Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
ភាសាខ្មែរ ភាសាខ្មែរ
English English
ចូលគណនី
Createx Logo
  • Jan 26, 2018 |
  • 6 ឆ្នាំមុន |
  • 2.7K មើល

រក្សាស្ថានភាពបេះដូងអ្នកជាមួយ YOGA ទាំង 6កាយវិការ

ជាមួយបរិបទសង្គមដែលកំពុងឲ្យមានការលើកទឹកចិត្តទាក់ទងនឹងលំហាត់ប្រាណ  កម្មវិធីកីឡាយោគៈ ការសម្មាធិ និងកីឡាផ្សេងៗត្រូវបានប្រព្រឹត្តឡើងយ៉ាងផុសផុល។ លក្ខណៈពិសេសនៃកីឡាយោគៈមានភាពសាមញ្ញដោយគ្រាន់តែត្រូវពេលវេលារបស់អ្នក ជាមួយនឹងកម្រាល រួមទាំងរាងកាយរបស់អ្នកសម្រាប់ហាត់ ដែលអត្ថបទខាងក្រោមនេះនឹងបង្ហាញកាយវិការទាំង ៦យ៉ាងនៃកីឡាយោគៈដើម្បីជាប្រយោជន៍ និងជំនួយដល់សុខភាពបេះដូងផ្ទាល់របស់អ្នក។ 1.Vrikshasana (Tree pose) ការធ្វើកាយវិការបែប Vrikshasana ឲ្យបានត្រឹមត្រូវនោះរូបរាងរបស់អ្នកប្រៀបដូចជាដើមឈើដែលវាជួយសម្រួលអារម្មណ៍ និងរក្សាស្ថេរភាពនៃការគិត។ កាយវិការនេះធានាបាននូវសុខភាព និងភាពនឹងនរនៃមុខងារបេះដូង ហើយក៏មានផលប្រយោជន៍ផងដែរចំពោះអ្នកជំងឺឆ្អឹងខ្នង ឈឺសន្លាក់ ឬខ្សោយអវយវៈ។ 2.Veerabhadrasana (Warrior pose) កាយវិការដូចអ្នកចំបាំង ឬ Veerabhadrasanaជួយរក្សាតុល្យភាពរាងកាយ រក្សាអារម្មណ៍ កាត់បន្ថយស្រេ្តស និងសម្រួលចង្វាក់បេះដូងបានល្អ។ កាយ-វិការបែបនេះត្រូវបានណែនាំជាពិសេសសម្រាប់អ្នកធ្វើការនៅក្នុងការិយាល័យ។ 3.Utkatasana (Chair pose) ការហាត់ដោយធ្វើកាយវិការដូចអង្គុយលើកៅអី(Utkatasana)អាចមានភាពពិបាកប៉ុន្តែភាពតឹងតែងនៃកាយវិការកីឡាយោគៈបែបនេះជួយបង្កើននូវចង្វាក់ដង្ហើមដែលអាចជួយពង្រឹងថាមពលអ្នក។ 4.Trikonasana (Triangle pose) ការដកដង្ហើមវែងៗក្នុងកាយវិការ Trikonasana អាចជួយពន្លារដើមទ្រូង និងជាលំហាត់ប្រាណដ៏ល្អសម្រាប់សរសៃឈាម បេះដូង។ វាអាចជួយរក្សានូវសុខភាពរាងកាយ ពង្រឹងសាច់ដុំ និងកាត់បន្ថយសម្ពាធឈាម ស្រេ្តស និងភាពតប់ប្រមល់ ហើយក៏ត្រូវបានណែនាំចំពោះស្រ្តីមានផ្ទៃពោះផងដែរ។ 5.Dhanurasana (Bow pose) Dhanurasana ឬអាចហៅថាកាយវិការពត់ខ្លួន ជួយបង្កើនកម្លាំងសាច់ដុំពោះផ្នែកខាងក្រោយ និងខាងក្រោម។ វាបានជួយធ្វើការហ្វឹកហាត់ដល់សរីរាង្គខាងក្នុង ពោះ និងរាងកាយទាំងមូលបានពេញលេញ ជាពិសេសកាយវិការយោគៈនេះបានពង្រឹងនិងសម្រួលលំហូរនៃចរន្តឈាម និងការងាររបស់បេះដូង។ 6.SetuBandhasana (Bridge pose) កាយវិការដែលធ្វើឡើងដូចជារូបរាងស្ពានផ្តល់ជាប្រយោជន៍មានភាពប្រហាក់ប្រហែលទៅនឹងការពត់ខ្លួន (Bow pose) ដែលទាមទារឲ្យមានចង្វាក់ដង្ហើមវែង សម្រួលលំហូរចរន្តឈាម គ្រប់គ្រងសម្ពាធឈាម និងសុខភាពបេះដូងទាំងមូល តែកាយវិការបែបនេះមិនសូវជាតម្រូវការសម្រាប់ការហាត់នោះទេ។ អ្នកអាចនឹងកំពុងតែធ្វើចលនាណាមួយដូចដែលបានរៀបរាប់ខាងលើដោយវាផ្តល់ជាប្រយោជន៍យ៉ាងមានប្រសិទ្ធភាពចំពោះសុខភាពបេះដូងអ្នក យ៉ាងណាមិញ អ្នកក៏គួរតែធ្វើការកម្តៅសាច់ដុំជាមុនសិនមុននឹងចាប់ផ្តើមជំហានជាបន្តបន្ទាប់។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

លំហាត់​ប្រាណ
ចែករំលែក
  • Jan 25, 2018 |
  • 6 ឆ្នាំមុន |
  • 6.8K មើល

សមិទ្ធផលថ្មីរបស់ សមាគមគ្រូពេទ្យបេះដូងកម្ពុជា

សមាគមគ្រូពេទ្យបេះដូងអាស៊ាន (ASEAN FEDERATION OF CARDIOLOGY ឬ AFC) បានបង្កើតឡើងក្នុងឆ្នាំ១៩៧៣ ផ្តួចផ្តើមឡើងដោយ សមាគមគ្រូពេទ្យបេះដូងចំនួន៥ប្រទេសគឺ ឥណ្ឌូនេស៊ី ម៉ាឡេស៊ី ភីលីពីន សិង្ហបុរី និងថៃ។ AFCគឺជាសមាគមរួមមួយដែលមិនមានពាក់ព័ន្ធនឹងនយោបាយរបស់ប្រទេស ដើម្បីលើកកម្ពស់ការអនុវត្ត និងចំណេះដឹងផ្នែកជំងឺបេះដូង ក្នុងបណ្តាប្រទេសនៅអាស៊ីអាគ្នេយ៍។ ក្នុងខែតុលា ឆ្នាំ១៩៧៥ កិច្ចប្រជុំលើកទី១ របស់សមាគមគ្រូពេទ្យបេះដូងអាស៊ាន ត្រូវបានប្រារព្ធធ្វើឡើងនៅទីក្រុងបាលី ប្រទេសឥណ្ឌូនេស៊ី ដោយមានវត្តមានចូលរួមពីអ្នកតំណាងនៃប្រទេសទាំង៥។ សមាគមនេះ ក៏បានកំណត់រៀបចំសមាជរបស់ ខ្លួនរៀងរាល់២ឆ្នាំម្តង ហើយបានធ្វើការប្តូរវេនម្ចាស់ផ្ទះរៀបចំសមាជនេះម្តងម្នាក់។ ម្ចាស់ផ្ទះនោះក៏ក្លាយជាប្រធានរបស់សមាគមគ្រូពេទ្យបេះដូងអាស៊ីក្នុងអាណត្តិដែលខ្លួនធ្វើជាអ្នករៀបចំសមាជ។ ក្រោយមក សមាគមនេះក៏បានទទួលនូវសមាជិក ថ្មីជាបន្តបន្ទាប់ដូចជា ប្រទេសវៀតណាម(២០០៦) ប្រទេសឡាវ និងមីយ៉ាន់ម៉ា(២០០៧) ប្រទេសព្រុយនេ(២០១៤)។ ដោយឡែក ចាប់ពីឆ្នាំ២០១៤មក សមាគមគ្រូពេទ្យបេះដូងកម្ពុជាយើងបានចូល រួមយ៉ាងសកម្មក្នុងសកម្មភាពរបស់AFC ដោយស្មើមុខមាត់ក្នុងនាមជាសមាជិកពេញសិទ្ធ។ ជាក់ស្តែង ដើម្បីអាចដាក់ពាក្យចូលជាសមាជិកសហភាតរៈគ្រូពេទ្យបេះដូងអាស៊ាន(Fellow of ASEAN Ccllege of Cardiology ឬ FAsCC) បានគ្រូពេទ្យឯកទេសបេះដូងទាំងអស់តម្រូវឲ្យមានលក្ខខណ្ឌដូចខាងក្រោម៖ •ជាគ្រូពេទ្យឯកទេសបេះដូងមានសញ្ញាបត្រដែលទទួលស្គាល់ដោយក្រសួងសុខាភិបាលនៃប្រទេសរបស់ខ្លួន •មានបទពិសោធន៍យ៉ាងតិច ៥ឆ្នាំ •ជាសមាជិកសកម្មរបស់សមាគមគ្រូពេទ្យបេះដូងនៃប្រទេសរបស់ខ្លួន •ត្រូវធ្វើការសិក្សាស្រាវជ្រាវសរសេរអត្ថបទចុះផ្សាយក្នុងទស្សនាវដ្តីជាតិ ឬអន្តរជាតិ •ទទួលបានលិខិតគាំទ្រពីប្រធានក្រុមប្រឹក្សាភិបាលនៃសមាគមគ្រូពេទ្យបេះដូង ពីប្រទេសរបស់ខ្លួន។ យោងទៅតាមប្រសាសន៍របស់ សាស្ត្រាចារ្យ វេជ្ជបណ្ឌិត សុខ ជួរ ការចូលជាសមាជិករបស់ សមាគមគ្រូពេទ្យបេះដូងអាស៊ាន(FAsCC) សមាជិកនឹងទទួលបានអត្ថប្រយោជន៍រួមបញ្ចូលដូចជា៖ •គ្រូពេទ្យត្រូវបានគេទទួលស្គាល់ទាំងគុណភាព និងសមត្ថភាព •សហភាតរៈអាចមានឱកាសក្នុងការបន្តការសិក្សាបន្ថែម •គ្រូពេទ្យបេះដូងក្នុងតំបន់អាស៊ាននឹងមានស្តង់ដារួមមួយ •សហភាតរៈទាំងអស់នឹងមានសិទ្ធិក្នុងការប្រើងាររបស់ខ្លួន (FAsCC)។ គ្រូពេទ្យឯកទេសបេះដូងរបស់កម្ពុជាយើង បានចូល ជាសមាជិករបស់សមាគមគ្រូពេទ្យបេះដូងអាស៊ាន ចំនួន ១៣រូប ក្នុងនោះមានដូចជា៖ ១.សាស្ត្រាចារ្យ វេជ្ជបណ្ឌិត សុខ ជួរ (ចូលជាសមាជិកក្នុងឆ្នាំ២០១៤) ២.វេជ្ជបណ្ឌិត ហាវ រត្ននារី (ចូលជាសមាជិកក្នុងឆ្នាំ២០១៦) ៣.វេជ្ជបណ្ឌិត លីវ ឈិញ (ចូលជាសមាជិកក្នុងឆ្នាំ២០១៦) ៤.វេជ្ជបណ្ឌិត ឈុន ឡាយ (ចូលជាសមាជិកក្នុងឆ្នាំ២០១៦) ៥.វេជ្ជបណ្ឌិត សុខ ផាង (ចូលជាសមាជិកក្នុងឆ្នាំ២០១៦) ៦.វេជ្ជបណ្ឌិត ពិត សារ័ត្ន (ចូលជាសមាជិកក្នុងឆ្នាំ២០១៦) ៧.វេជ្ជបណ្ឌិត លឹម ស៊ីវុតថា (ចូលជាសមាជិកក្នុងឆ្នាំ២០១៦) ៨.វេជ្ជបណ្ឌិត ចាន់ សុខា (ចូលជាសមាជិកក្នុងឆ្នាំ២០១៧) ៩.វេជ្ជបណ្ឌិត ថេង យូដាលីន (ចូលជាសមាជិកក្នុងឆ្នាំ២០១៧) ១០.វេជ្ជបណ្ឌិត ព្រំ វិសេស (ចូលជាសមាជិកក្នុងឆ្នាំ២០១៧) ១១.វេជ្ជបណ្ឌិត សាំង លាង (ចូលជាសមាជិកក្នុងឆ្នាំ២០១៧) ១២.វេជ្ជបណ្ឌិត លឹម គ្រុយ (ចូលជាសមាជិកក្នុងឆ្នាំ២០១៧) ១៣.វេជ្ជបណ្ឌិត សុខ ប៊ុនហេង (ចូលជាសមាជិកក្នុងឆ្នាំ២០១៧)។ គួរបញ្ជាក់ផងដែរថា កិច្ចប្រជុំរបស់សមាគមគ្រូពេទ្យបេះដូងអាស៊ានក្នុងឆ្នាំ ២០២០នឹងធ្វើឡើងនៅក្នុងប្រទេសកម្ពុជាយើងផ្ទាល់។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយa

ជំងឺផ្សេងៗ ព្រឹត្តិការណ៍ និងព័ត៌មាន
ចែករំលែក
  • Jan 25, 2018 |
  • 6 ឆ្នាំមុន |
  • 3.4K មើល

ការឡើងសម្ពាធឈាម ពេលហាត់ប្រាណចំពោះអ្នកជំងឺលើសឈាមជាគ្រោះថ្នាក់ទេ?

