Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
ភាសាខ្មែរ ភាសាខ្មែរ
English English
ចូលគណនី
Createx Logo
  • Apr 09, 2018 |
  • 7 ឆ្នាំមុន |
  • 3.9K មើល

សិក្ខាសាលាអំពី«ជំងឺទឹកនោមផ្អែមប្រភេទ ២» ពិសេសសម្រាប់និស្សិតពេទ្យគ្រប់ជំនាញ គ្រប់ឆ្នាំសិក្សា

​ដើម្បីជាចំណែកមួយក្នុងការផ្តល់នូវចំណេះដឹងបន្ថែមអំពី«ជំងឺទឹកនោមផ្អែមប្រភេទ ២»ជូនដល់អនាគតអ្នកប្រកបវិជ្ជាជីវៈសុខាភិបាល ក្រុមហ៊ុនហេលស៍ថាមខប ក្រោមកិច្ចសហការឧបត្ថម្ភពីសំណាក់មន្ទីរពិសោធន៍វេជ្ជសាស្ត្រ ម៉េឌីថិច (Medi-Tech Laboratory) និង មន្ទីរពិសោធន៍វេជ្ជសាស្ត្រ សុភមង្គល (Sopheak Mongkul Medical Laboratory) នឹងរៀបចំនូវសិក្ខាសាលាដ៏ពិសេសមួយសម្រាប់និស្សិតសុខាភិបាល គ្រប់ឆ្នាំសិក្សា គ្រប់ជំនាញ និងគ្រប់សាកលវិទ្យាល័យទាំងអស់ ជាពិសេសនិស្សិតវេជ្ជសាស្ត្រ គិលានុបដ្ឋាក និងគ្រូពេទ្យឯកទេសទូទៅ។  គួរបញ្ជាក់ផងដែរថា សិក្ខាសាលានេះនឹងមានការផ្តោតសំខាន់ទៅលើប្រធានបទធំៗចំនួន ២សំខាន់ រួមមាន៖ -ប្រធានបទ ៖ ការគ្រប់គ្រងជំងឺទឹកនោមផ្អែមប្រភេទ ២ វាគ្មិន ៖ វេជ្ជបណ្ឌិត ចន្ថា តុលា ឯកទេសជំងឺទឹកនោមផ្អែម ក្រពេញអរម៉ូន បម្រើការនៅមន្ទីរពេទ្យ ព្រះកុសុមៈ និងមជ្ឈមណ្ឌលព្យាបាលជំងឺទឹកនោមផ្អែម -ប្រធានបទ ៖ តេស្តមន្ទីរពិសោធន៍ដ៏មានគុណប្រយោជន៍ក្នុងការគ្រប់គ្រងជំងឺទឹកនោមផ្អែមប្រភេទ ២ វាគ្មិន ៖ វេជ្ជបណ្ឌិត ស៊ុំ សត្ថា វេជ្ជបណ្ឌិតឯកទេសជំងឺទឹកនោមផ្អែមប្រចាំនៅ មជ្ឈមណ្ឌលព្យាបាលជំងឺទឹកនោមផ្អែម អ្វីដែលរឹតតែពិសេសនោះ គឺអ្នកចូលរួមទាំងអស់នឹងមានឱកាសទទួលបានកាដូពិសេសពីសំណាក់ក្រុមការងារអ្នករៀបចំ និងក្រុមហ៊ុនឧបត្ថម្ភផងដែរ ជាពិសេស គឺមានឱកាសធ្វើការសាកសួរបន្ថែមពីប្រធានបទទាំង២ខាងលើ ក្រោយពីបទបង្ហាញរបស់វាគ្មិនជាវេជ្ជបណ្ឌិតឯកទេសទាំង២រូបផងដែរ។ កាលបរិច្ឆេទ ៖ ថ្ងៃសៅរ៍ ទី២៨ ខែមេសា ឆ្នាំ២០១៨ ពេលវេលា ៖ ម៉ោង៧:៣០ ដល់ ម៉ោង ១១:០០ ព្រឹក ទីកន្លែង ៖ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) បន្ទប់លេខ ៧-៨ បញ្ជាក់ ៖ ការចូលរួមស្តាប់ គឺមិនគិតថ្លៃ ដោយរាប់បញ្ចូលទាំងអាហារសម្រន់ តែចំនួនកន្លែងមានកំណត់ ប្រសិនបើអ្នកមានចំណាប់អារម្មណ៍ ហើយមានបំណងចុះឈ្មោះចូលរួម សូមប្រញាប់រួសរាន់ ចូលទៅកាន់តំណនេះ Diabetes Educator Seminar Registration Form   សម្រាប់ព័ត៌មានបន្ថែម៖  Facebook Event : Diabetes Educator Seminar Tel : 077 888 075 E-mail : info@time-media.com ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

អាជីព និងការសិក្សា ព្រឹត្តិការណ៍ និងព័ត៌មាន
ចែករំលែក
  • Apr 09, 2018 |
  • 7 ឆ្នាំមុន |
  • 2.5K មើល

អត្ថបទប្រចាំសប្ដាហ៍ទី១ នៃខែមេសា

មួយប៉ព្រិចភ្នែកសោះ ខែមេសាក៏បានចូលមកដល់ ពិធីបុណ្យចូលឆ្នាំប្រពែណីជាតិខ្មែរក៏ជិតឈានចូលមកដល់ដែរ ...ហើយអត្ថបទដែលទទួលបានការអានច្រើនជាងគេនៅក្នុងសប្ដាហ៍ទី១ នៃខែមេសានេះ រួមមានដួចជា៖ តើវាពិតជាខ្មោចសង្កត់ ឬជាជំងឺ? តើ Sleep Paralysis ជាអារម្មណ៍បែបណា? ហេតុអ្វីអារម្មណ៍បែបនោះ តែងកើតឡើងពេលយប់ ? តាមការសិក្សាស្រាវជ្រាវបានបង្ហាញថា ភាពធុញថប់ ការប៉ះទង្គិចផ្លូវអារម្មណ៍ ទុក្ខព្រួយ កង្វល់ អាចជាហេតុធ្វើឲ្យមានការកើនឡើងនូវ Sleep Paralysis នេះ។ ជាក់ស្តែង បញ្ហានេះកើតមាននៅពេលអ្នកភ្ញាក់មុនពេល Rem cycle (Rapid eyes movement) បញ្ចប់ ដែល Rem គឺជាដំណាក់កាលនៃការគេង ដែលខួរក្បាលរបស់អ្នកមានសកម្មភាពខ្លាំង។ ក្នុងអំឡុងពេល Rem សាច់ដុំរបស់អ្នកត្រូវបានផ្អាក ជាហេតុធ្វើឲ្យមានការបញ្ឈប់ការសុបិន និងធ្វើឲ្យអ្នកមានអារម្មណ៍ឈឺចាប់….. ត្រូវបញ្ឈប់ការប្រើប្រាស់ និងទិញផលិតផលពីប្រភពទាំងពីរនេះ... កាលពីថ្ងៃច័ន្ទ ២រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២ ខែមេសា ឆ្នាំ២០១៨  ក្រសួងសុខាភិបាលចេញផ្សាយនូវសេចក្តីប្រកាសជូនដំណឹងរបស់ ស្តីអំពី«គេហទំព័រឈ្មោះ Health and Beauty និងវេបសាយឈ្មោះ https://www.angkorhealth.com ដែលបាន និងកំពុងធ្វើការផ្សព្វផ្សាយឱសថបំប៉នសុខភាព និងគ្រឿងសម្អាង ដោយគ្មានច្បាប់អនុញ្ញាតពីក្រសួងសុខាភិបាល»…. បំបាត់បញ្ហាអាល្លែកហ្ស៊ីជាមួយ Cetirizine ឱសថ Cetirizine ដែលកំពុងមានលក់នៅលើទីផ្សារទាំងក្នុងទម្រង់គ្រាប់ ឬស៊ឺរ៉ូ ត្រូវបានប្រើប្រាស់សម្រាប់តម្រូវការរបស់បុគ្គលទូទៅដោយមិនចាំបាច់មានវេជ្ជបញ្ជា។ ជាទូទៅ Cetirizineជាឱសថមានប្រសិទ្ធភាព និងសុវត្ថិភាពសម្រាប់ដោះស្រាយបញ្ហាអាល្លែកហ្ស៊ី តែអ្នកប្រើប្រាស់ទាំងអស់ក៏គួរតែធ្វើការចាប់អារម្មណ៍ និងស្វែងយល់ពីសញ្ញាគ្រោះថ្នាក់ និងប្រុងប្រយ័ត្ននៅអំឡុងពេលប្រើប្រាស់ផងដែរ... ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

អត្ថបទប្រចាំខែ
ចែករំលែក
  • Apr 07, 2018 |
  • 7 ឆ្នាំមុន |
  • 3.7K មើល

ពេលធ្លាក់ទឹកចិត្តម្តងៗ អាចធ្វើអ្វីខ្លះដើម្បីខ្លួនឯង?

ពេលមានអារម្មណ៍ថានៅលើលោកនេះ ខ្លួនឯងទុកក៏មិនចំណេញ ដកចេញក៏មិនខាត អាចសាកល្បងវិធីទាំងនេះបាន…តែ…ជំហានដំបូង នោះគឺសូមគ្រប់គ្រងខ្លួនឯងឲ្យបានល្អ សូមយកឈ្នះលើខ្លួនអ្នកឲ្យបាន!!! បើមិនដូច្នោះទេ ទោះបីវិធីសាស្រ្តល្អឥតខ្ចោះបែបណា ធ្លាក់ពីលើមេឃមក ឬត្រូវបានណែនាំដោយអ្នកជំនាញខ្លាំងប៉ុណ្ណា បើចិត្តអ្នកមិនព្រមទទួលយកផងនោះ អ្វីៗក៏នឹងមិនបង្កើតផលចំណេញ ហើយក៏គ្មានអ្វីដែលនឹងអាចប្រសើរឡើងដែរ… ខាងក្រោមនេះ អាចជាវិធីខ្លះដែលអាចជួយអ្នកដែលកំពុងតែធ្លាក់ទឹកចិត្ត ឬលែងមានអារម្មណ៍រីករាយនឹងឆាកជីវិតរបស់ខ្លួនបាន… ១ ចូលគេង ហើយគិតថាថ្ងៃថ្មីនឹងល្អប្រសើរជាងនេះ     ប្រហែលជាពិបាកនឹងគេងលក់   ព្រោះតែចិត្តមិនស្ងប់ ប៉ុន្តែអ្នកអាចនឹងសាកល្បងធ្វើការសមាធិឬគ្រាន់តែព្យាយាមបញ្ឈប់ការគិតមួយរយៈដោយផ្តោតលើការដកដង្ហើមចេញចូល ហើយបិទភ្នែក និងផ្តេកខ្លួនគេង។ ជួនកាល អ្នកប្រហែលជាកំពុងតែយំ បើមិនអាចឈប់យំបានទេ អាចយំរហូតដល់គេងលក់ក៏បាន ហើយត្រូវចាំថា ថ្ងៃស្អែកជាថ្ងៃថ្មី ដែលនឹងល្អប្រសើរជាងនេះ។ ២ និយាយប្រាប់រឿងរ៉ាវក្នុងចិត្តទៅកាន់នរណាម្នាក់ដែលជិតស្និទ្ធ និងទុកចិត្តជាងគេ មិនថាជាក្រុមគ្រួសារ មិត្តភក្តិ ឬមនុស្សជាទីស្រឡាញ់ណាម្នាក់ឡើយ កុំមានអារម្មណ៍ថាខ្លួនឯងនាំរឿងស្មុគស្មាញ ឬបន្ទុកដល់ពួកគាត់ឡើយសុំពេលគាត់ប៉ុន្មាននាទីដើម្បីនិយាយរៀបរាប់រឿងក្នុងចិត្តដល់ពួកគាត់ ដើម្បីឲ្យបានធូរខ្លះ ព្រោះថាការលាក់ទុកអ្វីដែលមាននៅក្នុងចិត្តទាំងនោះ មិនប្រាកដថាជួយអ្វីអ្នកបានឡើយ។ ៣ អានសៀវភៅ ឬស្តាប់ធម៌អប់រំផ្លូវចិត្ត មានសៀវភៅ និងធម៌ ក៏ដូចជាការនិយាយខ្លះពិតជាអាចជួយដល់ការគិត និងសុខភាពផ្លូវចិត្ត ដរាបណាអ្នកបើកចិត្តឲ្យទូលាយក្នុងការទទួលស្តាប់ អាន និងដឹងឮនូវរឿងរ៉ាវទាំងនោះ។ ៤ រំលឹកអំពីស្នាដៃ និងរឿងអស្ចារ្យដែលបានធ្វើកន្លងមក ជាទូទៅ ពេលដែលធ្លាក់ទឹកចិត្ត អារម្មណ៍អវិជ្ជមានតែងតែកើតមានជានិច្ច ហើយក៏ជាពេលដែលអ្នកចាប់ផ្តើមស្តីបន្ទោសដល់ខ្លួនឯងផងដែរ ហេតុនេះហើយ វានឹងជាការប្រសើរប្រសិនបើអ្នករំលឹកអំពីសមិទ្ធផលល្អៗដែលអ្នកធ្លាប់បានធ្វើក៏ដូចជាទទួលកន្លងមក ដើម្បីផ្តល់នូវថាមពលនៃមោទនភាព និងភាពវិជ្ជមានចំពោះខ្លួនអ្នកឡើងវិញ។ ៥ មើលរឿងកំប្លែង ឬធ្វើអ្វីដែលសប្បាយៗ មិនមែនកើតទុក្ខហើយក៏ស្តាប់បទចម្រៀងកម្សត់ទៀតនោះទេ  បើទោះជាមិនអាចជួយឲ្យបានធូរស្រាលខ្លះ ឬច្រើនក៏ដោយ ក៏វិធីនេះនឹងមិនធ្វើឲ្យអ្នកកាន់តែពិបាកចិត្តជាងមុនដែរ។ សាកល្បងចូលរួមក្នុងសកម្មភាពផ្សេងៗក្នុងបរិយាកាសរីករាយ ជាពិសេសគឺសកម្មភាពដែលជាចំណង់ចំណូលចិត្តរបស់អ្នក សកម្មភាពដែលតែងតែធ្វើឲ្យមានស្នាមញញឹមជាប្រចាំ។ ៦ ទុកឲ្យពេលវេលាជាអ្នកស្រាយបញ្ហាផ្លូវចិត្តនេះ រឿងខ្លះ មិនប្រាកដថាបង្ខំចិត្តឲ្យទទួលយកបានងាយៗនោះទេ មានរឿងជាច្រើនដែលត្រូវការពេលវេលាជាអ្នកជួយសម្រួល។ ដូចនេះហើយ វានឹងជាការប្រសើរ បើសិនជាអ្នកអាចទុកពេលខ្លះដល់ខ្លួនឯង ទម្រាំដល់ពេលមួយដែលអ្នកអាចប្រឈមនឹងការពិតទាំងនោះ។ ៧ ទៅទីកន្លែងដែលខ្លួនឯងប្រាថា្ន និយាយពីចំណុចនេះ អ្នកខ្លះក៏មានលទ្ធភាពអាចទៅបានពិតមែន តែអ្នកខ្លះវិញក៏ហាក់ដូចជាមិនអាច តែកុំឲ្យវាក្លាយជាបញ្ហាស្មុគស្មាញមួយទៀតអី។ គិតពីកន្លែងណាដែលអាចទៅដល់ ឬគ្រាន់តែនៅកន្លែងណាមួយជាមួយមនុស្សយល់ចិត្តចំណាយពេលខ្លះព្រលែងចោលនូវរាល់ទុក្ខសោកក្នុងចិត្តគ្រប់យ៉ាងក៏បាន។      ៨ ធ្វើអ្វីដែលខ្លួនតែងតែប្រាថ្នាចង់ធ្វើ ឬចង់ឲ្យកើតមាន ប្រហែលជាអ្នកទើបតែបរាជ័យ ឬខកខានឱកាសណាមួយទើបធ្វើឲ្យចិត្តមិនស្ងប់ពេលនេះ កុំបណ្តោយឲ្យចិត្ត និងការគិតស្ថិតនៅលើវាទៀត ព្រោះអតីតកាលបានកន្លងហួសទៅហើយ រីឯអនាគតក៏នៅមិនទាន់មកដល់ដែរ ហេតុនេះហើយ ប្រើប្រាស់បច្ចុប្បន្នកាលនេះឲ្យមានតម្លៃ និងល្អប្រសើរដោយផ្តោតលើក្តីស្រមៃ ឬគោលដៅខ្លីណាមួយសិន ហើយរីករាយជាមួយនឹងការធ្វើដំណើរឈានទៅរកវា។ សូមធ្វើតាមអ្វីដែលអ្នកគិតថាត្រូវ និងមានប្រយោជន៍សម្រាប់អ្នក…សំខាន់ខ្លួនអ្នក យកឈ្នះលើខ្លួនឯង…តស៊ូបន្ត ដើម្បីជីវិតខ្លួនឯង… ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

