Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
ភាសាខ្មែរ ភាសាខ្មែរ
English English
ចូលគណនី
Createx Logo
  • Apr 02, 2019 |
  • 6 ឆ្នាំមុន |
  • 3.6K មើល

ការថែទាំ និងព្យាបាលស្បែកមុខតាមបច្ចេកវិទ្យាទាន់សម័យ

សម្រស់លើផ្ទៃមុខ គឺជាកត្ដាដ៏សំខាន់សម្រាប់បុរសស្រ្ដី ដូច្នេះ យើងត្រូវរិះរកវិធីសាស្រ្ដព្យាបាលមួយដែលមានប្រសិទ្ធភាព ដើម្បីជួយឲ្យមុខរបស់យើងស្អាតស្រស់ថ្លា និងក្មេងជាងវ័យ ។ ការមានផ្ទៃមុខស្រស់ស្អាត នាំឲ្យយើងមានទំនុកចិត្ដក្នុងការទំនាក់ទំនង មានអារម្មណ៍ស្រស់ស្រាយ និងទទួលបានភាពទាក់ទាញក្នុងក្រសែភ្នែករបស់មនុស្ស នៅពេលយើងចូលរួមកម្មវិធីពិសេសៗ ឬទៅណាមកណាម្ដងៗ ហើយភាពស្រស់ស្អាតនេះ ក៏ធ្វើឲ្យជីវិតរបស់យើងមានសុភមង្គលផងដែរ ។ ការទទួលការថែទាំ និងការព្យាបាលពុំត្រឹមត្រូវស្របតាមមាត្រដ្ឋាន មិនត្រឹមតែធ្វើឲ្យលោកអ្នក ខាតថវិកា និងពេលវេលាប៉ុណ្ណោះទេ វាថែមទាំងនាំឲ្យលោកអ្នក មានបញ្ហាស្បែកមុខ មុខឡើងមុន ស្បែកមុខយារធ្លាក់ មុខស្ងួតជ្រុល ឬឡើងខ្លាំញ់ជ្រុលទៀតផង។ លោកអ្នកគួរតែស្វែងយល់ពីការថែទាំ និងព្យាបាលស្បែកមុខស្របតាមបច្ចេកទេសព្យាបាល ដោយមានការប្រើប្រាស់ម៉ាស៊ីន និងផលិតផលបូកបញ្ជូលគ្នា ដើម្បីជួយឲ្យស្បែកមុខរបស់លោកអ្នកភ្លឺថ្លាក្មេងជាងវ័យ តាមរយៈការទទួលការថែទាំយ៉ាងល្អ និងត្រឹមត្រូវទៅលើការបំបាត់មុន បំបាត់ស្នាម ជម្រុះកោសិកាចាស់ៗ ដែលធ្វើឲ្យស្បែកមុខភ្លឺថ្លា បន្តឹងស្បែកមុខឲ្យតឹងណែន បំបាត់ភាពជ្រីវជ្រូញ និងជួយឲ្យសម្រស់ស្រស់ស្អាតក្មេងជាងវ័យ។ គ្លីនិកហ្វេសឡាញ ផ្តល់ជូនការថែទាំស្បែកមុខស្របតាមបច្ចេកវិទ្យាទាន់សម័យ ដែលលោកអ្នកអាចជឿទុកចិត្ដបាន ។ លោកអ្នកអាចទទួលការព្យាបាលស្បែកដោយម៉ាស៊ីនទំនើបទាន់សម័យដូចជា Micro-peeling, Micro-needling, Oxygen Cleanse, Aqua Peel, Oxyjet & ATP, Maintaining facial ។ ភាពពិសេសរបស់គ្លីនិកហ្វេសឡាញ គឺតែងតែផ្តល់ការប្រឹក្សាជាមួយអ្នកជំនាញ និងអ្នកឯកទេសថែរក្សាសម្រស់ជាមុនសិន មុននឹងណែនាំអតិថិជនឲ្យប្រើប្រាស់សេវាកម្មណាមួយ ។ លោកអ្នកអាចអញ្ជើញមក និងទំនាក់ទំនង គ្លីនិកហ្វេសឡាញ តាមរយៈ -អាសយដ្ឋាន ៖ ផ្ទះលេខ ១៧០ ផ្លូវ ៥១ សង្កាត់បឹងកេងកង១ ខណ្ឌចម្ការមន រាជធានីភ្នំពេញ -ទូរស័ព្ទលេខ ៖ 015 234 589(Eng) /086 683 234(Kh) -អ៊ីម៉ែល ៖ sales@facelinecambodia.com ៕

ស្បែក កាមរោគ​ និងសម្រស់ ស្បែក កាមរោគ​ និងសម្រស់
ចែករំលែក
  • Apr 02, 2019 |
  • 6 ឆ្នាំមុន |
  • 3.4K មើល

អ្នកអាចកំពុងមានជំងឺផ្លូវចិត្តទាក់ទង Eating Disorders

នាពេលបច្ចុប្បន្ន មនុស្សជាច្រើនបានកំពុងព្យាយាមសម្រកទម្ងន់ ដើម្បីទទួលបានរាងកាយតូចច្រឡឹងដូចជាតារាម៉ូឌែល ដោយពួកគេយល់ថាកាន់តែស្គមកាន់តែស្អាត។ ហេតុនេះការបង្អត់អាហារជាជម្រើសទីមួយដែលពួកគេគិតដល់! ប៉ុន្តែសតិអារម្មណ៍ដែលតែងស្រមៃដល់ការសម្រកទម្ងន់នេះបានធ្វើឲ្យពួកគេមានបញ្ហាផ្លូវចិត្តមួយប្រភេទឈ្មោះថា Eating Disorders។ Eating Disorders គឺជាជំងឺផ្លូវចិត្តដែលប៉ះពាល់ដល់អារម្មណ៍ដែលអ្នកមានចំពោះអាហារ និងរបៀបដែលអ្នកមានគិតអំពីរាងកាយរបស់អ្នកផ្ទាល់។ វានឹងបង្កជាបញ្ហាធ្ងន់ធ្ងរ ដែលអាចប៉ះពាល់ដល់សុខភាពរាងកាយ និងចិត្ត ព្រមទាំងអាចជះឥទ្ធិពលដល់សកម្មភាពប្រចាំថ្ងៃ ការងារ ទំនាក់ទំនងគ្រួសារ សង្គម និងអាចគំរាមកំហែងដល់អាយុជីវិតទៀតផង។ ជាទូទៅអ្នកដែលកំពុងមានបញ្ហាជាមួយ Eating Disorders  តែងទទួលបាននូវអារម្មណ៍អវិជ្ជមានដូចខាងក្រោម៖ • ពិបាកក្នុងការគ្រប់គ្រងអារម្មណ៍ និងពិបាកក្នុង  ការដោះស្រាយបញ្ហាដែលកំពុងប្រឈម • អន្ទះអន្ទែង រសេះរសោះ • មានអារម្មណ៍ខ្មាសអៀន ខុសឆ្គង ឬបរាជ័យ ក្នុងកិច្ចការងារ • កាន់តែមានការប្រុងប្រយ័ត្ន ដោយយល់ថាអ្នក ដទៃកំពុងមើល និងតាមដានខ្លួន • ភ័យខ្លាច និងបាត់បង់ទំនុកចិត្ត • គិតច្រើន និងខ្វល់ខ្វាយជានិច្ច • យល់ថាឯកា  គ្មានទីកន្លែងណាដែលស័ក្តិសម។ លទ្ធផលផ្លូវចិត្តទាំងអស់នេះសុទ្ធតែបណ្តាលមកពីភាពប្រែប្រួល និងការខូចខាតសុខភាពរាងកាយ ដែលមានជាការប្រែប្រួលអ័រម៉ូន និងភាពមិនប្រក្រតីនៃដំណើរការរបស់សរីរាង្គផ្សេងៗ។ សូមសាកល្បងឆ្លើយនឹងសំណួរ ៩ ខាងក្រោម ដើម្បីបញ្ជាក់ថាតើអ្នកកំពុងមានបញ្ហានេះ ឬយ៉ាងណា៖ 1. តើអ្នកតែងតែគិតអំពីចំណីអាហារដែលត្រូវញ៉ាំ ការតមអាហារ និងទម្ងន់មែនទេ? 2. តើអ្នកឧស្សាហ៍បង្អត់អាហារខ្លួនឯង បើទោះជាឃ្លានក៏ដោយ? 3. តើអ្នកតែងបន្ទោសខ្លួនឯង និងស្តាយក្រោយជានិច្ច បន្ទាប់ញ៉ាំអាហាររួច (ដោយគិតថាអ្នកមិនគួរញ៉ាំល្អជាង)? 4. រាល់ពេលអ្នកញ៉ាំអាហារម្តងៗ តើអ្នកមិនអាចគ្រប់គ្រងបរិមាណដែលអ្នកគួរញ៉ាំបានមែនទេ? 5. តើអ្នកមានអារម្មណ៍សប្បាយរីករាយ នៅពេលអ្នកមិនបានញ៉ាំអាហារឬ? 6. តើអ្នកតែងមានអារម្មណ៍ស្មុគស្មាញ និងពិបាកចិត្ត ប្រសិនបើអ្នកមិនបានស្រកដល់ទម្ងន់ដែលអ្នកចង់បាន? 7. តើវដ្តរដូវរបស់អ្នកតែងមកមិនទៀង និងខកខានជានិច្ចមែនទេ (ចំពោះស្ត្រី)? 8. តើអ្នកតែងព្យាយាមប្រើប្រាស់វិធីសាស្ត្រជម្រុះអាហារដែលអ្នកបានបរិភោគរួចចោល ដោយអាចមានជាវិធីសាស្រ្តក្អួតចេញ ប្រើថ្នាំធ្វើឲ្យរាក ថ្នាំបញ្ចុះទឹកនោម ឬលាមក? 9. តើអ្នកបានសង្កេតឃើញថាខ្លួនឯងមានសញ្ញានៃការមិនបានទទួលសារជាតិចិញ្ចឹមពីអាហារគ្រប់គ្រាន់ ដែលអាចមានជា   ជ្រុះសក់ ស្បែកស្ងួត អស់កម្លាំង វិលមុខមែនឬទេ? ប្រសិនបើអ្នកបានកំពុងតែមានសញ្ញាទាំងនេះ សូមពិភាក្សាជាមួយអ្នកជំនាញ និងក្រុមគ្រូពេទ្យឲ្យបានកាន់តែឆាប់កាន់តែប្រសើរ។ ថ្វីត្បិតការសម្រកទម្ងន់គឺជាគោលដៅដែលអ្នកចង់បាន ប៉ុន្តែសុំកុំបណ្តោយឲ្យបញ្ហានេះគ្រប់គ្រងលើរូបអ្នកវិញឲ្យសោះ! ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

សុខភាពផ្លូវចិត្ត និងកំសាន្ត
ចែករំលែក
  • Apr 01, 2019 |
  • 6 ឆ្នាំមុន |
  • 8.3K មើល

ឈប់ពន្យារកំណើតភ្លាមអាចមានកូនឬទេ?

