ហាសាមញ្ញក្នុងចំណោមប្រជាជនដែលមានផលប៉ះពាល់ពីជំងឺក្រិនថ្លើមរ៉ាំរ៉ៃនិងអាចសូម្បីក្នុងករណីមានផលរំខានពីការព្យាបាលដោយ Pegylated Interferon ដែលចេញវេជ្ជបញ្ជាដោយគ្រូពេទ្យសម្រាប់អ្នកជំងឺរលាកថ្លើមប្រភេទC។ លំហាត់ប្រាណជាទៀងទាត់ ជួយកាត់បន្ថយឥទ្ធិពលនៃភាពស្ត្រេស តាមរយៈការភ្ញោចឲ្យមានការបញ្ចេញ Endorphins និងកែប្រែកម្រិត Neurotransmitter ដើម្បីលើកកម្ពស់សុខភាពផ្នែកអារម្មណ៍ និងពង្រឹងថាមពលផ្លូវចិត្ត។ •បង្កើនកម្រិតអុកស៊ីសែនក្នុងឈាម៖  អត្ថប្រយោជន៍ចំពោះបេះដូងសរសៃឈាមនៃការធ្វើលំហាត់ប្រាណជាទៀងទាត់ បង្កើនសមត្ថភាពនៃការចាប់យកអុកស៊ីសែនក្នុងឈាម។ កម្រិតអុកស៊ីសែនច្រើនក្នុងឈាម មានន័យថា មានអុកស៊ីសែនច្រើនដែលត្រូវបានដឹកនាំទៅកាន់ថ្លើមដូច្នេះដែរ ជាលទ្ធផលវាជួយបង្កើននូវមុខងារថ្លើម ឲ្យដំណើរការបានកាន់តែប្រសើរជាងមុន។ •បន្ថយការឈឺចាប់៖  ការហ្វឹកហាត់បង្កើនកម្លាំងទ្រទ្រង់ការលូតលាស់របស់សាច់ដុំ និងថែទាំរាងកាយ  ដែលអាចការពារ  ឬពន្យារពេលនៃការខ្សោយសាច់ដុំធ្ងន់ធ្ងរ  ដែលតែងកើតមានចំពោះអ្នកជំងឺថ្លើម។ •បង្កើនថាមពល៖  គ្រប់ពេលការហាត់ប្រាណជាទៀងទាត់ធ្វើឲ្យប្រព័ន្ធបេះដូងសរសៃឈាមមានដំណើរការល្អ ប្រកបដោយប្រសិទ្ធភាព។ ដំណើរការនេះជួយដឹកនាំអុកស៊ីសែន និងអាហារ ទៅកាន់គ្រប់កោសិកា ជាលិកា សរីរាង្គ និងប្រព័ន្ធផ្សេងៗនៃរាងកាយ ដែលផ្តល់មកវិញនូវកម្រិតថាមពលកាន់តែខ្ពស់ជាងមុន។ យ៉ាងណាក៏ដោយ លោកអ្នកក៏ត្រូវគោរពតាមដំណាក់កាល និងកម្រិតដូចខាងក្រោម៖ •ដំណាក់កាលទី១៖  លោកអ្នកត្រូវចាប់ផ្តើមដោយយឺតៗប្រសិនបើអ្នកកំពុងមានជំងឺថ្លើមនិង/ឬមិនធ្លាប់បានធ្វើលំហាត់ប្រាណក្នុងរយៈពេលយូរ។អ្នកត្រូវបានស្ថិតក្នុងលក្ខខណ្ឌដែលហាត់ក្នុងកម្រិតមួយដែលនឹងជាតម្រូវការពីរាងកាយរបស់អ្នក ប៉ុន្តែនឹងមិនត្រូវហួសកម្រិត។ អ្នកអាចហាត់ដោយដើរជំហានខ្លីៗ ក្នុងរយៈពេល៥នាទី ១០នាទី ឬ១៥នាទីដែលជាការចាប់ផ្តើមដ៏ល្អបំផុត។  •ដំណាក់កាលទី២៖  អ្នកគួរមានជំនួយពីគ្រូបង្វឹកដែលអាចដឹងពីស្ថានភាពរបស់អ្នកនិងមានបទពិសោធន៍ក្នុងការបង្កើតនូវតម្រូវការពិសេសនៃកម្មវិធីកាយសម្បទា។ គ្រូបង្វឹកនឹងជួយអ្នក ច្នៃកម្មវិធីមួយយ៉ាងមានសុវត្ថិភាព ក្នុងការចាប់ផ្តើមស្តាឡើងវិញនូវកម្លាំង និងកាយសម្បទារបស់អ្នក។ លើសពីនេះ វានឹងអនុញ្ញាតឲ្យអ្នកមានការកើនឡើងនូវតម្រូវការ ក៏ដូចជាកម្រិតថាមពល និងនាំត្រឡប់មកវិញនូវភាពរស់រវើកដល់អ្នក។ •ដំណាក់កាលទី៣៖  ការរក្សាឲ្យមានស្ថេរភាព អាចត្រូវបានធ្វើឡើងយឺតៗ និងមានការឈឺចាប់តិចតួច នៅពេលចាប់ផ្តើមដំបូង។ ប៉ុន្តែ ទោះបីជាមេតាបូលីសរបស់អ្នកត្រូវបានប្រកួតប្រជែង ដោយជំងឺក្រិនថ្លើមយ៉ាងណាក៏ដោយ អ្នកនៅតែអាចឆ្លើយតបជាមួយនឹងការខិតខំប្រឹងប្រែង។ អ្នកត្រូវកំណត់រយៈពេល១ខែ ហើយសម្គាល់មើលថា តើអ្នកមានអារម្មណ៍យ៉ាងណា។ បន្ទាប់មក រក្សាការអនុវត្តលំហាត់ប្រាណបន្តក្នុងរយៈពេល២ខែ និងចុងក្រោយក្នុងរយៈពេល៣ខែ ហើយអ្នកនឹងមានអារម្មណ៍ប្លែក មានកម្លាំងជាងមុន មានសុខភាពល្អ និងបង្កើនការគិតបែបវិជ្ជមានចំពោះជីវិតជាទូទៅរបស់អ្នក។ លោកអ្នកនៅតែទទួលបានគុណប្រយោជន៍ ទាំងរាងកាយ និងផ្លូវចិត្ត នៅពេលលោកអ្នកអនុវត្តតាមការណែនាំ ទោះបីជាអ្នកស្ថិតនៅដំណាក់កាលណាក៏ដោយ… ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

