Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
ភាសាខ្មែរ ភាសាខ្មែរ
English English
ចូលគណនី
Createx Logo
  • Jan 20, 2017 |
  • 7 ឆ្នាំមុន |
  • 4.5K មើល

សកម្មភាពទាំង៥សម្រាប់ចុងសប្តាហ៍នៅភ្នំពេញ

ធ្វើការងារ ក៏ដូចជារៀន៥ថ្ងៃជាប់គ្នាហើយ…ម្នាក់ៗប្រាកដជាទន្ទឹងរង់ចាំឲ្យដល់ថ្ងៃចុងសប្តាហ៍ ដើម្បីបានសម្រាក និងលំហែផ្លូវកាយ ក៏ដូចជាផ្លូវចិត្ត…ក្នុងករណីដែលមិនមានពេលគ្រប់គ្រាន់ទៅដើរកម្សាន្តនៅក្រៅក្រុង ឬក្រៅប្រទេសនោះ យើងខ្ញុំក៏សូមធ្វើការណែនាំនូវសកម្មភាព៥យ៉ាងសម្រាប់កំដរថ្ងៃចុងសប្តាហ៍របស់អ្នក ដោយមិនចាំបាច់ទៅណាឆ្ងាយដូចគ្នា ប៉ុន្តែគិតថាវានឹងក្លាយជាថ្ងៃចុងសប្តាហ៍ដែលអ្នកចង់បាន។ មើលថ្ងៃរះនៅស្តាតអូឡាំពិក ការចាប់ផ្តើមថ្ងៃថ្មីពិតជាសំខាន់ណាស់ ប្រសិនបើអ្នកគេងយូរពេក  អ្នកនឹងរំលងអាហារពេលព្រឹក ហើយប្រហែលជាអាចមានអារម្មណ៍ខ្ជិលពេញមួយថ្ងៃតែម្តង។  អញ្ចឹង...ថ្ងៃចុងសប្តាហ៍នេះ សាកក្រោកពីព្រលឹម  ស្លៀកពាក់បែបកីឡាទៅស្តាតអូឡាំពិក រត់លេងបន្តិចឲ្យចេញញើស ហើយមើលពីភាពស្រស់ស្រាយរបស់អ្នកនៅជុំវិញដែលខ្លះកំពុងរត់ ខ្លះក៏រាំ និងហាត់កីឡាផ្សេងៗ អ្នកនឹងមានអារម្មណ៍ប្លែក និងស្វាហាប់ខុសពីធម្មតា។  ស្របពេលដែលព្រះអាទិត្យកំពុងរះ អ្នកក៏អាចឆ្លៀតស្រូបយកកម្តៅព្រះអាទិត្យពេលព្រលឹមដែលមានអត្ថប្រយោជន៍ដល់សុខភាព និងកុំភ្លេចផ្តិតយករូបភាពស្អាតៗដែលធ្វើឲ្យស្រឡះចិត្តផងដែរ។  អ្វីដែលមិនគួរមើលរំលងនោះ គឺអាហារសុខភាពជាច្រើនប្រភេទនៅទីនោះ ដូចជា បបរល្ង  តៅហ៊ូ  ទឹកសណ្តែក និងទឹកផ្លែឈើកិនស្រស់ៗជាដើម។  ម៉ោង៧កន្លះ ឬ៨ព្រឹក សមល្មមឲ្យអ្នកត្រឡប់ទៅផ្ទះវិញ ងូតទឹក ទទួលទានអាហារពេលព្រឹក និងចាប់ផ្តើមថ្ងៃចុងសប្តាហ៍ដ៏ល្អរបស់អ្នកបន្តទៀត។ ធ្វើម្ហូបញុំាដោយខ្លួនឯង ឬសម្រាប់គ្រួសារ ភាពមមាញឹកនឹងការសិក្សា និងការងារអាចធ្វើឲ្យអ្នកខ្វះភាពស្និទ្ធស្នាលក្នុងគ្រួសារ។ សាកល្បងធ្វើម្ហូបសម្រាប់ខ្លួនឯង ឬសម្រាប់គ្រួសារអ្នកម្តងមើល៎…អ្នកអាចនឹងមានអារម្មណ៍ប្លែក និងសប្បាយ បើទោះបីជាអ្នកមិនសូវពូកែធ្វើម្ហូបក៏ដោយ។ ហើយរសជាតិអាហារនៅចុងសប្តាហ៍នេះ អាចភ្លក្សនៅផ្ទះជុំគ្នាក៏បាន ឬក៏រៀបចំទៅពិកនិកនៅក្បែរៗក្រុងក៏កាន់តែល្អ។ អង្គុយលេងនៅហាងកាហ្វេ អង្គុយញុំាកាហ្វេនៅថ្ងៃចុងសប្តាហ៍អាចធ្វើឲ្យអ្នកមានអារម្មណ៍ស្រស់ស្រាយ។ អ្នកអាចទៅហាងកាហ្វេដែលមានសភាពអ៊ូអរដូចជាBrown ឬStarbucks មើលគេឯង ឬជួបជុំមិត្តភក្តិជជែកកំសាន្តបំបាត់ស្ត្រេស តែកុំច្រឡំថាទៅចុចទូរស័ព្ទណា៎!!!  មួយបែបទៀត គឺសម្រាប់អ្នកចូលចិត្តស្ងប់ស្ងាត់ ដែលហាងកាហ្វេបែបធម្មជាតិ គឺជាជម្រើសល្អបំផុតដូចជាកាហ្វេEM ឬThe Museum Caféជាដើម។ ដោយគ្រាន់តែអង្គុយអានសៀវភៅដែលអ្នកចូលចិត្ត និងស្តាប់ភ្លេងកំដរតិចៗក៏គ្រប់គ្រាន់ក្នុងការទទួលបានអារម្មណ៍ល្អៗបានហើយ។ សាកល្បងអ្វីដែលថ្មី ព្យាយាមសាកល្បងអ្វីដែលថ្មីខ្លះ នឹងធ្វើឲ្យអ្នកមានអារម្មណ៍ពេញចិត្តនឹងខ្លួនឯងជាងមុនដូចជា ជិះកង់កំសាន្ត លេងប៊ូលីង ហាត់យោគៈ ឡើងជញ្ជាំង (Mountain Climbing) ជិះស្គី ឬជិះស្គីទឹកកកជាដើម។ ថ្ងៃចុងសប្តាហ៍ ជាថ្ងៃដែលអ្នកអាចសន្សំបទពិសោធន៍ថ្មីៗ និងស្វែងរកចំណូលចិត្ត ឬទេពកោសល្យដែលមិនធ្លាប់ដឹងសម្រាប់ជីវិត…ដូចនេះ មិនថាអ្នកធ្លាប់ ឬមិនធ្លាប់ ពូកែ ឬក៏អត់ ចូលចិត្ត ឬមិនចូលចិត្ត សាកល្បងទៅ…បានដឹង! អង្គុយស្តាប់ភ្លេង និងមើលគេរាំ ការស្តាប់ភ្លេង ជាវិធីបំបាត់ស្ត្រេសដ៏មានប្រសិទ្ធភាពមួយ។ អ្នកអាចអង្គុយស្តាប់ភ្លេង និងមើលគេរាំនៅតាមទីសាធារណៈដូចជា សួនច្បារ ឬមាត់ទន្លេ ហើយក៏អាចញុំាចំណីតាមផ្លូវកំដរមាត់ ដែលនឹងធ្វើឲ្យអ្នកនឹកឃើញអនុស្សាវរីយ៍កាលពីវ័យកុមារផងដែរ។ អាចនិយាយថាថ្ងៃចុងសប្តាហ៍បែបនេះ ជាការចំណាយពេលវេលាដ៏ល្អសម្រាប់ខ្លួនឯងផ្ទាល់ បន្ទាប់មកគឺសម្រាប់ក្រុមគ្រួសារ ហើយក៏សម្រាប់មិត្តភក្តិក៏ដូចជាមនុស្សជាទីស្រឡាញ់ផងដែរ ហើយនេះជាអ្វីដែលធ្វើឲ្យចុងសប្តាហ៍ដ៏ខ្លីរបស់អ្នកមានតម្លៃបំផុត... ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

កំសាន្ត ដំណើរកំសាន្ត​ និងទេសចរ
ចែករំលែក
  • Jan 20, 2017 |
  • 7 ឆ្នាំមុន |
  • 3.7K មើល

យុវវ័យសម័យថ្មីចូលចិត្តញ៉ាំអ្វីប្លែកៗ

យុវជនយុវតីចូលចិត្តអី្វដែលទាន់សម័យ ហើយប្លែកៗ…ម៉្លោះហើយបានជាអាហារបច្ចុប្បន្នក៏មានភាពប្លែកៗស្ទើរតែនឹកស្មានមិនដល់។  ពេលនេះHealth Time Pub នាំមិត្តអ្នកអានទៅស្គាល់អាហារប្លែកៗប៉ុន្មានមុខនេះមើល៎ ទំនងញុំាអត់? ប៊ឺហ្គឺខ្មៅ អញ្ចឹងទំនងញុំាអត់? បើមើលពីរូបរាងខាងក្រៅខ្មៅៗអញ្ចឹង…ដូចជាមិនទំនងញុំាសោះ…តែបើអ្នកបានញុំាហើយ ពិតជាចង់ញុំាជារៀងរាល់ថ្ងៃ ហើយក៏ប្រហែលជាមើលយូរៗឃើញថា ប៊ឺហ្គឺខ្មៅដូចអាហ្រ្វិកអញ្ចឹង Cuteដែរតាស៎… បើនិយាយពីប៊ឺហ្គឺពណ៌ខ្មៅបែបនេះ  អ្នកអាចនឹកឃើញដល់myBurgerLab ដែលមានដើមកំណើតនៅប្រទេសម៉ាឡេស៊ីនៅឆ្នាំ២០១២។  អីយ៉ា!!!ទើបតែ៤ឆ្នាំសោះ មានដល់ទៅ៤សាខានៅម៉ាឡេស៊ីហើយមកដល់ស្រុកយើងបាត់ ធ្លាប់តែឮថាម៉ាក ២០ ឆ្នាំ៣០ឆ្នាំទើបពង្រីកសាខាក្រៅប្រទេស។ អញ្ចឹងអាហារនេះពិតជាមិនធម្មតាទេ... ថាធ្យូង…ធ្យូងមែន៎!!! សម្បកនំបុ័ងមានពណ៌ខ្មៅដោយសារតែវាធ្វើឡើងពីម្សៅធ្យូង ដែលមិនត្រឹមតែផ្តល់ភាពទាក់ទាញទាំងរូបរាង និងរសជាតិតែប៉ុណ្ណោះទេ វាថែមទាំងមានអត្ថប្រយោជន៍ដល់សុខភាពផងដែររួមមានការជួយសម្រួលដល់អាការៈហើមពោះ និងឆ្អល់ពោះដោយការស្រូបយកសារធាតុមិនល្អពីក្នុងប្រព័ន្ធរំលាយអាហារ។ ចំណែកគ្រឿងផ្សំមានច្រើនមុខដូចជាសាឡាដ ត្រាវបំពង សណ្តែកដី ប្លូប៊ឺរី គីមឈី បន្លែសរីរាង្គគ្មានសារធាតុគីមី សាច់ស្រស់ៗដូចជាទ្រូងមាន់ដែលសម្បូរដោយជាតិប្រូតេអ៊ីន សាច់គោយកមកពីអាមេរិកដែលមិនត្រឹមតែមានរសជាតិឆ្ងាញ់ ថែមទាំងមានសុវត្ថិភាពទៀតផង។ ណាគេថាប៊ឺហ្គឺមិនហិរ ប្លែកទៀតហើយ… សម្រាប់អ្នកដែលចូលចិត្តញុំាហិរពិតជាត្រូវប៉ាន់ហើយ myBurgerLabលើកនេះមាននាំមកជូននូវមេនញូបែបហិរហិរ គឺSuper spicy Gwang Wang Doដែលវាត្រូវបានដាក់ជាមួយម្ទេសចំនួន៦គ្រាប់។ ញាក់សាច់ដែរហ្នឹង…ហ៊ានមកផ្ចាញ់គ្នាដែរអត់ហ្នឹង? ការ៉េមផ្លែឈើ ធ្លាប់តែឃើញការ៉េមមានរសជាតិផ្លែឈើផ្សេងៗ ដែលញុំាទៅឡើងជក់មាត់ តែឥឡូវការ៉េមមួយបែបទៀតក៏លេចឡើង គឺមានទាំងរសជាតិ និងសាច់ផ្លែឈើតែម្តង…គ្រាន់តែឃើញ…ចង់ញុំាបាត់ទៅហើយ ជាពិសេសត្រង់ស្នូលផ្លែ ស្ត្រ័របឺរី  និងគីវីហ្នឹងហ្មង…ការ៉េមស្រស់ៗបែបហ្នឹង ជឿថាលោកអ្នកមិនទាន់បានឃើញច្រើនទេ តែលោកអ្នកអាចរកបាននៅLa Popsនៅផ្លូវប៉ាស័្ទរ និងសាខាមួយចំនួនទៀត។ ការ៉េមបែបនេះមិនត្រឹមតែ Cuteហើយឆ្ងាញ់នោះទេ ថែមទាំងមិនមានបញ្ចូលពណ៌ និងក្លិនដែលធ្វើឲ្យប៉ះពាល់សុខភាពទៀតផង។ នៅមានមុខម្ហូបប្លែកៗជាច្រើនទៀតដែលអាចរកញ៉ាំបានទៅតាមចំណង់ចំណូលចិត្តរបស់អ្នក...ហើយត្រុវចំាថា​«សុខភាពជាចម្បង កុំឲ្យរំលងអាហារបីពេល»ណា៎!!! ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

វីតាមីន & អាហារូបត្ថម្ភ
ចែករំលែក
  • Jan 19, 2017 |
  • 7 ឆ្នាំមុន |
  • 8.1K មើល