សុខភាពផ្លូវចិត្ត និងកំសាន្ត
ចែករំលែក
  • Apr 07, 2018 |
  • 7 ឆ្នាំមុន |
  • 4.1K មើល

អាល្លែកហ្ស៊ីភ្នែកមិនមានលក្ខណៈកាចសាហាវ ប៉ុន្តែជួបប្រទះញឹកញាប់

អ្វីជាអាល្លែកហ្ស៊ីភ្នែក? អាល្លែកហ្ស៊ីភ្នែក ត្រូវបានហៅជាភាសាបច្ចេកទេសថា Allergic Conjunctivitis មានន័យថាជាការរលាកភ្នែកដោយសារតែសារធាតុមួយចំនួន ជាដើមចមបង្កឲ្យមានប្រតិកម្មដែលគេហៅថា ភ្នាក់ងារ អាល្លែកហ្ស៊ី (Allergic Agents)។ ជំងឺអាល្លែកហ្ស៊ីនេះអាចកើតមានឡើងចំពោះមនុស្សស្ទើរគ្រប់វ័យ ហើយបើតាមការសង្កេតឃើញដោយផ្ទាល់របស់លោកវេជ្ជបណ្ឌិតឯកទេសចក្ខុរោគទៅលើអ្នកជំងឺដែលបានមកពិនិត្យជារៀងរាល់ថ្ងៃគឺមានប្រមាណ ៣០-៤០% ទៅតាមវេលានៃខែនីមួយៗក្នុងមួយឆ្នាំ។ ជាទូទៅអាល្លែកហ្ស៊ីភ្នែកត្រូវបានគេចែកចេញជាច្រើនប្រភេទ យោងទៅតាមមូលហេតុបង្កមានជាអាទិ៍៖ • តាមរដូវកាល (Seasoning)៖  មានន័យថាជាការកើតអាល្លែកហ្ស៊ីតាមរដូវកាល ជាពិសេសនៅក្នុងរដូវផ្ការីក និងមុនរដូវភ្លៀងធ្លាក់ ដោយសារតែសម្បូរទៅដោយលម្អងផ្កាព្រៃដែលអាចជាភ្នាក់ងារអាល្លែកហ្ស៊ី ហើយច្រើនកើតមានឡើងក្នុងប្រទេសត្រជាក់ ប៉ុន្តែ ដោយឡែកនៅប្រទេសកម្ពុជាយើងពុំសូវជួបប្រទះទេ។ • តាមការប៉ះពាល់ (Contact with Environment)៖  ជាប្រភេទអាល្លែកហ្ស៊ីដែលឧស្សាហ៍ជួបប្រទះញឹកញាប់បំផុតនៅក្នុងប្រទេសកម្ពុជា បង្កឡើងដោយសារធាតុមិនល្អមាននៅក្នុងខ្យល់ដូចជា ធូលី សារធាតុគីមី ដែលអាចជាភ្នាក់ងារបង្កអាល្លែកហ្ស៊ី ឬ  សម្ភារៈប្រើប្រាស់នៅក្នុងផ្ទះ មានសត្វល្អិតចង្រៃរស់នៅ (House Mite) និងរោមសត្វដូចជា ឆ្កែ ឬឆ្មាជាដើម។ • តាមប្រភេទជំងឺដទៃទៀត(Atopic Allergy)៖ ជាអាល្លែកហ្ស៊ីដែលទាក់ទងទៅនឹងជំងឺផ្សេងៗតួយ៉ាងដូចជា អ្នកដែលមានបញ្ហា   អាល្លែកហ្ស៊ីស្បែក ឬច្រមុះ ជំងឺកើតហឺត។ល។ អាលែ្លកហ្ស៊ីប្រភេទនេះ គេសង្កេតឃើញថាកើតមានទៅលើស្ត្រី ដោយសារ ការប្រើប្រាស់គ្រឿងសម្អាងច្រើន។ • តាមការពាក់លែន (Contact Lens)៖  វាទាក់ទងទៅនឹងអ្នកដែលចូលចិត្តប្រើប្រាស់លែនដាក់ភ្នែក ដោយសារតែសារធាតុដែលកកក្រោមលែនកកិតជាមួយនឹងកែវភ្នែករួចបង្កជាអាល្លែកហ្ស៊ី។ កុមារត្រូវបានសង្កេតឃើញថាងាយនឹងកើតមានជំងឺអាល្លែកហ្ស៊ីភ្នែកជាងគេ ក៏ព្រោះថាពួកគេកង្វះអនាម័យខ្លួនប្រាណ ដោយសារពួកគេចូលចិត្តលេងធូលីដី ឬលេងកន្លែងមិនស្អាតដែលនាំឲ្យពួកគេងាយប្រឈមនឹងភ្នាក់ងារអាល្លែកហ្ស៊ី។ម៉្យាងទៀត ស្រ្តីក៏ត្រូវបានសម្គាល់ថាងាយនឹងកើតមានជំងឺនេះផងដែរ ព្រោះពួកគាត់ចូលចិត្តប្រើប្រាស់គ្រឿងតុបតែងទៅលើភ្នែកដូចជា ម៉ាស្ការ៉ាដែលជាហេតុធ្វើឲ្យភ្នែកទទួលរងនូវប្រតិកម្មក្រៅពីនេះកត្តាមុខរបរមួយចំនួនក៏ងាយប្រឈមទៅនឹងអាល្លែកហ្ស៊ីភ្នែកដូចគ្នាដែរ។ រោគសញ្ញាគួរកត់សម្គាល់ រោគសញ្ញានៃអាល្លែកហ្ស៊ីភ្នែក រួមមាន រមាស់ក្រហម  ហើម រកាំ ឬស្រវាំង រួយភ្នែក និងចាញ់ពន្លឺដែលទាំងនេះសុទ្ធសឹងតែជារោគសញ្ញា អាចបញ្ជាក់ថាមានអាល្លែកហ្ស៊ីភ្នែក។ រោគវិនិច្ឆ័យសមស្រប បន្ថែមពីលើរោគសញ្ញាដែលបានរៀបរាប់ខាងលើការធ្វើរោគវិនិច្ឆ័យត្រូវពឹងផ្អែកទៅលើការសួរប្រវត្តិជំងឺ ក៏ដូចជាពិនិត្យបន្ថែមទៅលើភ្នែកដែលយើងឃើញមានជាដុំពកតូចនៅលើគ្រាប់ភ្នែក ឬនៅក្នុងត្របកភ្នែកផ្នែកខាងលើ ហើយដុំពកតូចនេះអាចក្លាយជាធំ ឬមានឡើងសនៅជុំវិញប្រស្រីភ្នែកក្នុងករណីអាល្លែកហ្ស៊ីធ្ងន់ធ្ងរ។ ការព្យាបាល ជំងឺអាល្លែកហ្ស៊ីភ្នែកកម្រិតស្រាលគ្រូពេទ្យនឹងណែនាំឲ្យព្យាបាលដោយការបន្តក់នូវទឹកភ្នែកសិប្បនិម្មិត ដើម្បីសម្អាតភ្នាក់ងារបង្កអាល្លែកហ្ស៊ី(Allergic Agents)ចេញពីក្នុងភែ្នក។ ក្នុងករណីអាការៈរោគមិនមានលក្ខណៈធូរស្រាល អ្នកជំងឺអាចប្រើប្រាស់ថ្នាំបន្តក់ភែ្នកដើម្បីកាត់បន្ថយរមាស់ដែលមាន២ក្រុមគឺ ពពួក Antihistamine និងMast cell stabilizer ក្នុងរយៈពេល៧ថ្ងៃ។ ចំណែកអ្នកដែលមានជំងឺអាល្លែកហ្ស៊ីធ្ងន់ធ្ងរដូចជា ហើមត្របកភែ្នកខ្លាំង ក្រហម និងចាញ់ពន្លឺ ជួនកាលអាចបង្កជាដំបៅលើកញ្ចក់ភែ្នក ដែលអាចធ្វើឲ្យប៉ះពាល់ដល់គំហើញ ពួកគាត់ចាំបាច់ត្រូវធ្វើការព្យាបាលជាមួយនឹងវេជ្ជបណ្ឌិតជំនាញឲ្យបានត្រឹមត្រូវទើបអាចជាសះស្បើយ។ វិធីសាស្រ្តបង្ការ ដើម្បីកាត់បន្ថយអាល្លែកហ្ស៊ីភ្នែកបានយើងត្រូវបញ្ចៀសនូវកត្តាបង្ក ឬប្រឈមមួយចំនួនដូចជា៖  -ត្រូវចៀសវាងកន្លែងសម្បូរលម្អងផ្កាសម្រាប់អ្នកដែលអាល្លែកហ្ស៊ីទៅតាមរដូវកាល  -ត្រូវពាក់វ៉ែនតាការពារធូលីហុយចូលភ្នែក  - ត្រូវជ្រើសរើសផលិតផលគ្រឿងសម្អាងដែលពុំបង្កឲ្យមានអាល្លែកហ្ស៊ី  -មិនត្រូវប្រើប្រាស់ Contact Lens ក្នុងករណីមិនចាំបាច់  -ហាមញីភ្នែកពេលរមាស់  -បង្កើនអនាម័យក្នុងការរស់នៅ និងហូបចុក  -ប្រើប្រាស់ម៉ាស៊ីនសម្អាតខ្យល់ដើម្បីបន្សុទ្ធខ្យល់ក្នុងផ្ទះ ឬក្នុងបន្ទប់គេង។ បើទោះបីជាអាល្លែកហ្ស៊ីភ្នែកពុំបង្កឲ្យបាត់បង់គំហើញក៏ដោយ ប៉ុន្តែវាត្រូវបានចាត់ទុកជាជំងឺភ្នែកដែលជួបប្រទះញឹកញាប់ ដូចនេះត្រូវធ្វើការការពារ ថែរក្សាភ្នែកឲ្យបានល្អ និងគប្បីចៀសវាងកត្តាបង្កដូចបានរៀបរាប់ខាងលើ។ ប្រសិនបើមានសញ្ញាសង្ស័យត្រូវរួសរាន់មកជួបគ្រូពេទ្យភែ្នកជំនាញឲ្យលឿន កុំឲ្យវិវឌ្ឍទៅរកសភាពធ្ងន់ធ្ងរបាន។ បកស្រាយដោយ ៖ វេជ្ជបណ្ឌិត ដោរ សីហា ឯកទេសចក្ខុរោគ មានតួនាទីជាអនុប្រធានការិយាល័យបច្ចេកទេសនៃមន្ទីរពេទ្យមិត្តភាពខ្មែរ-សូវៀត និងជាអនុប្រធានកម្មវិធីជាតិសុខភាពភ្នែក នៃក្រសួងសុខាភិបាល ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ  