លំហាត់​ប្រាណ
លំហាត់ប្រាណដែលអ្នកជំងឺខ្លាញ់រុំថ្លើមគួរសាកល្បង

ជំងឺខ្លាញ់រុំថ្លើមគឺជាការកកើតនៃខ្លាញ់នៅក្នុងកោសិកាថ្លើមដែលច្រើនកើតមានទៅលើអ្នកដែលមានជំងឺលើសទម្ងន់ ហើយជាទូទៅបន្ទាប់ពីបានទៅពិនិត្យ អ្នកជំងឺដែលត្រូវបានកំណត់រោគវិនិច្ឆ័យថាមានជំងឺនេះគ្រូពេទ្យព្យាបាលតែងណែនាំឲ្យបង្កើតទម្លាប់នៃការហាត់ប្រាណ និងកែប្រែនូវរបបបអាហារប្រចាំថ្ងៃជាដើម ដែលទាំងនេះអាចជួយកាត់បន្ថយ នូវសារជាតិខ្លាញ់ដែលលើស និងអាចគ្រប់គ្រងទម្ងន់បានល្អថែមទៀតផង។ ដូចនេះរបៀបនៃការហាត់ប្រាណទាំង២ខាង-ក្រោមអាចជាជម្រើសដល់ល្អដែលអ្នកគួរសាកល្បង ដើម្បីជួយពង្រឹងសុខភាពថ្លើមរបស់អ្នក ដោយការភ្ញោចទៅលើថ្លើម ក៏ដូចជាសរីរាង្គប្រព័ន្ធរំលាយអាហារផ្សេងទៀត។ អែរូប៊ិក ការដើរ និងការរត់យឺតៗត្រូវបានគេចាត់បញ្ចូលជាលំហាត់ប្រាណបែបអែរូប៊ិក ដែលការហាត់ប្រាណប្រភេទនេះត្រូវប្រើប្រាស់នូវក្រុមសាច់ដុំធំនៃ​រាងកាយដែលវាអាចជួយឲ្យមានលំនឹងអេឡិចត្រូលីតក្នុងសរីរាង្គក៏ដូចជាជំរុញមុខងារនៃថ្លើមផងដែរ។ របៀបនៃការហាត់៖  •ដំបូងយើងត្រូវដើរយឺតៗពី២០ទៅ៣០នាទីក្នុង១សប្ដាហ៍ •ត្រូវបន្ថែម១០នាទីរាល់១សប្ដាហ៍ម្ដងរហូតដល់៣០ទៅ៤៥នាទីរាល់ពេលដើរម្ដងៗ •ហើយចាប់ផ្ដើមដើរ២ដងក្នុង១សប្ដាហ៍បន្ទាប់មកតម្លើងម្ដងបន្តិចរហូតដល់៥ដងក្នុង១សប្ដាហ៍ •ត្រូវផឹកទឹកឲ្យបានគ្រប់គ្រាន់កំឡុងពេលដើរ ឬរត់។ យោគៈ ប្រភេទលំហាត់ប្រាណទីពីរដែលត្រូវបានណែនាំនោះគឺយោគៈដែលវាជួយពង្រឹងសាច់ដុំបានល្អព្រោះថាវាតម្រូវឲ្យសាច់ដុំធ្វើការច្រើនជាងធម្មតា។ នៅខណៈដែលសាច់ដុំធ្វើការហួសប្រមាណនោះ វានឹងជំរុញឲ្យមានការកើនឡើងនូវសកម្មភាពមេតាបូលីសក្នុងខ្លួនដែលជួយសម្រួលនូវមុខងារថ្លើម។ ខាងក្រោមនេះ ជាការបង្ហាញនូវលំហាត់ប្រាណយោគៈទាំង៤ដែលមានប្រសិទ្ធភាពទៅលើសុខភាពថ្លើម៖  •Kapalbhati Pranayama (ការហាត់ដកដង្ហើមតាមបែបយោគៈ)៖ យើងត្រូវអង្គុយពែនភ្នេននៅលើកម្រាលយោគៈ បន្ទាប់មកដកដង្ហើមចូលឲ្យជ្រៅ ហើយបង្ខំឲ្យដង្ហើមចេញវិញតាមច្រមុះដែលប្រតិបត្តិការនេះត្រូវធ្វើឲ្យរួចពី៥ទៅ១០វិនាទី និងគួរធ្វើឲ្យបានយ៉ាងតិច១៥នាទីជារៀងរាល់ថ្ងៃ។ •Ardha Matsyendrasana (កាយវិការ អង្គុយបង្វិលខ្នង)៖ ដើម្បីធ្វើកាយវិការនេះយើងត្រូវអង្គុយពែនភ្នែន ដោយដាក់ជើងឆ្វេងខាងលើរួចបញ្ឈរជង្គង់ឆ្វេងឡើង បន្ទាប់មកដាក់កំភួនដៃស្ដាំទៅលើជង្គង់ឆ្វេង ហើយបង្វិលខ្លួនយឺតៗ ដោយយកដៃឆ្វេងដាក់ទៅនឹងចុងជើងស្ដាំ។ •Gomukh Asana ៖ កាយវិការយោគៈមួយ​នេះអាចជំនួយថ្លើមបានដោយការសម្រួលនូវលំហូរឈាម និងអុកស៊ីសែន។ យើងត្រូវអង្គុយខ្វែងជើងដោយដាក់ជើងម្ខាងនៅពីលើជើងម្ខាងទៀតបន្ទាប់មកធ្វើខ្នងឲ្យត្រង់រួចបោះដៃម្ខាងទៅក្រោយកញ្ចឹងកនិងបោះដៃម្ខាងទៀតទៅក្រោយឆ្អឹងជំនីរួចព្យាយាមចាប់ប្រអប់ដៃទាំង២។  •Naukasana ៖ ជាកាយវិការយោគៈធម្មតាដែលអាចជួយបញ្ចេញជាតិពុលពីសារពាង្គកាយ ហើយកាយវិការនេះគឺយើងត្រូវគេងផ្កាប់ ឬផ្ងារ រួចលើកផ្នែកខាងលើនិងខាងក្រោមនៃដងខ្លួនឡើង ហើយបោះដៃឲ្យត្រង់ទៅមុខ ដោយរក្សាស្ថានភាពបែបនេះឲ្យយូរតាមដែលអាចធ្វើបានបន្ទាប់មកសម្រាករួចធ្វើវាម្ដងទៀត។ ក៏ព្រោះតែជំងឺខ្លាញ់រុំថ្លើមភាគច្រើនបណ្ដាលមកពីមកពីការធាត់ជ្រុលពេក ដូចនេះហើយអ្នកជំងឺគួរគប្បីជ្រើសរើសយកវិធីសាស្រ្ដដែលមានប្រសិទ្ធភាពខ្ពស់ក្នុងការផ្លាស់ប្ដូរទម្លាប់ការរស់នៅប្រចាំថ្ងៃដោយបែរមកធ្វើលំហាត់ប្រាណ និងចៀសវាងចំណីអាហារមួយចំនួន ដែលការផ្លាស់ប្ដូរនេះអាចជួយឲ្យកោសិកាថ្លើម និងមុខងារថ្លើមបានប្រសើរឡើងវិញ៕  ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

លំហាត់​ប្រាណ
យោគៈសម្រាប់អ្នកប្រាថ្នាចង់បានមុខស្លីម

   កង្វល់នៃមនុស្សសម័យថ្មីច្រើនតែជាបញ្ហាឡើងទម្ងន់ ក៏ដូចជាបរិមាណខ្លាញ់លើសកម្រិតនៅក្នុងសារពាង្គកាយ ហើយក៏ប្រហែលជាមើលរំលងពីកម្រិតជាតិខ្លាញ់នៅលើមុខរបស់ខ្លួន។ ប៉ុន្តែតើអ្នកដឹងទេថា វាអាចនឹងធ្វើឲ្យបាត់បង់នូវសោភ័ណភាពនៃមុខមាត់របស់អ្នក និងកាត់បន្ថយនូវមន្តស្នេហ៍ទាក់ទាញរបស់រូបអ្នកផងដែរ? អ្វីដែលមនុស្សជាទូទៅដឹងនោះ គឺថាយោគៈអាចនឹងជួយឲ្យសាច់ដុំក្បាលពោះរបស់អ្នកថយចុះ ឬក៏សម្រកទម្ងន់ ហើយនៅក្នុងអត្ថបទនេះ ហេលស៍ថាម នឹងបង្ហាញជូនលោកអ្នកនូវចលនាយោគៈលើមុខដែលលោកអ្នកគួរអនុវត្ត ដើម្បីទទួលបានទម្រង់មុខជាទីគាប់ចិត្ត៖ យោគៈកាត់បន្ថយមុខប៉ោង •បិទមាត់ឲ្យជិត ដោយឲ្យបបូរមាត់លើជាប់ជាមួយនឹងបបូរមាត់ក្រោម •ផ្លុំខ្យល់តាមក្រោមបបូរមាត់ខាងលើ ហើយស្ថិតនៅបែបនេះប្រមាណ១០វិនាទី •ផ្ទេរខ្យល់ទៅថ្ពាល់ខាងឆ្វេង ហើយស្ថិតនៅបែបនេះប្រមាណ១០វិនាទីទៀត •ផ្ទេរខ្យល់ទៅថ្ពាល់ខាងស្តាំវិញ ហើយស្ថិតនៅបែបនេះប្រមាណ១០វិនាទី •ធ្វើបែបនេះ ប្រមាណ១០-១៥ដង យោគៈឲ្យសាច់ដុំមុខហាប់ណែន និងបន្ថយជាតិខ្លាញ់លើមុខ ◊វិធីទី១ •ដកដង្ហើមចូលឲ្យវែងតាមមាត់ ហើយបំពេញវាដោយខ្យល់ •បិទមាត់ភ្លាមៗ ហើយផ្ទេរខ្យល់ពីថ្ពាល់ម្ខាង ទៅថ្ពាល់ម្ខាងទៀត (ធ្វើឲ្យដូចជាអ្នកកំពុងខ្ពុរមាត់ក្នុងទឹក) •ធ្វើបែបនេះប្រមាណ១៥ដង ◊វិធីទី២ •ច្បូញមាត់ចូលក្នុង ហើយក្របួចមាត់ •ស្ថិតនៅបែបនេះ ហើយព្យាយាមញញឹមបែបនេះឲ្យបាន៥វិនាទី •ធ្វើឡើងវិញឲ្យបានប្រហែល១០ដង យោគៈបំបាត់ចង្កាបឿ  (ចង្កាពីរជាន់) •ផ្អៀងក្បាលទៅលើ ហើយព្យាយាមសម្លឹងមើលឡើងលើ •ទាញបបូរមាត់ចូលគ្នាឲ្យតឹង •នៅបែបនេះប្រមាណ១០វិនាទី ហើយសម្រាក •ធ្វើបែបនេះឲ្យបាន១០ដង យោគៈបន្តឹងស្បែកមុខ •ដកដង្ហើមចូលតាមច្រមុះ •ក្តាប់ដៃឲ្យតឹង ហើយច្របាច់សាច់ដុំមុខរបស់អ្នក •ដកដង្ហើមចេញតាមមាត់ ដោយលាអណ្តាតចេញក្រៅឲ្យខ្លាំងតាមដែលអាចធ្វើបាន ព្រមទាំងបើកភ្នែកឲ្យធំខ្លាំងដូចគ្នា ហើយក៏ពន្លាដៃរបស់អ្នកផងដែរ •ស្ថិតនៅបែបនេះប្រមាណ១០វិនាទី ហើយសឹមសម្រាក •ធ្វើឡើងវិញ៣ដង យោគៈឲ្យមើលទៅមុខក្មេងជាងវ័យ •ធ្វើចលនាបបូរមាត់លើ •ទាញវាឡើងលើឲ្យដល់ជិតច្រមុះតាមដែលអាចធ្វើបាន •រក្សាលំនឹងនេះឲ្យបាន១៥វិនាទី •ធ្វើឡើងវិញ៥ដង យោគៈជួយឲ្យឆ្អឹងថ្ពាល់ខ្ពស់ជាងមុន •ចាប់ផ្តើមដោយធ្វើចលនាថ្គាម ឲ្យដូចជាអ្នកកំពុងតែទំពារអ្វីម្យ៉ាង •ត្រូវប្រាកដថាបបូរមាត់របស់អ្នកត្រូវបានបិទ •ដកដង្ហើមចូលឲ្យវែង ហើយដកដង្ហើមយឺតៗពេលដកដង្ហើមចេញមកវិញ •បើកមាត់ឲ្យធំ ហើយដាក់អណ្តាតឲ្យទល់ជាមួយនឹងធ្មេញខាងក្រោម •ធ្វើបែបនេះប្រមាណ៥វិនាទី •ធ្វើឡើងវិញ១០ដង យោគៈឲ្យសាច់ដុំបបូរមាត់ហាប់ណែន •ផ្លុំខ្យល់ចេញក្រៅតាមមាត់ •ធ្វើឡើងវិញចំនួន៤ដង •ដាក់ម្រាមដៃចង្អុល និងម្រាមដៃកណ្តាលទន្ទឹមគ្នា ហើយដាក់សង្កត់នៅលើបបូរមាត់ •ធ្វើឡើងវិញចំនួន៤ដង ប្រសិនបើអ្នកប្រាថ្នាចង់បានមុខស្លីម លោកអ្នកអាចធ្វើការសាកល្បងនូវចលនាយោគៈដែលបានណែនាំខាងលើនេះសាកលមើល ថាតើវាអាចនឹងមានប្រសិទ្ធភាពឬទេ? ប្រសិនបើមាន តើបានដល់កម្រិតណា?  វិធីងាយៗមិនចំណាយប្រាក់ច្រើន ហើយមានសុវត្ថិភាពបែបនេះ មិនសាក ធ្វើម៉េចនឹងដឹងលទ្ធផលទៅ? ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