ការប្រើថ្នាំពន្យារកំណើតមិនមែនមានន័យថាស្ត្រីមិនចង់មានគភ៌នោះទេ ជាក់ស្តែង ការពន្យារកំណើតគ្រាន់តែជាមធ្យោបាយទាំងឡាយណាដែលធ្វើឡើងដើម្បីការពារស្រ្តីពីការពពោះក្នុងរយៈពេលណាមួយតែប៉ុណ្ណោះ។ នៅពេលស្រ្តីសម្រេចចិត្តមានផ្ទៃពោះ នោះចម្ងល់ជាច្រើននឹងត្រូវចោទមានឡើង ដែលមិនត្រឹមតែការបញ្ឈប់ប្រើប្រាស់ថ្នាំពន្យារកំណើតនោះទេ កត្តាផ្សេងទៀតដូចជាអាយុ និងសុខភាពទូទៅក៏ត្រូវបានរាប់បញ្ចូលផងដែរ។ សកម្មភាពថ្នាំពន្យារកំណើត ថ្នាំពន្យារកំណើត ជាប្រភេទឱសថរួមផ្សំដោយពពួកអ័រម៉ូនដែលត្រូវបានប្រើប្រាស់យ៉ាងមានប្រសិទ្ធភាពសម្រាប់ពន្យារពេលក្នុងការមានផ្ទៃពោះ ដោយឱសថមានសកម្មភាព និងគោលដៅជាច្រើនរួមមាន៖ • រក្សាកម្រិតអ័រម៉ូន • ការបញ្ឈប់កម្រិតអ័រម៉ូនអឺស្រ្តូហ្សែនដែលបណ្តាលឲ្យបញ្ចេញពងអូវ៉ុល • ធ្វើឲ្យភ្នាសស្បូនឡើងក្រាស់ ដែលរារាំងមេជីវិតឈ្មោល។ ការវិវឌ្ឍបន្ទាប់ពីឈប់ពន្យារកំណើត យោងតាមការសិក្សាពី The United Kingdom’s National Health Service (NHS) បានបង្ហាញថាបន្ទាប់ពីបញ្ឈប់ការប្រើប្រាស់ថ្នាំពន្យារកំណើតភ្លាមស្រ្តីអាចមានវដ្តរដូវមិនទៀងទាត់រយៈពេលលើសពី ៣ខែ ទើបវដ្តរដូវអាចត្រលប់មកធម្មតាវិញ ដោយរដូវលើកដំបូងអាចមានសភាពមិនប្រក្រតី និងខុសប្លែកពីឈាមរដូវទូទៅ។ ដូច្នេះ ភាពមិនទៀងទាត់នៃការមករដូវបន្ទាប់ពីឈប់ប្រើប្រាស់ថ្នាំពន្យារកំណើតអាចបង្អាក់ក្នុងការមានផ្ទៃពោះភ្លាមៗបាន។ ការសិក្សាលើឱកាសមានផ្ទៃពោះ ការសិក្សាលើស្រ្តីចំនួន ៣៧២៧ នាក់ ក្នុងចន្លោះអាយុចាប់ពី ១៨ ដល់ ៤០ឆ្នាំ ពីការសិក្សាស្រាវជ្រាវនៅប្រទេសដាណឺម៉ាក បានបង្ហាញថាការប្រើប្រាស់ថ្នាំពន្យារកំណើត អាចនាំឲ្យមានការពន្យារពេលនៃការមានផ្ទៃពោះឡើងវិញពី ២ ទៅ៦ខែ បន្ទាប់ពីឈប់ប្រើប្រាស់ថ្នាំពន្យារកំណើត បើធៀបជាមួយការអនុវត្តវិធីសាស្រ្តពន្យារកំណើតផ្សេងទៀត។ បន្ថែមពីនោះ កត្តាអាយុរបស់ស្រ្តីដែលចាប់ផ្តើមប្រើប្រាស់ថ្នាំពន្យារកំណើតក៏ត្រូវបានយកមកសិក្សាផងដែរដោយលទ្ធផលបានបង្ហាញថាស្រ្តីចាប់ផ្តើមពន្យារកំណើតដោយថ្នាំនៅអាយុក្មេងជាង ២១ឆ្នាំ អាចពិបាកក្នុងការមានផ្ទៃពោះឡើងវិញជាងស្រ្តីដែលពន្យារកំណើតបន្ទាប់ពីអាយុ ២១ឆ្នាំ។ កត្តារំខានក្នុងការមានផ្ទៃពោះ ក្រៅពីកត្តាស្រ្តីដែលប្រើប្រាស់ថ្នាំពន្យារកំណើត ក៏នៅមានកត្តារួមផ្សំផ្សេងទៀតដែលអាចប៉ះពាល់ដល់លទ្ធភាពនៃការមានគភ៌ បន្ទាប់ពីឈប់ប្រើថ្នាំពន្យារកំណើតផងដែររួមមាន៖ • សុខភាពទូទៅរបស់ស្ត្រី៖ កត្តាមួយចំនួនដូចជាបញ្ហាក្រពេញទីរ៉ូអុីត ជំងឺក្រពេញ Pituitary ឬជំងឺសរសៃប្រសាទ (PCOS) ស្ត្រីដែលធាត់ ឬស្គមពេក • សុខភាពបន្តពូជរបស់ស្ត្រី៖ ស្ត្រីដែលមានប្រវត្តិឆ្លងមេរោគឆ្អឹងត្រគាក បញ្ហារារាំងបំពង់ស្បូន ឬជំងឺ Endometriosis • សុខភាពបន្តពូជរបស់បុរស៖ កម្រិតមេជីវិតឈ្មោលទាប • ការរួមភេទ៖ ការរួមភេទមិនទៀងទាត់រៀងរាល់ ២ទៅ ៣ថ្ងៃម្តង អាចជាកត្តារារាំងដល់ការមានផ្ទៃពោះ • អាយុរបស់ស្រ្តី៖ អត្រានៃការមានផ្ទៃពោះថយចុះបន្ទាប់ពីស្រ្តីឈានដល់អាយុ៣៥ឆ្នាំ។ ការពិគ្រោះជាមួយគ្រូពេទ្យជំនាញក្នុងការមានផ្ទៃពោះ ជារឿងចាំបាច់ និងមានប្រសិទ្ធភាព ដោយអ្នកនឹងអាចតម្រូវឲ្យប្រើប្រាស់វិធីសាស្រ្តនានារហូតទាល់តែអ្នកមានវដ្តរដូវជាធម្មតាឡើងវិញមុននឹងមានផ្ទៃពោះ។ ការរង់ចាំប៉ុន្មានខែបន្ទាប់ ដើម្បីឲ្យឈាមរដូវត្រលប់មកទៀងទាត់ឡើងវិញនឹងធ្វើឲ្យមានភាពជាក់លាក់ក្នុងការមានគភ៌។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

មាតា និងទារក
ចែករំលែក
  • Mar 30, 2019 |
  • 6 ឆ្នាំមុន |
  • 3.2K មើល

សេចក្តីជូនដំណឹងការហាមឃាត់គណនីហ្វេសប៊ុកឱសថបំប៉នសុខភាពឈ្មោះ GlutaQ10

សេចក្តីជូនដំណឹងថ្ងៃទី១៨ ខែមករា ឆ្នាំ២០១៩ ពីក្រសួងសុខាភិបាល សូមជម្រាបជូនដល់សាធារណជនទាំងអស់ ដោយបានពិនិត្យឃើញលើបណ្តាញសង្គមហ្វេសប៊ុករៀងរាល់ថ្ងៃមានគណនីចំនួន ១0 ឈ្មោះ ១-សុធារ៉ា ២- CamboHealth ៣-VT Store-CAMBODIA ៤-Van Thou ៥-Ah Mey ៦-Briya Store ៧-NA RA ៨-NARA SKIN CATE Battambong ៩-Sann Thearith ១០-Health Product Online, Com បានកំពុងផ្សព្វផ្សាយលក់ឱសថបំប៉នសុខភាពឈ្មោះ GlutaQ10 ផលិតនៅប្រទេសកូរ៉េ គ្មានអាសយដ្ឋានផលិតច្បាស់លាស់ គ្មានក្រុមហ៊ុននាំចូលត្រឹមត្រូវ គ្មានចុះបញ្ជិកា គ្មានការត្រួតពិនិត្យគុណភាព និងគ្មានច្បាប់អនុញ្ញាតផ្សព្វផ្សាយពីក្រសួងសុខាភិបាល ហើយថែមទាំងផ្សព្វផ្សាយភូតកុហក បោកប្រាស់ និងបំផ្លើសហួសពីការពិតគ្មានមូលដ្ឋានវិទ្យាសាស្ត្រត្រឹមត្រូវដូចជា ធ្វើឲ្យស្បែកសបែបធម្មជាតិ បំបាត់ស្នាមអុជខ្មៅ ផ្តល់សំណើមឲ្យស្បែកភ្លឺរលោង ជួយឲ្យ Collagen មានភាពរឹងមាំ បន្តឹងស្បែក និងកាត់បន្ថយភាពជ្រីវជ្រួញ។ ដើម្បីចៀសវាងការខាតបង់ប្រាក់កាស និងប៉ះពាល់ដល់សុខភាព ឬអាចឈានដល់ការបាត់បង់អាយុជីវិត សូមបងប្អូនប្រជាពលរដ្ឋបញ្ឈប់ការប្រើប្រាស់ឱសថបំប៉នសុខភាពឈ្មោះ GlutaQ10 ហើយក្រសួងសុខាភិបាលនឹងមានវិធានការតឹងរឹងទៅតាមផ្លូវច្បាប់ចំពោះគណនីទាំងអស់ខាងលើទៅតាមច្បាប់ស្តីពីច្បាប់វិសោធនកម្មច្បាប់ស្តីពីការគ្រប់គ្រងឱសថជាធរមាន។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន
ចែករំលែក
  • Mar 29, 2019 |
  • 6 ឆ្នាំមុន |
  • 3.1K មើល