ការហាត់ប្រាណ ឬការធ្វើសកម្មភាពរាងកាយច្រើន គឺជាការបារម្ភមួយចំពោះអ្នកជំងឺដែលលើសសម្ពាធឈាម (លើសឈាម)ដោយសារពួកគេគិតថាវាបង្កឲ្យសម្ពាធឈាមកើនឡើងរហូតដល់កម្រិតគ្រោះថ្នាក់។ ការពិតទៅ ការហាត់ប្រាណជួយធ្វើឲ្យសុខភាពបេះដូងរឹងមាំ គ្រប់គ្រងទម្ងន់បានល្អ ក៏ដូចជាបន្ថយស្ត្រេសផងដែរ ដែលទាំងនេះជាចំណែកដ៏អំណោយផលសម្រាប់ការគ្រប់គ្រងសម្ពាធឈាម។ ផ្ទុយទៅវិញ ការមិនធ្វើសកម្មភាព ឬមិនហាត់ប្រាណត្រូវបានរកឃើញថាមានទំនាក់ទំនងនឹងការកើនឡើងនៃសម្ពាធឈាមទៅវិញ។   ការឡើងសម្ពាធឈាម នៅពេលហាត់ប្រាណជារឿងធម្មតា វាជាការពិតដែលការធ្វើសកម្មភាព ក៏ដូចជាហាត់ប្រាណអាចធ្វើឲ្យអ្នកឡើងសម្ពាធឈាមក្នុងរយៈពេលខ្លីមួយ ក៏ប៉ុន្តែវានឹងត្រឡប់ទៅរកភាពប្រក្រតីវិញក្រោយពេលអ្នកបញ្ឈប់សកម្មភាពតាមដំណើរដូចជា ការដើរយឺតៗមកវិញជាដើម ដែលការធ្វើបែបនេះក៏ជួយការពារការវិលមុខបន្ទាប់ពីធ្វើចលនាផងដែរ។ ការត្រឡប់មកធម្មតាវិញនឹងកាន់តែរហ័ស ប្រសិនបើអ្នកកាន់តែមានសុខភាពរឹងមាំ។ មានន័យថាអ្នកជំងឺដែលមានសម្ពាធឈាមឡើង ជាធម្មតាគួរតែអាចហាត់ប្រាណ ឬបង្កើនការធ្វើសកម្មភាពរាងកាយបានដោយសុវត្ថិភាព។ ដោយឡែក ប្រសិនបើអ្នករក្សាទម្ងន់បានល្អ នោះការកើននៃសម្ពាធឈាមនៅពេលហាត់ប្រាណ គឺមានតិចជាងអ្នកដែលលើសទម្ងន់។ យ៉ាងណាមិញ ប្រសិនបើសម្ពាធឈាមរបស់អ្នកជំងឺកំពុងឡើងខ្ពស់ វេជ្ជបណ្ឌិតនឹងអាចឲ្យអ្នកជំងឺបញ្ចុះសម្ពាធឈាមដោយប្រើប្រាស់ឱសថសិន មុននឹងចាប់ផ្តើមណែនាំគម្រោងហាត់ប្រាណដល់ពួកគេ។ ជាមួយនឹងសម្ពាធឈាមឡើងខ្ពស់ អ្នកជំងឺពុំគួរចាប់ផ្តើមធ្វើសកម្មភាពថ្មីណាមួយដោយពុំមានការពិភាក្សានឹងវេជ្ជបណ្ឌិតឡើយ។ គួរបញ្ជាក់ថា សម្រាប់សម្ពាធឈាម Systolic (ខាងលើ) អាចកើនឡើងតាមតម្រូវការនៃរាងកាយអំឡុងពេលហាត់ប្រាណ ដែលអាចចាត់ទុកថានៅតែធម្មតាចំពោះការកើនពី ១២០ មីលីម៉ែត្របារ៉ត មុនពេលហាត់ រហូតដល់ ២០០ មីលីម៉ែត្របារ៉ត នៅអំឡុងពេលហាត់។ សញ្ញាគួរចាប់អារម្មណ៍ ការធ្លាក់ចុះភ្លាមៗនៃសម្ពាធឈាមក្រោយពីហាត់ប្រាណ ដោយមិនត្រឡប់មករកកម្រិតធម្មតាវិញ ក្នុងរយៈពេលប្រហែលមួយម៉ោងអាចជាសញ្ញានៃបញ្ហាបេះដូងណាមួយ។ ដោយឡែក ចំពោះអ្នកដែលមានសម្ពាធឈាមក្រោម ៩០/៦០ មីលីម៉ែត្របារ៉តជាប់ គួរតែត្រូវបានបញ្ជូនទៅកាន់វេជ្ជបណ្ឌិត។ ទោះយ៉ាងណាក៏ដោយ នៅពេលហាត់ប្រាណដំបូងរាងកាយរបស់អ្នកអាចនឹងមានសញ្ញាមិនប្រក្រតីមួយចំនួន តែវាអាចជារឿងធម្មតា និងត្រូវការពេលវេលា ដើម្បីទម្លាប់មកវិញ។ ក្នុងនោះ ការដកដង្ហើមខ្លាំងជាងមុន បែកញើស និងបេះដូងលោតញាប់ជាងមុន គឺជារឿងធម្មតានៅពេលដែលអ្នកហាត់ប្រាណបែបអេរ៉ូប៊ិច (ប្រើដង្ហើម)។  ក៏ប៉ុន្តែ ករណីដែលអ្នកមានអារម្មណ៍ថាដកដង្ហើមបានខ្លីខ្លាំង ឬមានអារម្មណ៍ថាបេះដូងលោតញាប់ខ្លាំង ឬមិនទៀងទាត់ ឬបែរជាលោតយឺតទៅវិញ អាចជាសញ្ញាដែលអ្នកគួរទៅពិភាក្សានឹងវេជ្ជបណ្ឌិត។ ម្យ៉ាងទៀត អ្នកក៏គួរបញ្ឈប់ការហាត់ប្រាណ ប្រសិនបើអ្នកមានអាការៈឈឺទ្រូង ខ្សោយ វិលមុខ ឈឺក្បាលតិចតួច ឬមានសម្ពាធ ឬការឈឺចាប់នៅត្រង់កញ្ចឹងក ដៃ ថ្គាម ឬស្មា។ ប្រសិនបើអាការៈទាំងនេះមិនបាត់ទៅវិញក្នុងរយៈពេលខ្លីណាមួយ ឬក៏វាកើតឡើងវិញម្តងទៀត អ្នកត្រូវទាក់ទងទៅកាន់វេជ្ជបណ្ឌិតរបស់អ្នកសម្រាប់ការផ្តល់ជំនួយជាបន្ទាន់។ ការហាត់ប្រាណដែលត្រូវបានណែនាំចំពោះអ្នកមានសម្ពាធឈាមខ្ពស់  អេរ៉ូប៊ិច (ប្រើដង្ហើម) គឺជាជម្រើសល្អបំផុតសម្រាប់ការបន្ថយសម្ពាធឈាម នេះបើតាម the medical journal ។ អ្នកអាចធ្វើការដើររាប់ជំហានក្នុងកម្រិតល្មម (ប្រហែល១០០ជំហានក្នុង ១នាទី) ហែលទឹក ធាក់កង់ ឬរាំជាដើម។ ការហាត់រយៈពេល៣០នាទីក្នុងមួយថ្ងៃ និង ៥ថ្ងៃក្នុងមួយសប្តាហ៍ បូកនឹងការហាត់ប្រើកម្លាំង (លើកទម្ងន់) រយៈពេល ២ថ្ងៃត្រូវបានណែនាំផងដែរ។ ដោយឡែក ប្រសិនបើអ្នកធ្លាប់មានស្ថានភាពសុខភាពណាមួយរួមមានការគាំងបេះដូង ឬមានជំងឺសរសៃឈាមបេះដូងជាដើម អ្នកត្រូវធ្វើការពិភាក្សាជាមួយនឹងវេជ្ជបណ្ឌិតជាមុនសិន។ ចំពោះការធ្វើសូណា និងត្រាំទឹកក្តៅ ជាទូទៅអាចទ្រទ្រង់បានដោយអ្នកមានសម្ពាធឈាមខ្ពស់ជាមួយនឹងសម្ពាធឈាមស្ថិតក្រោមការគ្រប់គ្រងបានល្អ។ ដោយឡែក ប្រសិនអ្នកជំងឺត្រូវបានណែនាំឲ្យចៀសវាងការហាត់ប្រាណកម្រិតល្មមដោយវេជ្ជបណ្ឌិត ពួកគេក៏គួរតែប្រុងប្រយ័ត្ននឹងការត្រាំទឹកក្តៅ និងសូណាផងដែរ ដោយសារកម្តៅអាចធ្វើឲ្យសរសៃឈាមរីក ដែលជាហេតុការណ៍ដែលកើតឡើងផងដែរ ចំពោះការដើរកម្រិតល្មម។ គន្លឹះក្នុងការហាត់ប្រាណខ្លះៗចំពោះអ្នកជំងឺលើសសម្ពាធឈាម • ចងចាំថាអ្នកត្រូវតែធ្វើការកម្តៅសាច់ដុំមុនពេលហាត់ប្រាណ និងបន្ថយកម្តៅមកវិញ ក្រោយពេលហាត់ • គួរដកដង្ហើមទៅតាមចង្វាក់នៃការហាត់ ចៀសវាងការទប់ដង្ហើម • គួរធ្វើឲ្យការហាត់ពោរពេញដោយភាពរីករាយ (រកកីឡាដែលអ្នកចូលចិត្ត) និងចងភ្ជាប់វាជាមួយទំនាក់ទំនងសង្គម (រកដៃគូហាត់ រាប់អានមិត្តជាដើម) • ចៀសវាងហាត់ប្រើកម្លាំងខ្លាំងពេក ដែលអាចបង្កឲ្យសម្ពាធឈាមឡើងខ្ពស់ • មិនគួរបាក់ទឹកចិត្តដោយសារជម្រើសនៃការហាត់ប្រាណមានកម្រិតនៅពេលដំបូងឡើយ ពីព្រោះនៅពេលស្ថានភាពរបស់អ្នកប្រសើរឡើង អ្នកនឹងអាចធ្វើសកម្មភាពកាន់តែច្រើនឡើង • គួរប្រើឧបករណ៍សម្រាប់តាមដានការលោតរបស់បេះដូង (heart rate) ផងដែរ ជាពិសេស ប្រសិនអ្នកត្រូវបានកំណត់នូវកម្រិតលោតរបស់បេះដូងដោយវេជ្ជបណ្ឌិត។ ដើម្បីសុវត្ថិភាព និងសម្រេចនូវគោលដៅក្នុងការហាត់ប្រាណ អ្នកគួរប្រាកដថាអ្នកបានចាប់ផ្តើមជាមួយនឹងគម្រោងដែលត្រឹមត្រូវ និងស័ក្តិសមនឹងអ្នក ដោយចែករំលែកគម្រោងហាត់ជាមួយនឹងវេជ្ជបណ្ឌិតរបស់អ្នក។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