គន្លឹះសុខភាព លំហាត់​ប្រាណ ស្បែក កាមរោគ​ និងសម្រស់
៥ ចំណុច អ្នកគួរហាត់ប្រាណក្នុងក្លឹបហាត់ប្រាណ!

   នឹកគិតដល់លំហាត់ប្រាណម្តងៗអ្នកប្រហែលអាចគិតឃើញនូវជម្រើសជាច្រើនក្នុងការជ្រើសរើសទីតាំងសម្រាប់ហាត់ដែលអាចធ្វើឡើងនៅតាម ទីធ្លាសាធារណៈសួនច្បារក៏ដូចជាតាមក្លឹបហាត់ប្រាណនានា។គ្រប់ទីតាំងទាំងអស់សុទ្ធតែមានអត្ថប្រយោជន៍រៀងៗខ្លួនតែការហាត់តាមក្លឹបហាត់ប្រាណបានផ្តល់នូវភាពងាយស្រួល នឹងផលវិជ្ជមានជាច្រើនបែបដែលអ្នកប្រហែលជាមិនធ្លាប់់បានដឹងពីមុន។   ដូច្នេះ អត្ថបទខាងក្រោមអាចជាការណែនាំដ៏ល្អសម្រាប់អ្នកដែលចង់ធ្វើការហាត់ប្រាណនៅតាមក្លឹបលំហាត់ប្រាណនានា ដែលនឹងប្រាប់អ្នកពីអត្ថប្រយោជន៍ទាំង ៥នៃក្លឹបលំហាត់ប្រាណ។  ១ ឧបករណ៍ហាត់ប្រាណក្នុងទីតាំងតែមួយ  លំហាត់ប្រាណខាងក្នុង អាចជួយសម្រួលយ៉ាងច្រើនសម្រាប់អ្នកដែលមានតម្រូវការប្រើប្រាស់ជាមួយឧបករណ៍លំហាត់ប្រាណផ្សេងៗ។ អ្នកអាចហាត់ប្រាណក្នុងទីតាំងទូលាយ ដែលអាចទុកដាក់ឧបករណ៍ហាត់ប្រាណរបស់អ្នកនៅក្នុងទីតាំងតែមួយ និងអំឡុងពេលហាត់ជាមួយគ្នាតែម្តង។ ២ ប្រៀបបានជាថ្នាក់បង្រៀន  ការហាត់តាមក្លឹបនានា  ប្រៀបបានជាការចូលរួមក្នុងថ្នាក់មួយបង្រៀនអ្នកពីលំហាត់ប្រាណផ្សេងៗ ដែលប្រហែលជាអ្នកមិនធ្លាប់បានស្វែងយល់កន្លងមក។  ដោយសារ ការហាត់ត្រូវបានបង្វឹកដោយអ្នកមានជំនាញត្រឹមត្រូវ អ្នកអាចធ្វើលំហាត់ប្រាណដែលស័ក្តិសមនិងមានអត្ថប្រយោជន៍ជាច្រើន  ផ្ទុយទៅនឹងការហាត់ប្រាណគ្មានការណែនាំដែលអាចបង្កឲ្យមានគ្រោះថ្នាក់កើតឡើងជាយថាហេតុ   ក្នុងករណីអ្នកហាត់មិនបានត្រឹមត្រូវ។ ម៉្យាងវិញទៀត ការហាត់ជាក្រុមអាចជួយជម្រុញឲ្យមានទឹក-ចិត្តខ្ពស់ក្នុងការហាត់ឲ្យមានប្រសិទ្ធភាព  ជាជាងការហាត់តែម្នាក់ឯង។ ៣ សម្រួលអារម្មណ៍ក្នុងពេលតែមួយ ក្នុងក្លឹបលំហាត់ប្រាណមួយចំនួន ក្រៅពីមាននូវឧបករណ៍សម្រាប់ការហាត់ប្រាណ ក៏មានរួមបញ្ចូលផងដែរនូវសេវាកម្មមួយចំនួនទៀតដូចជាសោណា និងការម៉ាស្សាជាដើម។ក្នុងករណីការធ្វើលំហាត់ប្រាណផ្តល់នូវភាពហត់នឿយអ្នកអាចស្វែងរកសេវាកម្មទាំងនោះដើម្បីសម្រួលអារម្មណ៍ជាការលើកទឹកចិត្ត  ក៏ដូចជាបន្ថែមនូវភាពទំនើបក្នុងជីវិតទៀតផង។ ៤ មិនបារម្ភពីអាកាសធាតុ ការហាត់ប្រាណក្នុងទីតាំងមួយ ឬក្លឹបនានា អ្នកមិនចាំបាច់បារម្ភអំពីស្ថានភាពបរិយាកាស ឬអាកាសធាតុ ដែលជាកត្តាមួយអាចបង្អាក់នូវលំហាត់ប្រាណជាប្រចាំរបស់អ្នកនោះឡើយ។ ម៉្យាងទៀត លំហាត់ប្រាណខាងក្នុង អាចបញ្ចៀសនូវហានិភ័យនានាមកពីបរិយាកាសខាងក្រៅដូចជា ប៉ះពាល់ដល់សួត ភ្នែក ឬបំពង់ក ដែលវាអាចជាការប្រឈមខ្ពស់ចំពោះអ្នកដែលរស់នៅក្នុងតំបន់ដែលមានការបំពុលបរិយាកាសខ្លាំងក្លាមួយវិញទៀត វាមានអត្ថប្រយោជន៍ចំពោះអ្នកដែលមានបញ្ហាអាល្លែកហ្ស៊ី ដោយលំហាត់ប្រាណក្នុងក្លឹបអាចជួយឲ្យអ្នកចៀសវាងពីបញ្ហានោះបាន។ ៥ អ្នកអាចមានគ្រូបង្វឹកផ្ទាល់ខ្លួន មានគ្រូបង្វឹកផ្ទាល់ខ្លួន ជាជម្រើសដ៏ល្អដែលជួយឲ្យអ្នកអាចធ្វើលំហាត់ប្រាណបានច្រើនបែប។ ដោយហេតុថា គ្រូបង្វឹកនីមួយៗសុទ្ធតែមានជំនាញផ្នែកលំហាត់ប្រាណ ដូច្នេះពួកគេអាចនឹងណែនាំអ្នកពីទម្រង់នៃការហាត់ដែលត្រឹមត្រូវ ម៉្យាងទៀតវត្តមានរបស់ពួកគេបានជួយផ្តល់ជាយោបល់ក្នុងករណីអ្នកមានបញ្ហាក្នុងពេលហាត់។ ជារួមអ្នកនឹងមិនខាតពេលវេលានោះឡើយ តែអ្នកថែមទាំងទទួលបាននូវលំហាត់ប្រាណមួយដែលមានអត្ថប្រយោជន៍យ៉ាងពេញលេញ និងសាកសមទៅនឹងខ្លួនអ្នក។ លំហាត់ប្រាណ បានចូលរួមចំណែកយ៉ាងច្រើនក្នុងការថែរក្សាសុខភាពនិងបន្ថែមរសជាតិជីវិតសម្រាប់បុគ្គលម្នាក់ៗ ដូច្នេះអ្នកគួរមានការជ្រើសរើស  និងអនុវត្តវីធីសាស្រ្តក្នុងការហាត់ប្រកបដោយប្រសិទ្ធភាព ចៀសវាងការខិតខំទាំងអស់ប្រែជាការខាតបង់ទៅវិញ។ © 2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

