Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
ភាសាខ្មែរ ភាសាខ្មែរ
English English
ចូលគណនី
Createx Logo
  • Mar 16, 2018 |
  • 6 ឆ្នាំមុន |
  • 7.4K មើល

Levosulpiride មិនត្រឹមតែជាឱសថសម្រាប់តែប្រព័ន្ធរំលាយអាហារទេ

ស្ថិតនៅក្រោមទម្រង់ជាគ្រាប់ ឱសថ Levosulpiride ត្រូវបានកំពុងប្រើប្រាស់នៅក្រោមមុខងារប្រឆាំងនឹងវិបត្តិផ្លូវអារម្មណ៍ (antipsychotics) និងជួយសម្រួលដល់ដំណើរការនៃប្រព័ន្ធរំលាយអាហារ (prokinetic agent)ដែលឱសថមានលក្ខណៈជា Antagonist ទៅនឹងរ៉េស៊ិបទ័រ Central dopamine (D-2, D-3 និងD-4)។ ប្រសិទ្ធភាពព្យាបាល ជាមួយនឹងមុខងារដ៏ចម្បង Levosulpiride ត្រូវបានប្រើប្រាស់សម្រាប់ព្យាបាលជំងឺដូចជា៖ • ភាពមិនប្រក្រតីនៃការគិត និងអារម្មណ៍ (Psychoses) • រោគសញ្ញារវើរវាយ (schizophrenia) • ការព្រួយបារម្ភ (anxiety disorder) • បាក់ទឹកចិត្តជាប្រចាំ (dysthymia) • រលាកប្រព័ន្ធរំលាយអាហារ (irritable bowel syndrome) • តឹងពោះ (abdominal distension) • ឈឺចុងដង្ហើម (epigastric discomfort)។ សកម្មភាពរាងកាយលើឱសថ សារធាតុសកម្មនៃឱសថត្រូវបានស្រូបចូលទៅក្នុងចរន្តឈាមក្នុងកម្រិត ៣០% រយៈពេល ៣ម៉ោងបន្ទាប់ពីការលេប  ដែលការបាត់បង់គឺតាមរយៈមេតាបូលីសនៅក្នុងសរីរាង្គថ្លើម។ ឱសថត្រូវបានបញ្ចេញចោលពាក់កណ្តាលក្នុងរយៈពេល ៨-៩ម៉ោងដែលធ្វើឡើងជាចម្បងតាមរយៈទឹកនោម។ កម្រិត និងការប្រើប្រាស់ ការប្រើប្រាស់ឱសថ Levosulpiride ទាមទារឲ្យមានការអនុញ្ញាតពីវេជ្ជបណ្ឌិត ដោយកម្រិតសម្រាប់មនុស្សពេញវ័យគឺ៖ ម្តង ១គ្រាប់ បីដងក្នុងមួយថ្ងៃ ក្រោយអាហារ។ ផលរំខាននៃឱសថ ឱសថអាចបង្កឲ្យមានផលប៉ះពាល់មួយចំនួនទៅលើដំណើរការរាងកាយមួយចំនួនដូចជា៖ • ប្រព័ន្ធអង់ដូគ្រីន៖ រាំងរដូវ ការផលិតទឹកដោះច្រើនហួសកម្រិត (ចំពោះស្រ្តី) និងការកើនឡើងទំហំដើមទ្រូងចំពោះបុរស • វិបត្តិរំលាយអាហារ៖ ក្អួត ចង្អោរ រាក ឬទល់លាមកជាដើម • ប្រព័ន្ធចរន្តឈាម៖   លើសសម្ពាធឈាមប្រសិនសង្កេតឃើញមានផលរំខានខាងលើ ឬបញ្ហាផ្សេងទៀតអំឡុងពេលប្រើប្រាស់ឱសថ ត្រូវផ្តល់ដំណឹង ឬស្វែងរកការពិគ្រោះពីសំណាក់វេជ្ជបណ្ឌិតជាបន្ទាន់។ ការហាមប្រើ ឱសថត្រូវបានហាមឃាត់ចំពោះ៖ • ស្រ្តីមានផ្ទៃពោះ • អ្នកជំងឺហូរឈាមក្នុងប្រព័ន្ធរំលាយអាហារ • អ្នកជំងឺលើសសម្ពាធឈាម • អ្នកមានប្រតិកម្មទៅនឹងសារធាតុសកម្មនៅក្នុងឱសថ • អ្នកជំងឺប្រកាច់។ ការប្រុងប្រយ័ត្ន ឱសថគួរត្រូវបានប្រើប្រាស់ដោយប្រុងប្រយ័ត្នចំពោះ៖ • អ្នកជំងឺលើសសម្ពាធឈាម • កុមារ និងមនុស្សវ័យចំណាស់ • អ្នកជំងឺកំពុងប្រើប្រាស់ឱសថនេះ គួរចៀសវាងពីការបើកបរ ឬបើកដំណើរការម៉ាស៊ីនដោយហេតុថា ឱសថអាចធ្វើឲ្យងងុយ ឬធីងធោង។គួរបញ្ជាក់ផងដែរ ឱសថ Levosulpiride  ដែលកំពុងមានលក់នៅលើទីផ្សារមានដូចជា Levopirid (Tab.), Pirivo-25, Depride-25 ជាដើម។ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

ឱសថ
ចែករំលែក
  • Mar 15, 2018 |
  • 6 ឆ្នាំមុន |
  • 4.4K មើល

វិធីប្រើប្រាស់វីតាមីនចម្រុះប្រកបដោយប្រសិទ្ធភាពខ្ពស់

អ្នក ឬគ្រួសាររបស់អ្នកអាចជាមនុស្សម្នាក់ដែលកំពុងប្រើប្រាស់ប្រភេទវីតាមីនចម្រុះ ដើម្បីទទួលបានការទ្រទ្រង់សុខភាពបានកាន់តែល្អប្រសើរ ហើយក៏អាចជាមនុស្សម្នាក់ដែលកំពុងខ្ជះខ្ជាយប្រសិទ្ធភាពរបស់វីតាមីនបំប៉នផងដែរ ប្រសិនបើអ្នកមិនបានដឹងពីការប្រើប្រាស់ត្រឹមត្រូវនៃវីតាមីនចម្រុះទាំងនោះ។គួររំឭកថាវីតាមីនចម្រុះ ឬ Multivitamin គឺជាការរួមបញ្ចូលគ្នានៃពពួកវីតាមីនជាច្រើនមុខ ដែលជាទូទៅ យើងអាចទទួលបានតាមរយៈចំណីអាហារ និងប្រភពធម្មជាតិមួយចំនួន ក៏ដូចជាឱសថបំប៉នដែលមាននៅក្នុងឱសថស្ថានផងដែរ។ វីតាមីនចម្រុះ ត្រូវបានប្រើចំពោះអ្នកខ្វះវីតាមីនច្រើនមុខដែលកង្វះទាំងនោះបណ្តាលមកពីការបង្កជំងឺមួយចំនួន ការមានផ្ទៃពោះ កង្វះ ឬអតុល្យភាពអាហារូបត្ថម្ភ ជំងឺដែលទាក់ទងនឹងប្រព័ន្ធរំលាយអាហារ និងកត្តាបង្កផ្សេងៗទៀត។ វិធីប្រើប្រាស់ គេប្រើ Multivitamin ដោយលេបតាមមាត់នៅអំឡុងពេល ឬក្រោយបរិភោគអាហារហើយភ្លាមជាមួយទឹកមួយកែវពេញដែលមានសីតុណ្ហភាពធម្មតា ឬទម្រង់ខ្លះអាចដាក់រំលាយក្នុងទឹកសម្រាប់ទទួលទានតែម្តង។ ជាទូទៅ គេប្រើប្រាស់វានៅពេលព្រឹកជារៀងរាល់ថ្ងៃ ដើម្បីទទួលបានប្រសិទ្ធភាពល្អ។ គួរបញ្ជាក់ថា ឱសថវីតាមីនចម្រុះនេះមិនត្រូវបានប្រើប្រាស់ជំនួសអាហារប្រចាំថ្ងៃឡើយ។ ម្យ៉ាងទៀត រាល់ពេលដែលប្រើប្រាស់ multivitaminអ្នកត្រូវគោរពតាមការណែនាំរបស់ថ្នាំ និងការណែនាំរបស់វេជ្ជបណ្ឌិត ឬឱសថការីជានិច្ច។ ដូចនេះ មុនពេលប្រើអ្នកត្រូវរៀបរាប់អំពីស្ថានភាពជំងឺប្រចាំថ្ងៃ ប្រវត្តិជំងឺ និងការប្រតិកម្មជាមួយសារធាតុណាមួយដល់វេជ្ជបណ្ឌិត និងឱសថការីរបស់អ្នក។ ក្នុងករណីខ្លះ អ្នកមិនត្រូវបានអនុញ្ញាតឲ្យប្រើថ្នាំ multivitamin ទេ ឬ ករណីខ្លះទៀត អ្នកត្រូវប្រើថ្នាំmultivitamin ក្នុងកម្រិតកំណត់មួយជាក់លាក់ និងដោយប្រុងប្រយ័ត្ន។ ចំពោះស្ត្រីមានផ្ទៃពោះកម្រិតនៃការប្រើប្រាស់ថ្នាំអាចខុសពីកម្រិតអ្នកប្រើប្រាស់ធម្មតា ហើយត្រូវគោរពតាមការណែនាំរបស់វេជ្ជបណ្ឌិតជាដាច់ខាត។ ការប្រុងប្រយ័ត្ន •មិនត្រូវប្រើប្រាស់ឱសថនេះលើសពីកម្រិតប្រើរបៀបប្រើ និងរយៈពេលប្រើប្រាស់ដែលបានណែនាំទ្បើយ •ចៀសវាងការប្រើប្រាស់ឱសថនេះជាមួយមុខឱសថដទៃទៀតដោយមិនមានការណែនាំពីវេជ្ជបណ្ឌិត •ចៀសវាងការប្រើប្រាស់ឱសថនេះជាមួយទឹកដោះគោ កាហ្វេ ស្រា ... •ការប្រើប្រាស់ផលិតផលវីតាមីនដែលមានលក្ខណៈស្រដៀងគ្នាក្នុងពេលតែមួយ អាចធ្វើឲ្យលើសកម្រិត និង អាចបង្កឲ្យមានគ្រោះថ្នាក់ធ្ងន់ធ្ងរ •ក្នុងករណី គិតថាអ្នកបានប្រើប្រាស់ឱសថ multivitamin ច្រើនហួសកំណត់ អ្នកត្រូវស្វែងរកការព្យាបាលជាបន្ទាន់ •ត្រូវប្រុងប្រយ័ត្នចំពោះស្ត្រីមានផ្ទៃពោះ (ត្រូវគោរពតាមការណែនាំរបស់វេជ្ជបណ្ឌិតដាច់ខាត) •ហាមឃាត់ដាច់ខាតចំពោះកូនក្មេងដែលទើបនឹងកើតក្នុងការប្រើប្រាស់វីតាមីនចម្រុះកម្រិតខ្ពស់។ អន្តរកម្មឱសថ ត្រូវប្រុងប្រយ័ត្នក្នុងការប្រើប្រាស់ឱសថ multivitamin ជាមួយឱសថដែលប្រើប្រាស់រាល់ថ្ងៃដូចជាពពួកកាល់ស្យូម ឬឱសថបំបាត់ការឈឺចាប់ដែលមានជាតិកាល់ស្យូម ព្រោះជាតិកាល់ស្យូមអាចធ្វើឲ្យសារធាតុ multivitamin មានលក្ខណៈពិបាកក្នុងការស្រូបចូលទៅក្នុងសារពាង្គកាយ។ មិនតែប៉ុណ្ណោះ ឱសថ multivitamin អាចមានអន្តរកម្មឱសថជាមួយពពួកឱសថផ្សេងៗទៀតដូចជា៖ ថ្នាំផ្សះ (Antibiotics ) ថ្នាំបំបាត់ការឈឺចាប់ (Antacid)ថ្នាំបញ្ចុះទឹកនោម (Diuretic) និងថ្នាំទាក់ទងនឹងបេះដូង ឬសម្ពាធឈាមជាដើម។ ដូច្នេះ ការប្រើប្រាស់វីតាមីនចម្រុះ អាចផ្តល់ឲ្យអ្នកនូវប្រសិទ្ធភាពក៏ដូចជាសុវត្ថិភាពបាន ប្រសិនបើអ្នកប្រើប្រាស់បានត្រឹមត្រូវប៉ុណ្ណោះ ហើយអ្នកត្រូវប្រាកដផងដែរថា អ្នកបានទៅពិគ្រោះជាមួយវេជ្ជបណ្ឌិត មុនពេលប្រើប្រាស់នូវឱសថបំប៉ននេះ និងចៀសវាងផ្តល់វីតាមីនបំប៉នរបស់អ្នកផ្ទាល់ទៅកាន់អ្នកដទៃ។ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Mar 09, 2018 |
  • 6 ឆ្នាំមុន |
  • 3.4K មើល