លំហាត់​ប្រាណ
ចែករំលែក
  • Jan 25, 2018 |
  • 6 ឆ្នាំមុន |
  • 3.9K មើល

ការរស់នៅជាមួយជំងឺ មហារីកពោះវៀនធំ

ការព្យាបាលជំងឺមហារីកពោះវៀនធំអាចប្រព្រឹត្តទៅបានតាមវិធីសាស្រ្តផ្សេងៗគ្នាទៅតាមស្ថានភាព និងដំណាក់កាលជំងឺនីមួយៗ។ យ៉ាងណាមិញ បញ្ហា ឬរោគសញ្ញាជាបន្តបន្ទាប់អាចកើតមានឡើងអំឡុងពេល ឬបន្ទាប់ពីការព្យាបាលបានបញ្ចប់ក្នុងនោះរួមមាន៖ • អ្នកជំងឺមានអារម្មណ៍ភ័យខ្លាច វិបត្តិក្នុងការគេង ឬបាក់ទឹកចិត្ត ដែលត្រូវការការគាំទ្រពីសំណាក់គ្រូពេទ្យចិត្តសាស្រ្ត • អំឡុងពេល និងបន្ទាប់ពីការព្យាបាលរបបអាហារអាចចោទជាបញ្ហាដោយសារការថយចុះតម្រូវការអាហារ ចង្អោរ និងល្ហិតល្ហៃ។ បន្ទាប់ពីការបញ្ចប់ទៅនៃការព្យាបាលជំងឺ គ្រូពេទ្យនៅតែតាមដាននូវស្ថានភាព ដើម្បី៖ • កំណត់រក និងការពារពីផលវិបាកបង្កឡើងពីការព្យាបាល • កំណត់រកការលាប់ឡើងវិញនៃជំងឺបានភ្លាមៗ ដើម្បីធ្វើការព្យាបាលបន្ត • ផ្តល់ព័ត៌មានពីផ្នែកសុខាភិបាល ការគាំទ្រផ្នែកផ្លូវចិត្ត និងបន្តផ្តល់សេវាផ្នែកគាំពារពីសំណាក់អ្នកមានជំនាញ ក្នុងការធានាឲ្យស្ថានភាពជីវិតរស់នៅត្រឡប់មកជាធម្មតាវិញ។ ការប្រែប្រួលជីវភាពរស់នៅរបស់អ្នកជំងឺ • បញ្ហាជីវជាតិអាហារ៖ របបអាហារដែលមានជាតិប្រូតេអ៊ីន និងថាមពលខ្ពស់ បូករួមជាមួយអាហារបំប៉នក្នុងកម្រិតទាបក្រៅពីវីតាមីន គឺត្រូវបានណែនាំពីវេជ្ជបណ្ឌិតសម្រាប់ការបរិភោគប្រចាំថ្ងៃ អំឡុងពេលព្យាបាលបែបគីមីសាស្រ្ត (chemotherapy) ។ បន្ទាប់ពីការព្យាបាលបែបគីមីសាស្រ្តបានបញ្ចប់ អ្នកជំងឺគួររក្សានូវរបបអាហារឲ្យមានតុល្យភាពដូចជាអាហារដែលមានជាតិសរសៃ  កំណត់អាហារដែលមានសារធាតុរក្សាទុក និងសាច់ពណ៌ក្រហមឲ្យនៅក្នុងកម្រិតទាប។ ការធ្វើឲ្យប្រសើរឡើងនៃទម្លាប់ក្នុងការញ៉ាំអាចការពារអ្នកជំងឺពីជំងឺរ៉ាំរ៉ៃ (ជំងឺទឹកនោមផ្អែម  ជំងឺបេះដូង និងសរសៃឈាមបេះដូង)។   • មិនត្រូវផ្លាស់ប្តូររបបអាហារភ្លាមៗ ៖ អ្នកជំងឺមហារីកពោះវៀនធំដំណាក់កាលចុងក្រោយមួយចំនួន មានទំនោរប្តូររបបអាហារភ្លាមៗ បន្ទាប់ពីការធ្វើរោគវិនិច្ឆ័យ។ យ៉ាងណាមិញ កម្រិតនេះអាចនឹងគ្មានប្រសិទ្ធភាព ដោយសាររបបអាហារថ្មីអាចខ្វះខាតជីវជាតិមួយចំនួនដូចជាប្រូតេអ៊ីន ហើយអ្នកជំងឺដែលទទួលការព្យាបាលបែបវះកាត់ និង បែបគីមីសាស្រ្តទាមទារនូវជីវជាតិជាវីតាមីនឲ្យបានគ្រប់គ្រាន់សម្រាប់កែប្រែស្ថានភាពជំងឺ និងការជាសះស្បើយនៃមុខរបួស។  • របបអាហារពិសេសសម្រាប់តម្រូវការខុសគ្នា ៖  ចំពោះអ្នកជំងឺដែលរងការព្យាបាលដោយវិទ្យុសកម្មនៅតំបន់ត្រគាកត្រូវការរបបអាហារដែលមានកម្រិតជាតិសរសៃទាប និងគួរទទួលទានទឹកឲ្យបានច្រើនចាប់ពី ៨ ទៅ១០កែវក្នុងមួយថ្ងៃ។ ចំណែកអ្នកជំងឺព្យាបាលដោយគីមីសាស្រ្តត្រូវចៀសវាងអាហារជាសាច់ឆៅ ឬខ្យងខ្ចៅ អយស្ទើរ ឈីស ទឹកដោះឆៅ អាហារជាប្រភេទប៊ូហ្វេ សាឡាត់ និងអាហារ នៅតាមភោជនីយដ្ឋានដែលបម្រើសេវាកម្មខ្លួនឯង  ដើម្បីកាត់បន្ថយហានិភ័យការចម្លងមេរោគដល់ប្រព័ន្ធរំលាយអាហារ។ • ជីវិតដែលសកម្ម ៖ អត្ថប្រយោជន៍នៃលំហាត់ប្រាណក្នុងការការពារពីជំងឺមហារីកត្រូវទទួលបានការសរសេរទុកយ៉ាងជាក់លាក់ ។  អ្នកជំងឺគួរធ្វើការហាត់ប្រាណកម្រិតស្រាលឲ្យបានជាប្រចាំ ដើម្បីអាចរក្សាបាននូវភាពរឹងមាំនៃរាងកាយ និងបង្កើនស្ថានភាពសុខភាពទាំងមូល។  ការសិក្សាក៏បានបញ្ជាក់ផងដែរពីទំនាក់ទំនងនៃការហាត់ប្រាណបែបអេរ៉ូបិក ដែលធ្វើឲ្យមានការថយចុះនូវការលាប់ឡើងវិញនៃជំងឺមហារីកពោះវៀនធំ បន្ថែមពីនោះទម្លាប់ក្នុងការកម្សាន្តអាចជួយឲ្យអ្នកជំងឺមហារីកសម្រួលអារម្មណ៍បានល្អ។  ការរស់នៅជាមួយ Colostomy Colostomy ជាការរួមបញ្ចូលនៃពាក្យ Colon (ពោះវៀនធំ) និង Stoma (មាត់)។ វាជាការវះកាត់បើកជញ្ជាំងពោះដើម្បីភ្ជាប់ពោះវៀនធំទៅនឹងផ្ទៃពោះខាងលើ ដែលជាផ្លូវសម្រាប់បញ្ចេញកាកសំណល់ និងហ្គាសចេញពីរាងកាយ។ អ្នកជំងឺមួយចំនួនអាចរស់នៅជាមួយការចោះពោះវៀនជាបណ្តោះអាសន្ន ឬអាចពេញមួយជីវិតទៅតាមលក្ខខណ្ឌនៃជំងឺ។ បន្ទាប់ពីធ្វើការបើកពោះវៀន ថង់ស្តុកទុក (Colostomy bag)  នឹងត្រូវបានភ្ជាប់ទៅលើពោះនៅកន្លែងដែលបើកសម្រាប់ស្តុកទុកកាកសំណល់ដែលបញ្ចេញចោល។ អ្នកជំងឺមិនអាចដឹងពីដំណើរនៃកាកសំណល់នៅកន្លែងបើកនោះទេ ដោយសារមិនអាចគ្រប់គ្រងបាន ហើយទាមទារឲ្យធ្វើការសម្អាតនូវថង់ស្តុកទុកជាច្រើនដងក្នុងមួយថ្ងៃ។ អ្នកជំងឺអាចធ្វើការសម្រាកព្យាបាលក្នុងមន្ទីរពេទ្យពី ៧ ទៅ១០ថ្ងៃ ឬយូរជាងនេះប្រសិនមានបញ្ហាសុខភាពធ្ងន់ធ្ងរ ឬការលេចឡើងនៃផលវិបាកបណ្តាលមកពីជំងឺមហារីកពោះវៀនធំ។ ដំណើរការជាសះស្បើយពីការបើកពោះវៀនធំ (Colostomy) អាចនឹងត្រូវការរយៈពេលដល់ទៅ ២ខែ។  ជាធម្មតា ការណែនាំពីរបបអាហារជាក់លាក់នឹងត្រូវធ្វើឡើងបន្ទាប់ពីការវះកាត់។ អ្នកជំងឺតម្រូវឲ្យបរិភោគទឹកស ពីរ ទៅបីថ្ងៃ បន្ទាប់មកអាចចាប់ផ្តើមសារធាតុរាវដែលខាប់ ជាស៊ុប និងអាហារទន់។ បន្ទាប់ពីការចោះពោះវៀន (Colostomy) កាកសំណល់នឹងបញ្ចេញពីរាងកាយតាមរយៈកន្លែងបើក (stoma) ជាជាងការបញ្ចេញតាមចុងពោះវៀនធំ។  ការណែនាំសម្រាប់អ្នកជំងឺជាមួយ Colostomy • សម្រាកក្នុងរយៈពេល ២ ឬ៣ខែ ហើយចៀសវាងធ្វើលំហាត់ប្រាណដែលធ្វើឲ្យរំខានដល់សាច់ដុំពោះដូចជា ការអង្គុយចុះឡើង លំហាត់ប្រាណបែបរុញ ឬការហែលទឹក ដើម្បីធានាបាននូវការជាសះស្បើយសាច់ដុំពោះ • ចៀសវាងការលើករបស់ធ្ងន់ព្រោះវាអាចធ្វើឲ្យពោះវៀនលៀនចេញពីកន្លែងដែលបើក • ត្រូវភ្ជាប់ថង់ស្តុកទុកដែលមានទំហំស័ក្តិសម ហើយរក្សាអនាម័យ ដើម្បីចៀសវាងពីការឆ្លងរោគ • បំពេញជាតិទឹកឲ្យបានគ្រប់គ្រាន់ ដើម្បីបង្ការពីការបាត់បង់ជាតិទឹក និងថយចុះសារធាតុអេឡិចត្រូលីត ជាពិសេសក្នុងរដូវក្តៅ • ស្លៀកពាក់រលុងៗ ហើយចៀសវាងពាក់ខ្សែក្រវ៉ាត់នៅផ្នែកខាងលើ ឬខាងក្រោមមុខដែលបើក (Stoma) • រក្សាអនាម័យស្បែកនៅជុំវិញ Stoma ឲ្យបានស្អាត • ធ្វើឲ្យត្រឡប់មកវិញនូវភាពធម្មតានៃជីវភាពរស់នៅប្រចាំថ្ងៃ នៅពេល Stoma ជាសះស្បើយ • មិនចាំបាច់បារម្ភពីការងូតទឹក ពីព្រោះទឹកមិនអាចជ្រាបចូលក្នុង Stoma នោះទេ ដោយសារវាមានបំពង់ហូរតែមួយផ្លូវ • គួរយកថង់ស្តុកទុកទំនេរទៅតាមខ្លួនរាល់ពេលធ្វើដំណើរ។ អ្នកជំងឺអាចប្រឈមទៅនឹងសម្ពាធផ្លូវចិត្ត ដោយសារភាពភ័យខ្លាច រងភាពអាម៉ាស់ពីសង្គម ឬថប់អារម្មណ៍ អំឡុងពេលសម្របខ្លួនទៅនឹងជីវភាពរស់នៅជាមួយការចោះពោះវៀន (Colostomy) ។ ការចូលរួមក្នុងកិច្ចការសង្គម បង្កើនទំនាក់ទំនង និងទទួលយកការគាំទ្រពីអ្នកដទៃអាចនឹងជួយសម្រាលនូវបញ្ហាផ្លូវចិត្តរបស់អ្នកជំងឺមហារីកពោះវៀនធំ។  បកស្រាយដោយ ៖ វេជ្ជបណ្ឌិត Turobova Tatiana វេជ្ជបណ្ឌិតឯកទេសជំងឺមហារីកចំពោះកូនក្មេង និងមហារីកទូទៅ ដែលសព្វថ្ងៃ ជាប្រធានផ្នែកមហារីកនៅ មន្ទីរពេទ្យសាកលវិទ្យាល័យអន្តរជាតិសែនសុខ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ជំងឺផ្សេងៗ ក្រពះ​ ពោះវៀន​ ថ្លើម ឫសដូងបាត
ចែករំលែក
  • Jan 25, 2018 |
  • 6 ឆ្នាំមុន |
  • 3.1K មើល