សន្និសីទសារព័ត៌មានស្តីពីការបើកដាក់ឲ្យដំណើរការមន្ទីរសម្រាកព្យាបាល អុិនដ្រា

រាជធានីភ្នំពេញ ថ្ងៃទី ១៥  ខែមីនា ឆ្នាំ២០១៩ មានសនិ្នសីទសារព័ត៌មានស្តីពីការបើកដាក់ឲ្យដំណើរការមន្ទីរពេទ្យសម្រាកព្យាបាល អុិនដ្រា។ ដោយមើលឃើញនូវការវិវត្តន៍ដ៏លេចធ្លោក្នុងវិស័យសុខាភិបាលនៅក្នុងប្រទេសកម្ពុជាក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជា ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដែលធានាឲ្យមាន សុខសន្តិភាព និងស្ថិរភាពនៅទូទាំងប្រទេសបានធ្វើឲ្យវិស័យសុខាភិបាលមានការរីកចម្រើនជាលំដាប់។ ជាក់ស្តែង តាមរយៈការអភិវឌ្ឍន៍ និងភាពរីកចម្រើនរបស់ប្រទេសជាតិ ក្នុងនោះផងដែរក៏មានការសហការចាប់ដៃគូគ្នារវាងគ្លីនិក យីគក់ នៅខេត្តបាត់ដំបង គ្លីនិក សេតេ នៅខេត្តព្រះសីហនុ និងវេជ្ជបណ្ឌិតឯកទេស ចាន់ ប៊ុនថា ព្រមទាំងក្រុមវេជ្ជបណ្ឌិតជំនាញឯកទេសនៅភ្នំពេញបានបង្កើតជាមន្ទីរសម្រាកព្យាបាល អុិនដ្រា ឡើងដើម្បីជួយសម្រួលដល់ការពិនិត្យ និងព្យាបាលជំងឺទូទៅជូនប្រជាពលរដ្ឋ។  ក្នុងនោះផងដែរ សន្និសីទសារព័ត៌មានរយៈពេលកន្លះថ្ងៃនេះ ក៏មានការចូលរួមពីសំណាក់ឯកឧត្តម លោកជំទាវ លោក លោកស្រី អ្នកនាង កញ្ញា និងភ្ញៀវកិត្តិយសប្រមាណជា ៦០នាក់។ ក្នុងឱកាសនេះដែរ លោកវេជ្ជបណ្ឌិត ចាន់ ប៊ុនថា បានមានប្រសាសន៍ថា« ការបើកដាក់ដំណើរការមន្ទីរសម្រាកព្យាបាល អុិនដ្រា នេះគឺធ្វើឡើងក្នុងគោលបំណងដើម្បីចង់បង្ហាញអំពីការផ្តល់នូវសេវាវេជ្ជសាស្រ្តដែលមានគុណភាពខ្ពស់ក្នុងការពិនិត្យ និងព្យាបាលជំងឺទូទៅ ហើយផ្តោតសំខាន់ទៅលើសុវត្ថិភាពក្នុងការផ្តល់សេវាកម្មប្រកបដោយក្រមសីលធម៌ និងវិជ្ជាជីវៈដែលឈរលើទស្សនវិស័យពង្រឹង និងលើកកម្ពស់វិស័យសុខាភិបាល ការផ្តល់នូវទំនុកចិត្តខ្ពស់ជូនអតិថិជនក្នុងការទទួលបានសេវាកម្មដ៏ល្អប្រសើរ ជាពិសេសកាត់បន្ថយការធ្វើដំណើរចេញទៅព្យាបាលនៅក្រៅប្រទេស។ បន្ថែមលើនេះមន្ទីរសម្រាកព្យាបាល អុិនដ្រា យើងខ្ញុំក៏មានឧបករណ៍វេជ្ជសាស្ត្រទំនើបទាន់សម័យដូចជា ម៉ាស៊ីនវះកាត់ទំនើបចុងក្រោយដោយការចោះ (Laparoscopic) ម៉ាស៊ីនស៊ីធីស្កែន (CT-Scan) ម៉ាស៊ីនបាញ់ក្រួសតម្រងនោម (Laser Lithotripsy) ម៉ាស៊ីនអ៊ុលដ្រាសោន (Ultrasound) ម៉ាស៊ីនអ៊ិចរ៉េ (X-ray) ដែលកាន់តែមានភាពងាយស្រួលក្នុងការធ្វើរោគវិនិច្ឆ័យផងដែរ។ ជាមួយគ្នានេះដែរ មន្ទីរសម្រាកព្យាបាល អុិនដ្រា ក៏មានការពិនិត្យ និងវះកាត់ជំងឺក្រពេញប្រូស្តាតដោយម៉ាស៊ីនអង់ដូស្កុប វះកាត់ទូទៅ វះកាត់ខួរក្បាល វះកាត់ឆ្អឹងកងខ្នង បំបែកក្រួសក្នុងតម្រងនោមដោយកាំរស្មីឡាស៊ែរសេវាសង្គ្រោះបន្ទាន់ ២៤ម៉ោង ព្យាបាលជំងឺទូទៅ ជំនាញកូនក្មេង និងរោគស្រ្តី។ ដោយឡែក លោកវេជ្ជបណ្ឌិត យី គក់ បានមានចំណាប់អារម្មណ៍នៅក្នុងសន្និសីទសារព័ត៌មានថា« ខ្ញុំមានសេចក្តីរីករាយយ៉ាងខ្លាំងដែលបានចូលរួមបើកដាក់ឲ្យដំណើរការ មន្ទីរសម្រាកព្យាបាល អុិនដ្រា ដែលមានសមិទ្ធផលថ្មីមួយបន្ថែមទៀតក្នុងការរួមលើកកម្ពស់វិស័យសុខាភិបាល និងពង្រឹងការផ្តល់សេវាពិនិត្យ និងព្យាបាលជូនដល់ប្រជាជនកម្ពុជា។ ក្រៅពីនេះ គ្លីនិក ក៏ខិតខំពង្រឹងគុណភាព ការផ្តល់នូវសេវាកម្មក៏ដូចជាជំនាញផ្នែកវេជ្ជសាស្រ្តនេះកាន់តែរឹងមាំបន្ថែមទៀត ក្នុងការផ្តល់នូវទំនុកចិត្តជូនប្រជាពលរដ្ឋ ព្រមទាំងជួយកាត់បន្ថយចំណាយ និងសន្សំពេលវេលាដោយមិនបាច់ទៅព្យាបាលនៅក្រៅប្រទេសឡើយ លើសពីនេះ ដោយឃើញថាប្រទេសកម្ពុជាទទួលបាននូវកំណើនសេដ្ឋកិច្ចខ្ពស់ ហើយមានការកើនឡើងជារៀងរាល់ឆ្នាំក្នុងអត្រា ៧,៥ភាគរយ ក្នុងនោះជីវភាពរបស់ប្រជាជនកាន់តែធូរធារ និងមានកម្រិតរស់នៅកាន់តែខ្ពស់ផងដែរនោះបានធ្វើឲ្យតម្រូវការផ្នែកវិស័យសុខាភិបាលសាធារណៈក៏កាន់តែមានការកើនឡើងខ្ពស់ក្នុងការចូលរួមលើកកម្ពស់សុខុមាលភាពជូនប្រជាពលរដ្ឋផងដែរ។ គួរបញ្ជាក់ផងដែរថា ការបើកមន្ទីរសម្រាកព្យាបាល អុិនដ្រា ក៏ជាការផ្តល់ឱកាសក្នុងការប្រកួតប្រជែងលើការផ្តល់សេវាកម្មផ្នែកសុខាភិបាលជូនអតិថិជន ព្រមទាំងរួមចំណែកជួយពង្រឹង និងលើកកម្ពស់ដល់វិស័យសុខាភិបាលនៅក្នុងប្រទេសកម្ពុជាឲ្យកាន់តែមានគុណភាពខ្ពស់ និងមានស្តង់ដារស្របតាមប្រទេសក្នុងតំបន់ និងអន្តរជាតិ ជាពិសេសវេជ្ជបណ្ឌិតជំនាញៗ រួមទាំងឧបករណ៍ និងម៉ាស៊ីនវះកាត់ទំនើបៗ។

ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន
ចែករំលែក
  • Mar 29, 2019 |
  • 6 ឆ្នាំមុន |
  • 3.8K មើល