អ្វីដែលត្រូវស្វែងយល់ពីតេស្តរក​មេរោគរលាកថ្លើម

ជំងឺរលាកថ្លើម គឺជាជំងឺដែលមានការរលាកនៅលើសរីរាង្គថ្លើម ហើយមូលហេតុនៃការរលាក គឺមានច្រើន។ មូលហេតុសំខាន់ៗនៃជំងឺនេះ គឺបណ្តាលមកពីវីរុស ការពិសាស្រាច្រើន ថ្នាំមួយចំនួន បញ្ហាAutoimmune (សារពាង្គកាយរបស់អ្នកជំងឺបង្កើតអង់ទីក័រប្រឆាំងនឹងថ្លើមខ្លួនឯង)។  វីរុសដែលធ្វើឲ្យរលាកថ្លើមមាន៥ប្រភេទ គឺ A, B, C, D, និង Eហើយវីរុសសំខាន់ដែលឲ្យរលាកថ្លើមរ៉ាំរ៉ៃ គឺវីរុសរលាកថ្លើមB និងC។ គួរបញ្ជាក់ផងដែរថា អត្រានៃអ្នកកើតជំងឺរលាកថ្លើមប្រភេទBនៅកម្ពុជាមាន៤.៦% និងប្រភេទC ចំនួន៥.៨% មិនត្រឹមតែប៉ុណ្ណោះ រលាកថ្លើមដែលគេព្រួយបារម្ភ គឺរលាកថ្លើមរ៉ាំរ៉ៃដែលអាចវិវឌ្ឍទៅជាក្រិនថ្លើម និងមហារីកថ្លើម។ ដូចនេះ ការធ្វើតេស្តរកមេរោគរលាកថ្លើម គឺជាការចាំបាច់។ និយមន័យ ការធ្វើតេស្តរកមេរោគថ្លើម គឺជាការរាវរកវត្តមាននៃមេរោគថ្លើមនៅក្នុងឈាមរួមជាមួយវត្តមាននៃអង់ទីក័រប្រឆាំងនឹងមេរោគផងដែរ។ ក្នុងការធ្វើតេស្តរកមេរោគថ្លើម អ្នកជំងឺមិនចាំបាច់ធ្វើតេស្តឈាមមុនញ៉ាំអាហារទេ អាចធ្វើនៅពេលណាក៏បាន។ បរិមាណឈាមត្រូវការតិចតួចត្រឹមតែ១មីលីលីត្រឈាមប៉ុណ្ណោះសម្រាប់ម៉ាស៊ីនធ្វើតេស្តទំនើបនៅមន្ទីរពិសោធន៍ស្តង់ដារអន្តរជាតិ ហើយលទ្ធផលនឹងទទួលបានក្នុងរយៈពេល១ម៉ោង។ ប្រភេទតេស្តរកមេរោគថ្លើម ១. តេស្តរកវីរុសថ្លើមប្រភេទ A មាន២ប្រភេទគឺ ៖ •តេស្តរកជំងឺរលាកថ្លើមស្រួចស្រាវ (anti-HAV IgM) តេស្តនេះត្រូវបានប្រើ ដើម្បីរកការវិវឌ្ឍទៅជាជំងឺរលាកថ្លើមស្រួចស្រាវ (Acute Hepatitis) ដែលក្នុងករណីកម្រអាចវិវឌ្ឍទៅជាទម្រង់ធ្ងន់ធ្ងរ (Fulminant Hepatitis) ត្រូវព្យាបាលដោយធ្វើការផ្លាស់ប្តូរថ្លើមទើបអាចបន្តជីវិតបាន។ វីរុសនេះមានវ៉ាក់សាំងសម្រាប់ចាក់ការពារ ដើម្បីបង្ការទម្រង់ធ្ងន់ធ្ងរនេះ។ •តេស្តរកអង់ទីក័រគ្រប់ប្រភេទប្រឆាំងនឹងវីរុសថ្លើមA (anti-HAV IgM, IgG, IgA) វីរុសរលាកថ្លើមប្រភេទ A អាចឆ្លងតាមចំណីអាហារ និងទឹកដែលមានវីរុសនៅក្នុងនោះ ហើយចំពោះប្រទេសដែលអនាម័យនៅមានកម្រិត អ្នកជំងឺអាចនឹងមានវីរុសនេះតាំងពីតូច។ ចំពោះកូនក្មេង ៩០%នៃអ្នកដែលផ្ទុកវីរុសរលាកថ្លើមប្រភេទ A មិនមានលេចចេញជារោគសញ្ញាទេ។ ចំពោះប្រទេសកម្ពុជាយើង ភាគច្រើននៃអ្នកជំងឺដែលមកធ្វើតេស្តភាគច្រើនមានអង់ទីក័រទាំងមូលរួចជាស្រេច។ ដូចនេះ ការធ្វើតេស្តរកអង់ទីក័រទាំងមូល(anti-HAV -IgM, IgG, IgA) ត្រូវបានធ្វើឡើង ដើម្បីបញ្ជាក់ថាអ្នកជំងឺដែលបានឆ្លងវីរុសរលាកថ្លើមប្រភេទ A ហើយបានជាសះស្បើយដោយមានអង់ទីក័រការពារខ្លួនជាស្រេច ឬក៏ក្នុងករណីដែលមានសញ្ញារលាកថ្លើមស្រួចស្រាវចាំបាច់ត្រូវរកanti-HAV IgM បន្ថែមទៀត។ ២. តេស្តរកមេរោគរលាកថ្លើមប្រភេទ B (Seroimmunology test) មាន ៥តេស្តផ្សេងៗគ្នា ដែលអាចធ្វើបាន ២ទៅ៤សប្តាហ៍ក្រោយការឆ្លងវីរុស៖ - តេស្តរកអង់ទីហ្សែន HBs បញ្ជាក់ពីវត្តមានរបស់មេរោគក្នុងខ្លួនអ្នកជំងឺ - តេស្តរកអង់ទីក័រ anti-HBs បញ្ជាក់ពីវត្តមានអង់ទីក័រការពារអ្នកជំងឺពីមេរោគ - Anti-HBc total បញ្ជាក់ពីការធ្លាប់ប៉ះជាមួយមេរោគ - Anti-HBc IgM បញ្ជាក់ពីការរលាកថ្លើមស្រួចស្រាវ - HBe និង anti-HBe សម្រាប់តាមដានការវិវឌ្ឍរបស់មេរោគតេស្តមួយប្រភេទទៀត គឺតេស្តរាប់មេរោគ សម្រាប់តាមដាន ឬវាយតម្លៃការព្យាបាល។ តេស្តនេះអាចធ្វើបាន២សប្តាហ៍ បន្ទាប់ពីការឆ្លងមេរោគ។ សម្រាប់អ្នកដែលមិនធ្លាប់ធ្វើតេស្ត និងចង់ចាក់វ៉ាក់សាំងការពារជំងឺរលាកថ្លើមប្រភេទ B គួរធ្វើតេស្តរកអង់ទីហ្សែន HBs អង់ទីក័រ anti-HBs និងអង់ទីក័រ anti-HBc។ ៣. តេស្តរកមេរោគរលាកថ្លើមប្រភេទ C គឺរកអង់ទីក័រ anti-HCV  ករណីអង់ទីក័រ anti-HCV វិជ្ជមាន អាចបញ្ជាក់បានថា អ្នកជំងឺកំពុងមានវីរុសនៅក្នុងខ្លួន ឬអ្នកជំងឺបានជាសះស្បើយហើយ។ ជាទូទៅ ៧៥% នៃអ្នកឆ្លងមេរោគរលាកថ្លើមប្រភេទ C នឹងវិវឌ្ឍទៅរកជំងឺរលាកថ្លើមរ៉ាំរ៉ៃ និង២៥%ទៀតអាចជាដោយខ្លួនឯង។ ដូចនេះ ដើម្បីញែកឲ្យដាច់ពីស្ថានភាពទាំងពីរនេះ អ្នកជំងឺត្រូវធ្វើតេស្តរាប់ចំនួនវីរុសរលាកថ្លើមប្រភេទ C ក្នុងឈាមបន្តទៀត។ ៤. តេស្តរកមេរោគរលាកថ្លើមប្រភេទ D គឺរកអង់ទីក័រ anti-HDV ដោយសារជំងឺរលាកថ្លើមប្រភេទ D អាចកើតមានបាន លុះត្រាតែអ្នកជំងឺមានជំងឺរលាកថ្លើមប្រភេទ B ដូចនេះ ចំពោះអ្នកដែលមិនមានវីរុសរលាកថ្លើមប្រភេទ B ឬធ្លាប់ចាក់វ៉ាក់សាំងការពាររួចហើយ គឺមិនចាំបាច់បារម្ភពីការកើតជំងឺរលាកថ្លើមប្រភេទ D ទេ។ សព្វថ្ងៃ នៅកម្ពុជាយើងនៅមិនមានការធ្វើតេស្តរកវីរុសប្រភេទនេះទេ។ ៥. តេស្តរកមេរោគរលាកថ្លើមប្រភេទ E គឺរកអង់ទីក័រ anti-HEV វីរុសនេះឆ្លងតាមរយៈចំណីអាហារដូចទៅនឹងជំងឺរលាកថ្លើមប្រភេទ A ដែរ ហើយវាងាយនឹងជាទៅវិញដោយឯកឯង។ នៅកម្ពុជា តេស្តក្នុងមន្ទីរពិសោធន៍ដែលអាចធ្វើបានមាន តេស្តរកមេរោគថ្លើមប្រភេទ A មេរោគថ្លើមប្រភេទ B និងមេរោគថ្លើមប្រភេទ C ទាំង Serology test និងតេស្តរាប់មេរោគ។  លទ្ធផលនៃតេស្តរកមេរោគថ្លើមប្រភេទ B អាចមាន False-positive លើ Screening test ព្រោះតេស្តប្រភេទនេះ មាន Sensibility ខ្ពស់ជាមួយនឹងអង់ទីហ្សែនរបស់មេរោគ ប៉ុន្តែកំហុសនេះអាចចៀសវាងបានដោយការប្រើប្រាស់ម៉ាស៊ីនដែលមានគុណភាព (ម៉ាស៊ីនរបស់ក្រុមហ៊ុន Roche ដូចមន្ទីរពិសោធន៍ស្តង់ដារអន្តរជាតិកំពុងប្រើ) ជាមួយនឹងបច្ចេកទេសដែលមានការត្រួតពិនិត្យត្រឹមត្រូវ ឧបករណ៍ទំនើប និងប្រតិករដែលមានការទទួលស្គាល់គុណភាពត្រឹមត្រូវ។ តើអ្នកណាចាំបាច់ត្រូវធ្វើតេស្តទាំងនេះ? ការធ្វើតេស្តស្វែងរកមេរោគរលាកថ្លើមនេះ អ្នកដែលចាំបាច់ត្រូវតែធ្វើមានដូចជា៖ •ស្រ្តីមានផ្ទៃពោះដែលមិនធ្លាប់ចាក់វ៉ាក់សាំង ព្រោះវីរុសរលាកថ្លើមប្រភេទ B អាចឆ្លងពីម្តាយទៅកូនបានតាមរយៈឈាម ហើយក្មេងដែលឆ្លងវីរុសនេះពីម្តាយ មានការប្រឈមខ្ពស់លើការវិវឌ្ឍទៅរលាកថ្លើមរ៉ាំរ៉ៃរហូតដល់ទៅ៩០% ដូចនេះ មានការប្រឈមខ្ពស់នឹងជំងឺក្រិនថ្លើម និងមហារីកថ្លើម ។ •អ្នករស់នៅប្រទេសដែលប្រឈមនឹងការឆ្លងមេរោគនេះខ្ពស់ (ប្រទេសកម្ពុជា) ជាពិសេសវីរុសរលាកថ្លើមប្រភេទB និងវីរុសរលាកថ្លើមប្រភេទ C •អ្នកត្រូវបញ្ចូលឈាមញឹកញាប់ •អ្នកមានដៃគូរួមភេទច្រើន •អ្នកបម្រើការក្នុងសេវាកម្មសុខាភិបាលដូចជាក្នុងមន្ទីរពិសោធន៍ •អ្នកជំងឺទឹកនោមផ្អែម ព្រោះបើមានឆ្លងវីរុសរលាកថ្លើមប្រភេទ B អ្នកជំងឺអាចនឹងប្រឈមខ្ពស់ជាមួយនឹងការកើតជំងឺមហារីកថ្លើម •អ្នកដែលប៉ះពាល់ជាមួយរបស់មុតស្រួច ដូចជាអ្នកចូលចិត្តសាក់។ បកស្រាយដោយ ៖ លោកស្រីឱសថបណ្ឌិតឯកទេសវេជ្ជសាស្រ្ត តោ ពើទី ស្ថាបនិកនៃ«មន្ទីរពិសោធន៍វេជ្ជសាស្រ្តស្តង់ដារអន្តរជាតិ» ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ។​

ជំងឺផ្សេងៗ ក្រពះ​ ពោះវៀន​ ថ្លើម ឫសដូងបាត
ចែករំលែក
  • Jan 19, 2017 |
  • 7 ឆ្នាំមុន |
  • 4.5K មើល