ខ្លីៗ មិត្តនារី នៅតែអាចស្អាតបានទោះបី…

អាចដោយសារតែអ្នកមានអារម្មណ៍មិនល្អ ឈឺមិនសូវស្រួលខ្លួន ស្បែកប្រែប្រួលមិនស្រស់ថ្លា ឬមានមុនលើមុខខុសធម្មតា ដែលធ្វើឲ្យអ្នកតែងតែសំងំក្នុងផ្ទះរាល់ពេលមករដូវមែនទេ? ការពិតទៅអ្នកក៏មានការងារដែលត្រូវទទួលខុសត្រូវជាប្រចាំ ដែលវាអាចនឹងសំខាន់ជាងអ្វីដែលកើតមានក្នុងខ្លួនអ្នក។ មិនមែនមានន័យថាឲ្យអ្នកទ្រាំជាមួយភាពមិនប្រក្រតីនោះទេ ប៉ុន្តែអ្នកត្រូវដោះស្រាយវា។    ដូច្នេះ ហេលស៍ថាម នឹងបង្ហាញមិត្តនារីនូវដំណោះស្រាយខ្លីៗ ប្រកបដោយប្រសិទ្ធភាពខាងក្រោម៖ ផ្តល់សំណើមស្បែក ការរក្សាស្បែកអំឡុងពេលអ្នកមករដូវ គឺរក្សាឲ្យស្បែករបស់អ្នកមានជាតិទឹកគ្រប់គ្រាន់ជាមួយនឹងប្រភេទផលិតផលផ្តល់សំណើមល្អនិងស័ក្តិសមតាមប្រភេទស្បែក។  អ្នកជំនាញបាននិយាយថា ស្បែករបស់អ្នកងាយនឹងប្រែប្រួល ហើយទៅជាស្ងួតជាងធម្មតាហើយស្បែករបស់អ្នកមានតម្រូវការចាំបាច់នូវប្រភេទផ្តល់សំណើមដែលមានបញ្ជាក់ថា oil-free ឬ comedogenic   ដើម្បីរក្សាតុល្យភាពស្បែកក្នុងពេលវេលាស្ត្រេសនេះ។ បិតម៉ាស់ធម្មជាតិ ព្យាយាមឲ្យស្បែកមុខអ្នកកាន់តែល្អប្រសើរដោយការបិតម៉ាស់ ជាមួយនឹងផ្លែឈើ ដ៏មានគុណប្រយោជន៍ជួយស្បែកមុខ។ ដោយហេតុថា ការបិតម៉ាស់ជួយឲ្យស្បែកមុខត្រជាក់ និងជួយដោះស្រាយភាពប្រែប្រួលខ្លាំងរបស់ស្បែកបានយ៉ាងប្រសើរ ដែលវាតែងកើតមានឡើងអំឡុងពេលមករដូវ។  មួយប្រភេទនៃផ្លែឈើទាំងនោះត្រសក់ក៏មានប្រសិទ្ធភាពដូចដែលអ្នកធ្លាប់ដឹង  ចិតត្រសក់ស្តើងៗបិតឲ្យសព្វលើផ្ទៃមុខទាំងមូលរបស់អ្នក ត្រឹម១៥ទៅ៣០នាទី ធ្វើឲ្យស្បែកមុខទន់រលោង។ សម្អាតកោសិកាស្បែកចាស់ៗ ស្បែករបស់អ្នកនឹងក្លាយជាចាស់ហើយស្រអាប់ជាងធម្មតាក្នុងរយៈពេលនេះ ដូច្នេះ ដើម្បីឲ្យស្បែកត្រឡប់មកជាភ្លឺថ្លាវិញ អ្នកត្រូវធ្វើការកម្ចាត់កោសិកាស្បែកដែលចាស់នោះក្នុងកម្រិតស្រាល។ អ្នកអាចប្រើជាប្រភេទស្ក្រាប់ពីធម្មជាតិ ប៉ុន្តែអ្នកត្រូវប្រាកដថាអ្នកលាបវាថ្នមៗលើផ្ទៃមុខ។ ការប្រើស្ក្រាប់ អ្នកក៏អាចកម្ចាត់ចេញនូវប្រេង ធូលី ដី និង កោសិកាស្បែកងាប់បានផងដែរ ជាពិសេសវាជួយសម្អាតរន្ធញើសនិងជួយឲ្យស្បែកភ្លឺរលោង។ បង្កើនជាតិទឹកក្នុងរាងកាយ ជាតិទឹកជួយរក្សាឲ្យស្បែកនៅភ្លឺថ្លាល្អ ហើយហេតុផលដែលវាពិតជាសំខាន់សម្រាប់ស្ត្រី គឺរក្សាស្បែកឲ្យមានជាតិទឹកច្រើនបំផុតអំឡុងពេលមករដូវ។ មានការប្រែប្រួលជាច្រើនដែលកើតឡើងលើស្បែកអំឡុងពេលនេះ ហើយការផ្លាស់ប្តូរនេះអាចដោះស្រាយបានប្រកបដោយប្រសិទ្ធភាព ដោយគ្រាន់តែបង្កើនបរិមាណជាតិទឹកក្នុងរាងកាយតាមគ្រប់រូបភាព។  ជាក់ស្តែងទឹកប្រៀបដូចជាឱសថទិព្វសម្រាប់ស្បែក ដូចនេះ អ្នកត្រូវញ៉ាំទឹកឲ្យបានច្រើនបំផុត។ ញ៉ាំអាហារសមស្រប អំឡុងពេលមករដូវជារៀងរាល់ខែស្ត្រីគ្រប់រូបមានទំនោរចូលចិត្តញ៉ាំអាហារមិនសូវល្អ រួមជាមួយអាហារដែលមានរសជាតិប្រៃ ខ្លាញ់ និងស្ករ។ អាហារទាំងនេះរឹតតែធ្វើឲ្យសញ្ញានៃការមករដូវកាន់តែធ្ងន់ធ្ងរ និងធ្វើឲ្យស្បែករឹតតែស្រអាប់  ឬរិល។ បង្កើនការញ៉ាំអាហារសុខភាព ដូចជាបន្លែបៃតង ផ្លែឈើ សណ្តែក និងប្រភេទទឹកដោះគោ ដោយសារវាជាសារធាតុបង្កើនកម្រិតជាតិដែកដល់រាងកាយរបស់អ្នក ដែលបានបាត់បង់យ៉ាងច្រើនតាម ការមករដូវ។ ម៉ាស្សារាងកាយ ធ្វើការម៉ាស្សារាងកាយជាវិធីសាស្រ្តល្អបំផុត ដើម្បីឲ្យប្រព័ន្ធប្រសាទនានារបស់អ្នកបានសម្រាក។ ដូចគ្នាផងដែរ វាក៏ជួយអ្នកបន្ថយនូវការឈឺចាប់ផ្សេងៗ និងការឈឺពោះនូវរាល់ពេលមករដូវរបស់អ្នក។ ដូច្នេះហើយ ការម៉ាស្សារាងកាយអ្នកទាំងមូលអាចបង្កើនលំហូរឈាមរដូវ ក៏ដូចជាដំណើរឈាមក្នុងរាងកាយផងដែរ ប៉ុន្តែអ្នកអាចនឹងសម្គាល់ឃើញថា អារម្មណ៍របស់អ្នកកាន់តែស្ងប់ និងស្រស់ស្រាយជាងធម្មតា។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ស្បែក កាមរោគ​ និងសម្រស់
ចែករំលែក
  • Jan 25, 2018 |
  • 6 ឆ្នាំមុន |
  • 9.7K មើល

១០mg នៃឱសថ XARELTO® (Rivaroxaban) អាចជួយកាត់បន្ថយជំងឺឈាមកកក្នុងសរសៃវ៉ែន

រដ្ឋបាលចំណីអាហារ និងឱសថសហរដ្ឋអាមេរិក (FDA) នាថ្ងៃទី ៣០ ខែតុលា ឆ្នាំ២០១៧ បានយល់ស្របឲ្យមានការប្រើប្រាស់ឱសថ Rivaroxaban (Xarelto, Janssen Pharmaceuticals, Inc.) ក្នុងកម្រិត ១០មីលីក្រាមក្នុងមួយថ្ងៃជាប្រចាំ សម្រាប់ការការពារហានិភ័យនៃជំងឺឈាមកកក្នុងសរសៃវ៉ែន (Venous thromboembolism) ដែលជាជំងឺតែងកើតមានឡើងបន្ទាប់ពីការព្យាបាលជំងឺកំណកឈាមអស់រយៈពេល ៦ខែ។ លទ្ធផលការប្រើប្រាស់នេះ ពឹងផ្អែកលើទិន្នន័យនៃការសិក្សាគ្លីនិកពី EINSTEIN CHOICE  បានបង្ហាញថា Factor Xa Inhibitor មានប្រសិទ្ធភាពរ៉ាប់រងក្នុងការកាត់បន្ថយនៃការកើតជំងឺឈាមកកក្នុងសរសៃវ៉ែន (Venous thromboembolism) ដោយការសិក្សានេះបានធ្វើឡើងលើអ្នកជំងឺដែលកំពុងទទួលការព្យាបាលជំងឺកំណកឈាមអស់រយៈពេល ៦ ទៅ១២ ខែ រួចតម្រូវឲ្យប្រើប្រាស់ឱសថ Xarelto អាចក្នុងកម្រិត ១០mg/១ថ្ងៃ និង២០mg/១ថ្ងៃ ជាប្រចាំ ចំណែកអ្នកជំងឺមួយផ្នែកទៀត ត្រូវបានប្រើប្រាស់ឱសថ Aspirin ១០០mg/១ថ្ងៃជាប្រចាំ ហើយគេសង្កេតឃើញថា អ្នកជំងឺប្រើប្រាស់ឱសថ Xarelto មានការថយចុះហានិភ័យនៃជំងឺឈាមកកក្នុងសរសៃឈាមវ៉ែន (Venous thromboembolism)  បើប្រៀបធៀបចំពោះអ្នកជំងឺដែលប្រើប្រាស់ឱសថ Aspirin ។ ការអនុវត្តប្រើប្រាស់ឱសថត្រូវចាប់ផ្តើមដំបូងក្នុងកម្រិត ១៥mg ពីរដងក្នុងមួយថ្ងៃសម្រាប់ការកើតឡើងនៃជំងឺឈាមកកក្នុងសរសៃឈាមអស់រយៈពេល ២១ថ្ងៃ រួចបន្តចាប់ពី ២២ ដល់ ១៨០ថ្ងៃ នោះកម្រិតនៃការប្រើប្រាស់អាចត្រឹម ២០mg មួយដងក្នុងមួយថ្ងៃ ហើយចាប់ពីរយៈពេល ១៨០ថ្ងៃឡើងទៅ ការប្រើប្រាស់អាចស្ថិតក្នុងកម្រិត ១០mgក្នុងមួយថ្ងៃជាប្រចាំ។ គួរបញ្ជាក់ផងដែរ អ្នកធ្លាប់ទទួលបានការព្យាបាលជំងឺកំណកឈាម អាចមានហានិភ័យក្នុងអត្រា២០% ប្រឈមទៅជំងឺឈាមកកក្នុងសរសៃវ៉ែន (Venous thromboembolism) ក្នុងរយៈពេល៣ឆ្នាំ ចំណែកការសម្រេចរបស់ FDA រួមជាមួយការសិក្សាបែបគ្លីនិកជាភស្តុតាងបង្ហាញពីប្រសិទ្ធភាពរបស់ឱសថ Xarelto បើប្រៀបធៀបទៅនឹងឱសថ Aspirin សម្រាប់ការពារពីជំងឺឈាមកកក្នុងសរសៃវ៉ែននេះ។ ឯកសារយោង : FDA Approves New 10 mg Dosing for XARELTO® (rivaroxaban) to Reduce the Continued Risk of Venous Thromboembolism (VTE) [news release]. Titusville, NJ. Janssen Pharmaceuticals, Inc. October 30, 2017. ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Jan 25, 2018 |
  • 6 ឆ្នាំមុន |
  • 4K មើល