សារសំខាន់នៃការចូលរួមរបស់អ្នកជំងឺក្នុងការព្យាបាលជំងឺទឹកនោមផ្អែម

អ្វីទៅជាជំងឺទឹកនោមផ្អែមប្រភេទទី២? ជំងឺទឹកនោមផ្អែម គឺជាជំងឺរ៉ាំរ៉ៃដែលអ្នកជំងឺមានជាតិស្ករលើសនៅក្នុងឈាម។ ជំងឺទឹកនោមផ្អែមនេះ ឬក៏យើងហៅពាក្យម៉្យាងទៀតថាជំងឺលើសជាតិស្ករក្នុងឈាម ពាក្យទាំងពីរនេះមានន័យដូចគ្នា។ ជំងឺនេះគឺបណ្តាលមកពីលំពែងដំណើរការមិនប្រក្រតី ដែលជាហេតុធ្វើឲ្យជាតិស្ករក្នុងឈាមរបស់អ្នកជំងឺកើនឡើង។ ជំងឺទឹកនោមផ្អែម មាន៣ប្រភេទគឺ ជំងឺទឹកនោមផ្អែមប្រភេទទី១ ជំងឺទឹកនោមផ្អែមប្រភេទទី២ និងជំងឺទឹកនោមផ្អែមដែលកើតលើស្ត្រីមានផ្ទៃពោះ។ ប៉ុន្តែចំនួនអ្នកជំងឺដែលមានច្រើនលើសលប់ជាងគេនោះគឺជំងឺទឹកនោមផ្អែមប្រភេទទី២។ ជំងឺទឹកនោមផ្អែមប្រភេទទី២ នេះគឺបណ្តាលមកពីលំពែងដែលដំណើរការមិនប្រក្រតីផលិតអាំងស៊ុយលីន ដែលជាអ័រម៉ូនម៉្យាងសម្រាប់នាំជាតិស្ករចូលទៅក្នុងរាងកាយរបស់យើងដើម្បីបំលែងទៅជាថាមពល។ លំពែងមិនអាចផលិតអាំងស៊ុយលីនក្នុងបរិមាណមួយគ្រប់គ្រាន់ ហើយមុខងាររបស់អាំងស៊ុយលីនក៏ថយចុះទៀតដែលជាហេតុធ្វើឲ្យជាតិស្ករនៅក្នុងឈាមរបស់អ្នកជំងឺកើនឡើង។ ដើម្បីគ្រប់គ្រង ឬធ្វើការព្យាបាលជំងឺនេះ តើមានវិធីសាស្រ្តអ្វីខ្លះ? ជំងឺទឹកនោមផ្អែម ឬជំងឺលើសជាតិស្ករក្នុងឈាមនេះគឺជាជំងឺរ៉ាំរ៉ៃ។ ការព្យាបាលដើម្បីគ្រប់គ្រងជាតិស្ករឲ្យបានល្អ បង្ការផលវិបាកនានាឲ្យអ្នកជំងឺរស់នៅបានយូរអង្វែងប្រកបដោយផាសុកភាព មានចំណុច២ធំៗ៖ - ការព្យាបាលទី១ គេហៅថាការព្យាបាលដោយមិនប្រើថ្នាំ គឺទាក់ទងទៅនឹងរបបចំណីអាហារ ការហាត់ប្រាណ ការផ្លាស់ប្តូរទម្លាប់នៃការរស់នៅ។ល។ - ការព្យាបាលទី២ គឺការព្យាបាលដោយថ្នាំ ចំពោះជំងឺទឹកនោមផ្អែមប្រភេទទី២ អាចលេបថ្នាំគ្រាប់ ឬប្រើថ្នាំចាក់ទៅតាមវេជ្ជបញ្ជារបស់គ្រូពេទ្យ។ វិធីសាស្រ្តក្នុងការព្យាបាលទាំងពីរនេះ ការប្រើថ្នាំនិងការព្យាបាលដោយមិនប្រើថ្នាំសុទ្ធតែមានសារសំខាន់ដូចគ្នាមិនអាចអត់មួយណាបាននោះទេ។ អ្នកជំងឺមិនអាចធ្វើតែលំហាត់ប្រាណ ផ្លាស់ប្តូរទម្លាប់នៃការរស់នៅដោយមិនទទួលទានថ្នាំបាននោះទេ។ ម្យ៉ាងវិញទៀតអ្នកជំងឺដែលទទួលទានថ្នាំហើយមិនព្រមធ្វើរបបចំណីអាហារ ឬក៏ហាត់ប្រាណ ក៏មិនល្អដូចគ្នា។ នៅប្រទេសកម្ពុជា តើអ្វីជាបញ្ហាប្រឈមដែលទាក់ទងនឹងអ្នកជំងឺក្នុងការព្យាបាលជំងឺទឹកនោមផ្អែមប្រភេទទី២? បញ្ហាប្រឈមមួយចំនួនដែលបានជួបប្រទះតាមរយៈការសិក្សានាពេលកន្លងមកយើងឃើញថា៖ - អ្នកជំងឺទឹកនោមផ្អែមប្រភេទទី២នៅក្នុងប្រទេសកម្ពុជាយើង មួយភាគធំមិនបានដឹងខ្លួនថាខ្លួនមានជំងឺប្រភេទនេះទេ ពីព្រោះជំងឺទឹកនោមផ្អែមប្រភេទទី ២នៅក្នុងដំណាក់កាលដំបូងមិនមានរោគសញ្ញាដែលជាហេតុធ្វើឲ្យអ្នកជំងឺមិនបានចាប់អារម្មណ៍។ - អ្នកជំងឺមិនសូវចាប់អារម្មណ៍នៅក្នុងការមកតាមដានពិនិត្យជាមួយគ្រូពេទ្យឲ្យបានជាប់លាប់ច្រើន តែប្រើឱសថតៗគ្នា ឬក៏ប្រើប្រាស់វេជ្ជបញ្ជាពីមុនៗមកដោយមិនព្រមទៅតាមដានដើម្បីធ្វើការផ្លាស់ប្តូរទៅតាមដំណាក់កាលនៃជំងឺ។ - អ្នកជំងឺមិនសូវចាប់អារម្មណ៍ស្វែងយល់អំពីរបៀបនៃការថែទាំខ្លួន អ្នកជំងឺមួយចំនួនគិតថាការដែលទទួលទានថ្នាំបានជាប់លាប់គឺគ្រប់គ្រាន់ហើយ។ - អ្នកជំងឺមិនសូវតាមដានជាតិស្ករជាប្រចាំទេ ហើយគាត់ជោះជាតិស្ករភាគច្រើនតែពេលព្រឹកមិនទាន់ទទួលទានអាហារ ព្រោះគាត់យល់ថាការជោះជាតិស្ករក្រោយទទួលទានអាហារគឺយកជាការមិនបាន។ តើអ្នកជំងឺត្រូវសហការដូចម្តេចខ្លះក្នុងពេលព្យាបាលជំងឺទឹកនោមផ្អែមប្រភេទទី២របស់ខ្លួន? ការព្យាបាលជំងឺទឹកនោមផ្អែមឬជំងឺលើសជាតិស្ករក្នុងឈាមនេះ មានលក្ខណៈពិសេស ពីព្រោះអ្នកជំងឺក្រៅអំពីជាតិស្ករនៅក្នុងឈាមត្រូវចាប់អារម្មណ៍ចំណុចដទៃៗទៀត ដូចជាបញ្ហាសម្ពាធឈាមគឺត្រូវរក្សាកុំឲ្យសម្ពាធឈាមឡើងខ្ពស់។ ករណីដែលសម្ពាធឈាមខ្ពស់ត្រូវប្រញាប់រូតរះទៅពិគ្រោះជាមួយគ្រូពេទ្យ។ បន្ទាប់មកទៀតអ្នកជំងឺ ត្រូវចាប់អារម្មណ៍កម្រិតជាតិខ្លាញ់នៅក្នុងឈាមដែរ ព្រោះថាបើព្យាបាលតែជាតិស្ករ ព្យាបាលតែសម្ពាធឈាម ហើយមិនបានគិតពីជាតិខ្លាញ់នៅក្នុងឈាម ក៏មិនជោគជ័យដែរ។ ដូចនេះយ៉ាងហោចណាស់មួយឆ្នាំម្តង អ្នកជំងឺត្រូវពិនិត្យមើលជាតិខ្លាញ់នៅក្នុងឈាម។ អ្នកជំងឺក៏ត្រូវតាមដានពិនិត្យមុខងារតម្រងនោមជាប្រចាំផងដែរ ព្រោះថាជំងឺទឹកនោមផ្អែមឬជំងឺលើសជាតិស្ករនៅក្នុងឈាមនេះអាចបណ្តាលឲ្យមានផល់ប៉ះពាល់ទៅលើតម្រងនោម ធ្វើឲ្យខូចតម្រងនោម ខ្សោយតម្រងនោម លាងឈាមជាដើម។ លើសពីនោះទៅទៀត អ្នកជំងឺត្រូវតាមដានភ្នែកជាប្រចាំ។ ទោះបីមានរោគសញ្ញា ឬមិនមានរោគសញ្ញាអ្នកជំងឺត្រូវពិនិត្យបាតភ្នែកជាប្រចាំ ព្រោះថាការលើសជាតិស្កររយៈពេលយូរអាចធ្វើឲ្យសរសៃឈាមនៅបាតភ្នែកខូច។ ក្រៅពីនេះអ្នកជំងឺត្រូវពិនិត្យថែទាំជើងពីព្រោះអ្នកជំងឺទឹកនោមផ្អែមងាយនឹងដំបៅជើង ហើយត្រូវការពេលវេលាយូរជាងអ្នកមិនមានជំងឺទឹកនោម ផ្អែមដើម្បីធ្វើឲ្យដំបៅជើងនោះជាសះស្បើយ ដូច្នេះត្រូវតែពិនិត្យជើងជាប្រចាំ។ អ្នកជំងឺ ក៏ត្រូវបញ្ឈប់ជាដាច់ខាតនូវការជក់បារី ពីព្រោះការជក់បារីបន្ថែមពីលើជំងឺទឹកនោមផ្អែម ធ្វើឲ្យសរសៃឈាមងាយនឹងមានបញ្ហាដូចជាកកស្ទះ។ ចុងក្រោយអ្នកជំងឺត្រូវប្រឹក្សាជាប្រចាំជាមួយគ្រូពេទ្យព្រោះថាឱសថដែលទទួលទានត្រូវនៅពេលនេះអាចនឹងមិនត្រូវនៅពេលក្រោយ ហើយគួរចៀសវាងការប្រើប្រាស់ថ្នាំតៗគ្នា។ តើគ្រូពេទ្យគួរធ្វើអ្វីខ្លះដើម្បីបង្កើនការចូលរួមរបស់អ្នកជំងឺក្នុងការគ្រប់គ្រងជំងឺទឹកនោមផ្អែមប្រភេទទី២? តើអ្នកជំងឺគួរធ្វើបែបណាដែរ? តើគួរមានតួអង្គណាខ្លះទៀតចូលរួមដើម្បីជួយឲ្យការគ្រប់គ្រងជំងឺនេះបានកាន់តែប្រសើរ? ដោយសារជំងឺទឹកនោមផ្អែមជាជំងឺរ៉ាំរ៉ៃ ដូច្នេះការថែទាំសុខភាពគឺត្រូវធ្វើជារឿយៗ និងខ្ជាប់ខ្ជួន។ ជំងឺនេះទាមទារឲ្យមានការសហការខ្ពស់ពីវេជ្ជបណ្ឌិត និងអ្នកជំងឺ ក៏ដូចជាក្រុមគ្រួសារផ្ទាល់ដែរ ពីព្រោះវេជ្ជបណ្ឌិតមានកាតព្វកិច្ចណែនាំអប់រំអ្នកជំងឺអំពីវិធីសាស្ត្រនៅក្នុងការថែទាំខ្លួនក៏ដូចជាធ្វើការព្យាបាលដោយប្រើប្រាស់ឱសថ ដោយជ្រើសរើសឱសថណាសមស្របទៅនឹងលក្ខខណ្ឌរបស់អ្នកជំងឺនីមួយៗ។ ជាងនេះទៅទៀត វេជ្ជបណ្ឌិតត្រូវមានកាតព្វកិច្ចក្នុងការផលិតជាឯកសារអប់រំនានាដើម្បីជាប្រយោជន៍ដល់អ្នកជំងឺព្រោះថាអ្នកជំងឺគាត់ត្រូវការឯកសារទាំងអស់នោះជាភាសាជាតិដើម្បីបង្កើនការថែទាំខ្លួនរបស់ពួកគាត់។ ថ្មីៗនេះយើងបានបង្កើតជាកម្មវិធីទូរស័ព្ទ ”Carnet Dia” សម្រាប់អ្នកជំងឺ។ លើសពីនោះទៅទៀត អ្នកជំងឺ និងក្រុមគ្រួសារត្រូវខិតខំស្វែងយល់អំពីវិធីសាស្ត្រនៅក្នុងការថែទាំ ហើយការចូលរួមនេះទៀតសោតតាមរយៈការសិក្សាធំៗនៅប្រទេសជឿនលឿនឃើញថាបើមានការចូលរួមពីក្រុមគ្រួសារនោះអ្នកជំងឺគឺមានការវិវឌ្ឍល្អជាងអ្នកជំងឺតែម្នាក់ឯងតស៊ូជាមួយនឹងជំងឺរ៉ាំរ៉ៃមួយនេះ។ អ្នកជំងឺនិងក្រុមគ្រួសារគួរគប្បីស្គាល់អំពីវិធីសាស្ត្រមួយចំនួននៅក្នុងការថែទាំដូចជាការជោះជាតិស្ករ ត្រូវជោះជាតិស្ករជាប្រចាំហើយយកកំណត់ត្រានេះទៅជូនគ្រូពេទ្យរាល់ពេលដែលមានការណាត់ជួបពិគ្រោះជំងឺ។ អ្នកជំងឺ និងក្រុមគ្រួសារគប្បីយល់ដឹងអំពីវិធីសាស្ត្រនានាក្នុងការថែទាំជើង និងស្វែងយល់អំពីហានិភ័យនានា ឬក៏កត្តាប្រឈមដែលធ្វើឲ្យមានដំបៅជើងជាដើម។ លើសពីនោះទៅទៀត ក្រុមគ្រួសារនិងអ្នកជំងឺត្រូវស្វែងយល់ពីការជួយខ្លួនឯង ក្នុងករណីដែលជាតិស្ករចុះជ្រុល។ តើលោកគ្រូមានចំណាប់អារម្មណ៍បែបណាដែរចំពោះយុទ្ធនាការ "ថ្ងៃដំបូងរបស់ខ្ញុំជាមួយជំងឺទឹកនោមផ្អែម"ដែលផ្តួចផ្តើមដោយក្រុមហ៊ុន Servier? ចំណាប់អារម្មណ៍ផ្ទាល់ខ្លួនរបស់ខ្ញុំចំពោះកម្មវិធី My First Day របស់ Servier International នេះ គឺមានសារៈសំខាន់ណាស់ជាប្រភពព័ត៌មានជាក់លាក់ប្រកបដោយលក្ខណៈវិទ្យាសាស្ត្រសម្រាប់បងប្អូនយើងយកទៅធ្វើការរក្សាទុកនិងធ្វើការសិក្សា ពីព្រោះយើងដឹងហើយថាបច្ចុប្បន្ននេះ តាមរយៈបណ្តាញសង្គមគឺថាសម្បូរទៅដោយព័ត៌មានដែលមិនពិតដែលបំពុលដល់បងប្អូនអ្នកជំងឺក៏ដូចជាក្រុមគ្រួសារ។ My First Day ជាប្រភពនៃការស្វែងយល់ និងជាប្រភពនៃចំណេះដឹងសម្រាប់អ្នកជំងឺដែលធ្វើឡើងដោយបង្កើតជាភាសាជាតិ ពីព្រោះអ្នកជំងឺត្រូវការឯកសារជាភាសាជាតិដើម្បីយកទៅស្វែងយល់។ ហើយការព្យាបាលជំងឺទឹកនោមផ្អែមនេះមិនតម្រូវឲ្យទៅធ្វើការព្យាបាលដល់បរទេសដែលអ្នកជំងឺមិនអាចធ្វើការទំនាក់ទំនងល្អបានដោយការលំបាកខាងភាសាក្តី ពីព្រោះបើខ្វះការស្វែងយល់ ខ្វះការយល់ដឹងគឺការព្យាបាលរបស់អ្នកជំងឺមិនបានដល់គោលដៅនោះទេ។ បកស្រាយដោយ៖ វេជ្ជបណ្ឌិត ស៊ុំ សត្ថា ឯកទេសក្រពេញអ័រម៉ូន និងទឹកនោមផ្អែម សព្វថ្ងៃបម្រើការនៅមន្ទីរពេទ្យកាល់ម៉ែត ហើយក៏ជាគ្រូបង្ហាត់បង្រៀន នៅសាកលវិទ្យាល័យវិទ្យាសាស្ត្រ សុខាភិបាល ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ទឹកនោមផ្អែម ទឹកនោមផ្អែម ទឹកនោមផ្អែម ទឹកនោមផ្អែម
ចែករំលែក
  • Mar 29, 2019 |
  • 6 ឆ្នាំមុន |
  • 4.3K មើល