សហគមន៍ថ្មីសម្រាប់ក្រុមហ៊ុនចែកចាយឱសថ  ក្នុងការផ្គត់ផ្គង់ឱសថដោយប្រើប្រាស់គេហទំព័រតែមួយ

ជាមួយនឹងការរីកចម្រើនតាមវិស័យនានាក្នុងយុគសម័យបច្ចុប្បន្ននេះ សេវាកម្មសុខាភិបាលផ្នែកឱសថក៏កំពុងត្រូវបានរីកដុះដាលគួរឲ្យកត់សម្គាល់ ដោយគេសង្កេតឃើញមានការកើនឡើងនៃវត្តមានបណ្តាក្រុមហ៊ុនផលិត និងចែកចាយឱសថ ទាំងក្នុងស្រុក និងក្រៅស្រុកជាបន្តបន្ទាប់ក្នុងសង្គមកម្ពុជាសព្វថ្ងៃនេះ។ វត្តមានទាំងនេះបាននឹងកំពុងធ្វើការ បម្រើសេវាកម្មយ៉ាងសកម្មដើម្បីចូលរួមចំណែកកែប្រែ ធ្វើឲ្យកាន់តែមានភាពងាយស្រួល និងសម្បូរបែបក្នុងវិស័យឱសថសម្រាប់ប្រជាជនកម្ពុជា បន្ថែមពីនោះក្រុមហ៊ុនក៏បានផ្តល់ជាឱកាសការងារយ៉ាងច្រើនសម្រាប់ធនធានមនុស្សក្នុងប្រទេសផងដែរ។ ក្រុមហ៊ុនចែកចាយឱសថ ជាសេវាកម្មដែលចម្បងមួយមិនអាចខ្វះបានក្នុងការផ្តល់ជាផលិតផលជាឱសថ អាហារប៉ប៉ន និងបរិក្ខារវេជ្ជសាស្រ្តមួយចំនួនទៀត សម្រាប់ជាតម្រូវការនៅតាមស្ថាប័នវិស័យសុខាភិបាល។ យ៉ាងណាមិញ ជាមួយនឹងនិន្នាការនៃសម័យកាលដ៏រីកចម្រើន គេសង្កេតឃើញមានការរុករក ស្រាវជ្រាវនូវអ្វីដែលថ្មីៗ និងឆាប់រហ័សតួយ៉ាងដូចជាប្រព័ន្ធអេឡិចត្រូនិក ឧបករណ៍ និងម៉ាស៊ីនប្រើប្រាស់មួយចំនួនសម្រាប់ជាជំនួយការដ៏មានប្រយោជន៍ក្នុងវិស័យនានា។ ជាមួយគ្នានេះផងដែរ ដើម្បីបោះជំហានឲ្យបានទាន់នូវសម័យដ៏ជឿនលឿនបែបនេះ ក្រុមហ៊ុនហេលស៍ថាម ក៏មានការបង្កើតជាសេវាកម្មទិញ-លក់ឱសថរវាងក្រុមហ៊ុនផ្គត់ផ្គង់ឱសថ និងឱសថស្ថាន ដែលដំណើរការនៃការទិញ-លក់នឹងត្រូវធ្វើឡើងនៅលើគេហទំព័រ www.healthtime.tips។  អត្ថប្រយោជន៍នៃគេហទំព័រដោយសារគេហទំព័រត្រូវបានបង្កើតឡើងរួមបញ្ចូលនូវមុខងារយ៉ាងសម្បូរបែប ដូចនេះម្ចាស់ក្រុមហ៊ុនផ្គត់ផ្គង់ឱសថអាចប្រើប្រាស់ដើម្បី៖  •ដាក់បញ្ចូលនូវស្តុកឱសថក្នុងគេហទំព័រ •ទទួលបានការបញ្ជាទិញឱសថពីម្ចាស់ឱសថស្ថាន •កាត់បន្ថយនូវការបាត់បង់នៃឱសថ ដោយគេហទំព័រនឹងធ្វើការកាត់ចំនួនស្តុកនៃឱសថនៅរាល់ទទួលការបញ្ជាទិញម្តងៗ និងបានផ្តល់ជាដំណឹងពីការអស់ស្តុកនៃឱសថនីមួយៗ •ប្រើប្រាស់គេហទំព័រក្នុងការផ្សព្វផ្សាយនូវកម្មវិធី ឬដំណឹងផ្សេងៗទាក់ទងទៅនឹងសេវាកម្មរបស់ក្រុមហ៊ុនផ្ទាល់ទៅកាន់អ្នកនៅក្នុងវិស័យសុខាភិបាល  •ផ្តល់ជាចំណេះដឹងផ្នែកឱសថទៅកាន់អ្នកប្រកបវិជ្ជាជីវៈផ្នែកសុខាភិបាល ក៏ដូចជាប្រជាជនទូទៅ ដោយធ្វើការចែករំលែកតាមរយៈអត្ថបទទៅក្នុងប្រព័ន្ធសង្គមនានា។  បើទោះបីការផ្លាស់ប្តូរ និងការសម្របខ្លួនសម្រាប់ចាប់ផ្តើមប្រើប្រាស់អ្វីដែលថ្មី ទាមទារនូវការអត់ធ្មត់ និងពេលវេលាមួយរយៈ យ៉ាងណាមិញវាអាចនឹងមានភាពប្រសើរ ស័កិ្តសម និងទាន់ពេលវេលាជាមួយគ្នានៃសម័យកាលដែលកំពុងតែជឿនលឿន មួយផ្នែកទៀតការប្រើប្រាស់នូវគេហទំព័រអាចជាមធ្យោបាយមួយក្នុងការជួយពន្លឿននូវប្រសិទ្ធភាពការងារក្នុងការលក់របស់បុគ្គលិកក្នុងក្រុមហ៊ុនផងដែរ។  ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Feb 20, 2018 |
  • 6 ឆ្នាំមុន |
  • 4.4K មើល

Healol ក្រុមហ៊ុនចែកចាយឱសថ ជាមួយវត្តមានជាង២១ឆ្នាំក្នុងទីផ្សារកម្ពុជា!

វត្តមានជាង ២១ឆ្នាំក្នុងការផ្គត់ផ្គង់ឱសថសម្រាប់ទីផ្សារកម្ពុជា ក្រុមហ៊ុន Healol បាននឹងកំពុងបម្រើសេវាកម្មចែកចាយឱសថយ៉ាងសស្រាក់សស្រាំ និងផ្តល់ផលិតផលផ្នែកសុខាភិបាល​ដែលមិនអាចខ្វះបាន និងជាតម្រូវការដ៏ចាំបាច់សម្រាប់សុខមាលភាពរបស់ប្រជាជនកម្ពុជាទាំងមូល។ ខ្លះៗអំពីក្រុមហ៊ុន ក្រុមហ៊ុន Healol បានដំណើរការនៅក្នុងប្រទេសកម្ពុជាដោយចាប់ផ្តើមជាការិយាល័យតំណាងនាឆ្នាំ ១៩៩៧ លុះដល់ឆ្នាំ ២០០០ ទើបចាប់ដំណើរការជាក្រុមហ៊ុនចែកចាយឱសថផ្ទាល់ក្នុងទីផ្សារកម្ពុជា នេះបើយោងទៅតាមប្រសាសន៍របស់លោក Abhay Kanchan ដែលជាប្រធានប្រចាំក្រុមហ៊ុន Healol ផ្ទាល់ និងមានបទពិសោធន៍ការងារអស់រយៈពេល ៧ឆ្នាំ ខាងផ្នែកទីផ្សារ និងផ្នែកលក់  គួរបញ្ជាក់ផងដែរក្រុមហ៊ុនបានចាប់ ផ្តើមដំបូងបំផុតនាឆ្នាំ ១៩៩៤នៅប្រទេសវៀតណាម។ Healol ត្រូវបានសម្រេចជាឈ្មោះរបស់ក្រុមហ៊ុន ដែលមានអត្ថន័យក្នុងគោលដៅ “ធ្វើការព្យាបាលដល់អ្នកគ្រប់គ្នា” ចំណែកការ សម្រេចចិត្តក្នុងការឈានជើងក្នុងទីផ្សារទៀតសោត គឺក្រុមហ៊ុនបានសម្លឹងមើលឃើញពីសក្តានុពលក្នុងទីផ្សារកម្ពុជា និងតម្រូវការផ្នែកឱសថ ដែលមានប្រសិទ្ធភាពខ្ពស់។ ចក្ខុវិស័យរបស់ក្រុមហ៊ុន ក្រុមហ៊ុនបាននឹងកំពុងប្រកាន់ខ្ជាប់នូវចក្ខុវិស័យមួយ ដើម្បីអាចក្លាយខ្លួនជាក្រុមហ៊ុនចែកចាយឱសថដែលលេចធ្លោជាងគេក្នុងវិស័យសុខាភិបាលនិងសុខភាពទាំងមូល ដោយមិនត្រឹមតែផ្គត់ផ្គង់នូវឱសថសម្រាប់ការព្យាបាលនោះទេ ថែមទាំង មានការចែកចាយនូវផលិតផលសុខាភិបាលសម្រាប់ជាការការពារផងដែរ។ ដើម្បីសម្រេច បានសមិទ្ធផលដែលបានគ្រោងទុកក្រុមហ៊ុនបានខិតខំបំពេញតួនាទីឲ្យបានពេញលេញ ដែលទាំងនោះក៏វាអាស្រ័យទៅនឹងភាពខិតខំប្រឹងប្រែងភាពស្មោះត្រង់ និងការលះបង់ពីសំណាក់បុគ្គលិក ទាំងថ្នាក់លើ និងថ្នាក់ក្រោមទាំងអស់ ដែលកំពុងបំពេញភារកិច្ចជារៀងរាល់ថ្ងៃ ហើយការគោរពស្រឡាញ់ពីអ្នកគ្រប់គ្នានៅក្នុងក្រុមហ៊ុនទាំងមូល និងការចាត់ទុកគុណភាពនៃផលិតផលជាចម្បង ក៏ជាផ្នែកមួយក្នុងការផ្តល់ជាអត្តសញ្ញាណរបស់ក្រុមហ៊ុន ដែលអាចនឹងមានភាពខុសប្លែកពីក្រុមហ៊ុនចែកចាយឱសថដទៃទៀត។ ផលិតផលរបស់ក្រុមហ៊ុន ក្រុមហ៊ុនបានធ្វើការចែកចាយផលិតផលជាច្រើនដែលរួមបញ្ចូលនូវផលិតផលផ្នែកជីវសាស្រ្ត(Biological products) ឱសថ និងឱសថបំប៉ន (Health suppl-ements) ផ្សេងទៀតទៅកាន់ទីផ្សារ។ ការនាំចូលនូវផលិតផលទាំងនោះ ក្រុមហ៊ុនមានបេសកម្មមួយក្នុងការធានាឲ្យបានប្រសិទ្ធភាព និងគុណភាពខ្ពស់ ចំពោះការផ្គត់ផ្គង់ផលិតផលដែលទទួលបានពីសំណាក់ដៃគូក្រុមហ៊ុន ឬរោងចក្រផលិតឱសថនានា។ បន្ថែមពីនេះ ក្រៅពីប្រសិទ្ធភាព និងគុណភាពនៃផលិតផល ការលក់ចេញក្នុងតម្លៃសមរម្យក៏ជាវិធានការណ៍របស់ក្រុមហ៊ុនក្នុងការចូលរួមចំណែកទីផ្សារកម្ពុជាសព្វថ្ងៃផងដែរ។   យុទ្ធសាស្រ្តឈានចូលក្នុងទីផ្សារកម្ពុជា គម្រោងការ និងវិធីសាស្រ្តចូលក្នុងទីផ្សារកម្ពុជាគឺធ្វើឡើង ស្របទៅតាមចក្ខុវិស័យ និងបេសកកម្មដោយក្រុមហ៊ុនមានគោលបំណងចែកចាយ និងផ្គត់ផ្គង់ផលិតផលផ្នែកសុខាភិបាលទៅកាន់ប្រជាជនគ្រប់រូប។ ចាប់តាំងពីការឈានជើងដំបូងរហូតមកដល់សព្វថ្ងៃ ក្រុមហ៊ុនមានភាពរលូនច្រើនប៉ុន្តែបើក្រឡេកមើលស្ថានភាពទីផ្សារទាំងមូលប្រជាជនទូទៅទាំងអស់គួរតែស្វែងយល់ពីប្រភពដែលធ្វើការចែក ចាយឱសថរួមជាមួយគុណភាពផលិតផលដែលអាចជឿទុកចិត្តបាន។ ការរំពឹងទុកនាពេលអនាគត នារយៈពេលខាងមុខទៀត លោក Abhay Kanchan សង្ឃឹមថានឹងឃើញមានវត្តមានការចែកចាយនូវផលិតផលថែរក្សាសុខភាព និងផលិតផលសម្រាប់ជីវភាពរស់នៅឲ្យបានកាន់តែច្រើន ដោយសារការកើនឡើងផលិតផលទាំងនោះជាសញ្ញាបញ្ជាក់ពីការការពារ ដែលមានភាពប្រសើរជាងការប្រើប្រាស់ផលិតផលសម្រាប់ការព្យាបាលតែមួយមុខ។ ដូច្នេះ ក្រុមហ៊ុននឹងរៀបចំនូវយុទ្ធនាការណ៍ផ្សព្វផ្សាយ ដើម្បីបណ្តុះការយល់ដឹងរបស់ប្រជាជនពីសារសំខាន់នៃការប្រើប្រាស់ផលិតផលដែលមានគុណភាព និងពង្រឹងការស្រឡាញ់សុខភាពឲ្យបានច្រើន។ សុខភាពជាវត្ថុដ៏មានតម្លៃ ដូច្នេះគ្រប់បុគ្គលទាំងអស់គួរធ្វើការស្វែងយល់ សិក្សា ស្រាវជ្រាវបន្ថែម និងបង្កើនបម្រុងប្រយ័ត្នចំពោះផលិតផលដែលប្រើប្រាស់ ដោយគួរធ្វើការជ្រើសរើស និងសង្កេតមើលពីគុណភាពផលិតផលនីមួយៗនៅតាមប្រភពនីមួយៗ។ លោក Abhay Kanchan ដែលជាប្រធានប្រចាំក្រុមហ៊ុន Healol ផ្ទាល់ និងមានបទពិសោធន៍ការងារអស់រយៈពេល ៧ឆ្នាំ ខាងផ្នែកទីផ្សារ និងផ្នែកលក់ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