ជំងឺផ្សេងៗ ភ្នែក
ចែករំលែក
  • Apr 06, 2018 |
  • 7 ឆ្នាំមុន |
  • 4.5K មើល

គួរចំណាយពេលថ្ងៃឈប់សម្រាកបែបណាខ្លះ ជាមួយកូនរបស់អ្នក?

ការចំណាយពេលនៅជាមួយគ្នាបានកាន់តែច្រើន រឹតតែមានឱកាសក្នុងការបង្កើននូវភាពស្និទ្ធស្នាល ភាពកក់ក្តៅ និងក្តីស្រឡាញ់នៅក្នុងរង្វង់គ្រួសារទៀត។ នាពេលបច្ចុប្បន្ននេះ វាហាក់ដូចជាឱកាសកម្រមួយសម្រាប់គ្រួសារទៅវិញដោយហេតុថាសមាជិកម្នាក់ៗជាក់ស្តែង គឺលោកឳពុកអ្នកម្តាយក្នុងវ័យធ្វើការរកស៊ីមិនសូវមានពេលទំនេរច្រើនឡើយសម្រាប់បុត្រធីតារបស់ខ្លួន។ ទោះបីជារវល់ម្តេចក្តី គ្រប់គ្នាត្រូវតែមានតុល្យភាពរវាងជីវិត និងការងារ មិនថាកាលវិភាគអ្នកមមាញឹកនឹងការសម្រេចនូវគោលដៅ ឬរកប្រាក់ចំណូល ដើម្បីផ្គត់ផ្គង់អនាគតនៃគ្រួសារកម្រិតណានោះទេ សូមទុកពេលវេលាខ្លះសម្រាប់ក្រុមគ្រួសារ ដែលជាមនុស្សជាទីស្រឡាញ់របស់អ្នកផង។ ប្រសិនបើមិនអាចឆ្លៀតបានក្នុងថ្ងៃធម្មតាទេនោះ សូមកុំបណ្តោយឲ្យថ្ងៃចុងសប្តាហ៍ ឬថ្ងៃឈប់សម្រាករំលងផុតទៅដោយការមិនមានពេលវេលាជាមួយគ្នាឲ្យសោះ។ ហេតុនេះហើយ តើមានអ្វីខ្លះដែលអ្នកអាចធ្វើបាន ដើម្បីចំណាយពេលវេលានោះជាមួយកូនៗរបស់អ្នក? ខាងក្រោមនេះ ជាគំនិតខ្លះៗដែលលោកអ្នកអាចធ្វើការពិចារណាបាន… ការទស្សនាភាពយន្ត ឬកម្មវិធីកម្សាន្តជាមួយគ្នា ជ្រើសរើសភាពយន្ត ឬកម្មវិធីកម្សាន្តណាមួយដែលអ្នកគិតថា អ្នក និងក្រុមគ្រួសារអាចមើលបានជាមួយគ្នាដោយមានការពិភាក្សាគ្នាពីនេះពីនោះ ដើម្បីឲ្យពេលវេលានោះកាន់តែមានគុណភាពបន្ថែមទៀត។ស្របពេលជាមួយគ្នា អ្នកក៏អាចបង្រៀនអំពីមេរៀនជីវិតផ្សេងៗដែលមានបង្ហាញនៅក្នុងភាពយន្ត ឬកម្មវិធីនោះដល់កូនៗរបស់អ្នកថែមទៀតផង ដែលការធ្វើបែបនេះ គឺអាចចំណេញបានទាំងសុភមង្គល និងការអប់រំផងដែរ។ ការប្រកួតប្រជែងសមត្ថភាព អាចជាការប្រកួតគូរគំនូរ ផ្គុំរូប ឬសមត្ថភាពផ្សេងៗដែលរឹតតែប្រសើរ បើអ្នកអាចផ្តល់នូវរង្វាន់លើកទឹកចិត្តដល់ពួកគេផងដែរ។ សកម្មភាពមួយនេះក៏នឹងបង្កើននូវភាពច្នៃប្រឌិត ទម្លាប់ក្នុងការគិត និងប្រឹងប្រែងដោយសុចរិតក្នុងការប្រកួតប្រជែង ដែលអាចឲ្យពួកគេត្រៀមខ្លួនសម្រាប់ពេលដែលត្រូវប្រកួតប្រជែងនៅខាងក្រៅទៀតផង។ ការចម្អិនអាហារ ប្រសិនបើអាច អ្នកអាចស្នើសុំឲ្យកូនៗរបស់ អ្នកចូលរួមក្នុងការរៀបចំ ក៏ដូចជាចម្អិនអាហារ សម្រាប់ក្រុមគ្រួសាររបស់អ្នក ដែលតាមរយៈការ ធ្វើបែបនេះ អ្នកអាចនឹងបង្រៀនពួកគេអំពីស្មារតីក្នុងការជួយគ្នាសម្រេចនូវគោលដៅរួម។ ស្របពេលជាមួយគ្នាអ្នកក៏អាចបង្រៀនពួកគេអំពីបំនិនជីវិតដ៏សំខាន់ គឺការធ្វើម្ហូបនេះតែម្តង ដែលនឹងជាប្រយោជន៍ទៅថ្ងៃអនាគតរបស់គេ។ ម្យ៉ាងទៀត អ្នកអាចឲ្យគេជួយភ្លក្សនូវមុខម្ហូបទាំងនោះហើយក៏រួមគ្នាសម្រេចនូវរសជាតិដែលអ្នកប្រាថ្នាព្រមគ្នាតែម្តង។ ការជប់លៀងញ៉ាំសាច់អាំង ការអាំងសាច់ ជាសកម្មភាពដ៏ប្រសើរបំផុតក្នុង ចំណោមសកម្មភាពនៅខាងក្រៅ (outdoor) ដទៃទៀត ព្រោះថាមិនត្រឹមតែបានញ៉ាំអាហារជុំគ្នាប៉ុណ្ណោះទេ គឺអាចចំណាយពេលក្នុងការអាំងសាច់ បណ្តើរ និយាយជជែកគ្នាបណ្តើរទៀតផង។ ពេលវេលាដែលចំណាយក៏រឹតតែមានគុណភាពថែមមួយកម្រិតទៀត ប្រសិនបើមានអ្នកចូលរួមកាន់តែច្រើនដែលអាចជាការជុំគ្នារវាងគ្រួសាររបស់មិត្តភក្តិអ្នកផ្ទាល់ ឬគ្រួសាររបស់មិត្តភក្តិកូនអ្នកផ្ទាល់ផងដែរ។ ការសម្រាកលំហែនៅឆ្នេរសមុទ្រ យូរៗម្តង ការទៅកម្សាន្តនៅឆ្នេរសមុទ្រជាលក្ខណៈគ្រួសារពិតជាបង្កើតនូវភាពសប្បាយរីករាយដល់កូនៗរបស់អ្នក តាមរយៈសកម្មភាពកម្សាន្តសប្បាយជាច្រើនរួមមាន ការសូនរូបជាមួយនឹងដីខ្សាច់ ការមុជទឹកសមុទ្រលេង ការប្រមូលរើសសំបកខ្យងខ្ចៅ ការចាប់ក្តាម ជាដើម។អ្នកក៏អាចលេងល្បែងជុំគ្រួសារដូចជាការលេងបាល់ ឬការលេងដេញចាប់គ្នាផងដែរ។ ការទស្សនាសួនសត្វ សួនធម្មជាតិ ឬសួនសិប្បនិម្មិត មានកន្លែងកម្សាន្តជាច្រើនដែលអ្នកអាចកំដរកូនរបស់អ្នកទៅបាន អាស្រ័យលើចំណង់ចំណូលចិត្តរបស់ពួកគេ។ លោកអ្នកអាចធ្វើការសាកសួរចិត្ត របស់ពួកគេជាមុនសិន ដើម្បីឲ្យប្រាកដក្នុងចិត្តថា គេនឹងសប្បាយចិត្តក្នុងការចូលរួម មិនមែនទៅដោយសារការបង្ខំ ឬរៀបចំរបស់អ្នកឡើយ។ ការចំណាយពេលទៅខាងក្រៅ រីករាយជាមួយនឹងធម្មជាតិក៏នឹងអាចផ្លាស់ប្តូរអារម្មណ៍ និងបរិយាកាសសម្រាប់អ្នក និងជាពិសេសកូនជាទីស្រឡាញ់ផ្ទាល់។ ការបោះតង់ ឬជំរុំ បែបឯកជន មិនសំដៅដល់ការបោះតង់នៅព្រៃភ្នំ ឬមាត់សមុទ្រ អ្វីឡើយ…អ្នកអាចប្រើប្រាស់សម្ភារៈផ្សេងជំនួសឲ្យតង់ (អាចជាការក្រាលកម្រាលគេងនៅលើ វាលស្មៅ ដោយមានដំបូលស្តើងគ្របពីលើ) ហើយគេងក្បែរកូនរបស់អ្នកដោយរើសយករឿងនិទានណាមួយមកនិយាយជូនពួកគេស្តាប់ (អ្នកគួររើសយករឿងណា ដែលមានគំនិតអប់រំល្អៗ ឬទាក់ទិននឹងបំណិនជីវិត)។ ស្របពេលជាមួយគ្នា អ្នកក៏ អាចរីករាយនឹងខ្យល់អាកាស ព្រមទាំងសំឡេងធម្មជាតិនាពេលរាត្រីដែលប្រាកដណាស់ គឺមានផលវិជ្ជមានចំពោះសុខភាពផ្លូវចិត្តរបស់អ្នក។ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

គន្លឹះសុខភាព ការចិញ្ចឹមកូន
ចែករំលែក
  • Apr 06, 2018 |
  • 7 ឆ្នាំមុន |
  • 5.8K មើល