5ជំហានមិនអាចខ្វះបានក្នុងការកសាងកេរ្តិ៍ឈ្មោះ

បុគ្គលម្នាក់ៗមាននាមជាសម្គាល់ រីឯផលិតផល ឬស្ថាប័នក៏មានស្លាកយីហោសម្រាប់ជាអ្វីដែលនាំឲ្យអ្នកផងទាំងពួងបានស្គាល់ផងដែរ ហើយទំនុកចិត្តពីសំណាក់អតិថិជនក៏មានទៅតាមកេរ្តិ៍ឈ្មោះនៃបុគ្គល  ឬស្ថាប័នដែរ។ ជាក់ស្តែង លោក សោម សម្បតិ្តដែលជានាយកប្រតិបត្តិនៃក្រុមហ៊ុនខាំផែន(ថ្នាំពណ៌ជាតិ) ក៏បានលើកឡើងផងដែរថា «មិនសំខាន់ អ្នកស្គាល់អ្នកណា សំខាន់ នរណាខ្លះស្គាល់អ្នក» ហើយសិល្បៈនៃការកសាងកេរ្តិ៍ឈ្មោះ ក៏មិនមានអ្វីខុសគ្នាពីសិល្បៈនៃការធ្វើទីផ្សារដែរ។  យ៉ាងណាមិញ កេរ្តិ៍ឈ្មោះដែលគេស្គាល់ និងទុកចិត្តនោះ គឺមិនអាចនឹងកសាងឡើងបានក្នុងរយៈពេលខ្លីនោះទេ ហើយបើអាចក៏នឹងមិនអាចស្ថិតស្ថេរបានយូរអង្វែងនោះដែរ។ តើគួរធ្វើបែបណាទើបគេស្គាល់ហើយស្គាល់យូរទៀត? មានជំហាន៥យ៉ាងដែលលោកអ្នកមិនគួរមើលរំលងក្នុងដំណើរនៃការសាងកេរ្តិ៍ឈ្មោះនេះ… គុណភាព ៖ «បើគ្មានគុណភាព កេរ្តិ៍ឈ្មោះក៏មិនអាចមានដែរ»  សម្រាប់បុគ្គល អ្នកដែលមានគុណសម្បត្តិល្អ   និងជួយឲ្យស្ថាប័នមួយរីកចម្រើនត្រូវបានគេហៅថាHuman Capital រីឯផលិតផលវិញក៏មិនខុសគ្នាដែរ មុននឹងឲ្យគេស្គាល់ទាល់តែមានគុណភាពដែលអាចទទួលយកបានសិន។ អ្វីដែលគួរចៀសវាងនោះ គឺការគិតលើប្រាក់ចំណេញភ្លាម និងរយៈពេលខ្លីដែលជាដៃគូនឹងតម្លៃថោក និងគុណភាពទាប។ សរុបទៅ គឺ គ្រប់ប្រភេទ និងផ្នែកទាំងអស់ សុទ្ធតែត្រូវការគុណភាពជាចម្បង ហើយក៏ត្រូវអាស្រ័យលើចំណែកទីផ្សារដែលចង់ចូលផងដែរ។ ការរចនា និងវេចខ្ចប់ ៖ មានគុណភាពតែមួយមុខ គឺមិនទាន់មានអ្វីដែលប្លែកខុសពីគេនោះទេ ហើយអ្វីដែលត្រូវការបន្ថែមនោះ ជាការរចនាម៉ូតព្រមទាំងការវេចខ្ចប់ប្លែក ដើម្បីបង្កើននូវភាពទាក់ទាញ។ សម្រាប់បុគ្គល ការតុបតែងខ្លួនទៅតាមវិជ្ជាជីវៈជាអ្វីដែលមិនអាចខ្វះបាន ព្រោះថាទោះចង់ ឬមិនចង់ វាជាអ្វីដែលអ្នកដទៃក្រឡេកឃើញមុនគេ។ ការកំណត់ជំហរ  ៖ ដរាបណាមានគោលជំហរច្បាស់លាស់ មិនថាស្ថិតនៅក្នុងចំណែកទីផ្សារណានោះទេ បុគ្គល ឬស្ថាប័នក៏នឹងមិនភ័យខ្លាចនឹងទទួលបានការស្គាល់ពីអ្នកដទៃដែរ។ សំខាន់…ត្រូវដឹងថាផលិតផលរបស់ខ្លួននឹងបំពេញតម្រូវការរបស់ក្រុមអតិថិជនប្រភេទណា ហេតុនេះហើយ ទើបទីផ្សារបច្ចុប្បន្នមិនមានទីផ្សារផ្តាច់មុខ។ តែអ្វីដែលយើងសង្កេតឃើញនោះ គឺក្រុមហ៊ុនច្រើនបំពេញតម្រូវការក្នុងចំណែកទីផ្សារដូចគ្នា ហើយក្រុមហ៊ុនដែលលេចធ្លោនឹងមានចំណែកទីផ្សារធំជាងគេ។ ការកសាងក្រុម ៖ «ជោគជ័យមិនមែនជាស្នាដៃរបស់បុគ្គលទេ វាគឺជាស្នាដៃ ឬសមិទ្ធផលរួមគ្នា ហើយមេដឹកនាំដែលពូកែ ចេះកសាងមនុស្សពូកែនៅជុំវិញខ្លួនឲ្យបានច្រើន ដោយបង្កើនថាមពល និងធ្វើឲ្យក្រុមហ៊ុនកាន់តែខ្លាំង។ ជាក់ស្តែង មនុស្សខ្លាំងពិត មានសមត្ថភាពចេះដឹកនាំគេឲ្យក្លាយជាមនុស្សមិនធម្មតា ហើយរួមគ្នាធ្វើការបង្កើតអ្វីដែលមិនធម្មតា ហើយលទ្ធផលដែលល្អប្រសើរ និងអស្ចារ្យនឹងត្រូវបានគេចាប់អារម្មណ៍ ហើយចង់ដឹង និងស្គាល់ពីហេតុ ឬអ្នកដែលនៅពីក្រោយភាពជោគជ័យនោះ។  ពេលវេលា ៖ អ្វីគ្រប់យ៉ាង សុទ្ធតែត្រូវការពេលវេលា ជាក់ស្តែង ការកសាងកេរ្តិ៍ឈ្មោះ និងទំនុកចិត្តរបស់បុគ្គល ឬស្ថាប័នមិនអាចធ្វើទៅបានជោគជ័យក្នុងរយៈពេលខ្លីនោះទេ។ ប្រសិនបើចង់បានលទ្ធផលឆាប់ រហ័សពេក ខ្លាចលោថាតែមិនអាចទទួលបានជាមួយនឹងកម្រិតគុណភាពដែលប្រាថ្នា។ លោកនាយកប្រតិបត្តិក៏បានបញ្ជាក់ផងដែរថា ដំណើរនៃការសាងកេរ្តិ៍ឈ្មោះរបស់ស្ថាប័ន និងបុគ្គល គឺកើតឡើងមុនក្រោយគ្នាតែបន្តិចប៉ុណ្ណោះ ដរាបណាអ្នកមាន«ចំណេះដឹង ជំនាញ និងចំណង់» ដែលត្រឹមត្រូវតាមសម័យកាលនោះ។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

អាជីព និងការសិក្សា អាជីព និងការសិក្សា
ចែករំលែក
  • Jan 18, 2017 |
  • 7 ឆ្នាំមុន |
  • 8.6K មើល