ហេតុអ្វីគួរឲ្យកូនៗរបស់អ្នកជិះកង់?

ការហាត់ប្រាណ ឬលេងកីឡាមួយចំនួន តែងផ្តល់ឲ្យអ្នកនូវសុខភាពល្អ មិនថាស្ថិតក្នុងវ័យណានោះទេ។ ដោយឡែក ការជិះកង់ជាលំហាត់ប្រាណមួយ ដែលត្រូវបានបង្ហាញថាស័ក្តិសមបំផុតសម្រាប់ក្មេង។ ដូចនេះ តាមរយៈអត្ថបទខាងក្រោម ហេលស៍ថាម នឹងបង្ហាញនូវគុណសម្បត្តិ៦ចំណុច ដែលមាតាបិតាគ្រប់រូបមិនគួរមើលរំលង៖ រក្សាឲ្យក្មេងសកម្ម ភាពអសកម្ម អាចនាំដល់បញ្ហាសុខភាពជាច្រើន មិនត្រឹមតែយុវវ័យនោះទេ តែក្មេងៗក៏ដូចគ្នា។ ឳពុកម្តាយមួយចំនួនច្រើនទម្លាប់កូន ជាមួយនឹងឧបករណ៍អេឡិចត្រូនិកនៅតែក្នុងផ្ទះ ឬនៅមួយកន្លែង ព្រោះតែបារម្ភពីសុវត្ថិភាពពួកគេ ជាលទ្ធផលវាអាចធ្វើឲ្យកូនរបស់អ្នកឡើងទម្ងន់ ដោយមិនដឹងខ្លួន ហើយអាចក្លាយជាក្មេងអសកម្ម។ គួរចាប់ផ្តើមបង្រៀនកូនរបស់អ្នកឲ្យជិះកង់ ហើយនាំពួកគេជិះ ជាជម្រើសល្អបំផុត ធ្វើឲ្យពួកគេរីករាយ កាន់តែជិះ កាន់តែធ្វើឲ្យពួកគេសកម្មឡើង។ ម៉្យាង វាក៏ត្រូវបានចាត់ជាទម្រង់ហាត់ប្រាណសមល្មមបំផុតដែលមានប្រសិទ្ធភាពខ្ពស់ចំពោះកូនៗរបស់អ្នក។ បង្កើនទំនាក់ទំនង តាមពិតទៅវាជាវិធីល្អបំផុតក្នុងការបង្កើនទំនាក់ទំនងរវាងឳពុកម្តាយ និងកូនៗ ល្អជាងការអង្គុយមើលទូរទស្សន៍ ឬធ្វើការងារលើតុមួយកន្លែង រឹតតែបង្កើនភាពរីករាយជាលក្ខណៈគ្រួសារដោយការជិះកង់រៀងៗខ្លួន។ អ្នកអាចជិះពេលទៅកម្សាន្តនៅមាត់សមុទ្រ ផ្តល់ឲ្យអ្នក និងកូនៗរបស់អ្នកនូវភាពរីករាយបង្កប់ជាមួយលំហាត់ប្រាណ។ មិន-ត្រឹមផ្តល់នូវលំហាត់ប្រាណប្រកបដោយប្រសិទ្ធភាព និងសុខភាពល្អប៉ុណ្ណោះទេ ប៉ុន្តែវាក៏បំពេញនូវពេលវេលាប្រកបដោយសំណើច  អនុស្សាវរីយ៍ល្អៗ និងធ្វើឲ្យសមាជិកគ្រួសារម្នាក់ៗរបស់អ្នកកាន់តែមានភាពស្និទ្ធស្នាល។ សម្រួលបេះដូង សរសៃឈាម និងសាច់ដុំ វាមិនលឿនពេកទេ ដែលចាប់ផ្តើមឲ្យកូនៗរបស់អ្នក មានចង្វាក់បេះដូងកើនឡើងបន្តិច ដើម្បីបង្កើនការច្របាច់ឈាមចេញទៅគ្រប់ផ្នែកផ្សេងៗនៃរាងកាយ។ នៅពេលជិះកង់ រាងកាយមានការចូលរួមពីក្រុមសាច់ដុំធំៗនៃប្រអប់ជើង បង្កើនចង្វាក់បេះដូង ខណៈពេលនោះ វាភ្ញោចឲ្យមានការបង្កើនសន្ទុះកម្លាំងកុមារឡើងវិញ។ ក្មេងដែលចូលរួមក្នុងការជិះកង់ជាទៀងទាត់ ត្រូវបានរកឃើញថា ការរក្សាថាមពលរបស់ពួកគេ គឺកាន់តែប្រសើរ បើប្រៀបធៀបទៅនឹងខណៈពេលដែលពួកគេហាត់កីឡាផ្សេងទៀត ដូចជាហែលទឹក និងបាល់ទាត់ជាដើម។ លើសពីនេះ វាក៏មានលទ្ធភាពបង្កើនឲ្យសាច់ដុំរឹងមាំ និងលូតលាស់បានយ៉ាងល្អផងដែរ។ បន្ថយការលើសខ្លាញ់ចំពោះកុមារ បច្ចុប្បន្ន ក្មេងធាត់ហួស ហាក់ក្លាយជាហានិភ័យចម្បងមួយសម្រាប់ឳពុកម្តាយភាគច្រើន ស្ទើរតែទូទាំងសកលលោក។ តាមការស្រាវជ្រាវ បានបង្ហាញថា ការជិះកង់គឺជាវិធីសាស្រ្តល្អបំផុត ដើម្បីប្រយុទ្ធនឹងបញ្ហានេះ ព្រោះវាអាចរក្សាឲ្យក្មេងសកម្មដោយគ្មានការធុញទ្រាន់។ កុមារភាគច្រើនអាចអនុវត្តកីឡានេះបានយ៉ាងងាយ ហើយវាមិនធ្វើឲ្យមានបញ្ហាទៅលើសន្លាក់ជង្គង់នោះឡើយ។ ការជិះកង់នេះ ក៏អាចអនុវត្តដើម្បីបន្ថយផ្នែកធាត់ខ្លះនៃរាងកាយបានផងដែរ។ បង្កើនស្មារតីប្រុងប្រយ័ត្ន អត្ថប្រយោជន៍ចំពោះសុខភាពផ្លូវចិត្ត ផ្តល់ដោយការជិះកង់ចំពោះកុមារ គឺជួយបង្កើនទំនុកចិត្តចំពោះខ្លួនឯង។ វាអនុញ្ញាតឲ្យក្មេងក្លាយជាជោគជ័យទៅលើខ្លួនពួកគេផ្ទាល់ ខណៈពេលដែលអារម្មណ៍មិនសូវមានភាពភ័យ ពីមិត្តភក្តិក៏ដូចជាកត្តាផ្សេងៗនៅជុំវិញខ្លួន។ ពិសេសការជិះកង់ធ្វើឲ្យកុមារចេះបែងចែកទីតាំង បង្កើននូវទំនុកចិត្ត និងស្មារតីប្រុងប្រយ័ត្នជានិច្ច ទោះពេលពួកគេស្ថិតក្នុងស្ថានភាពមិនច្បាស់ ក៏ពួកគេពិតជាអាចរកផ្លូវដ៏មានសុវត្ថិភាពត្រឡប់ទៅផ្ទះបាន។ អត្ថប្រយោជន៍ពីបរិយាកាសខាងក្រៅ ភាគច្រើនក្មេងៗចូលចិត្តចេញក្រៅបំផុត ពួកគេអាចទទួលបានពន្លឺធម្មជាតិដែលផ្តល់ឲ្យពួកគេនូវវីតាមីន D និងខ្យល់បរិសុទ្ធយ៉ាងច្រើន ជួយឲ្យក្មេងគេងលក់ស្រួលនៅពេលយប់។ ជាក់ស្តែង ការគេងលក់ស្រួលផ្តល់ឲ្យក្មេងនូវសុខភាពរាងកាយរឹងមាំ លូតលាស់បានល្អ និងបង្កើនប្រព័ន្ធភាពស៊ាំការពាររាងកាយកាន់តែរឹងមាំ។ ជិះកង់ជួយឲ្យពួកគេរៀនទទួលយកអ្វីៗនៅជុំវិញខ្លួនពួកគេ និងអាចឲ្យពួកគេទៅចំណាយពេលផ្ទាល់ខ្លួនបានយ៉ាងរីករាយ។ លើសពីនេះ ការជិះកង់នឹងធ្វើឲ្យកូនៗរបស់អ្នកស្គាល់ទីតាំងច្បាស់លាស់ និងអាចចូលរួមកាត់បន្ថយការបំពុលបរិស្ថានបានមួយផ្នែក។ ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

គន្លឹះសុខភាព ការចិញ្ចឹមកូន
ចែករំលែក
  • Jan 23, 2018 |
  • 6 ឆ្នាំមុន |
  • 5.2K មើល