ឱសថ
ចែករំលែក
  • Feb 14, 2018 |
  • 6 ឆ្នាំមុន |
  • 6.9K មើល

ស្វែងយល់ពីសកម្មភាពរបស់ឱសថ Sucralfate

សកម្មភាពរបស់ឱសថSucralfate ជាឱសថត្រូវបានបង្កើតឡើងក្នុងការព្យាបាលបញ្ហាដំបៅក្រពះពោះវៀនភ្លាមៗដែលរួមបញ្ចូល ដំបៅក្រពះ ដំបៅពោះវៀនតូច រលាកក្រពះរ៉ាំរ៉ៃ និងស្រួចស្រាវ ការច្រាលទឹកអាស៊ីតឡើងក្នុងបំពង់អាហារ និងដំបៅបំពង់អាហារ ដោយមានឥទ្ធិពលប្រឆាំងនឹង Pepsin និង Acid ដើម្បី ការពារភ្នាសរបស់ក្រពះ តែវាគ្មានសកម្មភាពក្នុងការការពារស្ថានភាពជំងឺមិនឲ្យលាប់ឡើងវិញបាននោះទេ។ ឱសថមានសមត្ថភាពក្នុងការការពារការដាច់រលាត់នៃដំបៅពីទឹកក្រពះ តាមរយៈការភ្ជាប់ទៅនឹងប្រូតេអុីននៅទីតាំងជំងឺ ជួយបន្ថយសកម្មភាពរបស់ Pepsin និងបន្សាបជាតិអាស៊ីត។ កម្រិតប្រើប្រាស់ កម្រិតប្រើប្រាស់ទូទៅគឺ៖ •មនុស្សធំ៖ លេបម្តង ១ក្រាម មុនអាហារ ១ម៉ោងឬក្រោយអាហារ ២ម៉ោង អាចប្រើបាន ៤ដងក្នុងមួយថ្ងៃ •រយៈពេលប្រើប្រាស់៖ ៤ ទៅ ៨សប្តាហ៍។ យ៉ាងណាមិញការប្រើប្រាស់ និងកម្រិតអាចនឹងប្រែប្រួលអាស្រ័យទៅតាមប្រភេទ ឬស្ថានភាពនៃជំងឺ និងអាយុរបស់អ្នកជំងឺ។ ផលរំខាននៃឱសថ ឱសថអាចបង្កឲ្យមានផលរំខានដល់៖ •ប្រព័ន្ធរំលាយអាហារ៖ ទល់លាមក រាក ក្អួតចង្អោរ ពិបាករំលាយអាហារ ឬហើមពោះជាដើម •ស្បែក៖ កន្ទួលក្រហម រមាស់លើស្បែក •ប្រព័ន្ធសរសៃប្រសាទ៖ ធីងធោង វិលមុខ •វិបត្តិផ្សេងៗ៖ ឈឺខ្នង ឈឺក្បាល និងងាយមានប្រតិកម្ម (កន្ទាលត្រអាក  ហើមសរសៃឈាមពិបាកដកដង្ហើម និងរលាកច្រមុះ)។ អន្តរកម្មឱសថ ឱសថ Sucralfate អាចទៅបន្ថយការស្រូបចូលនូវឱសថមួយចំនួនដូចជា Fluoroquinoloneantibiotic (ciprofloxacin, norfloxacin....),Cimetidine, Ranitidine, Digoxin, Phynytoin,Tetracycline និង Theophylline ក្នុងករណីប្រើប្រាស់ក្នុងពេលតែមួយ។ ដើម្បីចៀសវាងពីបញ្ហានេះ គួរប្រើប្រាស់ឱសថខាងលើ ២ ម៉ោងមុនពេលប្រើប្រាស់ឱសថ Sucralfate។   ការប្រុងប្រយ័ត្ន •អ្នកមិនគួរប្រើប្រាស់ឱសថនេះ ក្នុងករណីមានប្រតិកម្មជាមួយសារធាតុសកម្មនៃ Sucralfate •ប្រាប់ទៅដល់គ្រូពេទ្យមុនពេលប្រើប្រាស់ឱសថក្នុងករណីអ្នកមាន៖ ជំងឺទឹកនោមផ្អែម ខ្សោយតម្រងនោម (កំពុងលាងឈាម) ឬមានបញ្ហាក្នុងការលេបឱសថ ស្រ្តីមានផ្ទៃពោះ ឬកំពុងបំបៅដោះកូន •មិនត្រូវប្រើប្រាស់ឱសថក្នុងកម្រិតលើស ឬរយៈពេលយូរ ដោយគ្មានវេជ្ជបញ្ជា។ គួរបញ្ជាក់ផងដែរថា ឱសថ Sucralfateអាចមានទម្រង់ជាទឹក (Suspension) ឬគ្រាប់ (Tablets) ដែលរួមបញ្ចូលនូវឈ្មោះនៅលើទីផ្សារដូចជា Ulcrafa 15ml (Susp.)Carafate 10ml (Susp.) និង Sucramal 1g (Tablet)...ជាដើម។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Feb 14, 2018 |
  • 6 ឆ្នាំមុន |
  • 4.4K មើល

ប្រើវីតាមីនB លើសកម្រិត អាចបង្កជំងឺមហារីកសួត???

ការស្រាវជ្រាវថ្មីៗបានបង្ហាញថាការប្រើប្រាស់ក្នុងកម្រិតខ្ពស់នូវវីតាមីន B6 និង B12 មានទំនាក់ទំនងជាមួយនឹងការកើនឡើងនៃមហារីកសួតចំពោះបុរសជក់បារី។  “ការប្រឈមត្រូវបានបញ្ជាក់ថាមានការកើនឡើងចំពោះបុរសដែលប្រើប្រាស់ច្រើនជាង ២០ មីលីក្រាមនៃ B6 និង ៥៥ មីក្រូក្រាមនៃ B12 ក្នុងមួយថ្ងៃ អស់រយៈពេល១០ឆ្នាំ។ បុរសដែលជក់បារី និងប្រើប្រាស់វីតាមីន B6 និង B12 តែឯង (មិនមែនប្រភេទវីតាមីនចម្រុះ ឬរបបអាហារ) ក្នុងកម្រិតដែលលើសនេះ អាចវិវឌ្ឍជាមហារីកសួតដល់ទៅ ៣០ ទៅ ៤០% បើធៀបនឹងអ្នកមិនប្រើប្រាស់។ ដោយឡែក ពុំមានការរកឃើញនូវកត្តាប្រឈមកើតចំពោះស្រ្តីឡើយ” នេះបើតាមការរាយការណ៍ពី  The Ohio State University Comprehensive Cancer Center, Fred Hutchinson Cancer Research Center និងNational Taiwan University ចុះនៅថ្ងៃទី ២២ខែសីហា ឆ្នាំ ២០១៧ កន្លងទៅនេះ តាមរយៈ Journal of Clinical Oncology ។ ការសិក្សានេះត្រូវបានធ្វើឡើងលើបុរសអាយុពី ៥០ ទៅ៧៦ឆ្នាំ លើសពី ៤៤,០០០នាក់ ដែលបានប្រើប្រាស់វីតាមីន B ក្នុងកម្រិតខ្ពស់ និងជក់បារីតាំងពី ១០ឆ្នាំមុន។គួរបញ្ជាក់ម្តងទៀតថា ការកើនឡើងនៃការប្រឈមនេះត្រូវបានបកស្រាយថា អាចកើតមានតែចំពោះបុរសដែលមានប្រវត្តិជក់បារី និងប្រើប្រាស់វីតាមីនB សុទ្ធក្នុងកម្រិតខ្ពស់ជាងកម្រិតអនុញ្ញាតដែលណែនាំឲ្យប្រើប្រាស់របស់សហរដ្ឋអាមេរិក (the U.S. Recommended Dietary Allowance) ជាច្រើនដងក្នុងរយៈពេលយូរឆ្នាំតែប៉ុណ្ណោះ។ ការពិត ការស្រាវជ្រាវក៏បានរកឃើញផងដែរថា បុរសដែលបញ្ឈប់ការជក់បារីបានយ៉ាងតិច ១០ឆ្នាំ ហើយនៅមានការប្រើប្រាស់វីតាមីន B ក្នុងកម្រិតខ្ពស់ ពុំមានការប្រឈមខ្ពស់ទៅនឹងមហារីកសួតឡើយ ឬអាចនិយាយបានថា អត្រាប្រឈមរបស់ពួកគេគឺមានប្រហែលនឹងបុរសដែលមិនធ្លាប់ជក់បារីតែម្តង។  ទោះយ៉ាងណាក៏ដោយ មានភាពខ្វែងគ្នាមួយចំនួនទាក់ទងនឹងលទ្ធផលនៃការស្រាវជ្រាវ ដោយក្នុងនោះការសិក្សាមួយចំនួនទៀតបែរជាបានបង្ហាញថាវីតាមីន B6 អាចកាត់បន្ថយការប្រឈមនឹងមហារីកសួត ស្របពេលការសិក្សាខ្លះទៀតបានបង្ហាញថា ពុំមានទំនាក់ទំនងណាមួយត្រូវបានរកឃើញរវាង B12 ជាមួយកត្តាប្រឈមនឹងមហារីកឡើយ។ ម្យ៉ាងទៀត មានប្រភពពីគ្រូពេទ្យបានបញ្ជាក់ផងដែរថា ការទទួលទាននូវវីតាមីន B12ច្រើនជាងកម្រិតណែនាំមិនត្រឹមមិនអាចទទួលបានអត្ថប្រយោជន៍បន្ថែមណាមួយឡើយ តែបរិមាណដែលលើសនោះក៏មិនត្រូវបានស្រូបចូលផងដែរ ដែលមានន័យថារាងកាយរបស់យើងនឹងធ្វើការបញ្ចេញវាចោលតាមរយៈទឹកនោមដោយឯកឯង។ រីឯ ប្រភពពីគេហទំព័ររបស់ NIH បានឲ្យដឹងថារាងកាយរបស់យើងធ្វើការស្រូបវីតាមីន B12 ក្នុងទម្រង់គ្រាប់ថ្នាំសម្រាប់លេបយ៉ាងមានកម្រិតបំផុត ឬអាចនិយាយបានថា មានត្រឹមតែ ១០មីក្រូក្រាមក្នុង ៥០០មីក្រូក្រាមនៃ B12 ប៉ុណោះដែលអាចត្រូវបានស្រូបចូលដោយរាងកាយរបស់អ្នកមានសុខភាពល្អធម្មតា។ វាពិតជាមានការពិបាកក្នុងការបកស្រាយអំពីភាពខ្វែងគ្នានៃលទ្ធផលពីការសិក្សានីមួយៗខាងលើនេះបើតាមអ្នកជំនាញពី Memorial Sloan Kettering Cancer Center ក៏ប៉ុន្តែសារសំខាន់រួមពីការអង្កេតរបស់ the Ohio State និងការសិក្សាជាច្រើនទៀតគឺ ការឈប់ជក់បារីជាវិធីល្អបំផុតក្នុងការការពារមហារីកសួតប្រសិនបើអ្នកជាបុរសនិងត្រូវការប្រើប្រាស់វីតាមីន B ទាំងនេះ។ ក្រៅពីនោះអ្នកត្រូវគោរពតាមកម្រិតណែនាំប្រចាំថ្ងៃឲ្យបានត្រឹមត្រូវ ដែលក្នុងនោះចំពោះបុរសចាប់ពី ៥១ឆ្នាំឡើងគឺ ១,៧ មីលីក្រាមនៃវីតាមីន B6 និង ២,៤ មីក្រូក្រាមនៃវីតាមីន B12។ ជាពិសេស អ្នកគួរធ្វើការពិនិត្យសុខភាពឲ្យបានទៀងទាត់ និងស្វែងរកការណែនាំពីអ្នកជំនាញសុខភាព ឬវេជ្ជ-បណ្ឌិតរបស់អ្នកជាមុនដើម្បីទទួលបានការប្រើប្រាស់ក្នុងកម្រិតដែលត្រឹមត្រូវសម្រាប់អ្នកផ្ទាល់។ ប្រភពយោង៖ http://ascopubs.org/doi/abs/10.1200/JCO.2017.72.7735 https://www.medscape.com/viewarticle/884611 https://www.health.harvard.edu/cancer/b-vitamins-may-raise-risk-of-lung-cancer-in-men-who-smoke https://ods.od.nih.gov/factsheets/VitaminB12-HealthProfessional/ https://www.drugs.com/news/could-common-vitamin-supplements-raise-lung-cancer-risk-66756.html ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Jan 27, 2018 |
  • 6 ឆ្នាំមុន |
  • 3.1K មើល