ការកំណត់បរិមាណ Curcumin នៅក្នុងសារធាតុចម្រាញ់ អេតាណុលនៃមើមរមៀតរបស់ខ្មែរ ដោយប្រើHigh Performance Liquid Chromatography (HPLC)

រមៀត ឬឈ្មោះវិទ្យាសាស្ត្រ “Curcuma longa L.” ដែលស្ថិតនៅក្នុងអម្បូរ Zingiberaceae ត្រូវបានគេប្រើប្រាស់យ៉ាងទូលំទូលាយនៅក្នុងវិស័យអាហារផលិតផលសម្អាងធម្មជាតិ និងឱសថបុរាណ។ Curcumin គឺជាសារធាតុគីមីសំខាន់នៅក្នុងរមៀតដែលវាមានសមត្ថភាពព្យាបាលជំងឺដូចជា ប្រឆាំងនឹងដុំសាច់ ប្រឆាំងនឹងការរលាក អង់ទីអុកស៊ីដង់ និងប្រឆាំងនឹងការកកើតសរសៃឈាមថ្មី។ ការសិក្សាស្រាវជ្រាវនេះត្រូវបានធ្វើឡើងក្នុងគោលបំណងកំណត់នូវអត្តសញ្ញាណ និងបរិមាណ Curcumin ក្នុងរមៀតខ្មែរ។ ម្សៅមើមរមៀតដែលយកមកធ្វើការសិក្សាត្រូវបានទទួលមកពីហាងលក់ឱសថបុរាណក្នុងស្រុកហើយត្រូវបានផ្ទៀងផ្ទាត់ជាមួយសំណាករុក្ខជាតិរមៀត (កូដ: UPFPH-210019) ដែលតម្កល់ទុកនៅក្នុង “តិណាល័យសាកលវិទ្យាល័យពុទ្ធិសាស្ត្រ” (UP-Herbarium)។ ម្សៅមើមរមៀតចំនួន 50g ត្រូវបានចម្រាញ់ដោយប្រើអេតាណុលចំនួន 400mL តាមរយៈវិធីសាស្ត្រ Soxhlet ក្រោមសីតុណ្ហភាព 50អង្សាសេដោយប្រើរយៈពេល ៤ ម៉ោង។ សារធាតុចម្រាញ់ត្រូវបានសម្ងួតដោយប្រើម៉ាស៊ីន Rotatory Evaporator ក្នុងសីតុណ្ហភាព 50អង្សាសេ ក្រោមសម្ពាធ 175mbar បន្ទាប់មក យកទៅវិភាគដោយ C18 Reverse-phase High–Performance Liquid Chromatography ដោយប្រើ Mobile Phase រួមផ្សំពីទឹក អាស៊ីតស៊ីទ្រិច និងអាសេតូនីទ្រីល តាម Isocratic Elution Mode ក្នុងល្បឿនលំហូរ 1.0mL/min និងកំណត់ការវិភាគដោយប្រើកាំរស្មី UV ក្នុងជំហ៊ានរលក 425nm។ លទ្ធផលដែលចម្រាញ់បានគឺ 4.04% ស្មើនឹង 2.02g។ សមាមាត្ររបស់ Mobile phase ដែលល្អជាងគេក្នុងការវិភាគគឺ 45/55 vol% (សារធាតុរំលាយ A /សារធាតុរំលាយ B; សារធាតុរំលាយ A:ទឹក/អាស៊ីត អាសេទិច = 99.9/0.1 v/v; សារធាតុរំលាយ B: អាសេតូនីទ្រីល/អាស៊ីតអាសេទិច = 99.9/0.1 v/v)។ ក្រោយពីការចម្រាញ់ Curcumin ដែលកំណត់ឃើញក្នុងថេរៈវេលា tR= 5.274min មានចំនួន 21.80% (440.36 mg)។ ការសិក្សានេះផ្តល់ទិន្នន័យវិទ្យាសាស្រ្តក្នុងការវិភាគរក Curcumin នៅក្នុងរមៀតខ្មែរ។ ការរកឃើញនេះដើរតួយ៉ាងសំខាន់សម្រាប់ការស្រាវជ្រាវបន្តបន្ទាប់ទៀតទាក់ទងនឹង Curcumin ដែលមានប្រភពចេញពីមើមរមៀតរបស់ខ្មែរ។ ប្រភពអត្ថបទដោយ និស្សិត និងសាស្រ្តាចារ្យ មហាវិទ្យាល័យឱសថសាស្ត្រ នៃសាកលវិទ្យាល័យពុទ្ធិសាស្ត្រ ប្រទេសកម្ពុជា និងដេប៉ាតឺម៉ង់គីមីឱសថសាស្ត្រនៃមហាវិទ្យាល័យវិទ្យាសាស្ត្រឱសថនៃសាកលវិទ្យាល័យខនកែន ប្រទេសថៃ៖ តាង សុវណ្ណារ័ត្ន, ប៊ុណតារ៉ាវ៉ាន់ ថូរ៉ាប្រា, សូផាវ៉ាឌី ដាវឌី, ជា ស៊ីន, កែវ សំអែល ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ឱសថ ឱសថ
ចែករំលែក
  • Mar 28, 2019 |
  • 6 ឆ្នាំមុន |
  • 6.3K មើល

ឧស្សាហ៍ស្រវាំងភ្នែកអាចពាក់ព័ន្ធនឹងជំងឺអ្វី?