វុឌ្ឍី រ័ត្នវីរីយ៉ា និស្សិតUPក្មេងវ័យ តែក្តីស្រមៃធំ

មិនមែនជារឿងងាយទេ ដែលនិស្សិតពេទ្យមួយរូបមានកាលវិភាគសិក្សារវល់ ដែលត្រូវធ្វើការងារផង តែនៅតែអាចរៀនពូកែទៀត។ និស្សិតពេទ្យភាគច្រើនប្រាកដជាចង់ឲ្យលទ្ធផលនៃការសិក្សារបស់ខ្លួនបានជោគជ័យ បើទោះជាមានកាលវិភាគមិនសូវជាទំនេរក៏ដោយ។ ហេតុនេះហើយ ដើម្បីជាគន្លឹះសម្រាប់ចែកជូនមិត្តនិស្សិត ហេលស៍ថាម ក៏បានធ្វើបទសម្ភាសន៍ជាមួយនឹងយុវនិស្សិតស្រីវ័យក្មេងស្អាត  ឆ្លាតហើយថែមទាំងពូកែ ដែលតែងតែប្រកាន់ខ្ជាប់ជានិច្ចនូវសម្តីខ្លី តែមានន័យជ្រៅថា «Little Girl, Big Dream» គឺ កញ្ញា វុឌ្ឍី រ័ត្នវីរីយ៉ា។  ខ្លះៗពីវីរីយ៉ា ជាមួយនឹងក្តីប្រាថ្នាក្លាយជាវេជ្ជបណ្ឌិតតាំងពីតូច ដើម្បីជួយសង្រ្គោះជីវិតមនុស្ស ព្រមទាំងមានសុខភាពល្អ និងមានរាងកាយរឹងមាំរួចផុតពីជំងឺផ្សេងៗ និងដោយសារតែមានលោកឳពុកជាវេជ្ជបណ្ឌិតមួយរូបស្រាប់ ហេតុនេះហើយកញ្ញាមានការស៊ាំទៅនឹងការរស់នៅក្នុងមជ្ឈដ្ឋាននេះ  ដោយសព្វថ្ងៃនេះ កញ្ញាជានិស្សិតផ្នែកវេជ្ជសាស្រ្តនៅសាកលវិទ្យាល័យពុទ្ធិសាស្រ្ត (UP) និងបម្រើការងារក្រៅម៉ោងនៅគ្លីនិកស្បែកប៊ីស៊ី (BC Skin Clinic) ជាជំនួយការគ្រូពេទ្យផ្ទាល់រយៈពេល៣ឆ្នាំមកហើយ។ មូលហេតុនៃការសម្រេចចិត្តចូលសិក្សានៅUP ជានិស្សិតពូកែ និងគម្រូមួយរូបរបស់ UP  វីរីយ៉ាក៏បានបង្ហើបប្រាប់ដល់ហេលស៍ថាមផងដែរ អំពីមូលហេតុដែលកញ្ញាជ្រើសរើស UP ជាសាលាដែលកញ្ញាចូលសិក្សាក្នុងនោះរួមមានដូចជា  ប្រព័ន្ធសិក្សាដែលប្រើប្រាស់ភាសាអង់គ្លេសជាគោលដែលជួយសម្រួលដល់និស្សិតដែលមានបំណងសិក្សាផ្នែកវេជ្ជសាស្រ្ត ហើយមានចំណេះតែភាសាអង់គ្លេស។ ហេតុផលចម្បងមួយទៀត គឺ ដំណើរការដោយមានគោលការណ៍ច្បាស់លាស់ និងមានគម្រោងល្អៗជាច្រើនក្នុងការជម្រុញនិស្សិតឲ្យទទួលបានចំណេះដឹង និងសមត្ថភាពពិតប្រាកដដែលនឹងអាចយកទៅប្រើប្រាស់បានយ៉ាងជាក់លាក់។ ទន្ទឹមនឹងគ្នានេះដែរ UP ក៏មានទំនាក់ទំនងយ៉ាងជិតស្និទ្ធជាមួយស្ថាប័នរដ្ឋ ជាពិសេសក្រសួងសុខាភិបាល និងសាកលវិទ្យាល័យ ព្រមទាំងមន្ទីរពេទ្យនានា។ ក្រៅពីស្ថាប័នជាតិ  UP ក៏មានកិច្ចសហប្រតិបត្តិការជាមួយនឹងស្ថាប័នអន្តរជាតិនៅតាមបណ្តាប្រទេសផ្សេងៗផងដែរ។ គន្លឹះនៃការសិក្សាមុខវិជ្ជាពេទ្យ ចំពោះការយល់ឃើញរបស់យុវតីក្នុងវ័យ២១ឆ្នាំដ៏មានប្រជាប្រិយភាព និងរូបសម្ផស្សស្រស់សោភាជាទីចាប់អារម្មណ៍របស់អ្នកគ្រប់គ្នារូបនេះ ក៏បានប្រាប់ថាការសិក្សាមុខវិជ្ជាអ្វីក៏មានភាពលំបាកដែរ មិនថាតែមុខវិជ្ជាពេទ្យដែលខ្លួនកំពុងសិក្សានោះឡើយ។ យ៉ាងណាមិញ ការសិក្សាផ្នែកវេជ្ជសាស្រ្តនេះ គឺប្រាកដណាស់មានភាពលំបាកដូចដែលគ្រប់គ្នានិយាយមែន។ ជាក់ស្តែង ចំនួនមេរៀនដែលត្រូវសិក្សាមានច្រើន។  កញ្ញាក៏បានលើកឡើងផងដែរថា ការសិក្សាផ្នែកនេះទាមទារឲ្យប្រើប្រាស់នូវការស្រមៃច្រើនបន្តិច ព្រោះពេលដែលទើបចូលរៀនដំបូង គឺនិស្សិតត្រូវនៅតែសាលារៀនដោយមិនទាន់មានឱកាសទៅមន្ទីរពេទ្យនោះទេ ហេតុនេះហើយ រាល់ពេលដែលសាស្រ្តាចារ្យនិយាយ ឬណែនាំអំពីជំងឺអ្វីមួយ  និស្សិតចាំបាច់ស្រមៃមើលថាតើក្នុងករណីដែលមានជំងឺនោះកើតមានមែន តើមានទិដ្ឋភាពបែបណាខ្លះ? កញ្ញាក៏បន្ថែមទៀតថា របស់ខ្លះមិនអាចមើលឃើញដោយភ្នែកទទេនោះទេ ដែលជាការចាំបាច់ក៏ទាមទារនូវការស្រមៃដូចគ្នា។ មិនត្រឹមតែប៉ុណ្ណោះ និស្សិតគ្រប់រូបត្រូវមានការស្វែងយល់ពីមេរៀនឲ្យបានច្បាស់ ដោយមិនពឹងផ្អែកតែលើការទន្ទេញទាំងស្រុងនោះឡើយ ព្រោះថាការទន្ទេញនឹងមិនជួយឲ្យមានការចងចាំបានយូរនោះទេ។ អ្វីដែលមិនអាចខ្វះបាននោះ គឺ ការព្យាយាមស្រាវជ្រាវបន្ត ដើម្បីធ្វើការតាមដាននូវការវិវឌ្ឍថ្មីនៃផ្នែកវិទ្យាសាស្រ្ត តាមរយៈការអាននូវឯកសារ ឬប្រភពព័ត៌មានផ្សេងៗដែលមាននៅក្នុងសៀវភៅ ឬប្រព័ន្ធអ៊ីនធឺណែតឲ្យបានច្រើន។  ជាការពិតណាស់ ពេលដែលរៀននៅសាលា កម្រិតនៃការយល់ដឹងអាចនៅមិនទាន់គ្រប់គ្រាន់នៅឡើយ ហេតុនេះហើយ និស្សិតគួរណាស់តែអាន និងស្រាវជ្រាវបន្ថែមទៀតពេលដែលទៅដល់ផ្ទះ។ ប្រសិនបើនៅតែមិនទាន់សូវច្បាស់ទៀត ការពិភាក្សាជាមួយនឹងមិត្តភក្តិជាជម្រើសមួយដ៏ប្រសើរ ព្រោះថាបុគ្គលម្នាក់ៗមិនអាចចេះ ឬយល់ដឹងគ្រប់ដប់នោះទេ ប៉ុន្តែការពិភាក្សាបំពេញនូវចន្លោះគ្នាបែបនេះ នឹងជួយយ៉ាងហោចណាស់ក៏បានខ្លះៗដែរ។ គន្លឹះសាមញ្ញ តែប្រកបដោយប្រសិទ្ធភាពមួយទៀត គឺ ការត្រងត្រាប់ស្តាប់នូវការពន្យល់របស់សាស្រ្តាចារ្យឲ្យបានច្បាស់លាស់ ហើយមិនត្រូវរួញរាក្នុងការសាកសួរ រាល់ពេលដែលមានចម្ងល់ផ្សេងៗ។ និយាយដល់ត្រង់ចំណុចនេះ យុវតីវ័យក្មេងរូបសម្រស់ស្រស់សោភារូបនេះ ក៏បានលើកឡើងផងដែរថា  កញ្ញាមានការអរគុណចំពោះការផ្តល់នូវឱកាសដ៏ពិសេសរបស់ UP ដែលអាចឲ្យនិស្សិតធ្វើការសាកសួរ ក៏ដូចជាពិភាក្សាជាមួយនឹងសាស្រ្តាចារ្យ ដើម្បីដោះស្រាយនូវរាល់ចម្ងល់ ឬបញ្ហាផ្សេងៗ។ ឱកាសពិសេសផ្តល់ជូនដោយUP UP បានផ្តល់នូវលក្ខណៈងាយស្រួល ក៏ដូចជាសម្រួលដល់ការសិក្សារបស់និស្សិតផ្នែកវេជ្ជសាស្រ្តជាច្រើន។ជាក់ស្តែងសាស្រ្តាចារ្យ ដែលបម្រើការងារនៅ UP  សុទ្ធតែមានទឹកចិត្តទូលាយ និងតែងតែបង្កើតនូវភាពស្និទ្ធស្នាលនិស្សិតគ្រប់រូបដោយមិនប្រកាន់ខ្លួន ដែលជាឱកាសដ៏ល្អសម្រាប់ដល់និស្សិតធ្វើការពិភាក្សា ឬបញ្ចេញមតិយោបល់របស់ខ្លួនទាក់ទិននឹងមេរៀនដែលខ្លួនបានសិក្សា។ មិនត្រឹមតែសាស្រ្តាចារ្យនោះទេ បុគ្គលិកបម្រើការងារផ្នែកដទៃទៀត ក៏តែងតែរួសរាយរាក់ទាក់ជាមួយនឹងនិស្សិត ដែលជាហេតុជួយសម្រួលឲ្យទំនាក់ទំនងរវាងនិស្សិត និងសាលាមានភាពរលូន។  ស្របពេលជាមួយគ្នានេះផងដែរ UP តែងតែផ្តល់នូវឱកាសជូនដល់និស្សិតក្នុងការបញ្ចេញសមត្ថភាពផ្ទាល់ខ្លួនមិនថាតែនៅក្នុងថ្នាក់រៀន សាលា ឬនៅក្រៅប្រទេសនោះឡើយ។ ជាក់ស្តែង វីរីយ៉ា ផ្ទាល់ក៏ធ្លាប់បានចុះកម្មសិក្សា និងធ្វើបទបង្ហាញជាលក្ខណៈអន្តរជាតិអំពីវិស័យសុខាភិបាល នៅឯប្រទេសសិង្ហបុរីជាមួយនឹងនិស្សិត UP ចំនួន៤រូបទៀត ក្រោមការអញ្ជើញពីសំណាក់ សាកលវិទ្យាល័យមួយឈានមុខគេនៅអាស៊ី គឺ National University of Singapore (NUS) ។   អំពីសកម្មភាពក្រៅម៉ោងសិក្សានៅសាលា ចំពោះនិស្សិតវិស័យវិទ្យាសាស្រ្តសុខាភិបាល ចាំបាច់ណាស់ត្រូវឆ្លងកាត់នូវការចុះកម្មសិក្សានៅតាមស្ថាប័នផ្សេងៗទៅតាមជំនាញ ក៏ដូចជាមុខវិជ្ជាដែលខ្លួនសិក្សា។ ជាក់ស្តែង គ្លីនិកស្បែក និងឡាស៊ែBC តែងតែផ្តល់ឱកាសជានិច្ចចំពោះនិស្សិតឆ្នាំទី៥ ឬ៦ ដែលអាចឲ្យពួកគេធ្វើការហ្វឹកហាត់ខ្លួនឯងឲ្យស៊ាំនឹងបរិយាកាសការងារក្នុងការអនុវត្តផ្ទាល់ ព្រមទាំងអាចទទួលបាននូវថវិកាខ្លះផងដែរ។ ការចុះហ្វឹកហាត់ការងារបែបនេះពិតជាផ្តល់នូវអត្ថប្រយោជន៍ច្រើនណាស់ដល់និស្សិត ដែលរួមមាន បទពិសោធន៍ពិតៗក្នុងការធ្វើការងារជាមួយនឹងអ្នកជំងឺ ដែលជាលទ្ធផល គឺនិស្សិតមិនមានការភ័យខ្លាចពេលដែលចុះបំពេញការងារ ក៏ដូចជាជួបអ្នកជំងឺ។ សម្រាប់វីរីយ៉ាផ្ទាល់ ពេលម៉ោងទំនេរពីការសិក្សា កញ្ញាតែងតែធ្វើការងារនៅគ្លីនិក ដើម្បីទទួលបានចំណេះបន្ថែមពីលើទ្រឹស្តីដែលបានសិក្សាពីក្នុងថ្នាក់។ ក្រៅពីនេះ  កញ្ញាក៏ប្រាប់ដល់ហេលស៍ថាមផងដែរថា កញ្ញាក៏បានចូលរួមក្នុងការងារសង្គមដោយធ្វើការចុះទៅតាមសហគមន៍ផ្សេងៗ  និងការងារស្ម័គ្រចិត្តដោយធ្វើការពិនិត្យជំងឺជូនដល់ប្រជាជនដោយឥតគិតថ្លៃ តាមរយៈអង្គការ ឬគម្រោងជាតិ និងអន្តរជាតិមួយចំនួន។ ទន្ទឹមនឹងគ្នានេះ យុវតីរាងស្រលូនគួរឲ្យស្រលាញ់ក៏ឆ្លៀតធ្វើលំហាត់ប្រាណ ហើយកីឡាដែលកញ្ញាចូលចិត្តជាងគេ គឺកីឡាហែលទឹក ដើម្បីសុខភាពផ្លូវកាយ និងផ្លូវចិត្តផងដែរ។ កត្តានាំឲ្យការសិក្សាបានជោគជ័យ ចំពោះកញ្ញាផ្ទាល់ កត្តាដែលជម្រុញឲ្យការសិក្សារបស់និស្សិតពេទ្យទទួលបានជោគជ័យ គឺនិស្សិតគោរពតាម និងអនុវត្តតាមគុណតម្លៃទាំង៣របស់UP «គោរពខ្លួនឯង គោរពអ្នកដទៃ អភិវឌ្ឍសង្គម» ដែលការគោរពខ្លួនឯង គឺត្រូវខិតខំស្រាវជ្រាវ ឬរៀនបន្ថែមដោយខ្លួនឯង ហើយគោរពពេលវេលា និងពាក្យសន្យាដែលខ្លួនបាននិយាយ។ ចំណែកឯការគោរពអ្នកដទៃវិញ  គឺការឲ្យតម្លៃទៅលើពួកគេ តាមរយៈការផ្តល់សិទ្ធិ និងធ្វើការចែករំលែកជូនដល់គាត់។ កញ្ញាក៏បានបន្ថែមទៀតដែរថា «ដើម្បីក្លាយជាគ្រូពេទ្យល្អម្នាក់មិនមែនត្រឹមតែរៀនពូកែ ចេះខ្លាំងហើយអាចព្យាបាលគេជានោះទេ សំខាន់ គឺត្រូវមានឆន្ទៈមួយដែលមិនគិតលុយជាធំ។» គោលបំណងទៅថ្ងៃអនាគត ពេលដែលហេលស៍ថាម ធ្វើការសាកសួរអំពីគោលបំណងនៃថ្ងៃអនាគតវិញកញ្ញាក៏ផ្តើមបញ្ចេញនូវស្នាមញញឹមដ៏ស្រស់ មុននឹងផ្តល់នូវចម្លើយថា ក្នុងនាមជានិស្សិតផ្នែកវេជ្ជសាស្រ្តមួយរូប មុខរបរនាពេលអនាគត គឺគ្មានអ្វីក្រៅពីក្លាយខ្លួនជាវេជ្ជបណ្ឌិតមួយរូបនោះឡើយ។ ប៉ុន្តែ វីរីយ៉ា មិនត្រឹមតែចង់ធ្វើជាវេជ្ជបណ្ឌិតសាមញ្ញមួយរូបនោះទេ គឺ កញ្ញាប្រាថ្នាចង់ក្លាយជាបុគ្គលមួយរូបដ៏សំខាន់ និងសកម្មនៅក្នុងសង្គម ដើម្បីចូលរួមអភិវឌ្ឍ ក៏ដូចជាជួយស្តារនូវវិស័យសុខាភិបាលនៅក្នុងប្រទេសកម្ពុជា។  បន្ថែមពីលើនេះ យុវតីក្មេងវ័យ តែចិត្តគំនិតគួរឲ្យស្ញប់ស្ញែងរូបនេះ ក៏មានបំណងបង្កើតនូវមូលនិធិ និងមន្ទីរពេទ្យដែលអាចជួយអ្នកជំងឺក្រីក្រដោយឥតគិតថ្លៃព្រមទាំងឧបត្ថម្ភនូវគ្រឿងបរិក្ខារពេទ្យជូនដល់មន្ទីរពេទ្យផ្សេងៗទៅតាមលទ្ធភាពដែលអាចធ្វើបាន ដើម្បីធានាឲ្យបាននូវការទទួលបានសេវាព្យាបាល និងថែទាំសុខភាពជូនដល់ប្រជាជនកម្ពុជា ឲ្យដូចជាប្រជាជននៃជាតិសាសន៍ដទៃទៀត។ មិនត្រឹមតែប៉ុណ្ណោះ ប្រសិនបើមានឱកាស កញ្ញាក៏ចង់បម្រើការងារជាសាស្រ្តាចារ្យមួយរូប ដើម្បីធ្វើការចែករំលែកនូវបទពិសោធន៍ និងចំណេះដឹងនានាដែលខ្លួនមានទៅកាន់និស្សិតជំនាន់ក្រោយផងដែរ។  សារជូនដល់និស្សិតពេទ្យ «ត្រូវស្រលាញ់អ្វីដែលយើងធ្វើ មិនថាខ្លួនឯងកំពុងសិក្សា ឬធ្វើការងារអ្វីនោះទេចាំបាច់ណាស់ត្រូវមានចិត្តស្រលាញ់ និងឲ្យតម្លៃទៅលើវា។ ម្យ៉ាងទៀត ត្រូវតែគោរពអ្នកដទៃដោយមិនគិតតែពីប្រយោជន៍ផ្ទាល់ខ្លួនតែមួយមុខ។ អ្វីដែលមិនអាចភ្លេចបានទៀតនោះ គឺការតស៊ូប្រឹងប្រែងរៀនសូត្រ ដោយកុំចុះចាញ់បើទោះជាពិបាកយល់ ឬពិបាកចាំ ព្រោះថាមនុស្សគ្រប់គ្នាមិនអាចចាំបានទំាងអស់នោះទេ គឺត្រូវព្យាយាមមើលម្តងហើយម្តងទៀត ដោយមានភាពក្លាហានក្នុងការសួរ និងឆ្លើយរាល់ពេលដែលមានចម្ងល់។ ជាចុងក្រោយ ក៏សូមអរគុណគ្រប់គ្នាដែលតែងតែស្រលាញ់រាប់អាននាងខ្ញុំរហូតមក។» ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

អាជីព និងការសិក្សា សម្រាប់អ្នកវិជ្ជាជីវៈសុខាភិបាល
ចែករំលែក
  • Jan 18, 2017 |
  • 7 ឆ្នាំមុន |
  • 4.3K មើល

សេវាពិគ្រោះ និងព្យាបាលអ្នកជំងឺទឹកនោមផ្អែមនៃមន្ទីរពេទ្យព្រះកុសុមៈ

យោងតាមប្រសាសន៍របស់លោកសាស្ត្រាចារ្យជំនួយ ទូច ឃុន ជាអនុប្រធានមន្ទីរពេទ្យព្រះកុសុមៈ ទទួលបន្ទុកគ្រប់គ្រងមជ្ឈមណ្ឌលជម្ងឺទឹកនោមផ្អែមកម្ពុជា-កូរ៉េ បានឲ្យដឹងថា«មជ្ឈមណ្ឌលជម្ងឺទឹកនោមផ្អែមកម្ពុជា-កូរ៉េនៃមន្ទីរពេទ្យព្រះកុសុមៈ មានទទួលពិគ្រោះ និងព្យាបាលអ្នកជំងឺទឹកនោមផ្អែម ដោយមានកន្លែងទទួលរាល់អ្នកជំងឺទឹកនោមផ្អែមទាំងឡាយណា ដែលមានផលវិបាកឲ្យមកសម្រាក និងតាមដានជំងឺ២៤ម៉ោងលើ២៤ម៉ោង។» លោកសាស្រ្តាចារ្យក៏បញ្ជាក់ផងដែរថា ៖ «អ្នកជំងឺដែលបានមកតាមដាននៅមជ្ឈមណ្ឌលនេះ ត្រូវបានផ្តល់នូវការអប់រំ និងចំណេះដឹង ដែលទាក់ទងទៅនឹងជំងឺទឹកនោមផ្អែម ហើយធ្វើយ៉ាងណា ដើម្បីបញ្ចៀសនូវផលវិបាកដែលអាចកើតមានទៅថ្ងៃខាងមុខ។» មជ្ឈមណ្ឌលជម្ងឺទឹកនោមផ្អែមកម្ពុជា-កូរ៉េ នៃមន្ទីរពេទ្យព្រះកុសុមៈ រង់ចាំផ្តល់សេវាជូនបងប្អូនប្រជាជនទាំងអស់ដោយក្តីរីករាយ…ហើយក៏សូមជូនពរឲ្យប្រជាជនទាំងអស់ ដែលបានមកទទួលសេវាការព្យាបាលពីមជ្ឈមណ្ឌលជម្ងឺទឹកនោមផ្អែមកម្ពុជា-កូរ៉េ នៃមន្ទីរពេទ្យព្រះកុសុមៈឲ្យឆាប់ជាសះស្បើយទាំងអស់គ្នា… សម្រាប់ព័ត៌មានបន្ថែម និងការផ្តល់នូវមតិរិះគន់ក្នុងន័យស្ថាបនា សូមទំនាក់ទំនងទំព័រហ្វេសប៊ុករបស់មន្ទីរពេទ្យផ្ទាល់ មន្ទីរពេទ្យ ព្រះកុសុមៈ ឬទូរស័ព្ទលេខ 098 644 408

ជំងឺផ្សេងៗ ព្រឹត្តិការណ៍ និងព័ត៌មាន
ចែករំលែក
  • Jan 18, 2017 |
  • 7 ឆ្នាំមុន |
  • 2.4K មើល

បើបុរសចេះធ្វើម្ហូបទៀត កាន់តែមាននារីស្រឡាញ់?