Isoflavones ពីសណ្តែកសៀងជាមួយនឹងមុខងារ និងអត្ថប្រយោជន៍ដ៏សម្បើមចំពោះសុខភាព

ជាប្រភពនៃប្រូតេអ៊ីនដ៏មានគុណភាពដែលអាចជំនួសទឹកដោះគោ និងសាច់ដែលមានតម្លៃថ្លៃ ក្នុងអំឡុងប៉ុន្មានឆ្នាំចុងក្រោយនេះ សណ្តែកសៀងត្រូវបានគេស្រាវជ្រាវដោយផ្តោតយ៉ាងខ្លាំងលើសមាសធាតុផ្សំរបស់វាជាពិសេសគឺIsoflavones។ Isoflavonesជាសមាសធាតុដ៏អស្ចារ្យមួយដែលត្រូវបានដឹងថាការបរិភោគរយៈពេលវែង អាចការពារ​នូវភាពចាស់ជរាបាន ដោយសាររចនាសម្ព័ន្ធដែលស្រដៀងទៅនឹងអ័រម៉ូនអឺស្រ្តូសែនរបស់រាងកាយ។ អត្ថប្រយោជន៍នៃ Isoflavones ពីសណ្តែកសៀងGenistein និង Daidzeinប្រភេទធំៗទាំងពីររបស់ Isoflavones ត្រូវបានចាត់ទុកថាជាសារធាតុសារវន្តសម្រាប់សុខភាពដោយវានាំ មកនូវអត្ថប្រយោជន៍ដ៏សម្បើមដោយក្នុងនោះ រួមមាន៖ 1.  ការសម្រួលរោគសញ្ញារំខានរបស់ស្ត្រីអស់រដូវ Isoflavones អាចជួយសម្រួលនូវបញ្ហាសុខភាពដែលទាក់ទងនឹងអ័រម៉ូនអឺស្ត្រូសែនបានជាច្រើនជាពិសេសគឺ រោគសញ្ញានៅពេលមុនអស់រដូវ (ភាពក្តៅក្រហល់ក្រហាយ) និងក្រោយអស់រដូវ(ពុកឆ្អឹង)។ ប្រសិទ្ធភាព​របស់វាទៅលើរោគសញ្ញានៃការអស់រដូវគឺផ្អែកទៅលើកម្រិតប្រើប្រាស់ (បច្ចុប្បន្ន កម្រិតប្រើគឺ ៦០ ទៅ ៨០មីលីក្រាម/ថ្ងៃ) ។ 2.  ឥទ្ធិពលលើជំងឺសាច់ដុះក្រៅស្បូន (Endometriosis) ក្នុងការសិក្សាមួយដែលបានធ្វើឡើងនៅប្រទេសជប៉ុន និងបានចុះលើព្រឹត្តិបត្រព័ត៌មាន Epidemiology journal ក្នុងឆ្នាំ ២០០៧ បានបង្ហាញថាកម្រិតកាន់តែខ្ពស់នៃសារធាតុ genis​-tein និងdaidzein ពីសណ្តែកសៀងនៅក្នុងប្រព័ន្ធបង្ហូរនោមមានទំនាក់ទំនងជាមួយនឹងការថយចុះនៃការប្រឈទៅនឹងសាច់ដុះក្រៅស្បូនដំណាក់កាលធ្ងន់ធ្ងរ ។ 3.  ឥទ្ធិពលលើបណ្តុំរោគសញ្ញាដុំសាច់ក្នុងអូវែ (PCOS) ការប្រើIsoflavoneពីសណ្តែកសៀងរយៈពេល១២សប្តាហ៍ចំពោះ​ស្រ្តីមានបណ្តុំរោគសញ្ញាសាច់ដុះនៅក្នុងអូវែត្រូវបានរកឃើញ​ថាធ្វើឲ្យការប្រឈមនឹងជំងឺដែលទាក់ទងនឹងភាពខុសប្រ​ក្រ​តីនេះ (ទឹកនោមផ្អែមប្រភេទ២ជំងឺសរសៃឈាមបេះដូងមហា​រីកស្រទាប់ស្បូន និងភាពមិនប្រក្រតីនៃដំណើរអូវុល) មានភាពប្រសើរឡើង នេះបើតាមការសិក្សាលើស្ត្រី ៧០ នាក់ (១៨ឆ្នាំ ដល់ ៤០ឆ្នាំ) នៅសាកលវិទ្យាល័យវេជ្ជសាស្ត្រ Kashan ប្រទេសអ៊ីរ៉ង់។ 4.  ឥទ្ធិពលលើជំងឺពុកឆ្អឹង ជំងឺនេះកើតឡើងចំពោះស្ត្រី និងជាចម្បងកើនឡើងជាមួយនឹងអាយុ និងកង្វះនៃអ័រម៉ូន។ តាមការសិក្សាIsoflavone អាចបន្ថយ ការបាត់បង់ឆ្អឹងចំពោះការប្រើលើសពី ៦ ទៅ ២៤ ខែ។Isoflavone​ ត្រូវបានសន្និដ្ឋាន​ថាអាចបង្កើនការស្រូបមកវិញនូវកាល់ស្យូមរបស់ឆ្អឹង ក៏ដូចជាបន្ថយនូវការបញ្ចេញ ចោលនៃជាតិរ៉ែរបស់ឆ្អឹង។ 5.  ឥទ្ធិពលលើជំងឺប្រព័ន្ធសរសៃឈាមបេះដូង Isoflavones អាចកាត់បន្ថយការប្រឈមនឹងជំងឺសរសៃ​ឈាម​​​បេះដូងតាមរយៈការបន្ថយកម្រិតរបស់ជាតិខ្លាញ់អាក្រក់ (LDL) និងទ្រីគ្លីសេរីត។ មុខងារការពារបេះដូងនៃgenisteinត្រូវបានសង្កេតឃើញតាមរយៈសមត្ថភាពរបស់វាក្នុងការបន្ថយសម្ពាធឈាមចំពោះស្ត្រីក្រោយអស់រដូវ។ 6.  ឥទ្ធិពលចំពោះជំងឺទឹកនោមផ្អែម ជាង ១០ឆ្នាំមកហើយដែលការសិក្សាបានបង្ហាញថា genistein អាចព្យាបាល ក៏ដូចជាបន្ថយការប្រឈមទៅនឹងជំងឺទឹក នោមផ្អែមប្រភេទ២យ៉ាងគួរឲ្យកត់សម្គាល់Isoflavonesអាចបង្កើនការបញ្ចេញអាំងស៊ុយលីនដោយមិនធ្វើឲ្យប្រែប្រួលដល់ការចាប់យកជាតិស្ករពីឈាមមកប្រើដោយជាលិកា និងកំហាប់នៃ adiponectin ឡើយ។ 7.  ឥទ្ធិពលលើការលើសទម្ងន់ Isoflavones ត្រូវបានជឿថាអាចកាត់បន្ថយការប្រមូលផ្តុំជាតិខ្លាញ់ និងការចែកចាយជាលិកាខ្លាញ់បាន ដែលមាន ន័យថាវាមានអានុភាពខ្លាំងក្នុងការការពារ និងព្យាបាលការ លើសទម្ងន់។ ការប្រើប្រាស់   Isoflavones រយៈពេល ១២ សប្តាហ៍ក៏បានបង្ហាញពីអត្ថប្រយោជន៍លើជំងឺរឹងសរសៃឈាម និងមុខងារជញ្ជាំងសរសៃឈាមផងដែរ។ 8.  ឥទ្ធិពលលើជំងឺមហារីក តាមទ្រឹស្តី Isoflavones អាចបន្ថយការប្រឈមនឹងជំងឺមហា រីកភ្ញោចដោយអឺស្ត្រូសែនដោយក្នុងនោះ រួមបញ្ចូលនូវមហារីកសុដន់មួយចំនួន។ វាក៏អាចរារាំងការកកើតនៃរ៉ាឌីកាល់សេរីដែលអាចបង្កជាមហារីកផងដែរ។ ក្រៅពីនេះ វាអាចបន្ថយការប្រឈមនឹងមហារីកពោះវៀនធំ(មហារីកលំដាប់ទី ៣ លើពិភពលោក) បាន ២៣% ទៀតផង។ 9.  មុខងារក្នុងការរៀនសូត្រ និងចងចាំ Isoflavones មានឥទ្ធិពលយ៉ាងល្អលើមុខងារនៃការរៀនជាពិសេសទាក់ទងនឹងការចងចាំពាក្យចំពោះស្រ្តីក្រោយអស់រដូវ។ Genisteinជាមួយនឹងសកម្មភាពប្រឆាំងអុកស៊ីតកម្មរបស់វាអាចការពារប្រឆាំងនឹងជំងឺខូចខាតកោសិកាខួរក្បាលក៏ដូចជាការពារពីការពុលដោយប្រតិកម្មកើតឡើងពី H2O2ដែលបំផ្លាញកោសិកាខួរក្បាលផងដែរ។ 10.  សុខភាពស្បែក ការប្រើប្រាស់ Isoflavone aglycones ត្រូវបានដឹងថាអាច ជួយដល់បញ្ហាចាស់ជរានៃស្បែក។ឯធាតុចម្រាញ់របស់វាអាចជួយរារាំងការកកើតនៃកោសិកាស្បែកដែលងាប់ដោយ UVB ក៏ដូចជាបន្ថយការបញ្ចេញ H2O2 នៅក្នុងកោសិកាផងដែរ ដែលមានន័យថាវាអាចបន្ថយអុកស៊ីតកម្ម និងភាពឡើងក្រាស់នៃស្រទាប់ epiderm របស់ស្បែកបាន។ សុវត្ថិភាពនៃ Isoflavones ពីសណ្តែកសៀង អ្នកជំនាញពី The US Center for the Evaluation of Risks to Human Reproduction បានបង្ហាញអំពីផលរំខានដែលសឹងតែអាចផាត់ចោលបានចំពោះមនុស្សជាទូទៅដែលប្រើប្រាស់ genistein ។ គួរបញ្ជាក់ថា កម្រិតប្រើដែលផលរំខានមិនត្រូវបានសង្កេតឃើញ (no observed adverse effect level) នៃ genistein គឺ ៥០ មីលីក្រាម/គីឡូក្រាមនៃទម្ងន់មនុស្ស/ ថ្ងៃ ដែលវាជាកម្រិតដែលខ្ពស់ជាងការប្រើប្រាស់ដោយមនុស្សទូទៅជាច្រើនដង។ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

វីតាមីន & អាហារូបត្ថម្ភ
ចែករំលែក
  • Jan 22, 2018 |
  • 6 ឆ្នាំមុន |
  • 4.9K មើល

វិធីសាស្រ្តការពារពីជំងឺឫសដូងបាត

វិធីសាស្រ្តការពារពីជំងឺឫសដូងបាត ​(Prevention of Hemorrhoid) 1. កិច្ចការពារ ពីជំងឺឫសដូងបាត ត្រូវជៀសវាង ឬកាត់បន្ថយការងារណាអង្គុយច្រើន ដូចជាជាងដេរ ជាងអេឡិចត្រូនិច អ្នកបើកបរ អ្នកធ្វើការងារការិយាល័យជាដើម។  2. ត្រូវញ៉ាំអាហារឲ្យមានសម្លរទឹក មានបន្លែច្រើន ផ្លែឈើមានជាតិសសៃ ញ៉ាំទឹកឲ្យបានច្រើន២ឬ៣​លីត្រក្នុងមួយថ្ងៃ។ 3. ជៀសវាងកុំញ៉ាំច្រើន ញ៉ាំសាច់ច្រើន ញ៉ាំផ្លែម្ទេសច្រើន កុំញ៉ាំផ្លែឈើលេបទាំងគ្រាប់ ព្រោះ ក្រពះពោះវៀន មិនអាចរំលាយគ្រាប់ផ្លែឈើទាំងនោះបានទេ។ 4. ជៀសវាងកុំពន្យាពេល ការបត់ជើងធំយូរម៉ោង ដែលនាំឲ្យលាមករឹងក្តៀន ពិបាកបត់ជើងធំ។  5. ជៀសវាងធ្វើការងារធ្ងន់ៗ លើកដាក់ លីសែង ឡើងដើមឈើ ឡើងដើមត្នោតជាដើម។  6. ជៀសវាងកុំរូមភេទតាមរន្ធគូថ (ទ្វាលាមក) (Anal Intercourse) 7. ជៀសវាងកុំប្រើប្រាសវត្ថុរឹង ទៅសម្អាតទ្វាលាមក ដូចជាស្មៅ ចំបើង មែកឈើ ស្លឹកឈើ   ក្រដាសជាដើម។ 8. បើឪពុកមា្តយមានជំងឺឫសដូងបាត ត្រូវព្យាបាលឲ្យបានជាមុន ពេលបង្ករកំណើត វាអាចចម្លង ឲ្យកូនតាំងពីនៅក្នុងផ្ទៃ  ឲ្យកើតមានជំងឺឬសបាត ដោយស្វ័យប្រវត្តិន៏។  9. ត្រូវហាត់ប្រាណឲ្យបាន១ថ្ងៃ ១ឬ២ដងដើម្បីជៀសវាងកុំឲ្យលាមករឹង(ទល់លាមក)។  10. ជៀសវាងកុំឲ្យលាមករឹង ក្តៀន ឬរាគរូសយូរថ្ងៃពុំបានព្យាបាល។ 11. ត្រូវមានបង្គន់អនាម័យ មានទឹកសំរាប់លាងសំអាត រាល់ពេលបត់ជើងម្តងៗ។   យោងតាមករណីសិក្សាពីជំងឺឫសដូងបាត របស់លោកវេជ្ជបណ្ឌិត តូច យ៉ាន ឆ្នាំ ២០០៣​-២០១៧ ពីអ្នកជំងឺឫសដូងបាត ចំនួន ១៥០០នាក់ដែលបានមកព្យាបាលនៅ គ្លីនិក តូច យ៉ាន ផ្ទាល់។ បកស្រាយដោយ៖ លោកវេជ្ជបណ្ឌិត តូច យ៉ាន ឯកទេសព្យាបាលជំងឺឫសដូងបាតនៃ គ្លីនិក តូច យ៉ាន ព្យាបាលជំងឺ ឫសដូងបាត

ជំងឺផ្សេងៗ ក្រពះ​ ពោះវៀន​ ថ្លើម ឫសដូងបាត
ចែករំលែក
  • Jan 20, 2018 |
  • 6 ឆ្នាំមុន |
  • 3.2K មើល

អបអរសាទរ ខួបគម្រប់ ១៥ឆ្នាំ (២០០៣-២០១៨) គ្លីនិក តូច យ៉ាន ឯកទេសព្យាបាលជំងឺឫសដូងបាត!