សញ្ញាណនៃអាល្លែកហ្ស៊ីផ្លូវដង្ហើម

និយមន័យនៃអាល្លែកហ្ស៊ីផ្លូវដង្ហើម ជំងឺអាល្លែកហ្ស៊ីផ្លូវដង្ហើម គឺជាប្រតិកម្មដែលបង្កឡើងដោយពពួកអាល្លែកហ្សែនធ្វើឲ្យមានការហើម រលាកតាមផ្លូវដង្ហើម។ សម្រាប់ការអង្កេតនៅប្រទេសកម្ពុជាយើងគឺមានការកើនឡើង ជាក់ស្តែង នៅឆ្នាំ២០០៤ ការសិក្សានៅមន្ទីរពេទ្យព្រះអង្គឌួង ករណីអ្នកជំងឺដែលគាត់មកពិគ្រោះឃើញថាមានអាល្លែកហ្ស៊ី១៥% និងនៅឆ្នាំ២០១៥ការសិក្សានៅមន្ទីរពេទ្យព្រះកេតុមាលា ករណីជំងឺអាល្លែកហ្ស៊ីនេះមានការកើនឡើងរហូតដល់២៨%។  តាមទិន្នន័យនៅឆ្នាំ២០០៦ តំបន់នៃពិភពលោកដែលប្រឈមនឹងអាល្លែកហ្ស៊ីខ្ពស់ជាងគេ គឺអ៊ុយគ្រែន រហូតដល់៤០%។ មូលហេតុបង្កឲ្យមានអាល្លែកហ្ស៊ីផ្លូវដង្ហើម • កត្តាខាងក្រៅ     -ការផ្លាស់ប្តូរអាកាសធាតុ ដែលយើងហៅថាអាល្លែកហ្ស៊ីរដូវកាល វាកើតមានឡើងពេលប្តូរពីរដូវក្តៅទៅរដូវត្រជាក់  ឬពីរដូវត្រជាក់មករដូវក្តៅ ឬរដូវផ្ការីកដែលធ្វើឲ្យគាត់អាល្លែកហ្ស៊ីជាមួយលម្អងផ្កា     -ការបំពុលបរិស្ថាន ផ្សែងបារី ផ្សែងយានយន្តឬផ្សែងចេញពីរោងចក្រ     - គេហដ្ឋានមិនស្អាត មានផ្សិតនៅតោងជាប់ជញ្ជាំង ដោយសារជម្រាបទឹកផ្សេងៗ ផ្សិតដុះពីអាហារផ្អូម ឬផ្សិតពីកាកសំណល់ផ្សេងៗ     - សត្វចិញ្ចឹម ដែលមានរោមដូចជាសត្វឆ្កែ សត្វឆ្មា សត្វល្អិត ឬពពួកសត្វកន្លាត ទាំងលាមក ទាំងទឹកនោមរបស់វា     -Ascariens ជាសត្វល្អិតតូចបំផុតដែលរស់នៅជាប់កម្រាលព្រំ ភួយ មុង ខ្នើយ កន្ទេលជាដើម។ • កត្តាខាងក្នុង     - មកពីចំណីអាហារដូចជា គ្រឿងសមុទ្រ ស៊ុតទឹកដោះគោ អាហារផ្អាប់ និងសណ្តែកដី     - ថ្នាំពេទ្យ ថ្នាំបុរាណដែលមានការលាយផ្សំចូលគ្នាជាច្រើនមុខ។ បុគ្គលជាកម្មកររោងចក្រ រស់នៅ និងធ្វើការក្នុងបរិស្ថានមិនល្អ ឬធ្វើការក្នុងកសិដ្ឋានចិញ្ចឹមសត្វប្រឈមមុខខ្ពស់នឹងអាល្លែកហ្ស៊ីផ្លូវដង្ហើមបំផុត។ ចំពោះអ្នកអាល្លែកហ្ស៊ីច្រមុះស្រាប់មាន២០%កើតហឺត រីឯបុគ្គលដែលកើតហឺតមាន៥០%អាល្លែកហ្ស៊ីច្រមុះ។ រោគសញ្ញាជាក់ស្តែង មនុស្សម្នាក់អាចសន្និដ្ឋានថាមានជំងឺអាល្លែកហ្ស៊ីផ្លូវដង្ហើមបានផ្អែកលើរោគសញ្ញាដូចជា រមាស់ច្រមុះ តឹងច្រមុះ កណ្តាស់ ហៀរសំបោរ អាចដល់សួតគឺធ្វើឲ្យហត់ភ្លាមៗបន្ទាប់ពីសញ្ញាក្អកទៅតាមដំណាក់កាល។ រោគសញ្ញាបន្ទាប់បន្សំអាចរួមមានអស់កម្លាំង ឈឺក្បាល និងសញ្ញាលើស្បែក ហើយក៏អាចធ្វើឲ្យអ្នកជំងឺគេងមិនបានឬគេងភ្ញាក់ៗ ប៉ះពាល់ដល់ការសិក្សា ការងារ ក៏ដូចជាសង្គមជាតិទាំងមូល។ យន្តការនៃអាល្លែកហ្ស៊ីផ្លូវដង្ហើម ពេលដែលអាល្លែកហែ្សនចូលដល់ក្នុងខ្លួន  កោសិកាមួយហៅថាម៉ាក្រូហ្វាចាប់យកអាល្លែកហ្សែនដើម្បីបង្កើតបានជាអង់ទីក័រ។  នៅពេលអាល្លែកហ្សែនចូលលើកទី២ អង់ទីក័រចាប់យកអាល្លែកហ្សែននោះម្តងទៀត ហើយវាបញ្ចេញជាសារធាតុមួយឈ្មោះថាអ៊ីសស្តាមីន (Histamine)ជាហេតុនាំឲ្យមានការលេចចេញជារោគសញ្ញាអាល្លែកហ្ស៊ីផ្សេងៗ។ ការធ្វើរោគវិនិច្ឆ័យអាល្លែកហ្ស៊ីផ្លូវដង្ហើម ដំបូងត្រូវសាកសួរលម្អិតពីប្រវត្តិរបស់ជំងឺ កើតតាំងពីពេលណា តាំងពីកុមារភាព ឬទើបតែកើតមានឡើងថ្មីៗ ប្រវត្តិគ្រួសារ ដោយសារអាល្លែកហ្ស៊ីជាជំងឺតពូជ ប្រសិនបើឪពុក ឬម្តាយមានអាល្លែកហ្ស៊ី នោះកូនអាចប្រឈមនឹងបញ្ហានេះរហូតដល់៣០%។ មួយវិញទៀត ត្រូវសាកសួររហូតដល់ការរស់នៅរបស់គាត់ ដើម្បីរកមូលហេតុធ្វើឲ្យមានអាល្លែកហ្ស៊ី បរិស្ថានការងាររបស់គាត់ ជាកម្មកររោងចក្រ ធ្វើការនៅកន្លែងមួយគ្មានខ្យល់អាកាសឆ្លងកាត់ ឬហប់ កសិដ្ឋានចិញ្ចឹមសត្វ មុខងារ រួមនឹងបរិស្ថានដែលគាត់រស់នៅ។ បន្ទាប់មកតម្រូវឲ្យអ្នកជំងឺពិនិត្យគ្លីនិកដូចជា មើលច្រមុះ បំពង់ក ដើម្បីរកមើលកត្តាអាល្លែកហ្ស៊ី។ ក្រៅពីនេះ មានការធ្វើតេស្តឈាមដើម្បីសិក្សារក IgE specific រកមើលសារធាតុអាល្លែកហ្ស៊ី និងបច្ចេកទេសចុងក្រោយ គឺការធ្វើតេស្តលើស្បែក ហៅថា Skin Prick Testsដែលមានសារធាតុយកមកធ្វើតេស្តច្រើនយ៉ាង។ អាល្លែកហ្ស៊ីផ្លូវដង្ហើមត្រូវព្យាបាលរបៀបណា? ការព្យាបាលជារឿងមួយសំខាន់បំផុត ជាដំបូងត្រូវផ្អែកលើការសាកសួរអ្នកជំងឺ ប្រសិនបើគាត់មានអាល្លែកហ្ស៊ីជាមួយសារធាតុណាមួយ  ត្រូវចៀសសារធាតុនោះ។ ឧទាហរណ៍ បើគាត់ញ៉ាំទឹកដោះគោហើយបណ្តាលឲ្យគាត់ក្អក  រមាស់ក ឬកណ្តាស់ ត្រូវណែនាំឲ្យគាត់បញ្ឈប់ នោះគាត់នឹងមានភាពធូរស្រាល។ ដូចនេះ អ្នកជំងឺចាំបាច់ត្រូវធ្វើការអង្កេតខ្លួនឯងផ្ទាល់។ ម៉្យាងទៀត អ្នកជំងឺអាចតម្រូវឲ្យប្រើប្រាស់ថ្នាំប្រភេទប្រឆាំងនឹងអីុសស្តាមីន (Antihistaminic) ឬពពួក Corticoid ទាំងប្រភេទថ្នាំលេប និងថ្នាំបាញ់ទៅតាមសញ្ញាអាល្លែកហ្ស៊ីដែលគ្រូពេទ្យចេញវេជ្ជបញ្ជា។ ជាទូទៅការការពារ និងព្យាបាលជំងឺអាល្លែកហ្ស៊ីផ្លូវដង្ហើមត្រូវធ្វើឡើងទន្ទឹមគ្នា ដោយហាត់ប្រាណជាប្រចាំ ព្រោះវាអាចជួយឲ្យប្រព័ន្ធភាពស៊ាំកាន់តែមានភាពរឹងមាំ ហើយនៅពេលពួកគាត់ប៉ះជាមួយអាលែ្លកហ្សែនតិចតួចនឹងមិនចេញនូវសញ្ញាអាល្លែកហ្ស៊ីនោះទេ។ មួយវិញទៀត ត្រូវប្រកាន់ខ្ជាប់នូវអនាម័យ ផឹកស្អាត ហូបស្អាត រស់នៅស្អាត  និងត្រូវទម្លាប់ប្រើម៉ាស់ជាប្រចាំ  ឬអាចប្រើប្រាស់ថ្នាំការពារទុកជាមុន។ ប្រដាប់ដង្ហើមជាផ្នែកមួយដ៏សំខាន់នៃរាងកាយនៅពេលមានផលប៉ះពាល់ ឬហើម បុគ្គលនោះត្រូវជួបជាមួយបញ្ហា ទាំងសុខភាព ថវិកា ពេលវេលា ការរៀនសូត្រ ការងារ និងសង្គមទាំងមូល។ ជាក់ស្តែង ជាឧទាហរណ៍ស្រាប់នៅប្រទេសបារាំងឆ្នាំ២០០២ មានការខាតបង់បណ្តាលមកពីបញ្ហាអាល្លែកហ្ស៊ី រហូតដល់៩១៥លានអឺរ៉ូ។ ដូច្នេះគ្រប់គ្នាចាំបាច់ត្រូវចូលរួមប្រយុទ្ធប្រឆាំងជាមួយជំងឺអាល្លែកហ្ស៊ីនេះដោយយ៉ាងហោចណាស់ខិតខំសម្អាតទីក្រុងឲ្យបានស្អាត។ បញ្ជាក់ ៖ ទិវាពិភពលោកប្រយុទ្ធប្រឆាំងជំងឺអាល្លែកហ្ស៊ីនឹងប្រារព្ធឡើងចាប់ពីថ្ងៃទី២២ ដល់ ២៨ ខែមេសាឆ្នាំ២០១៨។ បកស្រាយដោយ ៖​ វេជ្ជបណ្ឌិត សុខ គួង ឯកទេស ត្រចៀក ច្រមុះ បំពង់ក មានតួនាទីជាអនុប្រធានផ្នែកត្រចៀក ច្រមុះ បំពង់ក នៃមន្ទីរពេទ្យព្រះអង្គឌួង ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ជំងឺផ្សេងៗ ផ្លូវដង្ហើម និងសួត
ចែករំលែក
  • Apr 06, 2018 |
  • 7 ឆ្នាំមុន |
  • 4.3K មើល