អាការៈស្រវាំងភ្នែក ឬងងឹតមុខ អាចកើតមានឡើងម្តងម្កាលនៅពេលរាងកាយមានការប្រែប្រួល ឬខ្វះខាតនូវសារធាតុចិញ្ចឹមណាមួយ ប៉ុន្តែប្រសិនរោគសញ្ញាទាំងនេះស្តែងឡើងជាញឹកញាប់ និងកាន់តែធ្ងន់ធ្ងរ នោះវាអាចមានហេតុផលនៅពីក្រោយមួយចំនួនដែលទាមទារការពិគ្រោះយោបល់ និងប្រឹក្សាពីគ្រូពេទ្យឯកទេស។ សំណួរ៖ ខ្ញុំបាទមានអាយុ ៣៥ឆ្នាំ កម្ពស់ ១ម៉ែត្រ៦៤ទម្ងន់៦៤គីឡូក្រាម មកពីខេត្តសៀមរាប។ ខ្ញុំឧស្សាហ៍មានអាការៈស្រវាំងភ្នែក ហើយពេលខ្លះដូចជាមានអ្វីនៅដាមជាប់ភ្នែកមើលមិនច្បាស់ ដែលបញ្ហានេះច្រើនកើតមាននៅពេលដែលខ្ញុំក្រោកពីអង្គុយម្តងៗ ហើយថែមទាំងងងឹតមុខទៀតផង។ តើបញ្ហានេះបណ្តាលមកពីមូលហេតុអ្វី? តើគួរដោះស្រាយដោយវិធីណា? ចម្លើយ៖ ទាក់ទងនឹងអាការៈឧស្សាហ៍ស្រវាំងភ្នែកនិងមានដាមជាប់ភ្នែកមើលមិនច្បាស់ វាមិនអាចជាសញ្ញានៃជំងឺអ្វីមួយឲ្យពិតប្រាកដនោះទេ ប៉ុន្តែអាចជាអាការៈមួយនៃការលើសជាតិស្ករ។ ដូចនេះ យកល្អប្អូនគួរតែអញ្ជើញទៅពិនិត្យឈាម ដើម្បីស្រាយនូវរាល់ចម្ងល់ និងអាការៈនេះ។ ផ្ទុយទៅវិញ ចំពោះបញ្ហាដែលក្រោកពីអង្គុយម្តងៗស្រាប់តែងងឹតមុខរបស់ប្អូននោះ គឺមូលហេតុអាចកើតឡើងដោយសារការដឹកនាំឈាមទៅចិញ្ចឹមខួរក្បាលមិនបានគ្រប់គ្រាន់។ គួរបញ្ជាក់ថា ប្រសិនបើអាការៈបែបនេះកើតឡើងចំពោះមនុស្សចាស់ ឬអ្នកដែលមានអាយុច្រើននោះ គាត់អាចនឹងតម្រូវឲ្យធ្វើការថតឆ្លុះសរសៃឈាមរកសញ្ញានៃការត្បៀតសរសៃឈាម។  ដោយឡែក ក្នុងករណីរបស់ប្អូនមានអាយុតិច ការត្បៀតសរសៃឈាមមិនសូវកើតឡើងនោះទេ ប៉ុន្តែទោះជាយ៉ាងណាក៏ដោយ ប្អូននឹងតម្រូវឲ្យពិនិត្យសុខភាពទូទៅ ក្នុងបំណងរកឲ្យឃើញថាមានជំងឺណាមួយដែលផ្តល់ជាផលវិបាកទាំងនេះ និងគួរតែមកជួបជាមួយវេជ្ជបណ្ឌិតជំនាញ ដើម្បីទទួលបានការណែនាំអំពីការព្យាបាលឲ្យបានត្រឹមត្រូវ។ បកស្រាយដោយ៖ សាស្ត្រាចារ្យវេជ្ជបណ្ឌិត សុខ ជួរ ឯកទេសជំងឺបេះដូងប្រធានអ៊ុយនីតេជំងឺបេះដូងនៃមន្ទីរពេទ្យកាល់ម៉ែត  ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ   

បេះដូង និងសរសៃឈាម បេះដូង និងសរសៃឈាម បេះដូង និងសរសៃឈាម
ចែករំលែក
  • Mar 27, 2019 |
  • 6 ឆ្នាំមុន |
  • 11.7K មើល

អនាម័យទ្វារមាសបែបណាដែលត្រឹមត្រូវ?

ទ្វារមាសជាផ្នែកមួយដ៏សំខាន់នៃរាងកាយស្ត្រី ម៉្យាងវាជាទីតាំងដែលងាយទទួលរងប្រតិកម្មជាជាងកន្លែងផ្សេងៗទៀត ដោយជួនកាលកំហុសឆ្គងនៃការធ្វើអនាម័យប្រចាំថ្ងៃបណ្តាលឲ្យមានបញ្ហាទៅវិញដូចជាកន្ទួលរមាស់ ស្ងួត ក្រហាយ ធ្លាក់ស ឬមានក្លិនជាដើម។ ដូច្នេះ តើអនាម័យបែបណាទើបត្រឹមត្រូវសម្រាប់ទ្វារមាស ហើយតើធ្វើដូចម្តេចទើបដឹងថា សុខភាពទ្វារមាសរបស់អ្នកល្អ? អំពីទ្វារមាស ជាទូទៅ ទ្វារមាសមានកម្រិត pH ទាបគឺនៅចន្លោះពី ៣.៨ ទៅ ៤.៥ និងសម្បូរទៅដោយបាក់តេរីល្អយ៉ាងច្រើន ដែលជាលក្ខខណ្ឌជួយឲ្យទ្វារមាសមានសុខភាពល្អប្រឆាំងនឹងការឈ្លានពានរបស់មេរោគព្រមទាំងរក្សាបាននូវសំណើមគ្រប់គ្រាន់។ តាមពិត ទ្វារមាសអាចសម្អាតភាពកង្វក់ និងមានសមត្ថភាពប្រឆាំងនឹងមេរោគដោយខ្លួនឯងបាន ដោយមិនចាំបាច់ប្រើប្រាស់សាប៊ូដែលមានក្លិន និងសារធាតុកាត់នោះទេ។ អ្វីដែលអ្នកត្រូវធ្វើ គឺគ្រាន់តែអនុវត្តអនាម័យប្រចាំថ្ងៃ និងធ្វើការលាងសម្អាតជាមួយទឹកក្តៅឧណ្ហៗ ឬសាប៊ូដែលស្រាលមិនមានជាតិកាត់ខ្លាំងព្រមទាំងមិនមានក្លិននៅបរិវេណជុំវិញទ្វារមាសតែប៉ុណ្ណោះ។ គន្លឹះថែរក្សាទ្វារមាសឲ្យស្អាត និងមានសុខភាពល្អ ១. សំខាន់បំផុតគឺមិនត្រូវប្រើប្រាស់សាប៊ូលាងសម្អាតខាងក្នុង (Douche) ការសិក្សាស្រាវជ្រាវបានបង្ហាញថា ចំពោះស្ត្រីដែលបានធ្វើការលាងសម្អាតបែបនេះងាយប្រឈមនឹងការកើតជំងឺបង្កដោយមេរោគនៅទ្វារមាសច្រើនជាងស្រ្តីដែលមិនបានអនុវត្ត។ នេះក៏បណ្តាលមកពីបម្រែបម្រួលនៃ pH និងការបាត់បង់បាក់តេរីល្អដែលជាហេតុធ្វើឲ្យបាត់បង់តុល្យភាព នាំឲ្យបាក់តេរីអាក្រក់អាចឈ្លានពានបាន។ គួរបញ្ជាក់ថា វិធីសាស្ត្រនេះត្រូវបានចេញវេជ្ជបញ្ជាឲ្យអនុវត្តចំពោះស្ត្រីដែលកំពុងមានការបង្ករោគនៅទ្វារមាសជាដើម។ ស្រដៀងគ្នានេះដែរ ការប្រើប្រាស់សាប៊ូលាងសម្អាតខ្លួនជំនួសឲ្យទឹកអនាម័យស្ត្រីដែលមានលក្ខណៈស្រទន់ និងមិនក្រអូប ក៏អាចបណ្តាលឲ្យសុខភាពទ្វារមាសធ្លាក់ទ្រុឌទ្រោមផងដែរ។ ហេតុនេះអ្នកគួរជ្រើសរើសប្រភេទទឹកអនាម័យស្ត្រីដែលមាន pH នៅចន្លោះ ៤.៥ ទៅ៨ ដែលអាចមានលក្ខណៈសមស្របចំពោះសុខភាពទ្វារមាស។ ២. ប្រើប្រាស់ខោទ្រនាប់ដែលធ្វើពីក្រណាត់កប្បាស ទ្វារមាសត្រូវតែរក្សាឲ្យស្ងួត និងស្អាតជានិច្ច ចៀសវាងភាពសើម លាយឡំជាមួយការផ្អាប់ដែលជាលក្ខខណ្ឌដ៏ប្រសើរសម្រាប់ការលូតលាស់របស់បាក់តេរីអាក្រក់។ ហេតុនេះការជ្រើសរើសខោទ្រនាប់ដែលអាចឲ្យមានខ្យល់ចេញចូល និងស្រូបសំណើមបានល្អជាចំណុចសំខាន់ដែលត្រូវគិតដល់។ អ្នកអាចប្រើប្រាស់ខោទ្រនាប់ប្រភេទសាច់ក្រណាត់កប្បាស  ឬស្បៃ ម៉្យាងអ្នកក៏គួរផ្លាស់ប្តូរខោទ្រនាប់មួយថ្ងៃ ២ដងផងដែរ។ ៣. ទទួលទានអាហារដែលល្អសម្រាប់សុខភាព ដើម្បីទទួលបានសុខភាពទ្វារមាស និងសុខភាពបន្តពូជឲ្យមានលក្ខណៈល្អប្រសើរអាហារក៏ជាកត្តាមួយយ៉ាងសំខាន់ផងដែរ ជាពិសេសគឺទឹក។ ក្នុងនោះអ្នកត្រូវប្រកាន់យករបបអាហារសុខភាព សម្បូរទៅដោយសារធាតុចិញ្ចឹម ដូចជាទឹកដោះគោជូរទឹកគ្រែនបឺរី (Cranberry) ផ្លែឈើ និងបន្លែបៃតងជាដើម។ ៤. រក្សាទម្លាប់អនាម័យល្អ ជាក់ស្តែងទម្លាប់ទាំងអស់នោះមានដូចជា៖ - ត្រូវជូតសម្អាត ឬបាញ់ទឹកពីមុខទៅក្រោយបន្ទាប់ពីបន្ទោបង់រួច ចៀសវាងការឆ្លងមេរោគពីទ្វារធំមកទ្វារមាស និង បំពង់បង្ហួរនោម - ផ្លាស់ប្តូរសំឡីអនាម័យ ឬទ្រនាប់តំប៉ុងឲ្យបានញឹកញាប់ (៤ម៉ោងម្តង) រាល់ពេលមករដូវម្តងៗ - ប្រើប្រាស់សំឡីអនាម័យតូចៗ ដើម្បីប្រើប្រាស់ប្រចាំថ្ងៃជំនួសការផ្លាស់ប្តូរខោទ្រនាប់ ក្នុងករណីធ្លាក់សតិចៗ រំអិលតិចៗ ឬមិនមានបញ្ហាអ្វីក៏ដោយ - បោកសម្អាតខោទ្រនាប់ជាមួយនឹងសាប៊ូ លាងជម្រះទឹកឲ្យបានស្អាត ព្រមទាំងហាលឲ្យត្រូវកម្តៅថ្ងៃ - បង្កើតទម្លាប់ល្អក្នុងការទៅពិនិត្យសុខភាពមាត់ស្បូនជាប្រចាំជាមួយគ្រូពេទ្យជំនាញ ចំពោះស្រ្តីដែលមានអាយុចាប់ពី ២៥ ទៅ៦៤ឆ្នាំ។ ធ្វើយ៉ាងណាទើបដឹងថាទ្វារមាសមានសុខភាពល្អ? ជាទូទៅ ស្ត្រីម្នាក់ៗតែងមានក្លិនត្រង់តំបន់ទ្វារមាសនេះផ្សេងៗគ្នា ហើយតែងប្រែប្រួលទៅតាមស្ថានភាពផ្សេងៗគ្នាដែរ ជាក់ស្តែងខណៈពេលមានរដូវជាដើម។ លក្ខខណ្ឌធម្មតានៃបម្រែបម្រួលទ្វារមាស មានដូចជា ការធ្លាក់សមានពណ៌ថ្លា ពណ៌ស ឬពណ៌លឿងស្រាល ប៉ុន្តែមិនមានក្លិនខុសប្លែកពីក្លិនដែលអ្នកធ្លាប់មាន ជាពិសេសមិនមានអាការៈរមាស់ ក្រហាយបន្ថែមទៀតឡើយ។ រក្សាសុខភាពទ្វារមាសរបស់អ្នកឲ្យបានល្អ ដោយចាប់ផ្តើមពីការយកចិត្តទុកដាក់ចាប់ពីចំណុចតូចតាចនៃសកម្មភាពប្រចាំថ្ងៃរបស់អ្នក!!! ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ       