ក្រៅពីរូបសម្បត្តិ សុភាពបុរសក៏អាចនឹងមានភាពទាក់ទាញជាមួយនឹងទេពកោសល្យ និងជំនាញផ្សេងៗរបស់ខ្លួន។ ជាក់ស្តែង ការចេះចម្អិនអាហារក៏ជាមន្តស្នេហ៍ទាក់ទាញមួយបែបផងដែររបស់បុរស....កាលពី៣០ឆ្នាំមុន មនុស្សប្រុសគិតថាការចម្អិនម្ហូបអាហារ គឺជាការងាររបស់ស្រ្តី។  តែបើក្រឡេកមកមើលបុរសសម័យថ្មីវិញ ៤៣%នៃពួកគេបានបែរមករកការចម្អិនម្ហូបអាហារដោយខ្លួនឯងនៅផ្ទះ នេះបើយោងតាមទិន្នន័យរបស់កាសែតវ៉ាស៊ីនតោនផុស។ តើមូលហេតុអ្វីបានជាបុរសភាគច្រើនផ្លាស់ប្តូរផ្នត់គំនិតរបស់ខ្លួនបែបនេះ? ការផ្លាស់ប្តូររបស់ស្រ្តី កាលពីមុនមនុស្សស្រីជាស្រ្តីមេផ្ទះ ហើយបុរសជាអ្នកប្រកបរបរផ្គត់ផ្គង់គ្រួសារ ដូចនេះស្រ្តីមានតួនាទីតែមួយគត់ គឺធ្វើការងារផ្ទះ។ ប៉ុន្តែមកទល់នឹងពេលនេះមានការផ្លាស់ប្តូរដ៏ធំមួយដោយស្រ្តីក៏មានភាពមមាញឹកក្នុងការប្រកបរបរផ្គត់ផ្គង់គ្រួសារដូចនឹងបុរសដែរ។ ទាំងនេះហើយទើបធ្វើឲ្យបុរសងាកមករកការធ្វើការងារផ្ទះដូចជាការចម្អិនម្ហូបអាហារ គឺដើម្បីជួយសម្រួលការងារស្រ្តី។ កត្តាទាក់ទងនឹងបុរសខ្លួនឯង     •បង្កើនភាពស្និទ្ធស្នាល ការចម្អិនម្ហូបអាហារដោយខ្លួនឯងនៅផ្ទះអាចចាត់ទុកថាជាការទុកពេលវេលាឲ្យខ្លួន ដើម្បីបង្កើនភាពស្និទ្ធស្នាលជាមួយមនុស្សជាទីស្រឡាញ់ និងក្រុមគ្រួសារតាមរយៈរសជាតិចេញពីទឹកចិត្តផ្ទាល់។     •សន្សំថវិកា ជាការពិតសម្រាប់ការរស់នៅម្នាក់ឯង ការទិញអាហារចម្អិនស្រាប់ពិតជាងាយ និងពេលខ្លះមានតម្លៃថោក ក៏ប៉ុន្តែភាគច្រើនក៏អាចធ្វើឲ្យប្រឈមមុខនឹងជំងឺជាច្រើនផងដែរ ដែលនឹងធ្វើឲ្យខាតថវិកាកាន់តែច្រើនឡើង។ ដោយឡែកទទួលទានម្ហូបចម្អិនស្រាប់ ត្រូវចំណាយថវិកាច្រើនដើម្បីទទួលបានបរិមាណអាហារគ្រប់គ្រាន់ និងមានទាំងគុណភាព ព្រមទាំងសុវត្ថិភាព។     •សុខភាព ប្រហែលនឹងចំណុចខាងលើ បន្ទាប់ពីចំណាយពេលធ្វើការអស់រយៈពេលពេញមួយថ្ងៃ បុរសមួយចំនួនបានជ្រើសយកការត្រឡប់មកផ្ទះដើម្បីចម្អិនអាហារសម្រាប់សុខភាព ក៏ដូចជាដើម្បីបង្កើនថាមពលឡើងវិញ និងចៀសផុតពីជំងឺផ្សេងៗផងដែរ ដោយពួកគាត់អាចកំណត់នូវបរិមាណអាហារដែលផ្ដល់ថាមពលគ្រប់គ្រាន់សម្រាប់ខ្លួនបាន។     •បង្ហាញពីភាពរឹងមាំ និងឯករាជ្យ ផ្ទុយពីការគិតថាមានតែស្រ្តីប៉ុណ្ណោះដែលត្រូវធ្វើការងារទាំងនេះ និងអាចចម្អិនអាហារដ៏មានឱជារស បុរសមួយចំនួនព្យាយាមបង្ហាញថាខ្លួនក៏អាចបង្កើតនូវឱជារសនេះដោយខ្លួនឯងដោយមិនចាំបាច់ពឹងពាក់នារីបានដែរ។     •បង្កើនភាពច្នៃប្រឌិតរបស់ខ្លួន ការចម្អិនអាហារក៏មិនខុសពីការងារដទៃដែរ ការធ្វើដោយការពេញចិត្ត និងទៅតាមចំណង់ចំណូលចិត្តនឹងនាំមកនូវគំនិតច្នៃប្រឌិតប្លែកៗជាច្រើន។ ភ្ជាប់ជាមួយស្នាដៃច្នៃប្រឌិតរបស់ពួកគេ បុរសសម័យថ្មីជាច្រើនក៏ចាត់ទុកការចម្អិនអាហារជាសិល្បៈមួយបែបដែលធ្វើឲ្យជីវិតរបស់គេមានភាពស្រស់ស្រាយបន្ថយភាពតានតឹង និងធ្វើឲ្យសុខភាពផ្លូវកាយ និងចិត្តរឹងមាំ។ ការពង្រឹងនូវចំណេះដឹងផ្នែកអាហារ ស្របពេលជាមួយនឹងការរីកចម្រើនខាងបច្ចេកវិទ្យានៃប្រព័ន្ធទំនាក់ទំនងសង្គមដូចជា​ Facebook ឬ Instagram និងការលូតលាស់វប្បធម៌នៃការអានសៀវភៅ ឬទស្សនាវដ្តីបានបង្កើនភាពងាយស្រួលក្នុងការបង្ហាញអំពីការធ្វើអាហារដែលអាចជម្រុញទឹកចិត្តបុរសៗឲ្យមានចំណង់ក្នុងការចម្អិនម្ហូបអាហារដោយពួកគាត់អាចអនុវត្តតាមការណែនាំក្នុងការចម្អិនអាហារតាមរយៈប្រព័ន្ធផ្សព្វផ្សាយទាំងនោះ។ ហើយពួកគេក៏អាចចែករំលែកស្នាដៃរបស់គេ និងលើកទឹកចិត្តដល់បុរសដទៃទៀតឲ្យចូលរួមចម្អិនម្ហូបអាហារដូចពួកគេដែរ។ សរុបមក…បុរសៗដែលបានយកការចម្អិនអាហារជាចំណង់ចំណូលចិត្តមួយ គួរតែបន្តការចូលចិត្តនេះដោយមិនចាំបាច់ខ្វល់ពីមជ្ឈដ្ឋានមួយចំនួនឡើយ ព្រោះការពិតវាជាសកម្មភាពទាន់សម័យមួយទៅវិញទេ។  រីឯអ្នកដែលមិនទាន់ចាប់អារម្មណ៍នឹងការចម្អិន ក៏គួរសាកល្បងល៎មើលថា អ្នកអាចទទួលបានអត្ថប្រយោជន៍ណាមួយក្នុងចំណោមខាងលើនេះ…ព្រោះថា…វាប្រៀបបានជាមន្តស្នេហ៍ទាក់ទាញមួយទៀតសម្រាប់សុភាពបុរសគ្រប់គ្នាផងដែរ… ដូចដែលគេតែងនិយាយតគ្នាថា «មនុស្សម្នាក់ៗមានភាពទាក់ទាញ ពេលដែលបញ្ចេញស្នាដៃ និងទេពកោសល្យរបស់ខ្លួន»…កុំលាក់បាំាងអី!!!​​បើចេះធ្វើម្ហូបអី បញ្ចេញថ្វីដៃឲ្យគេដឹងផង…

គន្លឹះសុខភាព
ចែករំលែក
  • Jan 17, 2017 |
  • 7 ឆ្នាំមុន |
  • 4.3K មើល

វេទិកាពិសេសសម្រាប់អ្នកមានក្តីស្រមៃ​ក្លាយជាសហគ្រិន

ប្រសិនបើជាអ្នកដែលកំពុងតែមានក្តីស្រមៃក្លាយខ្លួនជាសហគ្រិន ឬក្តីសុបិន្តបើកដំណើរការនូវអាជីវកម្មផ្ទាល់ខ្លួននោះ ឬក៏កំពុងតែជាសហគ្រិនវ័យក្មេង និងម្ចាស់អាជីវកម្មស្រាប់ ហើយមានបំណងស្វែងយល់បន្ថែមពីភាពជោគជ័យនៃវាគ្មិនកិត្តិយសដែលជារៀមច្បងដែលមានបទពិសោធន៍ស្រាប់ក្នុងវិស័យនេះនោះ គួរតែកុំរំលងនូវឱកាសមួយនេះអី… សូមស្វាគមន៍មកកាន់ «វេទិកាធុរកិច្ច ២០១៧» ក្រោមប្រធានបទចំនួន៤ដែលរួមមានដូចជា៖ «ការផ្លាស់ប្តូរផ្នត់គំនិត» ដោយលោក គឹម ចាន់ណា (ស្ថាបនិកនៃ Mindbook) ការផ្លាស់ប្តូរផ្នត់គំនិតពីភាពអកម្មទៅជាការផ្តួចផ្តើមក្នុងការពង្រីកនូវអាជីវកម្ម និងព្យាករណ៍ទុកជាមុននូវសកលដ៏ធំទូលាយ ជាផ្នែកមួយដ៏សំខាន់ក្នុងសហគ្រិនភាព។ លោកនឹងធ្វើបទបង្ហាញអំពីមតិយោបល់ដ៏មានប្រជាប្រិយភាពមួយ របស់ Robert Kiyosaki គឺ «The Cash flow Quadrant»។ «ទំនោរនៃអាជីវកម្ម» ដោយលោក ជី សិលា (នាយកប្រតិបត្តិនៃ Sabay Company)  ការយល់ដឹងអំពីនិន្នាការនៃសេដ្ឋកិច្ចពិភពលោក និងទំនោរនៃប្រជាជនទាក់ទិននឹងតម្រូវការ និងការចង់បាន ជាកត្តាមួយដ៏សំខាន់ក្នុងអភិវឌ្ឍសហគ្រាសអាជីវកម្ម ដើម្បីកាត់បន្ថយនូវហានិភ័យនៅតិចតាមដែលធ្វើបាន។ «ការចាប់ផ្តើមអាជីវកម្ម» ដោយលោក គង់ សូលីយ៉ា (សហស្ថាបនិកនៃ Joonaak Delivery) ការចាប់ផ្តើមអាជីវកម្មថ្មីមួយមិនត្រឹមតែជាកិច្ចការមួយងាយស្រួលនោះទេ ព្រោះថាផែនការអាជីវកម្មត្រូវឆ្លងកាត់ការអភិវឌ្ឍដោយមានភាពស្មុគស្មាញដោយដាក់បញ្ចូលនូវព័ត៌មានលម្អិត និងភាពដែលអាចអនុវត្តបាន។ ហេតុដូច្នេះហើយ ការយល់ដឹងអំពីអាជីវកម្មអាចនឹងនាំឲ្យមានលំនឹង ការគ្រប់គ្រងដ៏មានប្រសិទ្ធភាព ការគ្រប់គ្រងហិរញ្ញវត្ថុ ។ល។ កត្តាប្រកបដោយគុណតម្លៃទាំងនេះនឹងត្រូវបានបកស្រាយ ក៏ដូចជាបង្ហាញណែនាំចាពាក្យសម្រាយ និងងាយយល់។ «សារៈសំខាន់នៃស្លាកយីហោ» ដោយលោក សោម សម្បត្តិ (នាយកប្រតិបត្តិនៃCampaint) ធ្វើយ៉ាងណាអាចផ្សព្វផ្សាយនូវស្លាកយីហោរបស់ខ្លួនបាន ព្រោះស្លាកយីហោត្រូវបានចាត់ទុកជាកត្តាជម្រុញដ៏មានគុណតម្លៃមួយសម្រាប់អាជីវកម្មដែលជោគជ័យ ដោយវាដើរតួនាទីយ៉ាងសំខាន់ក្នុងការបញ្ចេញនូវប្រជាប្រិយភាព និងការទាក់ទាញអតិថិជននៅក្នុងទីផ្សារដែលកំពុងតែមានការប្រកួតប្រជែងខ្លាំងក្លា។ ជាក់ស្តែងណាស់ ប្រធានបទទាំង៤ដែលបានលើកឡើងខាងលើនេះ សុទ្ធតែជាកត្តាសំខាន់ដែលនឹងធ្វើឲ្យអាជីវកម្មរបស់លោកអ្នកទទួលបានជោគជ័យ ហើយសិក្ខាសាលានេះផងដែរ ជាឱកាសមួយយ៉ាងពិសេសសម្រាប់បងប្អូន និងប្រជាជនកម្ពុជា ដែលមានចំណាប់អារម្មណ៍ទៅលើមុខជំនួញអាជីវកម្ម ឬធុរកិច្ច ដើម្បីត្រៀមខ្លួនក្លាយជាសហគ្រិនវ័យក្មេងក្នុងសហសម័យថ្មីនេះ។ អ្នកចូលរួមទាំងអស់នឹងទទួលបាននូវការចែករំលែកបទពិសោធន៍  ទ្រឹស្តី និងគោលគំនិតសំខាន់ៗនៃភាពជោគជ័យពីសំណាក់វាគ្មិន ដែលធ្លាប់បានឆ្លងកាត់ការលំបាក និងភាពបរាជ័យជាច្រើនក្នុងវិស័យជំនួញ។ ស្របពេលជាមួយគ្នាផងដែរ លោកអ្នក ទទួលបានឱកាសបង្កើតបណ្តាញទំនាក់ទំនងរវាងសហគ្រិននានាផងដែរ។   កាលបរិច្ឆេទ ៖  ថ្ងៃអាទិត្យ ទី ២២ ខែមករា ឆ្នាំ២០១៧ វេលាម៉ោង    ៖  ១:០០ រហូតដល់ ៥:០០ ល្ងាច ទីកន្លែង       ៖  មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) សម្រាប់ព័ត៍មានបន្ថែម សូមទំនាក់ទំនងមកកាន់ ៖  •    ខៀន អានិកា (នៅវិទ្យាស្ថាន CamEd) 017 606 044 •    អ៊ឹង ហាំង (នៅវិទ្យាស្ថាន IFL) 086 639 914 •    គង់ គីរីវណ្ណ (អ្នករៀបចំកម្មវិធី) 017 494 968 or 010 494 941 •    ង៉ោ សុខចេង (Marketing Manager) 012 226 289 ឬ ចូលទៅកាន់ Facebook Page របស់ពួកយើង https://www.facebook.com/ibccambodia/?pnref=story ចុះឈ្មោះពេលនេះ ដើម្បីទទួលបានបន្តោងសោរដ៏ស្រស់ស្អាត ហើយតម្លៃតែ១៥,០០០រៀលប៉ុណ្ណោះ!!!