ភស្តុតាងលើប្រសិទ្ធភាពរបស់សារជាតិសណ្តែកសៀង ចំពោះស្ត្រីអស់រដូវ

សណ្តែកសៀងគឺជាគ្រឿងផ្សំគោលនៃអាហារប្រពៃណីរបស់ប្រជាជនអាស៊ីមករាប់ពាន់ឆ្នាំ ហើយក៏ត្រូវបានណែនាំទៅកាន់ប្រទេសប៉ែកខាងលិចរាប់រយឆ្នាំមកហើយដែរ។ បច្ចុប្បន្ន សណ្តែកសៀងត្រូវបានប្រើប្រាស់ជាចម្បងនៅក្នុងផលិតផលអាហារជាច្រើន និងត្រូវបានស្គាល់យ៉ាងទូលំទូលាយជាមួយនឹងសារជាតិបំប៉នរបស់វា ជាពិសេសគឺ  Isoflavone ដែលមានអត្ថប្រយោជន៍យ៉ាងសន្ធឹកទៅលើសុខភាព។ បរិមាណ Isoflavone នៅក្នុងអាហារពីសណ្តែកសៀង សណ្តែកសៀង មានផ្ទុកនូវ Isoflavone ច្រើនជាងគេ តែសណ្តែកសៀងផ្អាប់ ឬកែច្នៃមួយចំនួនអាចបាត់បង់នូវបរិមាណ Isoflavones រហូតដល់ ៨០ ទៅ ៩០%។ អត្ថប្រយោជន៍នៃ Isoflavone ចំពោះសុខភាព 1.   អាការៈរបស់ស្ត្រីអស់រដូវ ក្នុងឆ្នាំ ២០១៥ Isoflavone ពីសណ្តែកសៀងត្រូវបានបង្ហាញថាជាការព្យាបាលក្នុងលំដាប់ដំបូងគេទៅលើអាការៈនៃការអស់រដូវរបស់ស្ត្រី។ការសិក្សាបានបង្ហាញផងដែរដោយ CochraneLibrary នៅឆ្នាំ ២០១១បានលើកឡើងអំពីការបន្ថយការរសាត់ចេញរបស់ឆ្អឹងចំពោះស្ត្រីអស់រដូវដែលបរិភោគ  Isoflavoneពីសណ្តែកសៀង។ សារធាតុនេះត្រូវបានចាត់ទុកថាមានសុវត្ថិភាពជាងការប្រើប្រាស់ថ្នាំអ័រម៉ូនក្នុងការគ្រប់គ្រងអាការៈរបស់ស្ត្រីអស់រដូវ។ 2.   ប្រព័ន្ធសរសៃឈាមបេះដូង រដ្ឋបាលនៃចំណីអាហារនិងឱសថរបស់អាមេរិកក៏ដូចជាកាណាដា អង់គ្លេស ប្រេស៊ីល ឥណ្ឌូនេស៊ីនិងភីលីពីនបានបង្ហាញអំពី ការថយចុះនូវការប្រឈមនៃជំងឺសរសៃឈាមបេះដូង និងឥទ្ធិពលក្នុងការការពារជំងឺសរសៃឈាមបេះដូងដោយប្រូតេអ៊ីនសណ្តែកសៀង ក្នុងបរិមាណ ២៥ ក្រាមក្នុងមួយថ្ងៃ។ ការសិក្សាមួយចំនួនទៀត នៅឆ្នាំ ២០១១ និង ២០១២ បានរកឃើញថា Isoflavone អាចជំរុញមុខងាររបស់ជញ្ជាំងសរសៃឈាមក្នុងកម្រិតទាប    (Baseline) ព្រមទាំងធ្វើឲ្យប្រសើរឡើងពីភាពរឹងស្ទក់នៃសរសៃឈាមអាកទែរចំពោះស្ត្រីក្រោយអស់រដូវផងដែរ។ 3.   ការគ្រប់គ្រងទម្ងន់ ការលើសទម្ងន់ជាបញ្ហាគួរឲ្យកត់សម្គាល់នៅទូទាំងពិភពលោក។ Isoflavone មានឥទ្ធិពលសម្របសម្រួលមេតាបូលីស និងរក្សាលំនឹងនៅក្នុងរាងកាយ ដែលធ្វើឲ្យវាមានអានុភាពក្នុងការការពារ  និងព្យាបាលការលើសទម្ងន់។ 4.   សុខភាពផ្លូវចិត្ត ការសិក្សាមួយដោយជនជាតិជប៉ុនទៅលើស្ត្រីក្រោយអស់រដូវបានបង្ហាញថាការប្រើប្រាស់ក្នុងកម្រិតសមរម្យមួយ  (២៥មីលីក្រាមក្នុងមួយថ្ងៃ)នូវIsoflavone ក្រោមទម្រង់Aglycone អាចកាត់បន្ថយអាការៈនៃការធ្លាក់ទឹកចិត្ត  និងការបារម្ភ។ការសិក្សាពីឆ្នាំ ២០១៤ បានបង្ហាញថាការប្រើលើសពី ៣ខែក្នុងកម្រិត ១០០មីលីក្រាមក្នុង១ថ្ងៃនៃ Isoflavone អាចបន្ថយរោគសញ្ញានៃការបាក់ទឹកចិត្តរបស់ស្ត្រីក្រោយអស់រដូវ   ដោយប្រសិទ្ធភាពគឺប្រហែលនឹងឱសថ Zoloft (៥០mg/ថ្ងៃ) និង Prozac (១០ mg/ថ្ងៃ)។ 5.   សុខភាពស្បែក តាមរយៈការសិក្សាដែលបានធ្វើឡើងលើក្រុមស្ត្រីអស់រដូវបានបង្ហាញអំពីការប្រសើរឡើងយ៉ាងគួរឲ្យកត់សម្គាល់នៃការកាត់បន្ថយភាពជ្រីវជ្រួញការប្រែប្រួលនៃពណ៌ស្បែក និងរូបសម្រស់ទូទៅចំពោះស្ត្រីអាយុចន្លោះពី ៥០ ទៅ ៦៥ ឆ្នាំដែលបានប្រើប្រាស់ Isoflavone ពីសណ្តែកសៀង ២០ក្រាមក្នុងមួយថ្ងៃរយៈពេល ៣ខែ។ 6.   ជំងឺមហារីក សកម្មភាពប្រឆាំងនឹងជំងឺមហារីករបស់សណ្តែកសៀងត្រូវបានភ្ជាប់ទៅនឹងវត្តមានរបស់ Isoflavone ដែលធ្វើការការពារនៅវគ្គនៃការរីកលូតលាស់នៃដុំមហារីក ក៏ដូចជាកាត់បន្ថយការប្រឈម   និងការកើតឡើងវិញនៃដុំសាច់ផងដែរ។សេចក្តីវិភាគចេញពីការសិក្សាចំនួន ១៤៣ ក៏បង្ហាញអំពីលទ្ធផលគួរឲ្យកត់សម្គាល់លើទំនាក់ទំនងរវាង Isoflavone និងការថយចុះនៃការប្រឈមនឹងមហារីកក្រពះ និងសួតទៀតផង។   7.   ការឆ្លងរោគ Isoflavone គឺជាសារធាតុធម្មជាតិដែលបង្កើតឡើងដោយរុក្ខជាតិក្នុងការប្រឆាំងទប់ទល់នឹងការឆ្លងរោគពីផ្សិត  និងបាក់តេរី   ដូចនេះវាក៏អាចប្រឆាំងនឹងមេរោគ  និងជួយឲ្យមេរោគល្អក្នុងពោះវៀនកាន់តែប្រសើរផងដែរ។ 8.   ឥទ្ធិពលប្រឆាំងនឹងអុកស៊ីតកម្ម ឥទ្ធិពលនេះជួយការពារពីការវិវឌ្ឍនៃជំងឺមហារីកដែលបង្កដោយរ៉ាឌីកាល់សេរី។ ការសិក្សានៅក្នុងមន្ទីរពិសោធន៍បានបង្ហាញថាប្រភេទមួយរបស់Isoflavone (genistein) អាចជំរុញសកម្មភាពរបស់អង់ស៊ីមប្រឆាំងអុកស៊ីតកម្មផ្សេងៗ។សកម្មភាពនេះអាចប្រៀបបានទៅនឹងឥទ្ធិពលរបស់វីតាមីនE។ សុវត្ថិភាពរបស់ Isoflavone នៅឆ្នាំ ២០១៥ EFSA បានសរុបសេចក្តីថា កម្រិតប្រើពី ៣៥ ទៅ ១៥០mgក្នុងមួយថ្ងៃនៃ Isoflavone ពីអាហារ ឬអាហារបំប៉ន មិនមានចោទជាផលអវិជ្ជមានលើជាលិកាដែលរងឥទ្ធិពលពីអ័រម៉ូនភេទដូចជាសុដន់ ស្បូន ក្រពេញទីរ៉ូអ៊ីត រហូតដល់ ២ឆ្នាំកន្លះ។ ការប្រើប្រាស់ Isoflavone ពីសណ្តែកសៀងដោយស្ត្រីមានជំងឺមហារីកសុដន់មានទំនាក់ទំនងនឹងការថយចុះនៃអត្រាការស្លាប់ និងការរើឡើងវិញនៃមហារីកផងដែរ។ ម្យ៉ាងទៀត ពុំមានការហាមឃាត់ចំពោះការប្រើប្រាស់ Isoflavone លើស្រ្តីដែលព្យាបាលដោយឱសថ Tamoxifen ឬ Anastrozole ឡើយហើយវាបែរជំរុញប្រសិទ្ធភាពនៃការព្យាបាលទៅវិញ។ ថ្មីៗនេះផងដែរ សមាគមស្ត្រីអស់រដូវនៃអាមេរិកខាងជើង បានបញ្ជាក់ថាគ្មានការកើនឡើងនៃការប្រឈមទៅនឹងមហារីកសុដន់ ឬស្រទាប់ស្បូនដោយសារ Isoflavone ឡើយ។ ឯកសារយោង៖ (1) Gianluca Rizzo and Luciana Baroni : Nutrients. 2018 Jan;10(1): 43. (2) Mark Messina :Nutrients. 2016 Dec; 8(12):754.] ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

វីតាមីន & អាហារូបត្ថម្ភ សុខភាពស្រ្តី
ចែករំលែក
  • Apr 03, 2018 |
  • 7 ឆ្នាំមុន |
  • 5K មើល