ការសម្លឹងមើលពីសក្តានុពលនៃវិស័យសុខាភិបាល និងបេសកកម្មរបស់ Zuellig Pharma នៅកម្ពុជា

តើអ្នកគិតយ៉ាងណាចំពោះឧស្សាហកម្មក្នុងវិស័យសុខាភិបាលនៅប្រទេសកម្ពុជា? អ្នកនឹងមិនអាចឃើញមានប្រទេសច្រើនទេដែលមានការលូតលាស់ និងបោះជំហានទៅមុខបានយ៉ាងឆាប់រហ័សដូចជាប្រទេសកម្ពុជាក៏ប៉ុន្តែទាក់ទងនឹងសុវត្ថិភាព និងសុខភាពរបស់ប្រជាជនពួកយើងតែងតែត្រូវស្វះស្វែងក្នុងការរុញច្រានបន្ថែមជានិច្ច។ ឧស្សាហកម្មនៃវិស័យសុខាភិបាលនៅកម្ពុជា  នឹងមានការលូតលាស់បន្ថែមទៀតនៅប៉ុន្មានឆ្នាំខាងមុខទៀតប៉ុណ្ណោះ ដូចនេះការងាររបស់យើង គឺជាការចូលរួមជួយឲ្យមានការរីកចម្រើនតាមរយៈការផ្តល់ឲ្យអ្នកជំងឺកាន់តែច្រើននូវការទទួលបានផលិតផលឱសថ និងសេវាកម្មសុខភាពដែលមានគុណភាពខ្ពស់។” នេះជាការឆ្លើយតបរបស់ លោក Jean-Gaetan Guillemaud អតីតនាយកគ្រប់គ្រងទូទៅនៃក្រុមហ៊ុនចែកចាយឆ្លងកាត់ប្រទេសចិន ឥណ្ឌា អេស្ប៉ាញនិងបារាំង និងបច្ចុប្បន្នជានាយកគ្រប់គ្រងទូទៅនៃក្រុមហ៊ុន Zuellig Pharma ប្រចាំប្រទេសកម្ពុជា ដែលកំពុងទទួលខុសត្រូវលើគ្រោងការយុទ្ធសាស្ត្ររយៈពេល ៥ឆ្នាំក្នុងការអភិវឌ្ឍលើសកម្ម-ភាពរបស់ Zuellig Pharma នៅកម្ពុជាដែលបានដំណើរការតាំងពីឆ្នាំ ២០១៤ កន្លងទៅ។ អំពីក្រុមហ៊ុន Zuellig Pharma គួររំលឹកថា Zuellig Pharma ត្រូវបានចាប់ផ្តើមតាំងពីឆ្នាំ ១៩២២ នៅប្រទេសភីលីពីន ដោយវេជ្ជបណ្ឌិតជនជាតិស្វីសឈ្មោះ Frederik E. Zuellig ក្រោមគោលបំណងផ្តល់ឲ្យប្រជាជនអាចទទួលបាននូវផលិតផលដែលជាតម្រូវការចាំបាច់។Zuellig Pharmaត្រូវបានបង្កើតឡើងយ៉ាងពិតប្រាកដដោយកូនប្រុសរបស់គាត់ឈ្មោះ Stephenដែលជាសហគ្រិនដំបូងគេក្នុងការនាំយកនូវថ្នាំអង់ទីប៊ីយូទិក (ថ្នាំផ្សះ) ដែលមានឥទ្ធិពលធំទូលាយជាងគេ និងអាចប្រើប្រាស់ក្រោមទម្រង់ជាថ្នាំគ្រាប់សម្រាប់លេបដែលផ្តល់នូវភាពងាយស្រួលក្នុងការប្រើប្រាស់។ នៅក្នុងសង្គ្រាមលោកលើកទី ២ គឺជាពេលវេលាដ៏លំបាកសម្រាប់ Zuellig Pharma ក៏ប៉ុន្តែលោក Stephen Zuellig នៅតែផ្តល់ការងារនៅប្រទេសភីលីពីនសម្រាប់ប្រជាជនជាច្រើនដែលព្យាយាមភាសខ្លួនចេញពីការសម្លាប់រង្គាលរបស់សភាពអឺរ៉ុប ព្រមទាំងព្យាយាមផ្តល់នូវផលិតផលទៅកាន់មនុស្សដែលត្រូវការ ក៏ដូចជាចំណាយពេលរាប់ខែស្នាក់នៅក្នុងការិយាល័យជាមួយនឹងក្រុមការងារដើម្បីធានាពីសុវត្ថិភាពរបស់ផលិតផលទៀតផង។ ក្រោយពីសង្គ្រាម លោក Stephen Zuellig និងបងប្រុសរបស់លោកបានកសាងឡើងវិញនូវមុខជំនួញនេះ និងធ្វើការពង្រីក Zuellig Pharma ឆ្លងកាត់ទ្វីបអាស៊ី ដើម្បីក្លាយខ្លួនជាអ្នកចែកចាយដែលធំជាងគេក្នុងវិស័យសុខាភិបាលប្រចាំតំបន់។ ដោយឡែក Zuellig Pharma បានចូលទីផ្សារកម្ពុជានៅក្នុងឆ្នាំ  ២០០១   និងចាប់ផ្តើមមានសកម្មភាពពិតប្រាកដនៅក្នុងឆ្នាំ ២០១៤ ក្រោយពីមានការសម្រេចពីក្រុមប្រឹក្សាភិបាលនៃប្រធានក្រុមហ៊ុនក្នុងការកំណត់យកប្រទេសកម្ពុជាជាទីផ្សារឈានមុខក៏ដូចជាការតាំងចិត្តសម្រេចឲ្យបាននូវគម្រោងការវិនិយោគរយៈពេល ៥ ឆ្នាំដែលមានគោលដៅធ្វើឲ្យ Zuellig Pharma ក្លាយជាអ្នកដឹកនាំក្នុងវិស័យសុខាភិបាលរបស់កម្ពុជា។ទាក់ទងនឹងសេវាកម្មដែល Zuellig Pharma នាំមកជូនទីផ្សារកម្ពុជាត្រូវបានលោក Jean-Gaetan Guillemaud ឆ្លើយយ៉ាងខ្លីថា “ជារួមមក រាល់សេវាកម្មដែលអាចជួយឲ្យអ្នកជំងឺទទួលបាននូវសេវាសុខភាពប្រសើរឡើង គឺជាអ្វីដែល Zuellig Pharma ផ្តល់ជូនចំពោះទីផ្សារកម្ពុជា”។ លោកក៏បានបន្តផងដែរថា “សកម្មភាពចម្បងគេរបស់ Zuellig Pharma គឺជាការចែកចាយ។ពួកយើងបានធ្វើការវិនិយោគទៅលើការដឹកជញ្ជូនទៅគ្រប់ទីកន្លែងទូទាំងផ្ទៃប្រទេសកម្ពុជាជាមួយនឹងលក្ខខណ្ឌនៃការស្តុកទុកបំពាក់ដោយម៉ាស៊ីនត្រជាក់ក្នុងការរក្សាបាននូវស្ថានភាព និងអានុភាពសមស្របនៃផលិតផលឲ្យដូចនឹងពេលទើបបញ្ជូនចេញពីកន្លែងផលិត។    បេសកកម្មចម្បងទី ២គឺទាក់ទងនឹងការបង្កើនការយល់ដឹងទាក់ទងនឹងផលិតផលដែលអាចរកបាន និងធានាថាពួកវានឹងត្រូវបានប្រើប្រាស់នៅក្នុងស្ថានភាពប្រកបដោយសុវត្ថិភាពបំផុត តាមរយៈអ្នកតំណាងឱសថសម្រាប់ឱសថស្ថាន មន្ទីរពេទ្យ និងវេជ្ជបណ្ឌិត។ លើសពីនេះ Zuellig Pharma ក៏ផ្តល់សេវាណែនាំទៅកាន់អ្នកជំងឺហៅថា Care- Connect ផងដែរ ដែលក្នុងនោះយើងអាចបង្កើតជាក្រុមការងារគិលានុបដ្ឋាកយិកាដែលមាននាទីជួយទ្រទ្រង់សុខភាពរបស់អ្នកជំងឺដែលត្រូវការការព្យាបាលរយៈពេលវែង និងអំឡុងពេលជាសះស្បើយឬអាចជួយសម្រួលក្នុងការទទួលបានជំនួយពីសេវាធានារ៉ាប់រងរបស់អ្នកជំងឺ   ដើម្បីទទួលបានអត្ថប្រយោជន៍ពីការការពារកាន់តែពេញលេញ។មានសេវាជាច្រើនទៀតដែលក្រុមហ៊ុនរបស់យើងអាចធ្វើបានដូចនេះអ្នកអាចចូលទៅកាន់គេហទំព័រខាងក្រោម៖www.zuelligpharma.com ដើម្បីទទួលបានព័ត៌មានបន្ថែម។” គួរបញ្ជាក់ថា បច្ចុប្បន្ន Zuellig Pharma គឺជាអ្នកចែកចាយធំជាងគេក្នុងវិស័យសុខាភិបាលប្រចាំតំបន់អាស៊ី ដែលបានរីកដុះដាលយ៉ាងរឹងមាំក្នុងប្រទេសចំនួន ១៣ នៅទ្វីបអាស៊ី និងមានបុគ្គលិកលើសពី ១ ម៉ឺននាក់ ជាមួយនឹងប្រាក់ចំណូលនៅក្នុងឆ្នាំ ២០១៦ សរុបជាង ១០ ពាន់លានដុល្លាសហរដ្ឋអាមេរិក។ បើទោះបីជា  Zuellig Pharma នៅកម្ពុជា ជាក្រុមហ៊ុនវ័យក្មេងមួយនៅឡើយ ក៏ប៉ុន្តែប្រកបដោយមោទនភាព ក្រុមហ៊ុននេះបានធ្វើការពង្រីកខ្លួនស្ទើរតែទ្វេមួយជាពីរជារៀងរាល់ឆ្នាំអស់រយៈពេលជាង ៤ ឆ្នាំមកហើយជាមួយនឹងបុគ្គលិកលើសពី ១០០ នាក់បើគិតមកដល់ពេលបច្ចុប្បន្ន។ ឧបសគ្គដែលបានជួបប្រទះនៅប្រទេសកម្ពុជា លោក Jean-Gaetan Guillemaud បានលើកឡើងថា “Zuellig Pharma តែងតែមានមោទនភាពក្នុងការធ្វើការប្រកបដោយក្រមសីលធម៌ និងអនុលោមភាព(ត្រឹមត្រូវស្របច្បាប់)ដែលពិតជាបានបង្កប់នៅក្នុងចិត្តគំនិតរបស់បុគ្គលិកគ្រប់គ្នាដោយយើងជឿថានេះគឺជាផ្លូវតែមួយគត់សម្រាប់ជួយដល់អ្នកជំងឺនៅក្នុងផ្លូវដ៏វែងឆ្ងាយ។ ក្រៅពីមោទនភាពនេះវាក៏ជំរុញឲ្យពួកយើងជឿថានេះគឺជាភាពខ្លាំងរបស់ពួកយើងផងដែរ។យ៉ាងណាមិញពួកយើងក៏មិនមែនជាតួអង្គសំខាន់តែមួយដែលបង្កើតជាមោទនភាពនេះដែរប្រសិនបើគ្មានលោកអនុប្រធាននៃគណៈកម្មាធិការសភាពាណិជ្ជកម្មផ្នែកសុខាភិបាលរបស់អឺរ៉ុប  ដែលធ្វើឲ្យយើងអាចចាត់ប្រតិបត្តិការផ្តួចផ្តើមក្នុងការអនុវត្តប្រកបដោយភាពត្រឹមត្រូវលក្ខណៈជាក្រុម ហើយវាពិតជាមានភាពងាយស្រួលជាងមុនចំពោះការដោះស្រាយបញ្ហាផ្សេងៗ”។ ជាក់ស្តែង បើទោះជាក្រុមហ៊ុនជាច្រើននៅប្រទេសកម្ពុជាកំពុងតែប្រឈមមុខនឹងលំហូរចេញចូលនៃបុគ្គលិក ក៏ Zuellig Pharma នៅតែបង្ហាញពីជំហរវិជ្ជមានជាមួយនឹងបណ្តាញទាក់ទងយ៉ាងរឹងមាំរបស់បុគ្គលិករបស់ Zuellig Pharma   នៅកម្ពុជា ដែលនេះប្រហែលគឺជាសមិទ្ធផលសំខាន់បំផុតរបស់ពួកគេ។ ទាក់ទងនឹងបញ្ហានេះផងដែរលោកនាយកគ្រប់គ្រងទូទៅរបស់ Zuellig Pharma នៅកម្ពុជាដដែលបានបកស្រាយថា “ជាការពិត ពួកយើងក៏មានការប្រឈមមុខទៅនឹងលំហូរចេញចូលរបស់បុគ្គលិកដែរក៏ប៉ុន្តែចំពោះបុគ្គលិកដែលប្រកាន់នូវគុណតម្លៃ និងបេសកកម្មប្រកបដោយភាពពេញចិត្តរបស់យើងក្នុងការអភិវឌ្ឍសុខភាពរបស់អ្នកជំងឺតែងតែមានទំនោរចូលរួមជាមួយពួកយើងជានិច្ច។ វាអាចមិនមែនសម្រាប់បុគ្គលិកទាំងអស់ក៏ប៉ុន្តែខ្ញុំជឿជាក់ថាចំពោះក្រុមការងារដែលពួកយើងកំពុងកសាងឡើងគឺជាក្រុមដែលអាចដឹកនាំពួកយើងទៅរកសមិទ្ធផលដ៏ប្រសើរនៅអំឡុងពេល ៥ ឆ្នាំខាងមុខ។ ម្យ៉ាងទៀត ក្នុងនាមជាក្រុមហ៊ុនវ័យក្មេងនៅកម្ពុជា  ពួក យើងក៏ទាក់ទាញនូវយុវជន វ័យក្មេងដែលពោរពេញទៅដោយទេពកោសល្យផងដែរ។ខ្ញុំពិតជាលើកទឹកចិត្តដល់សិស្សនិស្សិតដែលមានចំណូលចិត្តក្នុងការអភិវឌ្ឍសុខភាពរបស់ប្រជាជនកម្ពុជាឲ្យធ្វើការផ្ញើសារអេឡិចត្រូនិកមកកាន់អីុម៉ែលរបស់ខ្ញុំ jgguillemaud@zuelligpharma.com។” ភាពជោគជ័យក្នុងបេសកកម្ម ការសម្រេចបាននូវកិច្ចសហការជាមួយនឹងក្រុមហ៊ុនសំខាន់ៗមួយចំនួនរបស់ Zuellig គឺជាភាពជោគជ័យមួយដែលត្រូវបានលោក Jean-GaetanGuillemaud បង្ហើបថា “ខ្ញុំគិតថាគោលការណ៍គោរពតាមច្បាប់និងក្រមសីលធម៌នៅក្នុងការធ្វើមុខជំនួញរបស់យើងគឺជាផ្នែកដែលសំខាន់ជាងគេ។ពួកយើងបានធ្វើការជាមួយនឹងក្រុមហ៊ុនអន្តរជាតិធំៗដែលចង់មានភាពប្រាកដថាភាពត្រឹមត្រូវតាមស្តង់ដារបស់ពួកគេ គឺពិតជាត្រូវបានអនុវត្តប្រកបដោយទំនុកចិត្ត បើទោះបីជាវាកើតឡើងនៅឆ្ងាយពីមជ្ឈមណ្ឌលកណ្តាលរបស់ក្រុមហ៊ុនពួកគេក៏ដោយ។ ក្រៅពីនោះ ពួកយើងក៏បានអភិវឌ្ឍប្រព័ន្ធដ៏មានប្រសិទ្ធភាពសម្រាប់គ្រប់គ្រងគុណភាព ព្រមទាំងប្រតិបត្តិការដែលសមស្របទៅតាមសញ្ញាបត្រអន្តរជាតិផងដែរ។ការធ្វើបែបនេះអាចផ្តល់ឲ្យដៃគូពាណិជ្ជកម្មរបស់យើងទុកចិត្តបានថាផលិតផលរបស់ពួកគេគឺទទួលបាននូវការផ្តល់តម្លៃ។ សរុបមក ខ្ញុំគិតថាគោលបំណង  ក៏ដូចជាកម្លាំងចលករទាំងនេះជំរុញឲ្យZuellig Pharmaក្លាយជាដៃគូដ៏ស័ក្តិសមសម្រាប់ការអភិវឌ្ឍការលក់ឲ្យឈានឡើងមួយកម្រិតទៀត។” ទោះជាបច្ចុប្បន្នមានក្រុមហ៊ុនប្រហែលគ្នាជាច្រើននៅកម្ពុជា តែ Zuellig Pharma នៅតែអាចបង្ហាញពីភាពខុសគ្នាពីក្រុមហ៊ុនដទៃបាន ជាពិសេសចំពោះរោងចក្រផលិតឱសថ   និងឱសថស្ថាន ដោយលោក Jean-Gaetan Guillemaudបានអះអាងថា “ដំបូង ចំពោះរោងចក្រផលិតឱសថ និងឱសថស្ថានជឿជាក់លើប្រព័ន្ធនៃគុណភាពរបស់ពួកយើង។ គ្រប់ភាគីទាំងអស់ អាចប្រាកដចិត្តបានថាពួកយើងនឹងផ្តល់ជូនតែផលិតផលដែលមានគុណភាពខ្ពស់តែប៉ុណ្ណោះ។  លើសពីនោះ ទំនាក់ទំនងរវាងដៃគូពាណិជ្ជកម្ម ក៏ដូចជាអតិថិជនគឺផ្អែកលើទំនុកចិត្ត។ ប្រាកដណាស់ ការងាររបស់ពួកយើងគឺប្រព្រឹត្តទៅតាមច្បាប់ប៉ុន្តែស្របពេលជាមួយគ្នាក៏ផ្អែកទៅលើប្រព័ន្ធដែលជាទូទៅមានភាពតឹងរឹងលើសពីច្បាប់ជាច្រើនដងផងដែរដើម្បីធានាបាននូវសុវត្ថិភាពចំពោះគ្រប់ភាគីភាគព័ន្ធទាំងអស់។   ពិសេសជាងនេះទៅទៀត ការមានវត្តមាននៅក្នុងតំបន់អាស៊ីមកជាង១០០ ឆ្នាំហើយនោះ ធ្វើឲ្យ Zuellig Pharmaបង្កើតបានជាទំនាក់ទំនងដ៏រឹងមាំជាមួយនឹងក្រុមហ៊ុនឱសថធំៗទាំងឡាយ ហើយបច្ចុប្បន្នសាខារបស់ Zuellig Pharma នៅកម្ពុជា ក៏អាចទទួលបាននូវអត្ថប្រយោជន៍តាមរយៈបណ្តាញអន្តរជាតិដ៏ទូលំទូលាយ និងប្រកបដោយកិត្តិនាមផងដែរ។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