សុខភាពស្រ្តី
ចែករំលែក
  • Mar 26, 2019 |
  • 6 ឆ្នាំមុន |
  • 3.3K មើល

កម្មវិធីសម្ពោធជាផ្លូវការនៃសៀវភៅ មគ្គុទេ្ទសក៍ជំងឺ

នាថ្ងៃទី២៣ ខែមីនា ឆ្នាំ២០១៩ កន្លងទៅនេះក្រុមហ៊ុន ហេលស៍ថាម ខបភើរេសិន (HEALTHTIME CORPORATION) បានរៀបចំកម្មវិធីសម្ពោធ សៀវភៅ មគ្គុទេ្ទសក៍ជំងឺ ដែលមានការសហការឧបត្ថម្ភដោយក្រុមហ៊ុន Coxil, Fix DERMA, CYSTONE, LIV.52 DS, SNACKING COFFEE and Catering  និងមន្ទីរពហុព្យាបាល ជប៉ុន ឡាយហ្វ៍ ដែលប្រារព្ធរៀបចំឡើងនៅមជ្ឍមណ្ឌលសហប្រតិបត្តិការកម្ពុជា-កូរ៉េ (CKCC) ចាប់ពីម៉ោង ៨ព្រឹក ដល់ ១១ព្រឹក។  កម្មវិធីសម្ពោធជាផ្លូវការនេះធ្វើឡើងក្នុងគោលបំណងសំខាន់ៗបីគឺ៖ ១-ដើម្បីដាក់សម្ពោធជាផ្លូវការនូវសៀវភៅមគ្គុទេ្ទសក៍ជំងឺរបស់ក្រុមហ៊ុន ហេលស៍ថាម ខបភើរេសិន ដើម្បីយកថវិកានៃការលក់សៀវភៅ ១០ភាគរយបង្កើតកម្មវិធីសប្បុរធម៌ ២-ការថ្លែងអំណរគុណដល់លោក លោកស្រី វេជ្ជបណ្ឌិត និងសាស្រ្តាចារ្យវេជ្ជបណ្ឌិត ទាំងអស់ដែលបានចូលរួមចែករំលែកនូវអត្ថបទចំណេះដឹងសុខភាពដ៏មានតម្លៃ ក្នុងការចងក្រងសៀវភៅមគ្គុទេ្ទសក៍ជំងឹឡើង ៣-ការបង្ហាញពីអត្ថប្រយោជន៍របស់សៀវភៅដល់សាធារណជន។ កម្មវិធីទាំងមូលក៏ទទួលបានកិត្តិយស ចូលរួមពីសំណាក់ លោក លោកស្រី សាស្រ្តាចារ្យវេជ្ជបណ្ឌិត វេជ្ជបណ្ឌិត ក្រុមហ៊ុនដៃគូសហការ និងក្រុមហ៊ុនពាក់ព័ន្ធក្នុងវិស័យសុខាភិបាល    ព្រមទាំងមានការចូលរួមយ៉ាងច្រើនលើសការរំពឹងទុក ពីសំណាក់បងប្អូនសិស្សានុសិស្សសុខាភិបាល និងអ្នកប្រកបរបរវិជ្ជាជីវៈសុខាភិបាលប្រមាណជិត ២០០នាក់ផងដែរ។ ជាក់ស្តែង មគ្គុទេ្ទសក៍ជំងឺ ជាសៀវភៅប្រមូលផ្តុំទៅដោយជំងឺជិត១០០ប្រភេទដែលមាន ការបកស្រាយ យ៉ាងក្បោះក្បាយ ពីសំណាក់ សាស្រ្តាចារ្យវេជ្ជបណ្ឌិត និងវេជ្ជបណ្ឌិត ដោយក្តោបសំខាន់នូវនិយមន័យ រោគសញ្ញា ការធ្វើរោគវិនិច្ឆ័យ ការព្យាបាល និងវិធីសាស្រ្តការពារទៅតាមស្ថានភាពជំងឺនីមួយៗ។ ជាមួយគ្នានោះផងដែរ ក៏មានការរួមបញ្ចូលនូវផ្នែកករណីសិក្សា ដែលមានការបកស្រាយរបស់វេជ្ជបណ្ឌិតជំនាញ លើបញ្ហាសុខភាពរបស់អ្នកជំងឺផ្ទាល់ផងដែរ។ ដោយឡែក ចំណុចសំខាន់ដែលគួរឲ្យចាប់អារម្មណ៍នោះសម្រាប់ការចងក្រងសៀវភៅមគ្គុទេ្ទសក៍ជំងឺនេះឡើងគឺដើម្បីជាផ្នែកមួយជួយដល់សាធារណជនក៏ដូចជា អ្នកនៅក្នុងវិស័យសុខាភិបាល ក្នុងការបង្កើតចំណេះដឹង និងលើកកម្ពស់ ការអប់រំផ្នែកសុខាភិបាល ក៏ដូចជាការលើកកម្ពស់ការអាន និងស្វែងយល់បន្ថែមក្នុងផ្នែកសុខាភិបាល មិនត្រឹមតែប៉ុណ្ណោះក៏ដើម្បីជាផ្នែកមួយជំរុញដល់ ការបន្ត បោះពុម្ពផ្សាយ ជាភាសាខ្មែរថែមទៀតផងដែរ។ នាឱកាសនេះសម្រាប់កម្មវិធីមួយព្រឹកនៃការសម្ពោធសៀវភៅមគ្គុទេ្ទសក៍ជំងឺ នេះក៏មានការថ្លែងសន្ទរកថា ស្វាគមន៍ពីសំណាក់នាយកប្រតិបត្តិ ក្រុមហ៊ុន ហេលស៍ថាម ខបភើរេសិន ក៏ដូចជាការបង្ហាញចំណាប់អារម្មណ៍ពីសំណាក់សាស្រ្តាចារ្យវេជ្ជបណ្ឌិតដែលបានចូលរួមចែករំលែកអត្ថបទ ក្នុងសៀវភៅមគ្គុទេ្ទសក៍ជំងឺ ។ មិនតែប៉ុណ្ណោះក្នុងវិធីនេះផងដែរ ក៏មានការបង្ហាញចំណាប់អារម្មណ៍ពី កញ្ញា វួន បញ្ញា ប្រធានគម្រោងនៃ ក្រុមហ៊ុន ហេលស៍ថាម ខបភើរេសិន ព្រមទាំងបញ្ចប់ទៅជាមួយនឹង ការចូលរួមនៅក្នុង វេទិកាសំណួរ-ចម្លើយពីអ្នកចូលរួមទាំងអស់ ក៏ដូចជាការសម្ដែងរឿងខ្លី ពីក្រុមនិស្សិតនៃសាកលវិទ្យាល័យ វិទ្យាសាស្រ្តសុខាភិបាល។ ជាការបូកសរុប យើងឃើញថាកម្មវិធីប្រព្រឹត្តដោយជោគជ័យ នឹងប្រកបដោយ លទ្ធផលដ៏ល្អគួរឲ្យកត់សម្គាល់។ គួរបញ្ជាក់ផងដែរ ហេលស៍ថាម ខបភើរេសិន ជាក្រុមហ៊ុននាំមុខគេដែលផ្តោតសំខាន់ជាចម្បងនូវការចែករំលែកចំណេះដឹងសុខភាព និងផ្តល់ជូនជាព័ត៌មានទៅកាន់ប្រជាជនទាំងអស់ ពីសេវាកម្មសុខភាព សម្រាប់ជាតម្រូវការផ្នែកសុខាភិបាលអស់រយៈពេល ៧ឆ្នាំមកហើយ។ សម្រាប់ការចេញផ្សាយជាសៀវភៅ “មគ្គុទេ្ទសក៍ជំងឺ” គឺជាការចាប់ផ្តើមបំពេញបន្ថែមតម្រូវការដែលកំពុងខ្វះខាត ដោយក្រុមហ៊ុននឹងបន្តផ្តល់ជូនការចេញផ្សាយជាបន្តទៀតនៅពេលខាងមុនទៀត ដែលជាគួរទុកចិត្តបំផុត។     សម្រាប់ព៌ត័មានបន្ថែម និងទំនាក់ទំនងជាវសៀវភៅ៖ ០៧៧ ៨៨៨ ០៧៥     ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ                                                                 

ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន ព្រឹត្តិការណ៍ និងព័ត៌មាន
ចែករំលែក
  • Mar 26, 2019 |
  • 6 ឆ្នាំមុន |
  • 3.3K មើល