អបអរសាទរ ខួបគម្រប់ ១៥ឆ្នាំ (២០០៣-២០១៨) គ្លីនិក តូច យ៉ាន ឯកទេសព្យាបាលជំងឺឫសដូងបាត សូមគោរព និង ថ្លែងអំណរគុណដ៏ខ្ពង់ខ្ពស់ដល់រាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាក្រោមការដឹកនាំរបស់រាជរដ្ឋាភិបាលនៃព្រះរាជាណាចក្រកម្ពុជា សម្តេចមានគោលនយោបាយបង្រួបបង្រួមជាតិផ្សះផ្សាជាតិ ឲ្យទទួលបានសុខសន្តិភាព មានការអភិវឌ្ឍរីកចម្រើនជឿនលឿនលើគ្រប់វិស័យក្នុងនោះ វិស័យសុខាភិបាលត្រូវបានសម្តេចបើកទូលាយឲ្យមានសាកលវិទ្យាល័យ មហាវិទ្យាល័យ វិទ្យាសាស្រ្តសុខាភិបាល មានមន្ទីរពេទ្យ គ្លីនិក ព្យាបាលជំងឺជូនប្រជាពលរដ្ឋ គ្រប់ថ្នាក់រដ្ឋ និងឯកជន បង្កឲ្យមានការងាយស្រួលដល់កូនខ្មែរជំនាន់ក្រោយទទួលបានការបណ្តុះបណ្តាលវិស័យវេជ្ជសាស្រ្តបានល្អទាំងបរិមាណ និងគុណភាព។ សូមគោរព និង ថ្លែងអំណរគុណដ៏ខ្ពង់ខ្ពស់ដល់ក្រសួងសុខាភិបាល ឯកឧត្តម ម៉មប៊ុនហេង រដ្ឋមន្ត្រីក្រសួងសុខាភិបាលក្រោមការដឹកនាំរបស់ឯកឧត្តមធ្វើឲ្យវិស័យនេះមានការរីកចម្រើនជឿនលឿនទាំងរដ្ឋ និងឯកជនដែលបង្កលក្ខណៈងាយស្រួល និងពង្រឹងវិស័យអប់រំផ្នែកសុខាភិបាលបានល្អ មានសាកលវិទ្យាល័យ មហាវិទ្យាល័យវេជ្ជសាស្ត្រ មានមន្ទីរពេទ្យ គ្លីនិកព្យាបាលជំងឺជូនប្រជាពលរដ្ឋគ្រប់ថ្នាក់ ទាំងរដ្ឋ និងឯកជន។  សូមថ្លែងអំណរគុណចំពោះអតិថិជនរបស់គ្លីនិក តូច យ៉ាន ​​អរគុណអតិថិជនទាំងអស់ដែលជឿជាក់ បានមកទទួលយកសេវាព្យាបាលជាពី ជំងឺឫសដូងបាត​ នៅ គ្លីនិក តូច យ៉ាន លទ្ធផល ១៥ ឆ្នាំកន្លងរបស់គ្លីនិក តូច យ៉ាន ព្យាបាលជំងឺ ឫសដូងបាតទទួលបានពីសកម្មភាពព្យាបាលជំងឺជូនប្រជាពលរដ្ឋ ជិត ១០,០០០នាក់បានមកទទួលសេវា និងបានព្យាបាលជា (មួយម៉ឺននាក់) “ធានាជូនមួយជីវិត”ពី គ្លីនិក តូច យ៉ាន ធ្វើឲ្យគ្លីនិកយើងខ្ញុំខិតខំបម្រើ និងពង្រឹងគុណភាព ពង្រីកសាខាបាន ៥កន្លែង ទាំងអស់នេះហើយគឺជាភាពអស្ចារ្យសម្រាប់គ្លីនិក តូច យ៉ានហើយក៍ជាមោទនភាព និងមុខមាត់របស់ប្រទេសកម្ពុជាយើងទាំងមូលដែលធ្វើឲ្យពិភពលោក ដឹងច្បាស់ពីសមត្ថភាពស្នាដៃរបស់កូនខ្មែរក៍មិនធម្មតាដែរ រហូតត្រូវបានអង្គការវាយតម្លៃគុណភាពពិភពលោក(WQC World Quality Commitment)  ផ្នែកជំងឺឫសដូងបាត គេឃើញ ហើយបានជ្រើសរើសឲ្យគ្លីនិក តូច យ៉ានទៅទទួលពានពីរឆ្នាំជាប់គ្នា ៖ ១)  នៅឆ្នាំ ២០១៦ ទទួលបានពានរង្វាន់ មាស (Gold Paris 2016 )នៅទីក្រុងប៉ារីស ប្រទេសបារាំង ពីអង្គការវាយតម្លៃ គុណភាពពិភពលោក WQC ។ ២) នៅឆ្នាំ ២០១៧ ទទួលបាន ពានរង្វាន់មាស (The Each Of Europe Frankfurt 2017) ទ្វារកោងអន្តរជាតិ នៅទីក្រុង Frankfurtប្រទេសអាល្លឺម៉ង់ ពីអង្គការវាយតម្លៃគុណភាពពិភពលោក WQC លើកទី២ លទ្ធផលល្អក្នុងការព្យាបាលជំងឺជូនប្រជាពលរដ្ឋរយៈពេល១៤ឆ្នាំកន្លងមក (២០០៣-២០១៧)។ ៣) ទទួលបានការប្រោសប្រទានមេដាយកិត្តិយសថ្នាក់ធិបឌិន ពីសម្តេចអគ្គមហាសង្ឃរាជាធិបតី កិត្តិឧទ្ទេស ទេព វង្ស សម្តេចមហាសង្ឃរាជនៃព្រះរាជាណាចក្រកម្ពុជា ជូនលោកវេជ្ជបណ្ឌិត តូច យ៉ាន ឆ្នាំ ២០១៧ ។ ៤)   ទទួលបានព្រះរាជប្រកាសនីយបត្រ សម្រេចតែងតាំងលោកវេជ្ជបណ្ឌិត តូច យ៉ាន ឲ្យឡើងជា ទីប្រឹក្សាសម្តេចអគ្គមហាសង្ឃរាជាធិបតី កិត្តិឧទ្ទេសទេព វង្ស ព្រះមហាសង្ឃរាជនៃព្រះរាជាណាចក្រកម្ពុជា ឆ្នាំ ២០១៧ ។ សូមគោរពជូនពរ សម្តេច ទ្រង់ ឯកឧត្តម លោក លោកស្រីព្រមទាំងអតិថិជន ដែលបានមកទទួលសេវាព្យាបាលនៅ គ្លីនិក តូច យ៉ាន ទាំងអស់សូមទទួលបានពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។ សូមអរគុណ!

ព្រឹត្តិការណ៍ផ្សេងៗ ព្រឹត្តិការណ៍ និងព័ត៌មាន
ចែករំលែក
  • Jan 20, 2018 |
  • 6 ឆ្នាំមុន |
  • 2.4K មើល

អត្ថបទប្រចាំសប្តាហ៍ទី៣ នៃខែមករា

នេះជាសប្ដាហ៏ទី៣នៃខែមករា ជាពេលដែលត្រូវសរុបលទ្ធផលប្រចាំសប្តាហ៍ជូនមិត្តអ្នកអានទាំងអស់។ ខណៈនេះផងដែរ ហេលស៍ថាមសូមធ្វើការថ្លែងអំណរគុណយ៉ាងជ្រាលជ្រៅចំពោះប្រិយមិត្តអ្នកអានទាំងអស់ដែលនៅតែបន្តគាំទ្ររាល់ការចុះផ្សាយរបស់យើងខ្ញុំ ហើយអត្ថបទដែលទទួលបានការពេញនិយមជាងគេនៅក្នុងសប្ដាហ៍នេះរួមមានដូចខាងក្រោម…  1. ក្រសួងសុខាភិបាលនឹងចាត់វិធានការតឹងរ៉ឹងចំពោះសេវាព្យាបាលជំងឺឯកជនដែលគ្មានការអនុញ្ញាតត្រឹម ការផ្តល់សេវាសុខាភិបាលដែលត្រឹមត្រូវ និងមានប្រសិទ្ធភាពព្រមទាំងស្របច្បាប់ពិតជារួមចំណែកយ៉ាងខ្លាំងក្លាក្នុងការលើកកម្ពស់សុខុមាលភាពរបស់ប្រជាជនមិនថានៅក្នុងប្រទេបែបណានោះទេ។ ផ្ទុយទៅវិញការផ្តល់នូវសេវាព្យាបាលជំងឺដែលមិនស្របច្បាប់ឬមិនមានប្រសិទ្ធភាពមិនត្រឹមតែប៉ះពាល់ដល់សុខភាពរបស់ប្រជាជននោះទេគឺប៉ះពាល់ដល់ទំនុកចិត្តលើវិស័យសុខាភិបាលនៅក្នុងប្រទេសតែម្តងហើយក៏អាចជាហេតុបង្កឲ្យមានជាបញ្ហាផ្សេងៗជាបន្តបន្ទាប់។។។ 2. ប្រភេទនៃជំងឺឫសដូងបាត (Classification of Hemorrhoid) យោងតាមការបកស្រាយរបស់លោកវេជ្ជបណ្ឌិត តូចយ៉ាន ឯកទេសព្យាបាលជំងឺឫសដូងបាតនៃ គ្លីនិក តូច យ៉ាន ព្យាបាលជំងឺ ឫសដូងបាត បានមានប្រសាសន័ថាជំងឺ ឫសដូងបាតមាន ៤ប្រភេទដូចជា… -ប្រភេទទី១ ឫសដូងបាតខាងក្រៅ -ប្រភេទទី២ ឫសដូងបាត ខាងក្នុង (ឫសដូងបាត នាងពូន) -ប្រភេទទី៣ ឫសដូងបាតខាងក្រៅ និងឫសដូងបាតខាងក្នុង -ប្រភេទទី៤ ឫសដូងបាតខាងក្រៅជាប់គ្នាជាមួយខាងក្នុង…. 3. Ibuprofen អាចធ្វើឲ្យបុរសមិនអាចមានកូន (អារ)? Ibuprofen ត្រូវបានគេស្គាល់ថាជាឱសថដែលស្ថិតនៅក្នុងក្រុម NSAIDs (Nonsteroidal Anti-inflammatory drug)មានឈ្មោះនៅលើទីផ្សារជា Motrin  ឬAdvil។ ឱសថនេះត្រូវបានប្រើប្រាស់ព្យាបាលការឈឺចុកចាប់តិចតួច និង អាការៈក្ដៅខ្លួន ក្នុងទម្រង់ជា ថ្នាំគ្រាប់(Tablet) ម្សៅលាយទឹក (Liquide Suspensions) និង បន្តក់ (Concentrated Liquide Drops)។ «អ្នកដែលប្រើប្រាស់ NSAIDs ងាយប្រឈមមុខនឹងជំងឺ គាំងបេះដូង (Higher Heart Attack) និងដាច់សរសៃឈាមខួរក្បាល (Stroke) ជាងអ្នកដែលមិនប្រើប្រាស់» នេះបើយោងតាម National Institutes of Health….. ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

អត្ថបទប្រចាំខែ
ចែករំលែក
  • Jan 19, 2018 |
  • 6 ឆ្នាំមុន |
  • 18.1K មើល

ជំងឺស្ទះសរសៃឈាមបេះដូង ហានិភ័យខ្ពស់លំដាប់ទី១!