អាជីព និងការសិក្សា ព្រឹត្តិការណ៍ និងព័ត៌មាន
ចែករំលែក
  • Jan 17, 2017 |
  • 7 ឆ្នាំមុន |
  • 32.1K មើល

អ្វីខ្លះដែលផ្នែកHR ពិចារណាមុនដំឡើងប្រាក់ខែ ឬមុខតំណែង?

  តើអ្នកធ្លាប់ទទួលបានការដំឡើងប្រាក់ខែ ឬមុខតំណែងពីសំណាក់ប្រធានក្រុមហ៊ុនរបស់អ្នកទេ? អ្នកធ្លាប់សួរខ្លួនឯងទេថា ហេតុអ្វីបានជាមិត្តរួមការងារបានទទួលការដំឡើងប្រាក់ខែ ឬមុខតំណែង? ​តែអ្នកហាក់ដូចជាគ្មានឱកាសទទួលបានតំណែងទាំងនោះទាល់តែសោះ…ជាក់ស្តែង ការទទួលបានការសរសើរ ឬដំឡើងមុខតំណែង ឬប្រាក់ខែ ពីសំណាក់ប្រធានក្រុមហ៊ុនផ្ទាល់ ជាការឆ្លុះបញ្ចាំងពីសមត្ថភាព និងជំនាញរួមជាមួយនឹងគុណតម្លៃយ៉ាងជាក់លាក់មួយរបស់អ្នកដែលបានផ្តល់ទៅកាន់ក្រុមហ៊ុន ហើយវាក៏ជាលើកទឹកចិត្តក្នុងការបន្តកិច្ចការងាររបស់អ្នកតទៅមុខទៀតផងដែរ។ ហេលស៍ថាម សូមនាំជូនមិត្តអ្នកអាននូវគនឹ្លះសំខាន់ៗក្នុងការរៀបចំខ្លួនសម្រាប់ការទទួលបានការដំឡើងប្រាក់ខែ ឬមុខតំណែងដោយមានការចែករំលែកពីសំណាក់លោក អួង​ បូរិន ដែលបានបញ្ចប់ថ្នាក់បរិញ្ញាបត្រជាន់ខ្ពស់នៅសាកលវិទ្យាល័យន័រតុនក្នុងឆ្នាំ២០០៨ខាងផ្នែកគ្រប់គ្រងអាជីវកម្ម ហើយសព្វថ្ងៃលោកកំពុងបម្រើការងារជាប្រធានផ្នែកធនធានមនុស្សនៅ Aplus Consulting Co., Ltd និងជាសាស្រ្តាចារ្យមួយរូបនៅសាកលវិទ្យាល័យន័រតុនផងដែរ។ តើក្រុមហ៊ុននឹងសម្លឹងមើលលើអ្វីខ្លះជាលក្ខខណ្ឌក្នុងការដំឡើងប្រាក់ខែ ឬមុខតំណែងដល់បុគ្គលិកមួយរូប? ជាទូទៅ សម្រាប់ក្រុមហ៊ុនមានលក្ខខណ្ឌពីរក្នុងការពិចារណាដំឡើងប្រាក់ខែ ឬមុខតំណែង៖ • លទ្ធផលការងារផ្ទាល់ខ្លួនដែលយើងហៅថា KPI (Key Performance Indicator)៖ ជាធម្មតា បុគ្គលិកទាំងអស់ត្រូវធ្វើយ៉ាងណាឲ្យការងាររបស់ខ្លួនទទួលបានKIPពីរឆ្នាំជាប់ៗគ្នា ដូច្នេះ ទើបគាត់មានលទ្ធភាពទទួលបានការដំឡើងមុនគេមិនថាតែប្រាក់ខែ ឬមុខតំណែងនោះទេ។ • លទ្ធភាពមួយទៀត គឺការកែប្រែក្រុមហ៊ុន (Company Review)៖ កាលណាក្រុមហ៊ុនមានការប្រែប្រួលដោយមានភាពរីកចម្រើននោះ គេនឹងចាប់ផ្តើមធ្វើការពិនិត្យឡើងវិញនូវរចនាសម្ព័ន្ធរបស់ក្រុមហ៊ុនទាំងមូល ជាទូទៅគេធ្វើរយៈពេលមួយឆ្នាំម្តងហើយបុគ្គលិកទាំងអស់នឹងទទួលបានកាំប្រាក់ថ្មី។ប៉ុន្តែវាប្រែប្រួលទៅតាមបុគ្គល បើបុគ្គលិកមិនមានប្រសិទ្ធិភាពការងារល្អ ទោះបីជាក្រុមហ៊ុនមានការរីកចម្រើនក៏ដោយ បុគ្គលិកប្រភេទនេះក៏ពុំទទួលបានលទ្ធផលល្អដែរ។ តើបុគ្គលិកថ្មីមានឱកាសទទួលបានការដំឡើងតំណែង ឬប្រាក់ខែទេ? ប្រាកដណាស់ ពួកគាត់ពិតមានឱកាសទទួលបានលទ្ធភាពទាំងនោះ បើទោះបីជាពួកគាត់ជាបុគ្គលិកថ្មីក៏ដោយ តែសំណួរសួរថា «តើបុគ្គលិកថ្មីទាំងនោះ គឺថ្មីកម្រិតណា» ជាធម្មតាការក្លាយខ្លួនជាបុគ្គលិកឆ្នើម អ្នកទាំងនោះគួរតែបានបំពេញការងាររយៈពេល២ឆ្នាំយ៉ាងតិច ពីព្រោះក្នុងអំឡុងពេលនេះ ពួកគាត់នឹងស្វែងយល់ពីការងាររបស់ក្រុមហ៊ុនកាន់តែច្បាស់ ហើយការសម្រេចភារកិច្ចរបស់ខ្លួនក៏ទទួលបានជោគជ័យ និងល្អប្រសើរ សម្រាប់ទទួលបានតំណែង និងប្រាក់ខែថ្មីទៅតាមហ្នឹងដែរ។ ចុះចំណែកបុគ្គលិកដែលមិនទទួលបានការដំឡើងតំណែង ឬប្រាក់ខែវិញមានលក្ខណៈសម្បតិ្តយ៉ាងណាខ្លះដែរ? •  បុគ្គលិកពុំសម្រេចបាននូវគោលដៅ ដូច្នោះហើយ ក្រុមហ៊ុនពុំរវីរវល់ក្នុងការដំឡើងប្រាក់ខែ ឬតំណែងនោះទេ។ •  បុគ្គលិកពុំមានជំនាញបន្ទាប់បន្សំសមរម្យ (Soft Skills) ហើយមានអត្តចរិត និងអាកប្បកិរិយាមិនសូវល្អរួមមានដូចជា ការនិយាយស្តីមិនសមរម្យ ការមិនគោរពវិន័យ ឬដាក់ច្បាប់សុំឈប់សម្រាកច្រើនជាដើម។ ភាពទាំងអស់នោះ ជាភាពកំសោយមួយរបស់បុគ្គលិកដែលក្រុមហ៊ុនមិនពិចារណាក្នុងការដំឡើងតំណែង ឬប្រាក់ខែនោះទេ ហើយអ្វីដែលជាការប្រឈមនោះ គឺពួកគាត់អាចត្រូវបានក្រុមហ៊ុនដកមុខតំណែង និយាយរួម គឺដេញចេញពីការងារតែម្តង។ មានកត្តាអ្វីខ្លះដែលផ្នែកធនធានមនុស្សពិចារណា រាល់ពេលដំឡើងប្រាក់ខែ និងមុខតំណែងដល់បុគ្គលិក? មានកត្តា៤ដែលរួមមាន៖ «លទ្ធផលការងារ វិន័យ ការងារក្រុម​​ និង កត្តាក្រុមហ៊ុនទាំងមូល»។ បុគ្គលគ្រប់រូបគួរតែប្រកាន់ខ្ជាប់នូវកត្តាទាំង៤នេះ បើខ្លួនអ្នកពិតជាចង់ទទួលបានឱកាសផ្សេងៗក្នុងមុខតំណែងរបស់ខ្លួន។ រវាងបុគ្គលិកចាស់ និងបុគ្គលិកថ្មី តើមួយណាដែលមានឱកាសច្រើនជាង? ខ្ញុំយល់ថាវាឈរលើបរិបទ២យ៉ាង៖ • ផ្អែកតាមLogic៖ជាទូទៅ ស្ថាប័នការងារមិនសូវជាគិតគូរខ្លាំងពីរយៈពេលដែលបុគ្គលិកបំពេញការងារនោះទេ ប៉ុន្តែគេសង្កេតខ្លាំងទៅលើសមត្ថភាព ដែលបុគ្គលិកបានបំពេញការងារ ដូច្នេះឱកាសដូចគ្នា។ • ផ្អែកតាមEmotion៖ពាក្យថា«អារម្មណ៍»ត្រង់ចំណុចនេះ គឺចង់ឲ្យក្រឡេកមើលឡើងវិញថាមុខតំណែងនីមួយៗដែលបុគ្គលិកកំពុងបំពេញជាប្រភេទអ្វីតួយ៉ាង មុខតំណែងដូចជាCashier គឺមិនត្រូវការអ្វីដែលថ្មី ដែលតម្រូវឲ្យពួកគាត់នាំចូលដល់ក្រុមហ៊ុននោះទេ ក្រៅពីការគ្រប់គ្រងថវិកាឲ្យបានល្អ ដូច្នេះហើយ ការដំឡើងប្រាក់ខែ ឬមុខតំណែងផ្សេងៗ គឺត្រូវមើលផងដែរនូវតួនាទីនៃប្រភេទមុខតំណែងដែលនិយោជិកកំពុងបំពេញ។ តើមានគន្លឹះអ្វីខ្លះដែលនិយោជិកគួរប្រតិបត្តិ ដើម្បីក្លាយជាបុគ្គលិកប្រកបដោយសក្តានុពលមួយរូប? ខ្ញុំសូមចែករំលែកនូវគោលការណ៍៥យ៉ាង ដែលនិយោជិកអាចមានឱកាសទទួលបានតំណែងថ្មី និងល្អ រួមនឹងប្រាក់ខែដែលជាទីគាប់ចិត្ត៖ • ត្រូវយល់ពីអាជីវកម្មរបស់ប្រធានក្រុមហ៊ុនឲ្យបានច្បាស់៖ ជួនកាល បុគ្គលិកខ្លះមិនបានយល់ច្បាស់ពីគោលបំណងរបស់អតិថិជន និងដៃគូប្រកួតប្រជែងក្នុងក្រុមហ៊ុនដែលខ្លួនកំពុងបម្រើការនោះទេ ដែលនេះហើយជាចំណុចមួយដែលពួកគាត់មិនទទួលបានជោគជ័យ។ • ត្រូវឲ្យតម្លៃលើតួនាទី និងកាតព្វកិច្ចរបស់ខ្លួនឯង៖ គួរយល់ឲ្យច្បាស់នូវចំណែករបស់ខ្លួន សម្រាប់ការរីកចម្រើនរបស់ស្ថាប័ន ហើយព្យាយាមធ្វើឲ្យបានល្អបំផុត។ • ត្រូវមានទំនាក់ទំនងល្អជាមួយអ្នកជុំវិញខ្លួន៖ ត្រូវតែប្រកាន់ខ្ជាប់នូវភាពល្អរបស់ខ្លួនដែលធ្វើទៅកាន់អ្នកដទៃ ហើយត្រូវចៀសឲ្យបាននូវឥទ្ធិពលអាក្រក់ពីអ្នកដទៃ ដែលធ្វើឲ្យផ្លាស់ប្តូរដល់ខ្លួនអ្នកផ្ទាល់។ • ត្រូវបង្ហាញពីសមិទ្ធផលរបស់ខ្លួន៖ និយោជិកត្រូវយកលទ្ធផលជាមូលដ្ឋាន ហើយកាត់បន្ថយហេតុផលដែលធ្វើឲ្យការងារមិនបានសម្រេច ព្រោះវាជាអំណាចនៃបុគ្គលិកឆ្នើម។ • បុគ្គលិកគួរតែចេះបារម្ភពីនិរន្តភាពរបស់ក្រុមហ៊ុន៖ ត្រូវចេះផ្តល់គំនិត ឬយោបល់សម្រាប់ដោះស្រាយភាពលំបាកក្នុងក្រុមហ៊ុនក្នុងគោលបំណងឲ្យស្ថាប័ននៅតែអាចបន្តទៅមុខទៀត។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