ឱសថ
ចែករំលែក
  • Jan 25, 2018 |
  • 6 ឆ្នាំមុន |
  • 9.7K មើល

១០mg នៃឱសថ XARELTO® (Rivaroxaban) អាចជួយកាត់បន្ថយជំងឺឈាមកកក្នុងសរសៃវ៉ែន

រដ្ឋបាលចំណីអាហារ និងឱសថសហរដ្ឋអាមេរិក (FDA) នាថ្ងៃទី ៣០ ខែតុលា ឆ្នាំ២០១៧ បានយល់ស្របឲ្យមានការប្រើប្រាស់ឱសថ Rivaroxaban (Xarelto, Janssen Pharmaceuticals, Inc.) ក្នុងកម្រិត ១០មីលីក្រាមក្នុងមួយថ្ងៃជាប្រចាំ សម្រាប់ការការពារហានិភ័យនៃជំងឺឈាមកកក្នុងសរសៃវ៉ែន (Venous thromboembolism) ដែលជាជំងឺតែងកើតមានឡើងបន្ទាប់ពីការព្យាបាលជំងឺកំណកឈាមអស់រយៈពេល ៦ខែ។ លទ្ធផលការប្រើប្រាស់នេះ ពឹងផ្អែកលើទិន្នន័យនៃការសិក្សាគ្លីនិកពី EINSTEIN CHOICE  បានបង្ហាញថា Factor Xa Inhibitor មានប្រសិទ្ធភាពរ៉ាប់រងក្នុងការកាត់បន្ថយនៃការកើតជំងឺឈាមកកក្នុងសរសៃវ៉ែន (Venous thromboembolism) ដោយការសិក្សានេះបានធ្វើឡើងលើអ្នកជំងឺដែលកំពុងទទួលការព្យាបាលជំងឺកំណកឈាមអស់រយៈពេល ៦ ទៅ១២ ខែ រួចតម្រូវឲ្យប្រើប្រាស់ឱសថ Xarelto អាចក្នុងកម្រិត ១០mg/១ថ្ងៃ និង២០mg/១ថ្ងៃ ជាប្រចាំ ចំណែកអ្នកជំងឺមួយផ្នែកទៀត ត្រូវបានប្រើប្រាស់ឱសថ Aspirin ១០០mg/១ថ្ងៃជាប្រចាំ ហើយគេសង្កេតឃើញថា អ្នកជំងឺប្រើប្រាស់ឱសថ Xarelto មានការថយចុះហានិភ័យនៃជំងឺឈាមកកក្នុងសរសៃឈាមវ៉ែន (Venous thromboembolism)  បើប្រៀបធៀបចំពោះអ្នកជំងឺដែលប្រើប្រាស់ឱសថ Aspirin ។ ការអនុវត្តប្រើប្រាស់ឱសថត្រូវចាប់ផ្តើមដំបូងក្នុងកម្រិត ១៥mg ពីរដងក្នុងមួយថ្ងៃសម្រាប់ការកើតឡើងនៃជំងឺឈាមកកក្នុងសរសៃឈាមអស់រយៈពេល ២១ថ្ងៃ រួចបន្តចាប់ពី ២២ ដល់ ១៨០ថ្ងៃ នោះកម្រិតនៃការប្រើប្រាស់អាចត្រឹម ២០mg មួយដងក្នុងមួយថ្ងៃ ហើយចាប់ពីរយៈពេល ១៨០ថ្ងៃឡើងទៅ ការប្រើប្រាស់អាចស្ថិតក្នុងកម្រិត ១០mgក្នុងមួយថ្ងៃជាប្រចាំ។ គួរបញ្ជាក់ផងដែរ អ្នកធ្លាប់ទទួលបានការព្យាបាលជំងឺកំណកឈាម អាចមានហានិភ័យក្នុងអត្រា២០% ប្រឈមទៅជំងឺឈាមកកក្នុងសរសៃវ៉ែន (Venous thromboembolism) ក្នុងរយៈពេល៣ឆ្នាំ ចំណែកការសម្រេចរបស់ FDA រួមជាមួយការសិក្សាបែបគ្លីនិកជាភស្តុតាងបង្ហាញពីប្រសិទ្ធភាពរបស់ឱសថ Xarelto បើប្រៀបធៀបទៅនឹងឱសថ Aspirin សម្រាប់ការពារពីជំងឺឈាមកកក្នុងសរសៃវ៉ែននេះ។ ឯកសារយោង : FDA Approves New 10 mg Dosing for XARELTO® (rivaroxaban) to Reduce the Continued Risk of Venous Thromboembolism (VTE) [news release]. Titusville, NJ. Janssen Pharmaceuticals, Inc. October 30, 2017. ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Jan 15, 2018 |
  • 6 ឆ្នាំមុន |
  • 15.7K មើល

Ibuprofen អាចធ្វើឲ្យបុរសមិនអាចមានកូន (អារ)?