ស្ទះសរសៃឈាមបេះដូង គឺជាការស្លោកសាច់ដុំបេះដូងស្រួចស្រាវ​ដោយសារការស្ទះនូវសរសៃឈាមដែលទៅចិញ្ចឹមបេះដូង​(coronary artery)។​ តាមរបាយការណ៍អង្គការសុខភាពពិភព​លោកបានបង្ហាញថា «នៅប្រទេសកម្ពុជា​ក្នុងចំណោមមនុស្ស​១០០​ពាន់នាក់ មាន១២៨.៨នាក់ ស្លាប់ដោយសារ ជំងឺស្ទះសរសៃឈាមបេះដូងនេះ»។ តាមតួលេខជាក់ស្តែងនៅមន្ទីរពេទ្យកាល់​ម៉ែតឆ្នាំ២០១​៦ពេញមួយឆ្នាំ បូករួម២០១៧​រយៈ​ពេល​កន្លះឆ្នាំមានអ្នកជំងឺស្ទះសរសៃឈាមបេះដូងចូលមក​សម្រាក និងព្យាបាលរហូតដល់៨៣៣នាក់ដែលជាតួលេខមួយគួរឲ្យព្រួយបារម្ភ។ បច្ចុប្បន្ននេះ ជំងឺស្ទះសរសៃឈាមបេះដូងនៅតែជាមូលហេតុទីមួយដែលសម្លាប់មនុស្សទូទាំងសកលលោក ក្រោយពេលរកឃើញថាមនុស្សប្រហែល៧លាននាក់ត្រូវបានស្លាប់ដោយសារជំងឺនេះជារៀងរាល់ឆ្នាំទោះបីជាមានការរីកចម្រើននូវបច្ចេក​វិទ្យាទំនើបក្នុងការព្យាបាលយ៉ាងណាក៏ដោយ។ សញ្ញាណាខ្លះដែលលេចឡើងចំពោះអ្នកជំងឺ? ការចុកដើមទ្រូងខ្លាំង ជាសញ្ញាសំខាន់ និងភាគច្រើនបំផុតនៃជំងឺស្ទះសរសៃឈាមបេះដូង ដែលមានរយៈ​ពេលលើសពី​២០​នាទី។​ ការចុកនេះទៀតសោតអាចនឹងរាលមកគល់ថ្គាមចុះ​មក​​ត្រឹមស្មា ឬរហូតដល់ដៃខាងឆ្វេង។ ក្រៅពីនេះ អ្នកជំងឺក៏មាន​សញ្ញារួមផ្សំផ្សេងទៀតដូចជាបែកញើស ឡេះឡាស់ ថប់ដង្ហើម និងហត់ជាដើម។ អ្វីជាមូលហេតុនៃជំងឺស្ទះសរសៃឈាមបេះដូង? ភាគច្រើននៃមូលហេតុបង្កឲ្យមានការស្ទះសរសៃឈាមបេះដូង ​គឺការកកដុំខ្លាញ់ក្នុងសរសៃឈាមបេះដូង។ បន្ថែមពីនេះ ក៏មាន​កត្តាជំរុញផ្សេងទៀត ​និងក្រុមមនុស្សប្រឈមដូចខាងក្រោម៖ •កត្តាអាយុ ៖ នៅពេលអាយុកាន់តែច្រើន អត្រាប្រឈមកាន់​តែខ្ពស់ (បុរសលើសពី៤៥ឆ្នាំ និងស្ត្រីលើសពី៥៥ឆ្នាំ) •អ្នកជំងឺលើសសម្ពាធឈាម •អ្នកជំងឺទឹកនោមផ្អែម •អ្នកលើសជាតិខ្លាញ់ និងលើសទម្ងន់ •មនុស្សអសកម្ម ឬមិនសូវធ្វើពលកម្ម •អ្នកជក់បារី •អ្នកមានប្រវត្តិក្រុមគ្រួសារមានជំងឺស្ទះសរសៃឈាមបេះដូង (family refractor)។ វិធីសាស្ត្រត្រឹមត្រូវក្នុងការធ្វើរោគវិនិច្ឆ័យ ករណីជំងឺស្ទះសរសៃឈាមបេះដូងមានសភាពមិនសូវធ្ងន់ធ្ងរ នោះការធ្វើរោគវិនិច្ឆ័យអាចធ្វើឡើងដោយ​ ការថតចង្វាក់​​បេះដូង ធ្វើអេកូបេះដូង និងការធ្វើតេស្តដោយឲ្យអ្នកជំងឺដើរនៅលើខ្សែពានឬដោយការធាក់កង់ ដើម្បីរកមើល​សញ្ញានៃការ​ស្ទះសរសៃឈាមបេះដូង។​ ក្នុងពេលជាមួយគ្នា គ្រូពេទ្យឯក​ទេសអាចតម្រូវឲ្យអ្នកជំងឺថត CT ស្កែនលើសរសៃឈាម​បេះ​ដូង​ និងចុងក្រោយអាចធ្វើ Angiography ដើម្បីរកមើលទីតាំងនៃសរសៃឈាមដែលស្ទះ រួម និងការពិនិត្យឈាម។ ការព្យាបាលអ្នកជំងឺស្ទះសរសៃឈាមបេះដូង ការព្យាបាលចម្បងនៃអ្នកជំងឺស្ទះសរសៃឈាមបេះដូង គឺធ្វើយ៉ាងណាត្រូវបើកសរសៃឈាមដែលស្ទះនោះដំណើរការឡើងវិញឲ្យបានលឿនបំផុតតាមដែលអាចធ្វើទៅបាន(មុន៦ម៉ោងនិងយ៉ាងហោចណាស់មុន១២ម៉ោង)។ ការបើកឲ្យមានដំណើរការសរសៃឈាមឡើងវិញអាចធ្វើឡើងតាម២របៀប៖ •ប្រើប្រាស់ថ្នាំចាក់​ ដើម្បីរំលាយដុំឈាមដែលកកស្ទះនៅក្នុងសរសៃឈាមបេះដូងនោះ​ ឬហៅថា Thrombolytic។ •ប្រើប្រាស់រ៉ឺស័រដើម្បីពង្រីកសរសៃឈាមបេះដូង(Angioplasty)។ ក្រោយពីការព្យាបាលដោយAngioplastyអ្នកជំងឺត្រូវពិសាថ្នាំឲ្យបានទៀងទាត់ទៅតាមវេជ្ជបញ្ជា និងធ្វើការតាមដានតាមការណែនាំរបស់គ្រូពេទ្យឯកទេស។ ហានិភ័យនៃអ្នកជំងឺស្ទះសរសៃឈាមបេះដូងអាចនឹងធ្ងន់ធ្ងររហូតឲ្យអ្នកជំងឺមានគ្រោះ​ថ្នាក់ដល់អាយុជីវិត ប្រសិនបើមិនទទួលបានការព្យា​បា​ល​ទាន់ពេលវេលា និងត្រឹមត្រូវតាមបច្ចេកវិទ្យា។ អ្នកជំងឺស្ទះសរសៃឈាមបេះដូងទាមទារធ្វើការព្យាបាលឲ្យបានមុន៦​ម៉ោង ​ឬយ៉ាងហោចណាស់ឲ្យបានមុន១២ម៉ោង ប្រសិនបើ​លើស​ពី១២ម៉ោងនោះសាច់ដុំបេះដូងរបស់អ្នកជំងឺនឹងស្លោកខូច ហើយហានិភ័យនឹងកាន់តែធ្ងន់ធ្ងរ។ គួរការពារខ្លួនបែបណាដើម្បីកាត់បន្ថយជំងឺនេះ? តាមពិតជំងឺស្ទះសរសៃឈាមបេះដូងមិនអាចការពារបាននោះ​ទេ ប៉ុន្តែវាអាចត្រូវបានកាត់បន្ថយតាមរយៈគោលការណ៍ដូចខាងក្រោម៖ •ធ្វើលំហាត់ប្រាណឲ្យបានទៀងទាត់ (៣០នាទីក្នុង១ថ្ងៃនិង៥ថ្ងៃក្នុងមួយសប្តាហ៍) •បញ្ឈប់ការជក់បារី •កាត់បន្ថយ ឬបញ្ឈប់ការពិសាគ្រឿងស្រវឹង •ចៀសវាងការបរិភោគអាហារប្រៃខ្លាំង •កាត់បន្ថយអាហារសម្បូរជាតិខ្លាញ់ •កាត់បន្ថយភាពតានតឹងក្នុងអារម្មណ៍ (Stress) •គ្រប់គ្រងសម្ពាធឈាមឲ្យបានល្អ •គ្រប់គ្រងជាតិស្ករឲ្យមានលំនឹងបើមានជំងឺទឹកនោមផ្អែម •រក្សាទម្ងន់ឲ្យបានសមស្រប និងចៀសវាងកុំឲ្យលើសទម្ងន់ •ជួបពិគ្រោះជាមួយគ្រូពេទ្យឯកទេសឲ្យបានទៀងទាត់។ ដោយសារជំងឺស្ទះសរសៃឈាមបេះដូងជាជំងឺមួយដែលធ្ងន់ធ្ងរ និងទាមទារឲ្យមានការព្យាបាលទាន់ពេលវេលា ដូច្នេះអ្នកជំងឺក៏ដូចជាគ្រូពេទ្យទាំងអស់ដែលបាន និងកំពុងបំពេញការងារទាំងនៅរាជធានីក្តី និងនៅតាមបណ្តាខេត្តក្តី ប្រសិនបើជួបជាមួយនឹងអ្នកជំងឺដែលមានសញ្ញាដូចខាងលើ សូមប្រញាប់បញ្ជូនអ្នកជំងឺមកមន្ទីរពេទ្យឯកទេសនៅភ្នំពេញជាបន្ទាន់ គឺ  មន្ទីរពេទ្យកាល់ម៉ែតដែលមានមធ្យោបាយទំនើបគ្រប់គ្រាន់​ក្នុងការធ្វើរោគវិនិច្ឆ័យ និងព្យាបាលអ្នកជំងឺព្រមទាំង​ជួយសង្គ្រោះអ្នកជំងឺឲ្យបានទាន់ពេលវេលា។ ជាក់ស្តែង បច្ចុ​ប្បន្ននេះ មន្ទីរពេទ្យកាល់ម៉ែត មានបន្ទប់ថតឆ្លុះ​សរសៃឈាម​បេះដូង (Angiography) ចំនួន២ ព្រមជាមួយគ្រូពេទ្យឯក​ទេ​ស​ជំនាញខាងថតឆ្លុះសរសៃឈាមបេះដូងគ្រប់គ្រាន់ រងចាំ​ទទួ​លព្យាបាលប្រជាពលរដ្ឋគ្រប់ពេលវេលា។ បកស្រាយដោយ៖ សាស្រ្តាចារ្យវេជ្ជបណ្ឌិត សុខ ជួរ ប្រធានអ៊ុយនីតេ ជំងឺបេះដូងនៃមន្ទីរពេទ្យកាល់ម៉ែត និងជាប្រធានសមាគមគ្រូពេទ្យបេះដូងកម្ពុជា ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ជំងឺផ្សេងៗ បេះដូង និងសរសៃឈាម
ចែករំលែក
Top