គន្លឹះសុខភាព លំហាត់​ប្រាណ
ផ្លាស់ប្តូរជីវិតរបស់អ្នកតាមរយៈការជិះកង់

  ធ្លាប់តែជិះម៉ូតូ ឬបើកឡានទៅមកពីកន្លែងទៅកន្លែងមួយ ហើយប្រាកដណាស់ គឺមានភាពធុញទ្រាន់ខ្លាំងនឹងភាពកកស្ទះចរាចារណ៍…ក្រលេកមកមើលអ្នកជិះកង់វិញ អារម្មណ៍ប្លែកម្យ៉ាង ត្រង់ថាងាយស្រួលបត់បែទៅណាមកណាក៏លឿន ហើយអ្វីដែលពិសេស គឺមិនបាច់អស់លុយថ្លៃសាំងនុះអី…   តាមការពិតទៅ ក្រៅពីហេតុផលខាងលើ និងចំណូលចិត្ត  មានមូលហេតុជាច្រើនដែលនាំឲ្យការជិះកង់ត្រូវបានទទួលការពេញនិយមខ្លាំងបែបនេះ ហើយជឿជាក់ថា អត្ថបទនេះនឹងអាចធ្វើជម្រុញចិត្តអ្នកឲ្យជ្រើសរើសកង់មួយមកជិះនៅថ្ងៃណាមួយ   ដោយសារវាអាចធ្វើឲ្យជីវិតរបស់អ្នកផ្លាស់ប្តូរយ៉ាងច្រើន…   ១ ធ្វើឲ្យអ្នកក្មេងជាងមុន ការជិះកង់ជាប្រចាំអាចប្រឆាំងនឹងភាពជ្រីវជ្រួញរបស់ស្បែក ដោយវាជម្រុញចលនាឈាមរត់ បង្កើនការដឹកជញ្ជូនអុកស៊ីហ្សែន និងសារធាតុចិញ្ចឹមទៅកោសិកា ស្របពេលដែលសារធាតុពុលក្នុងខ្លួនត្រូវបានបញ្ចេញចោល។ វាក៏បង្កើតជាមជ្ឈដ្ឋានដ៏ប្រសើរសម្រាប់ការផលិតកូឡាជែនដែលជួយឲ្យស្បែកហាប់ណែននិងស្រស់ថ្លា។   ២ រាងស្អាត និងសាច់ហាប់ណែន ការធាក់កង់តម្រូវឲ្យប្រើសាច់ដុំជាច្រើនកន្លែង ដូចជាភ្លៅ  ដើមដៃ  ក្បាលពោះជាដើម ដូច្នេះក្រោយពីការធាក់កង់លេង   លោកអ្នកក៏អាចទទួលនូវរូបរាងរឹងមាំ និងស្រស់ស្អាត។   ៣ ជម្រុញសមត្ថភាពខួរក្បាល ការជិះកង់អាចជម្រុញឲ្យមានការផលិតកោសិកាខួរក្បាលដែលមាននាទីសម្រាប់ការចងចាំ និងជាទូទៅវាខូចខាតចាប់ពីអាយុ៣០ឆ្នាំ។ ការបង្កើនចលនាឈាមរត់   និងផ្តល់អុកស៊ីហ្សែនដល់កោសិកាខួរក្បាល   ធ្វើឲ្យមានការកកើត និងមានសកម្មភាពឡើងវិញនៃប្រព័ន្ធទទួលរបស់សរសៃប្រសាទ។   ៤ ជម្រុញសមត្ថភាពធ្វើការ តាមរយៈការសិក្សាមួយទៅលើបុគ្គលិក២០០នាក់ ដែលជិះកង់   ឬធ្វើលំហាត់ប្រាណមុនមកធ្វើការអាចបង្កើនប្រសិទ្ធភាពការងារ និងគ្រប់គ្រងទំហំនៃការងាររបស់ពួកគេបានយ៉ាងប្រសើរ ហើយថែមទាំងបង្កើនទឹកចិត្តជាមួយនឹងសមត្ថភាពក្នុងការដោះស្រាយបញ្ហា និងស្រេ្តសបានទៀតផង។   ៥ បង្កើនភាពច្នៃប្រឌិត មិនថាអ្នកជានរណា ភាពច្នៃប្រឌិតជាគន្លឹះមួយនៃការរស់នៅ។ ត្រូវអរគុណដល់ដំណើរនៃការនាំអុកស៊ីហ្សែនទៅកាន់ខួរក្បាលត្រង់ផ្នែកដែលទទួលខុសត្រូវគុណភាពនៃការគិតបែបច្នៃប្រឌិត។   ៦ រស់បានកាន់តែយូរ ការជិះកង់បង្កើនចលនារបត់ឈាមទៅកាន់បេះដូង ធ្វើឲ្យបេះដូងមានដំណើរការល្អ   ការពារបញ្ហាគាំងបេះដូង   ព្រមទាំងពង្រឹងសមត្ថភាពសួតបានទៀតផង។ ក្រៅពីនោះ វាក៏អាចកាត់បន្ថយអត្រាប្រឈមនឹងជំងឺទឹកនោមផ្អែម មហារីក ការឡើងសម្ពាធឈាម និងជំងឺលើសទម្ងន់បានទៀតផង។   ៧ អ្នកអាចជួយគេបានកាន់តែច្រើន មានកម្មវិធីប្រមូលមូលនិធិសប្បុរសធម៌ជាច្រើនត្រូវធ្វើឡើងក្រោមរូបភាពជាការជិះកង់ជាក្រុម ដែលមានន័យថាអ្នកមិនត្រឹមតែជិះកង់ដើម្បីខ្លួនឯង តែក៏ដើម្បីអ្នកដទៃ និងពិភពលោកផងដែរ។   ៨ ជួបមនុស្សថ្មីៗបង្កើតមិត្តភាព ការជិះកង់ អាចបង្កើនឱកាសក្នុងការស្គាល់មនុស្សថ្មីៗ ធ្វើឲ្យទំនាក់ទំនងសង្គមរបស់អ្នកកាន់តែប្រសើរ ដែលជាលទ្ធផលនៃការបញ្ចេញអ័រម៉ូនអុកស៊ីតូស៊ីនដែលសម្របសម្រួលអារម្មណ៍ភ័យខ្លាច និងស្ទាក់ស្ទើរ។   ចង់ដឹងពីផលចំណេញនៃការជិះកង់ផ្សេងៗទៀតទេ? មានច្រើនសន្ធឹកទៀត មិនថាសប្បាយចិត្ត សន្សំលុយមិនបាច់ចាក់សាំង មិនបាច់អស់ថ្លៃផ្ញើ   ចោរក៏មិនសូវចង់បាន   ងាយស្រួលជិះ   មិនខ្លាចស្ទះចរាចរណ៍ ត្រជាក់ដោយខ្យល់ធម្មជាតិ អ្វីដែលពិសេសជាងនេះ   មិនបំពុលបរិស្ថាន ជួយផែនដីឲ្យនៅតែស្រស់ស្អាត និងគួរឲ្យចង់រស់នៅថែមទៀតផង…គឺថា…ចំណេញពេកក្រៃហ្មងហា៎…   ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