អាជីព និងការសិក្សា
ចែករំលែក
  • Jan 16, 2017 |
  • 7 ឆ្នាំមុន |
  • 4.9K មើល

គន្លឹះកសាងកេរ្តិ៍ឈ្មោះ និងសក្តានុពលរបស់ស្ថាប័នអប់រំ ពីលោកឧកញ៉ាវេជ្ជបណ្ឌិត គួច ម៉េងលី

  វិស័យអប់រំចូលរួមចំណែកមួយផ្នែកធំក្នុងការកសាងអនាគតនៃសង្គមជាតិ ដែលពឹងផ្អែកសើ្ទរតែទាំងសុ្រងទៅលើគុណភាពនៃស្ថាប័នអប់រំ។ ដើម្បីចែករំលែកនូវគុណតម្លៃដ៏មានសារសំខាន់ដែលស្ថាប័នអប់រំមួយមិនអាចខ្វះបាន ហេលស៍ថាម ក៏បានជួបសម្ភាសន៍ផ្ទាល់ជាមួយនឹងលោកឧកញ៉ាវេជ្ជបណ្ឌិត គួច ម៉េងលី ដែលជាអតីតសាស្រ្តាចារ្យផ្នែកកាយវិភាគវិទ្យា ជីវវិទ្យា និងសុខភាពសាធារណៈទូទៅនៅសហរដ្ឋអាមេរិក ដែលបានត្រឡប់មកមាតុប្រទេសវិញក្នុងឆ្នាំ២០០២ ក្នុងនាមជាគ្រូពេទ្យស្ម័គ្រចិត្ត និងទីប្រឹក្សាផែ្នកសុខភាពសាធារណៈតាមអង្គការដៃគូសម្រាប់អភិវឌ្ឍ មុននឹងក្លាយជាសាស្រ្តាចារ្យ និងស្ថាបនិកព្រឹទ្ធបុរសមហាវិទ្យាល័យផ្នែកសុខភាពសាធារណៈនៅសាកលវិទ្យាល័យមួយនៅកម្ពុជា។ គួរបញ្ជាក់ផងដែរ លោកឧកញ៉ាក៏ជាស្ថាបនិកនៃវិទ្យាស្ថាន និងសាលារៀនអន្តរទ្វីបអាមេរិកាំង ដែលក្នុងស្ថាប័នរបស់លោកឧកញ៉ាក៏មានបន្ថែមនូវ Student Health Center សម្រាប់មើលថែទាំបឋមដល់សុខភាពទូទៅរបស់សិស្សក៏ដូចជាបុគ្គលិកសិក្សាទៀតផង។ ហេលស៍ថាម ៖ ចំពោះស្ថាប័នអប់រំដែលចាប់ផ្តើមដំបូង គួរតែមានគុណតម្លៃបែបណាខ្លះ ដើម្បីទទួលបានទំនុកចិត្តពីសំណាក់សិស្សានុសិស្ស ក៏ដូចជាអាណាព្យាបាល? ចាំបាច់ណាស់ ត្រូវតែមានការចុះឈ្មោះ និងទទួលស្គាល់គុណភាពជាផ្លូវការ ដោយបំពេញនូវសេវាកម្មស្របតាមស្តង់ដាអាជីពជាស្ថាប័នអប់រំ។ ស្របពេលជាមួយគ្នាផងដែរ គុណភាពគ្រូបង្រៀន និងបុគ្គលិកក៏ជាចំណុចដែលត្រុវយកចិត្តទុកដាក់ ដោយបន្ថែមពីលើចំណេះដែលគាត់មានស្រាប់ពិសេសគួរផ្តល់ជូននូវវគ្គបង្ហាត់បង្រៀន ដើម្បីធានាបាននូវគុណភាព និងក្រមសីលធម៌ល្អប្រកបដោយវិជ្ជាជីវៈ។ ចំពោះកម្មវិធីសិក្សា ត្រូវស្រប និងមានការអភិវឌ្ឍតាមក្រសួងអប់រំ និងស្តង់ដារអន្តរជាតិយ៉ាងណា កុំកៀបសង្កត់សិស្សពេក ព្រោះការដាក់សមា្ពធធ្ងន់ពេកទៅលើសិស្សដែលជាសសរទ្រូងនៃប្រទេសជាតិនាពេលអនាគតនឹងនាំមកនូវផលវិបាក គឺ សិស្សនឹង «ពូកែរៀនតែមិនពូកែចេះ រៀនច្រើនមិនពូកែចំណេះ ចេះច្រើនមិនយល់ដឹងច្រើន ហើយថែមទាំងមិនចេះអតា្ថធិប្បាយ»។ ហេលស៍ថាម ៖ ស្ថាប័នអប់រំមួយដែលមានគុណភាព និងសក្តានុពលមានលក្ខណៈសម្បតិ្តបែបណាខ្លះ? អ្វីដែលចម្បងជាងគេ គឺ ការទទួលស្គាល់គុណភាពពីស្ថាប័នជាតិហើយទីតាំង និងបរិស្ថានទៀតសោតចាំបាច់ត្រូវតែមានសុវត្ថិភាព និងអំណោយផលដល់ការសិក្សារបស់សិស្ស។ មិនត្រឹមតែប៉ុណ្ណោះ អគារសិក្សាគយរតែមានបំពាក់នូវគ្រឿងបរិក្ខារប្រកបដោយបច្ចេកវិទ្យា និងហេដ្ឋារចនាសម្ព័ន្ធតាមបែបទំនើប និងទាន់សម័យកាល។ ឯកម្មវិធីសិក្សាត្រូវតែស្របតាមស្តង់ដាររបស់ក្រសួង រួមផ្សំនឹងកម្មវិធីក្រៅម៉ោងសិក្សាឲ្យបានច្រើនសិក្សាឲ្យបានច្រើន ដើម្បីឲ្យសិស្សរៀនដោយភាពសប្បាយរីករាយ និងមានចំណូលចិត្តពិត។ ទន្ទឹមនឹងគ្នានេះផងដែរ ប្រព័ន្ធគ្រប់គ្រងក្នុងស្ថាប័នត្រូវតែសុក្រឹតយុត្តិធម៌ ដោយចៀសវាងដាច់ខាតនូវវប្បធម៌ពុករលួយដែលលក់ពិន្ទុ ឬសញ្ញាបត្រ ដោយមិនខ្វល់ខ្វាយពីគុណភាពអប់រំ ឬអនាគតរបស់សិស្ស។ កត្តាសំខាន់មួយទៀត គឺ លោកគ្រូ អ្នកគ្រូចាំបាច់ស្រឡាញ់សិស្សឲ្យដូចកូនរបស់ខ្លួនប្រៀបដូចពាក្យដែលគេតែងនិយាយថា «ឳពុកម្តាយទី២របស់សិស្សគឺ គ្រូ ហើយផ្ទះទី២របស់សិស្ស គឺសាលារៀន»។ ពិសេសគ្រូត្រូវមានភាពអំណត់អត់ធ្មត់ និងការបំពេញតួនាទីជាគ្រូបង្រៀនប្រកបដោយចំណេះដឹងសីលធម៌ និងចិត្តសាស្រ្តខ្ពស់ វិន័យនិងសណ្តាប់ធ្នាប់ត្រឹមត្រូវ ហើយចាំបាច់ត្រូវតាមដានការសិក្សារបស់សិស្ស ពិសេសត្រូវផ្សារភ្ជាប់ទំនា ក់ទំនងជាមួយនឹងអាណាព្យាបាលឲ្យបានត្រឹមត្រូវ ព្រោះវាជាកត្តាដែលមិនអាចខ្វះបាន។ ហេលស៍ថាម ៖ នាមជាស្ថាប័នអប់រំដែលមានសក្តានុពលមួយ តើមានគុណសម្បត្តិ និងគុណវិបត្តិអ្វីខ្លះ? គុណសម្បត្តិដែលធំជាងគេ គឺនឹងត្រូវបានគេទទួលស្គាល់ច្រើន ស្របពេលដែលចូលរួមចំណែកក្នុងការកសាងធនធានមនុស្ស ដែលមានតួនាទីក្នុងការបម្រើសង្គមជាតិឲ្យមានការលូតលាស់ ដែលសកម្មភាពនេះពិតជារួមចំណែកក្នុងការកសាងសង្គម ឬយុវជនឲ្យប្រទេសជាតិយើងពិតប្រាកដ ព្រោះថាវប្បធម៌នៃការចែករំលែកនូវចំណេះមានអត្ថន័យខ្លឹមសារជាងអ្វីៗទាំងអស់ បើយើងក្រឡេកមកមើលមួយផ្នែកទៀតនោះ គឺលទ្ធភាពក្នុងការប្រមូលចំណូលក្នុងកម្រិតមួយសមរម្យដើម្បីឧបត្ថម្ភ បណ្តុះបណ្តាល និងផ្តល់ជូននូវអត្ថប្រយោជន៍ផ្សេងៗជូនដល់បុគ្គលិក និងលោកគ្រូអ្នកគ្រូ។ ចំពោះគុណវិបត្តិវិញ គឺប្រាកដណាស់មានផលលំបាកច្រើនក្នុងការគ្រប់គ្រងដោយមានប្រភេទមនុស្សច្រើននៅក្នុងស្ថាប័ន។ ពុំនោះទៀតសោត ដៃគូប្រកួតប្រជែង ក៏មានច្រើនដែរ រីឯការចំណាយក៏មិនតិចដែរ ប្រៀបបានដូចនឹងពាក្យដែលគេនិយាយថា«ទូកធំ ក្តោងធំ»។ ហេលស៍ថាម ៖ នៅក្នុងប្រទេសកម្ពុជា តើប្រព័ន្ធអប់រំបែបណារួមចំណែកពិតក្នុងការអភិវឌ្ឍសង្គម? ដោយសារតែសង្គមកម្ពុជានាពេលបច្ចុប្បន្ន មានតម្រូវកា រនៃការវិនិយោគលើយុវជនច្រើនតាមរយៈរូបភាពផ្សេងៗ ព្រោះពួកគេជាសសរទ្រូងនៃប្រទេសជាតិ និងបង្កឲ្យមានបញ្ញវន្តលើកស្ទួយដល់អនាគតនៃជាតិខេមរា។ វាជាការពិតដែលថា «បច្ចុប្បន្នយុវជនត្រូវការយើង អនាគតយើងនឹងត្រូវការយុវជនវិញ»ហេតុនេះហើយ ប្រព័ន្ធអប់រំត្រូវតែអនុវត្តតាមកម្មវិធីសិក្សារបស់ក្រសួងឲ្យបានពេញលេញ ដោយមិនឆក់កណ្តៀត ឬកេងប្រវ័ញ្ចម៉ោងសិក្សា ព្រមទាំងមានវិន័យតឹងរឹងចំពោះអវត្តមាន តែមិនត្រូវជិះជាន់ ឬរំលោភបំពានលើសិទ្ធិនោះ ឡើយ។ អ្វីដែលសំខាន់ គឺថាការបង្រៀនត្រូវតែឲ្យចេះពិតប្រាកដ ក្នុងកម្រិតមួយដែលអាចយកទៅអនុវត្ត និងប្រើប្រាស់បានជាក់ស្តែង ដើម្បីលុបបំបាត់នូវភាពល្ងង់ខ្លៅ ក៏ដូចជាអនក្ខរភា ព។ ជាក់ស្តែង «មនុស្សចេះ គឺមិនល្ងង់ មិនឲ្យគេធ្វើបាប មិនរងសម្ពាធ ហើយក្លាហាន ជាហេតុមិនឲ្យគេមើលងាយ ហើយក៏មានទំនុកចិត្ត និងហ៊ានប្រឡូកក្នុងសង្គមប្រកបដោយជោគជ័យ» ។ ហេលស៍ថាម ៖ តើលោកឧកញ៉ាមានសារអ្វីខ្លះចែកជូនដល់យុវជនជំនាន់ក្រោយ? ជាចម្បង ត្រូវដឹងថាខ្លួនជានរណា? កំពុងធ្វើអ្វី? ហើយអ្វីដែលធ្វើមានសារសំខាន់អ្វីខ្លះ? បន្ទាប់មក ចាំបាច់ត្រូវរៀបចំផែនការឲ្យបានច្បាស់លាស់ អនុវត្ត តាមដាន កែប្រែ និងអភិវឌ្ឍ ព្រមទាំងរៀបចំឡើងវិញដោយធ្វើកា រដឹកនាំខ្លួនឯងឲ្យបានថ្លៃថ្លា ដឹកនាំគ្រួសារឲ្យបានត្រជា ក់ត្រជុំ ដើម្បីជាទុនក្នុងការដឹកនាំគ្រួសារ និងសង្គមជាតិឲ្យមានការរីកចម្រើន។ យ៉ាងណាមិញក្នុងជីវិតម្នាក់ៗមិនអាចចៀសវាងនូវកំហុសនោះទេ តែបើខុស ត្រូវចេះទទួលស្គាល់កំហុស និងកែប្រែឡើងវិញ។ រាល់ពេល មុននឹងនិយាយទិតៀនអ្នកដទៃ ត្រូវសួរខ្លួនឯងសិនថា តើចាំបាច់ឬទេ? មានប្រយោជន៍ទេ? ព្រោះថា «សម្តីមួយម៉ាត់សម្លាប់គេមួយជីវិត»។ អ្វីដែលរឹតតែមិនអាចខ្វះបាននោះ គឺភាសា៧ ដែលរួមមាន ភាសាជាតិ ភាសាសាកល(អង់គ្លេស ) ភាសាបច្ចេកវិទ្យា ភាសាបច្ចេកទេស ឬជំនាញរបស់ខ្លួន ភាសាទំនាក់ទំនង ឬការទូត ភាសាកាយវិការ (Body Language) និងភាសាអាស៊ាន (វប្បធម៌)។ បន្ថែមពីលើជំនាញដែលសិក្សា ជំនាញទន់ និងអត្តចរិតឫកពាក៏សំខាន់ណាស់ដែរ ជាក់ស្តែង គឺចៀសវាងនូវការប្រកា ន់ឫកឬ ចង្អៀតចង្អល់ ហើយគួរតែកុំលាក់ចំណេះ កុំត្រែះគំនិត បើកចំហបេះដូង ដើម្បីទទួលយកនូវគំនិតថ្មីរបស់អ្នកដទៃ។ ចូរចងចាំជានិច្ចថា ត្រូវខិតខំរៀនសូត្រ ឲ្យចំណេះដឹងបានដូច«បឹងពោរពេញដោយត្រី ស្រីពោរពេញដោយប្រុស សម្រ ស់ពោ រពេញដោយស្នេហ៍» ហើយការដើរលេងនៅក្រៅប្រទេសក៏បន្ថែមនូវចំណេះដឹងសកល ដែលនាំឲ្យបានស្គាល់ និងស្វែងយល់ពីពិភពលោកខាងក្រៅនោះ គឺជាឱកាសក្នុងការនាំអនាគតមកកាន់បច្ចុប្បន្នសម្រាប់សង្គមកម្ពុចាឲ្យកាន់តែខ្ពស់ជាងមុនដែរ។ ជាចុងក្រោយ គ្រប់ពេលដែលជួបប្រទះនឹងបញ្ហាសូមកុំមើលរំលងវា តែតូ្រវ «មើលបញ្ហា ឲ្យឃើញជាបញ្ហា ទើបយើងមិនមានបញ្ហា» ។ ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