វិធីសាស្រ្តធំ ៤យ៉ាងក្នុងការធ្វើរោគវិនិច្ឆ័យ ជំងឺមហារីកក្រពេញអូវែ

ជំងឺមហារីកក្រពេញអូវែ អាចនឹងត្រូវរកឃើញអំឡុងពេលទទួលបានការពិនិត្យសុខភាពជាប្រចាំ ដែលលទ្ធផលនៃការពិនិត្យបានបង្ហាញពីដុំសាច់នៅតំបន់ត្រគាក ឬគេអាចធ្វើការសន្និដ្ឋានតាមរយៈរោគសញ្ញាគួរឲ្យកត់សម្គាល់មួយចំនួនដែលបានបកស្រាយរួចមកហើយនៅក្នុងអត្ថបទ«“ជំងឺមហារីកក្រពេញអូវែ” ជាមូលហេតុមួយនៃការស្លាប់របស់ស្រ្តី» ។ ចំណែកការធ្វើរោគវិនិច្ឆ័យ និងការពិនិត្យជំងឺមហារីកក្រពេញអូវែអាចធ្វើឡើងតាមរយៈវិធីសាស្រ្តពិនិត្យដូចខាងក្រោម៖ 1.    ការពិនិត្យគ្លីនិក (Clinical examination) a ការពិនិត្យបែបគ្លីនិកនៅតំបន់ត្រគាក (អនុវត្តដោយវេជ្ជបណ្ឌិតផ្នែករោគស្រ្តី) ៖ ជាផ្នែកមួយនៃការធ្វើរោគវិនិច្ឆ័យផ្នែករោគស្រ្តី ដោយគ្រូពេទ្យនឹងធ្វើការពិនិត្យនៅតំបន់អាងត្រគាក ដើម្បីស្វែងរកពីវត្តមាននៃដុំសាច់ (Mass) ក៏ដូចជាហានិភ័យដែលវាអាចធ្វើការភ្ជាប់ខ្លួនទៅនឹងកោសិកាដែលនៅជុំវិញ។ អំឡុងពេលនៃការពិនិត្យ អ្នកជំនាញនឹងធ្វើការប៉ះផ្ទាល់លើតំបន់ក្រពេញអូវែតាមរយៈពោះ និងមាត់ស្បូន (អាចតាមចុងពោះវៀនធំចំពោះក្មេងស្រី) ដែលអាចអនុវត្តបានសម្រាប់ការពិនិត្យរោគស្រ្តីជាប្រចាំ ឬក្នុងករណីលេចឡើង នូវផលរំខាននានា។ b ការពិនិត្យរាងកាយទូទៅ (អនុវត្តដោយអ្នកជំនាញផ្នែកមហារីក) ៖ ចំពោះស្ថានភាពជំងឺក្នុងដំណាក់កាលធ្ងន់ធ្ងរ គ្រូពេទ្យនឹងពិនិត្យរកមើលសញ្ញា Ascites (ជាការប្រមូលផ្តុំជាតិទឹក ក្នុងប្រហោងពោះ) ការស្ទះចលនាពោះវៀន មានទឹកក្នុងស្រោមសួត និងការកើនឡើងទំហំ នៃក្រពេញទឹករងៃ ឬមានដុំសាច់ក្នុងសរីរាង្គផ្សេង (ដូចជា ដុំមហារីក Metastases ក្នុងថ្លើម)។ ការពិនិត្យបែបគ្លីនិកជាវិធីសាស្រ្តមានតមៃ្លថោក និងងាយស្រួលក្នុងករណីមានការសង្ស័យពីជំងឺមហារីកក្រពេញអូវែ ប៉ុន្តែវាមិនទាន់អាចឆ្លើយតបគ្រប់គ្រាន់ទៅនឹងអ្នកជំងឺដែលមានដុំសាច់នៅក្នុងក្រពេញអូវែ ឬតំបន់អាងត្រគាកនៅឡើយទេ។ 2.    ការពិនិត្យដោយវិទ្យុសកម្ម (Radiological Investigations) a ការថតឆ្លុះពោះដោយប្រើប្រាស់សំឡេង Ultrasonography (សម្រាប់ស្រ្តី និងក្មេងស្រី) និងការថតឆ្លុះមាត់ស្បូន Transvaginal ultrasonography (សម្រាប់ស្រ្តី)។ សម្រាប់ Transvaginal ultrasonography៖ គ្រូពេទ្យនឹងធ្វើការចាប់បានជារូបភាពនៃសរីរាង្គនៅតំបន់ត្រគាកថតដោយប្រើប្រាស់សំឡេង ultrasound តាមរយៈការស៊កបំពង់ចូលទៅក្នុងមាត់ស្បូន ដើម្បីរកមើលដុំមហារីកនៅក្រពេញអូវែ។ ការពិនិត្យបែបនេះមានភាពទ្រាំទ្របាន និងពុំសូវ មានតម្លៃថ្លៃ ដែលអាចប្រើក្នុងការធ្វើរោគវិនិច្ឆ័យដំបូង ប៉ុន្តែវាអាចមានភាពពិបាកក្នុងការ កំណត់បានពីស្ថានភាពដុំសាច់កម្រិតស្រាល (Benign) ឬធ្ងន់ធ្ងរ (malignant)។ ការពិនិត្យបែប Ultrasonography អាចបង្ហាញពីរោគសញ្ញាទឹកដក់ (Ascites) ឬមហារីកស្រោមពោះ (Peritoneal metastases) ដែលកោសិកាមហារីក ភ្ជាប់ទៅនឹងប្រហោងពោះ។   b វិធីសាស្រ្ត Magnetic Resonance Imaging (MRI) ឬវិធីសាស្រ្ត Computed tomography (CT-scan) ៖ ចំពោះការពិនិត្យតាមបែប MRI អាចផ្តល់ជាព័ត៌មានបន្ថែមពីលក្ខណៈនៃដុំសាច់ក្រពេញអូវែ ចំណែក CT-scan អាចផ្តល់ជាការកំណត់ពីប្រភេទនៃមហារីកក្រពេញអូវែ។ វិធីសាស្រ្តទាំងពីរបានជួយក្នុងការកំណត់ដំណាក់កាលនៃជំងឺ  ផែនការក្នុងការព្យាបាល និងគ្រប់គ្រងលទ្ធផលនៃ ការព្យាបាល ប៉ុន្តែវាមានតម្លៃថ្លៃជាងវិធីសាស្រ្តបែប Ultrasonography។ c ការថតឆ្លុះ X-ray (Chest X-ray)៖  ការពិនិត្យបែបនេះមានសារសំខាន់ក្នុងការកំណត់បាន នូវផ្នែករាងកាយណាមួយដែលត្រូវបានរងឥទ្ធិពលដូចជា សួត ជាដើម។ d វិធីសាស្រ្ត Positron-emission tomography – computed tomography (PET-CT)៖ ជាការពិនិត្យដោយធ្វើការបង្ហាញ ឲ្យកាន់តែច្បាស់ពីរូបភាពរចនាសម្ព័ន្ធ និងសកម្មភាពមេតាបូលីសរបស់កោសិកា។ PET-CT មានភាពជាក់លាក់ និងមានតម្លៃថ្លៃ ដែលពុំសូវត្រូវបានណែនាំសម្រាប់ការពិនិត្យដំបូងនោះទេ តែវាមានប្រយោជន៍ចំពោះដុំមហារីកដែលស្ថិតក្នុងដំណាក់កាលមានសកម្មភាពមេតាបូលីសខ្លាំង(ដូចជា ជំងឺមហារីកកោសិកាតូចនៃក្រពេញអូវែ)។ 3.    ការពិនិត្យសញ្ញាសម្គាល់ដុំមហារីក (ការធ្វើតេស្តឈាម) អង់ទីហ្សែន ១២៥ (CA 125) ដែលជាប្រូតេអ៊ីននៅលើផ្ទៃខាងលើនៃកោសិកាមហារីកក្រពេញអូវែ អាចនឹងមានការកើនឡើង ក្នុងកម្រិត ៨០% ចំពោះប្រភេទជំងឺមហារីក epithelial។ យ៉ាងណាមិញ សញ្ញាសម្គាល់នេះ នៅមិនទាន់មានភាពច្បាស់លាស់ និងគ្រប់គ្រាន់សម្រាប់ធ្វើរោគវិនិច្ឆ័យជំងឺមហារីកក្រពេញអូវែនោះទេដោយវាអាចបង្កភាពភាន់ច្រឡំទៅលក្ខខណ្ឌជំងឺមិនមែនជាមហារីក (ដូចជា ជំងឺស្បូន Endometriosis)។ ប្រតេអុីន CA 125 ត្រូវបានវាស់សម្រាប់ការធ្វើរោគវិនិច្ឆ័យចំពោះជំងឺដុំសាច់ក្នុងដៃស្បូន បន្ទាប់ពីទទួលបានការពិនិត្យតាមUltrasonography ដែលតេស្តនេះអាចប្រើបាន ដើម្បីគ្រប់គ្រងលទ្ធផលនៃការព្យាបាលបែបគីមី (Chemotherapy) និងសម្រាប់ការតាមដានបន្ទាប់ពីការព្យាបាល។  4.    ការពិនិត្យដុំមហារីក (Histopathological examination) ជាការពិនិត្យកោសិកាដុំមហារីកក្នុងមន្ទីរពិសោធន៍ ដែលដុំសាច់ត្រូវ បានយកមកតាមរយៈការកាត់ចេញ (Biopsy) ឬតាមការវះកាត់ (Radical surgery)។ វិធីសាស្រ្តនេះអាចផ្តល់ភាពច្បាស់លាស់ដល់ការធ្វើរោគវិនិច្ឆ័យ និងកំណត់បានពីលក្ខណៈរបស់ដុំមហា-រីកក្រពេញអូវែ អនុញ្ញាតឲ្យវេជ្ជបណ្ឌិតអាចដឹងពីប្រភេទរបស់មហារីក ដែលនាំឲ្យមានការកំណត់ពីវិធីសាស្រ្តព្យាបាលសម្រាប់អ្នកជំងឺនីមួយៗ។ ការប្រឹក្សាពីដំណាក់កាលនៃមហារីក ការរៀបចំផែនការព្យាបាល ទាមទារឲ្យធ្វើឡើងពីសំណាក់ វេជ្ជបណ្ឌិតផ្នែករោគស្រ្តី និងផ្នែកជំងឺមហារីក ដើម្បីធានាឲ្យបានពីការកំណត់ឲ្យបានច្បាស់ពីសា្ថនភាពជំងឺមហារីកក្រពេញអូវែ។  បកស្រាយដោយ ៖ វេជ្ជបណ្ឌិត Turobova Tatiana ឯកទេសជំងឺមហារីកចំពោះកូនក្មេង និងមហារីកទូទៅ ដែលសព្វថ្ងៃជាប្រធានផ្នែកមហារីក និងជាអនុប្រធាននៅ មន្ទីរពេទ្យសាកលវិទ្យាល័យអន្តរជាតិសែនសុខ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ជំងឺផ្សេងៗ សុខភាពស្រ្តី
ចែករំលែក
  • Apr 03, 2018 |
  • 7 ឆ្នាំមុន |
  • 3.6K មើល

ត្រូវបញ្ឈប់ការប្រើប្រាស់ និងទិញផលិតផលពីប្រភពទាំងពីរនេះ...

កាលពីថ្ងៃច័ន្ទ ២រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២ ខែមេសា ឆ្នាំ២០១៨  ក្រសួងសុខាភិបាលចេញផ្សាយនូវសេចក្តីប្រកាសជូនដំណឹងរបស់ ស្តីអំពី«គេហទំព័រឈ្មោះ Health and Beauty និងវេបសាយឈ្មោះ https://www.angkorhealth.com ដែលបាន និងកំពុងធ្វើការផ្សព្វផ្សាយឱសថបំប៉នសុខភាព និងគ្រឿងសម្អាង ដោយគ្មានច្បាប់អនុញ្ញាតពីក្រសួងសុខាភិបាល»។  ក្រសួងសុខាភិបាលបានលើកឡើងថា ប្រភពខាងលើបានផ្សព្វផ្សាយឱសថបំប៉នសុខភាព និងគ្រឿងសម្អាង ហួសពីការពិត ដោយគ្មានអំណះអំណាងច្បាស់លាស់។ ក្រសួងក៏សូមឲ្យប្រជាជនឈប់ប្រើប្រាស់ ឈប់ជឿតាមការឃោសនាអកុសល បោកប្រាស់ ភូតកុហក បំផ្លើសពីការគិតរបស់ជនខិលខូចមួយចំនួន និងជួយផ្សព្វផ្សាយបន្តឲ្យប្រជាពលរដ្ឋឈប់ទិញ ឬប្រើប្រាស់ផលិតផលតាមរយៈគេហទំព័រ និងវេបសាយខាងលើនេះ ស្របពេលដែលម្ចាស់ប្រភពត្រូវបញ្ឈប់ការផ្សព្វផ្សាយលក់ ឬចែកចាយ ផលិតផលឱសថ និងគ្រឿងសម្អាងជាបន្ទាន់។  ក្នុងករណីឃើញមានផលិតផលនេះត្រូវបានលក់ ឬចែកចាយនោះ សូមប្រញាប់ផ្តល់ព័ត៌មានជូនដល់នាយកដ្ឋានឱសថចំណីអាហារ បរិក្ខារពេទ្យ និងគ្រឿងសំអាងតាមរយៈទូរស័ព្ទលេខ ០៩៥ ៣៥៩ ៥៩៩/០១២ ៩៨៣ ៣៣៤។      សូមទទួលជ្រាបជាដំណឹង និងមានការប្រុងប្រយ័ត្នឲ្យបានខ្ពស់!!! ប្រភព ៖ ទំព័រហ្វេសប៊ុក ក្រសួងសុខាភិបាលនៃព្រះរាជាណាចក្រកម្ពុជា ©2018 រក្សាសិទ្ធិគ្រប់យ៉ាងដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Apr 03, 2018 |
  • 7 ឆ្នាំមុន |
  • 6.8K មើល

បំបាត់បញ្ហាអាល្លែកហ្ស៊ីជាមួយ Cetirizine

ឱសថ Cetirizine ដែលកំពុងមានលក់នៅលើទីផ្សារទាំងក្នុងទម្រង់គ្រាប់ ឬស៊ឺរ៉ូ ត្រូវបានប្រើប្រាស់សម្រាប់តម្រូវការរបស់បុគ្គលទូទៅដោយមិនចាំបាច់មានវេជ្ជបញ្ជា។ ជាទូទៅ Cetirizineជាឱសថមានប្រសិទ្ធភាព និងសុវត្ថិភាពសម្រាប់ដោះស្រាយបញ្ហាអាល្លែកហ្ស៊ី តែអ្នកប្រើប្រាស់ទាំងអស់ក៏គួរតែធ្វើការចាប់អារម្មណ៍ និងស្វែងយល់ពីសញ្ញាគ្រោះថ្នាក់ និងប្រុងប្រយ័ត្ននៅអំឡុងពេលប្រើប្រាស់ផងដែរ។ សកម្មភាពឱសថ Cetirizine ជាឱសថស្ថិតក្នុងក្រុម Antihistamineដែលមានមុខងារបន្ថយនូវរោគសញ្ញាអាល្លែកហ្ស៊ី ដែលមានដូចជា ហៀរសំបោរ ចេញទឹកភ្នែក រមាស់ភ្នែក ឬច្រមុះ កណ្តាស់ ឬឡើងកន្ទួលលើស្បែកជាដើម។ ឱសថមានសកម្មភាពដោយទៅបន្ថយការបញ្ចេញសារធាតុ Histamine ដែលរាងកាយតែងបញ្ចេញនៅរាល់ពេលប្រឈមទៅនឹងប្រតិកម្មអាល្លែកហ្ស៊ី យ៉ាងណាមិញ Cetirizineគ្មានប្រសិទ្ធភាពក្នុងការការពារជាមុនមិនឲ្យកើតមានកន្ទួលលើស្បែក ឬព្យាបាលប្រតិកម្មអាល្លែកហ្ស៊ីធ្ងន់ធ្ងរនោះទេ។ សកម្មភាពឱសថលើរាងកាយ ឱសថ Cetirizine ត្រូវបានស្រូបចូលយ៉ាងលឿនដោយកំហាប់ព្យាបាលខ្ពស់បំផុតមានឡើងបន្ទាប់ពីលេបបានរយៈពេលមួយម៉ោង ចំណែកប្រសិទ្ធភាពរបស់ឱសថមិនមានការប្រែប្រួលដោយសារចំណីអាហារនោះទេ ដោយគ្រាន់តែកំហាប់ព្យាបាលអាចកើតមានឡើងយឺតបន្តិចជាងក្នុងលក្ខខណ្ឌធម្មតា។ ឱសថត្រូវបានបញ្ចេញចោលតាមទឹកនោមក្នុងកម្រិត ៧០% និង ១០% ទៀត ត្រូវបញ្ចេញចោលតាមលាមក ដោយការបញ្ចេញចោលពាក់កណ្តាលធ្វើឡើងបន្ទាប់ពីរយៈពេល ៨ម៉ោង។ កម្រិត និងការប្រើប្រាស់ កម្រិតប្រើប្រាស់ធម្មតាសម្រាប់មនុស្សពេញវ័យគឺ ១០ មីលីក្រាមក្នុងមួយថ្ងៃ ក្រោមទម្រង់ជាឱសថគ្រាប់ ចំណែកឱសថក្រោមទម្រង់ជាស៊ឺរ៉ូអាចប្រើបានចំពោះកុមារក្នុងកម្រិត ៥mg/៥mL។ វេជ្ជបណ្ឌិតអាចឲ្យអ្នកប្រើប្រាស់ឱសថម្តងក្នុងកម្រិត៥មីលីក្រាម ពីរដងក្នុងមួយថ្ងៃ ប្រសិនបើស្ថានភាពអាល្លែកហ្ស៊ីមិនធ្ងន់ធ្ងរ។ គួរបញ្ជាក់ផងដែរ កម្រិត និងការប្រើប្រាស់នឹងមានការប្រែប្រួលទៅតាមអាយុ ស្ថានភាពជំងឺដែលអ្នកមិនគួរបន្ថយ ឬបង្កើនកម្រិតប្រើប្រាស់ដោយខ្លួនឯងនោះទេ។ ផលរំខានឱសថ សញ្ញាមួយចំនួនដែលអាចកើតមានជាទូទៅ និងមិនសូវធ្ងន់ធ្ងរមានដូចជា៖ • វិលមុខ ងងុយ • អស់កម្លាំង • ស្ងួតមាត់ • ចង្អោរ ក្អួត • ឈឺក្បាល។ ក្រៅពីផលរំខានខាងលើ ឱសថក៏អាចបណ្តាលឲ្យមានប្រតិកម្មធ្ងន់ធ្ងរផ្សេងទៀតដែលទាមទារឲ្យមានការសង្រ្គោះបន្ទាន់ដូចជា៖ ពិបាកដកដង្ហើម ហើមមុខ បបូរមាត់ អណ្តាត ឬបំពង់ក។ ម្យ៉ាងទៀត អ្នកគួរបញ្ឈប់ប្រើប្រាស់ឱសថភ្លាមៗ ប្រសិនអ្នកមានរោគសញ្ញាដូចជា ចង្វាក់បេះដូងញាប់ ឬមិនស្មើគ្នា ញ័រ ពិបាកគេង អារម្មណ៍មិនស្រណុក មានបញ្ហាគំហើញជាដើម។ អន្តរកម្មឱសថ • ត្រូវពិគ្រោះជាមួយគ្រូពេទ្យ ឬឱសថការីក្នុងករណីអ្នកប្រើប្រាស់ឱសថដែលបង្កឲ្យមានផលរំខានធ្វើឲ្យធីងធោងរួមបញ្ចូលគ្នាក្នុងពេលតែមួយដូចជា ឱសថបំបាត់ការឈឺចាប់ (Opioid) ឱសថបំបាត់ក្អក (Codeine,Hydrocodone) សារធាតុអាល់កុល ឱសថងងុយគេង (Alprazolam, Lorazepam, Zolpidem) ជាដើម • មិនត្រូវប្រើប្រាស់ឱសថ Hydroxyzine និងLevocetirizine នៅពេលកំពុងប្រើប្រាស់ Cetirizine ពីព្រោះឱសថទាំងនេះមានប្រសិទ្ធភាពប្រហាក់ប្រហែលគ្នា • មិនត្រូវប្រើប្រាស់ឱសថបំបាត់អាល្លែកហ្ស៊ីក្នុងទម្រង់ជាក្រែមដោយលាបលើស្បែក ជាមួយគ្នានឹងឱសថ Cetirizine ពីព្រោះវាអាចបង្កើននូវផលរំខាន។ បម្រុងប្រយ័ត្ន • ត្រូវប្រាប់ដល់គ្រូពេទ្យ ឬអ្នកមានជំនាញផ្នែកសុខាភិបាលមុនពេលប្រើប្រាស់ ក្នុងករណីអ្នកមានបញ្ហាអាល្លែកហ្ស៊ីជាមួយសារធាតុសកម្មក្នុងឱសថ • ត្រូវពិគ្រោះជាមួយគ្រូពេទ្យក្នុងករណីមានបញ្ហាតម្រងនោម ឬជំងឺថ្លើម មុនពេលប្រើប្រាស់ឱសថ • ដោយសារផលរំខានធ្វើឲ្យងងុយ និងធីងធោងរបស់ឱសថ នោះអ្នកត្រូវចៀសវាងបើកបរ ឬបញ្ជាម៉ាស៊ីន • ត្រូវប្រើដោយប្រុងប្រយ័ត្នក្នុងករណីអ្នកមានផ្ទៃពោះ និងស្ត្រីកំពុងបំបៅដោះកូន។ គួរបញ្ជាក់ផងដែរ ឱសថ Cetirizine ដែលកំពុងចរាចរនៅលើទីផ្សារស្ថិតនៅក្រោមឈ្មោះដូចជា Cetrisyn, Zyrtec, Aller-Tec ជាដើម។ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ឱសថ
ចែករំលែក
  • Apr 03, 2018 |
  • 7 ឆ្នាំមុន |
  • 4.3K មើល