អត្ថបទដែលជាទីចាប់អារម្មណ៍ប្រចាំខែកុម្ភៈ

មិនខុសពីការចេញផ្សាយនៅរៀងរាល់ខែឡើយ ហេលស៍ថាម ប្រូ នៅតែបន្តផ្សព្វផ្សាយចំណេះដឹងសុខភាពជាច្រើន ដែលជាការបកស្រាយពីវេជ្ជបណ្ឌិតជំនាញ ក្រុមអ្នកនិពន្ធ ក៏ដូចជាការចូលរួមចែករំលែកពីអ្នកប្រកបវិជ្ជាជីវសុខាភិបាល។ ចំណែកសម្រាប់ខែ កុម្ភៈនេះ កំណើនអ្នកអានក៏នៅតែមានចំនួនច្រើន ដែលអត្ថបទ ៣ខាងក្រោម បានទទួលចំណាប់អារម្មណ៍ច្រើនជាងគេរួមមាន៖ ១. អ្នកអាចកំពុងមានដុំសាច់ក្នុងខួរក្បាលឬ? ដុំសាច់ខួរក្បាល ឬភាសាបច្ចេកទេស ហៅថា Brain Tumors គឺជាដុំដុះមិនធម្មតានៅក្នុងប្រអប់ខួរក្បាល ដែលរួមមានប្រមាណ ១៥០ ប្រភេទ ប៉ុន្តែជាក់ស្តែងវាត្រូវបានបែងចែកជា ២ ប្រភេទធំៗគឺ ដុំសាច់ដែលកើតឡើងដោយឯកឯង (Primary Brain Tumors) ដែលមានប្រភពពីកោសិកាណាមួយនៃខួរក្បាលខ្លួនឯងផ្ទាល់ និងដុំសាច់ដែលមានប្រភពមកពីការរាលដាលនៃសរីរាង្គមហារីកផ្សេងទៀតរបស់រាងកាយ (Metastatic Brain Tumors)។ ប្រភេទនៃដុំសាច់ខួរក្បាលកើតឡើងដោយខ្លួនឯងមាន ២ប្រភេទ គឺប្រភេទកាច និងប្រភេទស្លូត អាចកើតមកពីក្រពេញនៅក្នុងខួរក្បាល ហើយមួយចំនួនទៀតកើតចេញពីកោសិកាប្រព័ន្ធប្រសាទខួរក្បាល ឬពីកោសិកាស្រោមខួរក្បាល  និងកោសិកានៅជុំវិញខួរក្បាលតែម្តង នេះបើយោងទៅតាមការបកស្រាយរបស់  វេជ្ជបណ្ឌិតស៊ឹម សុខចាន់ ឯកទេសវះកាត់ប្រព័ន្ធប្រសាទគ្លីនិកក្ដីសង្ឃឹមនៃយេរ៉េម៉ា និងជាសមាជិកអន្តរជាតិនៃសមាគមវះកាត់ប្រព័ន្ធប្រសាទសហរដ្ឋអាមេរិក។ កាន់តែស៊ីជម្រៅលើបញ្ហានេះ សូមអានបន្ថែម៖ http://healthtime.tips/library/article/1853  ២. កូនកណ្តុររីកធំអាចជាសញ្ញានៃជំងឺមហារីក វេជ្ជបណ្ឌិត ប៊ុនប៉ា ប៉ូលី ឯកទេសបញ្ចាំងកាំរស្មី ជំងឺមហារីក និងជំងឺឈាមនៃមជ្ឈមណ្ឌលជាតិប្រឆាំងជំងឺមហារីក មន្ទីរពេទ្យកាល់ម៉ែត បានឲ្យនិយមន័យមហារីកកូនកណ្តុរ ឬភាសាបច្ចេកទេសហៅថា Lymphoma ជាប្រភេទជំងឺមហារីកដែលកើតមានផ្ទាល់នៅលើកោសិកាកូនកណ្តុរ ខុសពីការរាលដាលនៃជំងឺមហារីករបស់សរីរាង្គណាមួយមកលើកូនកណ្ដុរ។ ជំងឺនេះត្រូវបានគេបែងចែកជា ២ ប្រភេទធំៗគឺ ជំងឺមហារីកកូនកណ្តុរប្រភេទ Hodgkin (Hodgkin’s Lymphoma) និង Non-Hodgkin (Non-Hodgkin’s Lymphoma) ដែលបែងចែកជាប្រភេទបេ(B) និងប្រភេទតេ(T)។ ស្វែងយល់បន្ថែមពីជំងឺនេះបន្ថែមតាមរយៈ៖ http://healthtime.tips/library/article/1849  ៣. អ្វីខ្លះជាប្រភេទនៃការវះកាត់សម្រាប់ព្យាបាលជំងឺមហារីក? ជំងឺមហារីកដែលច្រើនតម្រូវឲ្យព្យាបាលដោយការវះកាត់គឺរាល់ដុំមហារីកទាំងឡាយណានៅលើសរីរាង្គ ដែលអាចដំណើរការដោយវិធីសាស្រ្តនេះបាន និងដុំមហារីកដែលមិនទាន់រាលដាលទៅកន្លែងផ្សេងទៀត រួមមាន មហារីកបំពង់អាហារ មហារីកក្រពះ មហារីកពោះវៀនតូច ឬធំ មហារីកសួត មហារីកសុដន់ មហារីកក្រពេញដៃស្បូន មហារីកស្បូន និងមហារីកលើសរីរាង្គផ្សេងៗទៀត។ ក្នុងចំណោមមហារីកទាំងនេះគឺស្ទើរតែទាំងអស់អាចធ្វើការវះកាត់ព្យាបាលបាននៅប្រទេសកម្ពុជា ក្នុងកម្រិតស្តង់ដាដូចទៅនឹងបរទេស (Oncological surgery standard) ផងដែរ។ ដោយឡែក​​ ចំពោះជំងឺមហារីកដែលមិនតម្រូវឲ្យធ្វើការព្យាបាលដោយការវះកាត់រួមមានមហារីកគ្រាប់ឈាម (Leucemia) មហារីកប្រព័ន្ធទឹករងៃ ឬមហារីកកូនកណ្តុរ (Lymphoma) និងមហារីកដែលកើតនៅលើសរីរាង្គជ្រៅ មិនអាចធ្វើការវះកាត់បាន នេះបើយោងទៅតាមប្រសាសន៍របស់ វេជ្ជបណ្ឌិត ឆាយ រស្មី ឯកទេសវះកាត់ប្រព័ន្ធរំលាយអាហារ និងមហារីកប្រព័ន្ធរំលាយអាហារនៃមន្ទីរពេទ្យមិត្តភាពខ្មែរ-សូវៀត។ ចង់ដឹងពីប្រភេទនៃការវះកាត់ សូមចូលទៅកាន់៖ http://healthtime.tips/library/article/1862  ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

អត្ថបទប្រចាំខែ
ចែករំលែក
  • Mar 26, 2019 |
  • 6 ឆ្នាំមុន |
  • 3K មើល

អត្ថបទទាក់ទាញបំផុតប្រចាំខែមករា

ការកើនឡើងនូវប្រភេទអត្ថបទជាច្រើនសម្រាប់ជម្រើសរបស់មិត្តអ្នកអានទាំងអត្ថបទពីក្រុមអ្នកនិពន្ធក៏ដូចជាអត្ថបទដែលមានការចូលរួមចែករំលែកពីអ្នកប្រកបវិជ្ជាជីវសុខាភិបាល និងសាធារណជន កាន់តែប្លែក និងគួរឲ្យចាប់អារម្មណ៍។ ជាក់ស្តែង សម្រាប់ខែមករានេះ សង្កេតឃើញថាកំណើននៃការចូលអានអត្ថបទច្រើនទ្វេដង ហើយប្រភេទអត្ថបទ៣ដែលមានភាពទាក់ទាញបំផុត រួមមាន៖ ១. ការត្រៀមខ្លួនមុនពេលចាប់ផ្តើមមានផ្ទៃពោះ ការចាប់ផ្តើមបង្កើតគ្រួសារដ៏តូចមួយមិនមែនជារឿងងាយស្រួល ហើយធ្វើបានភ្លាមៗនោះទេ។ អនាគតមាតាបិតា ឬមាតាបិតាគ្រប់រូបត្រូវធ្វើការត្រៀមខ្លួនក្នុងរយៈពេលកំណត់មួយតាមការណែនាំ។ បើតាមការលើកឡើងរបស់វេជ្ជបណ្ឌិត យូ ម៉ូលីន ឯកទេសសម្ភព និងរោគស្ត្រីនៃមជ្ឈមណ្ឌលជាតិគាំពារមាតា និងទារក ការត្រៀមខ្លួនចាប់ផ្តើមមានផ្ទៃពោះស្ត្រីគ្រប់រូបត្រូវត្រួតពិនិត្យរាងកាយ ឬធ្វើតេស្តនានា និងទទួលទានសារធាតុបំប៉នបន្ថែមឲ្យបានគ្រប់គ្រាន់... ចង់ដឹងថាតេស្ត និងសារធាតុបំប៉នណាខ្លះសូមអានបន្ថែម៖ http://healthtime.tips/library/article/1827 ២. តើខ្ញុំមានជំងឺប្រកាំងឬ? បុរសអាយុ២៣ឆ្នាំម្នាក់តែងមានអាការៈឈឺក្បាល គេងមិនសូវលក់ និងហេវហត់ ជាខ្លាំង ហើយតែងតែស្វែងរកការព្យាបាលដោយការប្រើថ្នាំឈឺក្បាល ឬផ្តាសាយ។ គាត់ឆ្ងល់អំពីអាការៈនេះ មិនដឹងត្រូវព្យាបាលបែបណាទើបមានប្រសិទ្ធភាព និងសង្ស័យថាជាជំងឺប្រកាំង។ ករណីនេះត្រូវបានបកស្រាយយ៉ាងក្បោះក្បាយពីសាស្ត្រាចារ្យ វេជ្ជបណ្ឌិត ជុំ ណាវុធ ឯកទេសប្រព័ន្ធសរសៃប្រសាទសរសៃឈាមខួរក្បាល នាយផ្នែកសរសៃប្រសាទខួរក្បាលា នៃមន្ទីរពេទ្យមិត្តភាពខ្មែរ-សូវៀត.. ចង់ដឹងថាជាករណីអ្វីឲ្យពិតប្រាកដ សូមចូលទៅកាន់៖ http://healthtime.tips/library/article/1819 ៣. វិធីសាស្ត្រជួយអ្នកឲ្យសម្រេចក្តីប្រាថ្នាដោយជោគជ័យសម្រាប់ឆ្នាំថ្មី បំណងប្រាថ្នាឆ្នាំថ្មី ដែលគ្រប់គ្នាតែងនិយាយថា New Year Resolution គឺជាបំណងប្រាថ្នាដែលយើងចង់ធ្វើវាយូរហើយ តែធ្វើមិនបាន ឬមិនបានធ្វើតែម្តង។ វាអាចជាបំណងដែលសល់ពីឆ្នាំចាស់ ឬបំណងថ្មីៗទើបនឹងកើតក្នុងចិត្តយើងគ្រប់គ្នា ប៉ុន្តែសួរថាវាសំខាន់អត់? គួរតែមានឬអត់? ចម្លើយគឺវាអាស្រ័យលើខ្លួនអ្នកហ្នឹងហើយ... ប្រសិនអ្នកមិនច្បាស់ ឬចង់សម្រេចក្តីប្រាថ្នាទាំងនោះតំណភ្ជាប់នេះនឹងជួយអ្នកបាន៖ http://healthtime.tips/library/article/1818 ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

អត្ថបទប្រចាំខែ
ចែករំលែក
Top