អាជីព និងការសិក្សា
ចែករំលែក
  • Jan 15, 2017 |
  • 7 ឆ្នាំមុន |
  • 3.8K មើល

#healthcomesfirst

មិនថាខ្ញុំ មិនថាអ្នក សុទ្ធតែមានកាតព្វកិច្ចប្រចាំថ្ងៃត្រូវបំពេញ ខំណាស់…រាល់ថ្ងៃ…ហើយជួនកាលក៏ឈានដល់យប់ទៀត…. បើទោះជាពេលខ្លះ ដល់ថ្នាក់ធ្លាក់ខ្លួនឈឺ ក៏សឹងតែមិនហ៊ានឈប់សម្រាកផងព្រោះពេលដែលមានទម្លាប់ប្រឹងប្រែងយូរៗទៅ ក៏កើតមានផ្នត់គំនិតមួយថា «គេងទៅដូចខាតពេល ញ៉ាំអីក៏ខាតពេលដែរ…»រហូតដល់ផ្តល់តម្លៃលើសុខភាពតិចៗទៅ ក៏ដឹងហើយថា គោលដៅជីវិតសំខាន់ណាស់សម្រាប់ម្នាក់ៗ ប៉ុន្តែ…ធ្លាប់នឹកគិតដល់ផលវិបាក និងការប្រឈមនៃបញ្ហាសុខភាពផ្សេងៗទេ៎? ចង់ ឬមិនចង់…ក៏ត្រូវចំណាយប្រាក់មួយភាគធំទៅលើការព្យាបាល ប្រសិនបើមិនថែទាំខ្លួនបានល្អប្រសើរនោះ សាកគិតមើលម្តងទៀត៎!!! ខំប្រឹងរកប្រាក់ពីព្រលឹមទល់ព្រលប់រាល់ថ្ងៃ ដើម្បីអ្វី? ដើម្បីកសាងសុភមង្គលរបស់ខ្លួន និងមនុស្សជាទីស្រលាញ់? ឬ ទុកសម្រាប់តែព្យាបាលខ្លួន? ពាក្យចាស់គំរិល តែអត្ថន័យនៅតែខ្លឹម «ការពារប្រសើរជាងព្យាបាល» ពិតជាមិនអាចប្រកែកបានឡើយ ចាំណា៎…«មិនថារវល់ម្តេចក្តី ទោះយប់ ឬថ្ងៃ ត្រូវមានពេលសម្រាក» ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

កំសាន្ត គ្រួសារ​ និងទំនាក់ទំនង
ចែករំលែក
  • Jan 15, 2017 |
  • 7 ឆ្នាំមុន |
  • 6.2K មើល

Menu ងាយៗ សម្រាប់អ្នកចង់សម្រកទម្ងន់

របបអាហារគឺសំខាន់ស្រាប់ហើយ ប្រសិនបើនិយាយដល់ការសម្រកទម្ងន់ ដូចនេះអ្នកត្រូវស្វែងរករូបមន្តអាហារ ឬភេសជ្ជៈដែលមានប្រសិទ្ធភាព និងមិនផ្តល់ផលប៉ះពាល់ដល់សុខភាពរបស់អ្នក ដើម្បីទទួលបានជោគជ័យលើគម្រោងនេះ។ សាកល្បង Menu ដែល ណែនាំដោយ Health Time   ហើយតាមដានលទ្ធផលទាំងអស់គ្នា… ១. ទឹកក្រូចឆ្មារលាយជាមួយគ្រាប់ជី គុណសម្បត្តិ៖ ផលិតផលធម្មជាតិទាំងពីរមានគុណប្រយោជន៍រៀងខ្លួន ក្នុងការជួយសម្រកទម្ងន់ និងជួយឲ្យអ្នក្មេងជាងវ័យ។ នៅពេលលាយសារធាតុទាំងពីរចូលគ្នា វាបានបង្កើនប្រសិទ្ធភាព និងរសជាតិទ្វេឡើង។ អ្នកអាចញ៉ាំបានគ្រប់ពេលដែលអ្នកស្រេកទឹក ពិសេសគឺនៅពេលព្រឹក។ • គ្រាប់ជី៖ មានតួនាទីជាពពួកប្រឆាំងអុកស៊ីតកម្ម និងជាប្រភពនៃសារធាតុសរសៃ (Fiber) ព្រមទាំងជាតិទឹកយ៉ាងសំខាន់សម្រាប់អ្នកដែលចង់សម្រកទម្ងន់។ តាមរបាយការណ៍របស់ Harvard Medical School ការញ៉ាំសារធាតុសរសៃអាចជួយសម្រកទម្ងន់បាន ដោយមិនចាំបាច់បន្ថយរបបអាហាររាល់ថ្ងៃក៏បាន។ អ្នកអាចញ៉ាំគ្រាប់ជីជំនួសអាហារពេលព្រឹកផងដែរដោយវាផ្តល់ឲ្យអ្នកនូវភាពឆ្អែតបានយូរ និងកាត់បន្ថយចំណង់អាហារ។ • ក្រូចឆ្មារ៖ សម្បូរទៅដោយ វីតាមីន សារធាតុរ៉ែពពួកប្រឆាំងអុកស៊ីតកម្ម និងជាប្រភពថាមពលសម្រាប់អ្នកកំពុងសម្រកទម្ងន់ដូចគ្នា។ វាជួយពង្រឹងប្រព័ន្ធការពាររាងកាយ និងកាត់បន្ថយកូឡេស្តេរ៉ូលក៏ដូចជាជួយថែរក្សស្បែករបស់អ្នកពីស្នាមជ្រីវជ្រួញ និងជម្រុញឲ្យខ្លួនរបស់អ្នកផលិតនូវពពួកកូឡាជែន។ វិធីធ្វើ៖ លាយគ្រាប់ជី១ស្លាបព្រាបាយ និងក្រូចឆ្មាមួយចំហៀង ក្នុងទឹកមួយកែវ រួចទុករយៈពេល១០នាទីមុនពេលពិសា ដើម្បីឲ្យគ្រាប់ជីរីកបានល្អ ហើយអ្នកអាចបន្ថែមទឹកកកអនាម័យតាមតែអ្នកចង់បាន។ ២. ទឹកក្រូចពោធិ៍សាត់ច្របាច់ ក្រូចឆ្មារ និងទឹកឃ្មុំ គុណសម្បតិ្ត៖ លាយកូ្រចឆ្មារ និងកូ្រចពោធិ៍សាត់កាន់តែធ្វើឲ្យកើនឡើងនូវបរិមាណ និងប្រសិទ្ធិភាពរបស់វីតាមីនC ដែលជួយអ្នកឲ្យសម្រកទម្ងន់បានលឿន។ គួរញ៉ាំមុនពេលទទួលទានអាហារពេលព្រឹកដើម្បីបានប្រសិទ្ធភាពកាន់តែល្អ។ • ទឹកឃ្មុំ៖ ជាប្រភេទស្ករធម្មជាតិដែលមានប្រូតេអ៊ីន ជាតិទឹក ថាមពល ជាតិសរសៃ វីតាមីន និងសារធាតុរ៉ែមួយចំនួនផងដែរ។ វាអាចជួយកាត់បន្ថយហានិភ័យនៃជំងឺបេះដូងចំពោះអ្នកលើសទម្ងន់ កាត់បន្ថយកូឡេស្តេរ៉ូល និងមិនធ្វើឲ្យអ្នកឡើងទម្ងន់ បើប្រៀបធៀបនឹងប្រភេទស្ករដទៃ។ ម្យ៉ាងទៀត ទឹកឃ្មុំមានតួនាទីពន្លឿនការធ្វើមេតាបូលីសខ្លាញ់ និងកាត់បន្ថយអ័រម៉ូនស្ត្រេសផងដែរ។ វិធីធើ្វ៖ ច្របាច់កូ្រចឆ្មារ ១ចំណិត ក្នុងទឹកកូ្រចពោធិ៍សាត់ច្របាច់២កូនកែវ រួចបន្ថែមស្លឹកជីអង្កាម ២ ឬ៣ទង អំបិលមួយភាគបីស្លាបព្រាបាយ និងចុងក្រោយថែមទឹកឃ្មុំមួយស្លាបព្រាបាយហើយយកវាទៅដាក់ក្នុងម៉ាស៊ីនក្រឡុក និងអាចលាយជាមួយទឹកកកទៀតក៏បាន។ ៣. ក្រូចឆ្មារ ត្រសក់ និងខ្ញីត្រាំទឹក គុណសម្បតិ្ត៖ កូ្រចឆ្មារ ត្រសក់ និងខី្ញ សុទ្ធតែជាបន្លែដែលអ្នកអាចរកបានក្នុងផ្ទះបាយរបស់អ្នក និងមានប្រយោជន៍ជាច្រើន។ បន្ថែមលើការញ៉ាំទឹកធម្មតា យើងគ្រាន់តែបន្ថែមចំណិតបន្លែខាងលើ ដើម្បីពង្រឹងប្រព័ន្ធការពាររាងកាយ និងអាចជួយសម្អាតប្រព័ន្ធរំលាយអាហារ ជាពិសេសជួយដល់អ្នកដែលចង់សម្រកទម្ងន់តែម្តង។ • ត្រសក់៖ ជាប្រភេទបន្លែដែលមានកាឡូរីតិចជាងគេ ដោយចំណិតត្រសក់មួយកូនកែវមានតែ១៤កាឡូរីប៉ុណ្ណោះ មានជាតិទឹកជាង៩០ភាគរយដែលវាអាចផ្តល់ជាតិទឹកគ្រប់គ្រាន់ដល់សារពាង្គកាយ។ លើសពីនេះទៀត ត្រសក់មានផ្ទុកនូវ វីតាមីនK វីតាមីនC ប៉ូតាស្យូម និងម៉ាញេស្យូម ដែលមានតួនាទីប្រឆាំងជាតិពុល និងបន្ថយជាតិខ្លាញ់។ • ខ្ញី៖ ជាប្រភេទបន្លែដែលមានតួនាទី ប្រឆាំងអុកស៊ីតកម្ម និងជួយបំបាត់ជាតិពុលពីរាងកាយ។ វាមិនគ្រាន់តែជួយដល់ការកាត់បន្ថយកូលេស្តេរ៉ូលទេ តែវាក៏បានជួយរក្សាកម្តៅក្នុងខ្លួន ដោយជួយដុតបំផ្លាញខ្លាញ់តាមរយៈការបង្កើនការធ្វើមេតាបូលីសលើសពីធម្មតាបានដល់ទៅ២០ភាគរយទៀតផង។ វិធីធើ្វ៖ ដាក់ចំណិតកូ្រចឆ្មារមួយផែ្ល ចំណិតត្រសក់មួយផ្លែ និងខ្ញី៣-៤ចំណិត ទៅក្នុងថូទឹក រួចបន្ថែមទឹកបរិសុទ្ធ ១.៥លីត្រទៅក្នុងនោះហើយទុករយៈពេល ១០នាទីមុនពេលយកទៅញ៉ាំ។ បនា្ទប់ពីញ៉ាំទឹកអស់ អ្នកអាចញ៉ាំកាករបស់វា ឬបនែ្ថមទឹកដើម្បីញ៉ាំទៀតក៏បាន។ អ្នកក៏អាចដាក់វាក្នុងទូរទឹកកកសម្រាប់ញ៉ាំបានគ្រប់ពេលផងដែរ។ ថាងាយ គឺងាយហើយ!!!​ កុំបង្អង់យូរអី…ចាប់ផ្តើមជ្រើសរើសរូបមន្តដែលងាយស្រួល ទៅតាមចំណង់ចំណូលចិត្តរបស់អ្នក និងបរិភោគវាជាប្រ​ចាំ ដើម្បីទទួលបានអត្ថប្រយោជន៍ជាច្រើនរបស់វា…មិនត្រឹមតែដើម្បីឲ្យគីឡូស្រកតិចនោះទេ គឺដើម្បីសុខភាពល្អផងដែរ… ព្រួយមួយបាញ់បានសត្វពីរបែបនៀក នៅចាំអីទៀតហ៎??? ©2017 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

វីតាមីន & អាហារូបត្ថម្ភ ស្រក-ឡើង​​ ទម្ងន់​
ចែករំលែក
Top