ធ្វើរឿងទាំងនេះ ដើម្បីទិញផលិតផលថែរក្សាសម្រស់ដូចអ្នកជំនាញ

មិត្តៗនារីភាគច្រើនប្រាកដជាមានភាពរីករាយ នៅរាល់ពេលដើរទិញផលិតផលថែរក្សាសម្រស់ ដើម្បីបង្កើនភាពស្រស់ស្អាត និងជំនឿចិត្តដល់ខ្លួនឯង ហើយអ្នកខ្លះក៏បានចាត់ទុកការដើរshoppingផលិតផលទាំងនោះ ជាឋានសួគ៌របស់សុភាពនារីទាំងឡាយទៀតផង។ ស្របពេលដែលមានភាពសម្បូរបែប និងទាន់សម័យនិយម ផលិតផលថែរក្សាសម្រស់ និងគ្រឿងសម្អាងក៏មានច្រើនម៉ាក   ច្រើនប្រភេទ និងច្រើនជម្រើសសម្រាប់ឲ្យអ្នកស្រឡាញ់សម្ផស្ស និងភាពស្រស់ស្អាត ធ្វើការជ្រើសរើស ក៏ដូចជាសាកល្បងប្រើប្រាស់។ ជាទូទៅ ប្រហែលជាមានអ្នកខ្លះមានការលំបាកក្នុងការជ្រើសរើសផលិតផលដោយហេតុថាមានជម្រើសច្រើន ដែលមានលក្ខណៈសម្បត្តិខុសៗពីគ្នា ហេតុនេះហើយ ទើបយើងខ្ញុំសូមនាំមកជូននូវគន្លឹះខាងក្រោមនេះដែលនឹងជួយសម្រួលដល់ដំណើរការទិញរបស់អ្នក… ស្វែងយល់តាមរយៈបុគ្គលិកផ្នែកលក់ បុគ្គលិកផ្នែកលក់ភាគច្រើនបានឆ្លងកាត់ការបណ្តុះបណ្តាល និងបង្ហាត់បង្ហាញច្រើនអំពីផលិតផលដែលខ្លួនត្រូវលក់ជូនដល់អតិថិជន ហើយពួកគាត់តែងតែរង់ចាំស្វាគមន៍ ប្រឹក្សា និងផ្តល់យោបល់ដល់លោកអ្នកជានិច្ច។ ដោយសារតែពួកគាត់ជាអ្នកជំនាញលើផលិតផលទាំងនោះស្រាប់លោកអ្នកគួរតែធ្វើការសាកសួរពួកគាត់ ដើម្បី ធ្វើការស្រាយនូវចម្ងល់ ក៏ដូចជាសំណួរទាំងឡាយដែលមានក្នុងចិត្តអំពីប្រភេទ ពណ៌ ឬគុណប្រយោជន៍នៃផលិតផលដែលស័ក្តិសមបំផុតសម្រាប់អ្នក។ នាំមិត្តភក្តិទៅជាមួយ ការដែលមានគ្នាទៅជាមួយនឹងជួយដល់អ្នកក្នុងការសម្រេចចិត្ត ប៉ុន្តែក៏ត្រូវប្រាកដផងដែរថា គេជាមនុស្សស្មោះត្រង់ និងមានចំណូលចិត្តក្នុងការប្រើប្រាស់គ្រឿងសម្អាងដូចជាអ្នកដែរ ទើបលទ្ធផលមិនសូវប្រឈមនឹងការខកចិត្ត។ ថ្វីត្បិតថា នៅកន្លែងលក់តែងតែមានបុគ្គលិកផ្នែកលក់ជាអ្នកប្រឹក្សាដូចដែលបានលើកឡើងខាងលើក៏ពិតមែន តែពួកគេមិនប្រាកដថាដឹងច្បាស់អំពីទម្លាប់ ចំណូលចិត្ត និងជាពិសេសលទ្ធភាពក្នុងការចំណាយរបស់អ្នកឡើយ។ មានមិត្តភក្តិនៅក្បែរ អ្នកអាចនឹងបានផលិតផលដែលស័ក្តិសមនឹងអ្នក ទាំងការប្រើប្រាស់ និងធនធាន។ ប្រើប្រាស់ស្មាតហ្វូន សម្រាប់ផលិតផលថ្មីដែលអ្នកមិនធ្លាប់ស្គាល់ ឬប្រើប្រាស់ពីមុនមក អ្នកអាចធ្វើការស្វែងរក «ការបញ្ចេញមតិយោបល់» នៅលើអ៊ីនធើណែត ដើម្បីឲ្យអ្នកអាចដឹងយ៉ាងរហ័សថាតើអ្នកធ្លាប់ប្រើប្រាស់កន្លងមកនិយាយបែបណាខ្លះអំពីផលិតផលទាំងនោះ? ស្របពេលជាមួយគ្នា អ្នកក៏អាចស្វែងរកផលិតផលនោះនៅហាងផ្សេងទៀត ក្រែងលោមានផលិតផលដូចគ្នាដាក់លក់នៅទីណាផ្សេងដែលមានតម្លៃទាបជាងនេះ ប៉ុន្តែសូមកុំភ្លេចថាការដែលបានឃើញ និងសាកផលិតផលដោយផ្ទាល់ ទើបអាចឲ្យអ្នកមានទំនុកចិត្តជាងការដែលគ្រាន់តែឃើញតម្លៃទាបមួយមុខនៅហាងផ្សេង។ យល់ដឹងពីសមាសធាតុដែលស្បែកអ្នកត្រូវការ ជាពិសេស គឺផលិតផលថែរក្សាស្បែក ដែលអ្នកគួរយល់ដឹងអំពីសមាសធាតុដែលស្បែករបស់អ្នកត្រូវការ។ អ្នកគួរតែធ្វើការសាកសួរ និងប្រឹក្សាយោបល់ជាមួយអ្នកជំនាញ ហើយធ្វើការកត់ចំណំាទុក ដើម្បីពិនិត្យមើលលើសមាសធាតុផ្សំដែលមាននៅក្នុងផលិតផលដែលអ្នកកំពុងជ្រើសរើស ឬអត់។ ចុះឈ្មោះជាអតិថិជនសមាជិក ផលិតផលភាគច្រើនតែងតែមានកម្មវិធីពិសេសសម្រាប់អតិថិជនប្រចាំរបស់ខ្លួន ជាពិសេសគឺកម្មវិធីទិញសន្សំពិន្ទុ។ បើសិនជាអ្នកតែងតែទិញផលិតផលណាមួយ ឬនៅកន្លែងណាមួយជាប្រចាំនោះ កុំភ្លេចចុះឈ្មោះជាសមាជិករបស់ពួកគេ ដើម្បីទទួលបានការផ្តល់ជូនពិសេស រួមមានការបញ្ចុះតម្លៃផលិតផល ការផ្តល់ជូនបន្ថែម ការផ្តល់កាដូពិសេស ឬការផ្តល់ជូននូវផលិតផលសម្រាប់សាក(sample)សម្រាប់ប្រើប្រាស់ជាដើម។ ស្នើសុំផលិតផលសម្រាប់សាក ការធ្វើបែបនេះនឹងធានានូវសុវត្ថិភាពសម្រាប់អ្នកដែលអាចឲ្យអ្នកដឹងជាមុនទេថាតើអ្នកអាចនឹងមានប្រតិកម្ម ឬអាល្លែកហ្ស៊ីនឹងផលិតផលនោះឬអត់ ក៏ដូចជាបានដឹងខ្លះៗថាតើ វាមានប្រសិទ្ធភាពដែរឬទេ? មុននឹងធ្វើការចំណាយប្រាក់ទៅលើវា ដែលអាចឲ្យចៀសវាងនូវការខាតបង់ទាំងប្រាក់កាស និងសុខភាពស្បែករបស់អ្នក។ ទៅទិញដោយមុខទទេ (មិនចាំបាច់ផាត់មុខ) ក្នុងករណីអ្នកត្រូវការគ្រឿងតុបតែងមុខជាលក្ខណៈឈុត ឬច្រើន ដើម្បីកុំឲ្យពិបាកក្នុងការលាងសម្អាត ឬតុបតែងបន្ថែមពីលើគ្រឿងសម្អាងដែលអ្នកតុបតែងស្រាប់ អ្នកគួរតែទៅទីនោះដោយមុខទទេ ដើម្បីមានឱកាសក្នុងការសាកល្បងនូវផលិតផលដែលអ្នកកំពុងត្រូវការផ្ទាល់តែម្តង ហើយអ្នកក៏អាចមើលដឹងភ្លាមៗថាតើវានឹងបង្ហាញចេញបែបណាដែរនៅលើមុខរបស់អ្នក។ យ៉ាងណាមិញ កុំភ្លេចប្រើប្រាស់ជក់ ឬប៉ុងផ្សេងពីគេ ដើម្បីបង្ការនូវការឆ្លងបាក់តេរី ឬបញ្ហាស្បែកផ្សេងៗ។ មានជំហរក្នុងចិត្តច្បាស់លាស់ថាខ្លួនឯង ត្រូវការអ្វីខ្លះ? មានផលិតផលខ្លះក៏អាចរកទិញបាននៅកន្លែងផ្សេង និងពេលក្រោយដែរ សូមកុំភ្លេចខ្លួន ដោយសារតែការឃើញមានច្រើននៅទីនោះស្រាប់ ហើយក៏ត្រូវចំណាយច្រើនទៅលើផលិតផលដែលមិនចាំបាច់។ វានឹងជាការប្រសើរ ប្រសិនបើអ្នកដឹងច្បាស់ក្នុងចិត្តថា តើអ្នកត្រូវការអ្វីខ្លះជាចាំបាច់ក្នុងពេលនេះ? ត្រូវប្រើប្រាស់អ្វីខ្លះជាប្រចាំ? ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

គន្លឹះសុខភាព ស្បែក កាមរោគ​ និងសម្រស់
ចែករំលែក
  • Apr 02, 2018 |
  • 7 ឆ្នាំមុន |
  • 3.8K មើល

សុខភាពអាជីវកម្មរបស់ឱសថស្ថានក្នុងស្រុក មានបញ្ហាឬទេ?