គន្លឹះសុខភាព លំហាត់​ប្រាណ
១០តិចនិកធ្វើឲ្យហាត់ប្រាណមិនជិនណាយ

សម័យនេះម្នាក់ៗពោលថា ចង់ហាត់ប្រាណ ដើម្បីឲ្យរាងស្អាត សុខភាពល្អ ខួរក្បាលក៏ស្រឡះអីបែបហ្នឹង។ បញ្ហាគឺ អ្នកខ្លះក៏បានតែពោល ហើយខ្លះទៀតក៏បានអនុវត្តពិតមែន តែមិនទៅបានយូរអី ហាត់មួយថ្ងៃចោលមួយថ្ងៃ ថ្ងៃណានឹកឃើញក៏ហាត់ ថ្ងៃណាខ្ជិលក៏ខានសិន យូរៗទៅក៏បោះបង់ចោលឯកឯង។ សាកល្បងម្តងទៀតជាមួយតិចនិកដែលនឹងជួយឲ្យអ្នកស្រឡាញ់ការហាត់ប្រាណរហូតមិនចង់ខកខានសូម្បីតែមួយថ្ងៃ។ ១ ធ្វើគម្រោងសម្រាប់ហាត់ប្រាណ ហាត់នៅពេលណា? ប៉ុន្មានថ្ងៃក្នុងមួយសប្តាហ៍?មួយថ្ងៃប៉ុន្មាននាទី?  ត្រូវហាត់បែបណាខ្លះ? សុទ្ធតែជាសំណួរដែលត្រូវបញ្ចូល   ដើម្បីឲ្យអ្នកដឹងថាអ្នកនឹងត្រូវធ្វើអ្វីនៅពេលហាត់ប្រាណ។ ២ កំណត់គោលដៅឲ្យច្បាស់ ត្រូវចាំថាគោលដៅរបស់អ្នកមិនគួរធំពេកទេនៅពេលចាប់ផ្តើមដំបូង ឧទាហរណ៍ ហាត់ដើម្បីមិនឲ្យឡើងគីឡូ ជំនួសឲ្យហាត់ដើម្បីឲ្យស្រកគីឡូសិន ឬដើរឲ្យបានពីរគីឡូ ជំនួសឲ្យការរត់ឲ្យបានពីរគីឡូជាដើម។ កុំទាន់ប្រញាប់ដាក់សម្ពាធលើខ្លួនឯងពេក។ ៣ ឈុតកីឡា អ្នកអាចរកឈុតកីឡាដែលអ្នកស្រឡាញ់ និងផ្តល់ផាសុកភាពដល់ខ្លួនឯង ដោយវានឹងផ្តល់អារម្មណ៍បែបកីឡា    និងថាមពលស្ទុះស្ទារាងធម្មតា     ហើយធ្វើឲ្យអ្នកមានជំនឿចិត្តក្នុងការបង្ហាញមុខក្នុងពេលហាត់ប្រាណម្តងៗផងដែរ។ ៤ ជ្រើសរើសទីតាំង ប្រាកដជាទីតាំងដែលអ្នកចូលចិត្តហើយ ទើបអាចជម្រុញឲ្យអ្នកទៅដោយមិនស្ទាក់ស្ទើរ និងគ្មានសម្ពាធ។ ហើយជម្រើសរបស់អ្នកអាចជា ផ្ទះ ក្លិបហាត់ប្រាណ ឬទីសាធារណៈជាដើម។ ៥ ពេលវេលា មិនទាន់ដល់ពេលគិតថា ហាត់ប្រាណនៅពេលណាល្អជាងទេ សំខាន់តើពេលណាអំណោយផលដល់អ្នកជាងគេ?ពេលព្រឹក ដោយត្រូវធ្វើការ ឬរៀនដល់យប់ៗធ្វើឲ្យពិបាកក្រោក ជ្រើសរើសពេលល្ងាចក៏បាន ឬក៏ពេលល្ងាចច្រើនតែរវល់បញ្ចប់ការងារ ឬអស់កម្លាំង អញ្ចឹងព្យាយាមពីព្រឹកទៅ ឬជ្រើសរើសចុងសប្តាហ៍ក៏បាន។ ៦ រាប់អានមិត្តថ្មីៗ សម្រាប់ការហាត់នៅក្លិប ឬទីសាធារណៈ អ្នកអាចមានឱកាសជួបមនុស្សច្រើន ហើយហេតុអ្វីអ្នកមិនរាប់អានមិត្តល្អៗនៅទីនោះ? មិនត្រឹមតែអាចកំដរគ្នានិយាយលេង ថែមទាំងអាចចែករំលែកបទពិសោធន៍នៃការហាត់ប្រាណ ឬបញ្ហាផ្សេងៗផងដែរ។ ម្យ៉ាង មានមិត្តខ្លះក៏ជួយឲ្យអ្នកស៊ាំជាមួយនឹងបរិយាកាស មានអារម្មណ៍ល្អ គ្មានសម្ពាធ និងមិនទើសទាល់ពេលជួបគ្នាច្រើនដង។ ៧ រកអ្នកដែលអាចជម្រុញទឹកចិត្តរបស់អ្នក អ្នកគួរតែរកមើលអ្នកណាម្នាក់ជាបុគ្គលគំរូ ដែលអាចជម្រុញទឹកចិត្តអ្នកឲ្យចង់ធ្វើដូចគេ ឬចង់សម្រេចដូចគេ  ដូចជាអ្នកដែលមានរាងស្អាតៗដែលអ្នកជួបនៅក្លិបហាត់ប្រាណ    ឬរត់នៅផ្លូវជាមួយគ្នា ឬអាចបិតរូបតារាបង្ហាញម៉ូតនៅបន្ទប់ហាត់ប្រាណជាដើម។ ៨  តាមដានរឿងជុំវិញការធ្វើលំហាត់ប្រាណ តាមអ៊ីនធឺណេត  ឬទស្សនាវដ្តីបានដឹងច្រើន មិនថាជាអត្ថប្រយោជន៍   វិធីសាស្រ្តថ្មីៗ   ឬក៏ព័ត៌មានដែលទាក់ទងនឹងការហាត់ប្រាណឬកីឡា   អ្នកនឹងកាន់តែមានអារម្មណ៍ស្និទ្ធស្នាលឡើងជាមួយនឹងសកម្មភាពទាំងនោះ ធ្វើឲ្យអ្នកកាន់តែចង់ហាត់ប្រាណ ។ ៩ តន្រ្តី សាមញ្ញបំផុត អ្នកអាចយកពេលវេលាហាត់ប្រាណ ជាពេលដែលអ្នកអាចមានឱកាសស្តាប់បទចម្រៀងកំសាន្តអារម្មណ៍   ដូចនេះអ្នកនឹងមិនគិតថា អ្នកត្រូវចំណាយពេលធ្វើរឿងដែលនឿយហត់នោះឡើយ ហើយវាកាន់តែល្អបើអ្នកមិនសូវចូលចិត្តនិយាយ។ ១០ ឲ្យរង្វាន់ខ្លួនឯង រាល់ពេលសម្រេចគោលដៅនីមួយៗ  អ្នកគួរលើកទឹកចិត្តខ្លួនឯងខ្លះ   ដើម្បីបន្តទៅជំហានមួយទៀត។ មិនចាំបាច់ជាកាដូធំដុំទេឧទាហរណ៍អ្នកគ្រាន់តែឲ្យពេលខ្លួនឯងមួយម៉ោងលេងហ្គេមដែលអ្នកពេញចិត្ត   ឬមើលរឿងភាគមួយភាគក៏បាន។ ទាំងនេះអាចជាថាមពលជម្រុញទឹកចិត្តឲ្យអ្នកហាត់ប្រាណជាទៀងទាត់   តែអ្វីដែលសំខាន់ចុងក្រោយគឺការតាំងចិត្តរបស់អ្នកផ្ទាល់ពោល គឺតាំងចិត្តមិនបោះបង់ មិនយកលេស មិនកុហកខ្លួនឯង មិនពន្យារពេលហាត់ប្រាណ... © 2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

គន្លឹះសុខភាព លំហាត់​ប្រាណ
ស្រាយកង្វល់សម្រាប់អ្នកគ្មានពេលហាត់ប្រាណ តែចង់បានសុខភាពល្អ