Ibuprofen ត្រូវបានគេស្គាល់ថាជាឱសថដែលស្ថិតនៅក្នុងក្រុម NSAIDs (Nonsteroidal Anti-inflammatory drug) មានឈ្មោះនៅលើទីផ្សារជា Motrin  ឬAdvil។ ឱសថនេះត្រូវបានប្រើប្រាស់ព្យាបាលការឈឺចុកចាប់តិចតួច និង អាការៈក្ដៅខ្លួន ក្នុងទម្រង់ជា ថ្នាំគ្រាប់(Tablet) ម្សៅលាយទឹក (Liquide Suspensions) និង បន្តក់ (Concentrated Liquide Drops)។ «អ្នកដែលប្រើប្រាស់ NSAIDs ងាយប្រឈមមុខនឹងជំងឺ គាំងបេះដូង (Higher Heart Attack) និងដាច់សរសៃឈាមខួរក្បាល (Stroke) ជាងអ្នកដែលមិនប្រើប្រាស់» នេះបើយោងតាម National Institutes of Health។ មិនតែប៉ុណ្ណោះ ឱសថនេះអាចបង្កឲ្យកើតជំងឺ ដំបៅក្រពះ ហូរឈាមក្នុងក្រពះពោះវៀន សម្រាប់មនុស្សមួយចំនួន។ គ្រោះថ្នាក់ទាំងនេះអាចខ្ពស់ ប្រសិនបើអ្នកប្រើ NSAIDs រយៈពេលយូរ អ្នកសុខភាពខ្សោយ និងអ្នកផឹកស្រាយ៉ាងហោចណាស់៣ដង ឬលើសពីនេះក្នុងមួយថ្ងៃ។  យោងតាមការផ្សព្វផ្សាយរបស់ CNN នៅថ្ងៃទី០៩ ខែមករា ឆ្នាំ២០១៨ បានឲ្យដឹងថា «ការប្រើប្រាស់ Ibuprofen អាចមានផលប៉ះពាល់អវិជ្ជមានលើពងស្វាសរបស់មនុស្សប្រុស (ការសិក្សាស្រាវជ្រាវដែលបានបោះពុម្ពផ្សាយ នៅថ្ងែច័ន្ទរបស់ទស្សនាវដ្តី National Academy Of Science Found)»។ ការសិក្សាបានបង្ហាញថា ការប្រើប្រាស់ Ibuprofen ក្នុងកម្រិតធម្មតា អាចធ្វើឲ្យក្មេងប្រុសមានការវិវត្តលក្ខណៈអ័រម៉ូន ដែលលក្ខណៈនេះធ្វើឲ្យមានការកាត់បន្ថយការមានកូន (អារ)។  ពងស្វាស(Testicles) មិនមែនត្រឹមតែផលិតទឹកកាមទេ វាថែមទាំងជួយបញ្ចេញនូវអ័រម៉ូន តេសស្តូស្តេរ៉ូន (Testosterone) ដែលជាអ័រម៉ូនភេទរបស់មនុស្សប្រុស។ Ibuprofen គឺជា Anti-androgenic ដែលរំខានដល់អ័រម៉ូនបុរស នេះបើតាមការពន្យល់របស់លោក David M. Kristensen សហអ្នកនិពន្ធ និង អ្នកវិទ្យាសាស្រ្តជាន់ខ្ពស់ផ្នែកណឺរ៉ូន នៃមន្ទីរពេទ្យសាកលវិទ្យាល័យ Copenhagen (Copenhagen University Hospital)។ មិនតែប៉ុណ្ណោះ Ibuprofen ក៏អាចធ្វើឲ្យមានការកើនទ្បើងលទ្ធភាពដែលទារកប្រុសអាចនឹងកើតមកខូចទ្រង់ទ្រាយ និងមុខងារមួយចំនួនតាំងពីកំណើត (បកស្រាយដោយលោក Kristensen)។ ចំពោះ បុរសដែលប្រើប្រាស់ Ibuprofen ក្នុងកំទ្បុងពេល ១៤ថ្ងៃ អ័រម៉ូន Luteinizing (ជាអ័រម៉ូនដែលបញ្ចេញដោយក្រពេញ Pituitary និងភ្ញោចឲ្យពងស្វាសផលិតអ័រម៉ូនបុរស testosterone ) ត្រូវបានសម្របសម្រួលជាមួយកម្រិតនៃ Ibuprofen ដែលដំណើរការក្នុងចរន្តឈាម។ ក្នុងពេលជាមួយគ្នានេះ សមាមាត្ររបស់ អ័រម៉ូនភេទបុរស (Testosterone) និងអ័រម៉ូន Luteinizing ថយចុះ ដែលជាសញ្ញានៃការធ្វើឲ្យពងស្វាសដំណើរការមិនបានត្រឹមត្រូវ។ ឯកសារយោង: Ibuprofen linked to male infertility, study says (by CNN) ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Jan 12, 2018 |
  • 6 ឆ្នាំមុន |
  • 3.7K មើល

Kintaro Cells ពន្យារជីវិតមនុស្ស!