ឱសថស្ថានអាចចាត់ទុកបានថាជាកន្លែងផ្តល់សេវាសុខភាពដំបូងគេ   ដែលប្រជាជនភាគច្រើនគិតដល់ កាលណាមានតម្រូវការទាក់ទងនឹងឱសថ ឬដំបូន្មានសុខភាពណាមួយ។ ដូចនេះ ឱសថស្ថានក្នុងសហគមន៍គឺជាកន្លែងដែលអាចមានឱកាសទំនាក់ទំនងជាមួយនឹងអ្នកជំងឺ និងប្រជាជនទូទៅផ្ទាល់បានយ៉ាងទូលំទូលាយ ដែលធ្វើឲ្យវាក្លាយទៅជាផ្នែកមួយដ៏សំខាន់ក្នុងការផ្តល់ឲ្យអ្នកជំងឺនូវទំនុកចិត្តលើវិស័យសុខាភិបាល។ ជាក់ស្តែង  នៅប្រទេសកម្ពុជាឱសថស្ថានសហគមន៍បានរីកដុះដាលនៅស្ទើរគ្រប់ទីកន្លែង    និងគ្រប់ខេត្តក្រុងទូទាំងផ្ទៃប្រទេសដែលធ្វើឲ្យការទទួលបានសេវាសុខភាពជាពិសេសទាក់ទងនឹងផ្នែកឱសថកាន់តែកើនឡើងជាបន្តបន្ទាប់។   ទោះយ៉ាងណាក៏ដោយ   ឧបសគ្គមួយចំនួននៅក្នុងដំណើរការរបស់ឱសថស្ថានត្រូវបានរាយការណ៍មកថា    អាចប៉ះទង្គិចដល់សុខភាពផ្ទាល់របស់អាជីវកម្មឱសថស្ថាន   និងអាចឈានដល់ការប៉ះទង្គិចខ្លះលើការផ្តល់សេវាសុខភាពទៅកាន់អ្នកជំងឺ ក៏ដូចជាអតិថិជនទូទៅផងដែរ ហើយទាំងនេះ ក៏បានធ្វើឲ្យលេចចេញជារូបភាពខ្លះៗរួចមកហើយនូវការបាត់បង់ទំនុកចិត្ត និងការវាយប្រហារពីអ្នកជំងឺមួយចំនួនទៅលើវិស័យឱសថសាស្ត្រ  ព្រមទាំងវិស័យសុខាភិបាលទាំងមូល ដែលពេលខ្លះរូបភាពទាំងនោះ  ហាក់ដូចជាត្រូវបានពន្លើសហួសពីការពិតទៀតផង។    ខណៈនេះផងដែរ ទំនោរនៃទីផ្សារសេរី   និងសមាហរណកម្មបានគ្របដណ្តប់លើវិស័យមួយចំនួន រួចមកហើយនៅកម្ពុជាដោយក្នុងនោះដូចដែលយើងបានឃើញស្រាប់អំពីការរីកដុះដាលដូចផ្សិតនៃអាជីវកម្មផ្នែកចំណីអាហារ និងហាងកាហ្វេដែលមានម៉ាកយីហោជាមួយនឹងសក្តានុពលពីបរទេសជាដើម។   សំណួរសួរថា «ប្រសិនបើពុំមានដំណោះស្រាយណាមួយចំពោះបញ្ហាលាក់មុខនៅក្នុងឱសថស្ថានក្នុងស្រុក តើអាជីវកម្មក្នុងវិស័យនេះ អាចនឹងត្រូវប្រឈមនឹងការវាយប្រហារ និងការដណ្តើមទីផ្សារនេះដែរ ឬយ៉ាងណា?»     តើឱសថស្ថានក្នុងស្រុកគួរធ្វើយ៉ាងណាដើម្បីរក្សាជំហររបស់ខ្លួន និងធ្វើការដោះស្រាយបានទាន់ពេលវេលា ខណៈដែលពួកគេសឹងតែមិនមានពេលគ្រប់គ្រាន់ក្នុងការសម្លឹងមើលបញ្ហាដែលនឹងអាចកើតឡើងផងនោះ?  ជាការពិតណាស់   ឱសថស្ថានជាច្រើនបានព្យាយាមរក្សាជំហររបស់ខ្លួននៅលើទីផ្សារ ដើម្បីផ្តល់សេវាឱសថទៅកាន់ប្រជាជនទូទៅតាមរយៈមធ្យោបាយផ្សេងៗ មិនថាជាការបង្កើនកម្លាំងបុគ្គលិក  ការបំពាក់ប្រព័ន្ធទំនើបៗ ការពង្រីកទីតាំង ការបង្កើនមុខឱសថ និងទំនិញដែលជាតម្រូវការផ្នែកសុខភាពជាដើម។ ទោះយ៉ាងណាក៏ដោយ ប្រតិបត្តិការក្នុងការផ្តល់ឲ្យអ្នកជំងឺនូវសេវាកម្មសុខភាពល្អប្រសើរនេះ ពេលខ្លះឱសថស្ថានខ្លួនឯងផ្ទាល់បែរជាអាចប្រឈមនឹងការលំបាក និងបង្កើនការចំណាយទាំងពេលវេលាទាំងថវិកាកាន់តែច្រើនទៅវិញ។ ដូចនេះ ដើម្បីអាចបន្តការរក្សាជំហរក្នុងប្រតិបត្តិការទាំងនេះឲ្យសមស្របទៅនឹងតម្រូវការនាពេលបច្ចុប្បន្ន ឱសថស្ថានទាំងអស់ក៏គួរថែទាំលើសុខភាពអាជីវកម្មផ្ទាល់ផងដែរ ដើម្បីអាចទ្រទ្រង់នៅអំឡុងពេលធ្វើការផ្លាស់ប្តូរទៅរកភាពល្អប្រសើរទាំងនេះ។  តើឱសថស្ថានក្នុងស្រុកគួរធ្វើដូចម្តេចលើឧបសគ្គចំពោះមុខ? ការព្យាយាមជាលក្ខណៈបុគ្គល គឺជាអ្វីដែលអាជីវកម្មនីមួយៗមិនអាចខ្វះបាន ក៏ប៉ុន្តែ ក្នុងការរក្សាជំហរ និងការរីកចម្រើនរយៈពេលវែង ការរួមគ្នាជាសហគមន៍គឺជាជម្រើសដ៏ល្អមួយដែលឱសថស្ថានក្នុងស្រុកទាំងអស់មិនគួរខកខានក្នុងការចូលរួម ដើម្បីលើកស្ទួយវិស័យឱសថសាស្ត្រ ស្របពេលលើកស្ទួយសុខភាពរបស់អាជីវកម្មនៅក្នុងឱសថស្ថានប្រកបដោយប្រសិទ្ធភាព និងសុវត្ថិភាព។ ហេតុនេះទើប សហគមន៍ ហេលស៍ថាម សម្រាប់ឱសថស្ថាន ត្រូវបានបង្កើតឡើងដោយក្រុមហ៊ុន ហេលស៍ថាម ខបផូរេសិន (HEALTH TIME CORPORATION) ដើម្បីចូលរួមជាមួយនឹងឱសថស្ថានក្នុងស្រុកទាំងអស់ក្នុងការអភិវឌ្ឍឱសថស្ថាន តាមរយៈការផ្តល់ជាប្រព័ន្ធដែលអនុញ្ញាតឲ្យឱសថស្ថានទាំងអស់សម្រួលកិច្ចដំណើរការអាជីវកម្ម  ដោយប្រើប្រាស់គេហទំព័រតែមួយគឺ www.healthtime.tips  ដែលបច្ចុប្បន្ន ប្រព័ន្ធនេះមានមុខងារសំខាន់ៗដូចជា៖ •ស្វែងរកមុខឱសថលើទីផ្សារ ព័ត៌មាន និងចំណេះដឹងឱសថជាភាសាខ្មែរ •កុម៉្មង់ទិញឱសថបានគ្រប់ពេលវេលា និងគ្រប់ទីកន្លែង (ពីក្រុមហ៊ុនឱសថ និងឱសថស្ថានបោះដុំនានា) •គ្រប់គ្រងទិន្នន័យទិញលក់តាមរយៈរបាយការណ៍ស្វ័យប្រវត្តិ។ ក្រៅពីនោះ តាមរយៈគេហទំព័រនេះ ឱសថស្ថាននីមួយៗក៏អាចបង្កើតជាទំព័រអាជីវកម្មដាក់បង្ហាញទៅកាន់ប្រជាជនទូទៅដើម្បីធ្វើការស្វែងរកទីតាំង ព្រមទាំងព័ត៌មានអំពីឱសថស្ថានរបស់ខ្លួនបានផងដែរ។ ស្របពេលជាមួយគ្នា ឱសថស្ថាននីមួយៗ ក៏អាចបង្កើននូវទំនាក់ទំនងជាមួយដៃគូអាជីវកម្ម ក៏ដូចជាអតិថិជន ឬអ្នកជំងឺរបស់ខ្លួនបានថែមមួយកម្រិតទៀតតាមរយៈការចែករំលែកចំណេះដឹង ឬព័ត៌មានសុខភាពផ្សេងៗ ក៏ដូចជាការឆ្លើយតបនានានៅលើទំព័រអាជីវកម្មនេះ។ តាមរយៈមុខងារទាំងនេះ ឱសថស្ថានលក់ដុំ និងរាយទាំងអស់អាចធ្វើការទំនាក់ទំនងក្នុងអាជីវកម្មរបស់ខ្លួនបានកាន់តែងាយស្រួលជាពិសេសជាមួយនឹងក្រុមហ៊ុនចែកចាយឱសថដោយមិនចាំបាច់ពឹងផ្អែកទាំងស្រុងលើកម្លាំងរបស់អ្នកតំណាងលក់ឱសថ។ លើសពីនោះ ពួកគេក៏អាចកាត់បន្ថយការខាតបង់មួយចំនួនដោយសារកំហុសក្នុងរបាយការណ៍ ឬបញ្ជីទំនិញ ព្រមទាំងចំណេញពេលវេលា និងកម្លាំងពលកម្មក្នុងដំណើរការឱសថស្ថានខ្លះៗដូចជា ការស្វែងរកឱសថ និងព័ត៌មានផ្សេងៗ ជាពិសេសគឺការកុម៉្មង់ទិញឱសថ និងត្រួតពិនិត្យបញ្ជី ឬស្តុកទំនិញតែម្តង។ ជាមួយនឹងអត្ថប្រយោជន៍ទាំងនេះ  ឱសថស្ថានក៏នឹងអាចកាត់បន្ថយការចំណាយពេលវេលាទៅលើប្រតិបត្តិការប្រចាំថ្ងៃខ្លះៗ ហើយផ្ទុយមកវិញអាចចំណាយពេលវេលាបានកាន់តែមានប្រសិទ្ធភាព ដើម្បីជាការរីកចម្រើននៃឱសថស្ថានរបស់ខ្លួន ព្រមទាំងអាចផ្តល់ភាពយកចិត្តទុកដាក់កាន់តែប្រសើរចំពោះអតិថិជន។ ពិតប្រាកដណាស់ ប្រព័ន្ធដែលអភិវឌ្ឍទៅតាមបច្ចេកវិទ្យាថ្មី អាចត្រូវបានមើលឃើញថាជាភាពស្មុគស្មាញសម្រាប់ឱសថស្ថានក្នុងស្រុកក្នុងការប្រើប្រាស់ជាលើកដំបូង ក៏ប៉ុន្តែជាក់ស្តែងបច្ចេកវិទ្យាក្នុងឱសថស្ថានបែបទំនើប ត្រូវបានប្រើប្រាស់រួចមកហើយនៅប្រទេសអភិវឌ្ឍជាច្រើន។ នៅចុងបញ្ចប់ ការសហការណ៍ និងជួយគ្នាជាលក្ខណៈសហគមន៍ ក៏ដូចជាការធ្វើការស្ថាបនាកែលំអជាបន្តបន្ទាប់ នឹងផ្តល់ឲ្យឱសថស្ថានរីកចម្រើន រឹងមាំជាមួយនឹងភាពងាយស្រួលរបស់បច្ចេកវិទ្យា និងភាពកក់ក្តៅពីសហគមន៍។ ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

អាជីព និងការសិក្សា
ចែករំលែក
Top