រវល់ខ្លាំងណាស់មែនទេ? មមាញឹកនឹងការងារប្រចាំថ្ងៃខ្លាំងណាស់មែនដែរទេ? ប្រាកដណាស់ ភាពមមាញឹកនឹងការងារបានក្លាយជាមូលហេតុ ឬសឹងតែជាលេសរបស់មនុស្សជំនាន់ថ្មីមួយចំនួន ដែលធ្វើឲ្យគេខកខានមិនបានធ្វើចលនាលំហាត់ប្រាណផ្សេងៗ។ ការធ្វើចលនារបស់ដងខ្លួនទោះបីជាមួយរយៈពេលខ្លី ឬវែង គួរណាស់តែជាទម្លាប់ប្រចាំថ្ងៃមួយដ៏សំខាន់សម្រាប់សុខភាពរបស់បុគ្គលគ្រប់រូប ព្រោះថានាពេលបច្ចុប្បន្ននេះ អាទិភាពដំបូងគេនៃជីវិតរបស់យើងគ្រប់គ្នា គឺជាសុខភាពទាំងផ្លូវកាយ និងចិត្ត។ យ៉ាងណាមិញ សម្រាប់អ្នកដែលរវល់ខ្លាំងដល់ថ្នាក់ដកខ្លួនពីការងារដើម្បីទៅលេងកីឡា ឬធ្វើលំហាត់ប្រាណផ្សេងៗទៀតនោះ សូមកុំបារម្ភអីណា៎…អត្ថបទមួយនេះនឹងណែនាំអ្នកអំពីសកម្មភាពមួយចំនួនដែលលោកអ្នកអាចធ្វើបាន ជំនួសឲ្យការលេងកីឡា ឬលំហាត់ប្រាណ៖ ធ្វើការងារច្រើនក្នុងពេលតែមួយ អ្នកប្រហែលជាធ្លាប់ឃើញបានដឹងលឺ ក៏ដូចជាស្គាល់នូវអត្ថន័យនៃឃ្លានេះហើយ គឺបានន័យថា ក្នុងពេលដំណាលគ្នា បុគ្គលម្នាក់ធ្វើសកម្មភាពច្រើនជាងមួយ។ ជាក់ស្តែង នៅកន្លែងធ្វើការងាររបស់អ្នក អ្នកក៏អាចដើរបណ្តើរ និយាយទូរស័ព្ទបណ្តើរ ឬ ចុចកុំព្យូទ័រវាយឯកសារបណ្តើរ នឹកគិតពីគម្រោងនាពេលអនាគតបណ្តើរផងដែរ។ ការដើរជាសកម្មភាពគោលចម្បងមួយដែលត្រូវបានណែនាំដោយអ្នកជំនាញ ហើយលោកអ្នកក៏អាចគួបផ្សំវាជាមួយនឹងសកម្មភាពណាមួយទៀត។ ធ្វើកិច្ចការងារផ្ទះ ការងារផ្ទះដែលអ្នកធ្វើជាប្រចាំដូចជា ការបោកសម្លៀកបំពាក់ ការថែទាំសួនច្បារ ការលាងសម្អាតចាន ឬបោសសម្អាតផ្ទះជាដើម សុទ្ធតែរួមចំណែកធ្វើឲ្យខ្លួនប្រាណមានភាពនឿយហត់ និងបញ្ចេញជាតិពុលពីក្នុងខ្លួនប្រាណដូចគ្នានឹងលំហាត់ប្រាណមួយចំនួនផងដែរ។ ធ្វើដំណើរប្រចាំថ្ងៃ ចំណុចនេះអាចនឹងពិបាកបន្តិចសម្រាប់អ្នកដែលធ្វើដំណើរដោយរថយន្ត ឬម៉ូតូ ប៉ុន្តែលោកអ្នកក៏អាចឆ្លៀតបានតាមរយៈការដើរចុះឡើងនៅក្នុងការិយាល័យ ឬបន្ទប់ ធ្វើយ៉ាងណាឲ្យខ្លួនឯងសកម្ម និងមិននៅស្ងៀមតែមួយកន្លែង។ ពេលបញ្ចប់ការងាររួចរាល់ហើយ អ្នកក៏គួរឆ្លៀតពេល៥ទៅ១០នាទី ដើរត្រឹកៗនៅទីធ្លាផ្ទះផងដែរ។ ធ្វើការចតយានយន្តឲ្យឆ្ងាយបន្តិច បើមិនអាចឆ្លៀតដើរបានពេលផ្សេង លោកអ្នកអាចអនុវត្តវិធីមួយនេះបានប្រកបដោយប្រសិទ្ធភាពដោយគ្រាន់តែដាក់ចតរថយន្ត ឬម៉ូតូឲ្យនៅឆ្ងាយបន្តិចពីផ្លូវចូលកន្លែងធ្វើការងារ  ឬពេលទៅផ្សារទំនើប ភោជនីយដ្ឋាន។ល។ ដោយគ្រាន់តែធ្វើបែបនេះ អ្នកក៏អាចចំណេញពេលប្រមាណនាទី ដុតកម្តៅជាតិពុលក្នុងខ្លួនប្រាណបាត់ទៅហើយ។ ហាត់ប្រាណបន្តិចបន្តួចក្នុងការិយាល័យ ការហាត់ប្រាណពិតជាផ្តល់នូវអត្ថប្រយោជន៍ដល់ទាំងសុខភាពរបស់អ្នកផ្ទាល់ និងផលិតភាពនៃការងាររបស់អ្នក។ ការពត់ពែនដងខ្លួននៅលើកៅអី (តាមចលនាមួយចំនួនដែលអ្នកអាចរកមើលបាននៅក្នុងការណែនាំដោយអ្នកជំនាញនៅក្នុងអ៊ីនធឺណែត) ក៏អាចនឹងគ្រប់គ្រាន់ និងប្រសើរជាងការដែលអង្គុយសំកុកគ្រប់នាទីសម្លឹងមើលតែអេក្រង់កុំព្យូទ័រដែរ។ ដើរទៅកាន់កន្លែងជិតៗ ការឆ្លៀតឱកាសដើរ ជាវិធីសាស្រ្តដ៏ល្អប្រសើរមួយសម្រាប់បុគ្គលដែលរវល់នឹងការងារ ព្រោះដូចដែលបានលើកឡើងខាងលើរួចមកហើយថា ការដែលធ្វើឲ្យខ្លួនឯងមានចលនា និងភាពសកម្មជាអ្វីដែលគ្រប់គ្នាគួរតែធ្វើ។ ប្រសិនបើមានកាលៈទេសៈណាដែលតម្រូវឲ្យអ្នកទៅកាន់កន្លែងខ្លះដែលមិនសូវស្ថិតក្នុងចម្ងាយឆ្ងាយខ្លាំង វានឹងជាការប្រសើរ បើអ្នកធ្វើដំណើរដោយថ្មើរជើង។ ប្រើប្រាស់ជណ្តើរជើង បុរសម្នាក់បានដុតរហូតដល់១៨០កាឡូរី តាមរយៈការប្រើជណ្តើរជើងរយៈពេល២០នាទី ជារៀងរាល់ថ្ងៃ។ ដូចគ្នាសម្រាប់អ្នកផងដែរ ប្រសិនបើមានជម្រើសនោះ អ្នកគួរតែរើសយកជណ្តើរជើង ជំនួសឲ្យជណ្តើរយន្ត។ សកម្មភាពមួយនេះក៏មានប្រយោជន៍ចំពោះសុខភាពបេះដូងរបស់អ្នកផងដែរ។ លំហាត់ប្រាណងាយៗ តាមការពិតទៅ មានចលនាលំហាត់ប្រាណតូចតាចខ្លះដែលអាចអនុវត្តដោយមិនប្រកាន់ទីកន្លែង ឬពេលវេលានោះឡើយ មានដូចជា ការលោតដោយលើកដៃទាំងពីរឡើងលើហើយទះដៃទាំងពីរ ការអោនចុះអាវ៉ង់ហើយងើបឈរឡើងដោយលើកដៃទំាងពីរ ជាដើម។ បន្ថែមពីលើសកម្មភាពដែលបានរៀបរាប់ខាងលើនេះហើយ អ្នកក៏ត្រូវតែប្រាកដដែរថាសារពាង្គកាយរបស់អ្នកបានទទួលថាមពលគ្រប់គ្រាន់តាមរយៈរបបអាហារដែលមានសារធាតុចិញ្ចឹមត្រឹមត្រូវ ក៏ដូចជាក្នុងបរិមាណមួយគ្រប់គ្រាន់ល្មម។ «ការពារប្រសើរជាងព្យាបាល» ទាន់ពេលដែលសុខភាពអ្នកមិនទាន់មានបញ្ហា អ្នកគួរតែចំណាយពេល និងថវិកាទៅលើការទ្រទ្រង់វា ជាជាងការព្យាបាលវាទៅថ្ងៃអនាគត។ © 2017 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ​

គន្លឹះសុខភាព លំហាត់​ប្រាណ
យោគៈ អាចនឹងមិនមានសុវត្ថិភាព ដូចជាអ្នកគិតនោះទេ

យោគៈ ហាក់ដូចជាទទួលបានប្រជាប្រិយភាពនៅទូទាំងពិភពលោក ពីព្រោះគេបានរកឃើញថា វាមានប្រយោជន៍យ៉ាងច្រើនលើសលុបចំពោះសុខភាពទូទៅ។ សម្រាប់ប្រទេសកម្ពុជាយើង យោគៈក៏បានក្លាយជាការហាត់ប្រាណដ៏ពេញនិយម សម្រាប់ប្រជាពលរដ្ឋមួយចំនួនផងដែរ ជាពិសេស សម្រាប់អ្នកមានបញ្ហាស្រ្តេស និងអ្នកធាត់លើសទម្ងន់។   ប៉ុន្តែ​ តើអ្នកដឹងទេថា ការសិក្សាមួយចំនួនថ្មីៗនេះ បានរកឃើញថាសម្រាប់មនុស្សមួយចំនួន យោគៈមិនមានសុវត្ថិភាពក្នុងការហាត់នោះទេ។ ការសិក្សាដោយសាកលវិទ្យាល័យ Sydney និងសាកលវិទ្យាល័យ Mercy នៅទីក្រុងញូយ៉ក បានបង្ហាញថា «អ្នកហាត់យោគៈ ១០% បានទទួលរងការឈឺចុកចាប់សាច់ដុំ ខណៈពេលដែល ២១ % បានទទួលរងគ្រោះថ្នាក់នានាផ្សេងៗទៀត»។   សាស្រ្តាចារ្យរង Evangelos Pappas មកពីសាកលវិទ្យាល័យ Sydney បានប្រាប់សារព័ត៌មានស៊ីនហួររបស់ប្រទេសចិនថា ការសិក្សារបស់គាត់ បានរកឃើញគ្រោះថ្នាក់ និងបញ្ហាមួយចំនួន ដែលបណ្តាលមកពីការហាត់ក្បាច់យូហ្កា។ គាត់បាននិយាយថា ៖ «យើងចង់បង្ហាញថា យោគៈអាចធ្វើឲ្យអ្នកហាត់ ឈឺចុកចាប់សាច់ដុំ ហើយប្រឈមទៅនឹងបញ្ហានានាមួយចំនួនទៀត»។   ការសិក្សាហាក់ដូចជា សារក្រើនរំលឹក ដល់អ្នកស្រឡាញ់ការហាត់យោគៈទាំងអស់ ឲ្យមានការប្រុងប្រយ័ត្នចំពោះក្បាច់ហាត់ប្រាណមួយនេះ។ យោគៈ ជាក្បាច់ហាត់ប្រាណមួយ ដែលទាមទារចលនា និងកាយវិការជាច្រើន ហើយកាយវិការទាំងនោះមួយចំនួនមិនស័ក្តសមនឹងមនុស្សទាំងអស់គ្នានោះឡើយ។ ដូច្នេះ សូមអ្នកស្រឡាញ់ការហាត់យោគៈទាំងអស់មេត្តាប្រុងប្រយ័ត្ន និងស្វែងយល់ពីការហាត់នេះឲ្យបានច្បាស់ ដើម្បីឲ្យដឹងថាវាស័ក្តសមនឹងសុខភាព ឬលក្ខខណ្ឌរាងកាយរបស់អ្នកដែរឬទេ។ ជាមួយគ្នានេះផងដែរ អ្នកគួរតែស្វែងរកគ្រូបង្វឹក ឬអ្នកណែនាំឲ្យបានត្រឹមត្រូវផងដែរ ដើម្បីចៀសផុតពីគ្រោះថ្នាក់ និងផលវិបាកនានា៕ ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