ក្រុមហ៊ុនជប៉ុនដែលផលិតស្ទីមសេល Kintaro Cells បានធ្វើការយ៉ាងសកម្មក្នុងការណែនាំនូវឱសថជាប្រភេទកោសិកានេះទៅកាន់គ្រូពេទ្យដែលផ្តល់សេវាព្យាបាលជារៀងរាល់ថ្ងៃ។ សព្វថ្ងៃ អ្នកជំងឺរាប់ពាន់នាក់ដែលមកពីប្រទេសផ្សេងៗក្នុងពិភពលោក បានទទួលនូវការព្យាបាលផ្សេងៗ និងកម្មវិធីបង្កើតកោសិកាឡើងវិញដោយប្រើប្រាស់ Kintaro stem cells ។ អនាគតដែលបានមកដល់ Kintaro Cells Power គឺជារោងចក្រផលិតកោសិកាដើមដែលផ្តល់ជូននូវការព្យាបាលតែមួយគត់សម្រាប់ជំងឺផ្សេងៗ។ មន្ទីរពិសោធន៍ និងផលិតរបស់ក្រុមហ៊ុន គឺស្ថិតនៅទីក្រុងតូក្យូ។ អស់រយៈពេលជាច្រើនឆ្នាំ “Kintaro Cells Power” រួមជាមួយនឹងអ្នកជំនាញវិទ្យាសាស្ត្រពូកែបំផុតរបស់ពិភពលោក កំពុងធ្វើការបង្កើតនូវផលិតផលជីវសាស្ត្រជំនាន់ក្រោយ។ កោសិកាដើម Kintaro Cells ដែលត្រូវបានបង្កើតឡើង គឺជាលទ្ធផលនៃការពិតដែលថាអ្នកវិទ្យាសាស្ត្រមកពីប្រទេសជាច្រើនបានប្រមូលផ្តុំចំណេះដឹងរបស់ខ្លួន និងបានបង្កើតនូវការច្នៃប្រឌិតថ្មីក្នុងការព្យាបាលជំងឺដ៏ស្មុគស្មាញបំផុតរបស់មនុស្ស។ ដោយសារតែកោសិកាដើមរបស់ខួរឆ្អឹងត្រូវបានទទួលពីអ្នកបរិច្ចាគវ័យក្មេង និងមានសុខភាពល្អ  កោសិកាទាំងនោះ គឺមានសុវត្ថិភាពពេញលេញ សម្រាប់អ្នកជំងឺ និងមិនត្រូវបានរងប្រតិកម្មដោយប្រព័ន្ធភាពស៊ាំរបស់អ្នកជំងឺឡើយ។ ឱសថប្រភេទជាកោសិកា គឺជាការបង្កើតថ្មីតែមួយគត់ក្នុងសតវត្សរ៍ទី២១នេះ ហើយជាក់ស្តែងឱសថប្រភេទនេះបានមកជំនួសនូវការព្យាបាលដោយប្រើឱសថដែលធ្លាប់មានពីមុន។ សព្វថ្ងៃនេះ វេជ្ជបណ្ឌិតជាច្រើនបានជ្រើសរើសនូវវិធីព្យាបាលផ្គួបគ្នា ដោយយកការចាក់បញ្ចូលកោសិកាដើមរបស់ឆ្អឹងខ្នងរួមបញ្ចូលជាមួយនឹងការព្យាបាលដោយថ្នាំ។ ការអនុវត្តរយៈពេលយូរនូវកោសិកាដើមរបស់ខួរឆ្អឹងនេះ មិនមានការរាយការណ៍ពីផលប៉ះពាល់រយៈពេលយូរនោះទេ ដែលនេះបង្ហាញពីការឆ្ពោះទៅរកភាពត្រឹមត្រូវនៃការព្យាបាល និងធានាពីភាពជោគជ័យផងដែរ។ មកទល់សព្វថ្ងៃនេះ ក្រុមហ៊ុន Kintaro Cells Power បានផ្គត់ផ្គង់នូវផលិតផលដែលអាចជួយក្នុងការព្យាបាលជំងឺដែលជួបញឹកញាប់បំផុត។ បញ្ជីនៃការប្រើប្រាស់ Kintaro Cells មានជំងឺច្រើនជាង៦០មុខទាក់ទងនឹងផ្នែកជំងឺបេះដូង ប្រព័ន្ធបន្តពូជ និងមូត្រសាស្ត្រ បំពង់រំលាយអាហារ ប្រព័ន្ធសាច់ដុំ និងឆ្អឹង ប្រព័ន្ធប្រសាទសាស្ត្រ ជំងឺប្រព័ន្ធភាពស៊ាំ និងក្រពេញអ័រម៉ូន។ ស្តង់ដារថ្មីនៃឱសថសម័យថ្មីអនុញ្ញាតឲ្យរាងកាយមនុស្សស្តារឡើងវិញតាមបែបធម្មជាតិនូវសរីរាង្គនិងជាលិកាដែលខូចខាត។ វានឹងធ្វើឲ្យមុខងាររបស់សរីរាង្គដែលបាត់បង់ត្រឡប់មកវិញ ឯការព្យាបាលជំនួសដែលប្រើច្រើនឆ្នាំកន្លងទៅនឹងមិនចាំបាច់ទៀតឡើយ។ គោលការណ៍នៃ Kintaro Cells គឺមានភាពសាមញ្ញ ដោយដាក់វាចូលក្នុងរាងកាយតាមរយៈចាក់បញ្ចូល កោសិកាដើមនឹងធ្វើការស្វែងរកនិងទៅកាន់សរីរាង្គ និងប្រព័ន្ធដែលខូចខាតដោយខ្លួនឯង នៅពេលដែលវាត្រូវបំបែកខ្លួនក្លាយជាកោសិកានៃសរីរាង្គទាំងនោះ។ ដូចនេះ ខ្លួនប្រាណរបស់អ្នកជំងឺនឹងជាសះស្បើយឡើងវិញពេញលេញពីផ្នែកខាងក្នុង តាមបែបធម្មជាតិ។ មជ្ឈមណ្ឌលវេជ្ជសាស្ត្រឈានមុខគេរបស់ពិភពលោក បាន និងកំពុងប្រើប្រាស់កោសិកា Kintaro Cells សម្រាប់ Kintaro Cells Power ការសហការជាមួយនឹងគ្លីនិកនិងវេជ្ជបណ្ឌិតគឺជារឿងអាទិភាព។ ដោយហេតុនេះហើយ សិក្ខាសាលាបណ្តុះបណ្តាលបទបង្ហាញ និងការប្រឹក្សា ត្រូវបានធ្វើឡើងយ៉ាងទៀងទាត់ក្នុងប្រទេសអាស៊ីអាគ្នេយ៍។ ត្រឹមនេះ វាត្រូវបានគេយល់ច្បាស់ថាការអភិវឌ្ឍផ្នែកវិទ្យាសាស្ត្រត្រូវការមានភាពល្បីរន្ទឺទូទាំងពិភពលោករហូតដល់សហគមន៍វេជ្ជសាស្ត្រទាំងមូលអាចផ្លាស់ប្តូរមកជឿជាក់លើវិធីព្យាបាលថ្មីនេះ។  អ្នកជំនាញមួយចំនួន បានកំពុងធ្វើការប្រើប្រាស់បច្ចេកវិទ្យានៃឱសថប្រភេទជាកោសិកាដើមនេះ និងទទួលនូវលទ្ធផលដ៏ល្អ។ ការផ្តល់មតិយោបល់ស្តីពីសក្តានុពលវិជ្ជមានក្នុងការប្រយុទ្ធប្រឆាំងនឹងជំងឺ រួមទាំងការព្យាបាលដែលមិនអាចព្យាបាលបាន ត្រូវបានទទួលយ៉ាងទៀងទាត់។ ឱសថប្រភេទកោសិកា មានតម្រូវការខ្ពស់ក្នុងការព្យាបាលប្រឆាំងនឹងភាពចាស់ ដោយសារវាមិនមានលក្ខណៈស្រដៀងគ្នាទៅនឹងគុណភាពនៃការបង្កើតឡើងវិញ និងការធ្វើឲ្យប្រសើរឡើងនៃរាងកាយ។ អ្នកកែសម្ផស្សភាគច្រើន ក៏ប្រើនូវផលិតផលប្រភេទកោសិកា និងព្យាបាលបញ្ហាដោយទទួលបានលទ្ធផលដ៏ល្អនៅពេលព្យាបាលស្បែក ឬសក់។ ដៃគូរបស់ក្រុមហ៊ុន Kintaro Cells Power គឺជាអ្នកជំនាញជាន់ខ្ពស់ និងជាគ្លីនិកពហុព្យាបាលដ៏ល្បីល្បាញ។  សម្រាប់វេជ្ជបណ្ឌិតកម្ពុជា ក្រុមហ៊ុនផ្តល់ជូននូវ៖ • ផលិតផលដែលមានប្រសិទ្ធភាព និងសុវត្ថិភាពខ្ពស់បំផុត • ការអភិវឌ្ឍវិជ្ជាជីវៈយ៉ាងទៀងទាត់នៅក្នុងសិក្ខាសាលា និងតាមបណ្តាញអ៊ីនធឺណែត • ការបណ្តុះបណ្តាលជាមួយនឹងអ្នកជំនាញដែលទទួលស្គាល់លំដាប់ពិភពលោកមានបទពិសោធន៍ផ្នែកគ្លីនិកលើបច្ចេកទេសកោសិកា • គាំទ្រលើផ្នែកវិជ្ជាជីវៈនិងផ្នែកទីផ្សារ • ការប្រឹក្សាដោយមិនកំណត់ជាមួយនឹងអ្នកជំនាញដ៏ល្អបំផុតរបស់ក្រុមហ៊ុន • ពង្រឹងកេរិ៍្តឈ្មោះក្នុងវិជ្ជាជីវៈនិងបង្កើនចំនួនអ្នកជំងឺ។ សម្រាប់ព័ត៌មានអំពីក្រុមហ៊ុន ផលិតផលនិងលក្ខខណ្ឌជាដៃគូ សូមទំនាក់ទំនងអ្នកតំណាងរបស់ក្រុមហ៊ុន Kintaro Cells Power ក្នុងប្រទេសកម្ពុជា លោក Andrey Saklakov (ទូរស័ព្ទលេខ +855-312-357-387, cambodia@cellspower.com)។ ការព្យាបាលជំងឺទឹកនោមផ្អែម គឺជាឧទាហរណ៍មួយដែលបង្ហាញពីការប្រើប្រាស់ Kintaro Cells យ៉ាងជោគជ័យ សមាគមគ្រូពេទ្យទឹកនោមផ្អែមពិភពលោក ថ្មីៗនេះ បានចេញផ្សាយនូវតួលេខដោយបង្ហាញថាចំនួននៃអ្នកជំងឺទឹកនោមផ្អែមទូទាំងពិភពលោកបានកើនឡើងពី១០៨លាននាក់ក្នុងឆ្នាំ១៩៨០ ដល់៤២២លាននាក់ក្នុងឆ្នាំ២០១៧។ តួលេខនេះបង្ហាញថា ការគំរាមកំហែងពីប្រព័ន្ធក្រពេញអ័រម៉ូនកំពុងតែមានភាពខ្លាំងក្លា ឯពិភពវិទ្យាសាស្ត្រមានបន្ទុកក្នុងការផ្តល់នូវដំណោះស្រាយមួយដ៏ត្រឹមត្រូវ។ ឆ្លងតាមការអនុវត្តជាច្រើនឆ្នាំ វាបានបង្ហាញយ៉ាងច្បាស់ថាការប្រយុទ្ធប្រឆាំងនឹងជំងឺទឹកនោមផ្អែមដោយប្រើកោសិកា គឺជាឱកាសតែមួយគត់ក្នុងការជួយសង្គ្រោះមនុស្សពីផលវិបាកដ៏គួរឲ្យខ្លាចរបស់ជំងឺមួយនេះ និងបង្កើនគុណភាពជីវិតរបស់ពួកគេ។ ការចាក់បញ្ចូលនូវកោសិកាដើម Kintaro Cellsពីអ្នកបរិច្ចាគ ធ្វើឲ្យអ្នកទទួលបានចំនួនកោសិកាត្រឹមត្រូវក្នុងការផលិតអាំងស៊ុយលីន។ ការស្តារឡើងវិញនូវមុខងារធម្មជាតិរបស់លំពែង ធ្វើឲ្យជីវិតរបស់អ្នកជំងឺមានភាពងាយស្រួលក្នុងកម្រិតមួយគួរឲ្យកត់សម្គាល់។ ភ្លាមៗបន្ទាប់ពីការចាក់ដំបូង ការធ្លាក់ចុះនៃកម្រិតជាតិស្ករក្នុងឈាមត្រូវបានគេកត់សម្គាល់ឃើញ ការឆ្លើយតបរបស់ជាលិកាត្រូវបានស្តារឡើងវិញ និងការប៉ះពាល់ទៅលើសរីរាង្គទូទៅដូចជាតម្រងនោម ថ្លើម បេះដូង និងសរសៃឈាម ត្រូវបានផ្អាក។  រឿងដែលសំខាន់មួយទៀត គឺថាកោសិការបស់អ្នកបរិច្ចាគមានឥទ្ធិពលទប់ស្កាត់ការប្រតិកម្មនៃប្រព័ន្ធភាពស៊ាំនិងមិនអនុញ្ញាតឲ្យកោសិកា T cells បំផ្លាញកោសិកាបេតារបស់លំពែង ដែលវាសំខាន់ខ្លាំងចំពោះជំងឺទឹកនោមផ្អែមប្រភេទ១។ វាក៏ជារឿងសំខាន់មួយទៀត ដែលត្រូវបញ្ជាក់ផងដែរថា ក្រុមហ៊ុន Kintaro Cells Power ក៏ធ្វើការព្យាបាលលើកុមារដោយទទួលនូវលទ្ធផលល្អប្រសើរ។ ក៏មានផងដែរនូវឧទាហរណ៍ផ្សេងៗដែលធ្វើលើក្មេងជំទង់នៅពេលដែលការព្យាបាលមានទាក់ទងនឹងការផ្ទុះឡើងនូវអ័រម៉ូនក្នុងសារពាង្គកាយដ៏ក្មេងខ្ចី។ ទាក់ទងនឹងការព្យាបាលជំងឺទឹកនោមផ្អែម និងជំងឺផ្សេងៗជាច្រើនទៀតដោយ Kintaro Cells លោកអ្នកអាចធ្វើការប្រឹក្សាឥតគិតថ្លៃជាលក្ខណៈបុគ្គលជាមួយនឹងវេជ្ជបណ្ឌិតឯកទេសរបស់ក្រុមហ៊ុនKintaro Cells Power ដោយគ្រាន់តែផ្ញើសំណួររបស់លោកអ្នកមកកាន់អ៊ីម៉ែលផ្លូវការរបស់ក្រុមហ៊ុន cambodia@cellspower.com ។ ជឿជាក់លើការបង្កើតថ្មី បានន័យថាអ្នកស្ថិតនៅដំបូងគេបង្អស់នៃអ្វីៗគ្រប់យ៉ាង! ដំណើរការទៅមុខរបស់បច្ចេកទេស បាននាំវេជ្ជសាស្ត្រទៅកាន់កម្រិតមូលដ្ឋានថ្មីមួយ និងធ្វើឲ្យមានភាពទៅរួចនូវអ្វីៗដែលហាក់ដូចជាមិនអាចកើតមាន។ វាចាំបាច់ណាស់ ក្នុងការជឿជាក់ទៅលើអ្នកវិជ្ជាជីវៈ និងទទួលស្គាល់អ្នកជំនាញ! ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Jan 02, 2018 |
  • 6 ឆ្នាំមុន |
  • 4.7K មើល