គន្លឹះសុខភាព លំហាត់​ប្រាណ
[វីដេអូ]​ ផលប៉ះពាល់នៃសន្លាក់ពីការលេងកីឡាមិនបានត្រឹមត្រូវ

បច្ទុប្បន្នការលេងកីឡា មានភាពពេញនិយមចំពោះយុវវ័យសម័យថ្មី ដើម្បីទទួលបានសុខភាពល្អ និងរឹងមាំ។ ក៏ប៉ុន្តែ ការអំឡុងពេលលេងកីឡា​ទាំងឡាយប្រាកដណាស់នឹងមានការប៉ះទង្គិច ដែលបង្កឲ្យមានរបួសស្រាល ឬធ្ងន់មួយចំនួន ដោយពេលខ្លះក៏មិនដឹងខ្លួនឯងថាមានរបួស។ ដូចនេះ សូមស្តាំការបកស្រាយ​ ពី​លោកវេជ្ជបណ្ឌិត ម៉េង សុខ ឯកទេស​ វះកាត់ប្តូរសន្លាក់ និងបាក់បែកឆ្អឹង បម្រើការនៅមន្ទីរពេទ្យមិត្តភាពខ្មែរ-សូវៀត និងមន្ទីរសម្រាក់ព្យាបាល​ លឹម តាំង។​ សូមតាមដានស្តាប់តាមរយៈវីដេអូ ដែលបានភ្ជាប់មកខាងក្រោមនេះ។​

ជំងឺផ្សេងៗ ឆ្អឹង​ និងសន្លាក់ ឆ្អឹង​ និងសន្លាក់ លំហាត់​ប្រាណ
កំហុស ៦ចំណុចពីការហាត់ប្រាណខាងក្រៅ

អ្នកប្រហែលជាម្នាក់ដែលចូលចិត្តការហាត់ប្រាណបែបខាងក្រៅ ឬហៅថា Outdoor រីករាយជាមួយពន្លឺព្រះអាទិត្យ ខ្យល់អាកាសដ៏បរិសុទ្ធ ពិតទេ?... អញ្ចឹង អ្នកប្រាកដជាចង់ឲ្យការហាត់របស់អ្នកទទួលបានទាំងប្រសិទ្ធភាព និងធ្វើឡើងដោយសុវត្ថិភាពនៅក្នុងបរិយាកាសខាងក្រៅ។តាមរយៈហេលស៍ថាម ដែលតែងតែគិតគូរពីសុខភាពរបស់អ្នក ហេលស៍ថាម នឹងបង្ហាញនូវកំហុសឆ្គងទាំង៦ នៃការហាត់ប្រាណនៅខាងក្រៅ (outdoor)៖   1. ភ្លេចផ្តល់ជាតិទឹកឲ្យបានគ្រប់គ្រាន់មុននឹងចេញទៅហាត់ប្រាណខាងក្រៅ៖ ជាការពិតអ្នកត្រូវប្រាកដថាផ្តល់ជាតិទឹកដល់រាងកាយរបស់អ្នកឲ្យបានគ្រប់គ្រាន់ មុនពេលចេញទៅហាត់ ទោះជាការហាត់នៅក្នុងក្លឹប ឬការហាត់នៅខាងក្រៅក្តី។ ប៉ុន្តែ អ្នករឹតតែចាំបាច់ត្រូវញ៉ាំទឹកដើម្បីផ្តល់ដល់រាងកាយរបស់អ្នក ប្រសិនបើអ្នកមានគម្រោងហាត់នៅក្រោមសីតុណ្ហភាពខាងក្រៅ។ កង្វះជាតិទឹកក្នុងពេលហាត់ប្រាណត្រូវបានបង្ហាញថា វាមានផលប៉ះពាល់អវិជ្ជមាន លើការអនុវត្តការហាត់ បន្ថយប្រសិទ្ធភាពក្នុងការហាត់ ថែមទាំងធ្វើឲ្យអ្នកឆាប់អស់កម្លាំង។ លោកអ្នកគួរញ៉ាំទឹកត្រជាក់ក្នុងកម្រិតកំណត់មុននឹងអ្នកចេញទៅធ្វើលំហាត់ប្រាណ ជាជាងរង់ចាំញ៉ាំក្នុងកំឡុងពេលហាត់។ 2. ស្លៀកសម្លៀកបំពាក់ខ្មៅ៖ អ្នកប្រហែលមិនសូវសម្គាល់វានោះទេ ក្នុងពេលហាត់នៅខាងក្រៅ ឬហៅថាOutdoorនេះ ការស្លៀកពាក់ពណ៌ខ្មៅ នឹងធ្វើឲ្យអ្នកមានអារម្មណ៍រលាក ឬក្តៅស្បែកដោយសារពន្លឺព្រះអាទិត្យ។ ដូចនេះ លោកអ្នកគួរធ្វើការចៀសវាងដោយងាយស្រួល ដោយការជ្រើសរើសខោអាវហាត់កីឡាដ៏ត្រឹមត្រូវ។ ខោអាវពណ៌ខ្មៅ ជាអន្ទាក់ស្រូបកម្តៅខ្លាំង ប្រឆាំងនឹងស្បែក ហើយធ្វើឲ្យអ្នកអស់កម្លាំងដោយងាយ ហេតុនេះលោកអ្នកគួរជំនួសពណ៌ខ្មៅ ដោយសម្លៀកបំពាក់ពណ៌ភ្លឺៗឆ្អៅ ស្រាល រលុងៗ ហើយអាចឲ្យខ្យល់ឆ្លងកាត់ ដែលអាចហួតញើសអ្នកបាន។ 3. មិនបានការពារកម្តៅថ្ងៃ៖ នៅពេលអ្នកហាត់កីឡានៅខាងក្រៅប្រាកដជាប្រឈមជាមួយកម្តៅថ្ងៃ ទោះបីជាអ្នករត់ ឬជិះកង់ នៅក្នុងសួនដែលពោរពេញដោយដើមឈើយ៉ាងណាក៏ដោយ។ អ្នកចាំបាច់ត្រូវការឡេការពារកម្តៅថ្ងៃ ព្រោះការប៉ះផ្ទាល់ជាមួយពន្លឺថ្ងៃញឹកញាប់ នឹងមានគ្រោះថ្នាក់ដល់ស្បែក។ 4. ពាក់ស្បែកជើងខុស៖ ការដើរនៅលើម៉ាស៊ីនក្នុងក្លឹបហាត់ប្រាណ គឺវាខុសគ្នាជាមួយនឹងការដើរនៅខាងក្រៅ ហើយវានឹងប៉ះពាល់ដល់ប្រអប់ជើងរបស់អ្នក ប្រសិនបើអ្នកប្រើស្បែកជើងដែលដើរក្នុងក្លឹបហាត់ប្រាណ សម្រាប់ហាត់បែប outdoor ផងដែរ។ វាមិនមែនជាផ្ទៃរាបស្មើដូចនៅផ្ទះ ឬនៅក្លឹបនោះទេ ការដើរនៅខាងក្រៅជាញឹកញាប់គឺមានន័យថាអ្នកត្រូវប្រឈមជាមួយឧបសគ្គមួយចំនួន។ ដូចនេះ អ្នកគួរជ្រើសរើសស្បែកជើងដែលរចនាសម្រាប់ការហាត់ប្រាណនៅខាងក្រៅ មានកម្រិតការពារគ្រប់គ្រាន់ ដើម្បីជួយសម្រួលដល់ការហាត់ និងការពារពីរបួសដែលអាចកើតឡើងក្នុងពេលហាត់។ 5. ហាត់ក្រោមកម្តៅខ្លាំង៖ ជារឿងល្អបំផុតដែលជំរុញឲ្យខ្លួនអ្នកក្រោកពីព្រលឹម ដើម្បីហាត់ ឬហាត់ក្រោយពីអ្នកត្រឡប់មកពីធ្វើការវិញពេលល្ងាច។ ការហាត់នៅកណ្តាលថ្ងៃ ពិសេសក្នុងកំឡុងពីខែមេសា ដល់ខែតុលា ថ្ងៃក្តៅខ្លាំងក្នុងចន្លោះម៉ោង១០ព្រឹក ទៅម៉ោង៤ល្ងាច មិនត្រូវបានណែនាំឡើយ។ ដូចនេះ ត្រូវចៀសវាងហាត់រយៈពេលយូរ និងហាត់ក្នុងម៉ោងនោះ ដើម្បីការពារកម្តៅខ្លាំង ការអស់កម្លាំងខ្លាំង ឬអាចឈានដល់ដាច់សរសៃឈាមខួរក្បាលដោយសារកម្តៅខ្លាំងពេក។ វាពិតជាត្រជាក់ ខ្យល់អាកាសបរិសុទ្ធ នៅពេលព្រឹកព្រលឹម ឬពេលល្ងាច ប៉ុន្តែអ្នកត្រូវត្រួតពិនិត្យសីតុណ្ហភាព និងសំណើមមុនចេញទៅក្រៅជាការល្អ។ 6. រំពឹងទុកដូចគ្នា៖ តាមពិតទៅវាមិនដូចគ្នានោះទេ ទាំងការហាត់ និងលទ្ធផលនៃការហាត់ នៅក្នុងក្លឹប ហើយនិងហាត់ខាងក្រៅ។ ពន្លឺព្រះអាទិត្យ ខ្យល់ សីតុណ្ហភាព សំណើម និងឧបសគ្គមួយចំនួននៅខាងក្រៅ ធ្វើឲ្យអ្នកហាត់ប្រាណនៅខាងក្រៅឆាប់ហត់ និងត្រូវការថាមពលច្រើនជាងការហាត់ក្នុងក្លឹប។ អ្វីដែលអ្នកត្រូវដឹងនៅពេលនេះ គឺមិនត្រូវបង្ខំខ្លួនឯងក្នុងរយៈពេលកំណត់ ដូចពេលអ្នកហាត់ក្នុងក្លឹបឡើយ។   ត្រូវប្រាកដថា អ្នកបានចៀសវាងពីកំហុសដែលបានរៀបរាប់ខាងលើ… © 2017 រក្សាសិទ្ធិគ្រប់យ៉ាង​ដោយ Health Time Corporation ​​​​ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