ការផ្ទុះឡើងនូវឥទ្ធិពលរំខានជាង15,000 ករណីនៃរូបមន្តថ្មីរបស់ឱសថ LEVOTHYROX

ករណីនៃឥទ្ធិពលរំខានពីឱសថយ៉ាងតិច14,633ករណីនៅប្រទេសបារាំងត្រូវបានរាយការណ៍ទៅកាន់ភ្នាក់ងារជាតិនៃសុវត្ថិភាពឱសថនិងផលិតផលសុខភាពដែលហៅកាត់ថា ANSM បន្ទាប់ពីមានការផ្លាស់ប្តូរទៅលើរូបមន្តឱសថ Levothyrox (Levoth-yroxine) របស់ក្រុមហ៊ុន Merckដែលត្រូវបានចេញវេជ្ជបញ្ជាឲ្យប្រើប្រាស់យ៉ាងទូលំទូលាយសម្រាប់ការព្យាបាលជំងឺខ្វះអ័រម៉ូនទីរ៉ូ-អ៊ីត (hypothyroid) នេះបើ យោងតាមការបញ្ជាក់ពី Le Figaro Santé ដែលបានចេញផ្សាយនៅថ្ងៃទី 11 ខែ តុលា ឆ្នាំ 2017។    គួរបញ្ជាក់ថា ប្រមាណ 5062 ករណីក្នុងចំណោមករណីសរុបនៃផលរំខាននៃរូបមន្តថ្មីរបស់  Levothyrox អាចត្រូវបានចាត់ទុកថាជាករណីធ្ងន់ធ្ងរដោយសារតែផលប៉ះពាល់របស់វាទៅលើជីវិតគ្រួសារការប្រកបរបរ ឬការងារ និងជីវិតក្នុងសង្គម។ ផលរំខានភាគច្រើនដែលកើតឡើងរួមមានដូចជា អស់កម្លាំងខ្លាំង ឈឺក្បាល គេងមិនលក់ ឈឺសន្លាក់ និងសាច់ដុំ ជ្រុះសក់ និងកាន់តែធ្ងន់ធ្ងរគឺ អាការៈវិលមុខ ជាមួយនឹងបញ្ហាទៅលើចង្វាក់បេះដូង។ ផលរំខានទាំងអស់នេះស្តែងអំពីអតុល្យភាពនៃអ័រម៉ូននៅក្នុងរាងកាយនិងអាចមានទំនាក់ទំនងនឹងការប្រើប្រាស់អ័រម៉ូនទីរ៉ូអ៊ីតជំនួសក្នុងកម្រិតមិនគ្រប់គ្រាន់ ឬច្រើនពេក។ បញ្ហាទាំងនេះផងដែរ ក៏បានកើតមានរួចមកហើយចំពោះរូបមន្តចាស់នៃឱសថ Levothyrox ។  ANSM បានបង្ហាញរបាយការណ៍មកថាការត្រួតពិនិត្យដែលធ្វើលើឡូត៍នៃឱសថ Levothyrox រូបមន្តថ្មីកាលពីខែកញ្ញាកន្លងទៅមិនបានបង្ហាញឲ្យឃើញពីបញ្ហាណាមួយទាក់ទងនឹងគុណភាពនៃឱសថឡើយ។ទោះយ៉ាងណាដោយសារតែការផ្ទុះឡើងនៃផលរំខានរបស់រូបមន្តថ្មីនៃឱសថាLevothyroxបានបង្ខំឲ្យក្រុមហ៊ុនMerckដាក់មកវិញនូវឱសថរូបមន្តចាស់នៅលើទីផ្សារជាមួយនឹងបរិមាណមានកំណត់។ដោយឡែកអ្នកជំងឺដែលមិនបានរងផលរំខានដោយឱសថរូបមន្តថ្មីនេះក៏មិនត្រូវបានណែនាំឲ្យផ្លាស់ប្តូរការប្រើប្រាស់ឱសថឡើយ។  ដូចគ្នាផងដែរ យោងតាមប្រភពពី Medscape Medical News ដែលបានចុះផ្សាយនៅថ្ងៃទី 11 ខែ តុលា ឆ្នាំ 2017 ក៏បានឲ្យដឹងផងថាភ្នាក់ងារពី ANSM បានធ្វើការសម្គាល់ ផលប៉ះពាល់នេះជា “បញ្ហាដែលមិនទាន់មានការបកស្រាយតាមបែបវិទ្យាសាស្ត្រ”នៅឡើយស្របពេលដែលបង្កើតឲ្យមានការអង្កេតជាបន្តនិងរក្សាជំហរក្នុងការគាំទ្រពីសុវត្ថិភាពនៃឱសថរូបមន្តនេះដដែល។ តាមប្រភពខាងលើក៏បានបង្ហាញទៀតថារូបមន្តថ្មីនៃឱសថ Levothyrox ត្រូវបានណែនាំឲ្យប្រើប្រាស់នៅប្រទេសបារាំងតាំងពីខែ មីនា មកម្លេះដើម្បីឆ្លើយ តបទៅនឹងបញ្ហាដែលបានលើកឡើងនៅឆ្នាំ 2012 ដោយ ANSM ទាក់ទងនឹងបម្រែបម្រួលនៃកម្រិតសារធាតុសកម្ម ដែលជះឥទ្ធិពលយ៉ាងខ្លាំងដល់អាយុកាល (shelf life) របស់ឱសថរូបមន្តចាស់។ ការផ្លាស់ប្តូរទៅលើរូបមន្តរបស់ឱសថនេះរួមមាន ការដកចេញនូវសារធាតុអសកម្ម lactose និងជំនួសមកវិញនូវ mannitol និងអាស៊ីត citricដែលជាទូទៅត្រូវបានប្រើនៅក្នុងរូបមន្តផលិតថ្នាំគ្រាប់ហើយមិនធ្លាប់ត្រូវបានសង្កេតឃើញពីការចោទឡើងនូវផលរំខានដែលមិនបានដឹង (adverse effects) ណាមួយឡើយ។ ទាក់ទងនឹងមូលហេតុនៃផលរំខានខាងលើមានការលើកឡើងអំពីភាពតូចចង្អៀតនៃចន្លោះសន្ទស្សន៍ព្យាបាល (therapeutic index) របស់ឱសថ levothyroxine ដែលធ្វើឲ្យសូម្បីតែភាពល្អៀងនៃបរិមាណដ៏តិចមួយនៃសារធាតុសកម្មនេះក៏អាចធ្វើឲ្យមានការប្រែប្រួលលើការពិនិត្យមុខងារនៃក្រពេញទីរ៉ូអ៊ីតបានយ៉ាងងាយដែរហើយនេះជាមូលហេតុនៃការព្រួយបារម្ភទាក់ទងនឹងការបង្កើតរូបមន្តថ្មីរបស់ឱសថ។ដោយឡែកអ្នកជំងឺដែលប្រើប្រាស់ឱសថរូបមន្តថ្មី ក៏គួរតែត្រូវបានណែនាំឲ្យធ្វើការពិនិត្យមុខងារនៃក្រពេញទីរ៉ូអ៊ីតរៀងរាល់ 6 ទៅ 8 សប្តាហ៍ម្តងក្រោយពីផ្លាស់ប្តូរឱសថដើម្បីប្រាកដថាមុខងារនៃក្រពេញទីរ៉ូអ៊ីតរបស់ពួកគេនៅរក្សាបាននូវស្ថានភាពនឹងនរ។ប្រសិនបើវានៅស្ថិតក្នុងភាពនឹងនរហើយនោះការចាប់ផ្តើមរកមើលមូលហេតុផ្សេងទៀតដែលអាចចោទជាផលរំខានខាងលើគួរតែត្រូវបានធ្វើឡើង។ ប្រភពឯកសារ៖  1.http://sante.lefigaro.fr/article/levothyrox-les-autorites-annoncent-pres-15-000-cas-d-effets-indesirables/ 2.https://www.medscape.com/viewarticle/886900 ©2018 រក្សាសិទ្ធិគ្រប់យ៉ាងដោយHealthtime Corporationចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ឱសថ
ចែករំលែក
  • Dec 25, 2017 |
  • 6 ឆ្នាំមុន |
  • 7.6K មើល

៥ចំណុចពីថ្នាំសម្រកទម្ងន់ អ្នកចាំបាច់ត្រូវដឹង!

មិត្តនារីមួយចំនួនឲ្យតែឆ្លុះកញ្ចក់ពេលណាក៏មិនដែលពេញចិត្តនឹងរូបរាងខ្លួនឯងធាត់ហើយស្លៀកពាក់យ៉ាងណាក៏មិនសម។ សំខាន់ តមអាហារ និងហាត់ប្រាណក៏អនុវត្តរួចហើយ នៅតែដដែល ពេលនោះអ្នក ប្រាកដជាគិតដល់ការប្រើថ្នាំ ឬផលិតផលអាហារបំប៉នផ្សេងទៀតដែលមានយ៉ាងច្រើនទាំង​លើទីផ្សារក៏ដូចជាតាមប្រព័ន្ធអុីនធឺណេត។ ប៉ុន្តែថា តើអ្នកប្រាកដទេថាជម្រើសនេះត្រឹមត្រូវ? តើអ្វីខ្លះដែលអ្នក ត្រូវដឹងជាមុន? គ្មានការធានា អ្នកប្រហែលមិនធ្លាប់បានដឹង ឬចាប់អារម្មណ៍ទេថាថ្នាំ ឬ ផលិតផលដែលអ្នកប្រើ បានត្រួតពិនិត្យត្រឹមត្រូវ មានច្បាប់ អនុញ្ញាតឲ្យចែកចាយនៅលើទីផ្សារនោះទេ។ អ្វីដែលគួរឲ្យកត់សម្គាត់សព្វថ្ងៃផលិតផលថែរក្សាសម្រស់មួយចំនួន ក៏ដូច ជាផលិតផលសម្រកទម្ងន់ ត្រូវបានបង្ហាញលក់ពាសពេញប្រព័ន្ធអ៊ីនធឺណេត។ ជាងនេះទៅទៀតមានប្រភេទអាហារបំប៉នខ្លះក៏មិនទាមទារឲ្យមានការអនុម័តពីរដ្ឋបាលចំណីអាហារនិងឱសថ(FDA)មុននឹងចេញលក់លើទីផ្សារឡើយ។​ ជាមួយគ្នាផងដែរក្រុមហ៊ុនឬផលិតផលជាច្រើនងាយនឹងមានសារធាតុផ្សំដែលគ្មានសុវត្ថិភាពតែដោយសារភាពពេញនិយម មិនបានចាប់អារម្មណ៍ រហូតដល់រយៈពេលណាមួយលេច ចេញនូវផលអវិជ្ជមាន ទើបបានរាយការណ៍ទៅកាន់FDA និង បញ្ឈប់លែងឲ្យប្រើ។ អំណះអំណាងមិនត្រឹមត្រូវ សូមកុំជឿជាក់លើគ្រប់អំណះអំណាងដែលអ្នកអានលើស្លាកសញ្ញាអាហារបំប៉ន ឬផលិតផលសម្រកមួយចំនួន ព្រោះតាម រយៈរបាយការណ៍ចេញដោយនាយកដ្ឋានសុខាភិបាលសហរដ្ឋអាមេរិកការវិភាគនៃអាហារបំប៉នចំនួន១២៧រួមបញ្ចូលទាំង ថ្នាំគ្រាប់សម្រកទម្ងន់បានបង្ហាញថា២០%មានអំណះ​អំណាងមិនស្របច្បាប់នៅលើស្លាកសញ្ញាបញ្ជាក់ថាវាជាផលិតផលសម្រាប់ព្យាបាលជំងឺផ្សេង ឬមានប្រសិទ្ធភាពលើសលទ្ធភាព របស់សារធាតុសកម្ម។ គ្មានប្រសិទ្ធភាព ថ្នាំគ្រាប់សម្រកទម្ងន់មួយចំនួន ជាធម្មតាមានផ្ទុកជារួមជាមួយ សារធាតុកាហ្វេអ៊ីន និងប្រភេទបញ្ចុះទឹកនោមដទៃទៀត ដែលបង្កឲ្យមានការបាត់បង់ជាតិទឹកពីក្នុងរាងកាយ។លទ្ធផលនៃការស្រកទម្ងន់ដំបូងនេះមិនមែនជាការបាត់បង់ខ្លាញ់ពិតប្រាកដនោះហើយវានឹងត្រឡប់មកវិញក្នុងរយៈពេលមួយ។បន្ថែមពីនេះទៀតទឹកដែលបាត់បង់ដោយសារការប្រើថ្នាំសម្រក ទម្ងន់ប្រភេទគ្រាប់នេះ អាចបង្កគ្រោះថ្នាក់ជាការបាត់បង់ជាតិទឹកធ្ងន់ធ្ងរ។ មិនអាចប្តូរទម្លាប់ ការស្រកទម្ងន់រយៈពេលយូរ ទាមទារឲ្យមានការផ្លាស់ប្តូរទម្លាប់ទាំងរបបអាហារ និងការធ្វើលំហាត់ប្រាណ ដើម្បីអនុម័តឲ្យបានសុខភាពកាន់តែល្អ។ អ្នកអាចនឹងមិនសូវត្រួតពិនិត្យស្លាកសញ្ញាផលិតផល កម្រិតរបបអាហារ និងការហាត់ប្រាណ ប្រសិនបើអ្នកគិតថាថ្នាំទាំងនោះនឹងអាចជួយអ្នកបានក្នុងការសម្រកទម្ងន់។លើសពីនេះការញ៉ាំថ្នាំជារៀងរហូតមិនអាចមាននិរន្តភាពបាននោះទេ ហើយពេលណាដែលអ្នកឈប់ នោះអ្នកនឹងត្រឡប់ទៅរកទម្លាប់អាក្រក់ និងទម្ងន់ដំបូងរបស់ អ្នកបាន។ ផលរំខានជាច្រើន ថ្នាំសម្រកទម្ងន់ខ្លះមានផ្ទុកនូវសកម្មភាពរារាំងការស្រូបខ្លាញ់ជាមូលហេតុមួយអាចបង្កឲ្យឈឺក្រពះ។ បើតាមរបាយការណ៍ ផ្សេងទៀត ផលរំខាននៃថ្នាំគ្រាប់សម្រកទម្ងន់ រួមមាន ទល់លាមក ឈឺក្បាល និងបម្រែបម្រួលអារម្មណ៍។ សារធាតុ ផ្សំចម្បងក្នុងប្រភេទថ្នាំសម្រកគឺពពួកភ្ញោច ដែលត្រូវបានរកឃើញថាអាចបង្កើនហានិភ័យសម្រាប់ការគាំងបេះដូង និងដាច់សរសៃឈាមខួរក្បាល។ជាញឹកញាប់ប្រភេទឱសថភ្ញោចទាំងនេះត្រូវបានចេញវេជ្ជបញ្ជាក្នុងកម្រិតសមស្របចំពោះមនុស្សម្នាក់ៗ។ថ្នាំឬផលិតផលជួយឲ្យស្រកទម្ងន់ជាញឹកញាប់មានផ្ទុកនូវamphetaminesសារធាតុប្រឆាំងការថប់អារម្មណ៍ និង សារធាតុបំបាត់ការធ្លាក់ទឹកចិត្ត ដែលអាចធ្វើឲ្យញៀនក្នុងកម្រិតខ្ពស់។ វាគ្រាន់តែជាចំណុចអវិជ្ជមានដែលអ្នកត្រូវដឹងប៉ុណ្ណោះ មិនមែនជាការបំភ័យ ឬជាការហាមឃាត់ តែសូមឲ្យអ្នកគិតឲ្យបាន ដិតដល់ ហើយប្រសិនបើអាច លោកអ្នកក៏គួរធ្វើការប្រឹក្សា ជាមួយគ្រូពេទ្យជាមុន ទើបជាការប្រសើរបំផុត។ ©2017រក្សាសិទ្ធិគ្រប់យ៉ាងដោយHealthtime Corporationចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ   

ឱសថ ស្រក-ឡើង​​ ទម្ងន់​ ឱសថ
ចែករំលែក
Top