គន្លឹះសុខភាព លំហាត់​ប្រាណ
អត្ថប្រយោជន៍នឹកស្មានមិនដល់ពីការហាត់ប្រាណបែប outdoor

ជំនាន់ថ្មី មិនថាក្មេង ចាស់ ប្រុស ឬស្រីទេ ចាប់ផ្តើមមានទំនោរមករកការហាត់ប្រាណហើយ ព្រោះតែហេតុផលដែលតែងទន្ទេញជាប់មាត់ថា «សុខភាពជាចម្បង» ។ ក្នុងនោះ មានមនុស្សមួយចំនួននិយមនឹងការហាត់ប្រាណតាមក្លឹប រីឯមួយចំនួនទៀតក៏មានចំណូលចិត្តដើរ រត់ រាំ និងជិះកង់ នៅខាងក្រៅវិញ។ ទោះជាសកម្មភាពអ្វីក៏ដោយឲ្យតែជាការហាត់ប្រាណ សុទ្ធតែផ្តល់មកវិញនូវអត្ថប្រយោជន៍ គ្រាន់តែខុសៗគ្នាអាស្រ័យនឹងបរិស្ថានជុំវិញ។ ដោយឡែក ការហាត់ប្រាណបែប outdoor នេះផ្តល់ឲ្យលោកអ្នកជាច្រើនរួមមាន៖ បង្កើនការផលិតវីតាមីនD ក្នុងពេលហាត់ប្រាណនៅក្រៅ អ្នកចៀសមិនផុតពីការប៉ះពាល់នៃពន្លឺថ្ងៃ ដែលអ្នកក៏ដឹងហើយថាកាលណាស្បែករបស់អ្នកប៉ះជាមួយពន្លឺថ្ងៃក្នុង កម្រិតមធ្យម ជួយបង្កើនការផលិតវីតាមីនDដ៏មានគុណប្រយោជន៍ក្នុងការកាត់បន្ថយបញ្ហាពុកឆ្អឹង និងហានិភ័យនៃជំងឺមហារីកមួយចំនួន។ ភ្ញោចលើផ្លូវចិត្ត ការកើនឡើងនូវចំនួននៃការស្រាវជ្រាវបង្ហាញថាសកម្មភាពខាងក្រៅ ឬការហាត់បែប outdoor ពិតជាល្អបំផុតសម្រាប់សុខភាពផ្លូវចិត្តរបស់ បុគ្គលម្នាក់ៗ ដែលការហាត់បែប indoor ហាក់ដូចជាមិនផ្តល់ឲ្យអ្នក។ ការហាត់នៅក្នុងចំណោមធម្មជាតិ ឬរុក្ខជាតិជាច្រើនផ្តល់ត្រឡប់មកឲ្យអ្នក វិញនូវសុខភាពផ្លូវចិត្តល្អ និងអាចជួយបំបាត់ជំងឺថប់អារម្មណ៍ ព្រមទាំងស្ត្រេសបានយ៉ាងប្រសើរ។ ជាការពិត ការសម្លឹងមើលជញ្ជាំងទាំង ៤ នៃបន្ទប់ ក្នុងផ្ទះ ឬនៅក្លឹប អាចនឹងធ្វើឲ្យអ្នកវិលមុខបាន ដូចច្នេះ ហើយគួរចំណាយពេលហាត់ប្រាណនៅខាងក្រៅខ្លះសម្រាប់ផ្តល់នូវការភ្ញោចខួរក្បាល និង ធ្វើឲ្យចិត្តអ្នកក៏ទទួលបានការហាត់ប្រាណដែរ។ បន្ថែមពីនេះ ខ្យល់បរិសុទ្ធនឹងបង្កើនបរិមាណ អុកស៊ីហ្សែន ដែលជួយបញ្ចេញនូវសារធាតុគីមីល្អពីខួរក្បាលគឺ សេរ៉ូតូនីន មានន័យថាការហាត់ប្រាណនៅខាងក្រៅមិនត្រឹមតែដើម្បីរក្សារាង និងសុខភាពល្អប៉ុណ្ណោះទេ គឺរឹតតែធ្វើឲ្យអារម្មណ៍ល្អអស្ចារ្យទៀតផង។ ពិសេស វាគឺត្រូវបានចាត់ចូលជាការព្យាបាលដ៏សាមញ្ញមួយ នៃជំងឺធ្លាក់ទឹកចិត្ត និងវិបត្តិអារម្មណ៍ផ្សេងទៀត។ កាត់បន្ថយកាឡូរីខ្ពស់ ជាការពិតណាស់ លំហាត់ប្រាណទាំងឡាយសុទ្ធតែកាត់បន្ថយកាឡូរី ប៉ុន្តែគ្រាន់តែនៅក្នុងកម្រិតខុសៗគ្នាប៉ុណ្ណោះ។ លំហាត់ប្រាណនៅក្រៅ ឬហៅថាបែប outdoor នេះអាចផ្តល់ឲ្យអ្នកនូវការកាត់បន្ថយកាឡូរីបានខ្ពស់ជាងការហាត់នៅក្នុងក្លឹប ឬបែប indoor ។ ជាឧទាហរណ៍ស្រាប់ បើអ្នករត់ដោយម៉ាស៊ីន នៅក្នុងក្លឹប នោះអ្នកនឹងចំណាយថាមពលតិចជាង បើធៀបនឹងការរត់នៅក្រៅ ព្រោះអ្នកអាចនឹងត្រូវរត់បញ្ច្រាសខ្យល់រួមនឹងរបាំងធម្មជាតិផ្សេងៗទៀត។ បង្កើនប្រសិទ្ធភាព លោកអ្នកប្រហែលជាចំណាយពេលជាទូទៅ ៣០ នាទីក្នុងក្លឹបហាត់ប្រាណ ហើយមានអារម្មណ៍ថាពិតជាយូរខ្លាំងណាស់ មែនទេ? ជួនកាលធ្វើឲ្យអ្នក ឆាប់ធុញថប់ និងមិនសូវចង់ហាត់ ដែលពេលខ្លះជាហេតុផលធ្វើឲ្យអ្នកមិនសូវហាត់បានទៀងទាត់។ បើអញ្ចឹងមែន ប្តូរទម្លាប់ចាស់ហើយចាប់ផ្តើម ហាត់ប្រាណបែប outdoor នេះវិញម្តង លោកអ្នកអាចនឹងហាត់បានទ្វេដងដោយមិនដឹងខ្លួន មិនធុញព្រមទាំងជំរុញឲ្យលោកអ្នកហាត់បាន ទៀងទាត់ផង។ តើលោកអ្នកនឹងចាំដល់ពេលណាទៀត? ចាប់ផ្តើមពីថ្ងៃនេះ ឈានជើងចេញក្រៅ ដើរ រត់ ឬ ជិះកង់ សាកល៎មើល លោកអ្នកនឹងទទួលបានអារម្មណ៍ប្លែក និងអត្ថប្រយោជន៍ដ៏ល្អទាំងនោះ…. ©2017 រក្សាសិទ្ធិគ្រប់យ៉ាង​ដោយ Health Time Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។

គន្លឹះសុខភាព លំហាត់​ប្រាណ